Himua ang mga Butkon nga Dayon ni Jehova nga Imo Sakdag

“Ang dayon nga Dios amo ang imo puluy-an, kag sa idalom yara ang mga butkon nga dayon.”​—⁠DEUTERONOMIO 33:27, American Standard Version.

1, 2. Ngaa makasalig ang katawhan ni Jehova sa iya sakdag?

SI Jehova nagaulikid sa iya katawhan. Halimbawa, sa tion sang kapipit-an sang mga Israelinhon, “ginpiutan sia”! Sa gugma kag kaluoy, “ginkugos niya sila kag gindala sila.” (Isaias 63:​7-9) Gani kon matutom kita sa Dios, makasalig kita sa iya sakdag.

² Si manalagna Moises nagsiling: “Isa ka duog nga panaguan ang Dios sang dumaan nga tion, kag sa idalom yara ang mga butkon nga dayon.” Ang isa pa ka badbad nagasiling: “Ang dayon nga Dios amo ang imo puluy-an, kag sa idalom yara ang mga butkon nga dayon.” (American Standard Version) Apang paano ang mga butkon sang Dios nagasakdag sa iya mga alagad?

Ngaa May Tuman Kadamo nga mga Kabudlayan

3. San-o maagom sing bug-os sang matinumanon nga katawhan “ang mahimayaon nga kahilwayan sang mga anak sang Dios”?

³ Ang pag-alagad kay Jehova wala nagataming sa aton gikan sa mga kabudlayan nga kinaandan sa dihimpit nga mga tawo. Ang alagad sang Dios nga si Job nagsiling: “Ang tawo nga natawo sa babayi, malip-ot sing mga adlaw, kag puno sing kagamo.” (Job 14:1) Tuhoy sa “mga adlaw sang aton mga tuig,” siling sang salmista: “Ang pagpadayon sini may kagamo kag kasakit.” (Salmo 90:10) Amo sini ang kabuhi tubtob ‘ang tinuga hilwayon sa kahiulipnan sang pagkamadinulunton kag makaagom sing mahimayaon nga kahilwayan sang mga anak sang Dios.’ (Roma 8:​19-22) Matabo ini sa tion sang Isa ka Libo ka Tuig nga Paggahom ni Cristo. Pasad sa halad nga gawad ni Jesus, ang mga tawo nga sakop sang Ginharian luwason sa amo nga tion gikan sa sala kag kamatayon. Sa katapusan sang Milenyo, mabuligan na ni Cristo kag sang iya kaupod nga mga hari kag mga saserdote ang matinumanon nga katawhan sa pagdangat sa kahimpitan, kag ang mga ngalan sang mga matutom sa Dios sa tion sang katapusan nga pagtilaw ni Satanas kag sang iya mga demonyo masulat na sing permanente sa “tulun-an sang kabuhi.” (Bugna 20:​12-15) Nian maagom nila sing bug-os ang mahimayaon nga kahilwayan sang mga anak sang Dios.

4. Sa baylo nga magkumod nahanungod sa aton kahimtangan sa kabuhi, ano ang dapat naton himuon?

⁴ Samtang wala pa ini, sa baylo nga magkumod nahanungod sa aton kahimtangan sa kabuhi, magsalig kita kay Jehova. (1 Samuel 12:​22; Judas 16) Pasalamatan naton ang aton Mataas nga Saserdote, si Jesus, nga paagi sa iya makapalapit kita sa Dios “agod nga makabaton kita sing kaluoy kag makaagom sing dibagay nga kaluoy sa pagbulig sa aton sa nagakaigo nga tion.” (Hebreo 4:​14-16) Indi gid naton pagsundon si Adan. Sa kahulugan, ginbasol niya si Jehova nga ginhatagan sia sing malain nga asawa, sa pagsiling: “Ang babayi nga ginhatag mo nga mangin kaupod ko, ginhatagan niya ako gikan sa kahoy kag nagkaon ako.” (Genesis 3:12) Maayo nga mga butang ang ginahatag sang Dios kag wala sia nagadala sing mga kabudlayan sa aton. (Mateo 5:​45; Santiago 1:17) Ang mga kapipit-an masami nga resulta sang aton kakulang sing kaalam ukon sang sayop sang iban. Mahimo nga magaabot man ini sa aton bangod makasasala kita kag nagakabuhi sa isa ka kalibutan nga yara sa gahom ni Satanas. (Hulubaton 19:​3; 1 Juan 5:19) Apang, ang mga butkon nga dayon ni Jehova pirme nagasakdag sa iya matutom nga mga alagad nga mapangamuyuon nga nagasandig sa iya kag nagaaplikar sa ila kaugalingon sang laygay sang iya Pulong.​—⁠Salmo 37:​5; 119:105.

Ginsakdag sa Tion sang Balatian

5. Ano nga pagpalig-on ang masapwan sang mga nagabalatian sa Salmo 41:​1-3?

⁵ Ang balatian nagapasubo sa kalabanan sa aton kon kaisa. Apang, si David nagsiling: “Malipayon ang bisan sin-o nga nagapatugsiling sa maluya; si Jehova magaluwas sa iya sa adlaw sang kalaut. Si Jehova magabantay sa iya kag magatipig sa iya. Mangin malipayon sia sa duta; kag indi mo sia matugyan sa kalag sang iya mga kaaway. Si Jehova magasakdag sa iya sa higdaan sang pag-antos; ginabayluhan mo ang bug-os niya nga higdaan sa iya pagbalatian.”​—⁠Salmo 41:​1-3.

6, 7. Paano ginbuligan sang Dios si David sang nagahigda sia sa higdaan nga may masakit, kag paano ini nagapalig-on sa mga alagad ni Jehova karon?

⁶ Ang tawo nga mapatugsilingon nagabulig sa imol. “Ang adlaw sang kalaut” mahimo nga amo ang bisan anong kalamidad ukon malawig nga tion sang kabudlayan nga nagapaluya sa isa ka indibiduwal. Nagasalig sia sa Dios sa pagbantay sa iya sa tion sang iya kaluyahon, kag ang iban ‘nagahimo sa iya nga malipayon sa duta’ paagi sa pagpalapnag sing balita tuhoy sa maluluy-on nga pagpakig-angot ni Jehova sa iya. Ginsakdag sang Dios si David “sa higdaan sang balatian,” ayhan sadtong makapahuol nga tion sang ang anak ni David nga si Absalom nagtinguha sa pag-agaw sang trono sang Israel.​—⁠2 Samuel 15:​1-6.

⁷ Bangod nagpatugsiling si David sa mga imol, ginbatyag niya nga sakdagon sia sang Dios samtang may masakit sia kag wala sing mahimo sa higdaan. (Salmo 18:​24-26) Bisan pa grabe ang iya balatian, nagsalig sia nga ‘bayluhan [sang Dios] ang iya higdaan,’ indi sa milagruso nga pagdula sang balatian, kundi sa pagpalig-on sa iya paagi sa makalipay nga mga panghunahuna. Daw subong bala nga ginbayluhan ni Jehova ang iya higdaan gikan sa higdaan sang pagbalatian padulong sa higdaan sang pag-ayo. Sing kaanggid, kon nagaantos kita sing balatian subong mga alagad sang Dios, ang mga butkon nga dayon ni Jehova magasakdag sa aton.

Lugpay Para sa Ginapung-awan

8. Paano ginpakita sang isa ka nagabalatian nga Cristiano ang iya pagsalig sa Dios?

⁸ Ang balatian mahimo tunaan sing kapung-aw. Ang isa ka balatianon gid nga Cristiano, nga kon kaisa wala sing kusog bisan sa pagbasa, nagsaysay: “Bangod sini, madamo nga sahi sang kapung-aw ang ginbatyag ko, pagbatyag nga wala sing pulos, kag nagahibi pa gani ako.” Bangod nahangpan niya nga luyag ni Satanas nga dugmukon sia paagi sa iya pagbatyag sing kaluya, nagabato sia, kay nahibaluan niya nga sa bulig ni Jehova indi sia mapaslawan. (Santiago 4:7) Ini nga tawo isa ka pagpalig-on sa iban nga nakahibalo nga nagasalig sia sa Dios. (Salmo 29:11) Bisan kon maospital sia, ginateleponohan niya ang mga may masakit kag ang iban pa agod palig-unon sila sa espirituwal. Sia mismo ginapalig-on paagi sa pagpamati sa audiocas­sette record­ings sang mga ambahanon sang Ginharian kag sa mga artikulo sa sini nga magasin kag sa kaupod nga magasin sini nga, Magmata!, kag paagi sa pagpakig-upod sa mga masigka-Cristiano. Ini nga utod nagasiling: “Regular ako nga nagapakighambal kay Jehova sa pangamuyo, ginapangabay sia nga hatagan ako sing kusog, tuytoy, lugpay, kag bulig sa pagbatas.” Kon ikaw isa ka Cristiano nga may daku nga palaligban sa panglawas, magsalig pirme kay Jehova kag himua ang iya mga butkon nga dayon nga imo sakdag.

9. Anong mga halimbawa ang nagapakita nga ang kapung-aw sang hunahuna nagatublag kon kaisa sa diosnon nga mga tawo?

⁹ Ang kapung-aw isa ka madugay na nga problema. Samtang ginatilawan, si Job naghambal subong isa ka tawo nga nagbatyag nga ginbiyaan sia sang Dios. (Job 29:​2-5) Nabalaka sa guba nga kahimtangan sang Jerusalem kag sang mga pader sini, si Nehemias ginsubuan, kag si Pedro ginpung-awan gid bangod ginpanghiwala niya si Cristo amo kon ngaa naghibi sia sing mapait. (Nehemias 2:​1-8; Lucas 22:62) Si Epafrodito ginpung-awan bangod nabatian sang mga Cristiano sa Filipos nga nagmasakit sia. (Filipos 2:​25, 26) Ang kapung-aw nagpaantos sa pila ka Cristiano sa Tesalonica, kay ginpalig-on ni Pablo ang kauturan didto nga “maghambal sing malugpayon sa ginapung-awan nga mga kalag.” (1 Tesalonica 5:14) Gani paano ginabuligan sang Dios ini nga mga indibiduwal?

10. Ano ang mahimo makabulig sa paglandas sang kapung-aw sang hunahuna?

¹⁰ Ang isa dapat magdesisyon sa iya kaugalingon kon paano ipabulong ang grabe nga kapung-aw.⁠a (Galacia 6:5) Ang nagakaigo nga pahuway kag balanse nga pagpanghikot mahimo makabulig. Sa baylo nga tamdon ang pila ka mga problema subong isa ka daku nga kahimtangan, masapwan sang ginapung-awan nga indibiduwal nga makabulig kon lubaron niya ini sing isa-isa sa tagsa ka tion. Ang makalugpay nga bulig gikan sa mga gulang sang kongregasyon mahimo mapuslanon gid, labi na kon ining problema sa emosyon nagahatag sing kabalaka sa espirituwalidad. (Santiago 5:​13-15) Labaw sa tanan, importante gid nga magsalig kay Jehova, ‘ginatugyan sa iya ang tanan naton nga paghimud-os, kay sia nagakabalaka sa aton.’ Ang dalayon kag tinagipusuon nga pangamuyo makahatag sa isa sing ‘paghidait sang Dios nga magaamlig sa tagipusuon kag sa painuino paagi kay Cristo Jesus.’​—⁠1 Pedro 5:​6-11; Filipos 4:​6, 7.

Ginabuligan Kita ni Jehova sa Pagbatas sang Kasubo

11-13. Ano ang makabulig sa pagpakanay sang kasubo bangod sa pagkapatay sang isa nga hinigugma?

¹¹ Ang isa pa ka mabudlay nga eksperiensia amo ang kamatayon sang isa nga hinigugma. Naglalaw si Abraham sa pagkadula sang iya asawa, nga si Sara. (Genesis 23:2) Sang mapatay ang iya anak nga si Absalom, nagkasubo si David. (2 Samuel 18:33) Ti, bisan gani ang himpit nga tawo nga si Jesus “naghibi” bangod sa pagkapatay sang iya abyan nga si Lazaro! (Juan 11:35) Gani kinaugali ang kasubo kon ang isa nga hinigugma mapatay. Apang ano ang makabulig agod mapakanay ini nga kasubo?

¹² Ginabuligan sang Dios ang iya katawhan agod mabatas ang mapait nga kasubo. Ang iya Pulong nagasiling nga may yara pagkabanhaw. Busa, wala kita “nagakasubo subong sang iban nga wala sing paglaum.” (1 Tesalonica 4:​13; Binuhatan 24:15) Ang espiritu ni Jehova nagabulig sa aton sa pag-agom sing paghidait kag pagtuo kag sa pagpamalandong sang matahom nga palaabuton nga ginsaad sa iya Pulong, agod nga indi kita madaug sing bug-os sang masubo nga mga panghunahuna tuhoy sa napatay nga hinigugma. Malugpayan man kita paagi sa pagbasa sang Kasulatan kag pagpangamuyo sa “Dios sang paglipay.”​—⁠2 Corinto 1:​3, 4; Salmo 68:​4-6.

¹³ Ang paglaum sa pagkabanhaw makalipay sa aton subong sang nabatyagan sang diosnon nga si Job, nga nagtuaw: “O kabay pa kuntani nga taguon mo [Jehova] ako sa Sheol, nga matago mo ako kuntani tubtob nga magtaliwan ang imo kasingkal, nga tangduan mo ako kuntani sing pinat-od nga tion kag madumduman ako! Kon ang mabukod nga tawo mapatay, mabuhi pa bala sia? Sa tanan nga mga adlaw sang akon pagpakig-away magahulat ako, tubtob nga mabuhian ako. Magapanawag ka, kag ako magasabat sa imo. Magahandum ka sa binuhatan sang imo mga kamot.” (Job 14:​13-15) Indi daku nga kasubo ang masami nga mabatyagan naton kon ang aton isa ka palangga nga abyan maglakbay, kay nagalaum kita nga makita sia liwat. Mahimo nga mabuhinan man ang aton daku nga kasubo bangod sang pagkapatay sang isa nga hinigugma kon tamdon naton sing subong man sini ang pagkapatay sang isa ka matutom nga Cristiano. Kon sia may dutan-on nga paglaum, magabugtaw sia gikan sa pagtulog sa kamatayon diri sa duta sa tion sang Isa ka Libo ka Tuig nga Paggahom ni Cristo. (Juan 5:​28, 29; Bugna 20:​11-13) Kag kon nagalaum kita nga magkabuhi sa duta sing dayon, mahimo nga yari kita diri sa pagsug-alaw sa aton ginbanhaw nga hinigugma.

14. Paano gin-atubang sang duha ka Cristianong mga balo ang pagkapatay sang ila mga bana?

¹⁴ Sang mapatay ang iya bana, nahibaluan sang isa ka utod nga babayi nga dapat niya padayunon ang iya pag-alagad sa Dios. Luwas sa pagpabilin nga masako sa ‘bugana nga hilimuon sa hilikuton sang Ginuo,’ nagapanghimo sia sing ­quilt nga may 800 ka tinabid nga pidaso. (1 Corinto 15:58) “Maayo ini nga proyekto,” siling niya, “bangod samtang nagatrabaho ako makapamati ako sa mga ambahanon sang Ginharian kag sa mga tape sa Biblia, nga naghupot sang akon hunahuna nga masako.” Indi niya malipatan ang pagduaw sang isa ka eksperiensiado nga gulang kag sang iya asawa. Gikan sa Biblia, ginpakita sang gulang nga ang Dios nagaulikid gid sa balo nga mga babayi. (Santiago 1:27) Ang isa pa ka Cristianong babayi wala magpadaug sa pagkaluoy sa kaugalingon sang mapatay ang iya bana. Gin-apresyar niya ang sakdag sang mga abyan kag nagpakita sia sing daku pa nga interes sa iban. “Mas masunson ako nga nangamuyo kag nagpalambo ako sing suod pa nga kaangtanan kay Jehova,” siling niya. Kag daw ano nga pagpakamaayo nga sakdagon sang mga butkon nga dayon sang Dios!

Bulig Kon Makasala Kita

15. Ano ang kaundan sang ginsiling ni David sa Salmo 19:​7-13?

¹⁵ Bisan pa ginahigugma naton ang kasuguan ni Jehova, nagasala kita kon kaisa. Wala sing duhaduha nga nagapapiot ini sa aton, subong sang nabatyagan ni David, nga nagtamod sang kasuguan, mga pahanumdom, sang mga mando, kag sang mga pagsulundan sang Dios nga kapin ka halandumon sang sa bulawan. Sia nagsiling: “Ang imo alagad ginapaandaman nila; sa pagtuman sa ila may daku nga padya. Sayop​—⁠sin-o ang makahantop? Hilwaya ako gikan sa akon tinago nga mga sayop. Punggi man ang imo alagad gikan sa matinaastaason nga mga buhat; dili sila pagpagahuma sa akon. Nian mangin matarong ako, kag mangin hilway ako sa dakung paglalis.” (Salmo 19:​7-13) Analisahon naton ining mga pulong.

16. Ngaa dapat naton likawan ang pagkamatinaastaason?

¹⁶ Ang matinaastaason nga mga buhat mas mabug-at nga mga sala sang sa mga sayop. Si Saul ginsikway subong hari bangod sang matinaastaason nga pagdulot sing halad kag pagluwas sa Amalekinhon nga hari nga si Agag kag sa labing maayo nga inati, walay sapayan sang sugo sang Dios nga laglagon ang mga Amalekinhon. (1 Samuel 13:​8-14; 15:​8-19) Si Hari Uzias gin-aro bangod sang iya matinaastaason nga pag-agaw sang mga katungdanan sang saserdote. (2 Cronica 26:​16-21) Sang ang kaban sang katipan ginadala pa Jerusalem kag ang karo diutayan lang matumba bangod sang paghublag sang mga baka, ginlaglag sang Dios si Uza bangod sang indi matinahuron nga pag-uyat sa Kaban agod punggan ini. (2 Samuel 6:​6, 7) Gani, kon indi naton mahibal-an kon ano ang himuon ukon indi kita pat-od nga awtorisado kita sa paghimo sing isa ka butang, dapat kita magpakita sing pagkamapainubuson kag magkonsulta sa mga tawo nga may paghantop. (Hulubaton 11:​2; 13:10) Sa pagkamatuod, kon nangin matinaastaason kita, dapat kita mangamuyo kag mangayo sing patawad kag mangabay sa Dios nga buligan kita sa pag-andam batok sa pagkamatinaastaason sa palaabuton.

17. Paano ang natago nga mga sala makaapektar sa isa ka tawo, apang paano maagom ang kapatawaran kag nahaw-asan nga pamatyag?

¹⁷ Ang natago nga mga sala mahimo nga bangdan sang kasisit-an. Suno sa Salmo 32:​1-5, gintinguhaan ni David nga taguon ang iya sala, apang sia nagsiling: “Sang naghipos ako nahagas ang akon mga tul-an tungod sang akon pag-ugayong sa bilog nga adlaw. Ang akon kahun-og nagbaylo subong sang kamala sang tingadlaw.” Ang pagtinguha nga punggan ang ginatublag nga konsiensia nagpalapyo kay David, kag ang iya kalisang nag-ubos sang iya kapagsik subong sang isa ka kahoy nga nadulaan sing nagahatag kabuhi nga kahun-og sa tion sang malawig nga tig-ilinit, ukon sa kainiton sang tingadlaw. Mahimo gid nga nag-antos sia sa hunahuna kag sa lawas kag nadulaan sing kalipay bangod wala sia magtu-ad. Ang pagtu-ad lamang sa Dios ang makahatag sing patawad kag nahaw-asan nga pamatyag. Si David nagsiling: “Malipayon ang isa nga ang iya paglalis ginpatawad, nga ang iya sala gintabunan. . . . Gintu-ad ko ang akon sala sa imo, kag wala ko ginlikom ang akon kalautan. Ako nagsiling: ‘Itu-ad ko ang akon mga paglalis kay Jehova.’ Kag ginpatawad mo ang kalautan sang akon sala.” Ang mahigugmaon nga bulig gikan sa Cristianong mga gulang makabulig sa pagpanumbalik sang espirituwalidad.​—⁠Hulubaton 28:​13; Santiago 5:​13-20.

18. Ano ang pamatuod nga ang sala may madugay nga mga epekto, apang ano ang mahimo isa ka tuburan sang paglipay sa sini nga mga kahimtangan?

¹⁸ Ang sala mahimo nga may madugay nga mga epekto. Amo sini ang natabo kay David, nga nakiglahi kay Bat-seba, nagmaniobra sang kamatayon sang iya bana, kag ginpangasawa niya ang nagabusong nga balo. (2 Samuel 11:​1-27) Walay sapayan sang pagpakita sang Dios sing kaluoy bangod sang katipan sa Ginharian, sang paghinulsol ni David, kag sang iya pagkamaluluy-on sa iban, si David nakaeksperiensia sing ‘kalautan gikan sa iya kaugalingon nga panimalay.’ (2 Samuel 12:​1-12) Ang anak sa iya pagpanghilahi napatay. Ginlugos sang anak ni David nga si Amnon ang iya utod sa amay nga si Tamar kag ginpatay sa sugo sang iya utod nga si Absalom. (2 Samuel 12:​15-23; 13:​1-33) Ginpakahuy-an ni Absalom si David paagi sa paghulid sa mga babayi ni David. Gintinguhaan niya nga agawon ang trono apang napatay sia. (2 Samuel 15:​1⁠–​18:33) Sa gihapon ang sala may mga epekto. Halimbawa, ang isa ka nadisfellowship nga nakasala mahimo nga maghinulsol kag mapasag-uli sa kongregasyon, apang kinahanglan ang tinuig agod mapanas ang namusingan nga dungog kag ang nahalitan nga emosyon bangod sang sala. Samtang, daw ano ka makalipay nga mabaton naton ang pagpatawad ni Jehova kag ang sakdag sang iya mga butkon nga dayon!

Ginluwas Gikan sa Aton mga Kahuol

19. Paano makabulig ang espiritu sang Dios kon kita nagaatubang sing mabudlay nga pagtilaw?

¹⁹ Kon kita may daku nga pagtilaw, mahimo nga kulang kita sing nagakaigo nga kaalam kag kusog sa paghimo sing desisyon kag sa pagtuman sini. Sa sini nga kaso, ang espiritu sang Dios “nagabulig sa aton kaluyahon; kay indi kita makahibalo magpangamuyo sing nagakaigo, apang ang espiritu gid nagapatunga tungod sa aton nga nagapakiluoy nga may mga pag-ugayong nga dimamitlang.” (Roma 8:26) Kon pahanabuon ni Jehova ang pagbaylo sang mga kahimtangan, dapat kita magpasalamat. Apang, mahimo nga ang iya butkon magaluwas sa aton sa lain nga paagi. Kon mangayo kita sing kaalam sa pangamuyo, mahimo nga ipakita ni Jehova paagi sa iya espiritu kon ano ang dapat naton himuon kag hatagan kita sing kusog nga kinahanglanon sa paghimo sini. (Santiago 1:​5-8) Sa bulig niya, makabatas kita kon “mag-antos kita sing sarisari nga pagtilaw” kag makalampuwas sa sini nga may natilawan kag napabakod nga pagtuo.​—⁠1 Pedro 1:​6-8.

20. Ano ang maagom naton kon ginahimo gid naton ang mga butkon nga dayon ni Jehova nga aton sakdag?

²⁰ Indi gid kita mag-untat sa pagliso sa Dios sa pangamuyo. “Ang akon mga mata yara pirme kay Jehova, kay paluson niya ang akon mga tiil sa pukot,” siling ni David. “Balikda ako, kag kaluuyi ako; kay mamingaw ako kag napiutan. Ang mga kagamo sang akon tagipusuon nagadaku; O paguwaa ako sa akon kalisdanan. Talupangda ang akon kapipit-an kag ang akon kasakitan, kag patawara ang tanan ko nga sala.” (Salmo 25:​15-18) Kaangay ni David, maagom naton ang pagluwas, ang kahamuot, kag ang kapatawaran sang Dios kon himuon gid naton ang mga butkon nga dayon ni Jehova nga aton sakdag.

[Footnote]

Paano Mo Sabton?

◻ Paano ginabuligan ni Jehova ang iya mga alagad nga nagamasakit?

◻ Ano ang mahimo makabulig kon ginatinguhaan naton nga landason ang kapung-aw sang hunahuna?

◻ Ano ang makabulig sa pagpakanay sang kasubo bangod sa pagkapatay sang isa nga hinigugma?

◻ Paano mahaw-asan ang mga nagatago sang ila mga sala?

◻ Ano nga bulig ang yara kon ang katawhan ni Jehova nagaatubang sing daku nga pagtilaw?

[Laragway sa pahina 16, 17]

Ang paglaum sa pagkabanhaw makalipay sa aton, subong sang ginbatyag sang diosnon nga si Job