Determinado sa Pag-alagad kay Jehova sa Bug-os nga Tagipusuon

‘Alagda sia sa bug-os nga tagipusuon kag sa malipayon nga kalag; kay ginausisa ni Jehova ang tanan nga tagipusuon, kag ginahangop niya ang tanan nga hunahuna.’—1 CRONICA 28:9.

 1. Anong mga pamangkot ang ginapautwas sang 1 Cronica 28:9?

ANG kasulatan nga nabalikwat sa ibabaw nagapautwas sing pila ka pamangkot nahanungod sa tagipusuon. Kon nagapatuhoy ini sa pisikal nga tagipusuon, paano mabuhi ang isa ka tawo kon indi kompleto ang tagipusuon? Halimbawa, may mabuhi bala nga tunga ang tagipusuon? Si Jehova bala, subong sang espesyalista sa tagipusuon karon, nagausisa sa pisikal nga tagipusuon agod mangita sing mga depekto? Tuhoy sa huyog sang mga panghunahuna, nagapuyo bala ang mga panghunahuna sa aton tagipusuon? Daw amo sini ang ginasiling sang iban nga reperensya sang Biblia, nagahambal tuhoy sa ‘huyog sang mga hunahuna sang tagipusuon.’ (Genesis 6:5; 1 Cronica 29:18) Ginausisa bala ni Jehova ang aton pisikal nga tagipusuon agod mahantop ang aton mga panghunahuna? Ano gid ang kahulugan sang ‘pag-alagad sa iya sa bug-os nga tagipusuon’?

 2. Ano ang mga pagpati sang dumaan nga mga Egiptohanon, mga Babilonianhon, kag sang Griegong pilosopo nga si Aristotle nahanungod sa tagipusuon?

² Ang mga Egiptohanon anay nagapati nga ang pisikal nga tagipusuon amo ang sentro sang intelihensia kag mga emosyon. Naghunahuna man sila nga may kaugalingon ini nga kabubut-on. Ang mga Babilonianhon nagsiling nga ang kinaalam kag gugma yara sa tagipusuon. Ang Griegong pilosopo nga si Aristotle naghunahuna nga amo ini ang sentro sang mga sentido kag puluy-an sang kalag. Apang samtang nagaligad ang tion kag ang ihibalo nagdugang, ining mga pagtamod ginsikway. Sang ulihi ang tagipusuon nakilal-an kon ano gid ang tagipusuon, isa ka bomba agod magpalatay sang dugo sa bug-os nga lawas.

 3. Ano nga mga kamatuoran ang nagahimo sa tagipusuon nga tuman ka makapulunaw?

³ Huo, isa gid ini ka bomba, apang makapulunaw nga bomba, nga matutom nga nagabomba sing mapula nga dugo kada segundo sang aton kabuhi! Dakudaku lang diutay sa aton inumol, nagabug-at sing kubos sa isa ka onsa, ang tagipusuon sang tawo nagapitik sing 100,000 ka beses kada adlaw, nga nagabomba sing dugo sang kabuhi sa bug-os nga 60,000 ka milya nga kaugatan sang lawas—mga 2,000 ka galon kada adlaw, tignapulo ka milyon ka galon sa bug-os nga pagkabuhi.a Ang pagpitik sang tagipusuon nagaumpisa paagi sa konsentrasyon sang mga selula nga amo ang pacemaker sini, nagapadala sing elektrikal nga reaksion nga amo ang nagakontrol sang kadasigon sang pitik sang tagipusuon. Wala sing maskulo sang lawas nga nagapangabudlay sing labi ka lakas, labi kalawig, labi ka dalayon, sa tinuigtuig, sang sa tagipusuon. Sa tion sang mahuol nga emosyon ukon lakas nga pag-ehersisyo ang pagbomba sang tagipusuon nagadugang sing lima ka pilo. Kuhaa ang tagipusuon gikan sa dughan kag magapadayon pa ini sa pagpitik sa pila ka tion. Bisan ang selula nga ginkuha sa tagipusuon, sa idalom sang maayong mga kahimtangan, magapadayon sa pagpitik. Ang utok lamang ang nagakinahanglan sing kapin nga pagkaon kag oksiheno sang sa tagipusuon.

4, 5. (a) Anong mga kinaiya ang ginapatuhoyan sang Kasulatan sa tagipusuon? (b) Suno sa Kasulatan, anong mga emosyon kag mga katuyoan ang nagapuyo sa tagipusuon?

⁴ Halos isa ka libo ka beses nga ginasambit ang tagipusuon sa Pulong sang Dios. Ang pila sini nagapatuhoy sa literal nga tagipusuon. Ang iban pa nagapatuhoy sa sentro ukon tungatunga sang isa ka butang, subong sang “sa tagipusuon sang dagat” kag “sa tagipusuon sang duta.” (Ezequiel 27:25-27; Mateo 12:40) Apang, sa halos isa ka libo pa ka reperensya, ang tagipusuon ginagamit sing malaragwayon. Ang Theological Dictionary of the New Testament ni Kittel nagalista sing madamong kasulatan sa idalom sang “tagipusuon” para sa tagsatagsa sang masunod nga tig-ulo: “Sa tagipusuon nagapuyo ang mga balatyagon kag mga emosyon, mga handum kag mga kailigbon.” “Ang tagipusuon amo ang sentro sang paghangop, ang tuburan sang panghunahuna kag pagbinagbinag.” “Ang tagipusuon amo ang sentro sang kabubut-on, ang tuburan sang mga desisyon.” “Sa amo ang tagipusuon amo ang sentro sang tawo nga ginatan-aw sang Dios, nga ginahalinan sang relihioso nga kabuhi, nga nagapamat-od sang moral nga paggawi.”

⁵ Ang mga emosyon kag mga tinutuyo nagapuyo sa sining malaragwayon nga tagipusuon. Suno sa madamo nga kasulatan, ang tagipusuon mahimo nga masadya, masubo, madulom, masanagan, madulaan sing paglaum, masinaligon, matalaw, matig-a. Mahimo ini mag-init sa kaakig ukon matunaw sa kahadlok, bugalon kag hambog ukon malum-ok kag mapainubuson, mahigugmaon ukon puno sing dumot, putli kag matinlo ukon nakasala sing panghilahi. May huyog ini sa paghimo sing kalautan, apang makatiklod ini sa aton sa paghimo sing maayo.

Likawi ang Tunga nga Tagipusuon Ukon Doble nga Tagipusuon

6, 7. (a) Ano nga sahi sang mga tawo ang gindumtan sang salmista, kag paagi sa anong mga buhat sang Israel kag Juda gin-ilustrar ini nga kahimtangan? (b) Paano gin-ilustrar ni Jesus nga ang maduhaduhaon nga pag-alagad kay Jehova indi kalahamut-an?

⁶ Ang literal nga tagipusuon dapat mangin bug-os agod makapanghikot, apang ang malaragwayon nga tagipusuon mahimo matunga. Ang salmista, isa ka tawo nga diosnon, nagsulat sa idalom sang inspirasyon: “Ginadumtan ko ang mga maduhaduhaon [tunga nga tagipusuon].” (Salmo 119:113) Lakip sa sini amo ang mga Israelinhon anay nga ginhangkat ni Elias, nga nagasiling: “Tubtob pa bala san-o magpiniang kamo sa tunga sang duha ka magkatuhay nga panghunahuna? Kon si Jehova amo ang matuod nga Dios, sunda sia; apang kon si Baal, nian sunda sia.” (1 Hari 18:21) Bangod maduhaduhaon, ‘nagpiniang sila sa tunga sang duha ka panghunahuna.’

⁷ Sing kaanggid, sa tapos sang indi pa bug-os nga pagpanumbalik sang Juda kay Jehova, ginrekord ini: “Walay sapayan, ang katawhan naghalad pa sa mataas nga mga duog; apang kay Jehova lamang nga ila Dios.” (2 Cronica 33:17) Upod ang natunga nga tagipusuon, nagapangangkon sila nga nagasimba kay Jehova apang sa isa ka paagi nga wala ginsugo kag sa mga duog diin ginasimba nila anay si Baal. Si Jesus nagsiling: “Wala sing tawo nga makaalagad sa duha ka agalon.” (Mateo 6:24) Sadto nga mga adlaw ang mga ulipon kaangay sang isa ka propiedad. Nagaalagad sila sa ila agalon sing 24 ka oras kada adlaw. Ang ila tion indi matunga sa ulot sang duha ka agalon—tunga sa isa kag ang katunga sa isa naman. Amo ini ang punto ni Jesus: wala sing hapaw (tunga nga tagipusuon) nga pagsimba kay Jehova!

 8. Sa malaragwayon nga paghambal, paano mangin duha ang tagipusuon sang isa ka tawo, kag ano nga kasulatan ang nagapakita sini?

⁸ Ang tagsa ka tawo may isa lamang ka literal nga tagipusuon, apang, sa malaragwayon nga paghambal, ang isa ka tawo mahimo nga makatigayon sing duha ka tagipusuon. Si David nagpatuhoy sa sina nga mga tawo, nga nagasiling: “Paagi sa bibig naghambal sila nga may pagpakunokuno [“may tagipusuon kag tagipusuon,” Ref. Bi., footnote].” (Salmo 12:2) Ang isa ka tagipusuon ginapakita sa publiko, ang isa naman patago nga nagaplano para sa makagud nga kaayohan. Ining duha sing nawong, doble sing tagipusuon nga panagway ginlaragway sa Kasulatan: “Kay suno sa iya ginahunahuna sa sulod niya amo sia. ‘Magkaon kag mag-inum,’ nagasiling sia sa imo, apang ang iya tagipusuon wala sa imo.” “Bisan pa nagapamulong sia sing matahom, dili sia pagpatiha, kay may pito ka kangil-aran sa iya tagipusuon.”—Hulubaton 23:7; 26:25; Salmo 28:3.

 9. Ano ang nagapakita nga ang maduhaduhaon nga pagsimba nagluntad anay sang adlaw ni Jeremias kag sang tion ni Jesus?

⁹ Ina nga pagkasalimpapaw sa pagpakig-angot sang tawo makapasubo, apang kon isab-ug ini sa pagsimba kay Jehova, magaani ini sing kalaglagan. “Dili kamo magsalig sa binutig nga mga pulong, ‘Ang templo ni Jehova, ang templo ni Jehova, ang templo ni Jehova, amo ini sila!’ Yari karon nagasalig kamo sa binutig nga mga pulong—indi gid ini mapuslan. Kamo bala magapangawat, magapatay, magapanglahi, magasumpa sing dimatuod, magasunog sing incienso kay Baal, kag magasunod sa iban nga mga dios nga wala ninyo makilala, kag magakari kag magatindog sa akon atubangan sa sini nga balay nga gintawag sa akon ngalan kag magasiling, ‘Naluwas kami,’ agod nga mahimo ninyo ini tanan nga kangil-aran?” (Jeremias 7:4, 8-10) Ginpakamalaut ni Jesus ang pagkasalimpapaw (doble nga tagipusuon) sang mga escriba kag mga Fariseo, nga nagasiling: “Mga salimpapaw, matuod gid ang gintagna nahanungod sa inyo ni Isaias, sang nagsiling sia, ‘Ining katawhan sa mga bibig nagatahod sa akon, apang ang tagipusuon nila malayo sa akon.’”—Mateo 15:7, 8.

10, 11. Sa diin nagatulok si Jehova kag si Cristo Jesus kon nagahukom sa isa ka tawo, kag ngaa?

¹⁰ Bangod sini maathag kon ngaa si Jehova nagsiling kay Samuel: “Ang Ginuo nagatan-aw indi subong sang pagtan-aw sang tawo, bangod ang tawo nagatulok sa guwa nga dagway; apang si Jehova nagatulok sa tagipusuon.” (1 Samuel 16:7) Busa, kon ginatakus ni Jehova ang tawo, wala ini ginapasad sa naguwa nga pamatuod; ginausisa niya ang tagipusuon gid. Ginpakilala ni Cristo Jesus ang tagipusuon subong amo ang nagapahulag nga kusog sang aton paggawi, maayo ukon malain: “Ang maayo nga tawo nagapaguwa sing maayo gikan sa maayong bahandi sang iya tagipusuon, apang ang malaut nga tawo nagapaguwa sing malaut gikan sa iya malaut nga bahandi; kay gikan sa kabuganaan sang tagipusuon ang iya baba nagapamulong.” Subong man, “Sa tagipusuon nagagikan ang malaut nga mga hunahuna, pagpatay, panglahi, pakighilawas, pangawat, dimatuod nga pagsaksi, pasipala.”—Lucas 6:45; Mateo 15:19.

¹¹ Si Cristo Jesus, nga gintugyanan sang paghukom, nagatulok man sa ginatulok ni Jehova: “Ako ang nagapangusisa sang mga batobato [“pinakamadalom nga mga emosyon,” Ref. Bi., footnote] kag tagipusuon, kag hatagan ko ang tagsa sa inyo suno sa inyo mga buhat.” (Bugna 2:23) Bangod sini, “labi sa tanan nga bantayan mo, bantayi ang imo tagipusuon, kay amo ini ang tuburan sang kabuhi.”—Hulubaton 4:23.

12. Ngaa ang bug-os tagipusuon nga pag-alagad kay Jehova nagakinahanglan sing maukod nga panikasog sa aton bahin?

¹² Ang aton pagsimba kay Jehova indi dapat mangin maduhaduhaon (tunga nga tagipusuon) ukon mapakunokunohon (doble nga tagipusuon), kundi bug-os nga tagipusuon. Nagakinahanglan ini sing maukod nga panikasog sa aton bahin. Ngaa subong? Bangod ang tagipusuon madaya kag malimbungon. Makakululba ang kalantip sini sa pagpakamatarong sang malain nga mga butang nga nagaganyat sa aton napukan nga unod. Samtang mahimo madayaan kita sini kag taguon sa aton ang matuod nga katuyoan sini gikan sa aton, makita sa gihapon ni Jehova ang matuod nga kahimtangan sini. Ginapaandaman niya kita sini, nga nagasiling: “Ang tagipusuon malimbungon labaw sa tanan nga butang kag lakas gid kadunot. Sin-o bala ang makahibalo sini? Ako, si Jehova, nagausisa sang tagipusuon, nagatilaw sang mga batobato, sa paghatag sa tagsa ka tawo suno sa iya mga dalanon, suno sa bunga sang iya mga hinimoan.”—Jeremias 17:9, 10.

Pagtigayon sing Bug-os nga Tagipusuon

13. Ano ang ginsiling ni Jesus nahanungod sa pila ka relihionista sang iya adlaw, kag bangod sina nga paggawi, ano ang nangin resulta sa ila?

¹³ Tuhoy sa mga relihionista sang adlaw niya, si Jesus nagsiling: “Ang tagipusuon sining katawhan ginkibulan, kag ang ila mga dulunggan halos makabati, kag ginpiyong nila ang ila mga mata; agod nga indi gid sila makakita paagi sa ila mga mata kag makabati paagi sa ila mga dulunggan kag makahangop sini paagi sa ila tagipusuon kag magliso agod ayuhon ko sila.” (Mateo 13:15) Bangod sang relihioso nga mga ideya nga ila nahimo na, gintakop nila ang ila mga mata kag mga dulunggan kag ginpatig-a nila ang ila tagipusuon sa panudlo ni Jesus. Nagasikway sa sabdong, wala sila makatigayon sing tagipusuon nga napahulag sing nagakaigo: “Ang nagapamati sa pagsabdong nagatigayon sing tagipusuon [“nagatigayon sing maayong motibo,” Ref. Bi., footnote].” (Hulubaton 15:32) Nagapangangkon sila nga nagasimba sa Dios, apang ginahimo nila ang ila “pagkamatarong” agod nga makita sang mga tawo.—Mateo 6:1, 2, 5, 16.

14. Anong mga halimbawa ang nagapakita sang mga paagi nga ang kamatuoran makasulod agod magpuyo sa aton?

¹⁴ Daw ano kaayo pa nga ilugon si Hari Josafat sang Juda nga ‘naghanda ang iya tagipusuon sa pagpangita sa matuod nga Dios.’ (2 Cronica 19:3) Ang labing maayo nga paghanda sa imo pagpangita sa Dios amo ang tinagipusuon nga pagpangamuyo. Sang ang nasit-an nga si Ana nagpangamuyo sing hanuot kay Jehova, “nagpamulong sia sa iya tagipusuon,” kag ang iya pangamuyo ginsabat. Kinahanglan man ang kahanda sa pagpamati. Ang iloy ni Jesus nagpamati: “Ang iya iloy nagtipig sini tanan nga butang sa iya tagipusuon.” Sia “naghinakop sa iya tagipusuon,” kag sia nangin matutom nga disipulo ni Jesus. Ginabuligan ni Jehova ang sinsero nga nagapangita sa iya. Ang mahinadlukon sa Dios nga si Lidia nagpamati kay Pablo, “kag ang iya tagipusuon ginbuksan ni Jehova sa pagtalupangod sang ginpamulong ni Pablo.” Nagpabawtismo sia. (1 Samuel 1:12, 13; Lucas 2:19, 51; Binuhatan 16:14, 15) Sa masami ang malaragwayon nga tagipusuon—ang mga balatyagon, ang mga emosyon, ang maayong mga katuyoan—amo ang nagatugot sa kamatuoran sa pagsulod kag magpuyo sa isa ka tawo.

15. Agod makatigayon sing bug-os nga tagipusuon, sa ano kita handa sa paghimo?

¹⁵ Agod makatigayon sing bug-os nga tagipusuon, dapat naton ihanda ang aton emosyon nga sikwayon ang daan na nga mga opinyon, kag pakamatuuron ang Dios bisan pa kon laglagon sini ang pila sang aton naluyagan nga mga ideya ukon ginapakamahal nga mga doktrina. (Roma 3:4) Dapat nga dulaon ang makagud nga mga katuyoan agod nga batunon sang aton tagipusuon ang kabubut-on kag mga dalanon ni Jehova. Ginsulat anay ni Jehova ang iya kasugoan sa bato, apang sang ulihi ginsulat niya ang kasugoan sa tagipusuon sang tawo. Si apostol Pablo nagsulat man sa mga tagipusuon. Kag ikaw, man, ‘makasulat [sing mahigugmaon nga kaluoy kag pagkamatuod] sa tapitapi sang aton tagipusuon.’—Hulubaton 3:3; Hebreo 10:16; 2 Corinto 3:3.

16. Anong mga pamangkot ang nagapadaku sang mga tikang nga dapat himuon sang isa agod makatigayon sia sing bug-os nga tagipusuon para kay Jehova?

¹⁶ Kalipikado bala ang imo tagipusuon subong nagakaigo nga sululatan sing mga prinsipio kag mga ideya ni Jehova? Tinloan mo bala ini kag dulaon ang daan na nga mga ideya agod maghatag sing dalan para sa kamatuoran sang Dios? Magapadayon ka bala sa pagtuon, sa pagbag-o sang imo hunahuna, sa pag-uba sang daan nga personalidad, kag sa pagsul-ob sing bag-ong personalidad nga ginsunod sa Dios? Himuon mo bala ang imo labing masarangan nga mangin isa ka manugpangabudlay nga wala sing dapat ikahuya, nagagamit sang pulong sang kamatuoran sing matadlong?—Roma 12:2; Colosas 3:9, 10; 2 Timoteo 2:15.

Pagtipig sa Bug-os nga Tagipusuon

17. Paano ginlaygayan ni David ang iya anak nga si Solomon, kag ngaa napaslawan si Solomon sa pagsunod sa laygay?

¹⁷ Si David nagsiling kay Solomon: “Kag ikaw, Solomon nga anak ko, kilalaha ang Dios sang imo amay kag alagda sia sa bug-os nga tagipusuon kag sa malipayon nga kalag; kay ginausisa ni Jehova ang tanan nga tagipusuon, kag ginahangop niya ang tanan nga huyog sang mga hunahuna.” Nagsugod si Solomon sa pag-alagad nga may bug-os nga tagipusuon, apang sa pagligad sang mga tinuig, wala niya pagtipigi ini: “Kag natabo nga sang nagatigulang na si Solomon ginpahuyog sang iya mga asawa ang iya tagipusuon sa pagsunod sa iban nga mga dios; kag ang iya tagipusuon indi bug-os kay Jehova subong sang tagipusuon ni David nga iya amay.”—1 Cronica 28:9; 1 Hari 11:4.

18, 19. (a) Ano ang nanuhaytuhay nga paagi nga gamiton ni Satanas agod mapaslawan ikaw sa paghupot sing bug-os nga tagipusuon? (b) Kon ining kapin ka malalangon nga mga panikasog ni Satanas mapaslawan, paano magabalhin ang iya mga taktika?

¹⁸ Magmadinalag-on ka bala sa bahin nga napaslawan si Solomon? Sa tapos madedikar ang imo kaugalingon subong saksi ni Jehova, sa tapos masikway ang tanan nga pagkamaduhaduhaon ukon pagpakunokuno sa imo pagsimba, sa tapos makasunod sa mga pulong ni Jesus nga “higugmaon si Jehova nga imo Dios sa imo bug-os nga tagipusuon,” determinado ka bala karon nga tipigan ang imo tagipusuon nga nahugod sing bug-os sa pag-alagad kay Jehova? (Mateo 22:37) Indi ini luyag ni Satanas, kag isa sia ka malalangon nga kaaway. Ang imo tagipusuon mangin puntariya niya. Nahibaloan niya ang huyog sini sa sala, kag mapatalang niya ini kon indi ka magbantay. Wala bala niya ‘ginsulod sa tagipusuon ni Judas Iscariote nga itugyan si Jesus?’ (Juan 13:2) Kuwarta, materyalismo, kalingawan, bugal, sekular nga mga karera, mga bugal sang kabuhi, undanon nga mga kailigbon—nahibaloan niya ang aton maluya nga mga bahin kag ginatuon niya ang iya nagadabadaba nga mga baslay sa sini. Palungon mo bala ini tanan paagi sa taming sang pagtuo?—Efeso 6:16; 1 Juan 2:15-17.

¹⁹ Kag kon mapaslawan ining tanan nga pahito ni Satanas, indi pa sia tapos. Mangin subong sia sang nagangurob nga leon nga nagatinguha sa pagtukob sa matutom nga mga saksi ni Jehova paagi sa masingki nga mga grupo sang mga tawo, pagpanakit, pagbilanggo, kag kamatayon. Apang sa sining tanan palig-unon ni Jehova sila nga ang ila tagipusuon bug-os sa iya.—Santiago 4:7; 1 Pedro 5:8-10; Bugna 2:10.

20, 21. (a) Anong mga pamangkot ang mahimo ipamangkot sa pag-usisa sang literal nga tagipusuon? (b) Paano ang kaanggid nga mga pamangkot magamit sa pag-usisa sang malaragwayon nga tagipusuon?

²⁰ Ang literal nga tagipusuon kinahanglan nga usisaon sa tion kag tion. Nagabaton bala ini sing maayong pagkaon, sa bastante nga kadamuon, kag sa regular nga lang-at-lang-at? Dalayon bala kag mabaskog ang pagpitik sini ukon mahinay kag maluya? Ginatipigan bala sini ang nagakaigo nga presyon sang dugo? May yara bala ini nagakaigo nga ehersisyo? (Agod mangin mapagros kinahanglan nga ang tagipusuon magbomba sing mabaskog sa sulod sang malawig nga tion.) Nagalainlain bala ang kadasigon sang pacemaker sini agod maatubang ang nagabalhinbalhin nga mga kinahanglanon? Nagaatubang bala ini sing isa ka emosyonal nga palibot nga nagapahuol sa sini?

²¹ Kon ang pisikal nga tagipusuon kinahanglan nga usisaon, daw ano pa ang malaragwayon nga tagipusuon! Ginausisa ini ni Jehova; gani dapat man naton usisaon ini. Nagabaton bala ini sing bastante nga espirituwal nga kalan-on paagi sa regular nga personal nga pagtuon kag pagtambong sa mga miting? (Salmo 1:1, 2; Hulubaton 15:28; Hebreo 10:24, 25) Ang mga balatyagon sini kag tudok nga mga emosyon nagapahulag sa aton sa makugi nga pag-alagad sa latagon—kon kaisa nagapahulag sa aton nga magpangabudlay sing lakas paagi sa pag-auxiliary payunir? (Jeremias 20:9; Lucas 13:24; 1 Corinto 9:16) Kamusta ang palibot sini? Ginalibotan bala ini sang iban nga mga tagipusuon nga nahiusa kag bug-os nga may kaangay sa imo nga mga balatyagon kag mga katuyoan?—2 Hari 10:15, 16; Salmo 86:11; Hulubaton 13:20; 1 Corinto 15:33.

22. Ano ang magapasalig sing kadalag-an sa aton determinasyon nga alagdon si Jehova sa bug-os nga tagipusuon?

²² Kon ang imo pag-usisa makapasabat sa imo sing huo sa mga pamangkot sa ibabaw, nian ginaamligan mo ang imo malaragwayon nga tagipusuon. Magamadinalag-on ikaw, upod sa minilyon sang iban pa nga matutom nga mga Saksi, sa imo determinasyon nga alagdon si Jehova sa bug-os nga tagipusuon. Sila tanan ginapasalig sini: “Ang paghidait sang Dios nga nagalabaw sa tanan nga paghangop magatipig sang inyo mga tagipusuon kag inyo mga painoino paagi kay Cristo Jesus.”—Filipos 4:7.

[Mga footnote]

Isa ka galon = 3.8 litro.

Madumduman Mo Bala?

◻ Ano ang madamong kinaiya nga ginapatuhoy sa malaragwayon nga tagipusuon?

◻ Paano naton malikawan ang pagkamaduhaduhaon ukon pagpakunokuno?

◻ Ngaa si Jehova kag si Cristo Jesus nagatulok sa tagipusuon kon nagahukom?

◻ Paano naton matigayon kag matipigan ang bug-os nga tagipusuon?

[Laragway sa pahina 17]

Duha ka bala sing nawong?

[Mga Laragway sa pahina 18]

Lidia

Josafat

Ana

Maria