“Mga Buhat sang Dios” Bala ang mga Kalamidad?

KON uyugon sang linog ang duta nga ginatindogan nila, ang mga tawo anay nagapati nga ang isa ka tinuga sa idalom sang duta naghulag. Madamo man ang nagdumdom nga ang daguob, kilat, kag ang mga bagyo mga pamatuod sang pag-away sang ila mga diosdios.

Agod malikawan ang kalamidad, yadto nga mga tawo nagabuhat sang ila mga relihion nga ila ginalauman makapaugdaw sa kaakig sadto nga mga diosdios. “Sa daku nga bahin sang maragtas,” siling sang libro nga Disaster! When Nature Strikes Back, “ginpaathag sang tawo ang kinaugali nga mga kapahamakan nga iya ginbatas . . . paagi sa leyenda, mitolohiya, kag relihion.”

Sa nagahambal sing Ingles nga mga pungsod karon, ang prase nga “buhat sang Dios” masami nga ginagamit nga may legal nga kahulugan. Apang, ang isa ka hurista sang ika-19 nga siglo nagpaathag: “Wala gid ako nagaduhaduha nga ining prase wala nagakahulugan sing buhat sang Dios sa Biblikanhon nga kahulugan sang termino . . . Nagakahulugan ini sing tumalagsahon nga kahimtangan nga indi makita sing una, kag indi mapangamanan.”

Matuod nga mga Buhat sang Dios

Agod makabulig sa pagpatin-aw sang kagumon tuhoy sa kahulugan sang prase nga “buhat sang Dios,” dapat naton anay mahangpan ang talaksan, ukon mga kondisyon, nga dapat matuman sang isa ka hitabo agod mangin isa ini ka matuod nga buhat sang Dios.

Ang Biblia maathag nga nagasugid sa aton nga ang Dios Labing Gamhanan. (Exodo 6:3) Apang nagasiling man ini: “Himpit ang iya binuhatan, kay ang tanan niyang dalanon katarungan. Dios sang katutom, kag walay kalautan; matadlong kag matarong sia.”—Deuteronomio 32:4.

Ang paghibalo nga si Jehova matarong, matadlong, kag wala nagabalhin nagabulig sa pagpat-od sang talaksan nga makabulig sa aton sa pagpat-od kon ang isa ka kapahamakan matuod gid nga buhat sang Dios. Ang pila ka yabi nga butang amo: (1) Pirme ini nahisuno sa katuyoan sang Dios; (2) ang Dios nagahatag sing abanse nga paandam antes maghikot; (3) nagahatag sia sing mga instruksion sa mga matinumanon agod maluwas.

Ginahunahuna ini, binagbinaga ang duha ka okasyon sang ang Dios naghikot sa pagdala sing kalamidad. Ang isa amo ang sa tion ni Noe, kapin sa 4,300 ka tuig sang una.

Isa ka Matuod nga Buhat sang Dios

Ano ang mga kahimtangan sa duta sang adlaw ni Noe? “Ang pagkamalaut sang tawo daku sa duta kag nga ang tagsa ka painoino sang iya tagipusuon malaut gayod sa tanan nga tion. Kag ang duta dunot sa atubangan sang matuod nga Dios kag ang duta napun-an sing kasingki.”—Genesis 6:5, 11.

Busa, namat-od ang Dios nga laglagon ang malaut nga mga tawo gikan sa duta paagi sa pagpadala sing tugob-globo nga kalamidad. Matarong gid ang Manunuga, subong ang “Tag-iya” sang planeta, sa paghimo sadto bangod sang kalautan sang katawhan.

Apang, natalupangdan sang Dios ang integridad ni Noe kag sang iya pamilya. Ginsaaran niya sila sing kaluwasan sa pag-abot sang kapahamakan kon magtuman sila sa iya mga instruksion. (Genesis 6:13-21) Nagsunod bala si Noe kag ang iya pamilya sa sining kahimusan? Ang rekord sang Biblia nagasiling: “Ginhimo ni Noe ang tanan nga ginsugo sa iya sang Dios. Ginhimo gid niya ini.”—Genesis 6:22.

Mapuslanon bala ang pagtuman ni Noe? Huo, kay suno kay apostol Pedro “gintipigan [sang Dios] si Noe, nga manugbantala sang pagkamatarong, kaupod sang iban nga pito sang gin-anaw niya ang kalibutan sang mga didiosnon.” (2 Pedro 2:5) Sa pagkamatuod, ang Dios nagaulikid sa iya mga alagad, nagapakig-angot sa ila, kag ginapat-od niya nga maluwas sila kon maghikot sia. Subong ginasiling sang Biblia: “Ang Soberanong Ginuong Jehova indi maghimo sing bisan ano nga butang kon indi niya anay mapahayag ang iya tinago sa iya mga alagad nga mga manalagna.”—Amos 3:7.

Isa Pa ka Buhat sang Dios

Ang isa pa ka buhat sang Dios natabo pila ka siglo sa tapos sang Anaw. Ang mga siudad sang Sodoma kag Gomorra ginlaglag sang Dios bangod sang ila daku nga imoralidad. Wala sing bisan napulo lang gani ka matarong nga tawo nga masapwan didto, tatlo lamang—si Lot kag ang iya duha ka anak nga babayi.

Ano ang panimuot sang katawhan sa sadtong mga siudad? Bilang halimbawa, talupangda ang reaksion sang mga lalaki nga nakagon sa mga anak nga babayi ni Lot sang ginsilingan sila nga magguwa sa siudad bangod malapit na laglagon sang Dios ini: “Sa mga mata sang iya [palaabuton] nga mga umagad nga lalaki daw sa nagalahog sia.”—Genesis 19:14.

Una pa sa sini, sang ang mga mensahero nagdayon kay Lot, ang mga lalaki sang Sodoma “tingob ang pamatan-on kag tigulang, ang bug-os nga katawhan gikan sa tagsa ka duog, nagkibon sang balay palibot.” Ngaa? Nagpanawag sila kay Lot: “Diin bala ang mga lalaki nga nag-abot sa imo sining gab-i? Paguwaa sila sa amon agod nga maghiusa kami sa ila.” Luyag nila himuon ang ila homoseksuwal nga buhat sa mga ahente sang Dios! Sa amo, bangod sadto nga imoralidad, ginlaglag sang Dios ang mga siudad.—Genesis 19:4, 5, 23-25.

Nga ini isa pa ka buhat sang Dios maathag nga ginpakita: “Paagi sa pag-abo niya [Dios] sa mga siudad sang Sodoma kag sang Gomorra gintagudilian sila, nga nagahatag sing huwaran para sa didiosnon nga mga tawo sang mga butang nga maabot; kag ginluwas niya ang matarong nga si Lot, nga ginsakit sing lakas sang maulagon nga paggawi sang mga malauton.”—2 Pedro 2:6, 7; Judas 7.

Mga Kalamidad nga Indi “mga Buhat sang Dios”

Ang suod nga pag-usisa sa mga kapahamakan nga ginatawag sang iban subong “mga buhat sang Dios” nagapahayag nga, sa kamatuoran, madamo ang hinimo sang tawo. Sa pagkamatuod, ang iban resulta sang kinaugali nga mga kusog subong sang mga linog kag mga bagyo.

Bisan ginatagna sang Biblia ang madamo sang hinimo sang tawo kag kinaugali nga mga kalamidad subong bahin sang nagapakilala nga mga tanda sining “katapusan nga mga adlaw,” wala gid ini nagahatag sing mga instruksion nga nagagarantiya sing imunidad gikan sa ila sa sining tion. (2 Timoteo 3:1-5; Mateo 24:3-12) Ngaa wala? Bangod ina nga mga butang indi mga buhat sang Dios. Apang, ginapaathag sang Pulong sang Dios kon ngaa ang maayo kag malain nga mga tawo lunsay nagaantos sa sini.

Sang ginlalis sang nahaunang mga tawo ang maathag nga mga instruksion sang Dios, gin-agda nila ang kalamidad. “Mapatay kamo nga totoo,” paandam sang Dios. (Genesis 2:17) Ginapakita ni apostol Pablo kon daw ano kasangkad ang epekto sang ila ginbuhat paagi sa pagsiling: “Paagi sa isa ka tawo . . . ang kamatayon naglaton sa tanan nga tawo.”—Roma 5:12.

Apang kapin pa ang nadalahig. Ang paglalis sang nahaunang mag-asawa nagkahulugan sing pagsikway sa tuytoy kag pag-atipan sang Dios. Indi na nila luyag ang Dios nga mangin Manuggahom sa ibabaw nila kag sang ila puluy-an, ang planeta nga Duta. Paagi sa pagsikway sa pagdumala sang Dios, nadula man nila ang iya pag-amlig gikan sa mga kalamidad.

Ano ang kahulugan sining tanan para sa aton? Nagakahulugan ini nga ang “tion kag ang dimakita nga mga kahigayunan” nagakatabo sa aton tanan. Nagakahulugan ini nga indi naton mahibaloan kon ano ang matabo nga mahimo magabiktima sa aton sang wala ginapaabot. Subong sang isda nga ginadakop sa pukot ukon sang mga pispis nga ginadakop sa siod, amo man, “ang mga anak sang mga tawo ginasiod sa malaut nga tion,” subong halimbawa, “kon [ang kamatayon] mahanabo sa ila sing hinali.”—Manugwali 9:11, 12.

Gani bisan pa ginakabig sang mga hukmanan sang kasugoan ang kinaugali nga mga kapahamakan subong “mga buhat sang Dios” sa legal nga kahulugan, sa kamatuoran indi sila mga buhat sang Dios.

Malapit Na ang Isa pa ka Buhat sang Dios

Nagalaragway sang putokputokan sang katapusan nga mga adlaw sang karon nga sistema nga aton ginakabuhian kutob sang tuig 1914, si Jesus nagpaandam: “Kay nian magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan . . . wala, kag indi na gid mahanabo liwat.” (Mateo 24:21) Tapuson sina nga hitabo ang dimatarong nga sistema sang mga butang karon. Ang putokputokan sini mangin amo “ang inaway sang dakung adlaw sang Dios nga Labing Gamhanan”—ang Armagedon. Sa pagkamatuod mangin kalamidad gid ina para sa tanan nga nagapabilin subong “bahin sang kalibutan.”—Bugna 16:14, 16; Juan 17:14; 2 Pedro 3:3-13.

Ano ini nga sahi sang paghukom? Mangin mapilion ini, laglagon lamang ang “mga wala [nagapili sa] pagkilala sa Dios kag ang mga wala nagatuman sang maayong balita nahanungod sa aton Ginuong Jesus.” (2 Tesalonica 1:8-10) Apang indi ini mangin kalamidad sa mga nagapamati sa paandam kag mga instruksion sang Dios, subong sang natabo kay Noe kag sa iya pamilya. Ini nga hitabo mangin isa gid ka buhat sang Dios, kay amligan niya ang iya mga alagad. Ina ang nagahimo sini nga tuhay sa iban nga mga kalamidad, nga nagakutol sang kabuhi sang maayo kag malain.—Tan-awa ang Isaias 28:21.

Paano naton mapat-od nga ang pagkari sang “dakung kapipit-an” mangin buhat sang Dios? Mapat-od naton ini bangod nahisuno ini sa talaksan:

(1) Nahisuno ini sa ginpahayag nga katuyoan sang Dios: Ina nga katuyoan amo ang paglaglag sa sining didiosnon nga sistema sang mga butang karon.—Jeremias 25:31-33; Sofonias 3:8; Bugna 16:14, 16; 19:11-21.

(2) Abanse nga Paandam: Sa halos pito ka dekada na karon, ang mga Saksi ni Jehova nagpalanog sing maathag nga paandam tuhoy sa katapusan sining sistema, kag ginbantala nila ang maayong balita sang nagapakari nga Ginharian sang Dios. Ang kasangkaron sang ila hilikuton nag-uswag tubtob nga sa karon kapin sa tatlo ka milyon ang mga Saksi sa bug-os nga duta. (Mateo 24:14; Binuhatan 20:20) Ginapalig-on namon kamo nga pamangkuton sila nahanungod sa ila mensahe sa masunod nga tion nga magduaw sila sa inyo puluy-an. Indi pag-iloga ang mga tawo sang adlaw ni Noe, nga siling ni Jesus, “wala magtalupangod” kag nalaglag sa Anaw.—Mateo 24:37-39.

(3) Mga Instruksion Para sa Kaluwasan: Ang Biblia nagalaygay: “Magkahadlok sa matuod nga Dios kag bantayi ang iya mga sugo.” (Manugwali 12:13) Ang yabi sang kaluwasan amo ang paghibalo sang mga instruksion sang Dios kag pagsunod sini. Si Jesus maathag nga nagsiling sini: “Ini amo ang kabuhi nga walay katapusan, nga pagkilalahon ka nila nga ikaw lamang ang matuod nga Dios, kag ang imo ginpadala nga si Jesucristo.” (Juan 17:3) Malipay ang mga Saksi ni Jehova nga ipakita sa inyo kon ano ang mga instruksion sang Dios.

Ang Pulong sang Dios nagasaad man: “Maglaum kay Jehova kag bantayi ang iya dalanon . . . Kon ang mga malauton utdon, makita mo ini.” (Salmo 37:34) Mapakita mo nga amo ini ang imo paglaum paagi sa pagpamati sa mga instruksion ni Jehova karon kag sundon ini. Magapakilala ina sa imo sa atubangan sang Dios kag sang tawo subong isa nga nagatinguha sa paghimo sang Iya kabubut-on kag sa amo nagalinya para sa kaluwasan. “Ang kalibutan nagataliwan . . . , apang ang nagahimo sang kabubut-on sang Dios nagapabilin sing dayon.”—1 Juan 2:15-17; Mateo 28:19, 20.

Makapalig-on gid ang mga lauman sa palaabuton para sa mga nagatuon sang nagapakari nga buhat sang Dios kag nagahimo sang kinahanglanon nga mga tikang para sa kaluwasan, kay pasudlon sila sa isa ka bag-ong dag-on sa idalom sang paggahom sang Ginharian sang Dios. (Mateo 6:9, 10) Apang sa bag-ong sistema, ano ang himuon agod maamligan ang katawhan gikan sa hinimo sang tawo ukon kinaugali nga mga kalamidad?

Ang Pagpugong sang Dios sa Kalamidad

Kon ang Ginharian sang Dios nagagahom na sing bug-os, daw ano ina nga tion sang paghidait kag pagpasag-uli! Ang mga kaayohan sang pagpasakop sa paggahom sang ginpalingkod nga langitnon nga Hari sang Dios nga si Jesucristo, makadalayaw gid binagbinagon.

Binagbinaga ang ginhimo ni Jesus sang yari sia sa duta nga nagpasundayag kon ano ang iya himuon sa iya paggahom sa Ginharian: Gin-ayo niya ang masakiton, ang piang, ginbuksan ang mga mata sang bulag, ang mga dulunggan sang mga bungol, ginpahambal ang mga apa, kag ginbanhaw bisan ang mga patay!—Mateo 15:30, 31; Lucas 7:11-17.

Amo kon ngaa ang Biblia nagapasalig sa aton nga sa idalom sang paggahom sang Ginharian “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:4.

Ang ginhimo ni Jesus sa duta nagapakita sing halimbawa sang bulig nga iya ihatag sa iya mga sakop sa nagapakari nga bag-ong sistema. Kag ano tuhoy sa proteksion gikan sa kinaugali nga mga kalamidad? Dumduma nga sa isa ka okasyon ginpunggan ni Jesus ang isa ka kalamidad paagi sa pagpatunong sa unos. Ang iya mga disipulo natingala kag nagsiling sa isa kag isa: “Sin-o gid bala ini, nga bisan ang hangin kag ang dagat nagatuman sa iya?” (Marcos 4:37-41) Sa amo, upod ang bug-os nga pagkontrol sa mga elemento, pat-uron sang gamhanan nga langitnon nga Hari sang bag-ong sistema nga indi na liwat ang kinaugali nga mga kalamidad maghalit sa tawo.

Ang bisan ano nga halit sang hinimo sang tawo ukon kinaugali nga mga kalamidad sa aton planeta ukon eco­sys­tem sini remedyohan sang Ginharian sang Dios. Ang saad sang Biblia amo: “Ang kamingawan kag ang duta nga kigas magakasadya; ang desyerto magakalipay kag magapamulak. Huo, magapamulak ini sing bugana kag magakalipay gid nga may kasadya kag inamba! . . . Ang tuburan sang tubig magaguwa sa kamingawan, kag ang mga ilig sa desyerto.”—Isaias 35:1-7, The Living Bible.

Ang isa ka palareho nga programa sa pagtudlo magatudlo sa tanan sa bag-o nga sistema sa pagtrabaho sing maayo kag sa pag-atipan sa ila mga isigkatawo, subong man sa duta. “Ang mga pumuluyo sang mabungahon nga duta magatuon sing pagkamatarong.” (Isaias 26:9) Paagi sa sinang bug-os-kalibutan nga pagtudlo sang Dios, kag sa tapos ang katawhan mahimpit na sa hunahuna kag lawas, ang mga sayop bangod sang pagkadihimpit madula na. Wala na sing paglaktod sa mga paagi sa pagtrabaho bangod sang makagud nga mga interes nga makadul-ong sa mga aksidente.

Sa karon, ang hinimo sang tawo kag ang kinaugali nga mga kalamidad nagaapektar sa aton tanan. Apang ang kalamidad nga dapat naton tanan kabalak-an, ang “dakung kapipit-an,” amo ang buhat sang Dios nga magalaglag sining malaut nga sistema sang mga butang. Ina nga buhat sang Dios magabukas sang dalan padulong sa isa ka bag-ong dag-on sang pagkamatarong para sa mga tawo nga wala nagapaligad sa kamatuoran sa karon. Para sa ila, pat-od nga ipasundayag nga “ang ma­tuod nga Dios amo ang aton Dios sang kalu­wasan.” (Salmo 68:20) Gani ang mga nagapakita sing diosnon nga kaalam karon magasulod sa isa ka bag-ong sistema nga sa diin sila “magapuyo sa kalig-onan kag wala ginatublag sang kahadlok sa kalamidad.”—Hulubaton 1:33.

[Kahon sa pahina 6]

Mga Butang nga Yara sa Buhat sang Dios:

(1) Pirme ini nahisuno sa katuyoan sang Dios.

(2) Ang Dios nagahatag sing abanse nga paandam antes sia maghikot.

(3) Nagahatag sia sing maathag nga mga instruksion para sa kaluwasan.

[Laragway sa pahina 7]

Ang pagkalaglag sang Sodoma kag Gomorra isa pa ka buhat sang Dios

[Laragway sa pahina 9]

Ginpakita ni Jesus ang iya gahom sa ibabaw sang kinaugali nga mga kusog paagi sa pagpatunong sa makatalagam nga unos