Takus si Jehova sa Dayon nga Pagdayaw

“Sa tagsa ka adlaw pakamaayuhon ko ikaw, kag dayawon ko ang imo ngalan tubtob sa tion nga dinapat-od.”​—⁠SALMO 145:⁠2.

 1. Ngaa madamo sing rason si David agod dayawon si Jehova?

ANG matutom nga alagad ni Jehova nga si David may madamong rason agod dayawon ang Dios. Nahibaluan sining bantog nga hari sang dumaan nga Israel ang pagkadaku kag pagkaayo ni Jehova kag nahantop niya nga ang Iya pagkahari dayon. Takus dayawon ang Labing Mataas bangod ginapaayawan niya ang handum sang tanan nga butang nga buhi kag bangod ginapakitaan niya sing kaluoy ang iya matutom nga mga alagad.

 2. (a) Paano gin-areglo ang Salmo 145? (b) Anong mga pamangkot ang pagabinagbinagon naton?

² Si David naghatag sing pagdayaw sa Dios sa ika-145 nga Salmo. Ang kada bersikulo sining akrostiko nga salmo nagaumpisa sa sunodsunod nga letra sang Hebreo nga alpabeto, bisan pa nga ginlaktawan ang isa ka letra (nun). Ang akrostiko nga areglo mahimo nga nakabulig agod madali ini madumduman. Ang Salmo 145 nagapakataas kay Jehova, subong sa mga pulong: “Sa tagsa ka adlaw pakamaayuhon ko ikaw, kag dayawon ko ang imo ngalan tubtob sa tion nga dinapat-od.” (Salmo 145:⁠2) Apang paano kita maapektuhan sini nga salmo? Ano ang mahimo sini para sa aton kaangtanan sa Dios? Agod mahibaluan, binagbinagon naton anay ang mga bersikulo 1 tubtob 10.

Ang Pagkadaku ni Jehova Dimatungkad

 3. Kaangay ni David, ano ang aton utang sa ‘Dios naton nga Hari,’ kag ngaa?

³ Si David isa ka hari, apang ginkilala niya ang pagkasoberano ni Jehova sa iya, nga nagasiling: “Dayawon ko ikaw, O Dios nakon nga Hari, kag pakamaayuhon ko ang imo ngalan tubtob sa tion nga dinapat-od, bisan sing dayon.” (Salmo 145:⁠1) Upod ang kaanggid nga pagtahod, ginapakataas sang mga Saksi ni Jehova ang ngalan sang Dios kag ginadayaw sia sa bug-os nga duta. Ang aton kabuhi makalilipay samtang nagapakigbahin kita sa sina nga buluhaton. Kaangay ni David, utang naton ang pagtuman kag pagpasakop kay Jehova subong ‘Dios naton nga Hari.’ Kag ngaa indi? Sia ang “dayon nga Hari.” (Bugna 15:⁠3) Dugang pa, ang Daku Pa nga David, si Jesucristo, nagahari halin sa langitnon nga Bukid Sion kutob sang 1914, nagahatag sa aton sing matahom nga halimbawa sang pagpasakop kay Jehova, ang Dayon nga Hari.

 4. Paano naton ‘mapakamaayo ang ngalan sang Dios’?

⁴ Si David nagsiling nga ‘pakamaayuhon [niya] ang ngalan sang Dios.’ Paano ini mahimo sang isa lamang ka tawo? Ti, sa tunga sang iban nga mga butang, ang pagpakamaayo sa isa nagakahulugan nga magapamulong kita sing maayo nahanungod sa iya. Ang pagpakamaayo sa ngalan sang Dios nagakahulugan nga may makusog kita nga gugma sa iya kag sa iya balaan nga ngalan, si Jehova. Wala gid kita nagareklamo nahanungod sa Dios, wala gid nagabasol sa iya, wala gid nagapangduhaduha sa iya kaayo. Kon may amo kita sina nga panimuot, nagdedikar kay Jehova, kag naghupot sang integridad subong bawtismado nga mga Saksi niya nga makasiling kita kaupod ni David nga aton ‘pakamaayuhon ang ngalan sang Dios sing dayon.’ Kon ginahuptan naton sa aton kaugalingon ang gugma sang Dios, mabaton naton ang dulot nga kabuhi nga walay katapusan kag sa amo mapakamaayo si Jehova sing dayon.​—⁠Judas 20, 21.

 5. Ano ang epekto sa aton sang handum nga pakamaayuhon ang Dios sa “tagsa ka adlaw”?

⁵ Kon ginahigugma gid naton ang aton Manughatag sing Kabuhi, magasiling kita kaupod ni David: “Sa tagsa ka adlaw pakamaayuhon ko ikaw, kag dayawon ko ang imo ngalan tubtob sa tion nga dinapat-od, bisan sing dayon.” (Salmo 145:⁠2) Daw ano gid ka walay pulos ang isa ka adlaw kon indi naton pagpakamaayuhon ang Dios! Kabay nga indi kita mangin tuman kasaku ukon tuman ka mabinalak-on sa materyal nga mga butang sa bagay nga indi kita makapamulong sing maayo nahanungod sa aton langitnon nga Amay ukon makapangamuyo sa iya sa adlaw-adlaw. Ginpakita ni Jesus nga dapat kita magpangamuyo sa tagsa ka adlaw sang nagsiling sia sa modelo nga pangamuyo: “Hatagi kami sa adlaw-adlaw sang amon kalan-on suno sa inadlaw nga kinahanglanon.” (Lucas 11:⁠3) Madamo sang mga yara sa bug-os tion nga pag-alagad ang nagadayaw sa Dios adlaw-adlaw samtang nagapakigbahin sila sa Cristianong ministeryo. Apang bisan ano man ang aton kahimtangan, ang aton tagipusuon dapat magpahulag sa aton nga dayawon ang Dios sa pila ka paagi kada adlaw. Kag hunahunaa lamang! Subong dedikado nga mga Saksi ni Jehova nga may paglaum nga kabuhi nga dayon, may yara kita makalilipay nga palaabuton nga dayawon ang iya ngalan sing dayon.​—⁠Juan 17:⁠3.

 6. Ngaa si Jehova “dayawon sing daku”?

⁶ May rason gid kita nga dayawon ang Dios sa bug-os nga adlaw, kay si David nagdugang: “Daku si Jehova kag dayawon sing daku, kag ang iya pagkadaku dimatungkad.” (Salmo 145:⁠3) Daku gid si Jehova sa bagay nga dimatupungan sia, kag ang iya pagkasoberano walay latid. Ginbaton sang hari sang Babilonia nga si Nabocodonosor: “Wala gid sing makapugong sang [kamot] sang Dios ukon makasiling sa iya, ‘Ano bala ang ginahimo mo?’ ” (Daniel 4:​34, 35) Si Jehova “kahadlukan labaw sa tanan nga dios.” (Salmo 96:⁠4) Indi katingalahan nga sia “dayawon sing daku.” Ti, wala sing mga pulong sang pagdayaw ang tuman kataas kon nagadayaw kay Jehova! Takus sia sang walay latid kag dayon nga pagdayaw.

 7. Ano ang nagapamatuod nga ang “pagkadaku [sang Dios] dimatungkad”?

⁷ Ang “pagkadaku [ni Jehova] dimatungkad.” Bisan pa kon daw ano ka daku ang iya lawas, ang iya pagkadaku nasandig sa kon ano nga sahi sang Dios sia. Huo, ang mga butang nga gintuga niya tuman gid katingalahan para sa aton nga hangpon, kag kita mismo “ginhimo sing makatilingala.” (Salmo 139:14; Job 9:10; 37:⁠5) Dugang pa, daw ano katahom ang paggawi ni Jehova nga Dios sang iya kaugalingon! Matutom niya nga ginatuman ang iya mga saad kag mahigugmaon nga ginapahayag ang iya mga katuyuan. Apang, indi gid naton mahibaluan ang tanan nahanungod sa Dios. Tubtob sa walay katubtuban, magadugang ang aton ihibalo sa iya, sa iya pagpanuga, kag sa iya mga katuyuan.​—⁠Roma 11:​33-36.

Dayawa ang mga Binuhatan ni Jehova

 8. (a) Paano pagadayawon “halin sa isa ka kaliwatan pakadto sa isa” ang mga binuhatan ni Jehova? (b) Kon ginatudluan naton ang aton mga kabataan nahanungod sa mga binuhatan kag mga buhat, paano nila tamdon ang pagsimba sa iya? (c) Subong malipayon nga “kaliwatan,” ano ang ginhimo sang nagkalabilin?

⁸ Madamo ang masiling sa pagdayaw nahanungod sa aton dimatungkad nga dakung Dios sa bagay nga si David napahulag sa pagsiling: “Ang imo mga binuhatan pagadayawon halin sa isa ka kaliwatan pakadto sa isa, kag ibantala nila ang imo gamhanan nga mga buhat.” (Salmo 145:⁠4) Gindayaw sang sunodsunod nga mga kaliwatan sang katawhan ang mga binuhatan ni Jehova kag ginsugid ang iya gamhanan nga mga buhat. Daw ano nga pribilehiyo ang isugid ining mga butang sa ginahiwatan naton sing mga pagtuon sa Biblia! Halimbawa, masugid naton sa ila nga gintuga sang Dios ang tanan nga butang. (Genesis 1:1–2:25; Bugna 4:11) Masugid naton ang nahanungod sa iya gamhanan nga mga buhat sadto anay sang ginluwas niya ang mga Israelinhon gikan sa pagkaulipon sa Egipto, ginbuligan sila nga malupig ang taga-Canaan nga mga kaaway, gintipigan sila gikan sa pagpamatay sa dumaan nga Persia, kag madamo pa. (Exodo 13:​8-10; Hukom 4:15; Ester 9:​15-17) Kag wala bala kita ginapahulag sa pagsugid sa aton kabataan nahanungod sa mga binuhatan kag mga buhat ni Jehova? Kon ginasugid naton ina sa aton kabataan kag nakita nila kita nga nagaalagad sing malipayon sa Dios, mahimo nila tamdon ang pagsimba sa iya nga kalipay kag magtubo nga ‘ang kalipay ni Jehova amo ang ila kusog.’ (Nehemias 8:10; Salmo 78:​1-4) Ang hinaplas nga nagkalabilin nagahuman sa isa ka malipayon nga “kaliwatan” sang mga Saksi ni Jehova nga nagadayaw sa mga binuhatan sang Dios sa “dakung kadam-an,” ang bahin sang kaliwatan nga magapuyo sa Paraiso nga duta.​—⁠Bugna 7:⁠9.

 9. Samtang ginabinagbinag naton ang mga binuhatan kag gamhanan nga mga butat sang Dios, sa ano kita nakapat-od?

⁹ Samtang ginabinagbinag naton ang mga binuhatan kag gamhanan nga mga buhat sang Dios, mangin labi kita ka kombinsido nga “si Jehova indi magbiya sa iya katawhan tungod sa iya dakung ngalan.” (1 Samuel 12:22; Salmo 94:14) Kon nagaatubang kita sing mga pagtilaw, mga kabudlayan, kag paghingabot, mangin malinong kag makasalig kita nga “ang paghidait sang Dios” magaamlig sang aton mga tagipusuon kag mga ikasarang sa hunahuna. (Filipos 4:​6, 7) Gani daw ano gid ka nagakaigo nga isugid naton sa iban ang nahanungod sa aton mahigugmaon kag maamligon nga langitnon nga Amay!

10. Ano ang ginalakip sang “makatilingala nga mga buhat” ni Jehova, kag paano kita makabenepisyo gikan sa pagpamalandong sa sini?

¹⁰ Dapat kita maghinguyang sing tion sa pagpamalandong sa pagkahalangdon ni Jehova kag mga binuhatan niya, kay si David nagdugang: “Sang mahimayaon nga pagkahari sang imo kadungganan kag sang imo makatilingala nga mga binuhatan, magapamalandong ako.” (Salmo 145:⁠5) Ang kadungganan sang Dios makakulugmat kag dimapaanggiran. (Job 37:22; Salmo 148:13) Busa, pamalandungan ni David ang mahimayaon nga pagkahari sang kadungganan ni Jehova. Ginpamalandungan man sang salmista ang “makatilingala nga mga binuhatan” sang Dios. Nagalakip ini sang pagpatuman sang balaan nga katarungan sa paglaglag sa mga makasasala kag pagtipig sa diosnon, subong sa Anaw. (Genesis 7:​20-24; 2 Pedro 2:⁠9) Ang pagpamalandong sa sina nga mga butang nagapabakud sang aton kaangtanan kay Jehova kag nagapaposible nga masugid naton sa iban ang nahanungod sa iya kadungganan kag makatilingala nga mga binuhatan. Sa sulod sang 40 ka adlaw sa kamingawan, si Jesus ginpabakud batok sa pagsulay paagi sa pagpamalandong sa mga butang nga ginpatalupangod sa iya sang nagbukas nga langit. (Mateo 3:13–4:11) Ginsugid niya sa iban ang nahanungod sa kadungganan kag makatilingala nga mga binuhatan ni Jehova pagkatapos sadto.

11. (a) Ngaa hinadlukan ang mga pumuluyo sang Jerico? (b) Upod sa anong espiritu nga ang mga Saksi ni Jehova nagasugid nahanungod sa “makakulugmat nga mga binuhatan” kag sa iya “pagkadaku”?

¹¹ Kon nagahambal kita nahanungod sa mga kadungganan kag mga binuhatan sang Dios, ginapahulag naton ang iban nga maghambal nahanungod sa ila. Siling ni David: “Ang mga tawo magapamulong sang gahom sang imo makakulugmat nga mga binuhatan; kag ako magapahayag sang imo pagkadaku.” (Salmo 145:⁠6) Si Rahab nagpamulong nahanungod sa kahadlok nga ginbatyag sang mga pumuluyo sang Jerico sang nabatian nila ang nahanungod sa pagluwas ni Jehova sa mga Israelinhon sa Dagat nga Pula kag pagpadaug sa ila batok sa duha ka Amorinhon nga hari. Mahimo nga madamo gid ang sugilanon nahanungod sa sinang “makakulugmat nga mga binuhatan” sa Jerico. (Josue 2:​9-11) Kag pat-od gid nga ang nagahilapit nga “dakung kapipit-an” makakulugmat gid. (Mateo 24:21) Apang ang mga butang nga makahaladlok katama sa mga tawo nga nahamulag sa Dios nagapukaw sa sulod sang matarong nga mga tagipusuon sang “kahadlok kay Jehova,” isa ka maayo nga pagkakugmat sa iya. (Hulubaton 1:⁠7) Upod ang matinahuron nga espiritu, ang mga Saksi ni Jehova nagapamulong nahanungod sa mga pagpahayag sang gahom sang Dios. Ti, ang dakung Manughimo sang Katingalahan amo ang pangunang topiko nga mahambalan sa ulot sang hinaplas kag sang ila dutan-on nga mga kaupdanan! Kag bisan ang paghingabot wala nagapugong sa ila gikan sa pagsugid sa iban nahanungod sining mga butang kag sa “pagkadaku” ni Jehova.​—⁠Binuhatan 4:​18-31; 5:⁠29.

Dayawa si Jehova Tungod sang Iya Pagkaayo

12. Paano naton ‘ginabungat’ ang pagkaayo ni Jehova?

¹² Takus dayawon ang Dios indi lamang tungod sang iya pagkadaku kundi tungod man sang iya pagkaayo kag pagkamatarong. Gani si David nagsiling: “Ibungat (“bubble over” sa Ingles) nila ang handumanan sang imo dakung pagkaayo, kag magaamba sang imo pagkamatarong.” (Salmo 145:⁠7) Ang pagkaayo ni Jehova daku gid katama sa bagay nga ‘nagabungat’ kita upod ang makalilipay nga ekspresyon nahanungod sini. Sa Hebreo, ang ideya amo ang nahanungod sa tubig nga nagabukal gikan sa tuburan. Gani kabay nga ibungat naton ang mapasalamaton nga pagdayaw sa Dios, kaangay sang mabaskog nga ilig. (Hulubaton 18:⁠4) Sa ila dakung espirituwal nga kahalitan, nalipatan sang Israel ang pagkaayo ni Jehova. (Salmo 106:​13-43) Apang, tuguti ang aton tagipusuon nga magaawas sa pasalamat nga ang iban naghinulsol sa tapos nga nahibaluan nila kon daw ano kaayo si Jehova sa iya dedikado nga mga Saksi.​—⁠Roma 2:⁠4.

13. Ano dapat ang epekto sa aton sang mga pagpahayag sang balaan nga katarungan kag pagkamatarong?

¹³ Kabay nga ang mga pagpahayag sang balaan nga katarungan kag pagkamatarong magapahulag man sa aton sa pag-amba. Kon amo sini ang aton balatyagon, pangitaon naton anay indi lamang ang Ginharian sang Dios kundi ang iya man pagkamatarong. Pirme naton luyag nga ang aton paggawi nagadala sing kadayawan kay Jehova. Huo, mangin tayuyon kita nga mga manugbantala sang Ginharian nga may madamo nga hilimuon sa pag-alagad sa Dios. Ang aton pagdayaw kay Jehova indi gid malubong sa lulubngan sang kalinong.​—⁠Mateo 6:33; 1 Corinto 15:58; Hebreo 10:⁠23.

Si Jehova Maluluy-on

14. Ano ang pamatuod nga “si Jehova mainayuhon kag maluluy-on”?

¹⁴ Nagahatag sang dugang dalayawon nga mga kinaiya sang Dios, si David nagsiling: “Si Jehova mainayuhon kag maluluy-on, makuli sa pagpangakig kag daku sa mahigugmaon nga kalulo.” (Salmo 145:⁠8) Ang Dios mainayuhon sa bagay nga sia maayo kag maalwan gid. (Mateo 19:17; Santiago 1:⁠5) Nagahimo sia sing maayo bisan sa mga wala nagaalagad sa iya. (Binuhatan 14:​14-17) Si Jehova maluluy-on man, maalwan, “nagadumdom nga kita yab-ok.” Wala niya ginatamay ang buong nga tagipusuon ukon ginapakig-angotan kita suno sa aton mga sala kundi labi pa ka maluluy-on sang sa pinakamahigugmaon nga tawhanon nga amay. (Salmo 51:17; 103:​10-14) Ti, sa pinakadaku nga pagpakita sing kaluoy, ginpadala niya ang iya hinigugma nga Anak agod mapatay tungod sa aton agod mapasag-uli kita sa Dios kag matilawan sing tunay ang iya pagkamainayuhon!​—⁠Roma 5:​6-11.

15. Ngaa masiling nga si Jehova “makuli sa pagpangakig” kag “daku sa mahigugmaon nga kalulo”?

¹⁵ Ang aton langitnon nga Amay makuli sa pagpangakig. Wala sia nagapautwas sing dimakatarunganon nga kaakig. Si Jehova “daku [man] sa mahigugmaon nga kalulo.” Diri ang Hebreo nagasaysay sang kalulo nga halin sa gugma kag nagaangot sang iya kaugalingon sa isa ka butang. Amo sini diri tubtob ang iya katuyuan sa sina nga butang matuman. Ang tal-us nga pagbadbad amo ang “maunungon nga gugma.” Sa tunga sang iban nga mga butang, ang mahigugmaon nga kalulo, ukon maunungon nga gugma sang Dios, ginpakita sa mga buhat sang paghilway, pagtipig, pag-amlig, paghilway gikan sa mga palaligban, kag pagpasag-uli gikan sa sala paagi sa gawad. (Salmo 6:4; 25:7; 31:​16, 21; 40:11; 61:7; 119:​88, 159; 143:12; Juan 3:16) Ang katunayan nga wala gilayon pagpahanaboa ni Jehova ang Armagedon pagkatapos sang ‘inaway sa langit’ nagapaposible sa kadam-an nga makatigayon sing kaluwasan, ang daku nga ekspresyon sang balaan nga mahigugmaon nga kalulo.​—⁠Bugna 12:​7-12; 2 Pedro 3:⁠15.

16. Paano si Jehova napamatud-an nga “maayo sa tanan”?

¹⁶ Bangod sang kaluoy sang Dios, masiling nga sia may yara maluluy-on nga tagipusuon. Si David nagsiling: “Si Jehova maayo sa tanan, kag ang iya mga kaluoy sa ibabaw sang iya tanan nga binuhatan.” (Salmo 145:⁠9) Huo, ang Dios maayo sa mga Israelinhon. Bangod sina, “nagapasubang sia sang iya adlaw sa mga malauton kag sa mga maayo kag nagapaulan sa mga matarong kag sa mga dimatarong.” (Mateo 5:​43-45) Sa Eden, si Jehova nagsaad sing “binhi” nga mangin pagpakamaayo. Sang ulihi ginsilingan niya si Abraham: “Paagi sa imo binhi ang tanan nga pungsod sa duta magapakamaayo sang ila kaugalingon.” (Genesis 3:15; 22:18) Kag ang pagkaayo sang Dios daku gid katama sa sining “tion sang katapusan” sa bagay nga ang bisan sin-o ‘makakari kag makainum sang tubig sang kabuhi sa walay bayad.’ (Daniel 12:4; Bugna 22:17) Si Jehova handa sa paghimo sing maayo sa tanan intelihente nga mga tinuga, kag ang iya kaayo magapasuod pa gid sa aton sa iya.

17. Sa anong kahulugan nga ang ‘mga kaluoy [ni Jehova] sa ibabaw sang iya tanan nga binuhatan’?

¹⁷ Ang “kaluoy [ni Jehova] sa ibabaw sang iya tanan nga binuhatan” sa bagay nga nagahimo sia sing nagakaigo nga aman para sa mga tawo kag mga sapat. Sia amo ang “Isa nga nagahatag sing pagkaon sa tanan nga unod.” (Salmo 136:25; 147:⁠9) Ang Dios wala nagapadungog sa manggaranon kag nagayaguta sa mga ginasimusimo, nagapakataas sa bugalon kag nagatamay sa kubos, nagabayaw sa buangbuang kag nagapakanubo sa maalam. Ginahimo ina sang makasasala nga mga tawo apang wala ini ginahimo sang aton maluluy-on langitnon nga Amay. (Salmo 102:17; Sofonias 3:​11, 12; Manugwali 10:​5-7) Kag daw ano ka daku ang kaluoy, kaayo, kag mahigugmaon nga kalulo sang Dios sa pagpaposible sang kaluwasan paagi sa halad gawad sang iya hinigugma nga Anak!​—⁠1 Juan 4:​9, 10.

Ang mga Maunungon Nagapakamaayo kay Jehova

18. (a) Paano ang mga binuhatan sang Dios “magadayaw” sa iya? (b) San-o kita dapat mapahulag sa pagdayaw kay Jehova?

¹⁸ Takus dayawon ang Dios sa tanan nga bahin. Subong sang ginsiling ni David: “Ang tanan mong binuhatan magadayaw sa imo, O Jehova, kag ang imo mga maunungon magapakamaayo sa imo.” (Salmo 145:10) Ang mga buhat sang Dios sa pagpanuga ‘nagadayaw’ sa iya, subong nga ang gintukod sing maayo nga balay kadayawan sa nagtukod sini kag ang matahom nga plorera sa malantip nga maninihon sini. (Ipaanggid ang Hebreo 3:4; Isaias 29:16; 64:⁠8.) Makatilingala katama ang mga buhat sa pagpanuga ni Jehova sa bagay nga nagpahulag ini sa mga anghel kag sa mga tawo nga dayawon sia. Ang mga anghel nga anak sang Dios naghinugyaw sa kalipay sang ginpasad niya ang duta. (Job 38:​4-7) Si David nagsiling nga ‘ang mga langit nagapahayag sang himaya sang Dios kag ang kahawaan nagapakita sang binuhatan sang iya mga kamot.’ (Salmo 19:​1-6) Madayaw gid naton si Jehova kon makita naton ang dapay nga nagatimbuok sa langit ukon ang gasela nga nagalukso sa berde nga bakolod. (Job 39:26; Ambahanon ni Solomon 2:17) Nagakaigo ang pagdayaw kon nagaani kita sing mga patubas ukon nagasalusalo kaupod sa mga abyan. (Salmo 72:16; Hulubaton 15:17) Ang aton gindesinyo sing makatilingala nga mga lawas ma­gatiklod man sa aton sa pagpabutyag sang mapasalamaton nga pagdayaw sa Dios.​—⁠Salmo 139:​14-16.

19. Sin-o ang “mga maunungon,” kag ano ang ginahimo nila?

¹⁹ Sa karon, ang hinaplas sang espiritu nga “mga maunungon” ni Jehova sa duta nagapakamaayo sa iya. Nagapamulong sila sing maayo nahanungod sa iya kag nalangkag makita nga ang iya kabubut-on pagahimuon sa langit subong sa langit. (Mateo 6:​9, 10) Samtang ginasugid sang mga hinaplas sa iban ang nahanungod sa makatilingala nga mga binuhatan sang Dios, ang dakung kadam-an nagapamati sa nagadugang pa nga kadamuon. Upod sa hinaplas nga mga maunungon, nagaalagad sila sing makugi subong mga manugbantala sang Ginharian. Ang pasalamat nagapahulag bala sa imo nga makigbahin sing regular sa sining hilikuton sa kadayawan sang Dios?

20. (a) Paano pakabalaanon ang ngalan ni Jehova? (b) Nahanungod sa Salmo 145, anong mga pamangkot ang nagapabilin nga binagbinagon?

²⁰ Subong mga Saksi ni Jehova, kaangay kita ni David sa paghatag sa Dios sing pagdayaw. Para sa aton ang pagpakabalaan sa balaan nga ngalan ni Jehova kag ang pagdayaw sa sini amo ang importante gid. Bangod ang balaan nga ngalan pakabalaanon sang Ginharian sang Dios, ining panudlo sa Biblia nahanungod sa Ginharian amo ang nagapanguna nga bahin sang maayong balita nga aton ginabantala. Ang Salmo 145 nagahatag bala sing espirituwal nga kasanagan sa sining bahin? Ano ang ginapakita sang aton paghinun-anon sa nabilin nga bahin sini nga salmo? Sa anong iban pa nga mga paagi napamatud-an nga si Jehova takus sa dayon nga pagdayaw?

Ano ang Imo mga Komento?

◻ Paano naton mapakamaayo ang ngalan ni Jehova?

◻ Ano ang iban sa dalayawon nga mga buhat sang Dios?

◻ Paano kita magahulag kon ginaapresyar naton ang pagkaayo ni Jehova?

◻ Sa anong mga paagi ginpakita ang kaluoy sang Dios?

[Piktyur sa pahina 12]

Ginasugid mo bala sa imo kabataan ang gamhanan nga mga buhat ni Jehova, subong sang ginhimo sang diosnon nga mga ginikanan sa dumaan nga Israel?

[Piktyur sa pahina 15]

Subong nga ang natukod sing maayo nga balay kadayawan sa nagtukod sini, ang mga buhat ni Jehova sa pagpanuga nagadala sa Iya sing kadayawan