⁶ Ang mga sapat indi na magahalit ukon mangin peligro sa mga pumuluyo sa napasag-uli nga Paraiso. Ibalik sang Dios sa manubo nga mga tinuga ang nadula nga pagkahadlok sa mga tawo. Sa amo mapaabot naton ang literal nga katumanan sang makalilipay nga paglaragway sa mga sapat nga narekord sa Isaias 11:6-9 sa tion sang Milenyo nga Paggahom sang “Prinsipe sang Paghidait”:

⁷ “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. Kag ang baka kag ang oso magahalab; ang ila mga tinday magaluko sing tingob. Kag ang leon magakaon sing dagami kaangay sang baka. Kag ang bata nga nagasuso magahampang sa ibabaw sang buho sang dalitan nga man-ug; kag ang nalutas nga bata magakuot sang iya kamot sa palanaguan sang man-ug nga dalitan. Indi sila maghalit ukon maglaglag sa bug-os ko nga bukid nga balaan; kay ang duta matugob sang pagkilala kay Jehova subong nga ang mga tubig nagatabon sang dagat.”

⁸ Wala nagasinanto sa bahin sang Dios nga ipasulat ini nga tagna nga may espirituwal lamang nga kahulugan kag indi magapakita sina nga mga butang sa aktuwal nga kabuhi sa duta. Sing kaanggid, ang Isaias 65:25 nagasugid sa aton: “Ang lobo kag ang kordero magakaon sing tingob, kag ang leon magakaon sing dagami kaangay sang baka nga lalaki; kag ang yab-ok mangin kalan-on sang man-ug.” Nagakahulugan bala ini nga ang pamilya sang man-ug malaglag sa bilog-globo nga katamnan sang Eden? Indi, kay ang pagsiling sang tagna nga ang mangin kalan-on sang man-ug amo ang “yab-ok” nagakahulugan nga ang mga katapo sang pamilya sang reptilya indi na mangin makatalagam sa kabuhi kag maayong panglawas sang mga tawo. Kilalahon nila nga ang tawo amo ang ila agalon nga nagagahom sa tanan nga butang nga nagagiho sa ibabaw sang duta, subong ni Adan anay sa katamnan sang Eden sang ginhingalanan niya ang tanan nga sapat nga wala sing kahadlok.—Genesis 2:19, 20; Oseas 2:18.

¹¹ May kagamo pa bala sa bug-os-duta nga Paraiso bangod sa madamo nga hambal? Wala, bangod ang “Prinsipe sang Paghidait” ginapatuhuyan subong “Dios nga Gamhanan.” (Isaias 9:6) Sa amo sarang niya mabaliskad ang pagkagumon sang hambal nga nagsugod sa Torre sang Babel. (Genesis 11:6-9) Ano ang mangin isa ka hambal sang tanan nga dutan-on nga mga anak sang “Dayon nga Amay”? Amo bala ang orihinal nga hambal sang nahauna nga Adan, ang hambal nga ginhatag sa iya ni Jehova? Mahimo gid. Ano man ang matabo, ang tanan nga hambal nga mga sablag pagadulaon. Sarang ikaw makalakbay bisan diin kag makakomunikar sa katawhan. Mahangpan mo sila, kag mahangpan ka man nila. Mangin isa ang hambal para sa tanan nga katawhan, kag nagakaigo nga ang bug-os nga Biblia matigayon sa sina nga hambal. (Ipaanggid ang Sofonias 3:9.) Sa sina nga hambal ang bug-os nga duta mapuno sang pagkilala kay Jehova “subong nga ang mga tubig nagatabon sang dagat.”—Isaias 11:9.