“Nagauna sa Himaya ang Pagpaubos”

ISA ka pamatan-on nga lalaki sa bilanggoan sang Egipto ang ginsumbong sing dimatuod. Nag-antos sia sing daku nga kahuya, kag daw wala gid sing paglaum nga mapaguwa sia gikan sa bilanggoan. Nian ginsugo sia sa pag-atubang kay Faraon. Gilayon sia nga gindala paguwa sang mga guwardiya sa bilanggoan. Nagpamarbas sia, nag-ilis sing panapton, kag nian nag-atubang sa hari.

Isa ka sopresa ang nagahulat kay Jose. Paagi sa bulig ni Jehova ginpatpat sing husto ni Jose ang duha sa mga damgo ni Faraon. Si Faraon nagsiling: “Tan-awa, ginabutang ko ikaw sa bug-os nga duta sang Egipto.” (Genesis 41:41) Indi mapatihan nga eksperiensia​—⁠gikan sa bilanggoan tubtob sa palasyo sa sulod sang isa ka adlaw! Ang eksperiensia ni Jose nagailustrar kon ano ang nag-inspirar sang ulihi kay Hari Solomon nga nagsulat: “Bisan gikan sa bilanggoan nagguwa nga mangin hari.” Sing nagakaigo, si Solomon nagsulat sing makaduha: “Nagauna sa himaya ang pagpaubos.”​—⁠Manugwali 4:​14; Hulubaton 15:​33; 18:⁠12.

Agod makabenepisyo gikan sa sinang balaan nga kamatuoran, pamangkota ang imo kaugalingon: Ano ang nagsakdag sadto kay Jose sa iya makahuluya nga eksperiensia? Paano ginbatas sining matutom nga alagad ni Jehova ang butig nga panumbungon nga nagdala sa iya sa bilanggoan? Ano nga himaya ang ginhunahuna ni Jehova para kay Jose? Ano nga sahi sang himaya ang nagahulat sa sadtong sa sulod sang mga siglo matutom kag maisugon nga nag-antos sing paghingabot kag kahuluy-an? Labaw sa tanan, ano ang nagabulig sa aton sa paghupot sing timbang nga panimuot kon kita ginapakahuy-an?

Mahimo nga ginpamalandungan sing masunson ni Jose ang duha ka naunang matagnaon nga mga damgo nga nagpakita nga ang iya mga utod kag bisan ang iya mga ginikanan “magayaub” sa iya. Sa katunayan, ang iya mga utod, pagkabati sang una nga damgo, nagsiling: “Magahari ka bala sa amon sa pagkamatuod?”​—⁠Genesis 37:​8-10.

Halos patyon si Jose sang iya nahisa nga mga utod! Apang sa idalom sang panuytoy ni Jehova, ang 17-anyos nga pamatan-on ginbaligya sa nagalakbay nga manugpatikang, nga, sang ulihi, nagbaligya sa iya kay Potifar, ang pangulo sa bantay ni Faraon.

Sang ulihi, si Jose nangin tulugyanan sa panimalay ni Potifar, nga ang asawa nagtinguha sa pagsulay sa maambong nga pamatan-on. Apang si Jose maunungon kay Jehova kag nagpalagyo. Ang malimbungon nga asawa nagsumbong sing butig nga gintinguhaan sia nga luguson ni Jose, kag nagpati sa iya si Potifar, gani ang makaluluoy nga si Jose ginbilanggo.

Apang, nagpabilin sia nga maunungon kay Jehova, nga, subong sang ginsambit na, naghimos nga dal-on sia kay Faraon sa pagpatpat sa mga damgo. Sang ulihi gintangdo ni Faraon kay Jose ang mahimayaon nga pribilehiyo sang pag-organisar sa suplay nga pagkaon sang Egipto. Sang ang gutom naglapnag sa Canaan, ang mga utod ni Jose nagkari sa pagkamatuod sa pagyaub sa iya agod makakuha sing pagkaon para sa pamilya.

Ang Iban Pa nga Nakaagi sing ‘Pagpaubos Pakadto sa Himaya’

Ang isa pa ka matutom nga alagad ni Jehova nga ang pagkabuhi nagapamatuod sa balaan nga kamatuoran nga “nagauna sa himaya ang pagpaubos” amo si Moises. Ginpadaku sa manggaranon nga panimalay ni Faraon, si Moises may yara matahom nga palaabuton. Nian ang mga hitabo daw naglain. Si Moises nagpanghikot nga may pagtuo kay Jehova kag mahigugmaon nga pag-ulikid sa iya katawhan, amo kon ngaa nagpalagyo sia tungod sang iya kabuhi gikan sa akig nga Faraon. Sing isahanon naglakbay sia sa Midian. Sa sulod sang 40 ka tuig nagpakita sia sang iya pagpaubos paagi sa pagkabuhi sing simple subong manugbantay, nag-alagad sa iya umagad nga si Jetro. Daw ano ka makapalig-on para kay Moises sa sulod sang iya 40-ka-tuig nga pagdihon sang personalidad nga pamalandungan ang paagi ni Jehova sa pagpaubos sa iya kag binagbinagon kon ano ang yara pa nga natigana sa iya!

Nian nag-abot ang himaya. Gintangdo ni Jehova si Moises nga mangin mensahero Niya kay Faraon kag sa pagdala sang Iya katawhan paguwa sa Egipto. Daw ano ka dungganon ang pribilehiyo ni Moises sang direkta sia nga nadalahig sa napulo ka kasisit-an kag nagtuytoy sa Israel tabok sa Dagat nga Mapula! Sang ulihi, si Moises nagbaton sang Sugo gikan kay Jehova sa ­Bukid sang Sinai. Sang nagpanaug sia, ang katawhan “indi makatulok sing dayon sa guya ni Moises tungod sang himaya sini.”​—⁠2 Corinto 3:⁠7.

Binagbinaga man si Job, ang pinakadaku sa tanan nga mga taga-Sidlangan. Isa sia ka “tawo nga himpit kag matarong, isa nga mahadlukon sa Dios kag nagalikaw sa malaut.” (Job 1:​2, 3, 8) Nian, sing hinali, nawasi niya ang iya napulo ka anak kag tanan niya nga linibolibo ka karnero, kamelyo, baka, kag asno.

Indi lamang ina. Nalipos si Job sang malubha nga hubag, naghimo sa iya nga makangilil-ad tan-awon. Ang iya mismo asawa nagyaguta sa iya: “Ginahuptan pa bala nimo sing malig-on ang imo integridad? Sikwaya ang Dios kag panginmatay!” (Job 2:9) Si Job gintilawan sing daku kag ginpaubos, apang wala gid sia makahibalo nahanungod sa komprontasyon sa langit sa ulot ni Jehova kag sa una nga rebelde, si Satanas. Ang kahimtangan wala mag-uswag paagi sa malawig nga diskusyon upod sa tatlo ka “abyan” ni Job. Apang, ginhuptan ni Job ang iya integridad. Mapainubuson pa gani niya nga ginbaton ang maalam nga laygay ni Elihu​—⁠mas bata kaayo nga tawo.​—⁠Job 32:⁠4.

Ginpadyaan bala si Job? Huo. Gin-ayo ni Jehova si Job, gindoble ang kadamuon sang iya mga panong, kag ginhatagan sia sing pito ka anak nga lalaki kag tatlo ka anak nga babayi​—⁠ang pinakamatahom sa bug-os nga duta! Daw ano ka mahimayaon nga resulta sang pagpaubos ni Job! Matuod gid​—⁠“nagauna sa himaya ang pagpaubos.”​—⁠Job 42:​12-15.

Lainlain nga Sahi sang Himaya

Sing maathag may yara lainlain nga sahi sang himaya​—⁠gikan sa himaya sa buhok sang babayi tubtob sa himaya sa guya ni Moises samtang nagapanaug sia sa Bukid sang Sinai. (1 Corinto 11:​15; 2 Corinto 3:7) Ang matahom nga mga pagtunod sang adlaw may dalayawon nga himaya kag ang mga bituon may lain pa nga himaya.​—⁠1 Corinto 15:⁠41.

Ang lainlain nga dagway sang tinaga nga “himaya” gingamit sing ginatos ka beses sa Biblia. Sa pag-usisa sa sining mga pagsambit kag sa ila konteksto, maathag nga si Jehova amo ang tuburan sang tanan nga himaya. Ang iya matutom nga mga alagad kag ang iya mga obra-maestra sa pagpanuga sarang makapabanaag sini nga himaya sa madamong paagi kag sa lainlain nga kadakuon.

Sa aton ika-20 ka siglo, madamo kita sing pamatuod nahanungod sa pagpaubos nga naagom sadtong may mahimayaon nga paglaum sang langitnon nga kabuhi. Sadtong Inaway Kalibutanon I, ang nagapanguna nga mga katapo sang Watch Tower Society sa Brooklyn, Nueva York, ginpamatbatan sing 20 ka tuig nga pagkabilanggo sa butig nga panumbungon. Sadto man nga tion, ang paghingabot nagluntad sa madamong lugar. Halimbawa, si J. B. Siebenlist ginbilanggo sa sulod sang tatlo ka adlaw nga wala sing mandamyento de aresto kag wala sing pagkaon, luwas sa tatlo ka kihad sang pan-os nga tinapay. Ginkuha sia gikan sa bilanggoan sang magarot nga hubon, gin-ubahan, ginpinturahan sang mainit nga alkitran, kag ginbunal sing bilugon nga may alambre sa punta. Sa isa ka kasaba ang piskal nagsiling: “Dal-a sa impierno ang imo Biblia; dapat ka magkadto sa impierno nga bali ang imo likod; dapat ka bitayon.”

Sadtong Inaway Kalibutanon II, ang iban sang matutom nga mga alagad ni Jehova nag-antos sing daku sa mga kampo konsentrasyon sang Nazi. Ang isa amo si Martin Poetzinger, isa ka hinaplas nga Saksi nga nakalampuwas agod mangin katapo sang Nagadumala nga Hubon sang mga Saksi ni Jehova. Ginlaragway niya ang Dachau subong “balay sang mga demonyo.” Sa kampo sang Mauthausen, ang “Gestapo nagtilaw sang tanan nga paagi sa pagsulay sa amon nga bungkagon ang amon pagtuo kay Jehova. Ang makagulutom nga dieta, malimbungon nga pagpakig-abyan, kapintas, pagpatindog sa isa ka balayan sa madamo nga inadlaw, pagbitay sa dies-pie nga poste nga ang butkon ginalubag sa likod, pagbakol​—⁠ini tanan kag ang iban pa . . . gintilawan.”

Ano ang Nagsakdag sa Sining Matutom nga mga Cristiano?

Sa idalom sinang masubo kag malain nga mga kahimtangan, ang ila pagtuo sa ulihi nga matabo, lakip ang paglaum sa mahimayaon nga palaabuton para sa sadtong naghupot sang ila integridad nagbulig sa ila sa pagbatas. Para sa “diutay nga panong” sang hinaplas nga mga Saksi, isa ini ka langitnon nga panublion. (Lucas 12:32) Ang pinasahi nga sahi sang himaya sa duta gintigana para sa iban pa matutom nga mga tawo. Ang iban sa ila, subong ni Jose kag ni Moises, ginsambit sa Hebreo kapitulo 11. Palihog basaha ang bersikulo 32-40 kag pamalandungi ang mga pagpaubos nga gin-antos sang iban sining mga matutom. Dugang pa, ang “dakung kadam-an” nagaalagad kay Jehova sa duta karon. (Bugna 7:​9, 15) Ano ang ila paglaum?

Isa ka makalilipay nga palaabuton ang nagahulat sa ila. Ang langitnon nga ginharian sa idalom ni Jesucristo may yara dutan-on nga mga tiglawas nga magaaplikar sang instruksion nga ginsulat sa mga linukot nga ginpatuhuyan sa Binuhatan 20:⁠12. Ina sila may mahimayaon nga mga pribilehiyo, indi subong mga hari, kundi “subong mga prinsipe sa bug-os nga duta,” kag kaupod nila, ang dimaisip nga mapainubuson kag matutom nga katawhan, lakip ang mga banhawon, makatigayon sing dayon nga kabuhi sa mahimayaon nga paraiso nga duta.​—⁠Salmo 45:⁠16.

Sa karon minilyon ang nagpasundayag sang ila pagpaubos paagi sa pagbiya sa dimatuod nga relihion kag paagi sa malipayon nga pagpakigbahin sa pamalaybalay nga pagbantala nga hilikuton sang mga Saksi ni Jehova. Madamo sa ila ang ginyaguta sang mga katapo sang pamilya kag mga abyan, apang nagpabilin sila sa matuod nga pagsimba. Mapainubuson nila nga ginbaton ang pagtadlong kag disiplina agod maalagad ang matuod nga Dios, si Jehova. Ang paglaum nila amo ang magkabuhi sa napasag-uli nga Paraiso, nga “ang duta mapuno sang pagkilala sang himaya ni Jehova subong nga ang mga tubig nagatabon sang dagat.”​—⁠Habacuc 2:⁠14.

Amo ini ang mga adlaw sang pagtilaw para sa katawhan ni Jehova. Halos daw subong ini nga kita mga dumuluong sa pungsod sa luwas. Ang kal-ang sa ulot sang matuod nga pagsimba kag sang dimatuod nagadalom kag nagadaku. Kita tanan nagaantos sing pagpakahuya sa pila ka kasangkaron. Apang subong nga si Jesus napaumpawan kag napalig-on sang kalipay nga ginpahamtang sa atubangan niya, sarang man naton malandas ang mga pagtilaw paagi sa pagdumdom sa katapusan nga resulta.

Ang Biblia nagalaygay sa aton: “Paubsa ang inyo kaugalingon sa itololok ni Jehova, kag bayawon niya kamo.” (Santiago 4:10) Kon yara ikaw sa mabug-at nga pagtilaw, hunahunaa ining mga pulong: “Nagauna sa himaya ang pagpaubos.” Dumduma man nga si Jehova wala nagapaslaw!