Nagapabilin Ka Bala nga Matinlo sa Tanan nga Bahin?

“Halin kamo, halin kamo, guwa kamo gikan diri, dili kamo magtandog sing butang nga dimatinlo; guwa kamo gikan sa tunga niya, paninlui ang inyo kaugalingon, kamo nga nagadala sang mga gamit ni Jehova.”—ISAIAS 52:11.

1. (a) Paano ang harianon nga mando nagtugot nga ibalik ang mga gamit ni Jehova sa Jerusalem? (b) Paano gindagtaan ang iban sadtong mga suludlan?

SA HINALI hilway na sila—sa tapos sang 70 ka tuig nga pagkaulipon! Ang harianon nga mando sang mga 538 B.C.E. nagtugot sa Judiyong pungsod nga magbalik ‘kag patindugon ang balay ni Jehova nga Dios sang Israel.’ (Esdras 1:2, 3) Masunod, isa pa ka makapakibot nga hitabo: “Ginpaguwa ni Hari Ciro [sang Persia] ang mga gamit sang balay ni Jehova, nga gindala ni Nabocodonosor gikan sa Jerusalem.” (Esdras 1:7, 8) Lakip sa sini amo ang balaan nga mga suludlan nga gindagtaan ni Belsasar kag sang iya mga ginuo sang gab-i nga mapukan ang Babilonia paagi sa makahason nga paggamit sini sa pagdayaw sa dimatuod nga mga dios! (Daniel 5:3, 4) Mabalik na karon sang mga bihag anay ining mga gamit sa Jerusalem kag gamiton ini sa pagdayaw kay Jehova!

2. (a) Ano nga tagna ni Isaias ang dumdumon sang mga nagbalalik? Sa kay sin-o ini naaplikar? (b) Ngaa ginlaygayan sila nga indi magtandog sing bisan ano nga dimatinlo?

² Samtang may kakunyag nga naghanda sila para sa paglakat, walay duhaduha nga gindumdom sang manugpauli nga mga Judiyo ang mga pulong ni manalagna Isaias: “Halin kamo, halin kamo, guwa kamo gikan diri, dili kamo magtandog sang butang nga dimatinlo; guwa kamo gikan sa tunga niya, paninlui ang inyo kaugalingon, kamo nga nagadala sang mga gamit ni Jehova.” (Isaias 52:11) Sa pagkamatuod, ang mga Levinhon ang aktuwal nga nagsaylo sang mga gamit. (Numeros 1:50, 51; 4:15) Apang, gintagna ni Isaias nga ang tanan nga magabalik may kadungganan nga magadala sa mga suludlan. Sa amo, obligado ang tanan nga mangin matinlo. Indi nila paghublasan ang mga Babilonianhon sang ila hamili nga mga butang subong sang ginhimo anay sang mga Israelinhon sang magbiya sila sa Egipto. (Ipaanggid ang Exodo 12:34-38.) Dapat wala sila sing materyalistiko ukon makagod nga motibo sa pagbalik. Tuhoy sa “mahigko nga mga diosdios,” ang pagtandog lamang sa isa sini makadagta sa isa.a (Jeremias 50:1, 2) Paagi lamang sa pagkatinlo sa tanan nga paagi nga ang mga Judiyo makalabay sa “Alagyan sang Pagkabalaan” pabalik sa Jerusalem.—Isaias 35:8, 9.

3. Sin-o sa karon ang nagadala sang “mga gamit” ni Jehova? Ngaa isa ka hangkat para sa ila ang pagpabilin nga matinlo?

³ Ang mga Saksi ni Jehova karon dapat man mangin matinlo subong mga manugdala sang “mga gamit” ni Jehova. Ginbalikwat ni apostol Pablo ang mga pulong ni Isaias kag gin-aplikar ini sa mga Cristiano sang iya adlaw, nga nagasiling: “Tinluan ta ang aton kaugalingon sang tanan nga kadagtaan sang lawas kag espiritu, kag himpiton ta ang pagkabalaan sa kahadlok sa Dios.” (2 Corinto 6:17–7:1) Luwas nga nagapuyo sa dimatinlo nga kalibutan, dapat naton batuan ang aton dihimpit nga mga huyog. (Genesis 8:21) Ang Jeremias 17:9 nagapahanumdom sa aton: “Ang tagipusuon malimbungon labaw sa tanan nga butang kag lakas gid kalaut. Sin-o bala ang makahibalo sini?” Ang iban nagalimbong sa ila kaugalingon kag sa iban sa pagpati nga ang ila kabuhi matinlo kag kalahamut-an sa Dios, apang sa kamatuoran indi. Nagabuhat sila sing isa ka porma sang pagkasalimpapaw. Busa ang tagsatagsa sa aton dapat mamangkot, ‘Ginahimo ko bala ang tanan nga panikasog agod mangin matinlo sa atubangan ni Jehova sa tanan nga butang?’ Agod mabuligan kita sa paghimo sini, magkonsentrar kita karon sa apat ka bahin sang pagkatinlo.

Pisikal nga Pagkatinlo: Dapat Unahon

4. (a) Ngaa ang pagkatinlo sa pisikal isa ka butang nga ulunahon sa tunga sang katawhan ni Jehova? (b) Ngaa mabudlay kon kaisa huptan ang isa ka mataas nga talaksan sang pagkatinlo?

⁴ Ang pisikal nga pagkatinlo dapat unahon sa tunga sang katawhan ni Jehova karon subong anay sa dumaan nga mga tion. (Exodo 30:17-21; 40:30-32) Ginatahod bala naton ang “mga gamit ni Jehova” kon ang aton buhok, mga kamot, guya, mga ngipon, ukon mga kuko mahigko, ukon kon may baho ang aton lawas? Apang, mahapos tugutan ang manubo nga mga talaksan sang kalibutan sa pag-impluwensia sa aton.—Roma 12:2.

5. (a) Ngaa importante gid nga huptan naton ang aton talaksan sang pagkatinlo nga mataas? Maghatag sing lokal nga mga halimbawa kon paano maaplikar ining laygay. (b) Paano makabulig ang mga gulang?

⁵ Paano kita mangin tuhay sa kalibutan kon ginasunod naton ang manubo nga mga talaksan sang kalibutan? Indi bala ‘pasipalahan ang pulong sang Dios’ kon mahigko ang aton balay ukon ang aton balay sa pagsimba? (Tito 2:5) Apang kon himuon naton nga batasan ang mangin matinlo sa lawas, pudyuton ang sagbot sa duog sang mga kombension, magbulig sa pagmentinar sa Kingdom Hall, kag tipigan ang aton balay—bisan ang pinakadiutay nga puluy-an—nga mahipid kag matinlo, nagadala kita sing himaya sa Dios! (Ipaanggid ang 1 Pedro 2:12.) Mga gulang, magpakita sing maayong personal nga halimbawa sa pagkatinlo. Indi “mag-isol” sa paghatag sing nagakaigo nga laygay kon kinahanglanon.—Binuhatan 20:20.

6. Ano dapat ang mangin talaksan naton sa pagbiste para sa mga miting kag sa pag-alagad sa latagon?

⁶ Kamusta ang panapton nga aton ginasuksok kon nagasimba sa mga miting kag kon nagaalagad sa latagon? Indi bala ini dapat mangin ‘maugdang kag maligdong’? (1 Timoteo 2:9; Hebreo 10:23-25) Indi magpangatarungan nga obligado kita sa pagbiste sing maayo kon may bahin lamang kita sa miting. Ang sobra ka kaswal nga panapton indi maugdang kag indi nagakaigo para sa pagsimba. Ang guba na nga mga bag para sa libro kag ang madamo sing pilo sa punta sang mga pinanid ukon mahigko nga Biblia makabuhin sang interes sa mensahe sang Ginharian.

Paglikaw nga Madagtaan ang Hunahuna

7. Ano ang yabi sa pagkatinlo sa hunahuna, suno sa Filipos 4:8?

⁷ Sa Filipos 4:8 si Pablo naglaygay: “Sa katapusan, mga kauturan, ang bisan anong matuod, ang bisan anong halangdon, ang bisan anong matarong, ang bisan anong putli, ang bisan anong dungganon, kon may diosnon nga gahom, kon may takus dayawon, painoinoha ining mga butang.” Apang, bisan diin ginaatake kita sing mga pagsulay nga maglili “sa ‘madalom nga mga butang ni Satanas.’”—Bugna 2:24.

8. Paano mailustrar ang mga katalagman gikan sa nanuhaytuhay nga porma sang kalingawan? Maghatag sing lokal nga mga halimbawa.

⁸ Halimbawa, ang pagkamadali matigayon sang pornograpiko kag tuman kasingki nga materyal nagresulta sa daku nga mga problema para sa iban nga nagagamit sing video­cas­sette re­cord­ers. Sa Europa, ang isa ka minyo nga utod nga lalaki nagatan-aw sing malaw-ay nga mga tape kon nagakatulog na ang iya asawa. Ang binhi sang paghimo sing sayop natanom sing mabakod, nga nagresulta sa panghilahi. (Ipaanggid ang Santiago 1:14, 15.) Sa isa ka pungsod sang Aprika, ang isa ka grupo sang Saksi nga mga pamatan-on nagahulam sing malaw-ay nga mga tape gikan sa mga abyan sa eskwelahan kag ginatan-aw ini kon wala ang ila mga ginikanan. Apang, ang isa ka gulang sa Ni­geria, nagsiling: ‘Masami nga may daku nga katalagman ang regular nga mga programa sa TV nga nagapakita sing kasingki, krimen, inaway, mga danyag nga nagapakita sing seksuwal nga butang, kag sing pagtamay sa pagkatutom sa tiayon.’ Makatalagam man ang baratuhon kag malaw-ay nga mga pamantalaan, pornograpiko nga mga magasin, makapukaw sa sekso nga mga nobela, mga sine, kag malaw-ay nga mga musika.

9. (a) Ngaa dapat naton pilion ang aton ginapamatian, ginatan-aw kag ginabasa? (b) Ano dapat ang himuon naton kon ginaatubang kita sang malaw-ay nga materyal?

⁹ Indi naton mahimo nga higkuan ang aton hunahuna paagi sa mga butang nga “makahuluya bisan hambalon.” (Efeso 5:12) Gani pilia ang inyo ginapamatian, ginatan-aw, kag ginabasa. Magbantay kag sikwaya sa gilayon ang malaw-ay nga materyal. (Salmo 119:37) Magakinahanglan ini sing pagpugong sa kaugalingon, ayhan sa malaragwayon nga paagi ‘ginasakit ang imo lawas kag ginaulipon ini.’ (1 Corinto 9:27) Apang, dumduma pirme nga ang aton ginatan-aw sa tago makita sang “Isa nga dimakita.” (Hebreo 11:27) Gani likawi ang butang nga maduhaduhaan. “Padayon nga pat-ura ang kalahamut-an sa Ginuo.”—Efeso 5:10.

‘Padayon nga Magbantay’ Agod Magpabilin nga Matinlo sa Moral

10. (a) Ano ang isa ka rason nga madamo gid ang ginasabdong ukon ginadis­fel­low­ship kada tuig? (b) Anong mga prinsipio sang Biblia ang dapat magtuytoy sa aton paggawi kon bakasyon kag kon yara sa trabaho?

¹⁰ Sa Efeso 5:5 si Pablo nagpaandam: “Kay nahibaluan ninyo ini, ginakilala ini para sa inyo kaugalingon, nga wala sing makihilawason ukon dimatinlo nga tawo ukon makagod nga tawo—nga nagakahulugan isa nga nagasimba sa idolo—ang makapanubli sang ginharian ni Cristo kag sang Dios.” Apang, linibolibo kada tuig ang ginasabdong ukon ginadis­fel­low­ship bangod sang seksuwal nga imoralidad—‘nagapakasala batok sa lawas.’ (1 Corinto 6:18) Sa masami, resulta lamang ini sang indi ‘padayon nga pagbantay suno sa pulong [sang Dios.]’ (Salmo 119:9) Madamo nga kauturan, halimbawa, ang wala nagabantay sang ila moralidad sa tion sang bakasyon. Ginapatumbayaan ang teo­kratiko nga pagpakig-upod, nagapakig-abyan sila sa kalibutanon nga mga bakasyonista. Nagapangatarungan nga ini sila ‘mabuot nga mga tawo,’ ang iban nga mga Cristiano nagbuylog sa ila sa maduhaduhaan nga mga butang. Sing kaanggid, ang iban nangin sobra ka mainabyanon sa ila mga kaupod sa trabaho. Ang isa ka Cristianong gulang nabuyo gid sa isa ka empleyada sa bagay nga ginbiyaan niya ang iya pamilya kag nagpuyo upod sa iya! Subong resulta, gin­dis­fel­low­ship sia. Daw ano ka matuod ang mga pulong sang Biblia, “Ang malain nga mga pagpakig-upod nagadunot sang mapuslanon nga mga pamatasan”!—1 Corinto 15:33.

11. Ngaa dapat dumalahan sing nagakaigo ang Cristianong mga pagtinipon?

¹¹ Gikan sa Bagatnan nga Aprika naghalin ining report: “Ang isa pa ka katalagman nga nagabutang sa peligro sang pagkatadlong sa moral sang madamo amo ang dalagku nga mga sinalusalo . . . ang iban sini ginahiwat sa tapos sang mga sesyon sang distrito nga kombension.” Apang, ang diutay nga Cristianong pagtinipon nga ginadumalahan sing maayo malaka nga nagadul-ong sa “magansal nga kinalipay.” (Galacia 5:21) Kon may alkoholiko nga ilimnon nga iserbe, himua ini nga ginadumalahan sing maayo kag sing haganhagan. “Ang alak manug-uligyat,” kag sa idalom sang impluwensia sini, nadula sang iban nga kauturan ang pagbantay sa ila moralidad ukon ginpukaw nila ang nagakatulog nga mga kaluyahon. (Hulubaton 20:1) Sa amo, duha ka lamharon nga mga ministro ang naghimo sing homoseksuwal nga mga buhat sa tapos magpatuyang sa alkohol.

12, 13. (a) Paano ginpakamatarong sang iban ang imoral nga paggawi? Ngaa makapatalang ina nga pangatarungan? (b) Paano kita makapabilin nga nagabantay batok sa mga peligro sa maayong moral?

¹² Kon ginasulay sa pagpakasala, dumduma nga, walay sapayan kon daw ano kita katinlo sa guwa, ang importante amo ang kon ano kita sa sulod. (Hulubaton 21:2) Ang iban nagabatyag nga patawaron sang Dios ang ila pagbalikbalik sa imoral nga paggawi bangod maluya sila. Apang indi bala ini ‘paghimo sa dibagay nga kaluoy sang aton Dios nga isa ka balibad para sa lugak nga paggawi’? (Judas 4) Ang iban nagahunahuna pa gani nga ‘si Jehova indi makakita sa aton.’ (Ezequiel 8:12) Apang, dumduma nga “wala sing tinuga nga indi hayag sa atubangan niya, kundi ang tanan nga butang hublas kag dayag sa mga mata niya nga hatagan ta sing husay.”—Hebreo 4:13.

¹³ Gani magbantay batok sa mga peligro sa maayong moral! “Dili gid pagsambita sa tunga ninyo ang pagpakighilawas kag pagkadimatinlo, subong amo ang nagakaigo sa balaan nga mga tawo; bisan ang makahuluya nga paggawi ukon binuang nga mga hambal ukon malaw-ay nga linahog, mga butang nga indi nagakaigo.” (Efeso 5:3, 4) “Kangil-ari ang malaut,” walay sapayan kon daw ano ini ka makalilipay sa unod.—Roma 12:9.

Magpabilin nga Matinlo sa Espirituwal

14, 15. (a) Paano ginpadayag sang iban ang ila kaugalingon sa pagkahigko sa espirituwal? (b) Paano ginagamit sang mga apostata ang ila ‘baba sa paglaglag sa ila isigkatawo’? (c) Sa anong mga paagi ang mga apostata dimatinlo gid, kag ano ang ila nalipatan?

¹⁴ Ginpadayag sang iban ang ila kaugalingon sa posible nga pagdagta sa espirituwal paagi sa pagpamati sa relihioso nga mga palayag sa radyo kag telebisyon. Sa isa ka pungsod sang Aprika, ang iban nagatan-aw sing mga drama sa TV nga nagapakita sang mga disparatis sang tradisyonal nga ani­mist nga mga relihion sa paborable nga kapawa. Apang, si apostol Pablo nagpaandam tuhoy sa kapin ka makamamatay nga katalagman—ang mga apostata nga “nagatublag sang pagtuo sang iban.” (2 Timoteo 2:16-18) Ang mga indibiduwal nga subong sina nagaluntad gihapon! (2 Pedro 2:1-3) Kag kon kaisa nagmadinalag-on sila sa paghigko sa panghunahuna sang iban. Suno sa ginasiling sang Hulubaton 11:9: “Paagi sa iya baba ang isa nga apostata nagalaglag sa iya isigkatawo.”

¹⁵ Ang masami nga ginapukaw sang mga apostata amo ang bugal, nagasiling nga ginadingutan kita sang aton kahilwayan, lakip ang kahilwayan sa pagpatpat sang Biblia para sa aton kaugalingon. (Ipaanggid ang Genesis 3:1-5.) Ang matuod, ining mga manugtamay wala sing ginatanyag kundi ang pagbalik sa makasuluka nga mga panudlo sang “Babilonia nga Daku.” (Bugna 17:5; 2 Pedro 2:19-22) Ginapukaw sang iban ang unod, nga nagasiling sa mga kaupod anay nga “maghinayhinay lamang” bangod ang manubo nga hilikuton sa pagpanaksi sa balay kag balay “indi kinahanglanon” ukon “dimakasulatanhon.” (Ipaanggid ang Mateo 16:22, 23.) Matuod, ining madanlog maghambal nga mga tawo mahimo nga matinlo tulukon sa guwa, sa pisikal kag sa moral. Apang sa sulod dimatinlo sila sa espirituwal, bangod sang ila pagpadaug sa ila bugalon kag independiente nga panghunahuna. Nalipatan nila ang tanan nga naton-an nila nahanungod kay Jehova, sa iya balaan nga ngalan kag mga kinaiya. Wala na nila ginakilala nga ang tanan nga naton-an nila nahanungod sa kamatuoran sang Biblia—ang mahimayaon nga paglaum sa Ginharian kag ang paraiso nga duta kag ang pagpukan sa dimatuod nga mga doktrina, subong sang Trinidad, dimamalatyon nga kalag sang tawo, dayon nga pagpaantos, kag ang purgatoryo—huo, ini tanan nag-abot sa ila paagi sa “matutom kag mainandamon nga ulipon.”—Mateo 24:45-47.

16. Paano ang matarong ginaluwas “paagi sa ihibalo”?

¹⁶ Sing makawiwili, ang isa ka manugtatap sa sirkito sa Pransya nagsiling: “Ang iban nga kauturan nalimbungan bangod kulang sila sing sibu nga ihibalo.” Amo kon ngaa ang Hulubaton 11:9 nagasiling: “Paagi sa ihibalo ang matarong luwason.” Wala ini nagakahulugan nga pamatian ang mga apostata ukon basahon ang ila mga sinulat. Sa baylo, nagakahulugan ini sing pagtigayon sing “sibu nga ihibalo sa balaan nga tinago sang Dios” paagi sa maukod nga personal nga pagtuon sang Biblia kag sang napasad sa Biblia nga mga publikasyon sang Sosiedad. Sa tapos matigayon ining sibu nga ihibalo, sin-o pa ang mangin interesado sa pagpamati sa mga ginahambal sang mga apostata? Kabay nga wala sing tawo nga “magpatalang sa inyo sa pulong nga makabuluyok”! (Colosas 2:2-4) Ang propaganda sang dimatuod nga relihion bisan diin dapat likawan kaangay sang hilo! Sa pagkamatuod, sanglit ginagamit sang aton Ginuo ang “matutom kag mainandamon nga ulipon” sa pagpaalinton sa aton sang “mga pulong sang kabuhi nga walay katapusan,” ngaa makadto pa kita sa iban?—Juan 6:68.

Magapabilin Ka Bala nga Matinlo?

17, 18. Ngaa importante nga palambuon ang (a) pagkatinlo sa pisikal, (b) pagkatinlo sa hunahuna, (c) pagkatinlo sa moral, kag (d) pagkatinlo sa espirituwal?

¹⁷ Busa, daku ang nadalahig sa pagpabilin nga matinlo sa atubangan ni Jehova nga Dios. Ang pagtipig sang aton lawas, sang aton puluy-an, sang aton panapton, kag sang aton Kingdom Hall nga matinlo nagapuni sa aton mensahe sang Ginharian. Ang pagpabilin nga matinlo sa hunahuna nagabulig sa aton sa pagpabilin nga matinlo sa moral kag sa espirituwal. Kinahanglan sini nga pamatian naton ang laygay ni Pablo sa Filipos 4:8, nga huptan ang aton hunahuna sa mga butang nga matuod, putli, kag dalayawon.

¹⁸ Maapresyar man naton sing kapin sa bisan anong tion nga dapat kita magpabilin nga matinlo sa moral sa pulong kag sa buhat. Si Jehova malig-on nga nagapaandam sa aton nga ang mga nagahimo sang bisan anong porma sang imoralidad indi gid makapanubli sang Ginharian sang Dios. (1 Corinto 6:9-11) Bisan pa kon daw ano katahom ang dimatinlo nga mga butang, kon magsab-ug kita sa unod, magaani kita sing kaduluntan gikan sa unod. (Galacia 6:8) Bilang katapusan, importante nga magpabilin nga matinlo sa espirituwal kag sa doktrina. Ina nga pagkatinlo magabulig sa aton sa pagtipig sang pagkaputli sang aton tagipusuon kag hunahuna. Sa amo, mapahulag kita nga tinguhaon pirme ang panghunahuna sang Dios sa mga butang—indi ang aton kaugalingon.

19. Ano ang makabulig sa hinaplas kag sa “dakung kadam-an” sa pagpabilin nga matinlo sa tanan nga bahin?

¹⁹ Sa dili madugay ang una nga promotor sang pagkadimatinlo—si Satanas nga Yawa—itagbong, upod sa iya mga demonyo, sa madalom nga kadadalman. Sa wala pa ina nga tion, kabay nga ang tanan nga alagad ni Jehova—sang hinaplas kag sang “dakung kadam-an”—magpabilin nga matinlo subong nga manugdala sang mga suludlan ni Jehova. (Bugna 7:9, 13-15; 19:7, 8; 20:1-3) Ang pagpakig-away padayon kag mabudlay. Apang, dumduma nga si Jehova bugana nga nagahatag sang iya “espiritu sang pagkabalaan.” (Roma 1:4) Ang iya matinlo nga organisasyon, upod ang mga gulang sini, handa man sa pagbulig sa aton paagi sa pagtanyag sing maayo, Makasulatanhon nga laygay. Upod ina nga bulig kag ang aton determinasyon, makapabilin kita nga matinlo sa tanan nga bahin!

[Footnote]

Mga Pamangkot Para sa Repaso

◻ Ngaa dapat mangin matinlo ang mga Judiyo nga nagbalik gikan sa Babilonia?

◻ Paano naton maatipan ang pagkatinlo sa pisikal?

◻ Paano naton maamligan ang aton hunahuna nga indi madagtaan?

◻ Paano kita makapabilin nga nagabantay batok sa mga katalagman sa moral?

◻ Paano naton matipigan ang aton pagkatinlo sa espirituwal?

[Laragway sa pahina 16]

Ang aton puluy-an dapat mangin modelo sa pagkatinlo

[Laragway sa pahina 17]

Ang mga Cristiano dapat magdesisyon sing maayo sa paglikaw sa mga video tape kag mga programa sa TV nga makadagta sa hunahuna

[Laragway sa pahina 18]

Ang diutay nga mga pagtinipon mahimo nga makapalig-on sa moral

[Laragway sa pahina 19]

Ang makugi nga mga Saksi nagapabilin nga matinlo sa espirituwal kag nakasapo sing pag-amlig kag kalipay paagi sa maukod nga pagtuon sang Biblia