Ngaa ‘Magkadto sa Subay’?

ANG maalam nga si Hari Solomon sang Israel sang una naghatag sining laygay: “Kadto sa subay.” Ngaa ginsiling niya ini? Ano ang matun-an naton gikan sa mga subay?

Si Solomon nagdugang: “Tan-awa ang mga dalanon [sang subay] kag magmaalam. Sa wala sing pangulo, manugtatap, ukon manuggahom, nagatigana sia sang iya pagkaon sa tingadlaw; nagatipon sia sang iya kalan-on sa tig-alani.” (Hulubaton 6:​6-8) Inang madugay na nga pinamulong nagapabutyag sang kamatuoran nga natukiban sang modernong-adlaw nga mga naturalista.

Ang manughulubaton nga si Agur nagapakita nga ang mga subay “duna nga maalam.” (Hulubaton 30:​24, 25) Sa pagkamatuod, ang ila kaalam indi bunga sang intelihente nga pangatarungan kundi bunga sang pagkaduna nga ginhatag sang Manunuga sa ila. Bangod sang pagkaduna, halimbawa, ang mga subay nagatipon sang ila kalan-on sa nagakaigo nga tion.

Ang mga subay makatilingala nga organisado. Tumalagsahon nga mabinuligon kag mapinatihon sa mga masigkamanugpangabudlay, ginabuligan nila ang nasamad ukon nakapoy nga mga subay pabalik sa ila balay. Ginahandaan nila sing duna ang palaabuton kag ginahimo ang tanan nga masarangan sa paghimo sang ila mga buluhaton.

Ang kinaugali nga paggawi sang subay nagapakita nga ang mga tawo dapat magplano sing abanse kag magmangin mapisan nga mga manugpangabudlay. Naaplikar ini sa eskwelahan, sa trabaho, kag sa espirituwal nga mga hilikuton. Subong nga ang subay nagabenepisyo gikan sa iya kapisan, luyag man sang Dios nga ‘makita [sang mga tawo] nga maayo ang tanan tungod sang iya pinangabudlayan.’ (Manugwali 3:​13, 22; 5:18) Kaangay sang masako nga mga subay, ang matuod nga mga Cristiano mapisan nga nagabuhat sang ila hilikuton sa isa ka adlaw. ‘Ginahimo [nila] ang bisan ano nga makita nga himuon sang ila kamot,’ indi bangod nagatan-aw ang amo, kundi bangod sang katampad kag sang handum nga mangin mapisan, mapuslanon nga mga manugpangabudlay.​—⁠Manugwali 9:10; ipaanggid ang Hulubaton 6:​9-11; tan-awa man ang Tito 2:​9, 10.

Magamalipayon gid kita, sa pagkamatuod, kon ‘magkadto [kita] sa subay’ kag mag-aplikar sang natun-an naton gikan sa sini. Kag ang pinakadaku nga kalipay mangin aton kon makugi naton nga ginahimo ang kabubut-on ni Jehova nga Dios, subong sang ginapakita sa Biblia.