Imol Apang Manggaranon—Paano ini mahimo Matabo?

Siniglo na ang nakaligad isa ka maalamon nga tawo ang nangamuyo nga indi sia mag-imol. Ngaa nangabay sia sing subong sini? Bangod nahangawa sia nga ang kaimulon mahimo tunaan sing mga panimuot kag mga buhat nga magabutang sa katalagman sang iya kaangtanan sa Dios. Matalupangdan ini gikan sa iya mga pinamulong: “Pakan-a ako sing kalan-on nga kinahanglanon ko . . . agod indi ako mag-imol kag magpangawat kag magpasipala sa ngalan sang akon Dios.”—⁠HULUBATON 30:​8, 9.

NAGAKAHULUGAN bala ini nga imposible para sa isa ka imol nga tawo ang mag-alagad sa Dios sing matutom? Indi gid! Sa bug-os nga maragtas dimaisip nga mga alagad ni Jehova nga Dios ang naghupot sing integridad sa iya walay sapayan sang kabudlayan nga dala sang kaimulon. Gani, ginahigugma ni Jehova ang mga nagasalig sa iya kag ginaamanan sila.

Mga Matutom Sang Una

Si apostol Pablo mismo nakaeksperiensia sing mga tion sang kaimulon. (2 Corinto 6:​3, 4) Ginlaragway man niya ang ‘dakung panganod’ sang matutom nga mga saksi antes sang panahon sang Cristianismo, ang iban sa ila “nagdalangdalang nga napanaptan sing mga panit sang mga karnero, nga napanaptan sing mga panit sang mga kanding, samtang sila nawad-an . . . Nagdalangdalang sila sa mga desyerto kag sa mga kabukiran kag sa mga lungib kag sa mga gikab sang duta.”​—⁠Hebreo 11:​37, 38; 12:⁠1.

Isa sining mga matutom amo si manalagna Elias. Sadtong tatlo ka tuig kag tunga nga tigpamalangag, si Jehova tayuyon nga nag-aman sing kalan-on sa iya. Una, nagpadala ang Dios sing tinapay kag karne sa manalagna paagi sa mga uwak. (1 Hari 17:​2-6) Sang ulihi, milagruso nga ginpatener sing dugay ni Jehova ang suplay nga harina kag langis nga gin-aman sang isa ka balo para kay Elias. (1 Hari 17:​8-16) Ang kalan-on simple lamang, apang ginhuptan sini nga buhi ang manalagna, ang babayi, kag ang iya anak nga lalaki.

Ginsakdag man ni Jehova ang matutom nga si manalagna Jeremias sang panahon sang kapurauton. Nakalampuwas si Jeremias gikan sa pagsalakay sang Babilonia sa Jerusalem, sang ang mga tawo “nagkaon sing tinapay sa timbang kag may kahadlok.” (Ezequiel 4:16) Sang ulihi, nangin grabe gid katama ang tiggulutom sa siudad sa bagay nga ginkaon sang pila ka kababayin-an ang unod sang ila mismo mga anak. (Panalabiton 2:20) Walay sapayan nga nabilanggo si Jeremias bangod sang iya walay kahadlok nga pagbantala, ginpat-od ni Jehova nga ginhatagan sia sing “isa ka bilog nga tinapay” adlaw-adlaw “tubtob nga ang tanan nga tinapay gikan sa siudad naurot.”​—⁠Jeremias 37:⁠21.

Gani si Jeremias, kaangay ni Elias, may diutay lamang nga pagkaon. Ang Kasulatan wala nagasugid sa aton kon ano ukon kon daw ano kasunson nagkaon si Jeremias sa tapos nga maurot ang tinapay sa Jerusalem. Apang, nakahibalo kita nga ginsakdag sia ni Jehova kag nga nakalampuwas sia sa sadtong makangilidlis nga tion sang tiggulutom.

Sa karon, may kaimulon sa tanan nga bahin sang kalibutan. Suno sa Nasyones Unidas, ang labing daku nga kaimulon makita sa Aprika. Ang pahayag sang NU nagsiling sang 1996: “Halos katunga sang tanan nga Aprikano ang imol.” Walay sapayan sang daku nga kapurauton, nagadamo nga Aprikano ang nagaaplikar sang mga prinsipio sang Biblia sa kabuhi kag nagaalagad sing matutom sa Dios, nagasalig nga sakdagon niya sila. Binagbinaga ang pila ka halimbawa gikan sa isa ka bahin sang aton ginasit-an nga kalibutan.

Paghupot Sing Pagkabunayag

Si Michael,⁠a nga nagapuyo sa Nigeria, isa ka mangunguma nga may ginabuhi nga anom ka kabataan. “Mabudlay mangin bunayag kon wala ka sing kuwarta nga inugsagod sa imo pamilya,” siling niya. “Apang kon masulay ako nga mangin dibunayag, ginapahanumdom ko ang akon kaugalingon sang Efeso 4:​28, nga nagasiling: ‘Ang nagpangawat indi na magpangawat, kundi sa baylo magpangabudlay sia sing lakas, nga nagabuhat sa iya mga kamot sing kon ano ang maayo.’ Gani kon ginasulay ako, ginapamangkot ko ang akon kaugalingon, ‘Ginpangabudlayan ko bala ini nga kuwarta?’ ”

“Halimbawa,” padayon ni Michael, “sang nagalakat ako isa ka adlaw, nakita ko ang isa ka bag nga nahulog sa buli sang isa ka motorsiklo. Wala ko na malagas ang nakasakay, gani ginpudyot ko ang bag kag natukiban ko nga puno ini sing kuwarta! Paagi sa identipikasyon sa bag, nakita ko ang tag-iya kag gin-uli sa iya ang bag.”

Pagbato sa Kapung-aw

Isa ka tawo sa Aminhan nga Aprika ang nagkomento: “Ang kaimulon [kaangay] sa pagkabukot sa madalom nga buho, nga makita ang kasanag kag mga tawo nga nagalabay, apang indi makapangayo sing tabang ukon sing hagdan para masakaan paguwa.” Indi katingalahan nga ang kaimulon masunson nga amo ang ginabangdan sang kapung-aw kag kapaslawan! Bisan ang mga alagad sang Dios mahimo nga magatan-aw sa manggad sang iban kag magahunahuna nga ang pagkabuhi nga may integridad indi mapuslanon. (Ipaanggid ang Salmo 73:​2-13.) Paano malandas ini nga mga balatyagon?

Si Peter, nga taga-Katundan nga Aprika, nagretiro pagkatapos sang 19 ka tuig nga pagtrabaho sa gobierno. Nagapangabuhi na lang sia karon paagi sa diutay nga pension. “Sa mga panahon nga ginaluyahan ako sing buot,” siling ni Peter, “ginapahanumdom ko ang akon kaugalingon sang nabasa ko sa Biblia kag sa mga publikasyon sang Watch Tower Society. Ining daan nga sistema magataliwan, kag nagahulat kita sing isa ka mas maayo nga sistema.

“Subong man, ginadumdom ko ang 1 Pedro 5:​9, nga nagasiling: ‘Manindugan kamo batok [kay Satanas], malig-on sa pagtuo, nga nakahibalo nga ang amo man nga mga butang sa paagi sang mga pag-antos nagakahanabo sa bug-os nga paghiliupod sang inyo mga kauturan sa kalibutan.’ Gani indi lang ako isahanon nga nagaantos sing mga kabudlayan. Ining mga pahanumdom nakabulig sa akon nga kalimtan ang mga panghunahuna nga nagapaluya sing buot kag nagapapung-aw.”

“Isa pa,” padayon ni Peter, “si Jesus naghimo sing madamong milagro sang yari sia sa duta, walay sapayan nga wala niya ginpamanggad ang bisan sin-o. Ngaa dapat ko paabuton nga pamanggaron niya ako?”

Ang Gahom Sang Pangamuyo

Ang pagpalapit kay Jehova nga Dios sa pangamuyo isa pa ka paagi sa pagbato sa negatibo nga panghunahuna. Sang si Mary nangin isa sang mga Saksi ni Jehova sang 1960, ginsikway sia sang iya pamilya. Wala magminyo kag karon singkwentahon na ang edad, maluya sia kag pigado sa materyal. Walay sapayan sina, makugi sia sa Cristianong ministeryo.

Si Mary nagsiling: “Kon ginaluyahan ako sing buot, nagadangop ako kay Jehova sa pangamuyo. Nakahibalo ako nga wala sing isa nga makabulig sa akon sing labi pa sa mahimo niya. Natun-an ko nga kon magsalig ka kay Jehova, buligan ka niya. Pirme ko ginapanumdom ining mga pulong ni Hari David, nga masapwan sa Salmo 37:​25: ‘Nangin pamatan-on ako, kag karon tigulang na, apang wala ako makakita nga ang matarong ginpabayaan, ukon ang iya kaliwat nga nagapakilimos sing tinapay.’

“Nakatigayon man ako sing pagpalig-on gikan sa mga eksperiensia sang tigulang nga espirituwal nga mga kauturan nga lalaki kag babayi nga ginsaysay sa Ang Lalantawan. Ginbuligan sila ni Jehova nga Dios, gani nakahibalo ako nga padayon man niya ako nga buligan. Ginapakamaayo niya ang akon pagbulubaligya sing fufu [pagkaon halin sa balinghoy], kag nakatibawas ako sa akon adlaw-adlaw nga kinahanglanon. Kon kaisa nga halos wala na ako sing kuwarta kag nagapalibog sang akon himuon, si Jehova nagapadala sing isa nga nagahatag sa akon sing kuwarta kag nagasiling, ‘Sister, batuna ini palihug.’ Wala gid ako ginpaslaw ni Jehova.”

Ang Kabilihanan Sang Pagtuon sa Biblia

Ginapabilihan sang mga Saksi ni Jehova ang pagtuon sa Pulong sang Dios, ang Biblia, kag lakip sa sini amo ang mga imol sa tunga nila. Ang sisenta anyos nga si John nagaalagad subong isa ka payunir (isa ka bug-os tion nga manugbantala sing Ginharian) kag isa ka ministeryal nga alagad sa kongregasyon. Nagaistar sia sa isa ka mahuyang nga duha-sing-panalgan nga tinukod kaupod sang 13 ka pamilya. Ang iya hulot amo ang isa ka bahin sang pasilyo sa nahaunang panalgan, nga gindingdingan sing playwud. May duha ini ka daan nga siya kag isa ka lamesa nga puno sing mga bulig sa pagtuon sa Biblia. Nagatulog sia sa banig.

Mga isa ka dolyar sa isa ka adlaw ang ginakita anay ni John sa paglibod sing tinapay, apang sang gindumilian ang pagbakal sing trigo sa luwas, nadulaan sia sing palangabuhian. Sia nagsiling: “Nabudlayan gid ako kon kaisa, apang nagpadayon ako sa pagpayunir. Si Jehova amo ang nagasakdag sa akon. Ginahimo ko ang bisan ano nga obra nga makita ko kag wala ako nagasalig sa iban sa pagbuhi ukon sa pagpakaon sa akon, walay sapayan nga ang mga kauturan sa kongregasyon tuman ka mabuligon. Ginapangitaan nila ako sing obra kag kon kaisa ginahatagan nila ako sing kuwarta.

“Nagahinguyang ako sing tion sa pagbasa sang Biblia kag sang mga publikasyon sang Watch Tower Society. Nagatuon ako sa kaagahon sa tion nga ang balay malinong kag nagabasa sa gab-i kon may suga na kami. Nahibaluan ko nga dapat ko padayunon ang akon personal nga pagtuon.”

Paghanas sa mga Kabataan Para sa Kabuhi

Si Daniel isa ka balo nga may anom ka kabataan. Ang iya obra sa sulod sang 25 ka tuig nadula sang 1985, apang nakakita sia sing obra subong manugbantay sing tindahan. “Pigado ang pangabuhi para sa pamilya,” siling niya. “Karon makaisa na lang kami makakaon sa isa ka adlaw. Isa ka bes, tatlo ka adlaw kami nga wala makakaon. Tubig lamang ang gin-inom namon agod makalampuwas.”

Si Daniel isa ka gulang sa kongregasyon. “Wala gid ako nagapalya sa Cristianong mga miting, kag pirme ako masako sa teokratikong mga asaynment,” siling niya. “Kon may ulubrahon sa Kingdom Hall, ginapat-od ko gid nga didto ako. Kag kon mangin mabudlay gid ang kahimtangan, ginapahanumdom ko ang akon kaugalingon sang mga pinamulong ni Pedro kay Jesus, nga narekord sa Juan 6:​68: ‘Ginuo, kay sin-o bala kami makadto?’ Kon mag-untat ako sa pag-alagad kay Jehova, diin ako makadto? Ang mga pinamulong ni Pablo nga masapwan naton sa Roma 8:​35-39 nagpuno man sa akon sing determinasyon bangod ginapakita sini nga wala sing butang nga makahamulag sa aton gikan sa gugma sang Dios kag ni Cristo. Amo ini ang panimuot nga ginapatudok ko sa akon mga kabataan. Pirme ko sila ginasingganan nga indi gid namon dapat pagbayaan si Jehova.” Ang kakugi ni Daniel, lakip ang tayuyon nga pagtuon sa Biblia sang pamilya, may positibo nga epekto sa iya mga kabataan.

Ang Espiritu Sang Paghatag

Ang isa mahimo magahunahuna nga ang mga tuman ka imol wala gid sa kahimtangan nga makaamot sing pinansial sa pagpauswag sa mga interes sang Ginharian. Apang indi ina matuod. (Ipaanggid ang Lucas 21:​1-4.) Ang iban nga mga Saksi sa Ghana nga panguma ang palangabuhian nagapain sing bahin sang ila uma nga pagagamiton sa pagpauswag sa mga interes sang Ginharian sang Dios. Kon ang patubas sina nga bahin sang ila uma mabaligya, ang kuwarta ginagamit para sa sina nga katuyuan lamang, nga nagalakip sing pag-amot sa lokal nga Kingdom Hall sang mga Saksi ni Jehova.

Si Joan, nga taga-Central Aprika, isa ka payunir. Agod mabuhi ang paralisado nga bana kag apat pa ka salaguron, nagabaligya sia sing tinapay. Sang ang kongregasyon nga ginatambungan niya nagkinahanglan sing mga bangko para sa Kingdom Hall, ang pamilya ni Joan namat-od nga iamot ang ila tanan nga kuwarta sa balay. Wala na sing mabilin sa ila. Apang, sang masunod nga adlaw, may isa nga wala ginapaabot nga nagbayad sing madugay na nga utang, naghatag sa ila sing kuwarta nga wala gid nila ginlauman nga mabaton pa!

Si Joan malipayon kag wala nagapalibog sing dinagakaigo tuhoy sa kuwarta. “Ginapaathag ko ang akon kahimtangan kay Jehova sa pangamuyo, kag nian nagaguwa ako sa ministeryo sa latagon. Nahibaluan namon nga wala gid sing malauman nga mas maayo nga tion sa sining sistema sang mga butang. Apang, nahibaluan namon nga si Jehova magaaman sang amon mga kinahanglanon.”

Pagpakita Sing Kapisan

Ang mga Saksi ni Jehova nakilal-an tungod sang ila gugma sa isa kag isa. (Juan 13:35) Ginabuligan sang mga may kuwarta ang ila mga masigka-Cristiano nga nagakinahanglan. Sing masami ginahimo ini subong isa ka regalo kag kon kaisa subong bulig sa obra.

Si Mark, nga nagapuyo sa Congo, nagmasakit sing aro. Nasamad ang iya mga tudlo sa tiil kag kamot. Agod makalakat, nagapanungkod sia. Sang namat-od si Mark nga mag-alagad kay Jehova, naghimo sia sing daku nga pagbalhin sa iya kabuhi. Sa baylo nga magpakilimos sing pagkaon subong sang ginhimo niya anay, nagtanom sia para sa iya kaugalingon nga pagkaon. Naghimo man sia sing adobe nga mga tisa, nga ginabaligya niya.

Walay sapayan sang iya sablag sa lawas, si Mark padayon nga nagpangabudlay sing mapisan. Nakabakal sia sang ulihi sing isa ka lote kag ginpatindugan ini sing isa ka diutay nga balay. Karon, si Mark isa na ka gulang sa kongregasyon kag ginatahod sing daku sa banwa nga ginapuy-an niya. Ginabuligan niya karon ang iban nga mga nagakinahanglan.

Sa pagkamatuod, sa madamong lugar halos imposible makakita sing obra. Ang isa ka Cristianong gulang nga nagaalagad sa isa sang mga sanga talatapan sang Watch Tower Society sa Sentral Aprika nagsulat: “Madamong kauturan nga lalaki diri ang wala sing obra. Ang iban nagatinguha sa pagtukib sing kaugalingon nila nga mga obra, apang mabudlay ini. Madamo ang nangatarungan nga bangod magaantos sila bisan ano man ang ila himuon, magasakripisyo na lang sila sa materyal subong payunir nga mga ministro. Sa paghimo sina, natukiban sang madamo nga ginpakamaayo sila sing mas bugana sangsa may obra sila nga diutay lamang ukon nga wala gid sing bayad.”

Si Jehova Nagasakdag Sang Iya Katawhan

Si Jesucristo nagsiling tuhoy sa iya kaugalingon: “Ang talunon nga mga ido may mga lungib kag ang mga pispis sa langit may mga hapunan, apang ang Anak sang tawo wala gid sing ulunlan sang iya ulo.” (Lucas 9:58) Sing kaanggid, si apostol Pablo nagsulat: “Tubtob karon nga takna padayon kami nga ginagutom kag ginauhaw man kag haluson napanaptan kag ginapintasan kag walay puluy-an.”​—⁠1 Corinto 4:⁠11.

Sanday Jesus kag Pablo namat-od sa pagpangabuhi nga may limitado nga palangabuhian agod labi pa nila nga mapadayon ang ila ministeryo. Madamong Cristiano karon ang imol bangod wala na sila sing iban pa nga mapilian. Walay sapayan sina, ginaaplikar nila ang mga prinsipio sang Biblia sa kabuhi kag makugi nga nagatinguha nga makaalagad sa Dios. Nakahibalo sila nga ginahigugma gid sila ni Jehova samtang naeksperiensiahan nila ang pagkamaminatud-on sang pasalig ni Jesus: “Padayon, nian, nga pangitaa anay ang Ginharian kag ang iya pagkamatarong, kag ining tanan iban pa nga [materyal nga mga butang] idugang sa inyo.” (Mateo 6:​25-33) Dugang pa, ining imol nga mga alagad sang Dios may pamatuod nga “ang pagpakamaayo ni Jehova​—⁠amo ina ang nagapamanggaranon.”​—⁠Hulubaton 10:⁠22.

[Footnote]

[Kahon sa pahina 6]

Sin-o ang “mga Manugtuman Sang Pulong”?

SUNO sa 1994 nga surbe sang Gallup, 96 porsiento sang mga Amerikano ang “nagatuo sa Dios ukon sa isa ka bug-os uniberso nga espiritu.” May yara man “mas madamo nga simbahan sa kada tawo sa Estados Unidos sangsa bisan anong iban pa nga pungsod sa Duta,” siling sang U.⁠S.News & World Report. Walay sapayan sining relihiosong mga dagway, ang beterano nga manugsurbe nga si ­George ­Gallup, Jr., nagsiling: “Ang maathag nga kamatuoran amo, ang kalabanan nga Amerikano wala makahibalo kon ano ang ila ginatuuhan ukon kon ngaa.”

Ginapakita man sang estadistika nga may daku nga kal-ang sa ulot sang relihiosong pagtuluuhan sang madamong tawo kag sang ila mga binuhatan. Halimbawa, “natalupangdan sang mga sosyologo nga ang pila sa may pinakamadamo sing krimen nga mga lugar sa pungsod amo man ang mga lugar diin ang relihiosong pagtuluuhan kag binuhatan pinakamabakod,” siling sang manunulat nga si ­Jeffery ­Sheler.

Indi ini dapat makapakibot. Ngaa? Bangod sadto pa sang unang siglo, ginpaandaman ni apostol Pablo ang mga masigka-Cristiano nga mag-andam sa mga ‘dayag nga nagapahayag nga kilala nila ang Dios, apang ginapanghiwala nila sia paagi sa ila mga buhat.’ (Tito 1:16) Dugang pa, ginsilingan ni Pablo ang pamatan-on nga si Timoteo nga ang “katapusan nga mga adlaw” makilal-an paagi sa mga tawo nga “may dagway sang diosnon nga debosyon apang nagapanghiwala sang gahom sini.”​—⁠2 Timoteo 3:​1, 5.

Apang, ginahimo sang matuod nga mga Cristiano ang ila bug-os nga masarangan nga sundon ang sugo ni Jesucristo nga ‘maglakat . . . kag maghimo sing mga disipulo sa mga tawo sa tanan nga kapungsuran.’ (Mateo 28:19) Sa sining paagi sila “mangin manugtuman sang pulong, kag indi manugpalamati lamang.”​—⁠Santiago 1:⁠22.

[Kapsion sa pahina 7]

Ang pagtuon sa Biblia ginapabilihan sang katawhan sa bug-os nga kalibutan