Si Jehova Nagapamati sang Aton Madagmit nga Pagpangayo sing Bulig

KINAHANGLAN sing madagmit ang bulig. Makita ina sa daku nga kasubo sa nawong sang manugtagay sang hari. Sang ginpamangkot kon ano ang iya problema, ginpabutyag sang manugtagay ang iya kasubo bangod sang nahapay nga kahimtangan sang Jerusalem kag sang mga pader sini. Nian namangkot sia: ‘Ano bala ang ginapangayo mo sa akon?’ “Gani nagpangamuyo ako sa Dios sang langit,” sulat sang ulihi sang manugtagay nga si Nehemias. Isa yadto ka maabtik, mahipos, kag madagmit nga pagpangayo sing bulig kay Jehova. Kag ang resulta? Aba, gilayon nga gin-awtorisahan ni Artajerjes nga hari sang Persia si Nehemias nga patindugon liwat ang mga pader sang Jerusalem!​—⁠Nehemias 2:1-6.

Huo, ginapamatian sang Dios ang madagmit nga mga pangabay sang mga nagahigugma sa iya. (Salmo 65:2) Gani kon ang pagtilaw daw labi sa masarangan mo, sarang ka makapangamuyo subong sang ginhimo ni salmista David sa Salmo 70, sang nagkinahanglan sia sa gilayon sang bulig sang Dios. Ginapakita sang superskripsion sini nga salmo nga ang katuyuan sini amo ang “pagdumdom.” Upod ang diutay nga pagbalhin, ginasulit sini ang Salmo 40:​13-17. Apang paano kita mabuligan sang ika-70 nga Salmo subong katawhan ni Jehova?

Pagpangabay sing Gilayon nga Pagluwas

Si David nagasugod paagi sa pangabay: “Dalidali, O Dios, O Jehova, sa pagluwas sa akon.” (Salmo 70:1) Kon ginasubuan, sarang kita makapangamuyo nga buligan kita gilayon sang Dios. Wala kita ginatilawi ni Jehova sang malaut nga mga butang, kag “makahibalo [sia] magluwas sang mga tawo nga may diosnon nga debosyon sa mga pagtilaw.” (2 Pedro 2:​9; Santiago 1:13) Apang ano abi kon ginatugutan niya ang pagtilaw nga magapadayon, ayhan agod tudluan kita sang pila ka butang? Nian sarang kita makapangabay sa iya sing kaalam nga maatubang ini. Kon nagapangabay kita nga may pagtuo, nagahatag sia sa aton sing kaalam. (Santiago 1:​5-8) Ang Dios nagahatag man sa aton sing kusog nga kinahanglan agod mabatas ang mga pagtilaw. Halimbawa, ‘ginasakdag niya kita sa higdaan sang pagbalatian.’​—⁠Salmo 41:1-3; Hebreo 10:36.

Ang aton duna nga pagkamakasasala, kag ang aton pirme nga pagkanadayag sa pagsulay kag mga panikasog sang Yawa nga gub-on ang aton kaangtanan kay Jehova, dapat magpahulag sa aton nga magpangamuyo sing bulig sa Dios kada adlaw. (Salmo 51:​1-5; Roma 5:​12; 12:12) Talalupangdon ining mga pulong sang modelo nga pangamuyo ni Jesus: “Dili kami pagdalha sa panulay, kundi luwasa kami sa malaut.” (Mateo 6:13) Huo, sarang kita makapangabay sa Dios nga indi niya kita pagtugutan nga madala kon ginasulay nga lapason sia kag nga punggan niya si Satanas, “ang malaut” sa pagdaug sa aton. Kag updan naton ang aton mga pagpangabay sang kaluwasan sing mga tikang nga malikawan ang mga sitwasyon nga dinagakaigo nga magadayag sa aton sa pagsulay kag mga siod ni Satanas.​—⁠2 Corinto 2:⁠11.

Ang mga Nagasiling, “Aha!”

Mahimo kita matilawan sing daku bangod ang mga kaaway nagapasipala sa aton tungod sang aton pagtuo. Kon matabo ina sa imo, dumduma ang mga pulong ni David: “Magmahuy-an sila kag malibogan ang nagatinguha sang akon kalag. Patalikdon sila kag mawalaan sing dungog ang nagakalipay sa akon kasamaran. Patalikdon sila bangod sang ila kahuya nga nagasiling: ‘Aha, aha!’” (Salmo 70:​2, 3) Luyag makita sang mga kaaway ni David nga sia patay; ‘ginatinguhaan [nila] ang iya kalag,’ ukon kabuhi. Apang, sa baylo nga magbalus, nagtuo sia nga ang Dios magapakahuya sa ila. Nangamuyo si David nga ang iya mga kaaway ‘magmahuy-an kag malibogan’​—⁠mahuy-an, magsalasala, maligban, mapaslawan sa paghimo sang ila malaut nga mga buko. Huo, ang nagatinguha sang iya kahalitan kag nagaka­lipay sa iya kasamaran malibogan kag ma­huy-an.

Kon magakalipay kita kon may kasamaran nga matabo sa kaaway, magapanabat kita kay Jehova tungod sang aton sala. (Hulubaton 17:​5; 24:​17, 18) Apang, kon ang mga kaaway nagapasipala sa Dios kag sa iya katawhan, makapangamuyo kita tungod sang iya balaan nga ngalan, si Jehova ‘magapatalikod sa ila kag mahuy-an sila’ sa itololok sang mga tawo nga ginatinguhaan nila nga pahamut-an. (Salmo 106:8) Ang pagtimalus iya sang Dios, kag palibugon kag pakahuy-an niya ang iya kag ang aton mga kaaway. (Deuteronomio 32:35) Halimbawa, gintinguhaan sang Nazi nga lider nga si Adolf Hitler nga papason ang mga Saksi ni Jehova sa Alemanya. Napaslawan gid sia, kay linibo sa ila karon ang nagabantala sang mensahe sang Ginharian ­didto!

Sa mayugataon nga pagsunlog, ang aton mga kaaway mahimo magsiling: “Aha, aha!” Bangod ginayaguta nila ang Dios kag ang iya katawhan, ang mga makasasala ‘patalikdon bangod sang ila kahuya,’ nahuy-an. Samtang nagapangamuyo tungod sini, huptan naton ang aton integridad kag pahalipayon ang tagipusuon ni Jehova, agod masabat niya si Satanas kag ang bisan sin-o nga nagapakahuya sa Iya. (Hulubaton 27:11) Kag indi gid kita dapat mahadlok sa mga matinaastaason, kay “ang bisan sin-o nga nagasalig kay Jehova magmalig-on.” (Hulubaton 29:25) Ang bugalon nga hari sang Babilonia nga si Nabukodonosor, nga nagbihag sang katawhan sang Dios, nahuy-an kag napilitan sa pagbaton nga ‘ang Hari sang mga hari sarang makapaubos ­sa mga nagalakat sa pagkabugalon.’​—⁠Daniel 4:⁠37.

“Daku ang Dios!”

Bisan pa ang mga kaaway magagamo sa aton, pirme naton pakataason si Jehova kaupod sang aton mga masigkatumuluo. Sa baylo nga magpadala sa kasubo bangod napaslawan sia sa pagpadaku sa Dios, si David nagsiling: “Magkalipay kag magkasadya sa imo ang tanan nga nagapangita sa imo, kag magasiling sila sing dalayon: ‘Daku ang Dios!’​—⁠ang mga nagahigugma sa imo kaluwasan.” (Salmo 70:4) Ang katawhan ni Jehova padayon nga nagakasadya sing daku bangod ‘nagakalipay kag nagakasadya’ sila sa iya. Subong dedikado kag bawtismado nga mga Saksi niya, may daku sila nga kasadya bunga sang suod nga kaangtanan sa iya. (Salmo 25:14) Apang, mahimo sila matamod subong mapainubuson nga mga nagapangita sa Dios. Subong mga tumuluo nga nagatuman sang mga sugo sang Dios, padayon nila nga ginatinguhaan ang dugang nga ihibalo nahanungod sa iya kag sa iya Pulong.​—⁠Manugwali 3:​11; 12:​13, 14; Isaias 54:⁠13.

Samtang ang mga Saksi ni Jehova nagabantala sang maayong balita, sa katunayan nagasiling sila sing dalayon: “Daku ang Dios!” Ginapakataas nila si Jehova, ginatahod sia sing daku. Sing malipayon, ginabuligan nila ang mga nagapangita sang kamatuoran nga matun-an ang nahanungod sa Dios kag mahimaya man sia. Indi kaangay sang kalibutanon nga mga nagahigugma sang kalipayan, ang katawhan ni Jehova ‘nagahigugma sang iya kaluwasan.’ (2 Timoteo 3:​1-5) Nakahibalo sang ila duna nga pagkamakasasala, nagapasalamat gid sila sing daku sa mahigugmaon nga aman ni Jehova nga Dios para sa kaluwasan padulong sa kabuhi nga dayon, ginapaposible paagi sa nagatumbas nga halad sang iya mahal nga Anak, si Jesucristo. (Juan 3:​16; Roma 5:​8; 1 Juan 2:​1, 2) Ginapadaku mo bala ang Dios kag ginapakita nga imo ‘ginahigugma ang iya kaluwasan’ paagi sa paghimo sang matuod nga pagsimba sa kadayawan niya?​—⁠Juan 4:23, 24.

Magsalig sa Manugluwas

Sang ginpabutyag ni David ang iya kaugalingon sa sining salmo, nagbatyag sia sing daku gid nga pagkinahanglan sa bagay nga nagsiling sia: “Ako imol kag nawad-an. Dalidali sa akon, O Dios. Ikaw ang akon kabulig kag ang akon Manugluwas. O Jehova, dili ka magpalantang.” (Salmo 70:5) Nasit-an sang mga pagtilaw nga nagasalakay sa mga tumuluo​—⁠ang mga kapipit-an subong sang paghingabot, mga pagsulay, kag mga pagsalakay ni Satanas⁠—⁠daw sa “nawad-an” kita. Bisan pa indi kita imol, daw wala kita sing inugpangapin batok sa wala sing konsiensia nga mga kaaway. Apang, makasalig kita nga si Jehova sarang makaluwas kag magaluwas sa aton subong iya matutom nga mga alagad.​—⁠Salmo 9:​17-20.

Si Jehova amo ang “Manugluwas” kon kinahanglan naton ini. Ang aton mismo mga ka­kulangan mahimo nga nagadala sa aton sa ­mabudlay nga sitwasyon. Apang kon ang ‘aton kabuangan nagapatiko sang aton dalanon,’ kabay nga ang aton tagipusuon indi ‘naakig kay Jehova.’ (Hulubaton 19:3) Indi sia ang pagabasulon, kag handa sia sa pagbulig sa aton kon magapangamuyo kita sa iya nga may pagtuo. (Salmo 37:5) Ano abi kon nagapanikasog kita nga likawan ang sala? Nian mangin ispisipiko kita nahanungod sini sa pangamuyo, nagapangabay sang bulig sang Dios sa pagpadayon nga nagasunod sa matarong nga dalanon. (Mateo 5:​6; Roma 7:​21-25) Ang Dios magasabat sang aton tinagipusuon nga pangamuyo, kag magauswag kita sa espirituwal kon magpasakop kita sa panuytoy sang iya balaan nga espiritu.​—⁠Salmo 51:​17; Efeso 4:⁠30.

Kon ginabudlayan sing daku bangod sang pagtilaw sa pagtuo, mahimo kita magabatyag nga indi na naton ini mabatas. Bangod kay ang aton makasasala nga unod maluya, mahimo kita magahandum sing madasig nga pagluwas. (Marcos 14:38) Gani mahimo kita magapangabay: “O Jehova, dili ka magpalantang.” Labi na kon nabalaka kita nahanungod sa pasipala sa ngalan sang Dios, mahimo kita mapahulag sa pagpangamuyo kaangay kay manalagna Daniel: “O Jehova, pamatii. O Jehova, patawara. O Jehova, pamatii kag himua. Dili magpalantang, tungod sa imo kaugalingon, O Dios ko, bangod nga . . . ang imo katawhan ginatawag sa imo ngalan.” (Daniel 9:19) Makatuo kita nga ang aton langitnon nga Amay indi man magpalantang, kay si apostol Pablo naghatag sini nga pagsalig: “Magpalapit kita nga may pagsalig sa trono sang dibagay nga kaluoy, kag makaagom sing dibagay nga kaluoy sa pagbulig sa aton sa tion sang kinahanglan.”​—⁠Hebreo 4:⁠16.

Indi pagkalimti nga si Jehova amo ang Manugluwas. Subong mga alagad niya, maayo nga dumdumon naton ini kag ang mapangamuyuon nga sentimiento sang Salmo 70. Kon kaisa kinahanglan nga magpangamuyo kita sa liwatliwat nahanungod sa butang nga ginakabalak-an katama. (1 Tesalonica 5:17) Daw wala sing solusyon sa isa ka partikular nga problema, wala sing lulutsan paguwa sa aton palaligban. Apang ang aton mahigugmaon nga langitnon nga Amay magapabakud sa aton kag indi magatugot sa aton nga matilawan sing labaw sa aton masarangan. Busa, indi gid maglapyo sa pagkadto sa atubangan sang trono sang Dayon nga Hari sa tinagipusuon nga pangamuyo. (1 Corinto 10:​13; Filipos 4:​6, 7, 13; Bugna 15:3) Magpangamuyo nga may pagtuo, kag magsalig sa iya sing bug-os, kay si Jehova nagapamati sa aton madagmit nga pagpangayo sing bulig.