1. Ano ang kabubut-on ni Jehova nahanungod sa pangamuyo, kag anong laygay ang ginhatag ni apostol Pablo nahanungod sa pangamuyo?

SI Jehova “Dios nga nagahatag sing paglaum” sa tanan niya nga matutom nga katawhan. Subong “Nagapamati sang pangamuyo,” ginapamatian niya ang ila pagpangabay sing bulig nga matigayon ang makalilipay nga paglaum nga ginbutang niya sa atubangan nila. (Roma 15:​13; Salmo 65:2) Kag paagi sa iya Pulong, ang Biblia, ginalaygayan niya ang tanan niya nga mga alagad nga magkari sa iya bisan san-o nga luyag nila. Pirme sia nga yara didto, maluyag sa pagpamati sang ila nasulod nga mga kabalaka. Sa katunayan, ginalaygayan niya sila nga “magpadayon sing malig-on sa pangamuyo” kag “magpangamuyo sa walay langan.”⁠a (Roma 12:​12; 1 Tesalonica 5:17) Kabubut-on ni Jehova nga ang tanan nga mga Cristiano dalayon nga magapanawag sa iya sa pangamuyo, nagabubo sang ila mga tagipusuon sa iya kag nagahimo sini sa ngalan sang iya hinigugma nga Anak, si Jesucristo.​—⁠Juan 14:​6, 13, 14.

³ Si disipulo Santiago nagsulat: “Magpalapit sa Dios, kag sia magapalapit sa inyo.” (Santiago 4:8) Huo, si Jehova indi tuman kataas ukon tuman kalayo nga indi makabati sang aton mga ginasiling sa iya, walay sapayan sang aton dihimpit tawhanon nga kahimtangan. (Binuhatan 17:27) Dugang pa, nagasapak sia kag nabalaka. Ang salmista nagasiling: “Ang mga mata ni Jehova yara nayon sa mga matarong, kag ang iya mga igdulungog bukas sa pagtuaw nila.”​—⁠Salmo 34:​15; 1 Pedro 3:⁠12.

4. Paano mahimo mailustrar ang pagpamati ni Jehova sa pangamuyo?

⁴ Si Jehova nagaabiabi sang pangamuyo. Mahimo naton ini ipaanggid sa isa ka pagtinipon diin madamo nga tawo ang nagasugilanunay. Didto ka man, nagapamati sa iban nga nagasugilanon. Ang imo papel amo ang iya sang manugpanilag. Apang nian may isa nga nagbalikid sa imo, nagsambit sang imo ngalan, kag nagsugilanon sa imo. Nagaganyat ini sang imo igtalupangod sa pinasahi nga paagi. Sa kaanggid, ang Dios pirme nagapamati sa iya katawhan, diin man sila. (2 Cronica 16:​9; Hulubaton 15:3) Gani ginapamatian niya ang aton ginasiling, maamligon kag makawiwili nga nagapanilag, kon sa aton pa. Walay sapayan, kon manawag kita sa ngalan sang Dios sa pangamuyo, ang iya igtalupangod ginaganyat, kag ginapamatian niya kita sa maathag nga paagi. Paagi sa iya gahom, mamutikan kag mahantop pa gani ni Jehova ang wala namitlang nga pakiluoy sang tawo nga ginpabutyag sa sulod sang natago nga bahin sang iya tagipusuon kag hunahuna. Ang Dios nagapasalig sa aton nga magapalapit sia sa tanan nga hanuot nga nagapanawag sa iya ngalan kag nagatinguha nga magpabilin nga suod sa iya.​—⁠Salmo 145:⁠18.