Kaangay Ka Bala sang Isa sa Ila?

‘MAS maayo mangin leon sa isa ka adlaw sang sa karnero sa isa ka gatos ka tuig.’ Ina nga mga pulong ginpatungod kay Benito Mussolini, diktador anay sa Italya.

Kaangay ni Mussolini madamo nga tawo ang nagapamatok nga maklase subong mga kordero kag mga karnero. Apang, ang salmista kag hari nga si David sang dumaan nga Israel nagsiling: “Si Jehova amo ang akon Manugbantay. . . . Sa luyo sang mga tubig nga malinaw ginatuytuyan niya ako.” (Salmo 23:​1, 2) Huo, si Jehova nga Dios amo ang Dakung Manugbantay, nga nagahatag sa iya katawhan sing mapinalanggaon nga pag-atipan subong nga daw mabuot sila nga mga karnero.

Ang katawhan sang Dios ginpatuhuyan subong malaragwayon nga mga karnero sa Salmo 95:​7, diin aton mabasa: “Kay [si Jehova] aton Dios, kag kita ang katawhan sang iya halalban kag ang mga karnero sang iya kamot.” Ang iban mahimo nagpaabot nga ang salmista magapamulong tuhoy sa “karnero sang iya halalban” kag sa “katawhan sang iya kamot.” Apang baliskad ini diri, kag sa amo ang katawhan gid ni Jehova ginpakilala subong mga karnero niya. Natigayon nila ang mga benepisyo sang halalban sang Dios kag ginatuytuyan sang iya mahigugmaon nga kamot.

Ang Anak ni Jehova, si Jesucristo, amo ang Maayo nga Manugbantay. Masunson niya nga ginapatuhuyan ang katawhan subong mga karnero. Halimbawa, si Jesus nagpamulong tuhoy sa “diutay nga panong” kag sa iya “iban nga mga karnero.” (Lucas 12:32; Juan 10:​14-16) Nahanungod sa iya mapainubuson nga kaangay sang karnero nga mga disipulo, si Jesus nagsiling: “Ang akon mga karnero nagapamati sang akon tingog, kag nakilala ko sila, kag nagasunod sila sa akon. Kag nagahatag ako sa ila sing kabuhi nga walay katapusan, kag indi na gid sila mawala, kag walay isa nga makaagaw sa ila sa akon kamot.” (Juan 10:​27, 28) Sa kamot sang isa ka mabuot nga gumalahom, ang mga sakop nagabenepisyo gikan sa iya gahom, pabor, pagtuytoy, kag pangamlig.​—⁠Bugna 1:​16, 20; 2:⁠1.

Wala sing isa ang mahimo makaagaw sa kaangay sang karnero nga katawhan gikan sa maamligon nga kamot ni Jesus. Sa karon, ginapainpain niya ang katawhan subong “mga kanding” nga wala sing kahamuot niya ukon subong “mga karnero” nga magatigayon sing kabuhi nga dayon sa idalom sang paggahom sang langitnon nga Ginharian sang Dios. (Mateo 25:​31-46) Mapamatud-an ka bala nga isa sining ginpakamaayo nga karnero?

[Credit Line sa pahina 32]

Garo Nalbandian