Magkasadya kay Jehova!

“Magkasadya pirme sa Ginuo. Sa liwat magasiling ako, Magkasadya!”​—⁠FILIPOS 4:⁠4.

 1. Ngaa mahimo matingala kita kon ano ang buot silingon ni Pablo sang magsiling sia nga ang mga Cristiano dapat pirme magkasadya?

KARON nga mga adlaw, mahimo nga malaka lang ang mga rason sa pagkasadya. Ang mga tawo nga gikan sa yab-ok, bisan ang matuod nga mga Cristiano, nagasumalang sing mga kahimtangan nga nagapasubo​—⁠pagkawalay trabaho, balatian, kamatayon sang mga hinigugma, mga problema sa personalidad, ukon pagpamatok sang ditumuluo nga mga katapo sang pamilya ukon mga abyan anay. Gani paano naton hangpon ang laygay ni Pablo, “Magkasadya pirme”? Bangod sang dimakalilipay kag mabudlay nga mga kahimtangan nga dapat naton tanan atubangon, posible gid bala ini? Ang pagbinagbinag sang konteksto sining mga pulong magabulig sa pagpaathag sini.

Magkasadya​—⁠Ngaa kag Paano?

 2, 3. Daw ano ka importante ang kalipay, subong gin-ilustrar sa bahin ni Jesus kag sang dumaan nga mga Israelinhon?

² “Magkasadya pirme sa Ginuo. Sa liwat magasiling ako, Magkasadya!” Mahimo nga pahanumdumon kita sini sang mga pulong nga ginpatuhoy sa mga Israelinhon sang mga 24 ka siglo nga nagligad: “Ang kalipay ni Jehova amo ang inyo kuta,” ukon suno sa Moffatt nga badbad: “Ang pagkasadya sa Dayon inyo kusog.” (Nehemias 8:10) Ang kalipay nagahatag sing kusog kag mapaanggid sa isa ka kuta nga sarang makuhaan sang isa sing paumpaw kag pag-amlig. Ang kalipay nakabulig bisan gani sa himpit nga tawo nga si Jesus sa pagbatas. “Bangod sang kalipay nga ginbutang sa iya atubang ginbatas niya ang usok sang pag-antos, gintamay ang kahuya, kag naglingkod sa tuo sang trono sang Dios.” (Hebreo 12:⁠2) Sing maathag, ang pagkalipay walay sapayan sang mga kabudlayan importante para sa kaluwasan.

³ Antes magsulod sa Ginsaad nga Duta, ginsugo ang mga Israelinhon: “Dapat ka magkasadya sa tanan nga kaayuhan nga nahatag sa imo ni Jehova nga imo Dios kag sa imo panimalay, ikaw kag ang Levinhon, kag ang manlulugayaw nga yara sa tunga nimo.” Malubha ang mangin mga resulta sang kapaslawan sa pag-alagad kay Jehova nga may pagkasadya. “Ini tanan nga pagpakamalaut magaabot sa imo kag magalagas sa imo kag magalambot sa imo tubtob nga malaglag ka . . . bangod nga wala ka mag-alagad kay Jehova nga imo Dios nga may kasadya kag kalipay sa tagipusuon bangod sang kabugana sang tanan nga butang.”​—⁠Deuteronomio 26:11; 28:​45-47.

 4. Ngaa mahimo kita mapaslawan sa pagkasadya?

⁴ Busa, kinahanglanon gid nga magkasadya ang hinaplas nga nagkalabilin karon kag ang ila “iban nga karnero” nga mga kaupod! (Juan 10:16) Sa pagsulit ni Pablo sa iya laygay, “sa liwat magasiling ako,” ginpadaku niya ang pagkaimportante sang pagkasadya bangod sang tanan nga kaayuhan nga nahimo ni Jehova para sa aton. Amo bala kita sini? Ukon tuman bala kita kasako sa aton adlaw-adlaw nga pagsinalayo nga kon kaisa nagakalipat kita sa aton madamo nga rason sa pagkasadya? Nagahantal bala ang mga problema sing tuman kataas sa bagay nga ginalipnan sini ang aton pagtulok sa Ginharian kag sa mga pagpakamaayo sini? Ginatugutan bala naton ang iban nga mga butang​—⁠paglapas sa mga kasuguan sang Dios, pagsikway sa mga prinsipio sang Dios, ukon pagpatumbaya sa Cristianong mga katungdanan⁠—​nga magdula sang aton kalipay?

 5. Ngaa nabudlayan sa pagkasadya ang isa ka dimakatarunganon nga tawo?

⁵ “Ipakilala sa tanan nga tawo ang inyo pagkamakatarunganon. Ang Ginuo malapit na.” (Filipos 4:⁠5) Ang isa ka dimakatarunganon nga tawo kulang sing balanse. Mahimo nga wala niya ginatatap sing nagakaigo ang iya lawas, ginapaidalom ang iya lawas sa sobra nga tension ukon kabalaka. Ayhan wala sia makatuon nga batunon ang iya mga limitasyon kag magkabuhi nahisuno sa sini. Mahimo nga tuman kataas sang iya mga tulumuron kag dayon ginatinguhaan niya nga lab-uton ini bisan ano man ang bili. Ukon mahimo nga gamiton niya ang iya mga limitasyon subong balibad sa paghinay ukon sa pag-uyaya. Bangod kulang sing balanse kag indi makatarunganon, nabudlayan sia sa pagkasadya.

 6. (a) Ano dapat ang makita sa aton sang mga masigka-Cristiano, kag san-o lamang mangin amo sini? (b) Paano ang mga pinamulong ni Pablo sa 2 Corinto 1:24 kag Roma 14:4 nagabulig sa aton nga mangin makatarunganon?

⁶ Bisan pa ginatamod kita sang mga manugpamatok subong mga panatiko, dapat pirme makita sang mga masigka-Cristiano ang aton pagkamakatarunganon. Kag amo matuod kon balanse kita kag wala nagapaabot sing kahimpitan gikan sa aton kaugalingon kag sa iban. Labaw sa tanan, dapat naton likawan ang pagpapas-an sing mga lulan sa iban nga lampas sa ginapatuman sang Pulong sang Dios. Si apostol Pablo nagsiling: “Indi nga mga agalon kami sang inyo pagtuo, kundi kami mga masigkamanugpangabudlay para sa inyo kalipay.” (2 Corinto 1:24) Subong isa ka Fariseo anay, nahibaluan gid ni Pablo nga ang estrikto nga mga pagsulundan nga ginahatag kag ginapatuman sang mga yara sa awtoridad nagapugong sang kalipay, samtang ang mga panugda sang mga masigkamanugpangabudlay magapadugang sini. Ang kamatuoran nga “ang Ginuo malapit na” dapat magpahanumdom sa makatarunganon nga tawo nga indi kita dapat ‘maghukom sa alagad sang isa. Sa iya kaugalingon nga agalon nagatindog ukon nagakapukan sia.’​—⁠Roma 14:⁠4.

 7, 8. Ngaa dapat paabuton sang mga Cristiano nga magaatubang sila sing mga problema, apang paano posible nga makapadayon sila sa pagkasadya?

⁷ “Dili kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.” (Filipos 4:⁠6) Nagaeksperiensia kita karon sing “makahalanguyos nga mga tion nga mabudlay pakig-angutan” nga ginsulat ni Pablo. (2 Timoteo 3:​1-5) Gani dapat paabuton sang mga Cristiano nga magaatubang sila sing mga problema. Ang mga pulong ni Pablo nga “magkasadya pirme” wala nagapuwera sang posibilidad nga ang isa ka matutom nga Cristiano mahimo kon kaisa makaeksperiensia sing kapung-aw ukon pagluya sang buot. Sa bahin ni Pablo realistiko nga ginbaton niya: “Ginaipit kami sa tagsa ka luyo, apang indi sa paagi nga indi kami makahulag; ginapalibog, apang indi sing bug-os nga wala kami sing maguwaan; ginahingabot, apang wala mapatumbayai; ginapanglampusan, apang wala malaglag.” (2 Corinto 4:​8, 9) Apang, ginapahaganhagan kag sa ulihi ginalandas sang Cristianong kalipay ang umalagi nga kabalaka kag kasubo. Ginahatag sini ang kinahanglanon nga kusog nga mangin determinado sa pagpadayon, nga wala gid ginakalipatan ang madamo nga rason sa pagkasadya.

⁸ Kon mag-utwas ang mga problema, bisan ano man ini, ang malipayon nga Cristiano mapainubuson nga nagapangayo sang bulig ni Jehova paagi sa pangamuyo. Wala sia nagapadaug sa sobra nga kabalaka. Sa tapos mahimo ang iya masarangan sa paglubad sang problema, ginabilin niya ang resulta sa mga kamot ni Jehova nahisanto sa imbitasyon: “Itungtong kay Jehova ang imo lulan, kag sia mismo magaalay-ay sa imo.” Sa tapos mahimo ini, padayon nga ginapasalamatan sang Cristiano si Jehova bangod sang tanan Niya nga kaayuhan.​—⁠Salmo 55:22; tan-awa man ang Mateo 6:​25-34.

 9. Paano ang ihibalo sa kamatuoran nagahatag sing mahidaiton nga hunahuna, kag ano ang maayo nga epekto sini sa isa ka Cristiano?

⁹ “Ang paghidait sang Dios nga nagalabaw sa tanan nga panghunahuna magabantay sang inyo mga tagipusuon kag sang inyo mga ikasarang sa paghunahuna paagi kay Cristo Jesus.” (Filipos 4:⁠7) Ang ihibalo sa kamatuoran sang Biblia nagahilway sa hunahuna sang Cristiano gikan sa kabutigan kag nagabulig sa iya sa pagpalambo sing maayo nga mga pagsulundan sang paghunahuna. (2 Timoteo 1:13) Sa amo, ginabuligan sia nga likawan ang sayop ukon dimaalamon nga paggawi nga mahimo makahalit sang iya mahidaiton nga mga kaangtanan sa iban. Sa baylo nga magluya bangod sang inhustisya kag kalautan, ginapahamtang niya ang iya pagsalig kay Jehova sa paglubad sang mga problema sang katawhan paagi sa Ginharian. Ina nga paghidait sang hunahuna nagabantay sang iya tagipusuon, nagahupot sang iya mga motibo nga putli, kag nagatuytoy sang iya panghunahuna sa dalanon sang pagkamatarong. Nian, ang putli nga mga motibo kag husto nga panghunahuna nagahatag sing dimaisip nga mga rason sa pagkasadya, walay sapayan sang mga problema kag mga pag-ipit nga ginadala sang magamo nga kalibutan.

 10. Ang matuod nga kalipay maeksperiensiahan lamang paagi sa paghambal ukon paghunahuna sing ano?

¹⁰ “Sa katapusan, mga kauturan, ang bisan anong mga butang nga matuod, ang bisan anong mga butang nga hunahunaon sing serioso, ang bisan anong mga butang nga matarong, ang bisan anong mga butang nga putli, ang bisan anong mga butang nga hiligugmaon, ang bisan anong mga butang nga ginahambal sing maayo, kon may maayong kinaiya kag kon may butang nga dalayawon, padayon nga binagbinaga ining mga butang.” (Filipos 4:⁠8) Ang isa ka Cristiano wala nagakalipay sa paghambal ukon sa paghunahuna nahanungod sa malain nga mga butang. Awtomatiko ini nga nagapuwera sang madamo nga kalingawan nga ginatanyag sang kalibutan. Wala sing bisan sin-o ang makahupot sing Cristianong kalipay kon pun-on niya ang iya hunahuna kag tagipusuon sing mga kabutigan, binuang nga mga lahog, kag sing mga butang nga dimatarong, imoral, wala sing maayo nga kinaiya, madinumtanon, kag makangilil-ad. Sa simple nga paghambal, wala sing bisan sin-o ang makatigayon sing matuod nga kalipay paagi sa pagpuno sang iya hunahuna kag tagipusuon sing kahigkuan. Sa garok nga kalibutan ni Satanas, makapalig-on gid ang mahibaluan nga ang mga Cristiano madamo gid sing maayong mga butang nga mahunahuna kag mahambalan!

Dimaisip nga mga Rason sa Pagkasadya

 11. (a) Ano ang dapat indi pagpasapayanan, kag ngaa indi? (b) Ano ang nangin epekto sa isa ka delegado kag sa iya asawa sang pagtambong sa isa ka internasyonal nga kombension?

¹¹ Kon nagahambal sing mga rason sa pagkasadya, indi naton pagkalipatan ang aton internasyonal nga paghiliutod. (1 Pedro 2:17) Samtang ang pungsudnon kag minoridad nga mga rasa sang kalibutan nagapabutyag sing daku nga dumot batok sa isa kag isa, ang katawhan sang Dios mahigugmaon nga nagatipon. Ang ila paghiusa ilabi na nga makita sa internasyonal nga mga kombension. Tuhoy sa isa nga ginhiwat sang 1993 sa Kiev, Ukraine, isa ka delegado gikan sa Estados Unidos ang nagsulat: “Ang mga luha sang kalipay, ang nagakilan nga mga mata, ang walay katapusan nga paghaksanay sang daw magpamilya, ang mga panamyaw nga ginapadala sa tabok sang halampangan nga latagon sang mga grupo nga nagawagayway sing de-kolor nga mga payong kag mga panyo maathag nga pamatuod sang teokratiko nga paghiusa. Puno sing bugal ang amon mga tagipusuon sa milagruso nga nahimo ni Jehova sa bug-os kalibutan nga paghiliutod. Tudok nga natandog sini kami sang akon asawa kag nagdugang ini sing bag-o nga kahulugan sa amon pagtuo.”

 12. Paano nagakatuman ang Isaias 60:22 sa atubangan gid sang aton mga mata?

¹² Makapalig-on gid sing pagtuo para sa mga Cristiano karon nga makita ang mga tagna sang Biblia nga nagakatuman sa atubangan gid sang ila mga mata! Binagbinaga, halimbawa, ang mga pulong sang Isaias 60:22: “Ang diutay mangin isa ka libo, kag ang diutay mangin mabakod nga pungsod. Ako mismo, si Jehova, magapadali sini sa iya tion.” Sang mabun-ag ang Ginharian sang 1914, ining diutay nga aktibo nga ­nagabantala, 5,100 lamang. Apang sa sulod sang nagligad nga lima ka tuig, ang kadamuon sang bug-os kalibutan nga paghiliutod nagadugang sa promedyo nga 5,628 ka bag-ong nabawtismuhan nga mga Saksi kada semana! Sang 1993, nalab-ot ang kataason nga 4,709,889 ka aktibo nga mga ministro. Hunahunaa lamang! Nagakahulugan ini nga “ang diutay” sang 1914 literal nga malapit na sa “isa ka libo”!

 13. (a) Ano ang nagakatabo sugod sang 1914? (b) Paano ginatuman sang mga Saksi ni Jehova ang prinsipio sang mga pulong ni Pablo sa 2 Corinto 9:⁠7?

¹³ Sugod sang 1914 ang Mesianikong Hari naggahom sa tunga sang iya mga kaaway. Ang iya paggahom ginsakdag sang handa nga tawhanon nga mga sumulunod nga nag-amot sing tion, kusog, kag kuwarta sa pagpadayon sang bug-os kalibutan nga pagbantala nga hilikuton subong man sang internasyonal nga kampanya sa pagpatindog. (Salmo 110:​2, 3) Nagakasadya ang mga Saksi ni Jehova nga may kuwarta nga ginaamot agod matapos ining mga hilikuton, bisan pa talagsa lang ginasambit sa ila mga miting ang kuwarta.⁠a (Ipaanggid ang 1 Cronica 29:⁠9.) Indi kinahanglan nga itulod ang matuod nga mga Cristiano sa pag-amot; ginakabig nila nga isa ka pribilehiyo ang sakdagon ang ila Hari tubtob sa masarangan nila, ang tagsatagsa “suno sa ginpamat-od niya sa iya tagipusuon, nga indi malain ang buot ukon ginapilit.”​—⁠2 Corinto 9:⁠7.

 14. Anong kahimtangan sa tunga sang katawhan sang Dios ang nangin maathag sugod sang 1919, nagahatag sa ila sing anong rason sa pagkasadya?

¹⁴ Ang gintagna nga pagpasag-uli sang matuod nga pagsimba sa tunga sang katawhan sang Dios nagresulta sa pagtuga sing isa ka espirituwal nga paraiso. Sugod sang 1919 amat-amat nga ginpasangkad sini ang iya mga dulunan. (Salmo 14:7; Isaias 52:​9, 10) Ang resulta? Ang matuod nga mga Cristiano nakaeksperiensia sing “kasadya kag kalipay.” (Isaias 51:11) Ang resulta nga maayong bunga isa ka pamatuod sang sarang mahimo sang balaan nga espiritu sang Dios paagi sa dihimpit nga mga tawo. Ang tanan nga kadungganan iya ni Jehova, apang ano pa nga pribilehiyo ang mas daku sa mangin masigkamanugpangabudlay sang Dios? (1 Corinto 3:⁠9) Ang gahom ni Jehova may ikasarang sa pagpahulag sa mga bato, kon kinahanglanon, nga ibantala ang mensahe sang kamatuoran. Walay sapayan, ginpili niya nga indi paggamiton ini kundi, sa baylo, pahulagon ang handa nga mga tinuga gikan sa yab-ok nga himuon ang iya kabubut-on.​—⁠Lucas 19:⁠40.

 15. (a) Anong modernong mga hitabo ang ginabantayan naton nga may interes? (b) Ano nga okasyon ang ginapaabot naton nga may pagkasadya?

¹⁵ Puno sing kapunaw, ginabantayan karon sang mga alagad ni Jehova ang mga hitabo sa kalibutan nga may kaangtanan sa talalupangdon nga mga tagna sang Biblia. Ang mga pungsod nagatinguha sing lakas​—⁠apang nagakapaslawan​—⁠sa pagtigayon sing mabakod nga paghidait. Ang mga hitabo nagapilit sa ila nga mangabay sa Nasyones Unidas nga organisasyon sa paghikot sa mga duog sa kalibutan nga may ginamo. (Bugna 13:​15-17) Samtang sa amo man nga tion, may dakung kalangkag nga ginapaabot sang katawhan sang Dios ang isa sang labing makalilipay nga mga okasyon nga mahanabo, isa nga nagaamat-amat lapit sa kada adlaw. “Magkalipay kita kag magkasadya sing lakas, kag maghimaya sa iya, kay ang kasal sang Kordero nag-abot kag nakaaman na ang iya asawa.”​—⁠Bugna 19:⁠7.

Pagbantala​—⁠Isa ka Lulan Ukon Isa ka Kalipay?

 16. Iilustrar kon paano ang kapaslawan sa pagbuhat sang iya natun-an makadula sang kalipay sang isa ka Cristia⁠no.

¹⁶ “Ang mga butang nga inyo natun-an kag nabaton kag nabatian kag nakita may kaangtanan sa akon, buhata ini; kag ang Dios sang paghidait mangin kaupod ninyo.” (Filipos 4:⁠9) Paagi sa pagbuhat sang natun-an nila, makapaabot ang mga Cristiano sa pagbaton sang pagpakamaayo sang Dios. Ang isa sang labing importante nga mga butang nga natun-an nila amo nga kinahanglan ibantala ang maayong balita sa iban. Sa pagkamatuod, sin-o ang makatigayon sing malinong nga panghunahuna ukon mangin malipayon kon gindingot niya sa bunayag sing tagipusuon nga mga tawo ang impormasyon nga sa diin ang kabuhi gid sining mga tawo nasandig sa pagpamati sa sini?​—⁠Ezequiel 3:​17-21; 1 Corinto 9:16; 1 Timoteo 4:⁠16.

 17. Ngaa dapat kita malipay sa aton pagbantala nga hilikuton?

¹⁷ Makalilipay gid makita ang tulad-karnero nga mga tawo nga handa makatuon nahanungod kay Jehova! Sa pagkamatuod, ang mga nagaalagad upod ang husto nga motibo makasapo gid pirme sing kalipay sa pag-alagad sa Ginharian. Amo sini bangod ang una nga rason sang mangin isa ka Saksi ni Jehova amo ang pagdayaw sa Iya ngalan kag sakdagon ang Iya posisyon subong Soberanong Manuggahom. (1 Cronica 16:31) Ang tawo nga nagakilala sining kamatuoran magakasadya bisan pa kon dimaalamon nga sikwayon sang mga tawo ang maayong balita nga iya ginadala. Nahibaluan niya nga ang pagbantala sa mga ditumuluo matapos sa pila ka adlaw; ang pagdayaw sa ngalan ni Jehova magapadayon tubtob sa walay katubtuban.

 18. Ano ang nagapahulag sa isa ka Cristiano sa paghimo sa kabubut-on ni Jehova?

¹⁸ Ang matuod nga relihion nagapahulag sa mga nagabuhat sini nga himuon ang mga butang nga ginapatuman ni Jehova, indi bangod dapat nila himuon ini, kundi bangod luyag nila himuon ini. (Salmo 40:8; Juan 4:34) Madamo nga tawo ang nabudlayan sa paghangop sini. Ginsilingan isa ka bes sang isa ka babayi ang isa ka Saksi nga nagduaw sa iya: “Abi mo, dapat ko kamo hatagan sing komendasyon. Indi gid ako magpamalaybalay nga nagabantala nahanungod sa akon relihion subong sang ginahimo ninyo.” Ang Saksi nagsabat nga nagayuhum: “Nahangpan ko kon ano ang ginabatyag mo. Antes ako mangin isa sang mga Saksi ni Jehova, indi mo ako mapakadto sa iban nga mga tawo agod hambalon sila nahanungod sa relihion. Apang karon luyag ko na.” Nagpamensar ang babayi sa makadali kag dayon naghinakop: “Maathag nga ang inyo relihion may butang nga matanyag nga wala ginatanyag sang akon relihion. Ayhan dapat ako mangusisa.”

 19. Ngaa karon gid ang tion sa pagkasadya subong wala pa gid matabo sang una?

¹⁹ Ang teksto para sa tuig sang 1994, nga ginapasundayag sa aton mga Kingdom Hall, regular nga nagapahanumdom sa aton: “Magsalig kay Jehova upod sa imo bug-os nga tagipusuon.” (Hulubaton 3:⁠5) May magalabaw pa bala nga rason sa pagkasadya sangsa pagpahamtang sang aton pagsalig kay Jehova, ang aton kuta nga aton ginadangpan? Ang Salmo 64:10 nagapaathag: “Ang matarong magakasadya kay Jehova kag sa pagkamatuod magadangop sa iya.” Indi ini tion sa pag-alang-alang ukon sa pag-ampo. Ang tagsa ka nagaligad nga bulan amat-amat nga nagapapalapit sa aton sa katumanan sang ginkalangkagan nga makita sang mga alagad ni Jehova kutob sang mga adlaw ni Abel. Karon na ang tion nga magsalig kay Jehova sa bug-os naton nga tagipusuon, kay nahibaluan naton nga wala pa gid matabo sang una nga may madamo kita nga rason sa pagkasadya!

[Footnote]

Paano Mo Sabton?

◻ Ngaa, suno sa Nehemias 8:​10, dapat kita magkasadya?

◻ Paano ginapakita sang Deuteronomio 26:11 kag 28:​45-47 ang pagkaimportante sang pagkasadya?

◻ Paano ang Filipos 4:​4-9 makabulig sa aton nga magkasadya pirme?

◻ Ano nga rason sa pagkasadya ang ginahatag sa aton sang teksto para sa tuig sang 1994?

[Piktyur sa pahina 16]

Ang Ruso kag Aleman nga mga Saksi nagakasadya nga mangin bahin sang isa ka internasyonal nga paghiliutod

[Piktyur sa pahina 17]

Ang pagpaambit sing kamatuoran sa iban isa ka kabangdanan sang pagkasadya