Pagpasag-uli sang Kusog, Wala Ginalapyo

“Sia nagahatag sing gahom sa ginapunaw; kag sa wala sing dinamiko nga enerhiya nagadugang sia sing kusog.”—ISAIAS 40:29.

1, 2. Paano mo iilustrar ang pagkaanggid sang mga Cristiano sa mga manugdalagan sa maraton?

ISA ka aga sang Oktubre sadtong 1984, mga 16,000 ka pumalasakop ang nagdinaguso sa mga dalan sang ginsugdan ang Maraton sang Siudad sang Nueva York. Ang fin­ish line mga 26.2 milya (42.2 km) kalayo. Yadtong dikinaandan nga tig-ilinit sadtong tigpamulak nagdala sing makaulugot nga init kag kapaang nga nagpaluya sang enerhiya sang mga manugdalagan kag nagtilaw sang ila pagbatas. Ang palumba nangin makahalago nga panikasog bisan para sa labing maayo nga humalampang. Madamong mga manugdalagan ang kinapoy kag nag-untat sa palumba; halos 2,000 ang wala makatapos. Yadtong nakatapos tunay nga nakalandas sang tuman kabudlay nga mga kahimtangan.

² Ang mga Cristiano nagapalumba man. Ang padya? Kabuhi nga walay katapusan. Kag kaanggid sa manugdalagan sa maraton, dapat sila manikasog tubtob sa katapusan. Kinahanglan ang pagbatas. Dapat huptan ang kusog kag likawan ang kakapoy. Ang aton palumba para sa kabuhi indi kaangay sang malip-ot madasig nga pagdalagan kundi, sa baylo, kaangay sang malayo sing distansia nga pagdalagan. Ginsilingan ni Pablo ang iya mga masigka Cristiano sa Corinto: “Wala bala kamo makahibalo nga sa palumba ang tanan nga nagadalagan nagapaindis-indis, apang isa lamang ang nagabaton sang padya? Gani dalagan kamo agod makaagom kamo sini.” (1 Corinto 9:24) Nagakinahanglan sing lakas nga panikasog ang pagdalagan sang mga Cristiano.—Lucas 13:24.

 3. Paano lamang mahuptan sang mga Cristiano ang lakas nga pagdalagan tubtob matapos nila ang palumba?

³ Apang basi mamangkot ka: ‘Sin-o ang makapadayon sa sina nga kadasig agod matapos ang palumba?’ Wala sing isa sa aton ang makasarang paagi sa aton lamang kaugalingon nga kusog. Agod matigayon ang padya, dapat kita magkuha sing kusog sa Tuboran mismo sang dinamiko nga enerhiya, si Jehova nga Dios.—Job 36:22; Salmo 108:13.

Si Jehova—Ang Tuboran sang Dinamiko nga Enerhiya

 4. Suno kay manalagna Isaias, ngaa makasalig kita sa ikasarang ni Jehova sa pagsakdag sa iya mga alagad?

⁴ Walay duhaduha nga sakdagon ni Jehova ang iya mga alagad. Paagi sa ginsiling sang iya manalagna nga si Isaias, ang Labing Gamhanan nagahambal tuhoy sa pagkawalay latid sang Iya mga ikasarang kag sang pagkadimatupongan sang Iya gamhanan nga mga buhat. “Itangla ang inyo mga mata sa hitaas kag tan-awa,” siling Niya. “Sin-o bala ang nagtuga sini sa ila? Sia nga nagapaguwa sang ila kasoldadosan sa isip, ginatawag niya sila tanan sa ngalan. Paagi sa kadaku sang iya dinamiko nga kusog, kag bangod makusog sia sa gahom, wala sing isa nga nakulang sa iya. . . . Wala ka bala makahibalo ukon wala ka bala makabati? Si Jehova, ang Manunuga sang mga ukbong sang duta, amo ang Dios sang tion nga dinapat-od. Wala sia ginapunaw ukon ginalapyo. Wala sing makatungkad sang iya paghangop.”—Isaias 40:26-28.

 5, 6. Maghatag sing mga halimbawa sang pamatuod sang dinamiko nga enerhiya ni Jehova.

⁵ Gikan sa may latid tubtob sa walay latid nga mga butang, makahalangawa ang gahom sa pagpanuga nga ginpakita ni Jehova! Halimbawa, binagbinaga ang mga bloke sa pagpatindog nga sa diin ang tanan nga mga bagay, lakip kita, gintukod—ang mga atomo. Tuman sa ila kadiutay sa bagay nga ang isa ka tulo sang tubig nagaunod sang 100 ka bilyon ka bilyon ka mga atomo (sistema sang Amerika sa pag-isip). Apang, sing makatilingala, yara sa sulod sang nu­cle­us sang mga atomo ang bastante nga enerhiya nga magabuhi, sa isa ka kaso, sing isa ka lupok nga tuman ka kusog nga mapalupok sini ang bolkan sa duta nga 32 ka panalgan kadalom kag un kuarto sang isa ka milya kasangkad.

⁶ Sa pihak nga bahin sang talaksan sang kadakuon, binagbinaga ang adlaw. Ining higante nga nuklear nga hurnohan nga nagabug-at sing binilyon ka tonelada nagainit sang aton solar nga sistema. Ginagatongan ini sang enerhiya nga naghalin sa magagmay nga mga atomo. Bisan pa nga ang tanan nga kabuhi sa duta—ang mga tanum, mga sapat, kag mga tawo—nagasalig sa enerhiya nga ginapaguwa sinang higante nga planta sang kusog sa langit, diutay lamang nga kadamuon sang enerhiya sang adlaw ang aktuwal nga nagalab-ot sa duta. Apang, bastante ina sa pagsuporta sa kabuhi. Sa iya libro Astronomy, ang astronomo nga si Fred ­Hoyle nagsulat: “Ang tuman ka diutay nga bahin sang enerhiya sang Adlaw nga nagatupa sa Duta—ginabantabanta nga mga lima ka bahin sang isa ka gatos ka milyon ka milyon—mga 100,000 ka beses nga mas daku sang sa tanan nga mga enerhiya nga ginagamit sa mga industriya sa kalibutan.”

 7. Ano ang aton mangin balatyagon tuhoy kay Jehova sa tapos mabinagbinag ang gahom nga napadayag sa iya tinuga?

⁷ Apang, ang adlaw isa lamang sang binilyon ka mga bituon nga nagaunod sang galaksiya sang aton Milky Way—kag tungatunga lamang ini sing kadakuon nga bituon. Dugang pa, ginabantabanta sang mga astronomo nga may yara mga 100,000,000,000 ka galaksiya sa uniberso. Makalilibog ini hunahunaon, indi bala? Indi katingalahan nga si Job, sa tapos mahunahuna kon paano ‘ginhumlad [ni Jehova] ang langit,’ nagsiling nga ang Dios “nagahimo sang mga butang nga dalagku nga indi matungkad.”—Job 9:8-10.

Si Jehova Magapapagsik sa Imo

 8. (a) Sin-o lamang ang makakuha sing bug-os sa gahom ni Jehova, kag ngaa? (b) Paano ang saad sa Isaias 40:29-31 makapabakud sing pagtuo?

⁸ Ang matuod nga mga sumilimba ni Jehova hilway kag bug-os nga makakuha sa sining Tuboran sang dinamiko nga enerhiya nga nagtuga kag nagasakdag sang uniberso. Ang mga alagad ni Jehova sarang ‘mahimo nga gamhanan sa kusog paagi sa iya balaan nga espiritu,’ nga wala mahadlok nga maubosan sang gahom. (Efeso 3:16; Salmo 84:4, 5) Sa pagkamatuod, ang aton pagdaug sa palumba sa kabuhi nagadepende sa bug-os nga pagsalig nga paagi sa gamhanan nga kamut sang Dios malampasan naton ang fin­ish line. Ginapapagsik niya kita. Subong sang ginsiling ni manalagna Isaias tuhoy kay Jehova: “Sia nagahatag sing gahom sa mga ginapunaw; kag sa wala sing dinamiko nga enerhiya nagadugang sia sing kusog. Bisan ang mga pamatan-on nga lalaki punawon kag lapyuon, kag ang mga pamatan-on mapukan sing bug-os, apang ang mga nagahulat kay Jehova magapasag-uli sang ila kusog. Magatimbuok sila nga may mga pakpak subong sang mga agila. Magadalagan sila kag indi paglapyuon; magalakat sila kag indi pagpunawon.” (Isaias 40:29-31) Ti, paagi lamang sa pagbasa sining mga pinamulong mapukaw ang aton espiritu!

 9. Paano ka mabuligan ni Jehova sa imo ‘daw bukid’ nga mga problema?

⁹ Kon ginaatubang sing dalagku nga mga palaligban nga daw magaupang sa imo kakugi para sa matuod nga pagsimba, ayhan magabatyag ka nga diutay kag indi importante. Indi magkasubo. Liso ka sa imo labing gamhanan nga langitnon nga Amay. Ginapabakud niya ang ‘tanan nga nagalaum sa iya.’ Indi bala paghatagan sang Manunuga sang atomo ang iya katawhan sing dinamiko nga enerhiya nga tuman ka kusog nga masaylo yadtong ‘mga bukid’? Magahatag gid sia!—Marcos 11:23.

10. (a) Ano nga mga butang ang magapalapyo sa Cristianong mga manugdalagan? (b) Ano ang luyag ni Satanas nga himuon sa imo?

¹⁰ Sa pihak nga bahin, ang iban nga mga Cristiano mahimo nga kapuyon bangod sang adlaw-adlaw nga pagpakig-away batok sa mga pag-ipit gikan sa kalibutan nga nagapasundayag sang iya indi pagtahod sa Cristianong mga prinsipio nga sa amo daw nagapahinay kag nagapadulog sa ila sa palumba sa kabuhi. Ang mga balatian, mga palaligban sa pangwarta, mga palaligban sa pamilya, kasubo, ukon iban pa nga mga kabudlayan magatuga man sing pagluya sing buot. Kag ang pagluya sing buot hinali nga magapaluya sang kusog sang isa ka Cristiano, subong nga ang nagatagiti nga adlaw madasig nga magaubos sang enerhiya sang isa ka manugdalagan sa maraton. Ang dakung Kaaway, si Satanas nga Yawa, nagagamit sina nga mga butang agod tinguhaan nga bungkagon ang imo integridad subong alagad ni Jehova. (1 Pedro 5:8) Dili pagtugoti ang Yawa nga himuon ini! Magdangop ka sa Manunuga sadtong minilyonmilyon ka mga galaksiya sa pag-ilis sang imo suplay sang espirituwal nga enerhiya. Sakdagon ka ni Jehova.—Salmo 37:17; 54:4.

11. Ano ang maton-an naton sa kon paano gin-atubang ni David ang mga palaligban?

¹¹ Sang gin-atubang sing mga palaligban, pirme nasapwan ni David nga si Jehova tuboran sang bag-o nga kusog. Ginpapagsik sang balaan nga espiritu, nasarangan ni David nga ‘landason’ ang bisan anong pagpamatok. Nagsiling sia: “Kay paagi sa imo ginasalakay ko ang kabon; kag paagi sa akon Dios ginalumpat ko ang kuta.” Si David nagsiling man: “Paagi sa Dios magaisganan kita, kay sia amo ang magalinas sang aton mga kasumpong.” (Salmo 18:29; 60:12) Himuon man ina ni Jehova sa imo.

Awaya ang Espirituwal nga Kalapyo

12. (a) Ngaa dapat dayon dulaon ang espirituwal nga kalapyo? (b) Ano ang mga simtoma sang espirituwal nga kalapyo? (c) Ano nga mga aman ang ginhimo ni Jehova agod ipasag-uli yadtong nakapoy sa espirituwal?

¹² Dapat naton gilayon mahibaloan ang mga tanda sang espirituwal nga kalapyo kag nian mangin maabtik man sa paglandas sini. Ngaa? Bangod yadtong diutay lamang nga ‘nagapanikasog sing lakas nga makasulod sa ganhaan nga makitid,’ ukon yadtong mga manugdalagan nga nakalampas sa fin­ish line, ang makatigayon sing padya nga kabuhi nga walay katapusan. (Lucas 13:24; Filipos 3:12, 13) Binagbinaga ang kaupod nga kahon nga gintig-ulohan “Ang Pila ka Paagi sa Pag-away sa Espirituwal nga Kalapyo.” Nakita mo bala ang iban sang mga simtoma sa imo kaugalingon ukon sa katapo sang imo panimalay? Kon amo, himoa ang gilayon nga mga tikang agod makahimo sing mga pagbag-o. Papagsika ang imo espirituwalidad paagi sa pagkuha sing kusog gikan sa ginlista nga mga aman ni Jehova.

13, 14. (a) Ano nga mga halimbawa ang magabulig sa pagpabag-o sang aton espirituwal nga kusog? (b) Paano ang laygay gikan sa isa ka madugay na nga alagad ni Jehova magabulig sa aton nga magpabilin sa palumba?

¹³ Mabatoan mo ang huyog nga maglapyo paagi sa pag-ilog sa mga halimbawa sang mga madinalag-on nga mga alagad sang Dios sa rekord sang Biblia. Madamo, lalaki kag babayi, bata kag tigulang, ang nagbatas tubtob sa katapusan. Basaha ang tuhoy sa ila sa kasulatan subong sang sa Hebreo 11:4-40. Subong man, sa modernong tion, may yara kita madamong mahal nga mga kautoran nga lalaki kag babayi nga nagapadayon sa pag-alagad kay Jehova nga wala sing kakapoy.

¹⁴ Si George, nga nagapuyo sa nabagatnan nga bahin sang Estados Unidos, isa ka halimbawa sang Cristianong manugdalagan nga wala pagkapoya. Sa tapos sang kapin sa 50 ka tuig sa palumba sa kabuhi nga dayon, mabaskog gihapon sia. Ano nga laygay ang ginhatag niya sa aton?

“Makusog ko nga ginasiling, magpabilin sa organisasyon. Dumduma nga si Jesucristo, ang Isa nga Gintangdo ni Jehova, nagapalakat sang organisasyon. Gani indi magluya sing buot kon may isa ka tuman ka suod sa imo nga indi magmatutom. Kon may pila ka butang nga indi mo mahangpan sing bug-os ukon nabudlayan ka nga batunon, magsalig nga sa ulihi magaathag ini. Gindala kita sang organisasyon ni Jehova tubtob karon. Magsalig nga tuytuyan kita sini pasulod sa Bag-ong Sistema.”—Juan 6:66-68.

15. Kon ang maayo nga mga halimbawa nagapapagsik sa aton espiritu, ano ang dapat naton himuon?

¹⁵ Ayhan may pila sining mga hamili sa inyo kongregasyon ukon nakilala mo sila sa sirkito nga mga asambleya. Makigsugilanon sa ila. Magtuon gikan sa ila. Dugang pa, ang mga halimbawa sang iban pa nga mga matutom makita sa Yearbook, kag sa Ang Lalantawan, kag iban pa nga mga publikasyon sang Watch Tower. Basaha ini nga mga kasaysayan. Tan-awa kon paano ka makakuha sing kusog gikan sadto nga mga eksperiensia.

Mga Gulang—Mangin ‘Makapalig-on’

16. (a) Paano mabuligan sang mga gulang ang mga masigka Cristiano nga mapapasag-uli ang kusog? (b) Ano nga pangandam ang dapat nga himuon sang mga gulang kon nagahatag sing laygay ukon pagpalig-on?

¹⁶ Ang mga gulang sa kongregasyon dapat nga labi ka alisto sa pagbulig sa mga katapo nga nagapakita sang mga tanda sang pagluya. Ang Isaias 35:3 nagahatag sing matahom nga laygay sang magsiling: “Pabaskuga ninyo ang mga kamut nga maluya, kag lig-ona ang mga tuhod nga nagakurog.” Apang, mga gulang, paano ninyo himuon ang inyo bahin sa sina? Una, mangin mapanilagon. Hibaloa ang tunay nga kabangdanan sang dayag nga paghinay. Maghatag sing praktikal, Makasulatanhon nga mga panugda nga bagay para sa sina nga tawo. Apang, maghalong. Luyag mo palig-unon, indi paluyahon ang buot, sang imo utod.a Busa, indi pag-ipilit ang imo konsiensia sa iban, ukon ipiton ang isa nga sundon ang imo solusyon, ukon tawgon sia nga dihamtong nga Cristiano kon mangalag-ag sia nga batunon ang imo personal nga pagtamod. Indi nila luyag nga pahinayon ang ila masigka mga manugdalagan paagi sa pagtumpok sa ila sing dinakaigo nga mga kasugoan sa kongregasyon.—Ipaanggid ang Mateo 11:28, 29 sa Mateo 23:2-4.

17. Paano mabatoan sang mga gulang ang mga taktika ni Satanas nga gindesinyo sa pagpahinay ukon pagpaluya sa masigka Cristiano?

¹⁷ Ang mga gulang sarang makapahamtang sing matahom nga mga halimbawa subong mga sumulunod ni Cristo paagi sa gilayon nga pagdayaw sa mga katapo sang kongregasyon. Pabatyaga sila nga sila naluyagan kag kinahanglan sing hanuot! Ang sistema ni Satanas pirme handa nga pabatyagon ang Cristiano nga indi nagakabagay. Sa sini nga punto sang ila palumba sa kabuhi, kinahanglan sang aton mga kautoran ang mga abyan, indi ang mga kritiko, agod pahalipayon sila padulong sa kadalag-an. Halimbawa, sang ang isa ka gulang-gulang nga utod nga babayi nag-untat sa pagpayunir, ang iya tagipusuon puno gihapon sing handum nga magbalik sa bug-os tion nga pag-alagad. Apang indi sia mahimo makabalik bangod sang mga palaligban sa pangwarta. Bisan nga maayo ang tinutuyo sang isa ka gulang, ginpamangkot niya ini nga utod nga babayi, sa mamulayon nga paagi: “San-o ka magapayunir liwat?” Ang prangka nga sabat sini nga utod nagpakibot sa iya: “Kon mabayaran na sang akon bana ang arkila.” Wala mahibaloi sang gulang, apang sang ulihi nahibaloan niya, nga ang pagpayunir sang utod nga babayi ginagastuhan sang kinitaan sang iya bana. Apang sang ang amo sang iya bana nagpaobra sing dugang kag dugang nga trabaho nga kwestionable para sa isa ka Cristiano, ang konsiensia sang iya bana nagpahulag sa iya nga mangita sing iban nga obra. Bangod sang iya edad, nabudlayan sia nga makakita sing trabaho. Gani nag-obra na lamang sia sing mas manubo sing suweldo nga trabaho; sa amo,nagakinahanglan para sa iya asawa nga magtrabaho sing bug-os tion.

18. Sa anong paagi ang mga gulang “makapalig-on”?

¹⁸ Gikan sa nasambit na nga eksperiensia, hangpon bala naton ini nga ang mga gulang magapangalag-ag sa paglaygay sa masigka Cristiano? Indi. Sa baylo, kon ginakinahanglan ang laygay ukon pagpalig-on, dapat hantupon sang mga gulang ang aktuwal nga kahimtangan sang ila mga utod kag indi lamang tan-awon ang nagguwa nga kahimtangan. (Santiago 2:15, 16) Sa sining paagi, ang mga gulang sarang mangin “makapalig-on” sa ila kongregasyon.—Colosas 4:11.

19. Ano ang imo himuon agod buligan ang mga payunir nga indi paglapyuon?

¹⁹ Madamo nga mga manugbantala sang Ginharian ang nagdasig sa ila pagdalagan kag mga regular na karon. Ang gahod sang kadam-an sarang makapabakud sa mga manugdalagan sa maraton agod mapasag-uli ang kusog. Gani, ano ang imo ginahimo agod pahalipayon padulong sa kadalag-an ang mga payunir sa imo kongregasyon? Sanday Doug kag Jo­anne naghimo sang bug-os tion nga pag-alagad nga karera sang ila kabuhi. Makapaluya sing buot kon pamangkuton sila sang iban, “San-o kamo magabata?” ukon, “San-o ka mangasawa ukon mamana?” Apang, ano ang matabo kon ang mga masigka Saksi magahatag sing moral nga pagsakdag paagi sa pagsiling, “Padayona ang inyo maayo nga binuhatan. Nalipay kami nga kamo mga payunir sa amon kongregasyon”? Ti, wala lamang nila ginalikawan ang espirituwal nga kalapyo, kundi ginabuligan nga magtimbuok kaangay sang mga agila sa ila payunir nga pag-alagad!—Ipaanggid ang Isaias 40:31.

Kon Paano Mapasag-uli sang mga Payunir ang Kusog

20, 21. Paano ang iban nga yara sa bug-os tion nga pag-alagad nakapapasag-uli sang kusog?

²⁰ Pamatii ini nga mag-asawa, sanday Frede­rick kag Marian. Nahibaloan nila kon paano ipasag-uli ang kusog. Lunsay sila mga misyonero nga nagaalagad sa isa ka pungsod sa Central America, kag lunsay sila mga setentahon na. Nagsugod si Frede­rick sang iya pagkamisyonero sang 1946, si Marian sang 1950. Ano ang nagbulig sa ila nga magpadayon sa pag-alagad kay Jehova? Si Frede­rick nagasabat: “Dugang sa gugma kay Jehova kag sa handum nga buligan ang iban nga katawhan, amo ini ang pagdumdum pirme sang lalambuton nga kabuhi nga walay katapusan.” Ang iya asawa nagasabat nga ang ‘mga saad sang Dios amo ang nagapapadayon sa amon.’ Paano nila nalikawan ang paglapyo? “Bisan ano man ang imo asaynment,” laygay ni Frede­rick, “magmasaku sa sini.” Si Marian nagarekomendar sang “pagkamapinadayunon sa teokratikong hilikuton” kag nagadugang: “Samtang nagatigulang ka, indi mo na mahimo ang tanan nga luyag mo himuon. Nagapaakig ina sa akon, apang ginapakighambal ko ini kay Jehova sa pangamuyo.” Si Frede­rick nagahinakop paagi sa sining matahom nga laygay: “Nagapangamuyo kami kada gab-i kag nagapangabay kami kay Jehova nga buligan kami.”—1 Pedro 4:7.

²¹ Si Lavonia 67 anyos ang edad kag isa ka regular payunir sa sulod sang 20 na ka tuig. Sang nagligad nga tuig, naghinguyang sia sing 15 ka adlaw sa ospital kag nagapabulong gihapon bangod sang iya tagipusuon. Ang pagkapatay sang pila ka katapo sang iya panimalay, lakip ang iya bana kag amay, isa ka daku nga kasubo sa iya. Apang nagpadayon sia nga nagpanikasog. Paano niya napasag-uli ang iya kusog? “Ang pagpakigbahin sing labi sa pagbantala nga hilikuton isa gid ka bulig,” siling niya, “bangod kon magapakighambal ako sa iban tuhoy kay Jehova, ginadula sini sa akon hunahuna ang akon problema kag nagahatag sa akon sing kalinong kag kalipay nga nagahimo sang kabuhi nga takus ikabuhi.” Wala sia nagaplano nga mag-untat sa pagpayunir kundi nagasiling: “Ang pagtan-aw sa iban nga nagatuon nahanungod kay Jehova kag sa iya matahom nga mga katuyoan nagahatag sa akon sing daku nga kalipay amo kon ngaa wala ko ginahunahuna ang pag-untat sa pagpayunir.”—Binuhatan 20:35.

22. Agod magmadinalag-on sa palumba para sa kabuhi nga walay katapusan, ano ang dapat naton himuon sing padayon?

²² Makasarang man kita sa pagpanikasog subong mga payunir sa sining punto sang kabuhi ukon indi, kita tanan makapabilin nga suod sa Tuboran sang dinamiko nga enerhiya, si Jehova, kag sang iya organisasyon. Padayunon naton nga ipasag-uli ang kusog paagi sa pag-alagad sing maunungon sa aton Dios. Nian, kaangay kay Habacuc, makasiling kita: “Si Jehova nga Soberanong Ginuo amo ang akon kusog; kag ginahimo niya ang akon mga tiil subong sang mga usa.” (Habacuc 3:19) Busa indi kita magkapoy ukon maglapyo. Dumduma nga ang palumba halos manugtapos na. Malapit na kita sa lalambuton!

[Footnote]

Repaso nga mga Pamangkot

◻ Sin-o lamang ang hilway nga makakuha sing dinamiko nga enerhiya ni Jehova?

◻ Ano ang pila ka mga tanda sang espirituwal nga kalapyo?

◻ Ano nga mga aman ni Jehova ang magabulig sa aton nga mapanumbalik ang kusog?

◻ Paano mabuligan sang mga gulang kag sang iban pa sa kongregasyon ang mga payunir nga magpabilin sa “palumba”?

[Kahon sa pahina 19]

Ang Pila ka Paagi sa Pag-away sa Espirituwal nga Kalapyo

Mga Simtoma sang Kalapyo

◻ Wala sing pagpugong sa kaugalingon sa pagkaon, pag-inum, kag paglipaylipay

◻ Wala sing entusiasmo sa kamatuoran, kontento na sa kaugalingon nga espiritu

◻ Nagahunahuna sing serioso kag mapinadayunon nga mga duhaduha

◻ Nagapatumbaya sang pagpakig-upod sa mga miting sa kongregasyon

◻ Wala sing kakugi kag kalipay sa pag-alagad sa latagon

◻ Nangin sobra ka mamulayon sa mga gulang kag sa organisasyon

Mga Bulig sa Pagbatas

◻ Mangamuyo sing bulig paagi sa balaan nga espiritu—Lucas 11:13; Galacia 5:22, 23; 1 Pedro 4:7

◻ Personal nga pagtuon—Salmo 1:1, 2

◻ Pagpamalandong sa Makasulatanhon nga mga bagay—Salmo 77:12

◻ Regular nga pagtambong sa mga miting kag mga asambleya—Nehemias 8:1-3, 8, 10;

Hebreo 10:23-25

◻ Regular nga pagpakigbahin sa pag-alagad sa latagon—Binuhatan 20:18-21

◻ Espirituwal nga bulig gikan sa mga gulang sa kongregasyon, mga nagalakbay nga manugtatap—Roma 1:11, 12; Hebreo 13:17

[Mga Laragway sa pahina 17]

Si Jehova, ang Manunuga sang uniberso, nagabulig sa iya mga saksi sa pagpasag-uli sang kusog

[Ginkuhaan]

NASA photo