LEKSION 10
Ano ang Imo Mabenepisyo sa mga Miting sang mga Saksi ni Jehova?
Nakatambong ka na bala sa miting sang mga Saksi ni Jehova? Kon wala pa, basi nahuya ka ukon nakulbaan. Mahimo nagapensar ka: ‘Ano ang ginahimo nila sa ila mga miting? Ngaa importante gid ini? Ngaa dapat ako magtambong?’ Sa sini nga leksion, matun-an mo kon ano ang imo mabenepisyo sa miting kag kon paano ini makabulig nga mangin mas malapit ka sa Dios.
1. Ngaa nagatipon ang mga Saksi ni Jehova?
Ginasugid sang manunulat sang Biblia ang pinakaimportante nga rason sa pagtipon: “Sa tunga sang daku nga kongregasyon, dayawon ko si Jehova.” (Salmo 26:12) Subong, ang mga Saksi ni Jehova sa bilog nga kalibutan nagatipon kada semana para simbahon ang Dios, dayawon sia paagi sa mga kanta, kag mangamuyo. Kada tuig, may pila man sila ka dalagku nga pagtilipon.
2. Ano ang matun-an mo sa amon mga miting?
Sa amon mga miting, ginagamit gid namon ang Pulong sang Dios, ‘ginapaathag ini kag ginahatagan ini sing kahulugan.’ (Basaha ang Nehemias 8:8.) Kon magtambong ka, matun-an mo ang parte kay Jehova kag ang iya mga kinaiya. Samtang ginatun-an mo kon daw ano ka niya ka palangga, mangin mas malapit ka sa iya. Matun-an mo man kon paano ka niya buligan para mangin malipayon ang imo kabuhi.—Isaias 48:17, 18.
3. Ano ang imo mabenepisyo kon makilala mo ang amon mga kaupdanan sa miting?
Si Jehova nagsugo sa aton nga “hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon.” (Hebreo 10:24, 25) Sa amon mga miting, makilala mo ang mga tawo nga nagaulikid sa kada isa, kag pareho sa imo, gusto man nila magtuon parte sa Dios. Mapalig-on ka gid sa pagpakig-istorya sa ila kag sa ila mga natun-an sa Biblia. (Basaha ang Roma 1:11, 12.) May makilala ka man didto nga malipayon gihapon bisan pa may mga problema sila. Pila lang ini sa mga rason kon ngaa gusto ni Jehova nga regular kita nga magtipon!
USISAA PA GID
Hibaluon naton kon ano ang ginahimo sa mga miting sang mga Saksi ni Jehova kag kon ngaa maayo gid nga magtambong ka.
4. Mga miting sang mga Saksi ni Jehova
Sang unang siglo, regular nga nagatipon ang mga Cristiano para simbahon si Jehova. (Roma 16:3-5) Basaha ang Colosas 3:16, dayon binagbinaga ini nga pamangkot:
Paano ang mga Cristiano sang una nagasimba kay Jehova?
Subong, ang mga Saksi regular man nga nagatipon sa ila Kingdom Hall. Para mabal-an mo kon ano ang ila ginahimo sa ila mga miting, tan-awa ang VIDEO. Dayon tan-awa ang piktyur sang miting sang kongregasyon kag binagbinaga ang masunod nga mga pamangkot.
Ano ang nakita mo nga ginahimo sa Kingdom Hall nga pareho sa ginbasa mo sa Colosas 3:16?
Ano ang nakita mo sa video ukon sa piktyur parte sa miting nga nanamian mo?
Basaha ang 2 Corinto 9:7, dayon binagbinaga ini nga pamangkot:
Ngaa libre lang ang pagtambong sa mga miting sang mga Saksi ni Jehova?
Pamangkuta ang nagatudlo sa imo kon ano ang pagatun-an sa masunod nga miting.
Sa banta mo, ano ang ginahimo sa miting nga manamian mo ukon makabulig sa imo?
Kabalo ka bala?
Sa jw.org, makita mo ang lokasyon kag oras sang mga miting nga ginahiwat sa bilog nga kalibutan.
Ang amon mga miting may mga pamulongpulong, presentasyon, kag mga video. Ginasugdan ini kag ginatapos paagi sa kanta kag pangamuyo
May pila ka bahin sa programa nga puede makakomento ang mga nagatambong
Ang tanan puede magtambong—mga pamilya, soltero ukon dalaga, tigulang, kag kabataan
Libre ang pagtambong sa amon mga miting. Wala sing bayad magsulod kag wala man sing nagapangolekta
5. Kinahanglan ang pagtinguha para makatambong sa mga miting
Maayo gid nga halimbawa ang pamilya ni Jesus. Para makatambong sa mga pagtilipon kada tuig, nagalakat sila sing mga 100 ka kilometro sa kabukiran halin sa Nazaret asta sa Jerusalem. Basaha ang Lucas 2:39-42, dayon binagbinaga ini nga mga pamangkot:
Sa banta mo, mabudlay bala ang ila pagkadto sa Jerusalem?
Ngaa kinahanglan mo tinguhaan para makatambong sa mga miting?
Sa banta mo, makabenepisyo ka gid bala kon tinguhaan mo nga magtambong? Ngaa?
Ang Biblia nagasiling nga importante gid ang pagtipon para sa pagsimba. Basaha ang Hebreo 10:24, 25, dayon binagbinaga ini nga pamangkot:
Ngaa dapat kita regular nga magtambong sa mga miting?
KON MAGSILING ANG IBAN: “Indi na kinahanglan nga magtipon ka upod sa iban. Tun-i na lang ang Biblia sa inyo balay.”
Ano nga bersikulo ukon halimbawa sa Biblia ang nagapakita kon ano ang gusto ni Jehova?
SUMARYO
Kon magtambong ka sa mga miting matun-an mo pa gid ang parte kay Jehova, mangin mas malapit ka sa iya, kag masimba mo sia upod sa iban.
Rebyu
Ngaa gusto ni Jehova nga magtipon kita upod sa iban?
Ano ang matun-an mo sa mga miting sang mga Saksi ni Jehova?
Sa banta mo, ano pa gid ang imo mabenepisyo kon magtambong ka sa mga miting?
DUGANG NGA IMPORMASYON
Nakulbaan ka bala magtambong sa miting? Tan-awa kon paano ang isa ka tawo nga amo man sina ang ginabatyag sang una nanamian na magtambong subong.
Tan-awa kon ngaa nanamian ang isa ka pamatan-on nga lalaki sa mga miting kag kon ano ang iya ginhimo para regular sia nga makatambong.
Hibalua kon ano ang ginabatyag sang iban parte sa pagtambong sa mga miting.
“Ngaa Dapat Ako Mag-attend sa Kingdom Hall?” (Artikulo sa website)
Hibalua kon paano nagbag-o ang kabuhi sang isa ka bayolente nga miembro sang gang sadto sang nakatambong sia sa miting sang mga Saksi ni Jehova.
“May Pusil Ako Bisan Diin Magkadto” (Ang Lalantawan, Hulyo 1, 2014)