Kapitulo Otso

Si Jehova nga Dios Yara sa Iya Balaan nga Templo

Isaias 6:1-13

1, 2. (a) San-o nabaton ni manalagna Isaias ang iya palanan-awon sa templo? (b) Ngaa nadula ni Hari Uzzias ang kahamuot ni Jehova?

“SANG tuig nga napatay si Hari Uzzias, nakita ko si Jehova, nga nagalingkod sa isa ka trono nga mataas kag nabayaw, kag ang iya mga sidsid naghil-ob sang templo.” (Isaias 6:1) Paagi sa sining mga pulong sang manalagna, nagsugod ang ika-6 nga kapitulo sang tulun-an sang Isaias. Tuig 778 B.C.E. sadto.

² Madinalag-on gid ang daku nga bahin sang 52 ka tuig nga paghari ni Uzzias sa Juda. Bangod ginhimo niya ang “matarong sa mga mata ni Jehova,” naangkon niya ang pagsakdag sang Dios sa iya mga pagpakig-away, pagpatindog sing mga tinukod, kag pagpanguma. Apang sia man ang kabangdanan nga nadula ang iya kadalag-an. Sang ulihi, ang iya tagipusuon nangin matinaastaason, “kay naghikot sia sing di-matutom batok kay Jehova nga iya Dios kag nagkadto sia sa templo ni Jehova agod magsunog sing incienso.” Bangod sining matinaastaason nga buhat kag sang iya kasingkal batok sa mga saserdote nga nagpakamalaut sa iya, napatay si Uzzias nga isa ka aruon. (2 Cronica 26:3-22) Sa amo sini nga tion nga ginsugdan ni Isaias ang iya pagpanagna.

3. (a) Nakita gid bala ni Isaias si Jehova? Ipaathag. (b) Ano nga danyag ang nakita ni Isaias, kag sa anong rason?

³ Wala kita ginasugiran kon diin si Isaias sang makita niya ang palanan-awon. Apang ang nakita sang iya pisikal nga mga mata maathag nga isa ka palanan-awon, indi isa ka aktuwal nga pagkakita sa Labing Gamhanan, kay “wala gid sing tawo nga nakakita sa Dios sa bisan ano nga tion.” (Juan 1:18; Exodo 33:20) Apang, isa gihapon ka makapulunaw nga talan-awon nga makita ang Manunuga, nga si Jehova, bisan sa palanan-awon lamang. Nagalingkod sa isa ka mataas nga trono, nga nagasimbulo sang iya papel subong walay katapusan nga Hari kag Hukom, amo ang Bug-os Uniberso nga Manuggahom kag Tuburan sang tanan matarong nga panguluhan! Ang mga sidsid sang iya malaba, malapad nga panapton nagahil-ob sang templo. Gintawag si Isaias agod maghimo sing pagpanagna nga magapadaku sang soberano nga gahom kag katarungan ni Jehova. Subong paghanda, hatagan sia sing palanan-awon tuhoy sa pagkabalaan sang Dios.

4. (a) Ngaa simbuliko ang mga paglaragway kay Jehova nga nakita sa palanan-awon kag ang narekord sa Biblia? (b) Ano ang matun-an tuhoy kay Jehova gikan sa palanan-awon ni Isaias?

⁴ Wala naghatag si Isaias sing laragway sang dagway ni Jehova sa iya palanan-awon—indi kaangay sang mga palanan-awon nga ginreport nanday Ezequiel, Daniel, kag Juan. Kag wala nagapalareho ining mga panaysayon tuhoy sa kon ano ang nakita sa langit. (Ezequiel 1:26-28; Daniel 7:9, 10; Bugna 4:2, 3) Apang, dapat tandaan ang sahi kag ang katuyuan sining mga palanan-awon. Indi ini literal nga mga paglaragway sang presensia ni Jehova. Indi makita sang pisikal nga mata ang butang nga espirituwal, ukon mahangpan sang limitado nga panghunahuna sang tawo ang espirituwal nga duog. Busa, ginapresentar sang mga palanan-awon sa mga termino nga mahangpan sang tawo ang impormasyon nga dapat ipaalinton. (Ipaanggid ang Bugna 1:1.) Sa palanan-awon ni Isaias indi kinahanglanon nga ilaragway ang dagway sang Dios. Ginpahibalo sang palanan-awon si Isaias nga si Jehova yara sa iya balaan nga templo kag nga sia balaan kag ang iya mga paghukom putli.

Ang mga Serafin

5. (a) Sin-o ang mga serafin, kag ano ang kahulugan sini nga termino? (b) Ngaa ginatago sang mga serafin ang ila mga nawong kag mga tiil?

⁵ Pamati kamo! Si Isaias nagpadayon: “May mga serafin nga nagatindog sa ibabaw niya. Ang tagsatagsa may anom ka pakpak. Ang duha ginatabon niya sa iya nawong, kag ang duha ginatabon niya sa iya mga tiil, kag ang duha ginagamit niya sa paglupad.” (Isaias 6:2) Ang Isaias kapitulo 6 amo lamang ang bahin sa Biblia nga nagasambit sang mga serafin. Maathag gid nga sila mga anghel nga tinuga nga may mataas gid nga pribilehiyo kag kadungganan sa pag-alagad kay Jehova, kay yara sila malapit sa langitnon nga trono ni Jehova. Indi subong sang bugalon nga si Hari Uzzias, nagapabilin sila sa ila puwesto nga may bug-os nga pagpaubos kag kaugdang. Bangod yara sila sa atubangan sang langitnon nga Soberano, ginatabunan nila ang ila mga nawong paagi sa ila duha ka pakpak; kag subong pagtahod sa balaan nga duog, ginatabunan nila ang ila mga tiil sing duha pa ka pakpak. Bangod malapit sila sa Bug-os Uniberso nga Soberano, labi pa nga wala nagapahilmon ang mga serafin, agod indi sila makabuhin sa personal nga himaya sang Dios. Ang termino nga “mga serafin,” nga nagakahulugan “mga kalayuhon” ukon “mga nagadabdab,” nagapahangop nga sila masanag, apang ginatago nila ang ila mga nawong gikan sa daku pa nga kasanag kag himaya ni Jehova.

6. Ano ang posisyon sang mga serafin may kaangtanan kay Jehova?

⁶ Ginagamit sang mga serafin ang ila ikatlo nga paris sang mga pakpak sa paglupad kag, walay duhaduha, sa paglupadlupad, ukon sa ‘pagtindog,’ sa ila mga puwesto. (Ipaanggid ang Deuteronomio 31:15.) Tuhoy sa ila posisyon, si Propesor Franz Delitzsch nagkomento: “Ang serafin wala gid nagalupad sa ibabaw sang ulo Niya nga nagalingkod sa trono, kundi nagalupadlupad sila sa ibabaw sang panapton nga natungod sa Iya nga naghil-ob sang tilipunan.” (Commentary on the Old Testament) Daw makatarunganon ini. Sila “nagatindog sa ibabaw,” indi subong superyor kay Jehova, kundi sa pag-alagad sa iya, matinumanon kag handa sa pag-alagad.

7. (a) Ano nga tulumanon ang ginatuman sang mga serafin? (b) Ngaa ginapahayag sang mga serafin ang pagkabalaan sang Dios sing tatlo ka beses?

⁷ Pamatii, karon, ang may pribilehiyo nga mga serafin! “Ining isa nagtawag sa isa pa kag nagsiling: ‘Balaan, balaan, balaan si Jehova sang mga kasuldadusan. Ang kabug-usan sang bug-os nga duta amo ang iya himaya.’” (Isaias 6:3) Ang ila tulumanon amo ang pagpat-od nga ang pagkabalaan ni Jehova ginapahayag kag nga ang iya himaya ginakilala sa bug-os nga uniberso, nga nagalakip sang duta. Ang iya himaya makita sa tanan nga iya gintuga kag sa indi madugay mahantop sang tanan nga pumuluyo sang duta. (Numeros 14:21; Salmo 19:1-3; Habacuc 2:14) Ang tatlo ka beses nga pagsiling sing, “balaan, balaan, balaan,” indi pamatuod sa Trinidad. Sa baylo, isa ini ka tatlo ka beses nga pagpadaku sang pagkabalaan sang Dios. (Ipaanggid ang Bugna 4:8.) Si Jehova amo ang labing balaan.

8. Ano ang resulta sang mga pagpahayag sang mga serafin?

⁸ Bisan pa wala ginasambit ang kadamuon sang mga serafin, mahimo nga may yara mga grupo sang mga serafin nga nagabantay malapit sa trono. Sa isa ka matahom nga pag-amba, ginasulitsulit nila sing paagisod ang pagpahayag sang pagkabalaan kag himaya sang Dios. Ano nga resulta ang matalupangdan naton? Pamatii liwat samtang nagapadayon si Isaias: “Ang mga sadsaran sang mga atangan nag-uyog sa tingog sang isa nga nagapanawag, kag ang balay amat-amat nga napuno sing aso.” (Isaias 6:4) Sa Biblia, ang aso ukon panganod masami nga nagahatag sang kitaon nga ebidensia sang presensia sang Dios. (Exodo 19:18; 40:34, 35; 1 Hari 8:10, 11; Bugna 15:5-8) Ginapakita sini ang himaya nga indi naton mapalapitan subong mga tawo.

Di-takus, Apang Natinluan

9. (a) Ano ang nangin epekto sang palanan-awon kay Isaias? (b) Ano ang pagkatuhay ni Isaias kag ni Hari Uzzias?

⁹ Ini nga palanan-awon tuhoy sa trono ni Jehova may daku nga epekto kay Isaias. Sia nagrekord: “Ako nagsiling: ‘Kailo ako! Kay daw subong nga ginpahipos ako, bangod tawo ako nga may di-matinlo nga mga bibig, kag sa tunga sang katawhan nga may di-matinlo nga mga bibig nagapuyo ako; kay ang akon mga mata nakakita sa Hari mismo, si Jehova sang mga kasuldadusan!’” (Isaias 6:5) Daku gid ang pagkatuhay sa ulot ni Isaias kag ni Hari Uzzias! Gin-agaw ni Uzzias ang posisyon sang hinaplas nga mga saserdote kag walay katahuran nga ginsulod ang Balaan nga bahin sang templo. Bisan pa nakita ni Uzzias ang bulawan nga mga kandelero, ang bulawan nga halaran sang incienso, kag ang mga lamesa sang “tinapay sang Presensia,” wala niya makita ang nawong sang pagkahamuot ni Jehova ukon nakabaton sia sing pinasahi nga sugo gikan sa iya. (1 Hari 7:48-50; footnote) Sa pihak nga bahin, wala ginsikway ni manalagna Isaias ang pagkasaserdote ukon ginlapas ang templo. Apang, nakita niya sa palanan-awon si Jehova nga yara sa iya balaan nga templo kag ginpadunggan sia sing isa ka talangkod nga sugo gikan sa Dios. Samtang ang mga serafin wala nagapangahas sa pagtulok sa nagalingkod sa trono nga Ginuo sang templo, gintugutan si Isaias, sa palanan-awon, sa pagtulok sa “Hari mismo, si Jehova sang mga kasuldadusan!”

10. Ngaa hinadlukan si Isaias sang makita ang palanan-awon?

¹⁰ Ang pagkatuhay nga nakita ni Isaias sa ulot sang pagkabalaan sang Dios kag sang iya pagkamakasasala nagpabatyag sa iya nga indi gid matinlo. Puno sing kahadlok, nangatarungan sia nga mapatay sia. (Exodo 33:20) Nabatian niya nga ginadayaw sang mga serafin ang Dios nga may matinlo nga mga bibig, apang ang iya mismo mga bibig di-matinlo kag dugang pa nga nahigkuan sang di-matinlo nga mga bibig sang katawhan nga sa tunga nila nagapuyo sia kag mabatian niya ang ila mga hambal. Si Jehova balaan, kag dapat ipakita sang iya mga alagad ina nga kinaiya. (1 Pedro 1:15, 16) Bisan pa napili na si Isaias nga mangin humalambal sang Dios, natublag gid sia sang iya pagkasayod nga sia makasasala kag wala sing matinlo nga mga bibig nga nagakadapat sa isa ka humalambal sang mahimayaon kag balaan nga Hari. Ano ang mangin reaksion sang langit?

11. (a) Ano ang ginhimo sang isa sa mga serafin, kag ano ang ginasimbulo sini nga buhat? (b) Paano ang pagbinagbinag sang ginsiling sang serafin kay Isaias makabulig sa aton kon nagabatyag kita nga di-takus subong mga alagad sang Dios?

¹¹ Sa baylo nga kuhaon ang kubos nga si Isaias gikan sa presensia ni Jehova, naghulag ang mga serafin agod buligan sia. Ang rekord nagasiling: “Nian, ang isa sang mga serafin naglupad sa akon, kag sa iya kamot may nagabaga nga uling nga ginkuha niya sa halaran paagi sa kimpit. Kag gintandog niya sini ang akon baba kag nagsiling: ‘Yari karon! Natandog sini ang imo mga bibig, kag ang imo sayop nakuha na kag ang imo sala natabunan na.’” (Isaias 6:6, 7) Sa simbuliko nga kahulugan, ang kalayo may makapaputli nga gahom. Sang ginpadapat ang nagabaga nga uling gikan sa balaan nga kalayo sang halaran sa mga bibig ni Isaias, ginpasalig sang mga serafin si Isaias nga ang iya mga sala natabunan na tubtob sa kinahanglanon nga kasangkaron agod makabaton sia sing kahamuot kag komisyon gikan sa Dios. Daw ano ini ka makapalig-on para sa aton! Kita man makasasala kag di-takus sa pagpalapit sa Dios. Apang nagawad na kita sang balor sang halad nga gawad ni Jesus kag makabaton sang kahamuot sang Dios kag makapalapit sa iya sa pangamuyo.—2 Corinto 5:18, 21; 1 Juan 4:10.

12. Ano nga halaran ang nakita ni Isaias, kag ano ang epekto sang kalayo?

¹² Ang nagapahanumdom sa aton liwat nga isa ini ka palanan-awon amo ang pagsambit sa “halaran.” (Ipaanggid ang Bugna 8:3; 9:13.) May duha ka halaran sa templo sa Jerusalem. Antes sang kurtina sang Labing Balaan amo ang gamay nga halaran sang incienso, kag sa atubangan sang alagyan padulong sa santuaryo amo ang daku nga halaran sang halad, diin ang kalayo pirme nagadabdab. (Levitico 6:12, 13; 16:12, 13) Apang ining dutan-on nga mga halaran malaragwayon, nagarepresentar sang daku pa nga mga butang. (Hebreo 8:5; 9:23; 10:5-10) Ang kalayo gikan sa langit amo ang nagsunog sang halad nga sinunog nga yara sa ibabaw sang halaran sang gin-inagurahan ni Hari Solomon ang templo. (2 Cronica 7:1-3) Kag karon ang kalayo gikan sa matuod, langitnon nga halaran amo ang nagkuha sang pagkadimatinlo gikan sa mga bibig ni Isaias.

13. Ano ang ginpamangkot ni Jehova, kag sin-o ang ginlakip niya sang magsiling sia nga “amon”?

¹³ Mamati kita kay Isaias. “Nabatian ko ang tingog ni Jehova nga nagasiling: ‘Sin-o ang ipadala ko, kag sin-o ang magakadto para sa amon?’ Kag ako nagsiling: ‘Yari ako! Ipadala ako.’” (Isaias 6:8) Ang pamangkot nga ginpautwas ni Jehova maathag nga gintuyo agod pasabton si Isaias, kay wala na sing iban nga tawhanon nga manalagna sa palanan-awon. Isa gid ini ka imbitasyon kay Isaias nga mangin mensahero ni Jehova. Apang ngaa namangkot si Jehova, “Sin-o ang magakadto para sa amon?” Sa paggamit sing pangmadamo nga pronombre nga “amon” sa baylo sang personal nga pronombre nga “akon,” ginalakip karon ni Jehova ang isa pa ka persona upod sa iya kaugalingon. Sin-o? Indi bala amo ini ang iya bugtong nga Anak, nga sang ulihi nangin ang tawo nga si Jesucristo? Sa pagkamatuod, amo gihapon ini nga Anak ang ginsilingan sang Dios, “Himuon naton ang tawo sa dagway naton.” (Genesis 1:26; Hulubaton 8:30, 31) Huo, sa tupad ni Jehova sa langitnon nga korte amo ang iya bugtong nga Anak.—Juan 1:14.

14. Ano ang ginsabat ni Isaias sa imbitasyon ni Jehova, kag ano nga huwaran ang ginapahamtang niya para sa aton?

¹⁴ Si Isaias wala magpangalag-ag sa pagsabat! Bisan ano man ang mensahe, nagsabat sia gilayon: “Yari ako! Ipadala ako.” Wala man sia mamangkot kon ano ang maangkon niya kon batunon niya ang tulumanon. Ang iya handa nga espiritu isa ka maayong huwaran para sa tanan nga alagad sang Dios karon, nga ginasugo nga ibantala ang ‘maayong balita sang ginharian sa bug-os napuy-an nga duta.’ (Mateo 24:14) Kaangay ni Isaias, matutom sila nga nagapabilin sa ila tulumanon kag ginahimo nila ang “pagpanaksi sa tanan nga kapungsuran,” walay sapayan sang lapnag nga indi pagsapak. Kag nagapanghikot sila nga may pagsalig, kaangay ni Isaias, kay nahibaluan nila nga ang ila komisyon naghalin sa pinakamataas nga awtoridad.

Ang Komisyon ni Isaias

15, 16. (a) Ano ang isiling ni Isaias sa “sining katawhan,” kag ano ang mangin reaksion nila? (b) Si Isaias bala ang salaon sa reaksion sang katawhan? Ipaathag.

¹⁵ Ginpaathag karon ni Jehova kay Isaias kon ano ang isiling kag kon ano ang mangin reaksion: “Lakat ka, kag ikaw magasiling sa sining katawhan, ‘Pamati kamo sa liwat kag liwat, apang indi kamo makahangop; kag tan-awa ninyo sa liwat kag liwat, apang indi ninyo mahibaluan.’ Patig-aha ang tagipusuon sining katawhan, kag pabungula ang ila mga dulunggan, kag papiyunga ang ila mga mata, agod indi sila makakita paagi sa ila mga mata kag paagi sa ila mga dulunggan indi sila makabati, kag agod ang ila tagipusuon indi makahangop kag agod indi sila manumbalik kag paayuhon ang ila kaugalingon.” (Isaias 6:9, 10) Nagakahulugan bala ini nga si Isaias dapat mangin prangka kag indi mataktikanhon kag awayon ang mga Judiyo, agod mangin kaaway sila ni Jehova? Indi sa pagkamatuod! Mga kasimanwa sila ni Isaias nga ginakabig niya nga mga kadugo niya. Apang ginpakita sang mga pulong ni Jehova kon ano ang mangin reaksion sang katawhan sa iya mensahe, bisan daw ano pa katutom nga tumanon ni Isaias ang iya tulumanon.

¹⁶ Ang sayop yara sa katawhan. Si Isaias magapakighambal sa ila “sa liwat kag liwat,” apang indi nila pagbatunon ang mensahe ukon hangpon ini. Ang kalabanan mangin batinggilan kag indi magsapak, nga subong daw bulag kag bungol sila. Paagi sa pagbalikbalik sa ila, tugutan ni Isaias nga ipakita “sining katawhan” nga indi nila luyag maghangop. Pamatud-an nila nga ginasira nila ang ila painuino kag tagipusuon sa mensahe ni Isaias—ang mensahe sang Dios—sa ila. Daw ano ka matuod ini sa katawhan karon! Madamo gid sa ila ang nagapangindi nga mamati sa mga Saksi ni Jehova samtang ginabantala nila ang maayong balita sang nagapakari nga Ginharian sang Dios.

17. Sang namangkot si Isaias, “Tubtob san-o?” ano ang iya ginapatuhuyan?

¹⁷ Nabalaka si Isaias: “Sa sini ako nagsiling: ‘Tubtob san-o, O Jehova?’ Nian nagsiling sia: ‘Tubtob nga ang mga siudad malaglag, nga wala sing pumuluyo, kag ang mga balay wala sing dutan-on nga tawo, kag ang duta malaglag padulong sa pagkahapay; kag ipahilayo gid ni Jehova ang dutan-on nga mga tawo, kag ang pagkahapay mangin tuman kalapnag sa tunga sang duta.’” (Isaias 6:11, 12) Sa pagpamangkot sing, “Tubtob san-o?” wala nagapamangkot si Isaias kon tubtob san-o sia magabantala sa wala nagasapak nga katawhan. Sa baylo, nabalaka sia sa katawhan kag nagapamangkot kon tubtob san-o magapadayon ang ila malaut nga espirituwalidad kag tubtob san-o pakahuy-an ang ngalan ni Jehova sa duta. (Tan-awa ang Salmo 74:9-11.) Gani, nian, tubtob san-o magapadayon ang walay pulos nga kahimtangan?

18. Tubtob san-o magapadayon ang malaut nga espirituwalidad sang katawhan, kag makita bala ni Isaias ang bug-os nga katumanan sang tagna?

¹⁸ Ang sabat ni Jehova nagapakita nga ang malaut nga espirituwalidad sang katawhan magapadayon tubtob ang bug-os nga resulta sang paglalis sa Dios, nga ginsambit sa iya katipan, matuman. (Levitico 26:21-33; Deuteronomio 28:49-68) Ang pungsod malaglag, ang katawhan itapok, kag ang duta mahapay. Indi na makita ni Isaias ang paglaglag sang Babilonianhon nga mga hangaway sa Jerusalem kag sa templo sini sa 607 B.C.E., apang magapanagna sia sing kapin sa 40 ka tuig, tubtob sa paggahom sang apo sa tuhod ni Hari Uzzias nga si Ezequias. Walay sapayan, matutom nga padayunon ni Isaias ang iya komisyon tubtob mapatay sia, kapin sa 100 ka tuig antes matabo ina nga pagkalaglag sang pungsod.

19. Bisan pa ang pungsod pudlon kaangay sang isa ka kahoy, ano ang ginpasalig sang Dios kay Isaias?

¹⁹ Ang kalaglagan nga magabilin sang Juda nga “nahapay” pat-od gid nga matabo, apang may paglaum pa ang kahimtangan. (2 Hari 25:1-26) Ginpasalig ni Jehova si Isaias: “May mabilin pa nga ikapulo didto, kag ini liwat mangin isa ka butang nga sulunugon, subong sang isa ka daku nga kahoy kag subong sang isa ka mataas nga kahoy nga kon utdon ini, may yara isa ka tuod; isa ka balaan nga binhi ang mangin tuod sini.” (Isaias 6:13) Huo, magapabilin ang “ikapulo, . . . isa ka balaan nga binhi,” kaangay sang tuod sang isa ka daku nga kahoy nga ginpulod. Walay duhaduha nga ini nga pasalig naglugpay kay Isaias—may balaan nga mga nagkalabilin nga masapwan sa tunga sang iya katawhan. Bisan pa makapila nasunog ang pungsod, kaangay sang daku nga kahoy nga ginpulod agod igatong, may mabilin nga isa ka importante nga tuod sang simbuliko nga kahoy sang Israel. Mangin isa ini ka binhi, ukon gutok, nga balaan kay Jehova. Sa ulihi, manalingsing ini liwat, kag magatubo liwat ang kahoy.—Ipaanggid ang Job 14:7-9; Daniel 4:26.

20. Paano una nga natuman ang katapusan nga bahin sang tagna ni Isaias?

²⁰ Nagmatuod bala ang mga pulong sang tagna? Huo. Pagligad sang kapituan ka tuig sa tapos mahapay ang duta sang Juda, ang mahinadlukon sa Dios nga mga nagkalabilin nagbalik gikan sa pagkabihag sa Babilonia. Ginpatindog nila liwat ang templo kag ang siudad, kag ginpasag-uli nila ang matuod nga pagsimba sa duta. Bangod ginpasag-uli ang mga Judiyo sa ila dutang natawhan nga ginhatag sa ila sang Dios, nangin posible ang ikaduha nga katumanan sini nga tagna nga ginhatag ni Jehova kay Isaias. Ano ina?—Esdras 1:1-4.

Iban Pa nga mga Katumanan

21-23. (a) Kay sin-o natuman ang tagna ni Isaias sang nahauna nga siglo, kag paano? (b) Sin-o ang “balaan nga binhi” sang nahauna nga siglo, kag paano ini natipigan?

²¹ Ang matagnaon nga hilikuton ni Isaias naglandong sang hilikuton nga himuon sang Mesias, si Jesucristo, pagligad sang mga 800 pa ka tuig. (Isaias 8:18; 61:1, 2; Lucas 4:16-21; Hebreo 2:13, 14) Bisan daku pa sia kay Isaias, handa man si Jesus nga ipadala sang iya langitnon nga Amay, nga nagsiling: “Yari karon! Nag-abot ako sa paghimo sang imo kabubut-on.”—Hebreo 10:5-9; Salmo 40:6-8.

²² Kaangay ni Isaias, matutom nga gintuman ni Jesus ang hilikuton nga ginpahimo sa iya kag amo man nga reaksion ang nasumalang niya. Kaangay sang mga tawo nga ginbantalaan ni manalagna Isaias wala man pagbatuna sang mga Judiyo sang adlaw ni Jesus ang iya mensahe. (Isaias 1:4) Naggamit si Jesus sing mga ilustrasyon sa iya ministeryo. Bangod sini, namangkot ang iya mga disipulo: “Ngaa nagapamulong ikaw sa ila paagi sa paggamit sing mga ilustrasyon?” Si Jesus nagsabat: “Sa inyo ginhatag ang paghangop sa sagrado nga mga tinago sang ginharian sang mga langit, apang sa sina nga mga tawo wala ini ginhatag. Amo sini kon ngaa nagapamulong ako sa ila paagi sa paggamit sing mga ilustrasyon, kay, sa pagtulok, sila nagatulok nga walay pulos, kag sa pagpamati, sila nagapamati nga walay pulos, kag indi man nila mahangpan ang kahulugan sini; kag natuman sa ila ang tagna ni Isaias, nga nagasiling, ‘Sa pagpamati, makabati kamo apang indi gid ninyo mahangpan ang kahulugan sini; kag, sa pagtulok, magatulok kamo apang indi gid kamo makakita. Kay ang tagipusuon sining katawhan nangin di-mabinatunon, kag sa ila mga dulunggan nakabati sila nga wala sing pagsabat, kag ginpiyong nila ang ila mga mata; agod indi gid makita sang ila mga mata kag mabatian sang ila mga dulunggan kag mahangpan ang kahulugan sini sa ila tagipusuon kag manumbalik, kag ayuhon ko sila.’”—Mateo 13:10, 11, 13-15; Marcos 4:10-12; Lucas 8:9, 10.

²³ Sa pagbalikwat gikan sa Isaias, ginpakita ni Jesus nga ang tagna may katumanan sang iya adlaw. Ang panimuot sang tagipusuon sang katawhan sa kabilugan kaangay gid sang mga Judiyo sang panahon ni Isaias. Nangin bulag kag bungol sila sa iya mensahe kag gani nalaglag man sila. (Mateo 23:35-38; 24:1, 2) Natabo ini sang ginsalakay sang Romanong mga hangaway sa idalom ni Heneral Tito ang Jerusalem sang 70 C.E. kag ginlaglag ang siudad kag ang templo sini. Apang, ang iban namati kay Jesus kag nangin mga disipulo niya. Si Jesus nagsiling nga “malipayon” sila. (Mateo 13:16-23, 51) Ginpahibalo niya sila nga kon makita nila ang “Jerusalem nga nalikupan sang nagkampo nga mga hangaway,” dapat sila ‘malagyo sa mga bukid.’ (Lucas 21:20-22) Sa amo ang “balaan nga binhi” nga nagpakita sing pagtuo kag ginhimo nga isa ka espirituwal nga pungsod, “ang Israel sang Dios,” naluwas.a—Galacia 6:16.

24. Paano gin-aplikar ni Pablo ang tagna ni Isaias, kag ano ang ginapakita sini?

²⁴ Sang mga 60 C.E., si apostol Pablo ginbilanggo sa iya balay sa Roma. Didto naghimo sia sing kahimusan nga makigkita sa “nagapanguna nga mga lalaki sang mga Judiyo” kag sa iban pa kag naghatag sa ila sing “bug-os nga pagpanaksi tuhoy sa ginharian sang Dios.” Sang madamo ang wala magbaton sang iya mensahe, ginpaathag ni Pablo nga katumanan ini sang tagna ni Isaias. (Binuhatan 28:17-27; Isaias 6:9, 10) Gani naghimo ang mga disipulo ni Jesus sing komisyon nga kaanggid sa ginhimo ni Isaias.

25. Ano ang nahantop sang modernong-adlaw nga mga Saksi sang Dios, kag ano ang ila reaksion?

²⁵ Sing kaanggid, nahantop sang mga Saksi ni Jehova karon nga si Jehova nga Dios yara sa iya balaan nga templo. (Malaquias 3:1) Kaangay ni Isaias, sila nagasiling: “Yari ako! Ipadala ako.” Sing makugi, ginapalanog nila ang nagapaandam nga mensahe nahanungod sa nagahilapit nga katapusan sining malaut nga sistema sang mga butang. Apang, subong ginpakita ni Jesus, pila lamang ka mga tawo ang nagamuklat sang ila mga mata kag nagabukas sang ila mga dulunggan agod makakita sila kag makabati kag maluwas. (Mateo 7:13, 14) Malipayon, sa pagkamatuod, ang mga nagaliso sang ila tagipusuon agod mamati kag “ayuhon ang ila kaugalingon”!—Isaias 6:8, 10.

[Mga nota]

[Retrato sa pahina 94]

“Yari ako! Ipadala ako.”

[Kapsion sa pahina 97]

‘Tubtob nga ang siudad malaglag, nga wala sing pumuluyo’