Simbaha si Jehova nga May Matinlo nga mga Kamot

GINBUGNAAN, si salmista David nag-amba: “Hinawan ko ang akon mga kamot sa pagkawalay sala, kag magalibot ako sa imo halaran, O Jehova.” —⁠Salmo 26:⁠6.

Sang ginkomposo ining mga tinaga, mahimo nga ginapatungdan ni David ang kustombre sang Levinhon nga mga saserdote sang Israel sa pagsaka sa rampa sang halaran kag nian ibutang ang ila mga halad sa kalayo. Apang antes himuon ining buhat sang pagsimba, ang mga saserdote ginasugo nga hinawan ang ila mga kamot kag mga tiil. Indi ini diutay nga detalye. Ang indi paghimo sining tikang sa paghanda magakahulugan sang kabuhi sang saserdote!​—⁠Exodo 30:​18-21.

Ang malaragwayon nga paghinaw nagaresulta sa espirituwal kag moral nga katinlo. (Isaias 1:16; Efeso 5:⁠26) Luyag ni Jehova nga ‘magamartsa [kita] sa palibot sang iya halaran’ karon paagi sa pag-alagad sa iya. Apang ginasugo niya nga himuon naton ini nga may matinlo nga mga kamot​—⁠subong sang ginsiling ni David, mga kamot nga ginhinawan sa “pagkawalay sala.” Indi ini diutay nga sugo, kay yadtong nagahimo sing kahigkuan indi makapanubli sang Ginharian sang Dios. (Galacia 5:​19-21) Ang pagkabuhi sa diosnon nga hilikuton wala nagahatag sa isa sing pahanugot nga maghimo sing imoral nga pagginawi. Sa amo si apostol Pablo nagsulat: “Ginasakit ko ang akon lawas kag ginahimo ini nga ulipon, agod nga, sa tapos nga nakawali ako sa iban, ako mismo indi pagsikwayon.”​—⁠1 Corinto 9:⁠27.

Yadtong nagatinguha nga matigayon ang kahamuot sang Dios kag ang matuod nga kalipay dapat mag-alagad kay Jehova nga may matinlo nga kamot. Kaangay ni David, nagalakat sila “nga may integridad sa tagipusuon kag sa pagkatarong.”​—⁠1 Hari 9:⁠4.