Makasinggit Ka Bala sing Malipayon

Makita mo bala ang kaalwan kag pagkamadinumdumon sang isa ka mahigugmaon nga Manunuga sa aton kinaugali nga palibot? Bisan pa nga ang mga panganud, mga kakahoyan, mga suba, kag mga kabukiran yari diri bangod sang mga rason luwas sa ila makagalanyat lamang nga katahom, indi bala talalupangdon nga sila, walay sapayan, ginhimo sing makaalayaw gid kag makagalanyat sa mata? Kag sin-o ang wala malipay sa malinong, makaparelaks—apang makapapagsik—nga epekto sang pagdayandayan sa sinang mga palibot? Kon idugang mo sa sina ang mga pagpakamaayo sang preska nga hangin nga hakluon, kahumot sang mga bulak, kag ang mga huni sang mga pispis, indi mabudlay ang mag-ugyon sa deklarasyon: “Bangod sang binuhatan sang imo mga kamot nagsinggit ako sing malipayon. Daw ano kadalagku sang imo binuhatan, O Jehova!”—Salmo 92:4, 5.

Matuod, bangod sang kakagud kag pagkadihimpit sang tawo madamo karon ang wala makaagom sining tanan nga pagpakamaayo. Apang malapit na ang tion nga ang Ginharian nga pangulohan sang Dios magapaayaw sa mga kinahanglanon sang tagsa ka tinuga nga buhi.—Salmo 104; Lucas 21:7-36.