Isaias 40:31—“Ang mga Nagalaum kay Jehova Maulian sing Kusog”

“Apang ang mga nagalaum kay Jehova maulian sing kusog. Magalupad sila nga daw may mga pakpak sang agila. Magadalagan sila kag indi paglapyuon; magalakat sila kag indi pagkapuyon.”—Isaias 40:31, Bag-ong Kalibutan nga Badbad.

“Pero ang mga nagasalig sa GINOO makaangkon liwat sang kusog. Daw sa magalupad sila pareho sa agila; kon magdalagan sila indi sila pagkapuyon; kon maglakat sila indi sila pagluyahon.”—Isaias 40:31, Ang Pulong sang Dios.

Ginapasalig ni Jehovaa nga Dios ang iya mga sumilimba nga hatagan niya sila sing kusog para malampuwasan ukon mabatas nila ang ila mga problema.

“Ang mga nagalaum kay Jehova maulian sing kusog.” Ang mga nagalaum ukon nagasalig nga may ikasarang ang Dios nga buligan ang iya katawhan kag gusto gid niya ini himuon, makasalig nga suportahan gid niya sila. (Hulubaton 3:5, 6) Ginapabakod sang Dios ang iya mga sumilimba. Kag ang isa ka paagi nga ginahimo niya ini, amo ang paghatag sa ila sang iya balaan nga espiritu, ukon aktibo nga puersa.—Lucas 11:13

“Magalupad sila nga daw may mga pakpak sang agila.” Ginapakita sini nga ilustrasyon kon ano ang epekto sa isa ka tawo sang gahom sang Dios. Ginagamit sang agila ang huyop sang mainit nga hangin, nga ginatawag thermal, para makalupad sia sang mataas kag makapautaw-utaw. Kon mabatyagan sang agila ang isa ka thermal, ginahumlad niya dayon ang iya mga pakpak kag nagalibotlibot sa sini, amo nga amat-amat sia nga ginadala sang hangin paibabaw. Nagasaylosaylo ang agila sa mga thermal, gani makalupad sia sing inoras nga wala ginakapoy.

“Magadalagan sila kag indi paglapyuon.” Bangod sa mga problema, ginalapyo kita kag nagaluya ang aton buot. Pero ginabuligan kita sang gahom sang Dios nga mangin mabakod. Ginapabakod kita sini nga himuon ang insakto bisan pa mabudlay katama ang aton sitwasyon. Si apostol Pablo, nga nagbatas sang madamo nga kabudlayan, nagsulat: “Sa tanan nga butang may kusog ako paagi sa isa nga nagapabakod sa akon.”—Filipos 4:13.

Gintuytuyan sang Dios si propeta Isaias nga isulat ini nga pinamulong mga 2,700 ka tuig na ang nagligad. Ini nga teksto para gid sa tanan nga matutom nga alagad sang Dios. Pero mahimo nga ginpasulat ini ni Jehova para pabakuron ang mga Judiyo nga bihagon sa Babilonia sing 70 ka tuig. Sang nagbalik na sa ila pungsod ang mga Judiyo nga gintapok, naeksperiensiahan nila nga natuman gid ang ginsiling sang Dios. (Isaias 40:1-3) Ginhatagan sila sang Dios sing kusog para malampuwasan nila ang malawig kag mabudlay nga paglakbayb halin sa Babilonia pakadto sa Jerusalem sang 537 B.C.E.—Isaias 40:29.