Kon ang Armado nga mga Kawatan Magsalakay

SA Ikoyi, isa ka eksklusibo nga kabalayan sa guwa sang siudad sa Katundan nga Aprika, ang mga mansion nangin mga kuta. Madamo ang may pader nga tatlo ka metro ang kataason, nga may mataliwis nga mga salsalon, buka nga mga kristal, ukon nagabaruron nga tunukon nga mga alambre sa ibabaw. Ginabantayan sang mga guardia ang dalagku nga mga ganhaan nga may mga pintal, balagbag, kadena, kag kandado. Ang mga bintana narehasan. Ang asero nga mga gawang nagapain sang hulot-tulugan sa iban pa nga bahin sang balay. Kon gab-i, ang dalagku nga mga ido​—⁠German shepherd kag Rottweiler​—⁠ginabuy-an sa ila mga bulukutan. Ang masanag nga mga suga nagadula sang kadulom, kag ang de-kompyuter nga sistema sang pagbantay nagatunog sing mahinay kon wala sing iban nga tawo.

Wala sing nagduhaduha nga dapat bantayan ang ila mga puluy-an. Ang mga ulong-dinalan sa pamantalaan nagapanganduhoy: “Ginkawatan Sang Armado nga mga Kawatan ang Komunidad”; “Ang Bataon nga mga Kawatan Indi Makontrol”; kag “Kakugmat, Samtang Ginasalakay Sang mga Gang sa Kalye [ang Isa ka Banwa].” Amo sini ang kahimtangan sa madamo nga pungsod. Subong sang gintagna sang Biblia, nagakabuhi gid kita sa makahalanguyos nga mga tion.​—⁠2 Timoteo 3:⁠1.

Ang krimen, lakip na ang armado nga pagpangawat, nagadugang pa gid sa bug-os nga kalibutan. Labi pa nga indi masarangan ukon indi handa nga amligan sang mga gobierno ang ila mga banwahanon. Sa pila ka pungsod ang pulisiya, nga kulang sing tinawo kag menos ang mga armas, kulang sing galamiton agod buligan ang nagapangayo sing bulig. Ang kalabanan nga nakakita nagapangalag-ag nga magpasilabot.

Ang mga biktima, nga indi makasalig sa bulig sang mga pulis ukon publiko, nagapangapin na lamang sa ila kaugalingon. Ang isa ka Cristianong gulang sa isa ka imol nga pungsod nagsiling: “Kon mangayo ka sing tabang, baldahon ka ukon patyon sang mga kawatan. Indi maglaum sing bulig halin sa guwa. Kon mag-abot ang bulig, maayo, apang indi ini pagpaabuta ukon pagpangayua kay ang pagpangayo sing bulig mahimo magdugang lamang sa problema.”

Pangamlig kag ang Pulong sang Dios

Bisan pa ang mga Cristiano indi bahin sang kalibutan, yara sila sa kalibutan. (Juan 17:​11, 16) Gani kaangay sa tanan, nagapangaman sila sing nagakaigo para sa ila seguridad. Apang, indi kaangay sang madamo nga wala nagaalagad kay Jehova, ang katawhan sang Dios nagapangita sing proteksion suno sa Cristianong mga prinsipio.

Sa kabaliskaran, ang mga tawo sa pila ka pungsod sa Aprika nagagamit sing madyik agod amligan ang ila kaugalingon batok sa mga kawatan. Mahimo nga pilasan sang isa ka babaylan ang butkon, dughan, ukon likod sang iya kliyente. Dayon ginabanyos ang may birtud nga bulong sa pilas, ginaorasyunan, kag ang tawo indi na kuno mahalitan sang pagsalakay sang mga kawatan. Ang iban nagabutang sing mga anting-anting ukon may birtud nga mga bulong sa ila mga puluy-an, nagapati nga bangod sining “panagang,” indi sila paghalitan sang mga kawatan.

Ang matuod nga mga Cristiano wala nagahimo sing bisan ano nga sahi sang madyik. Ginapakamalaut sang Biblia ang tanan nga porma sang espiritismo, kag nagakaigo ini, sanglit paagi sa sining mga buhat, nagapakig-angot ang mga tawo sa mga demonyo, sila mismo nga nagapalapnag sing kasingki sa duta. (Genesis 6:​2, 4, 11) Ang Biblia maathag nga nagasiling: “Dili kamo maghimo sing salamangka.”​—⁠Levitico 19:⁠26.

Ang pila ka tawo wala na sing mahimo agod amligan ang ila kaugalingon kundi maggamit sing pusil. Apang, nagapati gid ang mga Cristiano sa pinamulong ni Jesus, nga nagsiling: “Ang mga nagagamit sing espada sa espada mapatay.” (Mateo 26:52) Ang katawhan sang Dios ‘nagsalsal sang ila mga espada nga mangin punta sang arado’ kag wala sila nagabakal sing mga pusil agod pangapinan ang ila kaugalingon batok sa pagpangawat ukon pagsalakay.​—⁠Miqueas 4:⁠3.

Kumusta naman ang pagkuha sang serbisyo sang armado nga mga guardia? Bisan pa butang ini nga pagadesisyunan sing personal, dumduma nga ining kahimusan nagapauyat sing pusil sa iban. Ano ang ginapaabot sang amo sa mga guardia kon may kawatan? Ginapaabot bala niya nga tiruhon sang mga guardia ang kawatan kon kinahanglanon agod amligan ang mga tawo kag mga pagkabutang nga ginaguardiahan?

Ang panindugan sang mga Cristiano sa pagsikway sa madyik kag mga armas subong galamiton sa pag-amlig mahimo nga daw kabuangan para sa mga wala nakakilala sa Dios. Apang, ang Biblia nagapasalig sa aton: “Sia nga nagasalig kay Jehova pagaamligan.” (Hulubaton 29:25) Bisan pa ginaamligan ni Jehova ang iya katawhan sa kabilugan, wala sia nagapasilabot sa tanan nga tion agod amligan ang iya mga alagad batok sa mga kawatan. Si Job anay matutom gid, apang gintugutan sang Dios ang mga kawatan nga kawaton ang mga kasapatan ni Job, nga nagpatay sa iya mga alagad. (Job 1:​14, 15, 17) Gintugutan man sang Dios nga mabutang si apostol Pablo “sa katalagman sa mga makawat.” (2 Corinto 11:⁠26) Apang, ginatudluan sang Dios ang iya mga alagad nga magkabuhi suno sa mga prinsipio nga nagabuhin sa katalagman nga makawatan. Ginasangkapan man niya sila sing ihibalo nga nagabulig sa ila sa paghulag sa paagi nga mabuhinan ang mahimo nga halit sa tion sang mga pagtinguha nga kawatan.

Pagbuhin sa Katalagman nga Makawatan

Ang maalam nga tawo nagsiling anay: “Ang pagkabusog sang manggaranon indi magtugot sa iya sa pagtulog.” (Manugwali 5:12) Buot silingon, ang mga nagapanag-iya sing madamo nga butang mahimo mangin tuman ka mabinalak-on nga madula ang ila pagkabutang amo nga indi sila makatulog bangod sang pagkabalaka tuhoy sini.

Gani ang isa ka paagi nga mabuhinan indi lamang ang kabalaka kundi ang katalagman man nga makawatan amo ang paglikaw nga magtipon sing madamo, malahalon nga pagkabutang. Ang gin-inspirar nga apostol nagsulat: “Ang tanan nga butang sa kalibutan​—⁠ang kailigbon sang unod kag ang kailigbon sang mga mata kag ang pagpakitakita sang pangabuhi sang isa​—⁠wala maghalin sa Amay, kundi naghalin sa kalibutan.” (1 Juan 2:16) Ang mga kailigbon nga nagapahulag sa mga tawo nga magbakal sing malahalon nga mga butang amo man ang nagapahulag sa iban sa pagpangawat. Kag ang “pagpakitakita sang pangabuhi sang isa” mahimo magganyat sa mga nahuyog nga mangawat.

Luwas sa indi pagpakitakita, ang isa pa ka pangamlig batok sa mga kawatan amo ang pagpakita nga isa ikaw ka matuod nga Cristiano. Kon nagapakita ikaw sing gugma sa iban, bunayag sa imo mga pagpakig-angot, kag aktibo sa Cristianong ministeryo, matigayon mo ang reputasyon sa inyo komunidad subong isa ka maayo nga tawo, isa nga talahuron. (Galacia 5:​19-​23) Ining Cristianong reputasyon labi nga makaamlig sangsa armas.

Kon Magsalakay ang Armado nga mga Kawatan

Apang, ano ang himuon mo kon makasulod ang mga kawatan sa inyo puluy-an kag atubangon kamo? Dumduma nga ang imo kabuhi labi pa ka importante sangsa mga pagkabutang. Si Cristo Jesus nagsiling: “Indi pagpamatuki sia nga malauton; kundi ang bisan sin-o man nga magtampa sa imo sa tuo nga guya, itaya man ang pihak sa iya. Kag kon luyag sang isa ka tawo nga . . . magkuha sang imo bayo, bayai sa iya ang imo kunop man.”​—⁠Mateo 5:​39, 40.

Maalamon ini nga laygay. Walay sapayan nga indi obligado ang mga Cristiano nga sugiran ang mga kriminal tuhoy sa kamanggaran, mahimo gid nga magsingki ang mga kawatan kon mamutikan nila ang pagpamatok, indi pagkooperar, ukon pagdaya. Madamo sa ila, nga ‘bangod nawad-an sing igbalatyag sa maayo nga pamatasan,’ madali maakig kag magsingki.​—⁠Efeso 4:⁠19.

Si Samuel nagapuyo sa isa ka apartment. Ginlikupan sang mga kawatan ang tinukod kag ginsulod ang mga apartment, nga nagapangawat. Nakabati si Samuel sing mga lupok sang pusil, ginarungkab nga mga puwertahan, kag nagasininggit, nagahibi kag nagagurahab nga mga tawo. Imposible nga makapalagyo. Ginsingganan ni Samuel ang iya asawa kag tatlo ka anak nga lalaki nga magluhod sa salog, ibayaw ang ila mga kamot, piyungon ang ila mga mata, kag maghulat. Sang magsulod ang mga kawatan, nakighambal si Samuel sa ila nga nagadungok, kay nakahibalo sia nga kon tulukon niya sila sa ila nawong, basi hunahunaon nila nga makilala niya sila sa ulihi. “Sulod kamo,” siling niya. “Ano man ang gusto ninyo, kuhaa ninyo. Hilway kamo sa pagkuha sing bisan ano. Mga Saksi ni Jehova kami, kag indi namon kamo pagbalabagan.” Nakibot ang mga kawatan sa sini. Sa masunod nga isa ka oras ukon kapin pa, 12 ka armado nga tawo tanan ang nagsulod sing grupogrupo. Bisan pa ginkawat nila ang mga alahas, kuwarta, kag elektroniko nga kagamitan, ang pamilya wala ginsakit ukon ginlabo sang mga talibong subong sang ginhimo sa iban sa tinukod. Ang pamilya ni Samuel nagpasalamat kay Jehova nga naluwas ang ila kabuhi.

Nagapakita ini nga kon tuhoy sa kuwarta kag materyal nga mga butang, ang mga ginakawatan nga wala nagabato mahimo magbuhin sing kahigayunan nga mahalitan.a

Kon kaisa ang pagpanaksi sang isa ka Cristiano mahimo mangin pangapin batok sa kahalitan. Sang ginsalakay sang mga kawatan ang balay ni Ade, ginsilingan niya sila: “Nahibaluan ko nga pigado ang inyo kahimtangan, amo kon ngaa ginahimo ninyo ini. Subong mga Saksi ni Jehova, nagapati kami nga maabot ang adlaw nga ang tanan may bastante na nga kalan-on para sa iya kag sa iya pamilya. Ang tanan magapuyo na sa paghidait kag kalipay sa idalom sang Ginharian sang Dios.” Nagpakalma yadto sa mga kawatan. Ang isa sa ila nagsiling: “Ginakasubo namon nga nagsulod kami sa inyo balay, apang dapat ninyo mahangpan nga gutom kami.” Walay sapayan nga ginpangkuha nila ang pagkabutang ni Ade, wala nila gintandog si Ade kag ang iya pamilya.

Magpabilin nga Kalmado

Indi mahapos nga mangin kalmado sa makatalagam nga kahimtangan, ilabi na kon ang panguna nga tulumuron sang mga kawatan amo ang pagpahog sa ila mga biktima agod magsunod sa ila. Ang pangamuyo makabulig sa aton. Ang aton pagpangayo sing bulig, bisan pa mahipos kag malip-ot, mabatian ni Jehova. Ang Biblia nagapasalig sa aton: “Ang mga mata ni Jehova yara sa mga matarong, kag ang iya mga igdulungog yara sa pagpangayo nila sing bulig.” (Salmo 34:15) Si Jehova makabati sa aton kag makahatag sa aton sing kaalam agod maatubang sing kalmado ang bisan ano nga kahimtangan.​—⁠Santiago 1:⁠5.

Luwas sa pangamuyo, ang isa pa ka bulig amo ang pagpamat-od sing abanse kon ano ang imo himuon kag indi himuon kon ginakawatan. Siempre, indi mo mahibaluan antes sini kon mangin ano ang imo kahimtangan. Sa gihapon, maayo nga may mga prinsipio ikaw nga ginahunahuna, subong maalamon nga may ginahunahuna ikaw nga tikang sa pag-amlig engkaso nga yara ikaw sa tinukod nga nasunog. Ang paghunahuna sing abanse nagabulig sa imo nga magkalma, indi magsalasala, kag malikawan ang kahalitan.

Ang pagtamod sang Dios sa pagpangawat maathag nga ginapahayag: “Ako, si Jehova, nagahigugma sang katarungan, nagadumot sang pangawat nga may pagkadimatarong.” (Isaias 61:⁠8) Gin-inspirar ni Jehova ang iya manalagna nga si Ezequiel nga ilakip ang pangawat subong isa ka daku nga sala. (Ezequiel 18:18) Apang, ginapakita sang amo man nga tulun-an sang Biblia nga maluluy-on nga patawaron sang Dios ang tawo nga nagahinulsol kag nagauli sang kinawatan.​—⁠Ezequiel 33:​14-​16.

Walay sapayan nga nagapuyo sa puno sing krimen nga kalibutan, ang mga Cristiano nagakalipay sa paglaum nga kabuhi sa idalom sang Ginharian sang Dios, nga wala na sing pagpangawat. Tuhoy sa sinang tion, ang Biblia nagasaad: “[Ang katawhan sang Dios] magalingkod, ang tagsa sa idalom sang iya ubas kag sa idalom sang iya higuera, kag wala sing magapahadlok sa ila; kay ang baba mismo ni Jehova sang mga kasuldadusan nagpamulong sini.”​—⁠Miqueas 4:⁠4.

[Footnote]