Pagbulig sa mga Pamatan-on nga Malikawan ang “Kultura sang Kamatayon”

Ano ang kabangdanan sang pagkawili sang mga pamatan-on karon sa topiko tuhoy sa kamatayon? Si Kongresman Henry Hyde, sang estado sang Illi­nois, E. U. A., nagsiling: “May kakulangan sa espirituwal sa sining mga pamatan-on nga ginapun-an sang kultura sang kamatayon kag kasingki.”

ANG isa ka bumalasa sang Time nagsulat: “Ang matamad nga mga ginikanan, masingki nga kalingawan kag kakulang sang moral kag espirituwal nga paghanas ang may salabton sa kultura sang kamatayon nga nagaluntad sa tunga sang aton mga pamatan-on karon.”

Ang pag-isahanon isa pa sang panguna nga mga problema nga nagapaantos sa mga pamatan-on. Ang iban nagapuyo sa mga puluy-an diin ang mga ginikanan lunsay nagatrabaho kag wala sa balay halos sa bug-os nga adlaw; ang iban naman isa lang ang ginikanan. Suno sa isa ka tiliman-an, ang mga pamatan-on sa Estados Unidos nagapaligad sing 3.5 ka oras nga nagaisahanon kada adlaw kag nagahinguyang sing kubos sa 11 ka oras upod sa ila mga ginikanan kada semana sangsa mga pamatan-on sang katuigan 1960. Sa katunayan, ang iban nga mga pamatan-on wala gid gani sing pagpakig-upod ukon emosyonal nga pagsakdag sang ila mga ginikanan.

Kon Ano ang Sarang Mahimo sang mga Ginikanan

Bangod sang “kakulangan sa espirituwal” nga dapat batuan sang mga pamatan-on, daw ano gid ka importante ang papel sang mga ginikanan? Nahangpan sang maalam nga mga ginikanan nga sa isa ka bahin, kinahanglan sang ila kabataan ang maayo nga kalingawan kag sa pihak nga bahin, kinahanglan nila ang tayuyon personal nga suporta. Ginapahulag sang mahigugmaon nga pag-ulikid, mahimo makapakighambal ang mga ginikanan sa ila tuhoy sa naluyagan nila nga musika, mga programa sa telebisyon, mga video, mga nobela, mga hampang sa video, kag mga pelikula. Bisan pa mahimo nga indi ini mapabutyag sang mga pamatan-on, madamo sa ila ang nagahandum sing pagpalangga kag mahigugmaon nga panuytoy sang ila mga ginikanan. Nagakinahanglan sila sing talangkod nga mga sabat bangod nagakabuhi sila sa isa ka kalibutan nga puno sang walay kapat-uran. Dapat mahangpan sang mga hamtong nga ang mga kabataan nagaatubang sa isa ka mas masibod nga kalibutan sangsa gin-atubang nila sang una subong mga pamatan-on.

Ang mga ginikanan nga luyag mag-amlig sang ila kabataan magapakighambal sa ila sing tayuyon, magapamati gid sa ila, kag magapaandam sa ila sang mga katalagman may kaangtanan sa moderno nga kultura. Kon ang mga ginikanan nagapahamtang sing malig-on nga mga limitasyon kag wala nagabulubag-o kag makatarunganon subong man mapinalanggaon sa ila kabataan, masami nga matigayon nila ang maayo nga mga resulta.​—⁠Mateo 5:⁠37.

Ang mga ginikanan nga mga Saksi ni Jehova nagapanikasog nga makapakighambal sing tayuyon sa ila kabataan, nga nagagamit sing Biblia kag pasad-sa-Biblia nga mga publikasyon kag mga video.a Ginagamit nila ini nga mga okasyon, indi agod sabdungon ang ila kabataan, kundi agod binagbinagon ang mga topiko nga makapalig-on sa espirituwal. Sa sining mga pagtinipon sang pamilya, ginapamatian nila ang mga problema kag mga hangkat nga nagaapektar sa tagsa nila ka kabataan agod ang mga pamatan-on may kahigayunan nga magbaton sing indibiduwal nga atensyon.

Ang mga pamatan-on nga wala sing espirituwal nga panuytoy gikan sa ila mga ginikanan makatigayon sing kusog gikan sa Salmo 27:10, nga nagasiling: “Kon magbiya sa akon ang akon amay kag akon iloy, nian si Jehova magasapupo sa akon.” Paano ginabuligan ni Jehova, ang Amay sang mapinalanggaon nga kaluoy, ang mga pamatan-on? Ang mga kongregasyon sang mga Saksi ni Jehova nangin isa ka dalangpan diin madamo ang nakasapo sing pagpalangga sang iban nga mga tawo kag nagdula sang ila mga pangduhaduha. Si Josías, isa ka pamatan-on nga nakasapo nga matuod ina, nagkomento: “Ang organisasyon ni Jehova nagatungod sing importante nga papel. Nabatyagan ko nga ang kabuhi indi takus. Nagakabuhi ako nga wala sing katuyuan kag wala sing paglaum. Ang paghibalo nga ang isa wala nagaisahanon nagbag-o sing bug-os sang akon kabuhi. Daw nakita ko sa mga kauturan sa kongregasyon ang pamilya nga akon nadula. Ang mga gulang kag mga pamilya sa kongregasyon kaangay sa isa ka angkla sa emosyonal nga kahulugan.”

Sa katunayan, nag-uswag ang panghunahuna kag espirituwal nga kapagros sang madamo nga pamatan-on kag hamtong paagi sa tayuyon nga pagtambong sa mga miting sang kongregasyon sang mga Saksi ni Jehova. Ang antropologo nga si Patricia Fortuny nagkomento tuhoy sa sining positibo nga epekto sa iya salaysay nga Los Testigos de Jehová: una alternativa religiosa para enfrentar el fin del milenio (Mga Saksi ni Jehova: Isa ka Relihioso nga Alternatibo sa Pag-atubang sa Katapusan Sang Milenyo): “Ang mga Saksi ni Jehova nagahatag sing maathag kag klaro nga sistema sang kahim-ong nga maaplikar sa matag-adlaw nga kabuhi, isa ka sibu nga kodigo nga nangin isa ka giya sa panghunahuna kag sa pagpanghikot.” Ang “sistema sang kahim-ong” kag ang “kodigo” nga ginpatuhuyan diri ginapasad sa Biblia. Busa, bisan pa ang mga Saksi ni Jehova nagaatubang sing pareho nga mga problema kag pag-ipit subong sang ila mga kaingod, ginapabakod sila sang pinasahi nga kaalam sinang dumaan nga libro. Huo, ang mga Saksi nakasalapo sing dalangpan sa maathag nga mga doktrina kag mga prinsipio nga masapwan sa Biblia.

Kon “Wala Na sing Kamatayon”

Sulitsulit nga ginapadaku sang panudlo nga ginahatag sa mga Kingdom Hall sang mga Saksi ni Jehova ang saad sang Dios tuhoy sa isa ka bag-o nga kalibutan nga magaluntad sa indi madugay, diin “magapuyo ang pagkamatarong” kag “wala sing magapahadlok sa ila.” (2 Pedro 3:13; Miqueas 4:4) Dugang pa, ginrekord ni manalagna Isaias nga pagkatapos sini “lamunon [sang Dios] ang kamatayon sing dayon, kag pat-od nga pahiran sang Soberanong Ginuong Jehova ang mga luha gikan sa tanan nga nawong.” Ang kamatayon nagluntad sa tawhanon nga rasa bilang resulta sang pagpakasala sang una nga tawo, si Adan, apang ang saad sang Dios amo nga sa indi madugay “wala na sing kamatayon.”—Isaias 25:8; Bugna 21:3, 4; Roma 5:12.

Kon ikaw isa ka pamatan-on nga nagapangita sing bulig, ginaagda ka namon nga pangitaon ang paglaum kag ang rason sa pagkabuhi, sa mga pahina sang Biblia. Paagi sa bulig sang mga Saksi ni Jehova, matigayon mo ang paglaum nga ang pinakamaayo nga mga tion yara pa sa unahan naton sa bag-ong kalibutan nga ginsaad sang Dios.

[Footnote]

[Laragway sa pahina 9]

Ang mga ginikanan dapat maghinguyang sing tion sa pagpamati gid sa ila kabataan kag hangpon ang ila mga problema

[Mga laragway sa pahina 10]

“Ang mga Saksi ni Jehova nagahatag sing maathag kag klaro nga sistema sang kahim-ong nga maaplikar sa matag-adlaw nga kabuhi”