“Pakamaayuha si Jehova, O Kalag Ko”

“ANG nagligad lang nga binulan ang akon ministeryo nangin makatalaka kag indi makalilipay,” siling ni Nan­cy.a Sa sulod na sang mga napulo ka tuig, nagaalagad sia subong isa ka payunir, isa ka bug-os tion nga manugbantala sing maayong balita. Apang, sia nagdugang: “Wala ko maluyagi ang nagakatabo sa akon. Daw wala ako sing kapagsik kag indi tinagipusuon kon ginapresentar ko ang mensahe sang Ginharian. Ano ang himuon ko?”

Binagbinaga man ang kahimtangan ni Keith, isa ka gulang sa isa ka kongregasyon sang mga Saksi ni Jehova. Nakibot gid sia sang magsiling ang iya asawa: “Siguro lain ang imo ginapamensar. Sa pangamuyo mo bag-o lang, nagpasalamat ka para sa pagkaon, bisan pa indi tion sang tigkalaon!” Si Keith nagbaton: “Nakita ko nga ang akon pangamuyo daw wala na sing balatyagon.”

Wala sing duhaduha, indi mo luyag nga ang imo pagpahayag sing pagdayaw kay Jehova nga Dios mangin malas-ay kag pakulahaw. Sa kabaliskaran, luyag mo nga ini mangin tinagipusuon, nga resulta sang pagkamapinasalamaton. Apang, ang isa ka balatyagon indi mahimo nga sul-ubon ukon ubahon kaangay sang panapton. Dapat ini maggikan sa sulod mismo sang tawo. Paano ang isa mangin mapinasalamaton sing tinagipusuon? Ang ika-103 sang Salmo nagahatag sa aton sing paghantop nahanungod sini.

Ginsulat ni Hari David sang dumaan nga Israel ang ika-103 sang Salmo. Ginsugdan niya ini sa pinamulong: “Pakamaayuha si Jehova, O kalag ko, bisan ang tanan sa sulod nakon, ang iya balaan nga ngalan.” (Salmo 103:⁠1) “Ang tinaga nga pakamaayuhon, subong ginaaplikar sa Dios,” siling sang isa ka reperensia, “nagakahulugan sing pagdayaw, nga nagapahangop pirme sing mabaskog nga balatyagon para sa iya subong man sing pagpasalamat.” Bangod sang handum nga dayawon si Jehova upod ang tagipusuon nga puno sing gugma kag pagpasalamat, ginpalig-on ni David ang iya mismo kalag—ang iya kaugalingon—nga ‘pakamaayuhon si Jehova.’ Apang ano ang nagpahulag sining mahigugmaon nga balatyagon sa tagipusuon ni David para sa Dios nga iya ginasimba?

Si David nagpadayon: “Indi pagkalimti ang tanan niya [ni Jehova] nga binuhatan.” (Salmo 103:2) Ang pagkamapinasalamaton kay Jehova maathag nga naangot sa pagpamalandong sing mainapresyahon sa ‘iya mga binuhatan.’ Ano gid ang mga binuhatan ni Jehova nga ginahunahuna ni David? Ang pagtulok sa mga tinuga ni Jehova nga Dios, subong sang puno-sing-bituon nga kalangitan sa masinaw nga kagab-ihon, makapuno gid sa tagipusuon sing pagpasalamat sa Manunuga. Ang puno sing mga bituon nga kalangitan nagtandog gid kay David. (Salmo 8:3,4; 19:1) Apang, sa ika-103 sang Salmo, ginadumdom ni David ang tuhay nga hinimuan ni Jehova.

Si Jehova “Nagapatawad sang Tanan Mo nga Kasaypanan”

Sa sini nga salmo, ginaasoy ni David ang mga buhat sang mahigugmaon nga kaayo sang Dios. Nagapatuhoy sa pinakalabaw sa sini, sia nag-amba: ‘Si Jehova nagapatawad sang tanan mo nga kasaypanan.’ (Salmo 103:3) Nahibaluan gid ni David ang iya makasasala nga kahimtangan. Sang ginsuknaan sia ni Natan nga manalagna tuhoy sa iya makihilahion nga kaangtanan kay Bat-seba, si David nagbaton: “Batok sa imo [Jehova], sa imo lamang, nakasala ako, kag nakahimo ako sing malaut sa imo itutulok.” (Salmo 51:4) Upod ang buong nga tagipusuon, nagpakiluoy sia: “Kaluuyi ako, O Dios, suno sa imo mahigugmaon nga kaayo. Suno sa imo bugana nga kaluoy panasa ang akon mga paglapas. Hugasi ako sing maayo gikan sa akon kasaypanan, kag tinlui ako gikan sa akon sala.” (Salmo 51:1, 2) Mapinasalamaton gid si David bangod ginpatawad sia! Bangod dihimpit, nakahimo sia sing iban pa nga mga sala sa iya kabuhi, apang naghinulsol sia, nagbaton sing pagsabdong, kag nagtadlong sang iya mga dalanon. Ang pagpamalandong sa dalayawon nga mga buhat sang kaayo sang Dios sa iya nagpahulag kay David nga pakamaayuhon si Jehova.

Indi bala makasasala man kita? (Roma 5:12) Bisan si apostol Pablo nagpanalabiton: “Nagakalipay gid ako sa kasuguan sang Dios suno sa akon pagkatawo sa sulod, apang nakita ko sa akon mga bahin ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa akon mga bahin. Kailo ako nga tawo! Sin-o ang magaluwas sa akon gikan sa lawas nga nagaagom sining kamatayon?” (Roma 7:22-24) Mapinasalamaton gid kita nga wala ginaisip ni Jehova ang aton mga paglapas! Nalipay sia nga panason ini kon kita maghinulsol kag magpangayo sing patawad.

Ginpahanumdom ni David ang iya kaugalingon: “[Si Jehova] nagaayo sang tanan mo nga balatian.” (Salmo 103:3) Bangod ang pag-ayo isa ka buhat sang pagpasag-uli, wala lamang ini nagalakip sang pagpatawad sa kasal-anan. Nagalakip ini sa pagdula sang “mga balatian”—ang malain nga mga resulta sang aton sayop nga mga dalanon. Sa bag-ong kalibutan nga iya paluntaron, dulaon gid ni Jehova ang tanan nga pisikal nga resulta sang sala, subong sang balatian kag kamatayon. (Isaias 25:8; Bugna 21:1-4) Apang, bisan karon, ginaayo sang Dios ang aton espirituwal nga mga balatian. Para sa iban, nagalakip ini sa natublag nga konsiensia kag naguba nga kaangtanan sa iya. “Indi pagkalimti” ang nahimo na ni Jehova sa tagsa sa aton sing personal tuhoy sini.

Sia “Nagatubos sang Imo Kabuhi”

“[Si Jehova] nagatubos sang imo kabuhi gikan sa buho,” amba ni David. (Salmo 103:4) “Ang buho” amo ang kinaandan nga lulubngan sang katawhan—ang Sheol, ukon Hades. Bisan antes pa sia nangin hari sa Israel, nasapwan ni David ang iya kaugalingon nga yara sa katalagman sang kamatayon. Halimbawa, ginpalambo ni Hari Saul sang Israel ang makamamatay nga dumot kay David kag gintinguhaan nga patyon sia sa madamo nga higayon. (1 Samuel 18:9-29; 19:10; 23:6-29) Luyag man patyon sang mga Filistinhon si David. (1 Samuel 21:10-15) Apang sa tagsa ka higayon, ginluwas sia ni Jehova gikan sa “buho.” Pat-od nga mapinasalamaton gid si David kon madumduman niya ining binuhatan ni Jehova!

Kamusta naman ikaw? Ginasakdag ka bala ni Jehova sa tion sang kapung-aw ukon sa tion sang kadulaan? Ukon may nahibaluan ka bala nga mga hitabo nga ginluwas niya ang kabuhi sang iya matutom nga mga Saksi gikan sa buho sang Sheol sa aton tion? Ayhan natandog ka sa pagbasa sing mga kasaysayan tuhoy sa iya mga buhat sang pagluwas sa mga pahina sining magasin. Ngaa indi ka maghinguyang sing tion sa pagpamalandong sa sining binuhatan sang matuod nga Dios? Kag, sa pagkamatuod, tanan kita may rason nga mangin mapinasalamaton kay Jehova tungod sang paglaum nga pagkabanhaw.—Juan 5:28,29; Binuhatan 24:15.

Si Jehova nagahatag sa aton sing kabuhi kag sing butang nga nagahimo sini nga makalilipay kag takus gid ikabuhi. Ang salmista nagasiling nga ang Dios “nagapurongpurong sa imo sing mahigugmaon nga kaayo kag kaluoy.” (Salmo 103:4) Sa tion nga kita nagakinahanglan, wala kita ginapabay-an ni Jehova kundi ginabuligan kita paagi sa iya kitaon nga organisasyon kag sa gintangdo nga mga gulang, ukon mga manugbantay, sa kongregasyon. Nagabulig ini sa aton nga maatubang ang mabudlay nga kahimtangan nga wala nagadula sang aton pagtahod sa kaugalingon kag dignidad. Ginaatipan gid sang Cristianong mga manugbantay ang mga karnero. Ginapalig-on nila ang mga nagabalatian kag napung-awan kag ginahimo ang tanan nga masarangan nila agod mapasag-uli ang mga napukan. (Isaias 32:1, 2; 1 Pedro 5:2, 3; Judas 22,23) Ginapahulag sang espiritu ni Jehova ining mga manugbantay nga mangin maawaon kag mahigugmaon sa panong. Ang iya “mahigugmaon nga kaayo kag kaluoy” kaangay gid sa isa ka purongpurong nga nagapuni sa aton kag nagahatag sa aton sing dignidad! Wala gid ginakalimtan ang iya mga binuhatan, pakamaayuhon naton si Jehova kag ang iya balaan nga ngalan.

Nagapadayon sa iya paglaygay sa kaugalingon, ang salmista nga si David nag-amba: “[Si Jehova] nagapaayaw sang imo kabuhi sing maayo nga mga butang; ang imo pagkapamatan-on padayon nga nagabag-o kaangay sang agila.” (Salmo 103:5) Ang kabuhi nga ginahatag ni Jehova makaalayaw kag makalilipay. Ti, ang ihibalo tuhoy sa kamatuoran mismo isa ka bahandi nga indi mapaanggid kag isa ka tuburan sang daku nga kalipay! Kag binagbinaga lamang kon daw ano ka makaalayaw ang hilikuton nga ginhatag ni Jehova sa aton, nga amo ang pagbantala kag paghimo sing mga disipulo. Daw ano ka makalilipay nga makasalapo sing isa nga interesado sa pagtuon tuhoy sa matuod nga Dios kag sa pagbulig sa sinang isa nga makilala si Jehova kag mapakamaayo sia! Apang, may mamati man ukon wala sa aton lugar, isa ka daku nga pribilehiyo nga makapakigbahin kita sa hilikuton may kaangtanan sa pagpakabalaan sa ngalan ni Jehova kag sa pagbindikar sang iya pagkasoberano.

Samtang nagapadayon sa hilikuton sang pagbantala sang Ginharian sang Dios, sin-o bala ang wala ginakapoy ukon ginalapyo? Apang padayon nga ginabag-o ni Jehova ang kusog sang iya mga alagad, nagahimo sa ila nga ‘kaangay sang mga agila’ nga may mabaskog nga mga pakpak kag makatimbuok sing mataas katama sa kalangitan. Mapinasalamaton gid kita nga ang aton mahigugmaon langitnon nga Amay nagahatag sa aton sing “dinamiko nga kusog” agod nga matuman naton sing matutom ang aton ministeryo sa adlaw-adlaw!—Isaias 40:29-31.

Sa pag-ilustrar: Si Clara may bug-os-tion nga sekular nga trabaho kag nagahinguyang man sing 50 ka oras kada bulan sa ministeryo sa latagon. Sia nagsiling: “Kon kaisa kapoy na ako, kag ginapilit ko lamang ang akon kaugalingon nga magguwa sa pag-alagad sa latagon bangod may gintug-anan ako nga magpanghikot upod sa iya. Apang sa tion nga yara na ako sa latagon, pirme ako nagapagsik.” Ayhan naeksperiensiahan mo man ang kapagsik nga resulta sang pagsakdag sang Dios sa Cristianong ministeryo. Kabay nga mapahulag ka man sa pagsiling, subong ni David sa nagabukas nga pinamulong sining salmo: “Pakamaayuha si Jehova, O kalag ko, bisan ang tanan sa sulod nakon, ang iya balaan nga ngalan.”

Si Jehova Nagaluwas sang Iya Katawhan

Ang salmista nag-amba man: “Si Jehova nagahimo sing mga buhat sang pagkamatarong kag sing mga paghukom para sa tanan nga ginalimbungan. Ginpakilala niya ang iya mga dalanon kay Moises, ang iya mga pagpakig-angot sa mga anak sang Israel.” (Salmo 103:6,7) Mahimo gid nga ginahunahuna ni David ang ‘limbong’ sa mga Israelinhon sa idalom sang mga manugpigos sa Egipto sang mga adlaw ni Moises. Mahimo nga ang pagpamalandong sa kon paano ginpakilala ni Jehova ang iya mga paagi sa pagluwas kay Moises nagpalambo sing pagkamapinasalamaton sa tagipusuon ni David.

Mapahulag man kita nga mangin mapinasalamaton paagi sa pagpamalandong sa mga pagpakig-angot sang Dios sa mga Israelinhon. Apang indi naton dapat pagpatumbayaan ang pagpamalandong sa mga eksperiensia sang modernong-adlaw nga mga alagad ni Jehova, subong sang mga ginsambit sa kapitulo 29 kag 30 sang libro nga Jehovah’s Witnesses—Proclaimers of God’s Kingdom. Ang mga kasaysayan nga ginsulat sa sini kag sa iban pa nga mga publikasyon sang Watch Tower Society nagabulig sa aton nga makita kon paano ginabuligan ni Jehova ang iya katawhan sa karon agod mabatas ang pagkabilanggo, pagpanggamo sang akig nga mga grupo, mga pagdumili, mga kampo konsentrasyon, kag mga kampo sang pilit nga pagpatrabaho. May mga pagtilaw sa nagainaway nga mga pungsod, subong sang Burundi, Liberia, Rwanda, kag ang anay Yugoslavia. Kon matabo ang paghingabot, ang kamot ni Jehova pirme nagasakdag sa iya matutom nga mga alagad. Ang pagbinagbinag sining mga buhat sang aton dakung Dios, nga si Jehova, makabulig sa aton kon paano nga ang pagpamalandong sa kasaysayan sang pagluwas gikan sa Egipto nakabulig kay David.

Binagbinaga man kon daw ano ka mapinalanggaon nga ginaluwas kita ni Jehova gikan sa lulan sang sala. Gin-aman niya “ang dugo ni Cristo” agod ‘tinluan ang aton konsiensia gikan sa patay nga mga buhat.’ (Hebreo 9:14) Kon maghinulsol kita sa aton mga sala kag magpangayo sing patawad pasad sa ginpatulo nga dugo ni Cristo, ginapahilayo sang Dios sa aton ang aton mga kalapasan—“subong sang kalayuon sang sidlangan sa katundan”—kag ginapasag-uli kita sa iya pabor. Kag hunahunaa ang mga aman ni Jehova paagi sa Cristianong mga miting, makapalig-on nga pagpakig-upod, mga manugbantay sa kongregasyon, kag pasad sa Biblia nga mga publikasyon nga ginabaton naton paagi sa “matutom kag mainandamon nga ulipon.” (Mateo 24:45) Wala bala ining tanan nga binuhatan ni Jehova nagabulig sa aton nga mapabakod ang aton kaangtanan sa iya? Si David nagsiling: “Si Jehova maluluy-on kag maayo sing buot, makuli sa pagpangakig kag bugana sa mahigugmaon nga kaayo. . . . Wala sia nagahimo sa aton suno sa aton mga sala; ukon nagabalos sa aton suno sa aton mga kasaypanan nga nagakabagay sa aton.” (Salmo 103:8-14) Ang pagpamalandong sa mahigugmaon nga pag-atipan ni Jehova makapahulag gid sa aton nga himayaon sia kag pakabalaanon ang iya balaan nga ngalan.

“Pakabalaana si Jehova, Tanan Kamo nga Iya Binuhatan”

Kon ipaanggid sa pagkadimamalatyon ni Jehova, ang “Dios sa walay katubtuban,” ang “mga adlaw” sang “mamalatyon nga tawo” malip-ot gid—“kaangay sang berde nga mga hilamon.” Apang si David mainapresyahon nga nagsiling: “Ang mahigugmaon nga kaayo ni Jehova kutob sa tion nga walay latid tubtob sa tion nga walay latid sa mga nagakahadlok sa iya, kag ang iya pagkamatarong tubtob sa mga anak sang mga anak, sa mga nagahupot sang iya katipan kag sa mga nagadumdom sang iya mga sugo sa pagtuman sini.” (Genesis 21:33, footnote; Salmo 103:15-18) Wala ginakalimtan ni Jehova ang mga nagakahadlok sa iya. Sa gintalana nga tion, hatagan niya sila sing kabuhi nga walay katapusan.—Juan 3:16; 17:3.

Nagapahayag sang iya apresasyon sa paggahom ni Jehova, si David nagsiling: “Si Jehova mismo nagpatok sing malig-on sang iya trono sa kalangitan; kag ang iya ginharian nagagahom sa tanan.” (Salmo 103:19) Bisan pa ang pagginahom ni Jehova kitaon nga ginpahayag anay sa pila ka tion paagi sa ginharian sang Israel, ang iya trono didto mismo sa langit. Bangod sang iya Pagkamanunuga, si Jehova amo ang Soberano nga Manuggahom sang uniberso kag ginahimo niya ang iya balaan nga kabubut-on sa langit kag sa duta suno sa iya mga katuyuan.

Ginapalig-on pa gani ni David ang langitnon nga mga anghel. Sia nag-amba: “Pakamaayuha si Jehova, O kamo nga iya mga anghel, nga gamhanan sa kusog, nga nagatuman sang iya pulong, paagi sa pagpamati sa tingog sang iya pulong. Pakamaayuha si Jehova, tanan kamo nga iya kasuldadusan, kamo nga iya mga ministro, nga nagahimo sang iya kabubut-on. Pakamaayuha si Jehova, tanan kamo nga iya binuhatan, sa tanan nga duog nga iya ginagamhan. Pakamaayuha si Jehova, O kalag ko.” (Salmo 103:20-22) Indi bala dapat nga ang aton pagpamalandong sa mga buhat sang mahigugmaon nga kaayo ni Jehova sa aton magapahulag man sa aton nga pakamaayuhon sia? Sing pat-od gid! Kag mapat-od naton nga ang aton tingog sa pagdayaw kay Jehova sing personal indi madula sa tunga sang mabaskog nga ambahan sang mga dumalayaw nga nagalakip bisan sa matarong nga mga anghel. Kabay nga dayawon naton sing tinagipusuon ang aton langitnon nga Amay, nga pirme nagahambal sing maayo tuhoy sa iya. Sa pagkamatuod, tumanon naton ang pinamulong ni David, “Pakamaayuha si Jehova, O kalag ko.”

[Footnote]

[Laragway sa pahina 23]

Ginpamalandungan ni David ang mga buhat sang mahigugmaon nga kaayo ni Jehova. Ikaw man bala?