Sa mahigugmaon nga mga pulong sang isa ka amay, ang maalam nga si Hari Solomon sang dumaan nga Israel nagsiling: “Anak ko, kon imo batunon ang akon mga pulong kag pakabahandion ang akon mga sugo sa imo, sa paglingig sang imo igdulungog sa kaalam, agod nga mapahamtang mo ang imo tagipusuon sa paghantop; kon, dugang pa, magtuaw ka tungod sa paghangop kag magbayaw sang imo tingog tungod sa paghantop, kon imo padayon nga pangitaon ini subong sang pilak, kag padayon nga usisaon ini subong sang bahandi nga natago, nian mahangpan mo ang kahadlok kay Jehova, kag makita mo ang ihibalo sang Dios.”—Hulubaton 2:1-5.

Ang kaalam amo ang ikasarang sa paggamit sing nagakaigo sang hatag-Dios nga ihibalo. Kag daw ano gid ka dalayawon kon paano ang Biblia nagahimo nga matigayon ang kaalam! Huo, nagaunod ini sing mga pulong sang kaalam, subong sang narekord sa mga tulun-an sang Hulubaton kag Manugwali, kag kinahanglan nga maghatag kita sing igtalupangod sa sini nga mga pulong. Makita man naton sa mga pahina sang Biblia ang madamo nga halimbawa nga nagapakita sang mga benepisyo sang pag-aplikar sang mga prinsipio sang Dios kag sang mga tugalbong sang di-pagsapak sa sini. (Roma 15:4; 1 Corinto 10:11) Halimbawa, binagbinaga ang kasaysayan tuhoy sa mahamkunon nga si Giezi, ang alagad ni manalagna Eliseo. (2 Hari 5:20-27) Wala bala ini nagatudlo sa aton sang kaalam nga likawan ang kakagod? Kag kamusta naman ang makahalanusbo nga resulta sang daw indi makatalagam nga mga pagduaw sang anak nga babayi ni Jacob nga si Dina sa “mga anak nga babayi sang duta” sang Canaan? (Genesis 34:1-31) Wala bala naton mahantop sa gilayon ang kabuangan sang malain nga kaupdanan?—Hulubaton 13:20; 1 Corinto 15:33.

Ang pagtalupangod sa kaalam nagalakip sang pagtigayon sing paghantop kag paghangop. Suno sa Webster’s Revised Unabridged Dictionary, ang paghantop amo ang “ikasarang ukon kinaiya sang hunahuna nga paagi sa sini mapatuhay sini ang isa ka butang gikan sa isa pa.” Ang diosnon nga paghantop amo ang ikasarang sa pagkilala sang husto gikan sa sayop kag dayon ang pagpili sa husto nga dalanon. Magluwas kon ‘ipahamtang naton ang aton tagipusuon’ sa paghantop ukon nalangkag sa pagtigayon sini, paano bala kita makapabilin sa “dalan nga nagapadulong sa kabuhi”? (Mateo 7:14; ipaanggid ang Deuteronomio 30:19, 20.) Ang pagtuon kag pag-aplikar sa Pulong sang Dios nagahatag sing paghantop.