Pagpangapin sa Aton Pagtuo

“Pakabalaana si Cristo subong Ginuo sa inyo tagipusuon, handa pirme sa pagpangapin sa tagsa nga nagapangayo sa inyo sing pangatarungan tuhoy sa paglaum nga yara sa inyo.”​—⁠1 PEDRO 3:⁠15.

1, 2. Ngaa wala nagakatingala ang mga Saksi ni Jehova sa pagpamatok, apang ano ang luyag nila?

SA KALABANAN nga mga pungsod, ang mga Saksi ni Jehova sa kabilugan ginakilala subong bunayag, maayo sing dungog nga mga tawo. Madamo ang nagatamod sa ila subong maayo nga mga isigkatawo nga wala sing gamo. Apang, katingalahan nga ining mahidaiton nga mga Cristiano nag-antos sing dimakatarunganon nga paghingabot​—⁠may inaway man ukon wala. Wala sila nagakatingala sa sini nga pagpamatok. Sa katunayan, ginapaabot nila ini. Kay man, nahibaluan nila nga ang matutom nga mga Cristiano sang unang siglo C.⁠E. nangin “mga dulumtan,” gani ngaa abi magpaabot ang mga nagatinguha nga mangin matuod nga mga sumulunod ni Cristo karon nga tuhay ang ipakita sa ila? (Mateo 10:22) Luwas pa, ang Biblia nagasiling: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.”​—⁠2 Timoteo 3:⁠12.

² Wala ginapangita sang mga Saksi ni Jehova ang paghingabot, ukon ginakakunyagan nila ang mga kabudlayan​—⁠mga multa, mga pagkabilanggo, ukon kapintas​—⁠nga mahimo ginadala sini. Luyag nila ‘magkabuhi sing isa ka matawhay kag malinong nga kabuhi’ agod mabantala nila ang maayong balita sang Ginharian sang Dios nga wala sing sablag. (1 Timoteo 2:​1, 2) Ginaapresyar nila ang ila relihioso nga kahilwayan sa kalabanan nga kadutaan agod mapadayon nila ang ila pagsimba, kag maukod nga ginahimo nila ang ila masarangan agod “magpakighidait sa tanan nga tawo,” lakip ang mga gumalahom sang tawhanon nga mga panguluhan. (Roma 12:18; 13:​1-7) Ngaa, nian, nangin “mga dulumtan” sila?

3. Ano ang isa ka rason kon ngaa dimakatarunganon nga ginadumtan ang mga Saksi ni Jehova?

³ Ang mga Saksi ni Jehova dimakatarunganon nga ginadumtan bangod man sang mga rason nga ginhingabot anay ang unang mga Cristiano. Una, ginaaplikar sang mga Saksi ni Jehova ang ila relihioso nga mga pagtuluuhan sa mga paagi nga nagapaugot sa iban. Halimbawa, makugi nga ginabantala nila ang maayong balita sang Ginharian sang Dios, apang masami nga nasal-an sang mga tawo ang ila kakugi, ginatamod ang ila pagbantala subong “masupog nga pagpangumbertir.” (Ipaanggid ang Binuhatan 4:​19, 20.) Nagapabilin man sila nga neutral sa politika kag sa mga inaway sang mga pungsod, kag kon kaisa nasal-an ini nga ang mga Saksi maluib nga mga banwahanon.​—⁠Miqueas 4:​3, 4.

4, 5. (a) Paano ang mga Saksi ni Jehova nangin puntariya pirme sang butig nga mga panumbungon? (b) Sin-o ang puno nga mga manugsugyot sang paghingabot sa mga alagad ni Jehova?

⁴ Ikaduha, ang mga Saksi ni Jehova nangin puntariya sang butig nga mga panumbungon​—⁠mga kabutigan kag pagpatiko sa ila mga pagtuluuhan. Subong resulta, nangin sentro sila sang di-makatarunganon nga pagsalakay sa pila ka pungsod. Dugang pa, bangod wala sila nagapatayon sing dugo bilang pagtuman sa sugo sang Biblia nga ‘maglihi sa dugo,’ sayop nga ginlaragway sila nga “mga manugpatay sing bata” kag “isa ka kulto nga handa maghikog.” (Binuhatan 15:29) Apang ang matuod amo nga ginapabaloran sang mga Saksi ni Jehova ang kabuhi, kag ginatinguhaan nila nga matigayon ang pinakamaayo nga sahi sang pagbulong para sa ila kaugalingon kag sa ila mga anak. Ang panumbungon nga madamo nga kabataan sang mga Saksi ni Jehova ang nagakapatay kada tuig bangod sang indi pagpatayon sing dugo wala gid sing sadsaran. Dugang pa, bangod indi pareho ang epekto sang kamatuoran sang Biblia sa tanan nga katapo sang pamilya, may panumbungon man nga ginaguba sang mga Saksi ang mga pamilya. Apang, ang mga tawo nga nakakilala sa mga Saksi ni Jehova nakahibalo nga ginapabaloran nila ang pamilya kag nagatinguha sila nga sundon ang mga sugo sang Biblia nga ang mag-asawa dapat magpakita sing gugma kag pagtahod sa isa kag isa kag ang kabataan dapat magtuman sa ila mga ginikanan tumuluo man sila ukon indi.​—⁠Efeso 5:​21⁠–​6:⁠3.

⁵ Sa madamo nga kaso, ang puno nga mga manugsugyot sing paghingabot sa mga alagad ni Jehova amo ang relihioso nga mga manugpamatok nga nagagamit sang ila impluwensia sa politikal nga mga awtoridad kag sa media sa pagtinguha nga sumpuon ang hilikuton sang mga Saksi. Subong mga Saksi ni Jehova, ano dapat ang mangin reaksion naton sa sini nga pagpamatok​—⁠resulta man ini sang aton pagtuluuhan kag mga buhat ukon bangod sang butig nga mga panumbungon?

“Ipakilala sa Tanan nga Tawo ang Inyo Pagkamakatarunganon”

6. Ngaa importante nga maghupot sing balanse nga pagtamod sa mga tawo nga indi bahin sang Cristianong kongregasyon?

⁶ Una anay, dapat kita maghupot sing husto nga pagtamod​—⁠ang pagtamod ni Jehova​—⁠sa mga tawo nga wala nagaugyon sa aton relihioso nga mga pagpati. Kay kon indi, mahimo nga kaugtan lamang kita ukon pakahuy-an sang iban. “Ipakilala sa tanan nga tawo ang inyo pagkamakatarunganon,” sulat ni apostol Pablo. (Filipos 4:⁠5) Busa, ang Biblia nagapalig-on sa aton nga maghupot sing balanse nga pagtamod sa mga tawo nga indi bahin sang Cristianong kongregasyon.

7. Ano ang nadalahig sa aton pagpabilin nga “walay dagta gikan sa kalibutan”?

⁷ Sa isa ka bahin, ang Kasulatan maathag nga nagalaygay sa aton nga ‘huptan ang aton kaugalingon nga walay dagta gikan sa kalibutan.’ (Santiago 1:⁠27; 4:4) Ang termino diri nga “kalibutan,” subong sang mabasa sa madamo nga bahin sang Biblia, nagapatuhoy sa katawhan nga napain gikan sa matuod nga mga Cristiano. Nagapuyo kita sa tunga sining katilingban sang katawhan; nagapakig-angot kita sa ila sa trabaho, sa eskwelahan, sa palibot. (Juan 17:​11, 15; 1 Corinto 5:​9, 10) Walay sapayan, ginahuptan naton ang aton kaugalingon nga walay dagta gikan sa kalibutan paagi sa paglikaw sa mga panimuot, panghambal, kag paggawi nga nagasumpakil sa matarong nga mga dalanon sang Dios. Importante man nga kilalahon naton ang katalagman sang pagpakigsuod sa sining kalibutan, labi na sa mga tawo nga nagasikway sa mga talaksan ni Jehova.​—⁠Hulubaton 13:⁠20.

8. Ngaa ang laygay nga magpabilin nga walay dagta gikan sa kalibutan wala nagahatag sa aton sing bisan anong sadsaran nga pakanubuon ang iban?

⁸ Apang, ang laygay nga magpabilin kita nga walay dagta gikan sa kalibutan wala nagahatag sa aton sing bisan anong sadsaran nga pakanubuon naton ang mga tawo nga indi mga Saksi ni Jehova. (Hulubaton 8:13) Dumduma ang halimbawa sang Judiyo nga relihiosong mga lider, nga ginbinagbinag sa nagligad nga artikulo. Wala ginkahamut-an ni Jehova ang porma sang relihion nga ila gintukod; wala man ini makabulig para sa maayong relasyon sa mga di-Judiyo. (Mateo 21:​43, 45) Gikan sa ila nagapakamatarong sa kaugalingon nga pagtamod, ginpakanubo sining panatiko nga mga tawo ang mga Gentil. Wala kita nagahupot sining di-makatarunganon nga pagtamod sa mga indi Saksi, ginatamay sila. Kaangay ni apostol Pablo, handum naton nga ang tanan nga makabati sing mensahe sang kamatuoran sang Biblia kahamut-an sang Dios.​—⁠Binuhatan 26:29; 1 Timoteo 2:​3, 4.

9. Ano dapat ang epekto sang isa ka balanse, Makasulatanhon nga pagtamod sa aton panghambal nahanungod sa mga tawo nga wala nagaugyon sa aton mga pagtuluuhan?

⁹ Ang balanse, Makasulatanhon nga pagtamod dapat mag-apektar sang aton panghambal tuhoy sa indi mga Saksi. Ginhambalan ni Pablo si Tito nga pahanumdumon ang mga Cristiano sa isla sang Creta nga “dili maghambal sing mahaliton kay bisan sin-o, dili mangin palaaway, mangin makatarunganon, nagapakita sing bug-os nga kalulo sa tanan nga tawo.” (Tito 3:⁠2) Talupangda nga indi dapat maghambal sing mahaliton ang mga Cristiano “kay bisan sin-o”​—⁠bisan sa mga di-Cristiano sa Creta, nga ang iban sa ila kilala sa ila pagbinutig, pagkahakugan, kag pagkamatamad. (Tito 1:12) Gani indi makasulatanhon nga maggamit kita sing nagapakanubo nga mga tinaga kon nagapatuhoy sa mga tawo nga wala nagaugyon sa aton mga pagtuluuhan. Ang superyor nga panimuot indi magaganyat sa iban sa pagsimba kay Jehova. Sa baylo, kon tamdon naton kag pakig-angutan ang iban nahisanto sa makatarunganon nga mga prinsipio sang Pulong ni Jehova, ‘ginapunihan [naton] ang panudlo’ sang Dios.​—⁠Tito 2:⁠10.

Kon San-o Maghipos, Kon San-o Maghambal

10, 11. Paano ginpakita ni Jesus nga nakahibalo sia kon san-o ang (a) “tion sa paghipos”? (b) “tion sa paghambal”?

¹⁰ May “tion sa paghipos kag tion sa paghambal,” siling sang Manugwali 3:⁠7. Ang problema diri amo: ang pagpamat-od kon san-o indi pagsapakon ang mga manugpamatok kag kon san-o dapat maghambal agod pangapinan ang aton pagtuo. Daku ang matun-an naton gikan sa huwaran sang isa nga nagpakita sing himpit nga pagkamainandamon sa tanan nga tion​—⁠si Jesus. (1 Pedro 2:21) Nahibaluan niya kon san-o ang “tion sa paghipos.” Halimbawa, sang ginbutangbutangan sia sang puno nga mga saserdote kag sang gulang nga mga lalaki sa atubangan ni Pilato, si Jesus “wala magsabat.” (Mateo 27:​11-14) Wala sia maghambal sing bisan ano nga mahimo magsablag sa katumanan sang kabubut-on sang Dios para sa iya. Sa baylo, ginpili niya nga ang iya mga binuhatan ang maghatag sing ebidensia. Nahibaluan niya nga bisan ang kamatuoran indi makapabag-o sa ila matinaastaason nga hunahuna kag tagipusuon. Gani wala niya pagsapaka ang ila panumbungon, sia hungod nga naghipos.​—⁠Isaias 53:⁠7.

¹¹ Apang, nakahibalo man si Jesus kon san-o ang “tion sa paghambal.” May tion nga prangka kag dayag nga nakigbais sia sa mga nagamulay sa iya, ginapamatud-an nga indi matuod ang ila butig nga mga panumbungon. Halimbawa, sang magtinguha ang mga escriba kag mga Fariseo nga pakahuy-an sia sa atubangan sang isa ka kadam-an paagi sa pagsumbong nga sia nagapaguwa sing mga demonyo sa ngalan ni Beelzebub, nagdesisyon si Jesus nga indi pagpaligaron ang butig nga mga panumbungon. Paagi sa maathag nga lohika kag mapuwersa nga ilustrasyon, gintadlong niya ang ila kabutigan. (Marcos 3:​20-30; tan-awa man ang Mateo 15:​1-11; 22:​17-21; Juan 18:37) Subong man, sang si Jesus, sa tapos sia ginluiban kag gindakop, ginguyod sa atubangan sang Sanhedrin, ang Mataas nga Saserdote nga si Caifas malalangon nga nagsiling: “Paagi sa Dios nga buhi ginapasumpa ko ikaw nga magsugid ka sa amon kon ikaw ang Cristo nga Anak sang Dios!” ‘Tion [man ini] sa paghambal,’ kay ang paghipos lamang magapahangop nga ginapanghiwala niya nga sia ang Cristo. Gani si Jesus nagsabat: “Amo ako.”​—⁠Mateo 26:​63, 64; Marcos 14:​61, 62.

12. Ano ang mga kahimtangan nga nagtiklod kay Pablo kag kay Bernabe sa pagpamulong nga may kasidla sa Iconio?

¹² Binagbinaga man ang halimbawa ni Pablo kag ni Bernabe. Ang Binuhatan 14:​1, 2 nagasiling: “Sa Iconio nagsulod sila nga magkaupod sa sinagoga sang mga Judiyo kag nagpamulong sa bagay nga ang dakung kadam-an sang mga Judiyo kag mga Griego nangin mga tumuluo. Apang ang mga Judiyo nga wala magtuo nagsugyot kag malaut nga nag-impluwensia sa mga kalag sang mga tawo sang mga pungsod batok sa mga kauturan.” Ang The New English Bible mabasa: “Apang ginsugyot sang wala makumbertir nga mga Judiyo ang mga Gentil kag ginhiluan ang ila hunahuna batok sa mga Cristiano.” Indi pa kontento nga sikwayon nila mismo ang mensahe, nagpalapta pa ang Judiyo nga mga manugpamatok sing butig nga mga impormasyon, sa pagtinguha nga pakalainon sang mga Gentil ang mga Cristiano.⁠a Daku gid ang ila dumot sa Cristianismo! (Ipaanggid ang Binuhatan 10:⁠28.) Ginbatyag ni Pablo kag ni Bernabe nga ini “tion sa paghambal,” kay basi magluya ang buot sang bag-o nga mga disipulo bangod sang kahuy-anan sa publiko. “Gani naghinguyang sila [si Pablo kag si Bernabe] sing daku nga tion sa pagpamulong nga may kasidla paagi sa awtoridad ni Jehova,” nga nagpakita sang iya kahamuot paagi sa paghatag sa ila sing gahom sa paghimo sing milagruso nga mga tanda. Bangod sini, ang iban ‘nag-ugyon sa mga Judiyo apang ang iban sa mga apostoles.’​—⁠Binuhatan 14:⁠3, 4.

13. Sa pag-atubang sa pagpakahuya, san-o sa masami ang “tion sa paghipos”?

¹³ Ano, nian, ang himuon naton kon ginapakahuy-an kita? Depende ini sa kahimtangan. Sa pila ka kahimtangan, kinahanglan nga iaplikar naton ang prinsipio nga may “tion sa paghipos.” Amo gid sini ang himuon kon ang determinado nga mga manugpamatok nagatinguha nga ganyaton kita sa walay pulos nga pagbaisay. Indi naton dapat kalipatan nga ang iban nga mga tawo wala nagahandum nga mahibaluan ang kamatuoran. (2 Tesalonica 2:​9-12) Walay pulos ang pagtinguha nga mangatarungan sa mga tawo nga ang ila tagipusuon matinaastaason nga nagapakatig-a nga indi magpati. Kapin pa sa sini, kon mawili kita sa pagpakigbais sa tagsa ka butig nga manugsumbong nga nagaatake sa aton, mahimo ini makaupang sa aton gikan sa mas importante kag makapaladya nga hilikuton​—⁠nga amo ang pagbulig sa mga bunayag sing tagipusuon nga luyag gid makatuon sing kamatuoran sang Biblia. Gani kon ginaatake kita sang mga kaaway nga ang tuyo lamang amo ang magpalapta sing kabutigan batok sa aton, ang inspirado nga laygay amo: “Likawi sila.”​—⁠Roma 16:​17, 18; Mateo 7:⁠6.

14. Sa anong mga paagi mahimo naton mapangapinan ang aton pagtuo sa atubangan sang iban?

¹⁴ Sa pagkamatuod, wala ini nagakahulugan nga indi naton pangapinan ang aton pagtuo. May yara man “tion sa paghambal.” Nagakaigo lamang nga mabalaka kita sa sinsero nga mga tawo nga ginasugiran sing pagpakalain sa aton. Handa kita sa paghatag sa iban sing klaro nga paathag tuhoy sa aton tinagipusuon nga mga pagtuluuhan; sa pagkamatuod, ginaabiabi naton ini nga kahigayunan. Si Pedro nagsulat: “Pakabalaana si Cristo subong Ginuo sa inyo tagipusuon, handa pirme sa pagpangapin sa tagsa nga nagapangayo sa inyo sing pangatarungan tuhoy sa paglaum nga yara sa inyo, apang ginahimo ini nga may kalmado nga buot kag daku nga pagtahod.” (1 Pedro 3:⁠15) Kon ang interesado gid nga mga indibiduwal mangayo sing pamatuod tuhoy sa mga pagtuluuhan nga aton ginapakabahandi, kon mamangkot sila tuhoy sa butig nga mga panumbungon nga ginapautwas sang mga manugpamatok, salabton naton nga pangapinan ang aton pagtuo, nagahatag sing makatarunganon nga mga sabat pasad sa Biblia. Dugang pa, ang aton maayo nga paggawi makahatag sing daku nga pamatuod. Kon makita sang mahinangpanon nga mga tawo nga nagatinguha kita sa pagkabuhi nahisanto sa matarong nga mga talaksan sang Dios, makita nila sa gilayon nga ang mga panumbungon batok sa aton binutig.​—⁠1 Pedro 2:​12-15.

Ano ang Himuon sa Mapasipalahon nga Publisidad?

15. Ano ang isa ka halimbawa kon paano ginpuntariya ang mga Saksi ni Jehova sang tiko nga impormasyon sa media?

¹⁵ Kon kaisa, ang mga Saksi ni Jehova nangin puntariya sang sayop nga impormasyon sa media. Halimbawa, sang Agosto 1, 1997, ang isa ka pamantalaan sa Rusya nagbalhag sing isa ka artikulo nga, lakip sa iban pa nga mga butang, nagabutangbutang nga ang mga Saksi nagaobligar sa mga katapo nga ‘sikwayon ang ila asawa, bana, kag mga ginikanan kon indi nila mahangpan kag wala sila nagaugyon sa ila pagtuo.’ Ang isa nga nakakilala sa mga Saksi ni Jehova nakahibalo nga indi matuod ining panumbungon. Ginapakita sang Biblia nga dapat pakig-angutan sang mga Cristiano ang ditumuluo nga mga katapo sang pamilya sing mahigugmaon kag matinahuron, kag ginatinguhaan sang mga Saksi nga sundon ini nga laygay. (1 Corinto 7:​12-16; 1 Pedro 3:​1-4) Walay sapayan sini, ang artikulo gin-imprinta, kag madamo nga bumalasa ang ginhatagan sing sayop nga impormasyon. Paano naton mapangapinan ang aton kaugalingon kon kita butig nga ginasumbong?

16, 17, kag kahon sa pahina 16. (a) Ano anay ang ginsiling sang Ang Lalantawan tuhoy sa kon ano ang himuon sa sayop nga impormasyon sa media? (b) Sa idalom sang anong mga kahimtangan mahimo nga sabton sang mga Saksi ni Jehova ang negatibo nga mga sugilanon sa media?

¹⁶ Sa sini liwat, may “tion sa paghipos kag tion sa paghambal.” Subong sini ang ginsiling anay sang Ang Lalantawan: “Kon bala indi lang naton pagsapakon ang sayop nga impormasyon sa media ukon pangapinan ang kamatuoran paagi sa nagakaigo nga mga lalang nasandig sa mga kahimtangan, sa kon sin-o ang nagsugyot sang pagmulay, kag kon ano ang iya tulumuron.” Sa pila ka kaso mahimo labing maayo nga indi lang pagsapakon ang negatibo nga mga sugilanon, agod indi mahatagan sing dugang pa nga publisidad ang mga kabutigan.

¹⁷ Mahimo nga sa iban nga mga kaso isa ini ka “tion sa paghambal.” Mahimo nga ang isa ka masaligan nga dyurnalista ukon manugbalita ginhatagan sing sayop nga impormasyon tuhoy sa mga Saksi ni Jehova kag luyag niya mabatian ang matuod nga impormasyon tuhoy sa aton. (Tan-awa ang kahon nga “Pagtadlong sa Isa ka Sayop nga Impormasyon.”) Kon ang negatibo nga mga balita sa media magdul-ong sa sayop nga opinyon nga magaupang sa aton pagbantala nga hilikuton, ang mga tiglawas sang sanga talatapan sang Watch Tower Society makahimo sing tikang nga pangapinan ang kamatuoran paagi sa nagakaigo nga mga lalang.⁠b Halimbawa, mahimo magtangdo sing sangkol nga mga gulang nga magpresentar sing mga katunayan, subong sang isa ka programa sa telebisyon, kon ang indi paghimo sini mahimo magpahangop nga ang mga Saksi ni Jehova wala sing sabat. Ang indibiduwal nga mga Saksi maalamon nga magakooperar sa instruksion sang Watch Tower Society kag sang mga tiglawas sini tuhoy sa sini nga mga butang.​—⁠Hebreo 13:⁠17.

Legal nga Pagpangapin sa Maayong Balita

18. (a) Ngaa indi naton kinahanglan ang permiso sang tawhanon nga mga panguluhan sa pagbantala? (b) Ano nga dalanon ang ginasunod naton kon idingot sa aton ang permiso sa pagbantala?

¹⁸ Ang aton awtorisasyon nga ibantala ang maayong balita sang Ginharian sang Dios naghalin sa langit. Si Jesus, nga nagsugo sa aton nga himuon ining hilikuton, ginhatagan sing ‘bug-os nga awtoridad sa langit kag sa duta.’ (Mateo 28:⁠18-20; Filipos 2:​9-11) Busa, indi naton kinahanglan ang permiso sang tawhanon nga mga panguluhan sa pagbantala. Walay sapayan sini, ginakilala naton nga ang kahilwayan sa relihion makabulig sa pagpalapnag sa mensahe sang Ginharian. Sa kadutaan diin may kahilwayan kita sa aton pagsimba, gamiton naton ang legal nga sistema sa pag-amlig sini. Sa mga duog nga ginadingot sa aton ini nga kahilwayan, magatinguha kita, suno sa ginatugot sang kasuguan, nga matigayon ini. Ang aton tulumuron, indi ang reporma sa katilingban, kundi ang ‘pagpangapin kag legal nga pagpalig-on sa maayong balita.’⁠c​—⁠Filipos 1:⁠7.

19. (a) Ano mahimo ang mangin resulta sang aton ‘paghatag sa Dios sang mga butang nga iya sang Dios’? (b) Ano ang aton determinasyon nga himuon?

¹⁹ Subong mga Saksi ni Jehova, ginakilala naton si Jehova subong amo ang Bug-os Uniberso nga Soberano. Ang iya kasuguan amo ang pinakalabaw. Sinsero nga ginatuman naton ang tawhanon nga mga panguluhan, sa amo ‘ginahatag kay Cesar ang mga butang nga iya ni Cesar.’ Apang indi naton pagtugutan ang bisan ano nga mag-upang sa aton pagtuman sa aton mas importante nga salabton​—⁠‘ang paghatag sa Dios sang mga butang nga iya sang Dios.’ (Mateo 22:​21) Nahangpan naton sing bug-os nga bangod sini mangin “mga dulumtan” kita sang mga pungsod, apang ginabaton naton ini subong bahin sang kabilihanan sang pagkadisipulo. Ang legal nga rekord sang mga Saksi ni Jehova sa ika-20 nga siglo isa ka pamatuod sa aton determinasyon nga pangapinan ang aton pagtuo. Sa bulig kag pagsakdag ni Jehova, magapadayon kita nga “walay untat sa pagpanudlo kag sa pagpahayag sing maayong balita.”​—⁠Binuhatan 5:⁠42.

[Mga footnote]

Nadumduman Mo Bala

◻ Ngaa nangin “mga dulumtan” ang mga Saksi ni Jehova?

◻ Paano naton dapat tamdon ang mga tawo nga wala nagaugyon sa aton relihioso nga mga pagtuluuhan?

◻ Sa pagpakig-angot sa mga manugpamatok, anong balanse nga huwaran ang ginpahamtang ni Jesus?

◻ Kon ginapakahuy-an kita, paano naton maaplikar ang prinsipio nga may “tion sa paghipos kag tion sa paghambal”?

[Kahon sa pahina 16]

Pagtadlong sa isa ka Sayop nga Impormasyon

“Sa Yacuiba, Bolivia, ang isa ka lokal nga evangelical nga grupo nagpaguwa sa telebisyon sing isa ka pelikula nga maathag nga ginhimo sang mga apostata. Bangod sang malain nga mga epekto sadto nga programa, namat-od ang mga gulang nga duawon ang duha ka estasyon sang telebisyon kag nagtanyag nga bayaran sila sa pagpasalida sa publiko sing video nga Jehovah’s Witnesses​—⁠The Organization Behind the Name kag ang The Bible​—⁠A Book of Fact and Prophecy. Sa tapos matan-aw ang mga video halin sa Sosiedad, naakig ang tag-iya sang isa ka estasyon sang radyo sa sayop nga impormasyon sa programa sang mga apostata kag nagtanyag sa mga Saksi ni Jehova nga ipaanunsio nga walay bayad ang ila nagapakari nga distrito nga kombension. Indi kinaandan ang kadamuon sang nagtambong, kag madamo sang mga bunayag sing tagipusuon ang nagsugod sa pagpamangkot sing sinsero nga mga pakiana sang magduaw ang mga Saksi sa ila sa ministeryo.”​—⁠1997 Yearbook of Jehovah’s Witnesses, pahina 61-2.

[Retrato sa pahina 17]

May tion nga dayag nga ginpamatud-an ni Jesus nga indi matuod ang butig nga mga panumbungon sang mga nagmulay sa iya