Ang Dios Bala Matuod sa Imo?

KON ginatublag ka sing mga problema, nagapangamuyo ka bala gilayon sa Dios? Kon amo, nabatyagan mo bala nga nagapakighambal ka sa isa ka matuod nga persona?

Tuhoy sa iya langitnon nga Amay, si Jesucristo nagsiling: “Sia nga nagpadala sa akon matuod.” (Juan 7:28) Huo, si Jehova nga Dios matuod, kag ang pagpangamuyo sa iya kaangay sang pagdangop sa mahirop nga abyan sa pagpangayo sing bulig ukon laygay. Apang, agod pamatian sang Dios, ang aton mga pangamuyo dapat nga nahisuno sa Makasulatanhon nga mga kinahanglanon para sa kalahamut-an nga pangamuyo. Halimbawa, dapat kita mapainubuson nga magpalapit sa “Nagapamati sing pangamuyo” paagi sa iya Anak, si Jesucristo.​—⁠Salmo 65:​2; 138:​6; Juan 14:⁠6.

Ang iban mahimo magabatyag nga bangod ang Dios dimakita, indi sia interesado sa aton. Para sa ila, ang Dios daw wala nagaulikid. Bisan ang pila ka Cristiano, nga nakahibalo sang makatilingala nga mga kinaiya sang Dios, mahimo kon kaisa mabudlayan sa paghangop kon daw ano sia ka matuod. Naagihan mo na bala ini? Kon amo, ano ang makabulig sa imo agod si Jehova nga Dios mangin matuod sa imo?

Tun-i ang Kasulatan

Ginatun-an mo bala sing tayuyon ang Balaan nga Kasulatan? Kon mas masunson kag maukod ang imo pagtuon sa Biblia, si Jehova nga Dios mangin mas matuod sa imo. Busa ang imo pagtuo magabakod, sa amo magabulig sa imo nga ‘makita ang Isa nga dimakita.’ (Hebreo 11:​6, 27) Sa pihak nga bahin, ang dimasunson ukon ditayuyon nga pagtuon sa Biblia mahimo nga wala sing daku nga epekto sa imo pagtuo.

Sa pag-ilustrar: Handurawa nga ginsugo sa imo sang imo doktor nga ibanyos mo ang bulong sing makaduha sa isa ka adlaw agod madula ang guros. Madula bala ang imo guros kon mamanyos ka sing makaisa ukon makaduha lamang sa isa ka bulan? Indi. Sa kaanggid, ang salmista nagahatag sa aton sing “reseta” para sa espirituwal nga kapagros. Basaha ang Pulong sang Dios “sa mahinay nga tingog adlaw kag gab-i.” (Salmo 1:​1, 2) Agod matigayon ang bug-os nga kapuslanan, dapat naton sundon ang “reseta”​—⁠ang adlaw-adlaw nga pagbinagbinag sa Pulong sang Dios sa bulig sang Cristianong mga publikasyon.​—⁠Josue 1:⁠8.

Luyag mo bala nga mangin mas makapabakod sa pagtuo ang imo mga pagtuon? Yari ang isa ka panugda: Pagkatapos mabasa ang isa ka kapitulo sa New World Translation of the Holy Scriptures ukon ang isa pa ka Biblia nga may mga cross-reference, magpili sing isa ka makawiwili nga bersikulo kag tan-awa ang ginhatag nga reperensia nga mga kasulatan. Magapauswag ini sa kalidad sang imo pagtuon, kag pat-od gid nga malipay ka sa nasulod nga paghisantuanay sa Biblia. Nian, magabulig ini agod ang Awtor sini, nga si Jehova nga Dios, mangin mas matuod sa imo.

Ang paggamit sa mga cross-reference magabulig man sa imo nga mangin pamilyar sa mga tagna sa Biblia kag sa mga katumanan sini. Ayhan nahibaluan mo ang panguna nga mga tagna sa Biblia, subong sadtong may kaangtanan sa paglaglag sang mga Babilonianhon sa Jerusalem. Apang, ang Biblia nagaunod sing nagailinangot nga mga tagna kag mga katumanan nila. Ang pila sini wala mahibalui sing maayo.

Halimbawa, basaha ang tagna tuhoy sa silot tungod sa pagtukod liwat sa Jerico kag nian binagbinaga ang katumanan sini. Ang Josue 6:​26 nagasiling: “Si Josue nagsumpa sadtong partikular nga tion, nga nagasiling: ‘Isumpa ang tawo sa atubangan ni Jehova nga magabangon kag magatukod sini nga siudad, ang Jerico. Sa kamatayon sang iya panganay tukuron niya ang sadsaran sini, kag sa kamatayon sang iya kinagot ibutang niya ang mga ganhaan sini.’ ” Natuman ini mga 500 ka tuig sang ulihi, kay aton mabasa sa 1 Hari 16:​34: “Sa mga adlaw [ni Hari Ahab] si Hiel nga taga-Bethel nagpatindog sang Jerico. Sa kamatayon ni Abiram nga iya panganay gintukod niya ang sadsaran sini, kag sa kamatayon ni Segub nga iya kinagot ginpahamtang niya ang mga ganhaan sini, suno sa pinamulong ni Jehova nga ginpamulong niya paagi kay Josue nga anak ni Nun.”⁠a Ang matuod nga Dios lamang ang makabugna sing subong sina nga mga tagna kag makatuman sini.

Samtang ginabasa ang Biblia, mahimo ka mangin interesado sa pila ka punto. Halimbawa, ayhan magapalibog ka kon pila ka tuig ang nagaligad sa ulot sang isa ka tagna kag sang katumanan sini. Sa baylo nga pamangkuton lamang ang iban, ngaa indi ka manikasog nga hibaluon ini mismo? Paagi sa paggamit sa mga tsart kag mga bulig sa pagtuon sa Biblia, pangitaa ang mga sabat sing maukod subong sang pagpanikasog mo nga mahangpan ang isa ka mapa nga nagasugid kon diin makita ang bahandi. (Hulubaton 2:​4, 5) Kon makita mo ang mga sabat, may daku ini nga epekto sa imo pagtuo kag si Jehova nga Dios mangin mas matuod sa imo.

Mangamuyo sing Tayuyon kag sing Hanuot

Indi pagkalimti ang importansia sang pangamuyo kag pagtuo. Ang mga disipulo ni Jesus nangabay sing direkta: “Hatagi kami sing dugang nga pagtuo.” (Lucas 17:5) Kon si Jehova daw indi matuod sa imo, ngaa indi mo ipangamuyo sa iya ang tuhoy sa pagkinahanglan mo sing dugang nga pagtuo? Masinaligon nga mangayo sing bulig sa imo langitnon nga Amay agod mangin matuod sia sa imo.

Kon may problema nga nagatublag sa imo, maghinguyang sing kinahanglanon nga tion agod mapabutyag mo sa tinagipusuon nga paagi ang imo kaugalingon sa imo langitnon nga Abyan. Sang malapit na mapatay si Jesus, nangamuyo sia sing hugot. Bisan nga ginpakamalaut niya ang relihioso nga kinabatasan sang malawig nga mga pangamuyo para magpakitakita lamang sa tawo, nangamuyo sia sing pribado sa bug-os nga gab-i antes ginpili ang iya 12 ka apostoles. (Marcos 12:​38-40; Lucas 6:​12-16) Mahimo man kita makatuon gikan kay Ana, nga nangin iloy ni manalagna Samuel. Nalangkag makaanak sing lalaki, “nangamuyo sia kay Jehova sing malawig.”​—⁠1 Samuel 1:⁠12.

Ano ang sadsaran nga leksion sa sini tanan? Kon nagalaum ka nga masabat ang imo mga pangamuyo, dapat ka mangamuyo sing hugot, hanuot, padayon​—⁠kag, siempre pa, nahisuno sa kabubut-on sang Dios. (Lucas 22:​44; Roma 12:​12; 1 Tesalonica 5:​17; 1 Juan 5:​13-15) Magabulig ini sa imo agod mangin matuod ang Dios sa imo.

Tun-i ang mga Tinuga

Ang personalidad sang pintor sarang mahibaluan paagi sa iya mga ginapinta. Sing kaanggid, ang “dimakita nga mga kinaiya” ni Jehova, ang Desinyador kag Manunuga sang uniberso, maathag nga makita sa mga gintuga. (Roma 1:20) Kon tun-an naton sing maayo ang binuhatan ni Jehova, mahangpan naton sing mas maayo ang iya personalidad, kag busa mangin mas matuod sia sa aton.

Kon panilagan mo sing maayo ang mga butang nga gintuga sang Dios, mahimo gid ikaw magadayaw sa pagkamaminatud-on sang iya mga kinaiya. Halimbawa, ang impormasyon tuhoy sa mga ikasarang sa nabigasyon sang mga pispis magapadugang sang imo pagpabalor sa kaalam ni Jehova. Kon nagabasa tuhoy sa uniberso, mahimo mo mahibaluan nga ang Milky Way, nga mga 100,000 light-years ang kalaparon, isa lamang sang binilyon ka galaksiya sa bug-os nga espasyo. Wala bala ina nagapatudok sa imo sang pagkamaminatud-on sang kaalam sang Manunuga?

Sa pagkamatuod, ang kaalam ni Jehova matuod! Apang ano ang kahulugan sina sa imo? Ti, pat-od gid nga wala sia ginatublag sang mga problema nga ginadangop sang bisan sin-o sa aton sa iya sa pangamuyo. Huo, bisan ang diutay nga ihibalo tuhoy sa pagpanuga magahimo kay Jehova nga mas matuod sa imo.

Maglakat Upod kay Jehova

Personal ka bala nga makaeksperiensia kon daw ano ka matuod si Jehova? Huo, kon ikaw kaangay sang matutom nga patriarka nga si Noe. Gintuman niya pirme si Jehova, sa bagay nga masiling: “Si Noe naglakat upod sa matuod nga Dios.” (Genesis 6:9) Nagkabuhi si Noe subong nga si Jehova daw yara sa tupad niya. Ang Dios mangin subong sina ka matuod sa imo.

Kon ikaw nagalakat upod sa Dios, magasalig ka sa Makasulatanhon nga mga saad kag magapanghikot suno sa sini. Halimbawa, nagapati ka sa pinamulong ni Jesus: “Padayon . . . nga pangitaa anay ang Ginharian kag ang pagkamatarong [sang Dios], kag ining tanan iban pa nga butang [materyal nga mga pagkabutang] idugang sa inyo.” (Mateo 6:​25-33) Matuod, indi pirme si Jehova makaaman sang imo ginakinahanglan suno sa ginapaabot mo. Apang, kon ikaw magapangamuyo kag dayon magaagom sing bulig sang Dios, mangin matuod sia sa imo subong kay bisan sin-o nga yara sa tupad mo.

Inang suod nga kaangtanan kay Jehova nagalambo samtang ang isa padayon nga nagalakat upod sa Dios. Binagbinaga si Manuela, isa ka Espanyola nga Saksi, nga nagbatas sing madamong pagtilaw. Sia nagsiling: “Kon ginabudlayan ako ukon nagapamigado, ginaaplikar ko ang prinsipio nga masapwan sa Hulubaton 18:⁠10. Nagapangayo ako sing bulig kay Jehova. Pirme sia isa ka ‘mabakod nga torre’ sa akon.” Nasiling ini ni Manuela pagligad sang 36 ka tuig nga pagsalig kay Jehova kag pag-agom sang iya bulig.

Nagasugod ka pa lang bala sa pagsalig kay Jehova? Indi maluyahan sing buot kon ang imo kaangtanan sa iya indi pa subong sang luyag mo. Magkabuhi kada adlaw subong isa ka tawo nga nagalakat upod sa Dios. Samtang ginatukod mo ang matutom nga pagkabuhi, labi pa nga matigayon mo ang suod nga kaangtanan kay Jehova.​—⁠Salmo 25:​14; Hulubaton 3:​26, 32.

Ang isa pa ka paagi sa paglakat upod sa Dios amo ang mangin masako sa iya pag-alagad. Kon nagapakigbahin ka sa pagbantala sing Ginharian nga hilikuton, isa ikaw ka masigkamanugpangabudlay ni Jehova. (1 Corinto 3:9) Bangod nakahibalo sini, magabulig ini agod ang Dios mangin matuod gid sa imo.

Ang salmista nagalaygay: “Itugyan kay Jehova ang imo dalanon, kag magsalig sa iya, kag sia mismo magapanghikot.” (Salmo 37:5) Pirme itugyan sa Dios ang imo bisan ano man nga mga lulan ukon kabalaka. Pirme mangayo sing bulig kag panuytoy sa iya. Kon ikaw mapangamuyuon nga magasalig kay Jehova nga Dios kag pirme magasalig sa iya sing bug-os, magabatyag ka sing kalig-unan bangod nakahibalo ka nga pirme sia magapanghikot tungod sa imo. Nagasalig ka bala kon ginadangop mo kay Jehova ang imo personal nga mga kabalaka? Makasalig gid ikaw​—⁠kon ang Dios matuod sa imo.

[Footnote]

[Retrato sa pahina 21]

Himua ang imo mga pagtuon nga makapabakod sing pagtuo

[Retrato sa pahina 22]

Maghinguyang sing tion para sa tayuyon, hanuot nga pangamuyo

[Mga retrato sa pahina 23]

Panilagi kon paano ang mga kinaiya sang Dios ginapadayag sa mga tinuga

[Credit Lines]

Hummingbird: U.S. Fish and Wildlife Service, Washington, D.C./Dean Biggins; mga bituon: Retrato: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands