Kapitulo Dies

“Isa ka Tion Sang Maayong Kabubut-on”

Isaias 49:​1-​26

1, 2. (a) Ano nga pagpakamaayo ang natigayon ni Isaias? (b) Sin-o ang mga nadalahig sa matagnaon nga mga pulong nga narekord sa una nga katunga sang Isaias kapitulo 49?

ANG tanan nga matutom nga tawo madugay na nga ginakahamut-an kag ginaamligan sang Dios. Apang wala ginapakita ni Jehova ang iya maayong kabubut-on bisan kay sin-o lang. Dapat mangin kalipikado ang isa ka tawo sa sining walay kaanggid nga pagpakamaayo. Si Isaias isa sini. Ginkahamut-an sia sang Dios kag gingamit ni Jehova subong isa ka instrumento sa pagpahibalo sang Iya kabubut-on sa iban. Ang isa ka halimbawa sini narekord sa una nga katunga sang kapitulo 49 sang tagna ni Isaias.

² Ining mga pulong matagnaon nga ginapatuhoy sa binhi ni Abraham. Sa una nga katumanan, yadto nga binhi amo ang pungsod sang Israel, nga naghalin kay Abraham. Apang, ang daku nga bahin sang pinamulong maathag nga naaplikar sa madugay na ginlauman nga Binhi ni Abraham, ang ginsaad nga Mesias. Ang inspirado nga mga pulong naaplikar man sa espirituwal nga kauturan sang Mesias, nga nangin bahin sang espirituwal nga binhi ni Abraham kag sang “Israel sang Dios.” (Galacia 3:​7, 16, 29; 6:16) Partikular nga ginalaragway sini nga bahin sang tagna ni Isaias ang pinasahi nga kaangtanan ni Jehova kag sang iya hinigugma nga Anak, si Jesucristo.​​—Isaias 49:26.

Gintangdo kag Gin-amligan ni Jehova

3, 4. (a) Sin-o ang nagasakdag sa Mesias? (b) Kay sin-o nagapakighambal ang Mesias?

³ Ginpakitaan sang Dios ang Mesias sang iya maayong kabubut-on, ukon kahamuot. Ginhatagan sia ni Jehova sing awtoridad kag mga pamatuod nga kinahanglanon sa pagtuman sang iya misyon. Nagakaigo nian, nga ang palaabuton nga Mesias nagsiling: “Pamati sa akon, O kamo nga kapuluan, kag magtalupangod, kamo nga pungsudnon nga mga grupo sa malayo. Gintawag ako ni Jehova gikan pa sa tiyan. Gikan sa nasulod nga mga bahin sang akon iloy ginsambit niya ang akon ngalan.”​—Isaias 49:1.

⁴ Ginapatuhoy diri sang Mesias ang iya mga pulong sa mga katawhan gikan “sa malayo.” Bisan pa ang Mesias ginsaad sa Judiyong katawhan, ang iya ministeryo magapakamaayo sa tanan nga pungsod. (Mateo 25:​31-​33) Ang “kapuluan” kag ang “pungsudnon nga mga grupo,” bisan pa wala makigkatipan kay Jehova, dapat mamati sa Mesias sang Israel bangod ginpadala sia agod magdala sing kaluwasan sa tanan nga katawhan.

 5. Ano ang ngalan sang Mesias bisan sa wala pa sia matawo?

⁵ Ang tagna nagasiling nga hingadlan ni Jehova ang Mesias antes sia matawo. (Mateo 1:​21; Lucas 1:31) Madugay pa antes sia matawo, ginhingalanan si Jesus nga “Makatilingala nga Manuglaygay, Gamhanan nga Dios, Dayon nga Amay, Prinsipe sang Paghidait.” (Isaias 9:6) Ang Emmanuel nga mahimo ngalan sang anak ni Isaias, nangin isa man ka matagnaon nga ngalan sang Mesias. (Isaias 7:​14; Mateo 1:​21-​23) Bisan gani ang ngalan nga paagi sa amo makilala ang Mesias​​—ang Jesus​—​gintagna antes sia matawo. (Lucas 1:​30, 31) Ini nga ngalan naghalin sa Hebreong tinaga nga nagakahulugan sing “Si Jehova Amo ang Kaluwasan.” Maathag nga si Jesus indi isa ka nagtangdo-sa-kaugalingon nga Cristo.

 6. Sa anong paagi ang baba sang Mesias kaangay sang isa ka matalom nga espada, kag paano sia ginatago?

⁶ Ang matagnaon nga mga pulong sang Mesias nagpadayon: “Kag ginhimo niya ang akon baba nga kaangay sang isa ka matalom nga espada. Sa landong sang iya kamot gintago niya ako. Kag amat-amat nga ginhimo niya ako nga isa ka ginpahining nga baslay. Gintago niya ako sa iya kaugalingon nga baslayan.” (Isaias 49:2) Sa pag-abot sang tion nga sugdan sang Mesias ni Jehova ang iya ministeryo sa duta sa 29 C.E., ang mga pulong kag mga buhat ni Jesus mangin subong gid sang matalom, napahining nga mga hinganiban, nga sarang makalapos sa tagipusuon sang iya mga manugpalamati. (Lucas 4:​31, 32) Ang iya mga pulong kag mga buhat magapaibwal sa kasingkal sang daku nga kaaway ni Jehova, si Satanas, kag ang iya mga ahente. Kutob sa pagkatawo ni Jesus, magatinguha si Satanas nga kutlon ang Iya kabuhi, apang si Jesus kaanggid sa isa ka baslay nga natago sa baslayan mismo ni Jehova.a Makasalig sia sa pag-amlig sang iya Amay. (Salmo 91:​1; Lucas 1:35) Sa gintalana nga tion, ihatag ni Jesus ang iya kabuhi para sa katawhan. Apang magaabot ang tion nga magakari sia subong isa ka gamhanan nga langitnon nga hangaway nga naarmasan sa tuhay nga kahulugan, sing isa ka matalom nga espada nga nagaguwa sa iya baba. Sini nga tion, ang matalom nga espada nagalaragway sa awtoridad ni Jesus sa paghatag kag sa paghikot sing mga paghukom batok sa mga kaaway ni Jehova.​—Bugna 1:16.

Ang mga Pagpangabudlay Sang Alagad Sang Dios Indi sa Walay Pulos

 7. Kay sin-o naaplikar ang mga pulong ni Jehova sa Isaias 49:​3, kag ngaa?

⁷ Ginpamulong karon ni Jehova ining matagnaon nga mga pulong: “Ikaw akon alagad, O Israel, ikaw nga pakitaan ko sang akon katahom.” (Isaias 49:3) Ginapatuhuyan ni Jehova ang pungsod sang Israel subong iya alagad. (Isaias 41:8) Apang si Jesucristo amo ang nagapanguna nga Alagad sang Dios. (Binuhatan 3:13) Wala sing bisan sin-o sa mga tinuga sang Dios ang makapabanaag sang “katahom” ni Jehova nga labi pa kay Jesus. Busa, bisan pa literal nga ginapatuhoy sa Israel, ining mga pulong matuod nga naaplikar kay Jesus.​​—Juan 14:​9; Colosas 1:15.

 8. Ano ang reaksion sang mga kasimanwa sang Mesias sa iya, apang sin-o ang ginapaabot sang Mesias nga magahukom sa iya kadalag-an?

⁸ Apang, indi bala matuod nga si Jesus gintamay kag ginsikway sang kalabanan sang iya mga kasimanwa? Huo. Sa kabilugan, wala pagbatuna sang pungsod sang Israel si Jesus subong hinaplas nga Alagad sang Dios. (Juan 1:11) Para sa mga katubotubo ni Jesus, ang tanan nga nahimuan niya sang diri sia sa duta mahimo nga daw diutay lamang sing balor, indi pa gani talalupangdon. Ining daw kapaslawan sa iya ministeryo amo ang masunod nga ginpatuhuyan sang Mesias: “Nagpangabudlay ako sa wala sing pulos. Gin-ubos ko ang akon kusog sa di-matuod kag walay kapuslanan.” (Isaias 49:​4a) Ining mga pinamulong wala ginasambit bangod ang Mesias ginluyahan sing buot. Binagbinaga ang masunod nga ginsiling niya: “Sa pagkamatuod ang akon paghukom yara kay Jehova, kag ang akon kabayaran yara sa akon Dios.” (Isaias 49:​4b) Ang kadalag-an sang Mesias pagahukman, indi sang mga tawo, kundi sang Dios.

9, 10. (a) Ano ang komisyon sang Mesias gikan kay Jehova, kag ano nga mga resulta ang matigayon niya? (b) Paano ang mga Cristiano karon mapalig-on sang mga inagihan sang Mesias?

⁹ Interesado si Jesus labi na sa kahamuot ukon maayong kabubut-on sang Dios. Sa tagna, ang Mesias nagsiling: “Karon si Jehova, ang Isa nga naghuman sa akon gikan sa tiyan subong iya alagad, nagsiling nga ibalik ko si Jacob sa iya, agod ang Israel matipon sa iya. Kag himayaon ako sa mga mata ni Jehova, kag ang akon Dios mangin akon kusog.” (Isaias 49:5) Magakari ang Mesias agod ipasag-uli ang tagipusuon sang mga anak sang Israel sa ila langitnon nga Amay. Pila lamang ang magasunod. Apang, ang iya matuod nga kabayaran magagikan kay Jehova nga Dios. Ang iya kadalag-an wala ginatakus, suno sa talaksan sang tawo, kundi suno sa mga talaksan mismo ni Jehova.

¹⁰ Sa karon, mahimo ginabatyag kon kaisa sang mga sumulunod ni Jesus nga daw nagapangabudlay sila sa walay pulos. Sa pila ka duog, ang mga resulta sang ila ministeryo daw sa wala lamang kon ipaanggid sa kadakuon sang pagpangabudlay kag panikasog nga ginahinguyang. Apang, nagabatas sila gihapon, kay napalig-on sila sang huwaran ni Jesus. Ginapalig-on man sila sang mga pulong ni apostol Pablo, nga nagsulat: “Busa, mga kauturan ko nga hinigugma, magpakalig-on kamo, nga di-mationg, nga madamo pirme sing ginahimo sa hilikuton sang Ginuo, kay nahibaluan ninyo nga ang inyo pagpangabudlay may kaangtanan sa Ginuo indi walay pulos.”​​—1 Corinto 15:58.

“Kapawa Sang mga Pungsod”

11, 12. Paano ang Mesias nangin “kapawa sang mga pungsod”?

¹¹ Sa tagna ni Isaias, ginpalig-on ni Jehova ang Mesias paagi sa pagpahanumdom sa iya nga ang mangin Alagad sang Dios indi isa ka “diutay nga butang.” Magahikot si Jesus “agod bangunon ang mga tribo ni Jacob kag agod ibalik ang mga tinipigan sa Israel.” Nagpaathag pa si Jehova: “Ginhatag ko man ikaw nga kapawa sang mga pungsod, agod nga ang akon pagluwas mangin tubtob sa ukbong sang duta.” (Isaias 49:6) Paano ginaiwagan ni Jesus ang katawhan “tubtob sa ukbong sang duta” samtang sa Israel lamang sia nagministeryo sa duta?

¹² Ginapakita sang rekord sang Biblia nga ang “kapawa sang mga pungsod” sang Dios wala mapalong sang magbiya si Jesus sa duta. Mga 15 ka tuig sa tapos mapatay si Jesus, ginbalikwat sang mga misyonero nga sanday Pablo kag Bernabe ang tagna sang Isaias 49:6 kag gin-aplikar ini sa mga disipulo ni Jesus, ang iya espirituwal nga kauturan. Sila nagpaathag: “Si Jehova naghatag sing sugo sa amon sa sining mga pulong, ‘Gintangdo ko ikaw subong kapawa sang mga pungsod, agod mangin kaluwasan ka tubtob sa ukbong sang duta.’ ” (Binuhatan 13:47) Antes sia mapatay, nakita ni Pablo nga ang maayong balita sang kaluwasan nabantala indi lamang sa mga Judiyo kundi “sa tanan nga tinuga sa idalom sang langit.” (Colosas 1:​6, 23) Sa karon, ginapadayon sang mga nagkalabilin sang hinaplas nga kauturan ni Cristo ining hilikuton. Upod sa bulig sang “isa ka dakung kadam-an” nga minilyon ang kadamuon, nagaalagad sila subong “kapawa sang mga pungsod” sa kapin sa 230 ka kadutaan sa bug-os nga kalibutan.​—Bugna 7:9.

13, 14. (a) Ano nga reaksion ang nasumalang sang Mesias kag sang iya mga sumulunod sa pagbantala nga hilikuton? (b) Ano nga pagbaliskad sang mga kahimtangan ang natabo?

¹³ Nangin kusog gid si Jehova sa likod sang iya Alagad nga Mesias, sang hinaplas nga kauturan sang Mesias, kag sang bug-os nga dakung kadam-an, nga upod sa ila, nagapadayon sang hilikuton nga pagbantala sing maayong balita. Matuod, kaangay ni Jesus, gintamay kag ginpamatukan ang iya mga disipulo. (Juan 15:20) Apang sa iya gintalana nga tion, ginabaliskad pirme ni Jehova ang mga kahimtangan agod luwason kag padyaan ang iya matutom nga mga alagad. Tuhoy sa Mesias, nga “ginatamay sa kalag” kag “ginakangil-aran sang pungsod,” si Jehova nagasaad: “Ang mga hari mismo makakita kag pat-od nga magabangon, kag ang mga prinsipe, kag magayaub sila, tungod kay Jehova, nga matutom, ang Balaan sang Israel, nga nagapili sa imo.”​​—Isaias 49:7.

¹⁴ Si apostol Pablo nagsulat sang ulihi sa mga Cristiano sa Filipos tuhoy sa sining gintagna nga pagbaliskad sang mga kahimtangan. Ginlaragway niya si Jesus subong isa nga ginpakahuy-an sa isa ka usok sang pag-antos apang sa tapos sini ginbayaw sang Dios. Ginhatagan ni Jehova ang iya Alagad sing “mataas gid nga posisyon kag mainayuhon nga ginhatagan sia sing ngalan nga labaw sa tanan nga iban pa nga ngalan, agod sa ngalan ni Jesus magluhod ang tagsa ka tuhod.” (Filipos 2:​8-​11) Ginpaandaman ang matutom nga mga sumulunod ni Cristo nga hingabuton man sila. Apang kaangay sang Mesias, ginapasalig sila sang maayong kabubut-on ni Jehova.​​—Mateo 5:​10-​12; 24:​9-​13; Marcos 10:​29, 30.

“Ang Tion nga Labi Pa nga Nahamut-an”

15. Anong pinasahi nga “tion” ang ginasambit sa tagna ni Isaias, kag ano ang ginapahangop sini?

¹⁵ Nagpadayon ang tagna ni Isaias nga may importante gid nga pinamulong. Ginsugiran ni Jehova ang Mesias: “Sa isa ka tion sang maayong kabubut-on ginsabat ko ikaw, kag sa isa ka adlaw sang kaluwasan ginbuligan ko ikaw; kag padayon ko ikaw nga gin-amligan agod nga mahatag ko ikaw subong isa ka katipan para sa katawhan.” (Isaias 49:​8a) Ang kaanggid nga tagna narekord sa Salmo 69:​13-​18. Ang salmista nagapatuhoy sa “isa ka tion sang maayong kabubut-on,” nga ginagamit ang ekspresyon nga “tion nga nahamut-an.” Ining mga termino nagapahangop nga ang maayong kabubut-on kag pag-amlig ni Jehova ginapakita sa isa ka pinasahi nga paagi apang sa tion lamang sang isa ka espesipiko kag temporaryo nga panahon.

16. Ano anay ang tion sang maayong kabubut-on ni Jehova para sa dumaan nga Israel?

¹⁶ San-o yadtong tion sang maayong kabubut-on? Sa orihinal nga danyag, ang mga pulong bahin sang isa ka tagna tuhoy sa pagpasag-uli kag nagtagna sang pagbalik sang mga Judiyo gikan sa pagkabihag. Ang pungsod sang Israel nakaeksperiensia sing tion sang maayong kabubut-on sang ‘napasag-uli [nila] ang duta’ kag napanag-iyahan liwat ang ila “nahapay nga mga palanublion.” (Isaias 49:​8b) Indi na sila “mga bilanggo” sa Babilonia. Sa ila paglakbay pauli, ginpat-od ni Jehova nga indi sila “paggutumon” ukon “pag-uhawon,” ukon “sakiton sila sang nagatagiti nga init ukon adlaw.” Ang nag-aplaag nga mga Israelinhon nagpanong pabalik sa ila dutang natawhan “gikan pa sa malayo . . . , gikan sa aminhan kag gikan sa katundan.” (Isaias 49:9-12) Walay sapayan sining una nga dramatiko nga katumanan, ginapakita sang Biblia nga may dugang pa nga mga aplikasyon ini nga tagna.

17, 18. Anong tion sang maayong kabubut-on ang gintalana ni Jehova sang nahauna nga siglo?

¹⁷ Una, sang matawo si Jesus, ginpabutyag sang mga anghel ang paghidait kag maayong kabubut-on, ukon pabor sang Dios, para sa tawo. (Lucas 2:​13, 14) Ining maayong kabubut-on gintanyag, indi sa mga tawo sa kabilugan, kundi sa ila lamang nga nagpakita sing pagtuo kay Jesus. Sang ulihi dayag nga ginbasa ni Jesus ang tagna sa Isaias 61:​1, 2 kag gin-aplikar ini sa iya kaugalingon subong amo ang manugwali sang “tuig nga nahamut-an ni Jehova.” (Lucas 4:​17-​21) Si apostol Pablo nagpamulong tuhoy kay Cristo subong nakabaton sing pinasahi nga pag-amlig gikan kay Jehova sang undanon sia. (Hebreo 5:​7-9) Gani ining tion sang maayong kabubut-on naaplikar sa kahamuot sang Dios kay Jesus sang nagakabuhi sia subong isa ka tawo.

¹⁸ Apang, may dugang pa nga aplikasyon ini nga tagna. Sa tapos mabalikwat ang mga pulong ni Isaias nahanungod sa tion sang maayong kabubut-on, nagpadayon si Pablo sa pagsiling: “Yari karon! Karon amo ang tion nga labi pa nga nahamut-an. Yari karon! Karon amo ang adlaw sang kaluwasan.” (2 Corinto 6:2) Ginsulat ni Pablo ining mga pulong pagligad sang 22 ka tuig sa tapos mapatay si Jesus. Mahimo gid nga sang mabun-ag ang Cristianong kongregasyon sang Pentecostes sang 33 C.E., ginpalawig ni Jehova ang iya tuig sang maayong kabubut-on agod ilakip ang hinaplas nga mga sumulunod ni Cristo.

 19. Paano ang mga Cristiano karon makabenepisyo gikan sa tion sang maayong kabubut-on ni Jehova?

¹⁹ Kamusta naman ang mga sumulunod ni Jesus karon nga wala ginhaplas subong mga manunubli sang langitnon nga ginharian sang Dios? Makabenepisyo bala ang mga may dutan-on nga paglaum gikan sa sining nahamut-an nga tion? Huo. Ginapakita sang tulun-an nga Bugna sa Biblia nga isa ini ka tion sang maayong kabubut-on ni Jehova para sa dakung kadam-an nga magaguwa gikan sa “dakung kapipit-an” agod mag-agom sing kabuhi sa isa ka paraiso nga duta. (Bugna 7:​13-​17) Busa, sarang mahimuslan sang tanan nga Cristiano ining limitado nga panahon nga ginatanyag ni Jehova ang iya maayong kabubut-on sa di-himpit nga mga tawo.

20. Sa anong paagi malikawan sang mga Cristiano nga mawasi ang katuyuan sang di-bagay nga kaluoy ni Jehova?

²⁰ Gin-unahan ni apostol Pablo ang pagwali sang nahamut-an nga tion ni Jehova sing isa ka paandam. Nagpakiluoy sia sa mga Cristiano nga ‘indi pagbatunon ang di-bagay nga kaluoy sang Dios kag wasihon ang katuyuan sini.’ (2 Corinto 6:1) Gani, ginahimuslan sang mga Cristiano ang tanan nga kahigayunan agod pahamut-an ang Dios kag himuon ang iya kabubut-on. (Efeso 5:​15, 16) Maayo nga sundon nila ang laygay ni Pablo: “Mag-andam kamo, mga kauturan, kay basi magtubo sa bisan sin-o sa inyo ang malaut nga tagipusuon nga walay pagtuo paagi sa pagpalayo sa buhi nga Dios; apang padayon nga maglinaygayay kamo adlaw-adlaw, samtang matawag pa ini nga ‘Karon nga adlaw,’ basi may isa sa inyo nga magtig-a bangod sa madaya nga gahom sang sala.”​​—Hebreo 3:​12, 13.

21. Anong makalilipay nga pinamulong ang nagahinakop sang nahauna nga bahin sang Isaias kapitulo 49?

²¹ Samtang nagahingapos ang matagnaon nga mga pinamulong sa ulot ni Jehova kag sang iya Mesias, nagbungat si Isaias sing isa ka makalilipay nga pinamulong: “Maghugyaw, kamo nga mga langit, kag magkalipay, ikaw duta. Magkasadya ang kabukiran upod ang singgit sang kalipay. Kay si Jehova naglipay sa iya katawhan, kag nagapakita sia sing kaluoy sa iya mga nalisdan.” (Isaias 49:13) Daw ano katahom nga mga pulong sang paglipay para sa mga Israelinhon sang una kag para sa daku nga Alagad ni Jehova, si Jesucristo, subong man sa hinaplas nga mga alagad ni Jehova kag sa ila “iban nga mga karnero” nga mga kaupod karon!​—Juan 10:16.

Wala Ginakalipatan ni Jehova ang Iya Katawhan

22. Paano ginapadaku ni Jehova nga indi gid niya pagkalipatan ang iya katawhan?

²² Ginpadayon karon ni Isaias nga isugid ang mga pinamulong ni Jehova. Gintagna niya nga ang nabihag nga mga Israelinhon daw lapyuon kag madulaan sing paglaum. Si Isaias nagsiling: “Ang Sion padayon nga nagsiling: ‘Ginbayaan ako ni Jehova, kag ginkalimtan ako ni Jehova.’ ” (Isaias 49:14) Matuod bala ini? Ginbiyaan bala ni Jehova ang iya katawhan kag nalipatan sila? Nagahikot subong humalambal ni Jehova, nagpadayon si Isaias: “Malimtan bala sang isa ka asawa ang iya ginapasuso nga sa amo indi sia magkaluoy sa anak sang iya tiyan? Bisan ini nga mga babayi malipat, indi gid ako malipat sa imo.” (Isaias 49:15) Daw ano ka mahigugmaon nga sabat gikan kay Jehova! Ang gugma sang Dios sa iya katawhan daku pa sa gugma sang iloy sa iya anak. Ginadumdom niya pirme ang iya mga matutom. Ginadumdom niya sila nga subong bala daw natigib ang ila mga ngalan sa iya mga kamot: “Yari karon! Sa akon mga palad gintigib ko ikaw. Ang imo mga pader yara sa akon atubangan sing dalayon.”​​—Isaias 49:16.

23. Paano ginpalig-on ni Pablo ang mga Cristiano sa pagsalig nga indi malipat si Jehova sa ila?

²³ Sa iya sulat sa mga taga-Galacia, ginpalig-on ni apostol Pablo ang mga Cristiano: “Dili kita mag-untat sa paghimo sing maayo, kay sa nagakaigo nga dag-on magaani kita kon indi kita paglapyuon.” (Galacia 6:9) Sa mga Hebreo ginsulat niya ang makapalig-on nga mga pulong: “Ang Dios indi di-matarong nga malimot sang inyo binuhatan kag sang gugma nga ginpakita ninyo tungod sa iya ngalan.” (Hebreo 6:10) Indi gid kita maghunahuna nga nalipatan na ni Jehova ang iya katawhan. Kaangay sang dumaan nga Sion, may rason gid ang mga Cristiano sa pagkasadya kag mapailubon nga maghulat kay Jehova. Matutom gid sia sa mga kondisyon sang iya pagpakigkatipan kag sa iya mga saad.

24. Sa anong paagi ipasag-uli ang Sion, kag anong mga pamangkot ang ipamangkot niya?

²⁴ Paagi kay Isaias, naghatag si Jehova sing dugang pa nga paglipay. Ang mga “nagarumpag” sa Sion, ang mga Babilonianhon ukon ang apostata nga mga Judiyo, indi na isa ka peligro. Ang “mga anak” sang Sion, ang nabihag nga mga Judiyo nga nag-unong kay Jehova, “nagdalidali.” ‘Pagatipunon’ sila. Bangod dalidali sila nga nagbalik sa Jerusalem, ang ginhilway nga mga Judiyo mangin mga puni sa ila kapital nga siudad, subong nga ang “isa ka nobya” ginapanaptan sing “mga puni.” (Isaias 49:17, 18) Ang mga duog sang Sion “nahapay.” Handurawa ang iya kakibot sang hinali lang nga nagdamo kaayo ang iya mga pumuluyo amo kon ngaa daw naggutok ang iya puluy-an. (Basaha ang Isaias 49:​19, 20.) Natural lamang nga mamangkot sia kon diin maghalalin ining tanan nga anak: “Pat-od nga magasiling ka sa imo tagipusuon, ‘Sin-o ang nangin amay sini nila para sa akon, sanglit isa ako ka babayi nga nadulaan sing mga anak kag baog, gintapok kag gindala nga bilanggo? Tuhoy sini sa ila, sin-o ang nagpadaku sa ila? Yari karon! Ginbiyaan ako nga nagaisahanon. Ini sila​—diin sila maghalin?’ ” (Isaias 49:21) Daw ano ka makalilipay nga kahimtangan para sa baog anay nga Sion!

25. Sa modernong mga tion, anong pagpasag-uli ang naeksperiensiahan sang espirituwal nga Israel?

²⁵ May modernong katumanan ining mga pulong. Sa sulod sang mabudlay nga tinuig sang nahauna nga bug-os kalibutan nga inaway, naeksperiensiahan sang espirituwal nga Israel ang panahon sang kahapayan kag pagkabihag. Apang ginpasag-uli sia kag nagsulod sa isa ka espirituwal nga paraiso. (Isaias 35:​1-​10) Kaangay sang nahapay anay nga siudad nga ginlaragway ni Isaias, nagkalipay sia nga masapwan ang iya kaugalingon​—nga subong bala daw​—​napuno sing malipayon, aktibo nga mga sumilimba ni Jehova.

“Isa ka Sinyales Para sa Katawhan”

26. Ano nga pagtuytoy ang gin-aman ni Jehova para sa iya ginhilway nga katawhan?

²⁶ Sa isa ka matagnaon nga paagi, gindala karon ni Jehova si Isaias sa tion nga ang Iya katawhan hilwayon gikan sa Babilonia. Tuytuyan bala sila sang Dios? Si Jehova nagsabat: “Yari karon! Bayawon ko ang akon kamot sa mga pungsod, kag sa mga katawhan ipataas ko ang akon sinyales. Kag dalhon nila nga ginakungkong ang imo mga anak nga lalaki, kag pas-anon nila ang imo mga anak nga babayi.” (Isaias 49:22) Sa una nga katumanan, ang Jerusalem, nga lingkuranan anay sang panguluhan kag nahamtangan sang templo ni Jehova, nangin “sinyales” ni Jehova. Bisan ang prominente kag gamhanan nga katawhan sang iban nga mga pungsod, subong sang “mga hari” kag “mga prinsipe,” magabulig sa mga Israelinhon sa ila paglakbay pabalik didto. (Isaias 49:​23a) Ang Persianhon nga mga hari nga si Ciro kag si Artajerjes Longimanus kag ang ila mga panimalay amo ang lakip sa sining mga nagbulig. (Esdras 5:​13; 7:​11-​26) Kag ang mga pulong ni Isaias may dugang pa nga aplikasyon.

27. (a) Sa daku pa nga katumanan, sa ano nga “sinyales” magadugok ang katawhan? (b) Ano ang mangin resulta kon ang tanan nga pungsod mapilitan sa pagpasakop sa paggahom sang Mesias?

²⁷ Ang Isaias 11:​10 nagasambit sing “isa ka sinyales para sa katawhan.” Gin-aplikar ni apostol Pablo ining mga pulong kay Cristo Jesus. (Roma 15:​8-​12) Busa, sa daku pa nga katumanan, si Jesus kag ang iya hinaplas-sang-espiritu nga kaupod nga mga manuggahom amo ang “sinyales” ni Jehova nga ginadugukan sang katawhan. (Bugna 14:1) Sa gintalana nga tion ang tanan nga katawhan sang duta​​—bisan ang nagagahom nga mga hubon karon​—​magapasakop sa paggahom sang Mesias. (Salmo 2:​10, 11; Daniel 2:44) Ang resulta? Si Jehova nagasiling: “Imo makilala nga ako si Jehova, nga ang mga nagalaum sa akon indi mahuy-an.”​—Isaias 49:​23b.

“Mas Malapit Na Karon ang Aton Kaluwasan”

28. (a) Paagi sa anong mga pulong ginpasalig liwat ni Jehova ang iya katawhan nga hilwayon sila? (b) Ano gihapon ang pangako ni Jehova tuhoy sa iya katawhan?

²⁸ Ang pila sang mga bihag sa Babilonia mahimo magpalibog, ‘Posible gid bala nga hilwayon ang Israel?’ Ginbinagbinag ni Jehova ina nga pamangkot paagi sa pagpamangkot: “Ang mga nakuha na makuha pa bala gikan sa isa ka gamhanan nga lalaki, ukon makapalagyo bala ang hubon sang mga bihag sang manlulupig?” (Isaias 49:24) Ang sabat huo. Ginpasalig sila ni Jehova: “Bisan ang hubon sang mga bihag sang gamhanan nga lalaki pagakuhaon, kag ang mga nakuha na sang manlulupig makapalagyo.” (Isaias 49:​25a) Daw ano ka makalipay nga pasalig! Dugang pa, ang maayong kabubut-on ni Jehova sa iya katawhan may isa ka malig-on nga pangako nga amligan sila. Sa maathag gid nga mga pulong, sia nagsiling: “Sa bisan sin-o nga nagapakig-away batok sa imo ako ang makig-away, kag ang imo mga anak luwason ko.” (Isaias 49:​25b) Ina nga pangako nagapabilin gihapon. Subong narekord sa Zacarias 2:​8, si Jehova nagasiling sa iya katawhan: “Sia nga nagatandog sa inyo nagatandog sang tawotawo sang akon mata.” Matuod, kita karon nagakabuhi sa isa ka panahon sang maayong kabubut-on kag sa sini nga tion ang katawhan sa bug-os nga duta may kahigayunan nga magdugok sa espirituwal nga Sion. Apang, ina nga panahon sang maayong kabubut-on may katapusan.

29. Anong makahaladlok nga palaabuton ang nagahulat sa mga nagapangindi sa pagtuman kay Jehova?

²⁹ Ano ang matabo sa mga matig-a nga nagapangindi sa pagtuman kay Jehova kag nagahingabot pa gani sa iya mga sumilimba? Sia nagsiling: “Ang mga nagapigos sa imo pakaunon ko sang ila kaugalingon nga unod; kag subong sang matam-is nga alak mahubog sila sang ila kaugalingon nga dugo.” (Isaias 49:​26a) Isa ka makahaladlok nga palaabuton! Inang batinggilan nga mga manugpamatok wala sing malawig nga palaabuton. Laglagon sila. Sa amo, paagi sa pagluwas sa iya katawhan kag paagi sa paglaglag sa iya mga kaaway, mapamatud-an si Jehova subong isa ka Manluluwas. “Makilala sang tanan nga unod nga ako, si Jehova, ang imo Manluluwas kag imo Manunubos, ang Isa nga Gamhanan ni Jacob.”​—Isaias 49:​26b.

30. Anong mga buhat sang pagluwas ang ginhimo ni Jehova para sa iya katawhan, kag ano ang iya himuon pa?

³⁰ Yadtong mga pulong una nga naaplikar sang gingamit ni Jehova si Ciro sa paghilway sa Iya katawhan gikan sa pagkaulipon sa Babilonia. Naaplikar man ini sang 1919 sang gingamit ni Jehova ang iya nagalingkod sa trono nga anak, si Jesucristo, sa paghilway sa Iya katawhan gikan sa espirituwal nga pagkaulipon. Busa, ginapatuhuyan sang Biblia si Jehova kag si Jesus subong mga manluluwas. (Tito 2:​11-​13; 3:​4-6) Si Jehova amo ang aton Manluluwas, kag si Jesus, ang Mesias, amo ang iya “Puno nga Ahente.” (Binuhatan 5:31) Sa pagkamatuod, ang mga buhat sang pagluwas sang Dios paagi kay Jesucristo makatilingala. Paagi sa maayong balita, ginahilway ni Jehova ang mga may matarong nga tagipusuon gikan sa pagkaulipon sa butig nga relihion. Paagi sa halad nga gawad, ginahilway niya sila gikan sa pagkaulipon sa sala kag kamatayon. Sang 1919 ginhilway niya ang kauturan ni Jesus gikan sa espirituwal nga pagkaulipon. Kag sa nagahilapit sing madasig nga inaway sang Armagedon, luwason niya ang isa ka dakung kadam-an sang matutom nga mga tawo gikan sa kalaglagan nga magadangat sa mga makasasala.

31. Ano dapat ang mangin reaksion sang mga Cristiano nga nabaton nila ang maayong kabubut-on sang Dios?

³¹ Busa, isa gid ka pribilehiyo nga makabaton sang maayong kabubut-on sang Dios! Kabay nga gamiton naton tanan ining nahamut-an nga tion sing maalamon. Kag kabay nga maghikot kita nahisanto sa pagkahilingawon sang aton tion, nga ginapamatian ang mga pulong ni Pablo sa mga taga-Roma: “Nahibaluan ninyo ang panahon, nga oras na nga magmata kamo gikan sa katulugon, kay mas malapit na karon ang aton kaluwasan sangsa tion nga kita nangin mga tumuluo. Ang kagab-ihon nagob na; ang adlaw malapit na. Busa isikway naton ang mga buhat sang kadudulman kag isuklob naton ang mga hinganib sang kapawa. Subong nga sa adlaw maglakat kita sing disente, indi sa magansal nga kinalipay kag paghinubog, indi sa ginadumili nga paghulid kag lugak nga paggawi, indi sa pinuyas kag kaimon. Kundi isuklob ninyo si Ginuong Jesucristo, kag indi kamo magplano para sa mga kailigbon sang unod.”​—Roma 13:​11-​14.

32. Ano ang mga ginpasalig sa katawhan sang Dios?

³² Padayon nga kahamut-an ni Jehova ang mga nagasunod sa iya laygay. Magaaman sia sa ila sing kusog kag mga ikasarang nga kinahanglanon agod himuon ang pagbantala sing maayong balita. (2 Corinto 4:7) Gamiton ni Jehova ang iya mga alagad subong nga ginagamit niya ang ila Lider, si Jesus. Himuon niya ang ila baba nga mangin “kaangay sang isa ka matalom nga espada” agod nga malab-ot nila ang tagipusuon sang mga mahagop paagi sa mensahe sang maayong balita. (Mateo 28:​19, 20) Amligan niya ang iya katawhan “sa landong sang iya kamot.” Kaangay sang “isa ka ginpahining nga baslay,” taguon sila “sa iya baslayan.” Sa pagkamatuod, indi pagbiyaan ni Jehova ang iya katawhan!​​—​Salmo 94:​14; Isaias 49:​2, 15.

[Nota]

[Piktyur sa pahina 139]

Ang Mesias daw kaangay sang “isa ka ginpahining nga baslay” sa baslayan ni Jehova

[Piktyur sa pahina 141]

Ang Mesias isa ka “kapawa sang mga pungsod”

[Retrato sa pahina 147]

Ang gugma sang Dios para sa iya katawhan daku pa sa gugma sang iloy para sa iya anak