Ginapangita Mo Bala ang Natago nga mga Bahandi?

“Kabay nga ang dibagay nga kaluoy kag paghidait magbugana sa inyo paagi sa sibu nga ihibalo sa Dios kag kay Jesus nga aton Ginuo.”​—⁠2 PEDRO 1:⁠2.

 1, 2. Anong mga butang ang nagahimo sa bulawan nga hamili kag mahal?

NGAA kamahal gid sang bulawan? Isa lamang ini ka mahumok nga metal, apang ang bili sini nagalab-ot sa ginatos ka dolyar ang kada onsa. Matuod, madali ini kortehon kag himuon nga isa ka matahom nga puni sa porma sang isa ka singsing ukon pulseras. (1 Timoteo 2:​9; Santiago 2:2) Apang, kon nadula ka sa isa ka desyerto, kag nagatagumatayon ka bangod sa gutom kag kauhaw, indi mo ini makaon ukon mainom. Sa sina nga kahimtangan ang isa ka pan amerikano ukon isa ka plato sang kan-on upod sa mainom nga tubig mas hamili pa sa bulawan.

² Ngaa, nian, ginapabilihan sing daku ang bulawan? Una, malaka ini kag mabudlay matigayon. Halimbawa, sang magsira ang Empire nga minahan sang bulawan sa naaminhan nga California sang 1957 bangod diutay na lang ang bulawan sini, ang mga minero sadto nagakutkot sang kasangkaron nga kapin sa 1,500 metros apang dapat sila manaug sing 3 kilometros nga pahilay agod malab-ot ang bulawan. Tubtob sadto nga punto, ang mataas nga bili sang bulawan takus sa daku nga panikasog sa pagpangita sini.

 3. Anong bahandi ang mapangita naton?

³ Apang, may butang kita nga makutkot nga kapin ka hamili sa bulawan. Ano ini? Ang maalam nga si Hari Solomon naghatag sing sabat sang nagligad nga 3,000 ka tuig: “Kon, dugang pa, magpangayo ka sing paghangop kag magbayaw sang imo tingog para sa paghantop, kon pangitaon mo ini subong sang pilak, kag mag-usisa sini subong sang mga bahandi nga natago, nian mahangop mo ang kahadlok kay Jehova, kag makita mo ang ihibalo sa Dios.” Hunahunaa lamang nga maluya nga mga tawo makakita sang “ihibalo sa Dios”!​—⁠Hulubaton 2:​3-5.⁠a

Kon Ngaa Kinahanglan sang Tanan ang Sibu nga Ihibalo

 4. Ano ang dapat ilakip sa sibu nga ihibalo sang isa ka Cristiano?

⁴ Kutob sang tion ni Cristo, inang kinahanglanon nga ihibalo nagsangkad sa paglakip sang kapin pa sa matigayon sadto sang matutom nga Hebreong mga lalaki kag mga babayi. Subong ginpabutyag ni Pablo: “Nga ang Dios sang aton Ginuong Jesucristo, ang Amay sang himaya, maghatag sa inyo sing espiritu sang kaalam kag bugna sa sibu nga ihibalo sa iya, nga naiwagan ang mga mata sang inyo tagipusuon, agod nga mahibaluan ninyo kon ano ang paglaum diin gintawag niya kamo, kon ano ang kamanggaran sang mahimayaon nga panublion sang mga balaan.”​—⁠Efeso 1:​17, 18.

 5. Ngaa dapat pirme talupangdon sang mga hinaplas ang ila ihibalo tuhoy sa kabubut-on sang Dios?

⁵ Sadto, isa ini ka direkta nga laygay para sa balaan nga hinaplas nga mga utod ni Cristo, kag amo man tubtob karon. Subong ikaduha nga bahin sang “binhi” sang saad, ina sila pinasahi nga puntariya sang espirituwal nga pagpamukan ni Satanas. (Galacia 3:​26-29; Efeso 6:​11, 12) Dapat pat-uron sang mga hinaplas, labi na, ang pagkatawag sa ila paagi sa indi pagpatumbaya sa dibagay nga kaluoy nga regalo sang Dios. Amo kon ngaa dapat nila pirme palig-unon ang ila espirituwal nga manggad paagi sa pag-ilis sang ila sibu nga ihibalo sa kabubut-on kag Pulong sang Dios.​—⁠Efeso 3:​7; Hebreo 6:​4-6; 2 Pedro 1:​9-12.

 6. (a) Ngaa nagakinahanglan kita tanan sing sibu nga ihibalo, langitnon man ukon dutan-on ang aton paglaum? (b) Ano ang kinahanglanon sa pagtigayon sing sibu nga ihibalo?

⁶ Kamusta naman sila nga nagalaum sing kabuhi nga wala sing katapusan sa duta? Ngaa importante sa ila ang sibu nga ihibalo? Bangod ang Cristianong integridad wala sing mga grado, nga subong bala may mas mataas nga talaksan para sa mga hinaplas, nga may langitnon nga paglaum, sang sa iban nga mga karnero, nga may dutan-on nga paglaum. (Juan 10:​16; 2 Pedro 3:13) Ang Cristianong mga prinsipio palareho nga naaplikar sa tanan. Bangod sina, kinahanglan naton tanan nga kargahan ang aton espirituwal nga bateriya sing sibu nga ihibalo sing tayuyon. Apang nadalahig ang tion kag panikasog. Dapat kita maghimo sing espirituwal nga pagkutkot, nga subong sang natago nga mga bahandi.​—⁠Salmo 105:​4, 5.

Paghimulos sang Tion sa Pagkutkot

 7. (a) Anong mga kabudlayan ang nagaluntad nga mahimo mag-upang sa aton pagtigayon sing sibu nga ihibalo? (b) Ano mahimo ang mangin mga resulta sang espirituwal nga pagpatumbaya?

⁷ Ang kalabanan nga tawo karon masako sa ila kabuhi, kag subong mga Cristiano daw mas masako kita sa tanan bangod sang aton mga iskedyol para sa mga miting sang Biblia, pag-alagad sa latagon, sekular nga trabaho, buluhaton sa balay, buluhaton sa eskwelahan, kag madamo pa. Apang, subong nga nagaiskedyol kita sing tion kada adlaw sa pagkaon, dapat man kita magpain sing tion sa pagpakaon sang aton hunahuna kag sang aton espirituwalidad. Indi wala sing katuyuan ang ginsiling ni Jesus sang ginbalikwat niya ang Deuteronomio 8:​3: “Nasulat na, ‘Indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.’ ” (Mateo 4:4) Kon patumbayaan naton ang aton espirituwalidad, ginapatumbayaan naton ang aton espirituwal nga mga prinsipio kag ang aton paglaum sa palaabuton. Nian mahimo nga magasugod kita sa pagdaligdig kag sa pag-uyauya. Gani paano kita makakita sing tion para sa regular kag personal nga pagtuon sing Biblia?

 8. Anong Makasulatanhon nga laygay ang nagahatag sa aton sing nagakaigo nga pagtamod sa personal nga pagtuon?

⁸ Ang ginpamulong ni apostol Pablo nagakaigo gid: “Magbantay sing mainandamon kon paano ang paggawi ninyo, indi subong nga dimaalam kundi subong nga mga maalam, nga nagahimulos sang kahigayunan, bangod nga ang mga adlaw malaut. Bangod sini dili kamo magpakabuang, kundi hangpa ninyo kon ano ang kabubut-on ni Jehova.” Mahangpan naton kon ano ang kabubut-on ni Jehova kon mamati kita sa iya Pulong paagi sa aton personal nga pagtuon. Kag nagakahulugan ina nga dapat naton ‘himuslan ang kahigayunan’ ukon ‘gamiton sing maayo ang aton tion.’​—⁠Efeso 5:​15-17; Phillips.

 9. Sa ano kita mahimo nagauyang sing tion nga sarang magamit para sa personal nga pagtuon? Maghatag sing personal nga mga eksperiensia.

⁹ Kon usisaon naton ang aton indi kinahanglanon nga mga ginahimo kada adlaw, sa ano naton ginahinguyang ang kalabanan sang aton libre nga tion? Sa atubangan bala sang telebisyon? Inang makalupay nga aparato makakawat sing duha pa lima ka oras kada gab-i gikan sa aton kabuhi! Pila ka oras kada adlaw ang ginahinguyang mo sa pagtan-aw sing telebisyon? Sa masami, ang ginapakita sini makapalain bangod sang pagpadaku sini sa kasingki kag sekso. Kag sa masami ginatuyo ini sa pagganyat sa ‘kailigbon sang unod kag sa kailigbon sang mga mata kag sa bugal sang kabuhi.’ (1 Juan 2:​15-17) Apang, madamo ang wala sing determinasyon sa pagpatay sa telebisyon. Huo, ining modernong imbension sarang makakonsumo sang aton labing hamili nga pagkabutang, ang tion.

10. Ngaa importante gid karon nga gamiton naton ang aton tion sing maalamon?

¹⁰ Kon bunayag kita sa aton kaugalingon, marealisar naton nga sa masami posible magkuha sing tion para sa kinahanglanon nga mga hilikuton subong sang pagtuon sa Biblia. Kag ang personal nga pagtuon sa Biblia nga nagadul-ong sa sibu nga ihibalo kinahanglanon para sa isa ka Cristiano sa sining ital-ital nga mga tion. Apang, bangod kapin sa 41,000 ang nadisfellowshipped sang nagligad, maathag nga madamo nga kauturan nga lalaki kag babayi ang nagpatumbaya sang ila espirituwalidad. Ang pagsuklob kag paghupot sing “bug-os nga hinganib gikan sa Dios” indi lamang isa ka kaswal nga ehersisyo. Subong sang sa bahin sang isa ka soldado nga nagasuklob sing literal nga hinganib, isa ini ka adlaw-adlaw nga katungdanan.​—⁠Efeso 6:​10-18; Roma 1:​28-32; 2 Timoteo 3:⁠1.

11. Ano ang huwaran sang pamilya Bethel sa pagkaorganisado para sa pamilya nga pagtuon?

¹¹ Sa bug-os nga kalibutan ang kapin sa 9,000 ka katapo sang 95 ka pamilya Bethel sa mga sanga talatapan sang Watch Tower Society may pamilya nga pagtuon kada Lunes sang gab-i. Ginatun-an nila Ang Lalantawan bilang paghanda para sa miting sa talipuspusan sang semana, kag sa madamo nga okasyon may yara man sila lektura sa Biblia ukon klase para sa bag-o nga mga katapo sang pamilya. Huo, ang Lunes amo ang gab-i sa pagtuon sang bug-os kalibutan nga pamilya Bethel. San-o ang imo personal ukon pamilya nga pagtuon?​—⁠Hebreo 10:​24, 25.

Mga Kasangkapan kag Kon Paano Ini Gamiton

12. Ano ang pila sang talalupangdon nga mga bahin sa pagtuon sang New World Translation of the Holy Scriptures​—⁠With References?

¹² Subong nga ang minero may mga kasangkapan para sa iya trabaho, may yara man kita mga kasangkapan nga inugkutkot sa minahan sang Pulong sang Dios. Binagbinaga, halimbawa, ang New World Translation of the Holy Scriptures​—⁠With References. Nabalhag ini karon sa Olandes, Ingles, Pranses, Aleman, Italyano, Hapones, Portuges, kag Espanyol. Busa, ang kalabanan sang mga Saksi ni Jehova may dalayawon nga kasangkapan sa pagtigayon sing sibu nga ihibalo sa matuod nga Dios. Ini nga edisyon sang Biblia nagaunod sing linibolibo ka marhinal nga reperensya kag madamo nga footnote. May yara man ini 36-pahina nga apendise nga may detalyado nga impormasyon tuhoy sa nanuhaytuhay nga importante nga mga pamangkot tuhoy sa Biblia.⁠b

13. Anong makawiwili nga mga kamatuoran ang gina­presentar tuhoy sa paggamit sing “ihibalo” kag “sibu nga ihibalo” sa Hebreong Kasulatan kag sa Griegong Kasulatan?

¹³ Sa likod, ang Reference Bible may listahan sang nagapanguna nga “Bible Words Indexed.” Paano naton magamit ina? Kon usisaon mo ang imo kopya para sa ekspresyon nga “accurate knowledge” ukon sibu nga ihibalo, makakita ka sing napulo ka teksto nga nalista. Apang wala sing isa sini sa Hebreong Kasulatan. Nagakahulugan bala ina nga wala ginapadaku sang Hebreong Kasulatan ang pagkinahanglan sa sina nga ihibalo? Indi. Kay sa idalom sang tinaga nga “knowledge” ukon ihibalo, may yara 24 ka reperensya, lakip ang 18 gikan sa Hebreong Kasulatan. Apang, ang Hebreo nga hambal wala sing pinasahi nga tinaga para sa “sibu nga ihibalo.” Gani, subong makita mo sa mga reperensya, kon kaisa ginapadaku sini ang pagkinahanglan sing kapin pa sa kabilugan lamang nga ihibalo paagi sa pag-angot sa “ihibalo” sing mga tinaga subong sang “discernment” ukon paghantop kag “insight” ukon paghangop ukon paglaragway sa ihibalo subong “abundant” ukon bugana.​—⁠Daniel 1:​4; 12:​4; Jeremias 3:⁠15.

14. Anong makawiwili nga dalagkung mga punto ang yara sa idalom sang “knowledge” sa Insight on the Scriptures?

¹⁴ Subong natun-an naton sa nagligad nga artikulo, ang Griego sang Biblia nagapaalinton sing halos indi matalupangdan nga kinatuhayan sa ulot sang duha ka grado sang ihibalo. Kag samtang nagakutkot kita, luyag naton makahibalo sing dugang pa nahanungod sa kinatuhayan sining duha ka ekspresyon nga maaplikar sa mga Cristiano. Ngaa kinahanglanon para sa mga Cristiano ang ihibalo, gnoʹsis, kag sibu nga ihibalo, e·piʹgno·sis? Sa diin naton makita ang sabat? Sa insiklopedia sang Biblia nga Insight on the Scriptures. Daw ano nga balay sang mga bahandi ining mga tomo! Pangitaa ang tig-ulo nga “Knowledge.” Didto makakita ka sing isa ka kompleto nga artikulo tuhoy sa mga termino nga ginabinagbinag naton kag tuhoy sa may kaangtanan nga mga kinaiya nga kaalam, paghangop, paghantop, kag ikasarang sa paghunahuna. Kag nasapwan naton ining tanan nga “bulawan,” ining impormasyon, paagi lamang sa paggamit sing pila ka bulig sa pagtuon sa Biblia! Apang may dugang pa.​—⁠Salmo 19:​9, 10.

15. Ano pa ang aton mga kasangkapan para sa pagpanalawsaw, kag paano ini magamit?

¹⁵ Kon luyag mo padayunon ang masangkad pa nga pagtuon tuhoy sa “ihibalo” kag sa may kaangtanan nga mga termino, sarang mo magamit ang Indexes sang mga publikasyon sang Watch Tower Society, nga matigayon sa pila ka hambal. Kag subong sang pagpangita naton tuhoy sa tema nga ihibalo, sarang mo masunod ini gihapon nga paagi para sa ginatos ka iban pa nga tema. Handurawa ang manggad sang impormasyon sa idalom sang ngalan ni Jehova! Daw ano ka bugana ang sibu nga ihibalo nahanungod sa Soberanong Ginuo sang uniberso!​—⁠Salmo 68:​19, 20; Binuhatan 4:⁠24.

16. Ano ang ginasiling sang Kasulatan tuhoy sa pagpanalawsaw?

¹⁶ Upod ini kag ang iban pa nga bulig sa pagtuon nga ginbalhag sang Watch Tower Bible and Tract Society, daw ano katahom nga “natago nga mga bahandi” ang makita naton! Luyag mo bala ina nga “bulawan”? Sa banta mo ayhan mapuslanon ini? Hatagan mo bala sing tion ang pagkutkot sini?​—⁠Hulubaton 2:​1-5.

Sin-o ang Nagapanguna sa Espirituwal nga Pagmina?

17. Ano ang dapat naton himuon agod makatigayon sing ihibalo tuhoy sa Dios kag kay Cristo?

¹⁷ Ano ang yabi sa pagtigayon sining hamili nga ihibalo tuhoy sa Dios kag kay Cristo? Amo ang motibasyon​—⁠ang pagkalangkag sa pagtigayon sing nahamut-an nga tindog sa atubangan ni Jehova kag sang iya Anak kag ang handum nga mabaton ang regalo nga kabuhi nga wala sing katapusan. Amo sini ang ginsiling ni Jesus: “Magpadayon sa pagpangabay, kag kamo hatagan; magpadayon sa pagpangita, kag kamo makakita; magpadayon sa pagpanuktok, kag kamo pagabuksan. Kay ang tagsatagsa nga nagapangayo nagabaton, kag ang nagapangita makakita, kag ang nagapanuktok pagabuksan.” Apang talupangda ang kahimtangan. Si Jesus nagsiling, ‘Magpadayon sa pagpangabay, sa pagpangita, kag sa pagpanuktok.’ Indi ini kis-a lang. Ang pagpangita sing ihibalo dapat mangin dalayon.​—⁠Mateo 5:​6; 7:​7, 8.

18. Sa isa ka pamilya, sin-o ang dapat manguna sa pagpangita sing sibu nga ihibalo, kag ngaa?

¹⁸ Sa isa ka Cristianong pamilya, sin-o ang dapat manguna sa pagkutkot para sa sibu nga ihibalo? Si Pablo nagasabat: “Mga amay, dili ninyo pagpaakiga ang inyo mga anak, kundi sagura sila sa displina kag sa pagtuytoy ni Jehova sa hunahuna.” Huo, ang mga ginikanan, labi na ang amay, ang dapat manguna sa pagpakita sing apresasyon sa espirituwal nga mga prinsipio. Kag nagapahanumdom ina liwat sa aton nga kinahanglan ang regular nga kahimusan nga makalangkagan kag mapaabot-abot sang pamilya.​—⁠Efeso 6:⁠4.

19. Paano ang tion sa pagtuon sang pamilya mahimo nga makawiwili? Ano ang naeksperiensiahan sang inyo pamilya?

¹⁹ Ang tion sa pagtuon sang pamilya sarang mahimo nga makawiwili. Halimbawa, kon may mga anak ka, ngaa indi sila papilion sing isa ka tema kag dayon iasayn sila sa pagpanalawsaw sa nanuhaytuhay nga mga publikasyon suno sa ila edad kag ikasarang. Nian pagligad sang mga tunga sa oras, magtipon kamo liwat kag tan-awa kon ano ang natukiban sang kada isa tuhoy sa gin-asayn nga tema. Kon may yara kamo konkordansya, sarang maisip sang isa ka pamatan-on kon makapila gingamit ang isa ka tinaga sa Hebreong Kasulatan kag sa Griegong Kasulatan. Ayhan ang dakudaku na nga anak sarang makapangita sing mga hiyas sa mga tomo sang Insight. Nahibaluan sang mga ginikanan ang mga ikasarang sang ila mga anak kag ang kalawigon sang ila paghatag sing igtalupangod kag dapat nila hiwaton ang sesyon nga ginabinagbinag ining mga butang. Mangin mapasibusibuon kag mainapresyahon. Palig-una ang imo pamilya sa ila espirituwal nga pagkutkot​—⁠kag maghupot sing husto nga motibo.

Pagkutkot nga May Husto nga Motibo

20. Anong malain nga motibo ang dapat naton likawan sa aton personal nga pagtuon?

²⁰ Ang pagkaugdang isa ka Cristianong kinaiya. (Hulubaton 11:​2; 1 Timoteo 2:9) Dapat bala kita, nian, magtuon agod ipabugal ang aton natun-an? Ukon dapat bala naton ipadayawdayaw ang aton ihibalo kag ayhan palutawon ang iban nga wala sing namang-an? Ukon dapat bala naton ipabutyag ang aton kaugalingon nga interpretasyon ukon mga ispikulasyon? Si Pablo naglaygay: “Kay paagi sa dibagay nga kaluoy nga ginhatag sa akon nagasiling ako sa tagsa ka tawo nga yara sa inyo nga dili maghunahuna sang iya kaugalingon sing mataas pa sa dapat niya paghunahunaon; kundi maghunahuna sing maligdong, suno sa talaksan sang pagtuo nga ginbahin sang Dios sa tagsa ka tawo.”​—⁠Roma 12:⁠3.

21, 22. Ano dapat ang epekto sa aton sang sibu nga ihibalo?

²¹ Ang hanuot nga panikasog kag ang pag-aplikar sang sibu nga ihibalo makadul-ong sa pagtuo, maayong paggawi, pagpugong sa kaugalingon, pagbatas, diosnon nga debosyon, utudnon nga gugma, kag gugma. Ginpakita ni Pedro ang pagkaimportante sini sang magsulat sia: “Kay kon ining mga butang inyo kag nagabugana, magapugong ini sa inyo nga mangin indi aktibo ukon indi mabungahon tuhoy sa sibu nga ihibalo sa aton Ginuong Jesucristo.”​—⁠2 Pedro 1:​2-8.

²² Ang aton ihibalo dapat mag-apektar sa tagipusuon. Dapat ini magpahulag sa aton sa pagpakita sing gugma sa Dios kag sa isigkatawo kag mangin mabungahon nga mga Cristiano sa aton paggawi kag ministeryo. Magaresulta ini sa paghiusa kag sa bug-os pa nga paghangop sa huwaran ni Cristo. (Efeso 4:13) Daw ano kaayong padya sa pagpangita sa natago nga mga bahandi!

[Mga footnote]

Mga Pamangkot nga Binagbinagon

◻ Suno kay Hari Solomon, ano ang kapin ka hamili sang sa natago nga mga bahandi?

◻ Ngaa kinahanglanon ang sibu nga ihibalo para sa mga hinaplas kag sa iban nga mga karnero?

◻ Paano kita makakita sing tion para sa personal nga pagtuon?

◻ Ano ang aton pinasahi nga mga kasangkapan para sa pagkutkot sing sibu nga ihibalo?

◻ Sin-o ang dapat manguna sa pagtuon sang pamilya, kag ano dapat ang motibo sang aton pagtuon?