Mahimo Ikaw Mag-uswag sa Espirituwal

ANG matuod nga balor mahimo nga mabudlay mahibaluan. Subong sini sa kaso sang mga brilyante. Bisan pa ang napahining nga brilyante nagakilan, ang magaras nga brilyante wala masyado nagainggat. Walay sapayan, sa sining magaras nga brilyante makita ang isa gid ka matahom nga hiyas.

Ang mga Cristiano kaangay sa magaras nga mga brilyante sa madamo nga paagi. Bisan malayo pa kita sa kahimpitan, may mga kabilihanan kita nga ginapabaloran ni Jehova. Kaangay sa mga brilyante, tanan kita may kaugalingon pinasahi nga mga kinaiya. Kag ang tagsatagsa sa aton sarang mag-uswag sa espirituwal kon amo sina ang aton tinagipusuon nga handum. Ang aton personalidad mahimo mapauswag, agod labi pa ini nga magsanag sa kahimayaan ni Jehova.​—⁠1 Corinto 10:⁠31.

Pagkatapos nga makortihan kag mapahining, ang brilyante ginabutang sa bulutangan nga nagapabanaag gid sang mga kinaiya sini. Sing kaanggid, sarang kita magamit ni Jehova sa nanuhaytuhay nga mga kahimtangan, ukon asaynment, kon ‘magsul-ob [kita] sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’​—⁠Efeso 4:​20-​24.

Ina nga pag-uswag sa espirituwal indi mahapos himuon, subong nga ang isa ka brilyante sa kinaugali nga kahimtangan sini halos wala nagakilan kaangay sang hiyas. Ayhan dapat naton kuhaon sa aton kaugalingon ang pila ka kaluyahon, pasibuon ang aton panimuot sa pagbaton sing responsabilidad, ukon panikasugan pa gani naton nga bayaan ang indi maayo nga kinabatasan sa espirituwal. Apang mahimo kita mag-uswag kon luyag gid naton, sanglit si Jehova nga Dios makahatag sa aton sing “kusog nga labaw sa kinaandan.”​—⁠2 Corinto 4:7; Filipos 4:⁠13.

Si Jehova Nagapalig-on sa Iya mga Alagad

Ang pagkorte sa mga brilyante nagakinahanglan sing pagsalig sa kaugalingon nga resulta sang sibu nga ihibalo, sanglit kon mautod na ang isa ka bahin sang magaras nga brilyante, masami nga indi na ini mapuslan. Daku nga balor sang materyal—⁠kon kaisa 50 porsiento sang wala pa makortihan nga bato​—⁠ang ginautod agod matigayon ang luyag nga korte. Kita man nagakinahanglan sing pagsalig sa kaugalingon nga resulta sang sibu nga ihibalo agod madihon ang aton personalidad kag mag-uswag sa espirituwal. Dapat nagasalig kita ilabi na nga pabaskugon kita ni Jehova.

Apang, mahimo batyagon naton nga indi nagakadapat, ukon pensaron nga indi kita makasarang sa paghimo sing labi pa. Sang una, ang matutom nga mga alagad sang Dios nagbatyag sing subong sina. (Exodo 3:​11, 12; 1 Hari 19:​1-4) Sang gintangduan sang Dios nga mangin isa ka “manalagna sang mga pungsod,” si Jeremias nagsiling: “Yari karon indi gid ako makahibalo maghambal, kay isa lamang ako ka bata.” (Jeremias 1:​5, 6) Apang walay sapayan sang iya pagpangalag-ag, si Jeremias nangin isa ka maisog nga manalagna nga naghatag sing direkta nga mga mensahe sa dimainabyanon nga mga tawo. Paano ini posible? Natun-an niya nga magsalig kay Jehova. Si Jeremias nagsulat sang ulihi: “Bulahan ang tawo nga nagasalig kay Jehova, kag ang iya pagsalig amo si Jehova.”​—⁠Jeremias 17:7; 20:⁠11.

Sa karon, ginapalig-on man ni Jehova ang mga nagasalig sa iya. Nasapwan ni Edward,a isa ka amay nga may apat ka kabataan nga mahinay mag-uswag sa espirituwal, nga matuod ini. Sia nagpaathag: “Isa ako sang mga Saksi ni Jehova sa sulod na sang siam ka tuig, apang daw wala ako nagauswag sa espirituwal. Ang problema amo nga wala ako sing motibasyon kag wala sing pagsalig. Pagkatapos magsaylo sa Espanya, nakig-angot ako sa isa ka magamay nga kongregasyon nga may isa lamang ka gulang kag isa ka ministeryal nga alagad. Bangod kinahanglanon, ginpangabay ako sang gulang nga maghatag sing madamo nga bahin. Nagkurog ako samtang ginhatag ko ang akon una nga mga pamulongpulong kag mga bahin sa miting. Apang, natun-an ko nga magsalig kay Jehova. Pirme ako ginadayaw sang gulang kag nagahatag sing mataktikanhon nga mga panugda para sa pag-uswag.

“Sa amo man nga tion, gindugangan ko ang akon hilikuton sa pag-alagad sa latagon kag ginpangunahan sing mas maayo sa espirituwal ang akon pamilya. Subong resulta, nangin dugang nga makahulugan ang kamatuoran para sa bug-os nga pamilya, kag nagbatyag gid ako sing kaayawan. Isa na ako karon ka ministeryal nga alagad, kag nagapanikasog gid ako nga mapalambo ang mga kinaiya sang isa ka Cristianong manugtatap.”

“Ubaha ang Daan nga Personalidad”

Subong sang nahisayran ni Edward, ang espirituwal nga pag-uswag nagakinahanglan sing pagsalig kay Jehova. Ang pagpalambo sing tulad-Cristo nga “bag-ong personalidad” kinahanglanon man. Paano ini mahimo? Ang una nga tikang amo ang ‘pag-uba’ sing mga batasan nga bahin sang daan nga personalidad. (Colosas 3:⁠9, 10) Subong nga ang mga depekto, kaangay sang nagsamo nga mga mineral, dapat kuhaon sa magaras nga brilyante agod magkilan ini nga hiyas, ang mga panimuot ‘nga kalibutanon’ dapat man kuhaon agod nga ang aton bag-o nga personalidad magasanag.​—⁠Galacia 4:⁠3.

Isa sining mga panimuot amo ang pagpangalag-ag nga batunon ang responsabilidad bangod nahadlok nga daku kaayo ang ipatuman sa aton. Matuod, ang responsabilidad nagakahulugan sing trabaho, apang makaalayaw ini nga trabaho. (Ipaanggid ang Binuhatan 20:35.) Ginbaton ni Pablo nga ang diosnon nga debosyon nagakinahanglan nga ‘magpangabudlay kita kag magpanikasog.’ Ginahimo naton ini sing malipayon, siling niya, “bangod ang aton paglaum nahamtang sa Dios nga buhi,” ang isa nga wala nagakalimot sa aton binuhatan para sa aton mga masigka-Cristiano kag sa iban.​—⁠1 Timoteo 4:​9, 10; Hebreo 6:​10.

Ang pila ka brilyante may “matapok nga bahin” nga resulta sang pagporma sini kag kinahanglan halungan sing maayo. Apang, paagi sa instrumento nga ginatawag polariscope, mahibal-an sang manugpahining ang matapok nga bahin kag makortihan niya ang bato sing madinalag-on. Ayhan may nasulod kita nga mga kaluyahon, ukon diperensia sa personalidad, bangod sang aton ginhalinan ukon sang masakit nga inagihan. Ano ang aton mahimo? Una, dapat naton batunon ang problema kag determinado nga landason ini tubtob masarangan naton. Dapat naton haw-asan ang aton kaugalingon sing kabug-atan sa atubang ni Jehova paagi sa pangamuyo, ayhan mangayo man sing espirituwal nga bulig sa isa ka Cristianong gulang.​—⁠Salmo 55:22; Santiago 5:​14, 15.

Yadtong nasulod nga kaluyahon nag-apektar kay Nicholas. “Ang akon amay isa ka alkoholiko, kag nagpaantos ini sa amon sang akon utod nga babayi,” paathag niya. “Sang nag-untat ako sa pag-eskwela, nagsoldado ako, apang ang akon rebelyuso nga huyog naghatag sa akon sing problema. Ginpriso ako sang mga awtoridad sa soldado bangod sang pagbaligya sing mga droga, kag sa isa pa ka hitabo naghalin ako nga wala makalisensia. Sang ulihi, naghalin ako sa pagkasoldado, apang may problema gihapon ako. Walay sapayan nga magamo ang akon kabuhi bangod sang pag-abuso sa droga kag sobra nga pag-inom, interesado ako sa Biblia kag nagahandum nga makatigayon sing katuyuan sa kabuhi. Sang ulihi, nakapakigsugilanon ako sa mga Saksi ni Jehova, ginbag-o ang akon estilo sang kabuhi, kag ginbaton ang kamatuoran.

“Apang, naglawig sing tinuig antes ko ginbaton kag ginlandas ang diperensia sa akon personalidad. Indi ko gid luyag ang mga may awtoridad kag nagapangakig kon laygayan ako. Bisan pa luyag ko nga gamiton sing bug-os ni Jehova, ginaupangan ako sining kaluyahon. Sang ulihi, paagi sa bulig sang duha ka mahinangpanon nga gulang, ginbaton ko ang akon problema kag gin-aplikar ang ila mahigugmaon Makasulatanhon nga laygay. Walay sapayan nga nagasunggod ako kon kaisa, makontrol ko na karon ang akon pagkarebelyuso. Mapinasalamaton gid ako tungod sang mapailubon nga pagpakig-angot ni Jehova sa akon kag tungod sang mahigugmaon nga bulig sang mga gulang. Bangod sang akon pag-uswag sa espirituwal, gintangdo ako sining karon lang subong isa ka ministeryal nga alagad.”

Subong sang natukiban ni Nicholas, ang pagbag-o sa madugay na nga panimuot indi mahapos. Mahimo kita mag-atubang sing amo man nga kabudlayan. Ayhan tuman kita ka mabinatyagon. Mahimo nga nagahupot kita sing hinakit, ukon mahimo nga ginahatagan naton sing daku nga importansia ang pagkaindependiente. Sa amo, ang aton Cristianong pag-uswag mahimo nga limitado. Naeksperiensiahan sang mga manugpahining sing brilyante ang kaanggid nga butang sa mga bato nga ginatawag nila nga naats. Ang matuod, duha ini ka bato nga natunaw kag nagsamo sang magporma ang brilyante. Subong resulta, ang naats may duha ka nagasumpakilay nga paagi sang pagporma nga nagpabudlay gid sa pagkorte suno sa lugas. Sa aton bahin, masapwan naton ang kabubut-on sang espiritu nga nagapakig-away batok sa dihimpit nga unod. (Mateo 26:⁠41; Galacia 5:​17) Kon kaisa, mahimo kita magbatyag nga mag-untat sa pagpakig-away, nagapangatarungan nga ang mga kasawayan sa aton personalidad indi man gid importante. ‘Ti,’ mahimo isiling naton, ‘palangga ako gihapon sang akon pamilya kag mga abyan.’

Apang, agod makaalagad kita sa aton mga kauturan kag mahimaya ang aton langitnon nga Amay, kinahanglan ‘magbag-o kita sa puwersa nga nagapahulag sang aton hunahuna’ paagi sa pagsul-ob sing bag-o nga personalidad. Ang pagpanikasog takus gid, subong napamatud-an ni Nicholas kag sang madamo nga iban pa. Nahibaluan sang manugpahining sing brilyante nga ang isa ka higko makapalaw-ay sa bug-os nga brilyante. Sing kaanggid, paagi sa pagpatumbaya sa maluya nga bahin sang aton personalidad, maguba naton ang aton espirituwalidad. Malain pa, ang isa ka serioso nga kaluyahon mahimo magresulta sa aton pagkapukan sa espirituwal.​—⁠Hulubaton 8:​33.

Kaangay sang “Kalayo” sa Sulod Naton

Ginatinguhaan sang manugpahining sing brilyante nga magbadlak ang brilyante. Ginahimo ini paagi sa pagkorte agod makapabanaag sing daw balangaw nga mga duag. Sa sulod sang brilyante nagabanaag ang madamo sing duag nga silak nga amo ang nagapakilan sa brilyante. Sing kaanggid, ang espiritu sang Dios mahimo nga daw mangin “kalayo” sa sulod naton.​—⁠1 Tessalonica 5:​19; Binuhatan 18:25; Roma 12:11.

Apang ano kon nabatyagan naton ang pagkinahanglan nga mapahulag sa espirituwal? Paano ini mahimo? Dapat naton ‘binagbinagon ang aton mga dalanon.’ (Salmo 119:​59, 60) Magalakip ini sang pagkilala sa mga butang nga nagapahinay sa aton sa espirituwal kag dayon hibaluon kon ano nga teokratikong mga hilikuton ang kinahanglan nga himuon naton sing labi pa kapagsik. Mapadaku pa naton ang apresasyon sa espirituwal paagi sa regular personal nga pagtuon kag hanuot nga pangamuyo. (Salmo 119:​18, 32; 143:​1, 5, 8, 10) Dugang pa, paagi sa pag-upod sa mga nagapangabudlay sing lakas sa pagtuo, mapalig-on pa gid naton ang aton desisyon nga alagaron si Jehova sing makugi.​—⁠Tito 2:​14.

Si Louise, isa ka lamharon nga Cristianong babayi, nagbaton: “Duha ka tuig ko nga ginbinagbinag ang regular nga pagpayunir antes ako magpalista subong isa ka payunir, ukon bug-os tion nga manugbantala sing Ginharian. Wala sing nagaupang sa akon, apang masulhay ang akon kahimtangan, kag indi ko matalikdan ini. Nian hinali nga napatay ang akon amay. Narealisar ko kon daw ano kadali sang kabuhi kag nga wala ko ginagamit sa labing maayo nga paagi ang akon mismo kabuhi. Gani ginbag-o ko ang akon panimuot sa espirituwal, gindugangan ang akon pag-alagad, kag nangin isa ka regular payunir. Ang labi nga nakabulig sa akon sa sini amo ang akon espirituwal nga mga kauturan nga pirme nagasakdag sa mga kahimusan sang pag-alagad sa latagon kag tayuyon nga nagaupod sa akon sa ministeryo. Natun-an ko nga sa maayo man ukon sa malain nga kahimtangan, pareho kita sing mga prinsipio kag mga tulumuron sa aton mga kaupod.”

Ginapatalom Subong sang Salsalon

Ang brilyante amo ang pinakamatig-a nga kinaugali nga bagay sa duta. Busa, kinahanglan ang isa ka brilyante sa pag-utod sa isa pa. Nagapahanumdom ini sa mga estudyante sa Biblia tuhoy sa hulubaton nga nagasiling: “Ang salsalon nagapatalom sang salsalon. Sa amo ang tawo nagapatalom sang nawong sang iban.” (Hulubaton 27:17) Paano ‘ginapatalom’ ang nawong sang isa ka tawo? Ang isa ka tawo mahimo magmadinalag-on sa pagpatalom sing kaalam kag espirituwal nga kahimtangan sang iban, subong nga ang isa ka salsalon mahimo magamit sa pagpatalom sing sulab sang pareho nga metal. Halimbawa, kon nasubuan kita bangod sang pila ka kalugaw-an, ang pagpalig-on sang iban makapabakod gid. Sa amo, ang aton masubo nga nawong mangin manayanaya, kag mapapagsik kita liwat para sa makugi nga hilikuton. (Hulubaton 13:12) Ilabi na nga makabulig sa aton ang mga gulang sa kongregasyon agod patalumon kita paagi sa pag-aman sing Makasulatanhon nga pagpalig-on kag laygay para sa pag-uswag. Ginasunod nila ang prinsipio nga ginsiling ni Solomon: “Tudlui ang maalam nga tawo kag sia magamaalam pa gid. Tun-i ang isa nga matarong kag magadugang sia sa tinun-an.”​—⁠Hulubaton 9:⁠9.

Sa pagkamatuod, ang espirituwal nga paghanas nagakinahanglan sing tion. Sa sulod sang kapin sa napulo ka tuig, ginpaambit ni apostol Pablo ang iya eksperiensia kag mga paagi sang pagtudlo kay Timoteo. (1 Corinto 4:​17; 1 Timoteo 4:​6, 16) Ang malawig nga paghanas ni Moises kay Josue sa sulod sang 40 ka tuig nga panag-on nagbenepisyo sa pungsod sang Israel sa sulod sang malawig nga tion. (Josue 1:​1, 2; 24:​29, 31) Nag-upod si Eliseo kay manalagna Elias sa sulod sang ayhan 6 ka tuig, nga nagbaton sing maayo nga sadsaran para sa iya ministeryo nga naglawig sing mga 60 ka tuig. (1 Hari 19:21; 2 Hari 3:​11) Paagi sa paghatag sing padayon nga paghanas, ginasunod sang mga gulang ang huwaran nanday Pablo, Moises, kag Elias.

Ang pagdayaw isa ka importante nga bahin sang paghanas. Ang sinsero nga pagpahayag sing apresasyon sa maayo nga paghatag sing mga bahin ukon sa dalayawon nga mga buhat mahimo magpahulag sa iban nga alagaron ang Dios sing labi pa. Ang pagdayaw nagahatag sing pagsalig nga, sa amo, nagapahulag sa isa nga magpanikasog agod malandas ang mga kaluyahon. (Ipaanggid ang 1 Corinto 11:⁠2.) Makapalig-on man sa pag-uswag sa kamatuoran ang mangin masako sa pagbantala sing Ginharian nga hilikuton kag sa iban pa nga hilikuton sa kongregasyon. (Binuhatan 18:⁠5) Kon ang mga gulang nagatangdo sa kauturan nga lalaki sing responsabilidad suno sa ila pag-uswag sa espirituwal, nagahatag ini sa ila sing mapuslanon nga eksperiensia kag mahimo gid nga mapalig-on ang ila handum sa pag-uswag sing padayon sa espirituwal.​—⁠Filipos 1:​8, 9.

Maayo nga Rason sa Pag-uswag sa Espirituwal

Ang mga brilyante ginakabig nga malahalon. Matuod man ini sa mga nagapakig-upod karon sa bug-os kalibutan nga pamilya sang mga sumilimba ni Jehova. Sa katunayan, ginatawag sila mismo sang Dios nga “maayo,” ukon “hamili,” nga mga butang sang tanan nga pungsod. (Hageo 2:​7, footnote) Sang nagligad nga tuig, 375,923 ang nangin bawtismado nga mga Saksi ni Jehova. Agod maatipan ini nga pag-uswag, kinahanglan nga ‘palaparon pa ang tolda.’ Paagi sa pag-uswag sa espirituwal​—⁠kag paagi sa pagtigayon sing mga pribilehiyo sa Cristianong pag-alagad​—⁠posible nga makapakigbahin ikaw sa pag-atipan sa sining pagsangkad.​—⁠Isaias 54:2; 60:⁠22.

Indi kaangay sa madamo malahalon nga brilyante nga ginatago sa mga kaha de yero sa banko kag talagsa lang gid makita, ang aton espirituwal nga balor mahimo magsiga sing masanag. Kag samtang ginapauswag kag ginapadayag naton ang aton Cristianong mga kinaiya, ginahimaya naton si Jehova nga Dios. Ginsugo ni Jesus ang iya mga sumulunod: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag mahimaya nila ang inyo Amay nga yara sa langit.” (Mateo 5:16) Pat-od gid nga nagahatag ina sa aton sing maayo nga rason sa pag-uswag sa espirituwal.

[Footnote]