Ang Hangkat sang Pagsunod sa Iya mga Tikang

“Kay si Cristo nag-antos para sa inyo kag nagbilin sa inyo sing personal nga halimbawa, agod nga sundon ninyo ang iya mga tikang.”​—⁠1 PEDRO 2:​21, Phillips.

 1, 2. (a) Ano mahimo ang mangin isa ka matuod nga hangkat, kag ngaa interesado sa sini ang mga Cristiano? (b) Anong mga pamangkot ang ginapautwas diri?

NATILAWAN mo na bala nga maglakat sa balas sang baybayon ukon sa nakulapan sing yelo nga latagon kag nawili ka sa pagtan-aw sa mga agi sang tiil sang isa nga nauna sa imo? Imo pa ayhan ginpili ang isa ka paris sang mga agi sang tiil kag ginsunod ini, nga ginabagay ang imo mga tikang sa sini sing eksakto nga mahimo mo? Kon amo, natukiban mo nga indi yadto mahapos. Sa kamatuoran, ang pagsunod sing suod sa mga tikang sang isa​—⁠sing literal ukon sing malaragwayon​—⁠isa ka matuod nga hangkat. Apang, sa pagtawag naton sa aton kaugalingon nga mga Cristiano, ginpakita naton ang aton handum nga himuon ina gid, nga sundon sing suod ang mga tikang ni Cristo.

² Handa ka bala sa paghimo sing panikasog nga kinahanglanon sa pag-atubang sini nga hangkat sing madinalag-on? Kapin pa sa sina, determinado ka bala sa paghimo sina, bisan ano man ang matabo? Kon amo, ang bug-os nga paghangop sa mga kabudlayan sang pagsunod sa literal nga mga tikang magahimo sa imo nga kapin ka madinalag-on sa pagsunod sa malaragwayon nga mga tikang ni Cristo.

Magtuon sa Pagpauyon

 3. Ngaa daw indi natural sa primero ang pagsunod sa mga tikang sang isa?

³ Ang tagsatagsa may tuhay nga paagi sa paglakat. Ang kadakuon sang tikang, halimbawa, nagakatuhaytuhay sa tagsa ka tawo, subong man ang anggulo sang pagtapak sang isa ka tawo sa iya mga tiil. Ang mga tudlo sang iya tiil mahimo nga nagatudlo sing diretso, ukon mahimo nga nagakiwi pasulod ukon paguwa sa isa ka anggulo, ang isa ka anggulo mahimo nga kapin ka bal-anon upod sa isa ka tiil sang sa pihak nga tiil. Nahangpan mo bala ang hangkat? Agod masunod sing suod ang mga tikang sang isa, dapat mo sundon ang kadakuon sang iya tikang kag ang posisyon sang iya tiil. Sa primero daw indi ini natural, apang dapat ini himuon. Wala na sing iban pa nga paagi.

 4. Ngaa isa ka pinasahi nga hangkat ang pagsunod sa mga tikang ni Jesus?

⁴ Ang paagi sang paglakat ni Cristo, sa malaragwayon nga paghambal, tumalagsahon, bangod sa tunga sang iya mga katubotubo sia lamang ang himpit nga tawo, “nga wala makakilala sing sala.” (2 Corinto 5:21) Sanglit ang mga tawo sa kinaugali dihimpit nga mga makasasala, ang pagsunod sa mga tikang ni Jesus indi ang ila normal nga paagi sa paglakat. Ginpahanumdom sini ni Pablo ang mga Cristiano sa Corinto, nga nagasiling: “Kay mga lawasnon pa kamo. Kay sa may kahisa kag pinuyasay sa tunga ninyo, indi bala kamo mga lawasnon kag nagaginawi suno sa paagi sang mga tawo?” Ang mga huyog sa pagkahisa kag pagpinuyas, “mga buhat sang unod,” normal para sa dihimpit nga mga tawo, apang si Jesus naglakat sa dalanon sang gugma, kag ang “gugma wala nagakahisa, . . . indi ini maakigon.” Gani mas makahalangkat sundon ang mga tikang ni Cristo sang sa mga tikang sang isa ka dihimpit nga tawo.​—⁠1 Corinto 3:3; 13:​4, 5; Galacia 5:​19, 20; tan-awa man ang Efeso 5:​2, 8.

 5, 6. (a) Ngaa napaslawan ang madamo nga tawo sa pagsunod sa mga tikang ni Cristo, nga nagdul-ong kay Pablo sa paghatag sing anong laygay? (b) Paano ginapalig-on ang mga tawo sa pagsunod sa mga tikang ni Cristo karon, kag ano ang resulta sa ila?

⁵ Luwas sa dikahimpitan, ang pagkawalay hinalung-ong sa kabubut-on sang Dios makaupang man sa isa sa pagsunod sa mga tikang ni Cristo. Sa amo ginlaygayan ni Pablo ang mga Cristiano sa Efeso nga indi “maglakat subong sang paglakat sang mga pungsod sa pagkawalay pulos sa ila mga hunahuna, samtang yara sila sa kadudulman sa panghunahuna, kag nahamulag sa kabuhi nga iya sang Dios, bangod sang pagkawalay hinalung-ong nga yara sa ila, bangod sang pagkatig-a sang ila tagipusuon.”​—⁠Efeso 4:​17, 18.

⁶ Paagi sa hilikuton nga pagbantala sa Ginharian, ang mga tawo karon ginapalig-on nga mag-untat sa paglakat sa ila normal nga paagi, sa pagkawalay hinalung-ong sa mga katuyuan sang Dios, sa kadudulman sa panghunahuna, nga ginapahulag sang matig-a nga mga tagipusuon nga nagatinguha sing indi mapuslanon nga mga tulumuron. Ginapalig-on sila nga sundon ang himpit nga halimbawa ni Cristo, ‘nagalakat nga nahiusa sa iya,’ sa amo ‘nagabihag sa tagsa ka panghunahuna sa pagtuman kay Cristo.’ (Colosas 2:​6, 7; 2 Corinto 10:⁠5) Ang mga tawo nga handa sa pag-atubang sini nga hangkat malig-on sa ila pagtuo. Samtang nagakaanad sila sa paglakat suno sa paglakat ni Cristo, amat-amat ini nga nagahapos para sa ila.

 7. Ano ang pasalig sa aton nga, bisan pa masami nga isa ini ka hangkat, posible nga masunod ang mga tikang ni Jesus?

⁷ Apang, masami nga isa ini ka hangkat. Daku ang kinatuhayan sang himpit kag dihimpit nga tinuga. Gani ang dihimpit nga mga tinuga dapat maghimo sing dalagku nga mga pagbalhin agod sundon ang himpit nga halimbawa. Ang iban nga mga tawo, bangod siguro sang pinanubli ukon palibot, mas nabudlayan sa pagpauyon sa Cristianong dalanon sang pagkabuhi sang sa iban. Apang ginapasalig kita ni Jehova nga ang bisan sin-o nga handa gid sa pagpanikasog sang iya kaugalingon makahimo sini. “May kusog ako para sa tanan nga butang bangod sa iya nga nagahatag sa akon sing gahom,” siling ni apostol Pablo. (Filipos 4:13; tan-awa man ang 2 Corinto 4:7; 12:⁠9.) Amo man ang matuod sa tanan nga Cristiano.

Magtalupangod

 8, 9. (a) Ngaa kinahanglanon ang bug-os nga pagtalupangod kag konsentrasyon kon ginasunod ang mga tikang sang isa? (b) Ang pagsunod sa anong laygay sang Biblia magapugong sa aton sa pagsipak sa mga tikang ni Jesus?

⁸ Indi naton masunod ang literal nga mga tikang nga wala ginatan-aw sing maayo kon ano ang aton ginatapakan. Kon magpanghulonghulong ang aton mga mata​—⁠nagatan-aw sang mga butang nga nagakatabo sa palibot naton ukon sa iban nga mga butang​—⁠pat-od nga makasandad kita sa indi madugay. Kon indi kita magbantay sing maayo kag magkonsentrar, magalisa kita gikan sa mga tikang nga dapat naton sundon. Sa amo, kinahanglan nga magbantay pirme, labi na kon ang hinali nga mga gahod ukon iban pa nga wala ginapaabot nga mga tublag mag-agaw sang aton hunahuna gikan sa aton ginahimo.​—⁠Ipaanggid ang Job 18:​10, 11.

⁹ Sa malaragwayon nga paagi, matuod man ini sa mga nagasunod sa mga tikang ni Jesus. Ginpaandaman ni Jesus ang iya mga sumulunod nga bantayan sing maayo ang ila kaugalingon, basi ang ila tagipusuon “mabug-atan sang sobra nga pagkaon kag sang lakas nga pag-inom kag sang mga paghimud-os sang kabuhi.” (Lucas 21:34) Ginagamit ni Satanas ining mga tublag sa adlaw-adlaw agod kuhaon ang aton mga mata gikan sa mga tikang ni Jesus. Maabtik sia sa pagdakop sa aton nga wala nagabantay paagi sa paghimulos sa wala ginapaabot nga mga kahimtangan, subong sang pagpamatok, balatian, ukon pinansial nga pagpamigado. Agod mapat-od nga “indi kita magpalayo,” dapat kita “magpakita sing kapin sa kinaandan nga pagtalupangod sa mga butang nga nabatian,” sa iban nga pulong huptan ang aton mga mata nga nasentro sa mga tikang ni Cristo sing kapin sa bisan anong tion.​—⁠Hebreo 2:1; tan-awa man ang 1 Juan 2:​15-17.

Dili Magsipak

10. (a) Ano ang katalagman kon ang nanuhaytuhay nga mga agi sang tiil nagasinampawanay? (b) Sa espirituwal nga kahulugan, ngaa serioso ang mga resulta sang pagsunod sa sayop nga mga tikang?

¹⁰ Sa isa ka baybay nga madamo sing tawo, mahimo nga madamo sing mga agi sang tiil sa basa nga balas, kag ang iban nga mga agi sang tiil mahimo nga nagasampaw sa aton ginasundan. Madamo nga agi sang tiil ang mahimo, sa dimagkubos daw pareho tulukon. Daw ano ka importante nga pat-uron naton nga ang ginasunod naton husto! Kay kon indi, basi magtalang kita. Sa espirituwal nga kahulugan, mahimo ini magdul-ong sa serioso nga mga resulta. Ang katalagman sang pagsunod sa mga tikang nga daw husto kon tulukon apang sa kamatuoran indi gali ginpakita sa hulubaton nga nagapaandam: “May dalanon nga daw matarong sa tawo, apang ang iya katapusan mga dalanon sang kamatayon.”​—⁠Hulubaton 16:⁠25.

11. Anong paandam ang ginhatag ni Pablo sa nahaunang mga Cristiano, nga nagahatag sing halimbawa para kay sin-o karon?

¹¹ Bangod sining matuod gid nga katalagman, napilitan si Pablo sa pagpaandam sa iya kauturan sa nahaunang Cristianong kongregasyon: “Natingala ako nga nagahalin kamo sing tama kadali gikan sa Isa nga nagtawag sa inyo sa dibagay nga kaluoy ni Cristo padulong sa tuhay nga maayong balita. . . . May pila nga nagagamo sa inyo kag buot magpatiko sa maayong balita nahanungod kay Cristo. . . . Ang bisan sin-o nga magwali sa inyo sing maayong balita nga tuhay sang sa amon ginwali sa inyo, magmanginpinakamalaut sia.” (Galacia 1:​6-9) Sa pagsunod sa halimbawa ni Pablo, ang Nagadumala nga Hubon sang mga Saksi ni Jehova karon nagapaandam sa aton tuhoy sa mga apostata kag dimatuod nga mga utod nga daw nagahimo sing huwad nga mga agi sang tiil. Indi buot sang matuod nga mga Cristiano nga magsipak sa banas nga ginpahamtang ni Cristo sa atubangan nila sa pagtuytoy sang Dios.​—⁠Salmo 44:⁠18.

12. (a) Paano ang 2 Timoteo 1:13 makabulig sa aton nga indi magtalang sa pagsunod sa huwad nga mga agi sang tiil? (b) Ano ang kinaiya sang tuhay nga maayong balita?

¹² Paagi sa pagtalupangod sing maayo sa nagapakilala nga mga tanda sang mga agi ni Cristo, indi kita mapatalang. Ang sibu nga ihibalo nahanungod kay Jesus, nahanungod sa iya mga panudlo, kag nahanungod sa dalanon sang pagpanghikot sang Cristianong kongregasyon magabulig sa aton sa pagkilala sa “huwaran sang maayong mga pulong” nga nagaamlig sa aton gikan sa ila nga ‘nagapatiko sa maayong balita nahanungod kay Cristo.’ (2 Timoteo 1:13) Ang iban nga sahi sang ginatawag nga maayong balita​—⁠sa kamatuoran, huwad nga mga agi​—⁠wala nagahisanto sa sinang huwaran sang kamatuoran. Ginapatiko nila ini, ginapaburon ang laragway. Sa baylo nga athagon ang sadsaran nga mga kamatuoran kag mga prinsipio sang Biblia, ginasumpakil nila ini. Sa baylo nga palig-unon kita nga pauswagon pa ang aton pag-alagad kay Jehova, nagapangatarungan sila pabor sa paghinay. Ang ila mensahe indi positibo kag wala nagahimaya sa ngalan kag organisasyon ni Jehova; negatibo ini, palapangita sing sayop, kag mamulayon. Sa pagkamatuod, indi ini ang mga tikang nga luyag naton sundon.

Hupti ang Nagakaigo nga Kadasigon

13. Paano nadalahig ang kadasigon kon nagasunod kita sa mga tikang sang isa?

¹³ Kon nagalakat kita, ang kadakuon sang aton pagtikang ginapat-od sa bahin sang kadasigon sang aton paglakat. Sa masami, kon madasig kita maglakat, daku man ang aton pagtikang; kon mahinay kita maglakat, gamay man ang aton pagtikang. Sa amo, mas mahapos naton sundon ang literal nga mga tikang sang isa kon pasibuon naton ang aton kadasigon agod magpareho sa iya tikang. Subong man, agod magmadinalag-on sa pagsunod sa malaragwayon nga mga tikang sang aton Lider, nga si Jesucristo, dapat naton sundon ang iya kadasigon.

14. (a) Sa anong paagi nga kita mahimo nga wala nagadungan kay Jesus? (b) Ngaa binuang nga mag-una sa “matutom kag mainandamon nga ulipon”?

¹⁴ Ang indi pagdungan kay Cristo mahimo magkahulugan sing diin sa duha ka butang. Mas magadasig kita, nga nagauna sa “matutom kag mainandamon nga ulipon” nga ginagamit ni Jesus sa pagtuman sang katuyuan ni Jehova, ukon maulihi kita sa pagsunod sa pagtuytoy sina nga ‘ulipon.’ (Mateo 24:​45-47) Subong halimbawa sang nauna, ang iban nga mga Cristiano sang una nadulaan sing pailob nahanungod sa mga pagbag-o ukon pagpadalisay sa mga doktrina ukon sa organisasyonal nga butang nga sa pagbatyag nila kinahanglanon kag ulihi na. Naugot bangod sa pagbatyag nila wala nagahulag sing madasig ang mga butang, naghalin sila gikan sa katawhan ni Jehova. Daw ano ka binuang kag daw ano ka malip-ot sing panulok! Sa masami ang butang gid nga nagapaugot sa ila ginbag-o sang ulihi​—⁠sa nagakaigo nga tion ni Jehova.​—⁠Hulubaton 19:2; Manugwali 7:​8, 9.

15. Paano si Hari David kag si Jesus maayong mga halimbawa sang paghupot sing nagakaigo nga kadasigon?

¹⁵ Ang dalanon sang kaalam amo ang maghulat kay Jehova sa paghikot sa baylo nga diktahan ang kadasigon sang pagpanghikot sang mga butang. Si Hari David sang una nagpahamtang sing nagakaigo nga halimbawa. Wala sia maghimbon batok kay Hari Saul sa pagtinguha nga kuhaon ang pagkahari sa wala pa ang nagakaigo nga tion ni Jehova sa paghatag sini sa iya. (1 Samuel 24:​1-15) Subong man, narealisar sang “Anak ni David,” nga si Jesus, nga dapat sia maghulat agod mabaton niya sing bug-os ang iya langitnon nga pagkahari. Nahibaluan niya ang tagna nga naaplikar sa iya: “Lingkod ka sa akon tuo tubtob nga mahimo ko ang imo mga kaaway nga imo palatungan.” Gani sang ang isa ka grupo sang mga Judiyo buot ‘magpilit sa iya nga himuon sia nga hari,’ maabtik nga nagpalagyo si Jesus. (Mateo 21:9; Salmo 110:1; Juan 6:15) Mga 30 ka tuig sang ulihi, suno sa Hebreo 10:​12, 13, si Jesus nagahulat gihapon sa iya pagkahari. Sa kamatuoran, naghulat sia sing halos 19 ka siglo antes sia ginpalingkod subong may kinamatarong nga Hari sa Ginharian sang Dios sang gintukod ini sang 1914.

16. (a) Iilustrar kon paano kita mahimo maghinay sang sa nagakadapat. (b) Ano ang katuyuan sang pagpailob ni Jehova, kag paano malikawan ang pag-abuso sa sina nga pagpailob?

¹⁶ Apang, ang kapaslawan sa paghupot sing nagakaigo nga kadasigon mahimo man magkahulugan sing paghinay, pagkaulihi. Sa amo, kon ginapakita sang Pulong sang Dios nga dapat himuon ang mga pagbalhin sa aton kabuhi, nagahikot bala kita nga wala sing pagpalantang? Ukon nagapangatarungan bala kita nga sanglit mapailubon ang Dios, mapaatrasar naton ang paghimo sina nga mga pagbalhin, nagalaum nga basi mangin mahapos ina sa ulihi? Matuod, mapailubon si Jehova. Apang indi amo sini agod magpabuyanbuyan kita sa paghimo sing kinahanglanon nga mga pagpasibu. Sa baylo, ‘mapailubon sia sa inyo bangod wala sia nagahandum nga mawala ang bisan sin-o kundi nga ang tanan makadangat sa paghinulsol.’ (2 Pedro 3:​9, 15) Daw ano kaayo pa, kon amo, nga ilugon ang salmista nga nagsiling: “Nagdalidali ako kag wala magpalantang sa pagtuman sang imo mga sugo.”​—⁠Salmo 119:⁠60.

17. Ano ang kaangtanan sang paghupot sing nagakaigo nga kadasigon sa pagbantala sa Ginharian, nga nagadulong sa aton sa pagpamangkot sa aton kaugalingon sing anong pamangkot?

¹⁷ Ang pagpaulihi nagadalahig man sa pagbantala sa Ginharian. Suno sa Mateo 25, ginahukman karon ni Jesus ang katawhan, ginapain ang “mga karnero” gikan sa “mga kanding.” Ginahimo ini sa daku nga bahin paagi sa pagbantala “sining maayong balita sang ginharian.” (Mateo 24:14; 25:​31-33; Bugna 14:​6, 7) Ang tion nga gintalana sa pagtapos sining pagpain nga hilikuton limitado. (Mateo 24:34) Samtang nagahingapos ang gintalana nga tion, mapaabot naton nga padasigon ni Jesus ang hilikuton. Sa paghimo sini, nagahikot sia subong instrumento sang Dios, nga, nagahambal tuhoy sa pagtipon nga hilikuton, nagasaad: “Ako gid, si Jehova, magapadali sini sa iya tion.” (Isaias 60:22) Subong kabulig nga mga manugpangabudlay sang Dios, nga nagasunod sing suod sa mga tikang sang iya Anak, ginapadasig bala naton ang aton pagbantala sa Ginharian tubtob sa kasangkaron nga ginatugot sang aton pisikal nga kahimtangan kag Makasulatanhon nga mga salabton? Ang mga report sang naalagdan sa latagon nagapakita nga minilyonmilyon ka Saksi ni Jehova ang nagahimo sini!

Likawi ang Sobra nga Kompiyansa, Awaya ang Pagluya sang Buot

18. Ngaa mahimo nga magsobra ang kompiyansa sang isa ka tawo, kag paano nagapaandam ang Biblia tuhoy sa sini nga katalagman?

¹⁸ Sa kapin kadugay nga pagbatas naton sa pagsunod sa mga tikang sang isa, kapin nga maanad kita sa iya paagi sang paglakat. Apang, kon, mangin uyaya kita, sa indi madugay magasala kita sa pagtikang. Sa amo, sa pagsunod sa malaragwayon nga mga tikang ni Jesus, dapat naton kilalahon ang katalagman nga magsobra ang aton kompiyansa, nagasandig sa aton kaugalingon nga kusog kag mga ikasarang, nagabatyag nga hanas na kita sa iya himpit nga paagi sang paglakat. Ang eksperiensia ni Pedro nga narekord sa Lucas 22:​54-62 isa ka sibu sa tion nga paandam. Ginapadaku man sini ang pagkamaminatud-on sang 1 Corinto 10:​12, nga nagasiling: “Ang nagahunahuna nga nagatindog sia mag-andam basi kon mapukan sia.”

19. (a) Ano ang nagakatabo sa tagsa ka Cristiano sa tion kag tion? (Santiago 3:⁠2) (b) Paano naton dapat tamdon ang mga pulong ni Pablo sa Roma 7:​19, 24?

¹⁹ Bangod sang pagkadihimpit, ang tagsa ka Cristiano magasayop sa pagtikang sa tion kag tion. Ang pagsipak mahimo nga diutay lamang, halos indi matalupangdan sang iban. Ukon mahimo nga isa ini ka kitaon gid nga pagligdas sa tanda amo kon ngaa makita sang tanan. Bisan diin man sa sini, daw ano ka makapaumpaw dumdumon ang bunayag nga pagbaton ni Pablo: “Kay ang maayo nga luyag ko wala ko ginahimo, apang ang malaut nga indi ko luyag amo ang ginahimo ko. Kailo ako nga tawo!” (Roma 7:​19, 24) Sa pagkamatuod, ining mga pulong indi dapat pagtamdon subong balibad sa paghimo sing malaut. Sa baylo, isa ini ka pagpalig-on sa debotado nga mga Cristiano nga nagapakigaway batok sa ila pagkadihimpit, nagabulig sa ila nga magpadayon sa ila pagtinguha nga atubangon ang hangkat sang pagsunod sa himpit nga mga tikang ni Jesus.

20. (a) Paano ang Hulubaton 24:16 nagabulig sa aton pagpalumba para sa kabuhi? (b) Dapat kita mangin determinado sa paghimo sing ano?

²⁰ “Ang matarong nga tawo mapukan sing makapito, kag magabangon liwat,” siling sang Hulubaton 24:16. Sa aton pagpalumba para sa kabuhi, wala sing bisan sin-o ang dapat magbatyag nga ginapilit sia sa pag-untat. Ining palumba kaangay sa marathon, isa ka palumba nga nagakinahanglan sing pagbatas, indi ang madasig nga pagdalagan sa isa ka gatos ka yarda nga palumba. Ang pinakadiutay nga sayop sa pagtikang sang isa ka manugdalagan magabili sang iya pagkapierdi. Apang, ang manugdalagan sa marathon, kon makasandad sia, may tion pa sa pagdalagan liwat kag tapuson ang dalaganon. Gani kon ang pila ka personal nga sayop sa pagtikang magapasinggit sa imo sing, “Kailo ako nga tawo!” dumduma nga may tion pa ikaw sa pagpadayon. May kahigayunan pa ikaw sa pagtadlong sang imo tikang nga nahisuno sa tikang sang imo Lider, nga si Jesucristo. Wala sing rason nga madulaan ka sing paglaum! Wala sing rason nga mag-untat ka! Mangin determinado, upod sa bulig sang Dios, nga atubangon sing madinalag-on ang hangkat sa ‘pagsunod sing suod sa mga tikang ni Jesus.’​—⁠1 Pedro 2:⁠21.

Ngaa ang mga Cristiano dapat

◻ magtuon sa pagpauyon?

◻ magtalupangod sing bug-os?

◻ magtanda sa huwaran sang kamatuoran?

◻ maghupot sa nagakaigo nga kadasigon?

◻ maglikaw sa sobra nga kompiyansa?

◻ mag-away sa pagluya sang buot?

[Laragway sa pahina 15]

Paagi sa paghupot sang iya mata sa iya tulumuron, ang isa nga matarong pat-od nga magabangon