Kapitulo Dos

Makalipay nga Matagnaon nga mga Pulong nga Nagadalahig sa Imo

Isaias 41:1-29

 1. Ngaa dapat kita mangin interesado sa tagna ni Isaias?

GINSULAT ni Isaias ang tulun-an nga may ngalan niya halos 3,000 ka tuig na ang nagligad, apang mapuslanon gid ini karon para sa aton. Makatuon kita sing importante nga mga prinsipio gikan sa maragtason nga mga hitabo nga iya ginrekord. Kag mapalig-on naton ang aton pagtuo paagi sa pagtuon sa mga tagna nga ginsulat niya sa ngalan ni Jehova. Huo, si Isaias isa ka manalagna sang buhi nga Dios. Gin-inspirar sia ni Jehova nga isulat ang maragtas sing abanse​—agod ilaragway ang mga hitabo antes ini natabo. Sa amo, ginpasundayag ni Jehova nga sarang niya matagna kag madihon ang palaabuton. Sa tapos matun-an ang tulun-an sang Isaias, kumbinsido ang matuod nga mga Cristiano nga tumanon ni Jehova ang tanan nga ginsaad niya.

 2. Ano ang kahimtangan sa Jerusalem sang ginsulat ni Isaias ang iya matagnaon nga tulun-an, kag ano nga pagbag-o ang mahanabo?

² Sang tion nga natapos ni Isaias ang pagsulat sang iya tagna, nakalampuwas ang Jerusalem sa pagpamahog sang Asiria. Ang templo nagatindog gihapon, kag ginahimo sang katawhan ang ila adlaw-adlaw nga mga hilikuton subong sang ginahimo nila sa sulod sang ginatos ka tuig. Apang, magabag-o ina nga kahimtangan. Magaabot ang tion nga ang manggad sang Judiyo nga mga hari dalhon sa Babilonia kag ang lamharon nga mga Judiyo mangin mga opisyales sang palasyo sa amo nga siudad.a (Isaias 39:​6, 7) Natabo ini pagligad sang kapin sa 100 ka tuig.​—2 Hari 24:​12-17; Daniel 1:19.

 3. Ano nga mensahe ang makita sa Isaias kapitulo 41?

³ Apang, ang mensahe sang Dios paagi kay Isaias indi lamang isa ka mensahe sang paghukom. Ang kapitulo 40 sang iya tulun-an nagasugod sa pulong nga “Lipaya.”b Lipayon ang mga Judiyo sa pasalig nga sila ukon ang ila mga anak magabalik sa ila dutang natawhan. Ginapadayon sang kapitulo 41 ining makalipay nga mensahe kag nagatagna nga si Jehova magabangon sing isa ka gamhanan nga hari nga magatuman sang kabubut-on sang Dios. Nagaunod ini sing mga pasalig kag nagahatag sing pagpalig-on nga magsalig sa Dios. Ginabuyagyag man sini nga wala sing gahom ang butig nga mga dios nga ginasaligan sang katawhan sang mga pungsod. Ini tanan makapalig-on gid sang pagtuo, sang adlaw ni Isaias kag sa aton karon tion.

Ginahangkat ni Jehova ang mga Pungsod

 4. Paagi sa anong mga pulong ginhangkat ni Jehova ang mga pungsod?

⁴ Paagi sa iya manalagna, si Jehova nagasiling: “Talupangda ako sa kahipos, kamo nga kapuluan; kag magbag-o ang pungsudnon nga mga grupo sang ila kusog. Palapita sila. Sa amo nga tion pahambala sila. Magtipon kita sing tingob para sa paghukom.” (Isaias 41:1) Paagi sa sining mga pulong ginahangkat ni Jehova ang mga pungsod nga nagasumpong sa iya katawhan. Patinduga sila sa atubangan niya kag pahambala sila! Subong sang makita sa ulihi pa, si Jehova nagasugo sa sining mga pungsod, nga daw subong isa sia ka hukom sa hukmanan, nga maghatag sila sing pamatuod nga ang ila mga idolo mga dios matuod. May ikasarang bala ining mga dios sa pagtagna sing mga buhat sang pagluwas para sa ila mga sumilimba ukon sing mga paghukom batok sa ila mga kaaway? Kon matuod ini, matuman bala nila ining mga tagna? Indi ang sabat. Si Jehova lamang ang makahimo sining mga butang.

 5. Ipaathag kon paano ang mga tagna ni Isaias may kapin sa isa ka katumanan.

⁵ Samtang ginabinagbinag naton ang tagna ni Isaias, dumdumon naton nga, subong sang madamo nga tagna sa Biblia, ang iya mga pulong may kapin sa isa ka katumanan. Sang 607 B.C.E., ang Juda nangin bihag sa Babilonia. Apang, ginapahayag sang tagna ni Isaias nga hilwayon ni Jehova ang mga Israelinhon nga nabihag didto. Natabo ini sang 537 B.C.E. Yadto nga paghilway may kaanggid sa maaga nga mga bahin sang ika-20 nga siglo. Sa tion sang nahauna nga bug-os kalibutan nga inaway, ang hinaplas nga mga alagad ni Jehova sa duta nakaagi sing isa ka hut-ong sang kapipit-an. Sang 1918, bangod sang pag-ipit sang kalibutan ni Satanas​—nga ginsugyot sang Cristiandad subong nagapanguna nga bahin sang Babilonia nga Daku​—​ang organisado nga pagbantala sing maayong balita halos nagdulog. (Bugna 11:​5-10) Ang pila sang responsable nga mga opisyales sang Watch Tower Society ginbilanggo sa butig nga mga panumbungon. Daw nagmadinalag-on ang kalibutan sa iya pagpakig-away batok sa mga alagad sang Dios. Nian, subong sang natabo anay sang 537 B.C.E., hinali nga ginhilway sila ni Jehova. Sang 1919 ang nabilanggo nga mga opisyales ginpaguwa, kag sang ulihi ang mga panumbungon batok sa ila ginbawi. Ang kombension sa Cedar Point, Ohio, sang Septiembre 1919 nagpapagsik liwat sa mga alagad ni Jehova nga padayunon ang hilikuton nga pagbantala sing maayong balita sang Ginharian. (Bugna 11:​11, 12) Kutob sadto tubtob karon, ang kasangkaron sina nga hilikuton sa pagbantala talalupangdon nga nag-uswag. Dugang pa, madamo sang mga pulong ni Isaias ang dalayawon nga matuman sa Paraiso nga duta nga magaabot. Busa, ang madugay na nga mga pulong ni Isaias nagadalahig sa tanan nga pungsod kag katawhan karon.

Gintawag ang Manluluwas

 6. Paano ginalaragway sang manalagna ang isa ka palaabuton nga mandadaug?

⁶ Paagi kay Isaias, gintagna ni Jehova ang isa ka mandadaug nga magaluwas sa katawhan sang Dios gikan sa Babilonia kag magadala sing paghukom sa ila mga kaaway. Si Jehova namangkot: “Sin-o ang nagpukaw sa isa gikan sa ginabutlakan sang adlaw? Sin-o sa pagkamatarong ang nagtawag sa iya sa tiilan Niya, agod ihatag sa atubangan niya ang mga pungsod, kag agod pukanon niya bisan ang mga hari? Sin-o ang nagahatag sa ila sa iya espada nga subong sang yab-ok, amo kon ngaa subong sang ginalaban nga ginapalis sila sang iya pana? Sin-o ang nagalagas sa ila, nga nagaagi sing malinong sa dalanon nga wala niya maagihi? Sin-o ang naghulag kag naghimo sini, nga nagtawag sa mga kaliwatan kutob sa kamunuan? Ako, si Jehova, ang Una; kag sa mga ulihi ako amo gihapon.”​—Isaias 41:​2-4.

 7. Sin-o ang manug-abot nga mandadaug, kag ano ang iya ginhimo?

⁷ Sin-o ang pukawon gikan sa ginabutlakan sang adlaw, gikan sa nasidlangan nga mga bahin? Ang mga pungsod sang Medo-Persia kag Elam nahamtang sa sidlangan sang Babilonia. Gikan didto nagmartsa si Ciro nga Persianhon, upod sa iya gamhanan nga mga hangaway. (Isaias 41:​25; 44:​28; 45:​1-4, 13; 46:11) Bisan pa si Ciro indi sumilimba ni Jehova, nagpanghikot sia nahisanto sa kabubut-on ni Jehova, ang matarong nga Dios. Ginsakop ni Ciro ang mga hari, kag ginlapta ini sila subong sang yab-ok sa atubangan niya. Sa pagpadayon sang iya pagpangdaug, nag-agi sia “sing malinong,” ukon sing walay peligro, sa mga banas nga sa kinaandan wala ginaagihan, nga ginalandas ang tanan nga mga balagbag. Sang tuig 539 B.C.E., nakalab-ot si Ciro sa gamhanan nga siudad sang Babilonia kag ginpukan niya ini. Subong resulta, ginhilway ang katawhan sang Dios, agod nga makabalik sila sa Jerusalem kag tukuron liwat ang matuod nga pagsimba didto.​—Esdras 1:​1-7.c

 8. Ano ang butang nga si Jehova lamang ang makahimo?

⁸ Sa amo, paagi kay Isaias, gintagna ni Jehova ang pagbangon ni Ciro madugay na antes pa matawo ini nga hari. Ang matuod nga Dios lamang ang sibu nga makatagna sini nga sahi sang butang. Wala sing katupong si Jehova sa tunga sang butig nga mga dios sang mga pungsod. May maayo nga rason nga si Jehova nagsiling: “Indi ko pag-ihatag sa iban ang akon himaya.” Si Jehova lamang ang maminatud-on nga makasiling: “Ako ang nahauna kag ako ang katapusan, kag luwas sa akon wala na sing Dios.”​—Isaias 42:​8; 44:​6, 7.

Ang Hinadlukan nga Katawhan Nagasalig sa mga Idolo

9-11. Ano ang nangin reaksion sang mga pungsod sa pagsalakay ni Ciro?

⁹ Ginlaragway karon ni Isaias ang reaksion sang mga pungsod sa sining palaabuton nga mandadaug: “Ang kapuluan nakakita kag hinadlukan. Ang mga ukbong mismo sang duta nagkurog. Nagpalapit sila kag nagpadayon sa pag-abot. Nagbuligay ang tagsa sa iya kaupod, kag ang isa nagasiling sa iya utod: ‘Magpakabakod ka.’ Gani ang batid nga manugpangabudlay nagpalig-on sa platero; ang isa nga nagamaso agod magtapan sia nga nagamaso sa landasan, nga nagasiling tuhoy sa pagsolda: ‘Maayo ini.’ Sa katapusan may isa nga nagtakod sini paagi sa mga lansang agod nga indi ini maghunga.”​—Isaias 41:5-7.

¹⁰ Mga 200 ka tuig sa wala pa, gin-usisa ni Jehova ang matabo sa kalibutan sa palaabuton. Ang gamhanan nga mga hangaway sa idalom ni Ciro madasig nga nagasalakay, nga ginadaug ang tanan nga nagabato. Ang katawhan​—bisan ang mga pumuluyo sa kapuluan, ang mga nagapuyo sa malayo gid nga mga duog—​nagakurog sa iya pagpalapit. Sa kahadlok nagbuyluganay sila agod batuan ang isa nga gintawag ni Jehova gikan sa sidlangan nga magdala sing paghukom. Nagpalig-unay sila, nga nagasiling: “Magpakabakod ka.”

¹¹ Ang batid nga mga manugpangabudlay nagabuligay sa paghimo sing idolo nga mga dios agod magluwas sa katawhan. Ang panday nagahimo sing kahoy nga kuwadro, kag nagapangabay sa platero nga haklapan ini sing metal, ayhan sing bulawan. Ginapapa sang eskultor ang metal agod magtapan kag nahamuot sia sa pagsolda sini. Ayhan mayubiton nga ginasambit nga ginlansangan ini agod nga indi ini maghunga ukon mapalos, subong sang idolo ni Dagon nga napukan sa atubangan sang kaban ni Jehova.​—1 Samuel 5:4.

Indi Magkahadlok!

12. Ano nga pasalig ang ginhatag ni Jehova sa Israel?

¹² Ginliso karon ni Jehova ang iya igtalupangod sa iya katawhan. Indi kaangay sang mga pungsod nga nagasalig sa walay kabuhi nga mga idolo, ang mga nagasalig sa matuod nga Dios indi dapat mahadlok. Ang pagpasalig ni Jehova nagasugod paagi sa pagpahanumdom nga ang Israel kaliwat sang iya abyan nga si Abraham. Paagi sa mapinalanggaon gid nga mga pulong, ginsugid ni Isaias ang ginsiling ni Jehova: “Ikaw, O Israel, akon alagad, ikaw, O Jacob, nga akon ginpili, ang binhi ni Abraham nga akon abyan; ikaw, nga ginkaptan ko gikan sa mga ukbong sang duta, kag ikaw, nga gintawag ko gikan sa malayo nga mga bahin sini. Kag gani nagsiling ako sa imo, ‘Ikaw akon alagad; ginpili ko ikaw, kag wala ko ikaw ginsikway. Dili ka mahadlok, kay ako nagaupod sa imo. Dili ka manghulonghulong, kay ako ang imo Dios. Palig-unon ko ikaw. Buligan ko gid ikaw. Alay-ayon ko gid ikaw sang akon tuo nga kamot sang pagkamatarong.’ ”​—Isaias 41:​8-10.

13. Ngaa ang mga pulong ni Jehova mangin paglipay sa nabihag nga mga Judiyo?

¹³ Mangin makalipay gid ining mga pulong para sa matutom nga mga Judiyo nga nabihag sa iban nga pungsod! Makapalig-on gid nga mabatian nga ginatawag sila ni Jehova nga “akon alagad” sa tion nga sila mga bihag, mga alagad sang hari sang Babilonia! (2 Cronica 36:20) Bisan pa disiplinahon sila ni Jehova bangod sang ila pagkadimatutom, indi niya pagsikwayon sila. Ang Israel iya ni Jehova, indi sang Babilonia. Wala sing rason nga magkurog ang mga alagad sang Dios sa pagpalapit sang mandadaug nga si Ciro. Si Jehova magaupod sa iya katawhan agod buligan sila.

14. Paano ang mga pulong ni Jehova sa Israel nagalipay sa mga alagad sang Dios karon?

¹⁴ Yadtong mga pulong nagpasalig kag nagpalig-on sa mga alagad sang Dios bisan tubtob sa aton adlaw. Sadto sang 1918 ginkalangkagan nila nga mahibaluan ang kabubut-on ni Jehova para sa ila. Nalangkag sila nga hilwayon gikan sa ila nabihag nga kahimtangan sa espirituwal. Ginakalangkagan naton karon ang paumpaw gikan sa mga pag-ipit sa aton ni Satanas, sang kalibutan, kag sang aton mismo pagkadihimpit. Apang ginaapresyar naton nga nahibaluan ni Jehova sing sibu kon san-o kag kon paano sia magahikot para sa iya katawhan. Kaangay sang magamay nga kabataan, nagauyat kita sa iya gamhanan nga kamot, nagasalig nga buligan niya kita sa pagbatas. (Salmo 63:​7, 8) Ginapakabahandi ni Jehova ang mga nagaalagad sa iya. Ginasakdag niya kita karon subong nga ginsakdag niya anay ang iya katawhan sa mabudlay nga mga tion sang 1918-19 kag subong nga ginsakdag niya ang matutom nga mga Israelinhon sang madugay na nga tion.

15, 16. (a) Ano ang mahanabo sa mga kaaway sang Israel, kag sa anong mga paagi ang Israel nagaanggid sa ulod? (b) Bangod sang anong nagahilapit nga pagsalakay nga ang mga pulong ni Jehova ilabi na nga makapalig-on karon?

¹⁵ Binagbinaga ang masunod nga ginsiling ni Jehova paagi kay Isaias: “ ‘Yari karon! Ang tanan nga nagasingkal batok sa imo mahuy-an kag paubson. Ang mga tawo nga nagaaway sa imo mangin subong sang walay pulos kag malaglag. Pangitaon mo sila, apang indi mo sila makita, inang mga tawo nga nagapakigsumpong sa imo. Mangin subong sila sang wala nagaluntad kag subong sang butang nga walay pulos, inang mga tawo nga nagapakig-away sa imo. Kay ako, si Jehova nga imo Dios, magauyat sang imo kamot nga tuo, ang Isa nga nagasiling sa imo, “Dili magkahadlok. Ako gid magatabang sa imo.” Dili magkahadlok, ikaw nga ulod nga Jacob, kamo nga mga tawo sang Israel. Ako magatabang sa imo,’ siling ni Jehova, nga imo gid Manunubos, ang Balaan sang Israel.”​—Isaias 41:​11-14.

¹⁶ Ang mga kaaway sang Israel indi magadaug. Ang mga nagasingkal batok sa Israel mahuy-an. Ang mga nagapakigsumpong sa ila malaglag. Bisan pa ang bihag nga mga Israelinhon daw maluya kag walay pangapin subong sang ulod nga nagakuritot sa yab-ok, buligan sila ni Jehova. Daw ano ini nga pagpalig-on sa “katapusan nga mga adlaw” samtang ginaatubang sang matuod nga mga Cristiano ang determinado nga pagpamatok sang madamo gid sa kalibutan! (2 Timoteo 3:1) Kag daw ano ka makapalig-on ang saad ni Jehova bangod sang nagahilapit nga pagsalakay ni Satanas, nga ginapatuhuyan sa tagna subong “Gog sang duta sang Magog”! Sa idalom sang mabangis nga pagsalakay ni Gog, ang katawhan ni Jehova mangin daw walay pangapin subong sang ulod​—isa ka katawhan nga “nagapuyo nga wala sing mga kuta” kag wala “bisan sing pintal kag mga ganhaan.” Apang, ang mga nagalaum kay Jehova indi dapat magkurog sa kahadlok. Ang Labing Gamhanan mismo magapakig-away agod luwason sila.​—Ezequiel 38:​2, 11, 14-16, 21-23; 2 Corinto 1:3.

Paglipay Para sa Israel

17, 18. Paano ginalaragway ni Isaias ang pagpabakod sa Israel, kag ano nga katumanan ang ginapasalig sa aton?

¹⁷ Nagpadayon si Jehova sa paglipay sa iya katawhan: “Yari karon! Ginhimo ko ikaw nga isa ka inuglinas nga karas, isa ka bag-o nga inuglinas nga instrumento nga may mga ngipon nga doble ang sulab. Tasakon mo ang mga bukid kag dugmukon sila; kag ang kabakuluran himuon mo subong sang labhang. Pahanginan mo sila, kag ang hangin magapalid sa ila, kag ang hangin sang bagyo magalapta sa ila. Kag magakalipay ka kay Jehova. Sa Balaan sang Israel ipabugal mo ang imo kaugalingon.”​—Isaias 41:​15, 16.

¹⁸ Hatagan sing kusog ang Israel agod makahikot sila kag, sa espirituwal nga kahulugan, agod madaug nila ang ila tulad-bukid nga mga kaaway. Sa pagbalik sang Israel gikan sa pagkabihag, daugon niya ang iya mga kaaway nga magapamalabag sa pagtukod liwat sang templo kag sang mga pader sang Jerusalem. (Esdras 6:​12; Nehemias 6:16) Apang, ang mga pulong ni Jehova matuman sa “Israel sang Dios” sa daku nga kasangkaron. (Galacia 6:16) Nagsaad si Jesus sa hinaplas nga mga Cristiano: “Sa nagadaug kag nagatuman sang akon mga buhat tubtob sa katapusan, sa iya ihatag ko ang pagbulut-an sa kapungsuran, kag dumalahan niya ang katawhan paagi sa bilugon nga salsalon agod nga dugmukon sila kaangay sang mga suludlan sang maninihon, subong sang nabaton ko gikan sa akon Amay.” (Bugna 2:​26, 27) Pat-od nga magaabot ang tion nga ang kauturan ni Cristo nga ginbanhaw padulong sa langitnon nga himaya makatigayon sing bahin sa paglaglag sa mga kaaway ni Jehova nga Dios.​—2 Tesalonica 1:​7, 8; Bugna 20:​4, 6.

19, 20. Ano ang ginsulat ni Isaias tuhoy sa pagpasag-uli sa Israel sa isa ka matahom nga duog, kag paano ini natuman?

¹⁹ Sa malaragwayon nga pulong, dugang pa nga ginpabakod karon ni Jehova ang iya saad nga buligan ang iya katawhan. Si Isaias nagsulat: “Ang mga nagaantos kag ang mga imol nagapangita sing tubig, apang wala. Bangod sa kauhaw ang ila dila nagamala. Ako mismo, si Jehova, magasabat sa ila. Ako, ang Dios sang Israel, indi magbiya sa ila. Sa upaw nga kabakuluran magabukas ako sing mga suba, kag sa tunga sang patag nga nalupyakan, sing mga tuburan. Himuon ko ang kahanayakan nga tabun-akon nga linaw sang tubig, kag ang kadutaan nga wala sing tubig nga mga tuburan sang tubig. Ipahamtang ko sa kahanayakan ang kahoy nga sedro, ang akasya kag ang mirto kag ang kahoy nga lana. Ibutang ko sa desyerto nga kapatagan ang junipero, ang fresno kag ang sipre sing dungan; agod ang mga tawo makakita kag makahibalo kag magtalupangod kag makatigayon sing paghantop sa amo man nga tion, nga ang kamot mismo ni Jehova ang naghimo sini, kag ang Balaan sang Israel ang nagtuga sini.”​—Isaias 41:​17-20.

²⁰ Bisan pa ang nabihag nga mga Israelinhon nagapuyo sa kapital nga siudad sang isa ka manggaranon nga kagamhanan sa kalibutan, para sa ila subong ini sang walay tubig nga desyerto. Daw kaangay kay David ang nabatyagan nila sang nagapanago sia gikan kay Hari Saul. Sang 537 B.C.E., ginbuksan ni Jehova ang dalan agod makabalik sila sa Juda kag tukuron liwat ang iya templo sa Jerusalem, sa amo mapasag-uli nila ang putli nga pagsimba. Nian, ginpakamaayo sila ni Jehova. Sa isa ka tagna sa ulihi pa, si Isaias nagtagna: “Pat-od nga lipayon ni Jehova ang Sion. Pat-od gid nga lipayon niya ang tanan niya nga nahapay nga mga duog, kag himuon niya ang iya kahanayakan kaangay sang Eden kag ang iya desyerto nga kapatagan kaangay sang hardin ni Jehova.” (Isaias 51:3) Natabo gid ini sa tapos magbalik ang mga Judiyo sa ila dutang natawhan.

21. Ano nga pagpasag-uli ang natabo sa modernong mga tion, kag ano ang mahanabo sa palaabuton?

²¹ Kaanggid sini nga butang ang natabo sa modernong mga tion sang ginhilway sang Daku Pa nga Ciro, si Cristo Jesus, ang iya hinaplas nga mga sumulunod gikan sa espirituwal nga pagkabihag agod mapasag-uli nila ang putli nga pagsimba. Ining mga matutom ginpakamaayo sing isa ka bugana nga espirituwal nga paraiso, isa ka malaragwayon nga hardin sang Eden. (Isaias 11:​6-9; 35:​1-7) Sa indi madugay, kon laglagon na sang Dios ang iya mga kaaway, ang bug-os nga duta himuon nga isa ka pisikal nga paraiso, subong sang ginsaad ni Jesus sa tawo nga malauton sa usok.​—Lucas 23:43.

Isa ka Hangkat sa mga Kaaway Sang Israel

22. Paagi sa anong mga pulong ginahangkat liwat ni Jehova ang mga pungsod?

²² Liwat nga ginbalikan karon ni Jehova ang iya pagpakigsuay batok sa mga pungsod kag sa ila idolo nga mga dios: “ ‘Ipasaka ang inyo ginapakigsuay nga butang,’ siling ni Jehova. ‘Ipaguwa ang inyo mga argumento,’ siling sang Hari ni Jacob. ‘Ipaguwa kag isugid sa amon ang mga butang nga mahanabo. Ang una nga mga butang​—kon ano ini​—​isugid ninyo, agod mahugod namon ang amon tagipusuon kag mahibaluan ang palaabuton sini. Ukon ipabati sa amon bisan ang mga butang nga magaabot. Isugid ang mga butang nga magaabot pagkatapos sina, agod mahibaluan namon nga kamo mga dios. Huo, dapat kamo maghimo sing maayo ukon maghimo sing malain, agod amon matan-aw kag makita ini sa amo man nga tion. Yari karon! Kamo mga butang nga wala nagaluntad, kag ang inyo hinimuan wala sing pulos. Makangilil-ad nga butang ang bisan sin-o nga nagapili sa inyo.’” (Isaias 41:​21-24) May ikasarang bala ang mga dios sang mga pungsod sa paghimo sing sibu nga tagna kag sa amo mapamatud-an nila nga sila may labaw sa kinaugali nga ihibalo? Kon may ikasarang sila, dapat nga may yara pila ka resulta, maayo man ukon malain, agod sakdagon ang ila mga pangangkon. Apang, ang matuod, ang idolo nga mga dios indi makahimo sing bisan ano kag subong lamang sang butang nga wala nagaluntad.

23. Ngaa ginpakamalaut gid ni Jehova, paagi sa iya mga manalagna, ang mga idolo?

²³ Sa aton adlaw mahimo nagakatingala ang iban kon ngaa si Jehova, paagi kay Isaias kag sa iya kaupod nga mga manalagna, nagahinguyang sing daku nga tion sa pagpakamalaut sa kabuangan sang idolatriya. Mahimo nga nahangpan sang madamo karon ang pagkawalay pulos sang hinimo-sang-tawo nga mga idolo. Apang, sa tion nga ang isa ka butig nga sistema sang pagtuluuhan establisado na kag lapnag nga ginabaton, mabudlay ini panason gikan sa hunahuna sang mga nagatuo sa sini. Madamo pa nga pagtuluuhan sa sulod sang isa ka hut-ong sang tion ang subong ka walay pulos sa pagtuluuhan nga ang walay kabuhi nga mga imahen mga dios gid. Apang, ang mga tawo nagapanguyapot sa sining mga pagtuluuhan walay sapayan sang makakumbinsi nga mga argumento batok sa sini. Paagi lamang sa pagpamati sa kamatuoran sa liwat kag liwat nga ang iban napahulag nga mahangpan ang kaalam sang pagsalig kay Jehova.

24, 25. Paano ginapatuhuyan liwat ni Jehova si Ciro, kag anong iban pa nga tagna ang ginapahanumdom sini sa aton?

²⁴ Nagpatuhoy liwat si Jehova kay Ciro: “May ginbangon ako gikan sa aminhan, kag sia magaabot. Gikan sa ginabutlakan sang adlaw magapanawag sia sa akon ngalan. Kag magakadto sia sa tiglawas nga mga manuggahom subong nga daw daga sila kag subong isa ka maninihon nga nagatasak sa lunang.” (Isaias 41:25)d Tuhay sa mga dios sang mga pungsod, si Jehova makahimo sing mga butang. Sa tion nga tawgon niya si Ciro gikan sa sidlangan, gikan sa “ginabutlakan sang adlaw,” ipasundayag sang Dios ang iya ikasarang sa pagtagna kag dayon sa pagdihon sang palaabuton agod matuman ang iya gintagna.

²⁵ Ining mga pulong nagapahanumdom sa aton sang matagnaon nga paglaragway ni apostol Juan sa mga hari nga pukawon sa paghikot sa aton tion. Sa Bugna 16:​12, mabasa naton nga ang dalan ihanda “para sa mga hari gikan sa ginabutlakan sang adlaw.” Ining mga hari wala sing liwan kundi si Jehova nga Dios kag si Jesucristo. Subong nga ginhilway ni Ciro ang katawhan sang Dios sang una, laglagon sining mas gamhanan gid nga mga hari ang mga kaaway ni Jehova kag bantayan ang iya katawhan sa dakung kapipit-an padulong sa isa ka matarong nga bag-ong kalibutan.​—Salmo 2:​8, 9; 2 Pedro 3:​13; Bugna 7:​14-17.

Supremo si Jehova!

26. Ano ang ginapamangkot karon ni Jehova, kag nasabat bala ini?

²⁶ Sa liwat, ginpahayag ni Jehova ang kamatuoran nga sia lamang ang matuod nga Dios. Namangkot sia: “Sin-o ang nagsugid sing bisan anong butang kutob sa ginsuguran, agod mahibaluan namon, ukon kutob sadtong mga tion nga nagligad, agod masiling namon, ‘Husto sia’? Sa pagkamatuod wala sing nagasugid. Sa pagkamatuod wala sing nagapabati. Sa pagkamatuod wala sing nakabati sing bisan ano sang inyo mga pinamulong.” (Isaias 41:26) Wala sing idolo nga dios ang nagpahibalo sang pag-abot sang isa ka mandadaug agod hilwayon ang mga nagasalig sa sini. Ini tanan nga sahi sang dios wala sing kabuhi, mahipos. Indi gid sila mga dios.

27, 28. Anong importante nga kamatuoran ang ginapadaku sang nagahinakop nga mga bersikulo sang Isaias 41, kag sin-o lamang ang nagabantala sini?

²⁷ Sa tapos masugid ining makapulukaw nga matagnaon nga mga pulong ni Jehova, ginpadaku ni Isaias ang isa ka importante nga kamatuoran: “May isa nga una, nga nagasiling sa Sion: ‘Tuluka! Yari sila!’ kag hatagan ko ang Jerusalem sing isa ka manugdala sing maayong balita. Kag nagpadayon ako sa pagtan-aw, kag wala sing tawo; kag gikan sa sini wala man sing isa nga nagahatag sing laygay. Kag nagpadayon ako sa pagpamangkot sa ila, agod magsabat sila. Yari karon! Sila tanan butang nga wala nagaluntad. Ang ila mga binuhatan wala sing pulos. Ang ila mga larawan nga tinunaw hangin kag di-matuod.”​—Isaias 41:​27-29.

²⁸ Si Jehova ang una. Supremo sia! Sia ang matuod nga Dios, nga nagapahibalo sang kahilwayan sang iya katawhan, nga nagadala sing maayong balita sa ila. Kag ang iya mga Saksi lamang ang nagabantala sang iya pagkadaku sa mga pungsod. Sing mayubiton, ginapakamalaut ni Jehova ang mga nagasalig sa pagsimba sa mga idolo, kag ginasikway ang ila mga idolo subong “hangin kag di-matuod.” Daw ano kabakod nga rason nga magpanguyapot kita sa matuod nga Dios! Si Jehova lamang ang takus nga saligan naton sing bug-os.

[Mga nota]

[Piktyur sa pahina 19]

Si Ciro, bisan pa isa ka pagano, ginpili sa paghimo sang hilikuton sang Dios

[Piktyur sa pahina 21]

Ang mga pungsod nagasalig sa walay kabuhi nga mga idolo

[Piktyur sa pahina 27]

Ang Israel, kaangay sang “isa ka inuglinas nga karas,” ‘magadugmok sa mga bukid’