Ano ang Labing Importante sa Imo Kabuhi?

“Sugiri ako sang dalan nga dapat ko laktan.”​—⁠SALMO 143:⁠8.

 1. Ano ang ginhinakop ni Hari Solomon nahanungod sa tawhanon nga mga paghimud-os kag mga hinimuan?

KAANGAY kay bisan sin-o mahimo nga nahibaluan mo nga ang kabuhi puno sing mga hilikuton kag mga kabalaka. Kon hunahunaon mo ini, makilala mo ang pila sini subong kinahanglanon. Ang iban nga mga hilikuton kag mga kabalaka indi tanto ka importante ukon walay pulos pa gani. Ang katunayan nga nahibaluan mo ini nagakahulugan nga nagaugyon ka sa isa sang pinakamaalam nga tawo, si Hari Solomon. Sa tapos marepaso sing maayo ang mga hilikuton sang kabuhi, naghinakop sia: “Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.” (Manugwali 2:​4-9, 11; 12:13) Ano ang kahulugan sini para sa aton karon?

 2. Anong sadsaran nga pamangkot ang dapat ipamangkot sang mahinadlukon-sa-Dios nga katawhan sa ila kaugalingon, nga nagadul-ong sa anong may kaangtanan nga mga pamangkot?

² Kon luyag mo “magkahadlok sa matuod nga Dios kag magtuman sa iya mga sugo,” pamangkuta ang imo kaugalingon sining makahalangkat nga pamangkot: ‘Ano ang labing importante sa akon kabuhi?’ Matuod, mahimo nga wala mo ginahunahuna ina nga pamangkot adlaw-adlaw, apang ngaa indi ini binagbinagon karon? Sa katunayan, nagapanugda ini sing pila ka may kaangtanan nga pamangkot, subong sang, ‘Mahimo bala nga ginahatagan ko sing dinagakaigo nga pagpadaku ang akon trabaho ukon propesyon ukon ang materyal nga mga butang? Daw ano ka importante ang akon puluy-an, pamilya, kag mga hinigugma sa akon kabuhi?’ Ang isa ka pamatan-on mahimo mamangkot, ‘Daw ano ka daku nga bahin sang akon igtalupangod kag tion ang ginakuha sang edukasyon? Sa pagkamatuod, isa bala ka hobby, isport, ukon pila ka porma sang kalingawan ukon teknolohiya ang akon pangunang interes?’ Kag ano man ang aton edad ukon kahimtangan, dapat kita mamangkot sing nagakaigo, ‘Ano ang lugar sang pag-alagad sa Dios sa akon kabuhi?’ Ayhan nagaugyon ka sa pagkakinahanglanon sang mga prioridad. Apang paano kag diin kita makakuha sing bulig agod mapahamtang ini sing maalamon?

 3. Ano ang nadalahig sa pagtukod sing mga prioridad para sa mga Cristiano?

³ Ang “labing daku” may sadsaran nga kahulugan sang butang nga nagauna sa tanan pa nga iban ukon sa mga kinahanglanon nga dapat tamdon sing una. Ikaw man isa sang mga Saksi ni Jehova ukon isa sang minilyon ka sinsero nga mga estudyante sang Pulong sang Dios nga nagapakig-upod sa ila, binagbinaga ining kamatuoran: “Kay sa tagsa ka butang may gintangdo nga tion, bisan tion sa tagsa ka hilikuton sa idalom sang langit.” (Manugwali 3:1) Sing makatarunganon, nagalakip ina sang pagpakita mo sing mahigugmaon nga pagkabalaka sa mga kaangtanan sang pamilya. (Colosas 3:​18-21) Nagalakip ina sang bunayag mo nga pag-aman para sa imo panimalay paagi sa sekular nga palamugnan. (2 Tesalonica 3:​10-12; 1 Timoteo 5:8) Kag bilang pagbalhin, mahimo ka magpahunayhunay para sa isa ka hobby ukon sa tulutalagsa nga kalingawan ukon pagliwaliwa. (Ipaanggid ang Marcos 6:⁠31.) Apang, sa paghunahuna sing serioso, wala mo bala makita nga wala gali sing isa sini ang labing importante sa kabuhi? May butang nga mas importante pa.

 4. Paano naangot ang Filipos 1:​9, 10 sa pagpahamtang naton sing mga prioridad?

⁴ Ayhan nakita mo nga ang nagatuytoy nga mga prinsipio sang Biblia nagabulig sing bilidhon sa pagpahamtang sing mga prioridad kag sa pagdesisyon sing maalamon. Halimbawa, sa Filipos 1:​9, 10, ang mga Cristiano ginalaygayan nga “magbugana sing labi kag labi pa gid sa sibu nga ihibalo kag sa bug-os nga paghantop.” Sa anong katuyuan? Si apostol Pablo nagdugang: “Agod mapat-od ninyo ang mas importante nga mga butang.” Indi bala ina makatarunganon? Bangod sang sibu nga ihibalo, mapat-od sang isa ka mahinantupon nga Cristiano kon ano ang dapat unahon​—⁠ang labing importante​—⁠sa kabuhi.

Ang Sulundan sa Kon Ano ang Labing Importante

 5. Sa paglaragway sang sulundan nga ginbilin para sa mga Cristiano, paano ginapakita sang mga Kasulatan kon ano ang labing importante sa kabuhi ni Jesus?

⁵ Makasapo kita sing hamili nga bahin sang ihibalo sa pinamulong ni apostol Pedro: “Sa katunayan, sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing sulundan agod nga pagsundon ninyo sing maayo ang iya mga tikang.” (1 Pedro 2:21) Huo, para sa mga giya sa kon ano ang labing importante sa kabuhi, mahimo naton hibaluon ang panghunahuna ni Jesucristo nahanungod sini. Ang Salmo 40:8 nagsiling sing matagnaon nahanungod sa iya: “Sa paghimo sang imo kabubut-on, O Dios ko, nagakalipay ako, kag ang imo kasuguan yari sa akon nasulod nga mga bahin.” Amo ini kon paano niya ginpamulong ang kaanggid nga panghunahuna: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.”​—⁠Juan 4:34; Hebreo 12:⁠2.

 6. Paano naton matigayon ang kaanggid nga mga resulta kaangay kay Jesus sa pag-una sang kabubut-on sang Dios?

⁶ Talupangda ina nga yabi​—⁠ang paghimo sang kabubut-on sang Dios. Ginapadaku sang halimbawa ni Jesus kon ano ang makatarunganon nga dapat tamdon sang iya mga disipulo subong ang labing importante sa ila kabuhi, kay nagsiling sia nga “ang tagsatagsa nga natudluan sing himpit mangin subong sang iya manunudlo.” (Lucas 6:40) Kag samtang naglakat si Jesus sa dalanon nga gintuyo sang iya Amay, ginpakita niya nga may “kabug-usan sang kalipayan” sa padayon nga pag-una sang kabubut-on sang Dios. (Salmo 16:​11; Binuhatan 2:28) Nakita mo bala kon ano ang kahulugan sina? Samtang ginapili sang mga sumulunod ni Jesus ang paghimo sang kabubut-on sang Dios subong ang labing importante nga butang sa ila kabuhi, magaagom sila sing “kabug-usan sang kalipayan” kag sing matuod nga kabuhi. (1 Timoteo 6:19) Gani may kapin pa sa isa ka rason nga dapat naton unahon sa aton kabuhi ang paghimo sang kabubut-on sang Dios.

7, 8. Anong mga pagtilaw ang gin-atubang ni Jesus, kag ano ang matun-an naton gikan sini?

⁷ Sa gilayon pagkatapos ginsimbuluhan ni Jesus ang pagpresentar niya sang iya kaugalingon nga himuon ang kabubut-on sang Dios, nanikasog ang Yawa nga patalikdon sia. Paano? Paagi sa pagsulay sa tatlo ka bahin. Sa kada pagsulay nagsabat si Jesus sa Makasulatanhon, maathag nga mga termino. (Mateo 4:​1-10) Apang nagahulat sa iya ang dugang pa nga mga pagtilaw​—⁠paghingabot, pagyaguta, pagluib ni Judas, butig nga mga panumbungon, kag nian kamatayon sa usok sang pag-antos. Apang, wala sing isa sining mga pagtilaw ang nagpatalikod sa mainunungon nga Anak sang Dios gikan sa iya dalanon. Sa ital-ital nga tion, si Jesus nangamuyo: “Indi suno sa kabubut-on ko, kundi sa kabubut-on mo. . . . Paghimuon ang imo kabubut-on.” (Mateo 26:​39, 42) Indi bala nga ang kada isa sa aton dapat mapahulag sing tudok sining bahin sang sulundan nga ginbilin sa aton, nagatiklod sa aton nga “magpadayon sa pagpangamuyo”?​—⁠Roma 12:⁠12.

⁸ Huo, kon ginapahamtang naton ang aton mga prioridad sa kabuhi, ang panuytoy sang Dios mabuligon gid, ilabi na kon nagaatubang kita sa mga kaaway sang kamatuoran kag sa mga nagapamatok sang kabubut-on sang Dios. Dumduma ang pakiluoy sang matutom nga si Hari David sang ginpamatukan sia sang mga kaaway. Makita naton ini samtang ginabinagbinag naton ang isa ka bahin sang Salmo 143. Magabulig ini sa aton sa paghantop kon paano naton mapabakod ang aton personal nga kaangtanan kay Jehova kag mapalig-on nga himuon sing padayon ang kabubut-on sang Dios subong ang labing importante sa aton kabuhi.

Si Jehova Nagapamati kag Nagasabat sang Aton mga Pangamuyo

 9. (a) Bisan pa si David makasasala, ano ang ginapakita sang iya mga pinamulong kag mga buhat? (b) Ngaa indi kita dapat mag-untat sa paghimo kon ano ang husto?

⁹ Walay sapayan nga isa ka makasasala nga tawo, si David nagtuo nga pamatian ni Jehova ang iya pag-ampo. Mapainubuson sia nga nangamuyo: “O Jehova, pamatii ang akon pangamuyo; lingga ang akon mga pag-ampo. Sa imo pagkatutom sabta ako sa imo pagkamatarong. Kag indi ka magsulod sa paghukom upod sa imo alagad; kay sa atubangan mo walay tawo nga nagakabuhi ang mahimo nga mangin matarong.” (Salmo 143:​1, 2) Nakahibalo si David sang iya pagkadihimpit, apang ang iya tagipusuon bug-os sa Dios. Busa, nagsalig sia nga makabaton sia sing sabat sa pagkamatarong. Wala bala ini nagapalig-on sa aton? Bisan pa wala naton malab-ot ang pagkamatarong sang Dios, makasalig kita nga magapamati sia sa aton kon ang aton tagipusuon bug-os sa iya. (Manugwali 7:​20; 1 Juan 5:14) Samtang nagapadayon sa pangamuyo, handum naton dapat nga ‘daugon ang malaut sing maayo’ sa sining malauton nga mga adlaw.​—⁠Roma 12:​20, 21; Santiago 4:⁠7.

10. Ngaa may panag-on sang pagkabalaka si David?

¹⁰ Si David may mga kaaway, kaangay man naton. Isa man ka pugante kay Saul, nga napilitan sa pagdangop sa masubo, naligwin nga mga lugar, ukon isa man ka hari nga ginasamok sang mga kaaway, si David may iya mga panag-on sang pagkabalaka. Ginlaragway niya kon paano sia sini naapektuhan: “Ginhingabot sang mga kaaway ang akon kalag . . . Ginpapuyo niya ako sa madulom nga mga duog . . . Kag ang akon espiritu ginapunaw sa sulod nakon; sa sulod nakon mamingaw ang akon tagipusuon.” (Salmo 143:​3, 4) May rason ka bala sa pagbatyag sing amo man?

11. Anong mabinalak-on nga mga panag-on ang ginaatubang sang modernong-adlaw nga mga alagad sang Dios?

¹¹ Ang pag-ipit sang kaaway, ang mga pagtilaw bangod sang daku nga kapigaduhon sa pangabuhi, malubha nga balatian, ukon iban pa makalilibog nga mga problema nagdul-ong sa pila ka katawhan sang Dios sa pagbatyag nga ginapunaw ang ila espiritu. Kon kaisa ang ila man tagipusuon daw wala sing balatyagon. Daw subong bala nga sing indibiduwal nagsinggit sila: “Bangod ginpakita mo sa akon ang madamo nga kalisdanan kag kalamidad, kabay nga buhion mo ako liwat . . . Kabay nga palibutan kag lugpayan mo ako.” (Salmo 71:​20, 21) Paano sila nabuligan?

Kon Paano Atubangon ang mga Panikasog sang Kaaway

12. Paano gin-atubang ni Hari David ang katalagman kag mga pagtilaw?

¹² Ginapakita sang Salmo 143:5 kon ano ang ginhimo ni David sang gintublag sang katalagman kag dakung mga pagtilaw: “Nadumduman ko ang mga adlaw nga nagligad; ginpamalandungan ko ang tanan mo nga hinimuan; kinabubut-on ko nga ginhunahuna ang binuhatan sang imo mga kamot.” Gindumdom ni David ang mga pagpakig-angot sang Dios sa Iya mga alagad kag kon paano sia mismo ginluwas. Ginpamalandungan niya ang ginhimo ni Jehova tungod sa Iya dakung ngalan. Huo, pirme ginhunahuna ni David ang mga binuhatan sang Dios.

13. Kon nagaatubang kita sing mga pagtilaw, paano ang pagpamalandong naton sa dumaan kag sa modernong mga halimbawa sang matutom nga mga alagad nagabulig sa aton sa pagbatas?

¹³ Indi bala nga masami naton madumduman ang mga pagpakig-angot sang Dios sa iya katawhan? Pat-od gid! Nagalakip ini sang rekord nga ginhimo sang ‘dakung panganod sang mga saksi’ sang antes-ang-Cristiano nga panahon. (Hebreo 11:​32-38; 12:1) Ang hinaplas nga mga Cristiano sang unang siglo ginpalig-on man nga ‘dumdumon pirme ang nagligad nga mga adlaw’ kag kon ano ang ila ginbatas. (Hebreo 10:​32-34) Kamusta ang mga inagihan sang mga alagad sang Dios sa modernong tion, subong sang mga ginasugid sa Jehovah’s Witnesses​—⁠Proclaimers of God’s Kingdom?⁠a Ang mga sugilanon nga ginsugid didto kag sa iban pa nga mga publikasyon nagabulig sa aton sa paghinumdom kon paano ginbuligan ni Jehova ang iya katawhan nga batason ang mga pagdumili, mga pagbilanggo, mga pagdumog sang guban, kag mga kampo konsentrasyon kag mga kampo sang ulipon nga pagpangabudlay. May mga pagtilaw sa kadutaan nga may inaway, subong sang Burundi, Liberia, Rwanda, kag sa anay Yugoslavia. Kon may pagpamatok, ang mga alagad sang Dios nakabatas bangod sang paghupot sang isa ka mabakod nga kaangtanan kay Jehova. Ginsakdag sang iya kamot ang mga nagahimo sang iya kabubut-on subong ang labing importante sa ila kabuhi.

14. (a) Ano ang isa ka halimbawa sang pagsakdag sang Dios sa isa ka tawo sa kahimtangan nga mahimo nga kaanggid sa aton? (b) Ano ang matun-an mo gikan sa sinang halimbawa?

¹⁴ Apang, mahimo ka magsaligbat nga wala mo pa maagihi ining mapintas nga pag-abuso, kag ayhan magabatyag ka nga indi mo gid ini maagihan. Apang, ang pagsakdag sang Dios sa iya katawhan indi pirme suno gid sa mahimo nga ginatamod sang iban subong dramatiko nga mga kahimtangan. Ginsakdag niya ang madamong “kinaandan” nga mga indibiduwal sa “ordinaryo” nga mga kahimtangan. Yari ang isa lamang sang madamong halimbawa: Nakilala mo bala ang retrato sa ibabaw, kag nagabulig bala ini sa imo sa paghinumdom sang mga pagpakig-angot sang Dios sa iya katawhan? Nagguwa ini sa Ang Lalantawan sang Disiembre 1, 1996. Nabasa mo bala ang sugilanon ni Penelope Makris? Daw ano katahom nga halimbawa sang Cristianong integridad! Madumduman mo bala kon ano ang ginbatas niya gikan sa mga kaingod, kon paano niya ginbatuan ang malubha nga mga balatian, kag kon ano ang mga ginpanikasugan niya agod makapabilin sa bug-os tion nga ministeryo? Kamusta ang iya makapaladya nga eksperiensia sa Mytilene? Ang punto amo, nakita mo bala ang mga halimbawa kaangay sini subong bulig para sa aton tanan sa pagpahamtang sing mga prioridad, nagauna sang paghimo sang kabubut-on sang Dios sa aton kabuhi?

15. Ano ang pila sang mga binuhatan ni Jehova nga dapat naton pamalandungan?

¹⁵ Nagapabakod ini sa aton nga pamalandungan ang mga hilikuton ni Jehova, kaangay ni David. Sa pagtuman sang iya katuyuan, si Jehova naghatag sing aman para sa kaluwasan paagi sa kamatayon, pagkabanhaw, kag paghimaya sang iya Anak. (1 Timoteo 3:16) Gintukod niya ang iya langitnon nga Ginharian, gintabog sa langit si Satanas kag ang iya mga demonyo, kag ginpasag-uli ang matuod nga pagsimba diri sa duta. (Bugna 12:​7-12) Gintukod niya ang isa ka espirituwal nga paraiso kag ginpakamaayo ang iya katawhan sing pag-uswag. (Isaias 35:​1-10; 60:22) Ang iya katawhan nagahatag karon sing katapusan nga panaksi antes magsugod ang dakung kapipit-an. (Bugna 14:​6, 7) Huo, madamo kita sing dapat pamalandungan.

16. Sa ano kita ginapalig-on nga magkabalaka, kag ano ang ginapatudok sini sa aton?

¹⁶ Ang paghunahuna naton pirme sa binuhatan sang kamot sang Dios sa baylo nga magmasako sa tawhanon nga mga panikasog nagapatudok sa aton nga ang gin-aplikar nga gahom ni Jehova indi mapamatukan. Apang, ining mga binuhatan wala nalatiran sa makatilingala nga pisikal nga mga binuhatan sang tinuga sa mga langit kag diri sa duta. (Job 37:​14; Salmo 19:​1; 104:24) Ang iya makatilingala nga mga binuhatan nagalakip sang mga buhat sang kaluwasan para sa iya katawhan gikan sa kaaway nga mga manugpigos, subong sang ginpasundayag sa mga inagihan sang iya dumaan nga pinili nga katawhan.​—⁠Exodo 14:​31; 15:⁠6.

Paghibalo sang Dalan nga Dapat Laktan

17. Daw ano ka matuod si Jehova kay David, kag paano kita mapasalig sini?

¹⁷ Si David nangamuyo sing bulig agod ang pagkabasa sang kabuhi magamala sa iya: “Ginauntay ko ang akon mga kamot sa imo; ang akon kalag kaangay sang duta nga kigas sa imo. O dalidali sa pagsabat sa akon, O Jehova. Nagakalipong ang akon espiritu. Dili pagtagua sa akon ang imo nawong, basi mangin kaangay ako sang mga nagapanaug sa buho.” (Salmo 143:​6, 7) Nakahibalo si David, isa ka makasasala, nga nahibaluan sang Dios ang iya kahimtangan. (Salmo 31:7) Kon kaisa mahimo man kita magbatyag nga maluya ang aton espirituwalidad. Apang ang kahimtangan indi nga wala sing paglaum. Mahimo padasigon ni Jehova, nga nagapamati sang aton mga pangamuyo, ang pagpasag-uli sa aton paagi sa pagpapagsik sa aton sa kalalangan sang mahigugmaon nga mga gulang, sang mga artikulo sa Ang Lalantawan, ukon sang mga bahin sa miting nga daw gindesinyo gid para sa aton.​—⁠Isaias 32:​1, 2.

18, 19. (a) Ano dapat ang mangin hanuot nga pag-ampo naton kay Jehova? (b) Sa ano kita makapat-od?

¹⁸ Ang aton pagsalig kay Jehova magapahulag sa aton sa pagpangabay sa iya: “Papamatia ako sang imo mahigugmaon nga kalulo, kay sa imo nagasalig ako. Sugiri ako sang dalan nga dapat ko laktan.” (Salmo 143:8) Ginpaslaw bala niya si Sister Makris, nga napahilayo sa isa ka pulo sa Gresya? Gani paslawon ka bala niya samtang ginahimo mo ang iya kabubut-on subong amo ang labing importante nga butang sa imo kabuhi? Luyag punggan ukon pauntaton sing bug-os sang Yawa kag sang iya mga ahente ang aton hilikuton nga pagwali sang Ginharian sang Dios. Nagaalagad man kita sa mga kadutaan diin ginatugot ang matuod nga pagsimba ukon nagaalagad diin ginadumili ini, ang aton nahiusa nga mga pangamuyo nagahisanto sa pangabay ni David: “Luwasa ako sa akon mga kaaway, O Jehova. Nagadangop ako sa imo nga taguon ako.” (Salmo 143:9) Ang aton kalig-unan batok sa espirituwal nga kalamidad nasandig sa pagpuyo sa tago nga duog sang Labing Mataas.​—⁠Salmo 91:⁠1.

¹⁹ Ang aton pagtuo sa kon ano ang labing importante malig-on nga napasad. (Roma 12:​1, 2) Pamatuki, nian, ang mga panikasog sang kalibutan nga ipilit sa aton ang ginahunahuna sini nga importante sa tawhanon nga mga pagpahito sang mga butang. Padayuna nga ipakita sa tanan nga bahin sang imo kabuhi ang nahibaluan mo nga labing importante​—⁠ang paghimo sang kabubut-on sang Dios.​—⁠Mateo 6:​10; 7:⁠21.

20. (a) Ano ang matun-an naton nahanungod kay David sa Salmo 143:​1-9? (b) Paano karon ginapabanaag sang mga Cristiano ang espiritu ni David?

²⁰ Ang nahaunang siam ka bersikulo sang Salmo 143 nagapadaku sang suod personal nga kaangtanan ni David kay Jehova. Sang ginlibutan sang mga kaaway, nangayo sia sing hilway sang panuytoy sa Dios. Ginbubo niya ang iya tagipusuon, nangayo sing bulig sa husto nga banas nga laktan. Kaanggid man ini karon sa nagkalabilin sang mga hinaplas sang espiritu sa duta kag sa ila mga kaupdanan. Ginakabig nila ang ila kaangtanan kay Jehova subong hamili samtang nagapangayo sila sing panuytoy sa iya. Ang paghimo sang kabubut-on sang Dios amo gihapon ang labing importante sa ila, walay sapayan sang mga pag-ipit gikan sa Yawa kag sa kalibutan.

21. Ngaa importante para sa aton nga magpahamtang sing maayong halimbawa agod matudluan naton ang iban sa kon ano dapat ang labing importante sa ila kabuhi?

²¹ Dapat kilalahon sang minilyon nga nagatuon sang Biblia upod sa mga Saksi ni Jehova nga ang paghimo sang kabubut-on sang Dios amo ang labing importante. Mabuligan naton sila nga mahangpan ini kon nagahinun-anon sang kapitulo 13 sang libro nga Ang Ihibalo nga Nagadul-ong sa Kabuhi nga Walay Katapusan, nga nagapadaku sang mga prinsipio nga nadalahig subong mga matinumanon sa Pulong.⁠b Sa pagkamatuod, dapat nila makita sa aton huwaran ang ginatudlo naton sa ila. Pagkatapos sang malip-ot lamang nga tion, mahibaluan man nila ang dalan nga dapat nila laktan. Samtang nahantop sing personal sining mga minilyon kon ano dapat ang labing importante sa ila kabuhi, madamo ang mapahulag sa paghimo sang mga tikang sang dedikasyon kag bawtismo. Pagkatapos sina, mabuligan sila sang kongregasyon sa paglakat sing padayon sa dalan sang kabuhi.

22. Anong mga pamangkot ang binagbinagon sa masunod nga artikulo?

²² Madamo ang nagabaton dayon nga ang kabubut-on sang Dios amo dapat ang labing importante sa ila kabuhi. Apang, paano ginatudluan sing progresibo ni Jehova ang iya mga alagad sa paghimo sang iya kabubut-on? Ano ang mga kaayuhan nga mahatag sini sa ila? Ining mga pamangkot pagabinagbinagon, upod sang paghinun-anon sa yabi nga bersikulo, ang Salmo 143:​10, sa masunod nga artikulo.

[Mga footnote]

Ano ang Imo Sabat?

◻ Paagi sa pag-aplikar sang Filipos 1:​9, 10, paano naton mapahamtang ang mga prioridad?

◻ Paano ginpakita ni Jesus kon ano ang labing importante sa iya kabuhi?

◻ Ano ang matun-an naton gikan sa mga ginhimo ni David sang napaidalom sia sa pagtilaw?

◻ Sa anong paagi ang Salmo 143:​1-9 nagabulig sa aton karon?

◻ Ano dapat ang labing importante sa aton kabuhi?

[Retrato sa pahina 10]

Ang mga ginhimo ni David nagpamatuod sang iya pagsalig kay Jehova

[Credit Line]

Ginkopya gikan sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s