Nagapuyo sing Tingob sa Ginpasag-uli nga “Duta”

“Apang kamo pagatawgon nga mga saserdote ni Jehova; pagatawgon kamo nga mga ministro sang aton Dios.”​—⁠ISAIAS 61:⁠6.

 1, 2. (a) Ano ang kahimtangan sang mga proselita sa Israel? (b) Anong espiritu ang ginapakita sang “dakung kadam-an” sa modernong tion?

SADTONG dumaan nga mga tion, sang matutom pa ang Israel nag-alagad ini subong isa ka saksi sa himaya ni Jehova sa danyag sang kalibutan. (Isaias 41:​8, 9; 43:​10) Madamo nga dumuluong ang napahulag kag nagsimba kay Jehova upod sa Iya pinili nga katawhan. Sa pagkamatuod, ginsiling nila sa Israel ang ginsiling ni Rut kay Noemi: “Ang imo katawhan mangin akon katawhan, kag ang imo Dios mangin akon Dios.” (Rut 1:⁠16) Nagpasakop sila sa mga ginapatuman sang Kasuguan nga katipan, ang mga lalaki nagpasirkunsidar. (Exodo 12:​43-48) Ang iban sa mga babayi nagpamana sing mga Israelinhon. Si Rahab nga taga-Jerico kag si Ruth nga Moabita nangin mga katigulangan ni Jesucristo. (Mateo 1:5) Ini nga mga proselita bahin anay sang kongregasyon sang Israel.​—⁠Deuteronomio 23:​7, 8.

² Kaangay sa mga proselita sa Israel, ang “dakung kadam-an” sa karon nagsiling sa nagkalabilin nga hinaplas: “Magaupod kami sa inyo, kay nabatian namon nga ang Dios nagaupod sa inyo.” (Bugna 7:​9; Zacarias 8:23) Ginakilala nila nga ining hinaplas nga mga Cristiano amo ang “matutom kag mainandamon nga ulipon” ni Jehova, kag nagapangabudlay sila sing suod upod sa ila sa amo ang hinaplas kag ang “iban nga karnero” “isa ka panong, isa ka manugbantay.” (Mateo 24:​45-47; Juan 10:16) Ano ang matabo sa dakung kadam-an kon mabaton na sang tanan nila nga hinaplas nga mga kauturan ang ila langitnon nga padya? Indi sila dapat magkahadlok. Sa sulod sining “katapusan nga mga adlaw,” si Jehova may ginhimo nga paghanda para sa sina nga tion.​—⁠2 Timoteo 3:⁠1.

Isa ka Espirituwal nga “Duta”

 3. Ano ang “bag-ong mga langit” nga gintagna ni Pedro, kag san-o ini gintukod?

³ Ang langitnon nga paggahom nga kahimusan diin kabahin sa sini ang 144,000 ka hinaplas nga mga Cristiano gintagna anay ni apostol Pedro. Sia nagsiling: “Suno sa iya saad, nagahulat kita sing bag-ong mga langit kag bag-ong duta, diin magapuyo ang pagkamatarong.” (2 Pedro 3:13) Ining “bag-ong mga langit” gintukod sang 1914, sang ginpalingkod si Jesus subong Hari sa langitnon nga Ginharian. Apang kamusta ang “bag-ong duta”?

 4. (a) Anong wala ginapaabot nga hitabo ang natabo sang 1919? (b) Anong ‘pungsod ang natawo sa isa ka adlaw,’ kag anong ‘pungsod ang ginpanganak’?

⁴ Sang 1919, ginpaguwa ni Jehova ang nagkalabilin nga hinaplas gikan sa pagkaulipon sa Babilonia nga Daku. (Bugna 18:4) Wala gid ginpaabot sang mga lider sang Cristiandad ining dramatiko nga hitabo. Nahanungod sini, ang Biblia nagasiling: “Sin-o bala ang nakabati sang among butang? Sin-o ang nakakita sang among mga butang? Matawo bala ang isa ka duta sa isa ka adlaw? Ukon ipanganak bala ang isa ka pungsod sa makaisa lamang?” (Isaias 66:8) Sang ang hinaplas nga kongregasyon hinali nga nagtuhaw sa atubangan sang mga pungsod subong isa ka ginhilway nga katawhan, isa gid ini ka pungsod nga ‘ginpanganak sing makaisa lamang.’ Ano, nian, ang “duta”? Sa isa ka kahulugan, amo ini ang espirituwal nga katumbas sang duta sang dumaan nga Israel. Amo ini ang duog sang hilikuton nga ginhatag sa bag-o natawo nga “pungsod,” isa ka duog diin ang mga tagna tuhoy sa Paraiso sa tulun-an ni Isaias may moderno, espirituwal nga katumanan. (Isaias 32:​16-20; 35:​1-7; ipaanggid ang Hebreo 12:​12-14.) Bisan diin man nga duog ang isa ka Cristiano sa pisikal nga paagi, yara sia sa sina nga “duta.”

 5. Anong importante nga butang ang nagluntad sang 1919? Ipaathag.

⁵ Ano ang labot sini sa “bag-ong duta” nga gintagna ni Pedro? Buweno, inang bag-ong “pungsod,” nga natawo sang 1919 sa isa ka ginpasag-uli nga “duta,” mangin isa ka bug-os kalibutan nga organisasyon nga ginahuman sang hinaplas kag di-hinaplas nga mga dumalayaw ni Jehova. Ining organisasyon makalampuwas sa Armagedon padulong sa bag-ong kalibutan sang Dios. Sa sining paagi ina nga pungsod sarang makabig subong ang sentro sang matarong nga katilingban sang tawo, ang bag-ong duta, nga magaluntad pagkatapos malaglag ang kalibutan ni Satanas.⁠a Sang tungatunga sang 1930, ang mga hinaplas, subong isa ka grupo, gintipon sa ginpasag-uli nga duta. Kutob sadto, ang igtalupangod ginpatuhoy sa pagtipon sa dakung kadam-an sang iban nga karnero, nga sa karon nagadamo na sing halos lima ka milyon. (Bugna 14:​15, 16) Sobra na bala ang pumuluyo sa “duta”? Indi, ang mga dulunan sini sarang mapasangkad tubtob sa kinahanglanon nga kasangkaron. (Isaias 26:15) Sa pagkamatuod, makakulunyag makita ang pagdamo sing pumuluyo sini samtang ginapuno sang hinaplas nga nagkalabilin ang “duta” sing “mga patubas”​—⁠makapapagros, makapabakod espirituwal nga pagkaon. (Isaias 27:6) Apang ano ang posisyon sining iban nga karnero sa ginpasag-uli nga “duta” sang katawhan sang Dios?

Mga Dumuluong nga Aktibo sa “Duta”

 6. Paano ang mga dumuluong nangin aktibo sa “duta” sang katawhan sang Dios?

⁶ Subong nga ang mga proselita sa duta sang Israel nagpasakop sa Mosaikong Kasuguan, ang dakung kadam-an karon sa ginpasag-uli nga “duta” nagatuman sang mga sugo ni Jehova. Gintudluan sang ila hinaplas nga mga kauturan, ginalikawan nila ang tanan nga porma sang butig nga pagsimba kag ginabantayan ang pagkabalaan sang dugo. (Binuhatan 15:​19, 20; Galacia 5:​19, 20; Colosas 3:5) Ginahigugma nila si Jehova sa bug-os nilang tagipusuon, hunahuna, kalag, kag kusog kag ginahigugma ang ila isigkatawo subong sang ila kaugalingon. (Mateo 22:​37; Santiago 2:8) Sa dumaan nga Israel ang mga proselita nagbulig sa pagtukod sang templo ni Solomon kag nagsakdag sa pagpasag-uli sang matuod nga pagsimba. (1 Cronica 22:​2; 2 Cronica 15:​8-14; 30:25) Sa karon, ang dakung kadam-an nagapakigbahin man sa pagtukod nga mga proyekto. Halimbawa, nagbulig sila sa pagtukod sing mga kongregasyon kag mga sirkito, walay labot sa mga proyekto sing materyal nga pagtukod, subong sang mga Kingdom Hall, Assembly Hall, kag mga pasilidad sang sanga.

 7. Ano ang natabo sa nagbalik gikan sa tinapok nga Jerusalem sang tion nga kulang sing mga Levinhon sa pag-alagad sa templo?

⁷ Sang 537 B.C.E., sang ang Israel nagbalik gikan sa pagkatapok sa Babilonia, ginsugdan nila ang pag-organisar sing pag-alagad sa duog sang templo. Apang, diutay lamang ang mga Levinhon nga nagbalik. Busa, ang mga Netinim​—⁠sirkunsidado nga dumuluong nga mga pumuluyo nga mga kabulig anay sang mga Levinhon​—⁠ginhatagan sing dugang nga mga pribi­lehiyo sa pag-alagad sa templo. Apang, indi sila tupong sa hinaplas Aaroniko nga mga sa­serdote.⁠b​—⁠Esdras 7:​24; 8:​15-20; Nehemias 3:​22-26.

 8, 9. Paano ang iban nga karnero nakatigayon sing dugang nga bahin sang hilikuton sa paghimo sing balaan nga pag-alagad sa katapusan nga mga adlaw?

⁸ Ginsunod sang hinaplas nga mga Cristiano karon ini nga sulundan. Samtang nagahilapit ang “tion sang katapusan,” ang nagkalabilin sang mga hinaplas nagaamat diutay sa “duta” sang katawhan sang Dios. (Daniel 12:​9; Bugna 12:17) Bangod sini, ang dakung kadam-an amo karon ang nagahimo sing kalabanan nga hilikuton sang paghimo sing “balaan nga pag-alagad.” (Bugna 7:15) Nagasunod sa panuytoy sang ila hinaplas nga mga kauturan, “nagahalad sila sa Dios sing halad sang pagdayaw, nga amo, ang bunga sang mga bibig nga nagapahayag sang iya ngalan.” Wala nila “ginakalimtan ang paghimo sing maayo kag ang pagpaambit sang mga butang sa iban,” nakahibalo nga “sa amo nga mga halad nahamuot ang Dios.”​—⁠Hebreo 13:​15, 16.

⁹ Dugang pa, bangod sang linibo nga pag-uswag sang dakung kadam-an kada tuig, may yara nagauswag nga pagkinahanglan sing pagtatap. Mga hinaplas lamang ang nagahimo sini sang una. Sa karon, ang pagtatap sa kalabanan nga kongregasyon, subong man sang mga sirkito, distrito, kag mga sanga, kinahanglanon nga gintugyan sa iban nga karnero. Sang 1992 pila sa ila ang ginhatagan sing pribilehiyo sa pagtambong sa mga miting sang mga komite sang Nagadumala nga Hubon kag nagaalagad subong wala nagadesisyon nga mga kabulig. Sa gihapon, ang iban nga karnero nagapabilin nga mainunungon sa ila hinaplas nga masigka-Cristiano kag ginaapresyar ang pribilehiyo sa pagsakdag sa ila subong matutom kag mainandamon nga alagad ni Jehova.​—⁠Mateo 25:​34-40.

“Subong sang Isa ka (Sheikh) Pangulo”

 10, 11. Bilang pagsunod sa eksperiensia sang pila ka Filistinhon, paano ang pila ka kaaway anay sang katawhan sang Dios nagbag-o sing tagipusuon? Upod sa anong resulta?

¹⁰ Ang paagi nga gingamit sang matutom kag mainandamon nga ulipon ang iban nga karnero sa mga posisyon nga may daku nga responsabilidad natagna sa Zacarias 9:​6, 7. Didto aton mabasa: “Walaon ko ang bugal sang mga Filistinhon. Kag kuhaon ko ang iya dugo sa iya baba, kag ang iya mga kangil-aran gikan sa ulot sang iya mga ngipon, kag sia man mabilin nga sa aton Dios; mangin kasubong sia sang pangulo sa Juda, kag ang Ecron subong sang Jebusnon.”⁠c Ang mga Filistinhon sinumpa anay nga mga kaaway sang katawhan ni Jehova, kasubong sang kalibutan ni Satanas sa karon. (1 Juan 5:19) Subong nga ang mga Filistinhon ginlaglag sang ulihi subong katawhan, ini man nga kalibutan, upod ang iya relihioso, politikanhon, kag komersial nga mga bahin, makatilaw sa indi madugay sing malaglagon nga kaakig ni Jehova.​—⁠Bugna 18:​21; 19:​19-21.

¹¹ Apang, suno sa mga pinamulong ni Zacarias, may pila ka Filistinhon nga nagbag-o, kag ginlandong sini nga ang pila ka mga tawo sa kalibutan indi magapabilin nga kaaway ni Jehova. Untatan nila ang relihioso nga idolatriya upod ang makangilil-ad nga mga rito sini kag ang malaw-ay nga mga paghalad kag mangin matinlo sa mga mata ni Jehova. Sa aton adlaw inang nagbag-o nga “mga Filistinhon” masapwan sa dakung kadam-an.

 12. Sa modernong mga tion, paano ang “Ecron” nangin “kaangay sang Jebusnon”?

¹² Suno sa tagna, ang pangunang Filistinhon nga siudad sang Ecron mangin “kaangay sang Jebusnon.” Ang mga Jebusnon mga kaaway man anay sang Israel. Ginsakop nila ang Jerusalem tubtob nga ginlutos ini ni David. Walay sapayan, ang iban sadtong nakalampuwas sa mga inaway batok sa Israel pat-od nga nangin mga proselita. Nag-alagad sila sa duta sang Israel subong mga ulipon kag may pribilehiyo pa gani sa pagtrabaho sang ginpatindog ang templo. (2 Samuel 5:​4-9; 2 Cronica 8:​1-18) Sa karon, ang “mga Ecronhon” nga nagliso agod simbahon si Jehova may pribilehiyo man sang pag-alagad sa “duta” sa idalom sang pagtatap sang matutom kag mainandamon nga ulipon.

 13. Ano ang mga sheikh sa dumaan nga kalibutan?

¹³ Si Zacarias nagasiling nga ang mga Filistinhon mangin kaangay sang isa ka sheikh sa Juda. Ang Hebreong tinaga nga ’al·luphʹ, kon ginabadbad subong “sheikh,” nagakahulugan sing “pangulo sang isa ka libo” (ukon, “chiliarch”). Isa gid ini ka mataas nga posisyon. Ang dumaan nga pungsod sang Edom mahimo nga may 13 lamang ka sheikh. (Genesis 36:​15-19) Ang tinaga nga “sheikh” wala gingamit sing masami kon nagahambal tuhoy sa Israel, apang ang ekspresyon nga “pangulo (ukon, hepe) sang isa ka libo” masami nga makit-an. Sang ginpatawag ni Moises ang mga tiglawas sang pungsod sang Israel, gintawag niya ang “mga pangulo sang linibo sang Israel.”⁠d Dose sila ka bilog, nga pat-od nga manubo sangsa kay Moises. (Numeros 1:​4-16) Sing kaanggid, sa organisasyon sang mga hangaway, ang mga pangulo sang linibo ikaduha lamang sa heneral ukon sa hari.​—⁠2 Samuel 18:​1, 2; 2 Cronica 25:⁠5.

 14. Paano ang mga “Filistinhon” nangin kaangay karon sang mga sheikh?

¹⁴ Si Zacarias wala magtagna nga ang mahinulsulon nga mga Filistinhon pat-od nga mangin isa ka sheikh sa Israel. Indi ina nagakaigo, sanglit indi sia kinaugali nga Israelinhon. Apang mangin kaangay sia sang isa ka sheikh, nga nagauyat sing isa ka posisyon nga may awtoridad nga kaanggid sa isa ka sheikh. Kag nangin matuod ini. Samtang nagadiutay ang hinaplas nga mga Cristiano kag madamo sa mga buhi pa ang tigulang na, ang nahanas sing maayo nga iban nga karnero amo ang nagabulos, silingon pa. Indi nila luyag buslan ang ila hinaplas nga mga kauturan. Apang ang matutom kag mainandamon nga ulipon nagahatag sa ila sing awtoridad kon ano ang kinahanglanon sa “duta” agod ang organisasyon sang Dios padayon nga magauswag sa organisado nga paagi. Inang progresibo nga paagi makita sa isa pa ka tagna.

Mga Saserdote kag mga Mangunguma

 15. (a) Sa katumanan sang Isaias 61:​5, 6, sin-o “ang mga saserdote ni Jehova,” kag san-o sila nagaalagad sa sini nga ikasarang sa bug-os nga kahulugan? (b) Sin-o ang “mga dumuluong” nga naghimo sing hilikuton sang pagpanguma sang Israel, kag​—⁠sa espirituwal nga kahulugan​—⁠ano ang ginadalahig sining hilikuton?

¹⁵ Ang Isaias 61:​5, 6 mabasa: “Ang mga tagaluwas magatindog kag magapahalab sang inyo mga panong, ang mga dumuluong mangin inyo mga manug-arado kag inyo mga manugtatap sang ubas. Apang kamo, pagatawgon nga mga saserdote ni Jehova; pagatawgon kamo nga mga ministro sang aton Dios. Magakaon kamo sang manggad sang mga pungsod, kag sa ila himaya magapabugal kamo.” Sa karon ang “mga saserdote ni Jehova” amo ang hinaplas nga mga Cristiano. Sa ulihi kag bug-os nga kahulugan, magaalagad sila subong “mga saserdote ni Jehova . . . , mga ministro sang aton Dios,” sa langitnon nga Ginharian. (Bugna 4:​9-11) Sin-o ang “mga dumuluong” nga may salabton sa hilikuton sing pagpanguma? Sila amo ang iban nga karnero, nga nagapuyo sa “duta” sang Israel sang Dios. Ano ang pagbantay, pagpanguma, kag pagtatap sang ubasan nga gintugyan sa ila? Sa importante espirituwal nga kahulugan, ini nga mga hilikuton may kahilabtanan sa pagbulig, pag-atipan, kag pag-ani sa mga tawo.​—⁠Isaias 5:​7; Mateo 9:​37, 38; 1 Corinto 3:​9; 1 Pedro 5:⁠2.

 16. Sin-o sa ulihi ang magauyat sang tanan nga hilikuton sa “duta” sang katawhan sang Dios?

¹⁶ Sa karon, ang diutay nga kadamuon sang espirituwal nga mga Israelinhon nga nabilin sa duta nagapakigbahin sa espirituwal nga pagbantay, pagpanguma, kag pagtatap sang ubasan. Kon ang hinaplas nga kongregasyon sa kabug-usan mahiusa na sa ulihi upod kay Cristo, ining tanan nga hilikuton igabilin sa iban nga karnero. Bisan ang tawhanon nga pagtatap sa “duta” ibilin na sa mga kamot sang kalipikado nga iban nga karnero, nga suno sa tulun-an ni Ezequiel gintangdo subong isa ka pangulo nga klase.​—⁠Ezequiel, kapitulo 45, 46.⁠e

Ang “Duta” Nagapabilin

 17. Anong paghanda ang ginahimo ni Jehova sa sulod sining katapusan nga mga adlaw?

¹⁷ Huo, ang dakung kadam-an indi kinahanglan nga magkahadlok! Si Jehova nag-aman sing bugana para sa ila. Ang isa ka pinakaimportante nga hitabo sa duta sa sining katapusan nga mga adlaw amo ang pagtipon kag pagpat-in sa mga hinaplas. (Bugna 7:3) Apang, pagkatapos sini, ginpaupod ni Jehova ang iban nga karnero sa ila sa ginpasag-uli espirituwal nga duta. Didto espirituwal sila nga ginpakaon kag ginhanas sa Cristianong pagkabuhi. Dugang pa, gintudluan sila sing maayo sa balaan nga pag-alagad, lakip ang pagtatap. Bangod sini mapinasalamaton gid sila kay Jehova kag sa ila hinaplas nga mga kauturan.

 18. Paagi sa anong mga hitabo ang iban nga mga karnero magapabilin nga matutom sa “duta” sang espirituwal nga Israel?

¹⁸ Kon si Gog sang Magog magahimo sang iya katapusan nga pagsalakay sa katawhan sang Dios, ang iban nga karnero magatindog sing malig-on upod sa hinaplas nga nagkalabilin sa “duta sang minuro nga wala sing kuta.” Ang iban nga karnero magapabilin gihapon sa sina nga “duta” kon makalampuwas sila sa kalaglagan sang mga pungsod kag magasulod sila sa bag-ong kalibutan sang Dios. (Ezequiel 38:​11; 39:​12, 13; Daniel 12:​1; Bugna 7:​9, 14) Bangod nagapabilin nga matutom, indi nila kinahanglan nga biyaan pa inang matahom nga duog.​—⁠Isaias 11:⁠9.

 19, 20. (a) Sa bag-ong kalibutan, anong dakung pagtatap ang matigayon sang mga pumuluyo sang “duta”? (b) Ano ang aton ginapaabot upod ang daku nga kalangkag?

¹⁹ Ang dumaan nga Israel gingamhan anay sang tawhanon nga mga hari kag sing mga saserdote nga Levinhon. Sa bag-ong kalibutan, ang mga Cristiano may mas daku pa nga talatapon: Sa idalom ni Jehova nga Dios, magapasakop sila sa dakung Mataas nga Saserdote kag Hari, si Jesucristo, kag sa 144,000 nga kaupod nga mga hari kag mga saserdote​—⁠ang iban sa ila kilala nila anay subong ila Cristianong mga kauturan nga lalaki kag babayi sa duta. (Bugna 21:1) Ang matutom nga mga pumuluyo sang espirituwal nga duta magakabuhi sa duta nga ginpasag-uli sa isa ka literal nga paraiso, nagakalipay sa nagabulong nga mga pagpakamaayo nga ginapadala paagi sa Bag-ong Jerusalem.​—⁠Isaias 32:​1; Bugna 21:​2; 22:​1, 2.

²⁰ Samtang ang dakung langitnon nga kangga ni Jehova indi mapunggan nga nagaabante sa pagtuman sang iya mga katuyuan, kita tanan malangkagon nga nagapaabot sa paghimo sang aton gintangdo nga bahin. (Ezequiel 1:​1-28) Kon matuman na inang mga katuyuan, hunahunaa kon daw ano nga kalipay ang pagsaulog sa madinalg-on nga pagpakabalaan kay Jehova! Ang dakung ambahanon nga narekord sa Bugna 5:​13 pagaambahon sang tanan nga tinuga: “Sa Isa nga nagalingkod sa trono kag sa Cordero ang pagpakamaayo kag ang dungog kag himaya kag kagamhanan sa katuigan ­kag katuigan”! Kon bala ang aton duog mangin sa langit man ukon sa duta, indi bala nga ginahandum naton nga makadangat did­to, nagabuylog sang aton mga tingog sa si­ning makadalayaw nga ambahanon sang pagdayaw?

[Mga footnote]

Paano Mo Sabton?

◻ Anong “duta” ang ginpasag-uli sang 1919, kag paano ini napuno sing mga pumuluyo?

◻ Paano ang iban nga karnero ginhatagan sing dugang nga mga salabton sa “duta” sang napasag-uli nga katawhan sang Dios?

◻ Sa anong paagi ang mga katapo sang dakung kadam-an “kaangay sang Jebusnon”? “kaangay sang isa ka sheikh sa Juda”?

◻ Tubtob san-o ang matutom nga iban nga karnero magapabilin sa “duta”?

[Retrato sa pahina 23]

Ang modernong Filistinhon mangin “kaangay sang isa ka sheik sa Juda”

[Mga retrato sa pahina 24]

Ang hinaplas kag ang iban nga karnero magkaupod nga nagaalagad sa espirituwal nga duta