Pag-alagad Upod sa Manugbantay

“Sa ibabaw sang lalantawan, O Jehova, nagatindog ako sing dalayon sa adlaw, kag sa akon ginabantayan yara ako sa tanan nga gab-i.”​—⁠ISAIAS 21:⁠8.

1. Sa anong makalilipay nga mga saad nga si Jehova mismo isa ka saksi?

SI Jehova amo ang Daku nga Manugtuyo. Ang rebelde nga anghel nga nangin si Satanas nga Yawa wala sing mahimo agod pamatukan ang Iya daku nga katuyuan nga pakabalaanon ang Iya ngalan kag tukuron ang mahimayaon nga paggahom sang Ginharian sa ibabaw sang paraiso nga duta. (Mateo 6:​9, 10) Sa idalom sina nga pagginahom, ang katawhan pakamaayuhon gid. “Lamunon [sang Dios] ang kamatayon sing dayon, kag pahiran sang Soberanong Ginuo nga si Jehova ang mga luha gikan sa tanan nga nawong.” Ang malipayon kag nahiusa nga katawhan magaagom sing paghidait kag kabuganaan sa walay katubtuban. (Isaias 25:​8; 65:​17-25) Si Jehova mismo ang iya saksi sa sining makalilipay nga mga saad!

2. Sin-o nga tawhanon nga mga saksi ang ginbangon ni Jehova?

² Apang, ang Dakung Manunuga may tawhanon man nga mga saksi. Sang antes-sang-Cristiano nga panahon ang “isa ka panganod sang mga saksi,” sugod kay Abel, nagdalagan sa palumba sang pagbatas, sa masami sa atubangan sang daku nga mga kabudlayan. Ang ila labing maayo nga mga halimbawa nagapalig-on sa mainunungon nga mga Cristiano sa karon. Si Cristo Jesus amo ang pinakadaku nga halimbawa sang isa ka maisugon nga saksi. (Hebreo 11:​1⁠–​12:2) Dumduma, halimbawa, ang iya katapusan nga testimonya sa atubangan ni Poncio Pilato. Si Jesus nagpahayag: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Kutob sang 33 C.⁠E. tubtob karon nga tuig 2000 C.⁠E., gin-ilog sang makugi nga mga Cristiano ang halimbawa ni Jesus kag padayon nga nagpanaksi, maisugon nga nagpahayag sang “halangdon nga mga butang sang Dios.”​—⁠Binuhatan 2:⁠11.

Sektaryanismo sa Babilonia

3. Paano ginpamatukan ni Satanas ang panaksi nga ginhatag tuhoy kay Jehova kag sa iya kabubut-on?

³ Sa sulod sang mga milenyo ang daku nga Kaaway, si Satanas nga Yawa, malauton nga nagpanikasog nga pangduhaduhaan ang testimonya sang mga saksi sang Dios. Subong “amay sang kabutigan,” ining “daku nga dragon . . . , ang una nga man-ug,” “nagapatalang sa bug-os napuy-an nga duta.” Wala untat sia sa iya pagpakig-away batok sa mga “nagatuman sang mga sugo sang Dios,” ilabi na sa sining katapusan nga mga adlaw.​—⁠Juan 8:​44; Bugna 12:​9, 17.

4. Paano nagluntad ang Babilonia nga Daku?

⁴ Sang nagligad nga mga 4,000 ka tuig, pagkatapos sang Anaw sang adlaw ni Noe, ginbangon ni Satanas si Nimrod, ang “isa ka gamhanan nga mangangayam nga nagapamatok kay Jehova.” (Genesis 10:​9, 10) Ang pinakadaku nga siudad ni Nimrod, ang Babilonia (Babel), nangin sentro sang yawan-on nga relihion. Sang gingumon ni Jehova ang hambal sang mga manunukod sang torre sang Babel, ang katawhan nag-alaplaag sa bug-os nga duta, kag gindala nila upod sa ila ang ila butig nga relihion. Gani ang Babilonia nangin ginhalinan sang bug-os kalibutan nga emperyo sang butig nga relihion, nga ginhingalanan sing Babilonia nga Daku sa tulun-an sang Bugna. Ginatagna sina nga tulun-an ang masubo nga madangatan sining dumaan nga sistema sang relihion.​—⁠Bugna 17:​5; 18:⁠21.

Isa ka Pungsod Sang mga Saksi

5. Anong pungsod ang gin-organisar ni Jehova agod mangin iya saksi, apang ngaa gintugutan niya ini nga mangin tinapok?

⁵ Mga 500 ka tuig pagkatapos sang panahon ni Nimrod, gin-organisar ni Jehova ang mga kaliwatan sang matutom nga si Abraham nga mangin pungsod sang Israel agod mag-alagad subong Iya saksi sa duta. (Isaias 43:​10, 12) Madamo nga indibiduwal sina nga pungsod ang nag-alagad sing mainunungon kay Jehova. Apang, sa sulod sang mga siniglo, ang butig nga mga pagtuluuhan sang kaingod nga mga pungsod nagpalain sa Israel, kag ang katipan nga katawhan ni Jehova nagtalikod sa iya kag nagsimba sa butig nga mga dios. Gani, sang 607 B.⁠C.⁠E., ginlaglag sang kasuldadusan sang Babilonia, nga ginpangunahan ni Hari Nabocodonosor, ang Jerusalem kag ang templo sini kag gintapok sa Babilonia ang kadamuan sang mga Judiyo.

6. Anong maayong balita ang ginpahayag sang matagnaon nga manugbantay ni Jehova, kag san-o ini natuman?

⁶ Daw ano nga kadalag-an yadto para sa butig nga relihion! Apang, ang paggahom sang Babilonia makadali lamang. Mga 200 ka tuig antes sina nga hitabo, si Jehova nagsugo: “Lakat ka, magpahamtang sing bantay agod masugid niya kon ano ang iya makita.” Ano nga balita ang dapat ipahibalo sining manugbantay? “Napukan sia! Ang Babilonia napukan, kag ang tanan nga larawan nga tinigban sang iya mga dios ginbuka na niya sa duta!” (Isaias 21:​6, 9) Sa pagkamatuod, sang 539 B.⁠C.⁠E., ang matagnaon nga deklarasyon natuman. Ang gamhanan nga Babilonia napukan, kag wala madugay ang katipan nga katawhan sang Dios nakapauli sa ila tumandok nga duta.

7. (a) Ano ang natun-an sang mga Judiyo gikan sa disiplina ni Jehova? (b) Sa anong mga siod nahulog ang mga Judiyo pagkatapos sang pagtapok, kag ano ang resulta?

⁷ Natun-an gid sang nagbalik nga mga Judiyo nga talikdan ang idolatriya kag espiritistiko nga relihion. Apang, sa sulod sang mga tinuig, nahulog sila sa iban pa nga mga siod. Ang iban nasiod sang Griegong pilosopiya. Ang iban naman nagpadaku sang tawhanon nga tradisyon sangsa Pulong sang Dios. Ang iban pa nasulay sang nasyonalismo. (Marcos 7:​13; Binuhatan 5:37) Sang panahon nga natawo si Jesus, ang pungsod nagtalikod liwat sa putli nga pagsimba. Samtang ang indibiduwal nga mga Judiyo nagpamati sa maayong balita nga ginbantala ni Jesus, ang pungsod subong kabug-usan nagsikway sa iya kag sa amo ginsikway sang Dios. (Juan 1:​9-12; Binuhatan 2:36) Ang Israel indi na saksi sang Dios, kag sang tuig 70 C.⁠E., ang Jerusalem kag ang templo sini ginlaglag liwat, sini nga tion sang Romanong hangaway.​—⁠Mateo 21:⁠43.

8. Sin-o ang nangin saksi ni Jehova, kag ngaa ang paandam ni Pablo sa sini nga saksi suno-sa-tion?

⁸ Samtang, ang Cristianong “Israel sang Dios” nabun-ag, kag nagaalagad ini karon subong saksi sang Dios sa mga pungsod. (Galacia 6:16) Sa gilayon, nagbuko si Satanas nga palainon ining bag-o, espirituwal nga pungsod. Sang talipuspusan sang nahaunang siglo, ang sektaryan nga mga impluwensia nakita sa mga kongregasyon. (Bugna 2:​6, 14, 20) Ang paandam ni Pablo suno-sa-tion: “Magbantay: basi may isa nga magatangab sa inyo subong natukob niya paagi sa pilosopiya kag walay unod nga daya suno sa tradisyon sang mga tawo, suno sa nahauna gid nga mga butang sang kalibutan kag indi suno kay Cristo.”​—⁠Colosas 2:⁠8.

9. Subong sang ginpaandam ni Pablo, anong mga hitabo ang nagdul-ong sa pagluntad sang Cristiandad?

⁹ Sang ulihi, gindagtaan sang Griegong pilosopiya, sang relihioso nga mga ideya sang Babilonia, kag sang ulihi sang tawhanon nga “kaalam” subong sang teoriya sang ebolusyon kag higher criticism ang relihion sang madamo nga nagapangangkon subong Cristiano. Suno gid ini sa gintagna ni Pablo: “Nahibaluan ko nga kon makahalin na ako magasulod ang mapiguson nga mga lobo sa tunga ninyo kag indi pakig-angutan ang panong sing mapinalanggaon, kag gikan sa inyo mismo magabangon ang mga tawo kag magpamulong sing tiko nga mga butang agod ipahilayo ang mga disipulo sunod sa ila.” (Binuhatan 20:​29, 30) Subong resulta sini nga apostasya, ang Cristiandad nagluntad.

10. Anong mga hitabo ang nagpamatuod nga indi tanan nag-ampo sa malain nga pagsimba nga ginahimo sang Cristiandad?

¹⁰ Ang mga debotado gid sa putli nga pagsimba dapat “makig-away sing lakas para sa pagtuo nga gintugyan sing makaisa gid lang sa mga balaan.” (Judas 3) Madula bala sa duta ang saksi sa putli nga pagsimba kag kay Jehova? Indi. Samtang nagahilapit ang tion sang kalaglagan sang rebelde nga si Satanas kag sang tanan niya nga buhat, nangin maathag nga indi tanan nag-ampo sa apostata nga pagsimba nga ginahimo sa Cristiandad. Sang naulihi nga bahin sang ika-19 nga siglo, sa Pittsburgh, Pennsylvania, E.⁠U.⁠A., isa ka grupo sang sinsero nga mga estudyante sang Biblia ang gin-organisar kag nangin sentro sang modernong-adlaw nga klase sang saksi sang Dios. Ginpatalupangod sining mga Cristiano ang pamatuod sa Kasulatan nga ang katapusan sang karon nga sistema sang kalibutan malapit na. Suno gid sa tagna sang Biblia, ang “katapusan” sining kalibutan nagsugod sang 1914 kag gintandaan sang pagdabdab sang nahaunang bug-os kalibutan nga inaway. (Mateo 24:​3, 7) May mabaskog nga pamatuod nga si Satanas kag ang iya panong sang mga demonyo gintagbong gikan sa langit pagkatapos sadto nga tuig. Ang puno-sing-kagamo nga ika-20 nga siglo naghatag sing maathag nga pamatuod tuhoy sa hilikuton ni Satanas kag tuhoy sa tumalagsahon nga katumanan sang tanda sang harianon nga presensia ni Jesus nga may kagamhanan sa langitnon nga Ginharian.​—⁠Mateo, kapitulo 24 kag 25; Marcos, kapitulo 13; Lucas, kapitulo 21; Bugna 12:​10, 12.

11. Ano ang gintinguhaan ni Satanas nga himuon, apang paano nalugaw-an ang iya pagtinguha?

¹¹ Sang Hunyo 1918, maakigon nga gintinguhaan ni Satanas nga papason ang mga estudyante sang Biblia, nga sadto nga tion nagbantala sa pila ka pungsod. Ginpanikasugan man niya nga dulaon ang ila legal nga korporasyon, ang Watch Tower Bible and Tract Society. Ang masaligan nga mga opisyales sang Sosiedad ginbilanggo, sayop nga ginsumbong sing sedisyon, kaangay ni Jesus sang unang siglo. (Lucas 23:2) Apang sang 1919, ining mga opisyales ginbuy-an, sa amo napadayon nila ang ila ministeryo. Sang ulihi, naabsuwelto sila sing bug-os.

Isa ka “Bantay” nga Nagabantay Sing Maayo

12. Sin-o karon ang nagahuman sa manugbantay nga klase, ukon “bantay,” ni Jehova, kag ano ang ila panimuot?

¹² Busa, sang nagsugod ang “tion sang katapusan,” si Jehova nagpahamtang liwat sing isa ka manugbantay, sa pagpahibalo sa mga tawo sang mga hitabo may kaangtanan sa katumanan sang Iya mga katuyuan. (Daniel 12:​4; 2 Timoteo 3:1) Tubtob karon, inang manugbantay nga klase​—⁠ang hinaplas nga mga Cristiano, ang Israel sang Dios​—⁠nagapanghikot nahisanto sa paglaragway ni Isaias sa matagnaon nga manugbantay: “Nagpamati sia sing maayo, nga may daku gid nga pagtalupangod. Kag nagsinggit sia subong sang leon: ‘Sa ibabaw sang lalantawan, O Jehova, nagatindog ako sing dalayon sa adlaw, kag sa akon ginabantayan yara ako sa tanan nga gab-i.’ ” (Isaias 21:​7, 8) Amo ini ang manugbantay nga maukod sa iya hilikuton!

13. (a) Ano nga mensahe ang ginpahayag sang manugbantay ni Jehova? (b) Paano masiling nga ang Babilonia nga Daku napukan?

¹³ Ano ang nakita sini nga manugbantay? Sa liwat, ang manugbantay ni Jehova, ang iya saksi nga klase, nagpahibalo: “Napukan sia! Ang Babilonia napukan, kag ang tanan nga larawan nga tinigban sang iya mga dios ginbuka na niya [ni Jehova] sa duta!” (Isaias 21:9) Sini nga tion, pagkatapos sang Bug-os Kalibutan nga Inaway I, ang Babilonia nga Daku, ang bug-os kalibutan nga emperyo sang butig nga relihion, amo ang napukan sa iya mataas nga nahamtangan sang awtoridad. (Jeremias 50:​1-3; Bugna 14:8) Indi katingalahan! Ang Dakung Inaway, nga amo anay ang pagtawag sa sini, nagsugod sa Cristiandad, diin ang mga klero sa magtimbang nga bahin naggatong sa kalayo paagi sa pagpalig-on sa ila pinakaali nga mga pamatan-on nga magkadto sa inaway. Daw ano ka makahuluya! Sang 1919, indi mapunggan sang Babilonia nga Daku ang mga Estudyante sang Biblia, subong sang pagkakilala anay sa mga Saksi ni Jehova, nga makapalagyo gikan sa ila indi aktibo nga kahimtangan kag sugdan ang bug-os kalibutan nga kampanya sa pagpanaksi nga nagapadayon gihapon. (Mateo 24:14) Nangin senyales yadto sang pagkapukan sang Babilonia nga Daku, subong nga ang paghilway sa Israel sang ikan-om nga siglo B.⁠C.⁠E. nangin senyales sang pagkapukan para sa dumaan nga Babilonia.

14. Ano nga magasin ang gingamit sing lapnag sang manugbantay nga klase ni Jehova, kag paano ginpakamaayo ni Jehova ang paggamit sa sini?

¹⁴ Ang manugbantay nga klase pirme naghimo sang hilikuton sini nga may kakugi kag daku nga handum nga himuon kon ano ang husto. Sang Hulyo 1879, ginsugdan sang mga Estudyante sang Biblia ang pagbalhag sini nga magasin, nga kilala anay subong Zion’s Watch Tower and Herald of Christ’s Presence. Ang tagsa ka guwa kutob sang 1879 tubtob sang Disiembre 15, 1938, may mga pinamulong sa atubang nga panghapin sini “ ‘Manugbantay, Kamusta ang Gab-i?’​—⁠Isaias 21:⁠11.”⁠a Sa sulod sang 120 ka tuig, Ang Lalantawan maukod nga nagabantay sang mga hitabo sa kalibutan kag sang matagnaon nga kahulugan sini. (2 Timoteo 3:​1-5, 13) Gingamit sang manugbantay nga klase sang Dios kag sang “iban nga mga karnero” nga kaupdanan sini ining magasin sa lakas nga pagpahayag sa katawhan nga ang pagbindikar sa pagkasoberano ni Jehova paagi sa Ginharian ni Cristo malapit na. (Juan 10:16) Ginpakamaayo bala ni Jehova ini nga saksi? Ti, halin sa nahaunang guwa nga 6,000 ka kopya sang 1879, Ang Lalantawan nakalab-ot sa bug-os kalibutan nga sirkulasyon nga kapin sa 22,000,000 ka kopya sa 132 ka hambal​—⁠121 sini ang ginabalhag sing dungan. Daw ano gid ka nagakaigo nga ang ginapanagtag sing pinakalapnag nga relihiosong magasin sa duta amo ang isa nga nagapadaku sang ngalan sang matuod nga Dios, si Jehova!

Progresibo nga Pagtinlo

15. Anong progresibo nga pagtinlo ang nagsugod bisan antes sang 1914?

¹⁵ Mga 40 ka tuig tubtob sang pagsugod sang langitnon nga paggahom ni Cristo sang 1914, ang mga Estudyante sang Biblia ginhilway gikan sa madamo sang di-Biblikanhon nga mga doktrina sang Cristiandad, subong sang pagbunyag sa lapsag, pagkadi-mamalatyon sang tawhanon nga kalag, purgatoryo, pag-antos sa kalayuhon nga impierno, kag Trinidad nga Dios. Apang dugang pa nga tion ang ginkinahanglan agod madula ang tanan sayop nga mga ideya. Halimbawa, sang katuigan 1920 madamong Estudyante sang Biblia ang nagsuksok sing pamuni nga sibit nga may larawan nga krus kag korona, kag nagsaulog sila sing Krismas kag sing iban pa pagano nga mga selebrasyon. Apang, agod mangin putli ang pagsimba, ang tanan nga agi sang idolatriya dapat dulaon. Ang Pulong sang Dios, ang Balaan nga Biblia, dapat nga amo lamang ang basihan sang Cristianong pagtuo kag dalanon sang pagkabuhi. (Isaias 8:​19, 20; Roma 15:4) Sala nga dugangan ukon kuhaon ang bisan ano nga butang gikan sa Pulong sang Dios.​—⁠Deuteronomio 4:​2; Bugna 22:​18, 19.

16, 17. (a) Anong sayop nga ideya ang ginpatihan sang manugbantay nga klase sa sulod sang pila ka dekada? (b) Ano ang husto nga paathag tuhoy sa “halaran” kag “haligi” sa “Egipto”?

¹⁶ Ang isa ka halimbawa magapadaku kon daw ano ka importante ini nga prinsipio. Sang 1886 sang ginbalhag ni C. T. Russell ang libro nga gintawag The Divine Plan of the Ages, ini nga tomo may isa ka tsart nga nagaangot sang mga dag-on sang katawhan sa Daku nga Piramide sang Egipto. Ginhunahuna sadto nga ining monumento ni Paraon Khufu amo ang haligi nga ginpatuhuyan sa Isaias 19:​19, 20: “Sa amo nga adlaw may magaluntad nga isa ka halaran kay Jehova sa tunga sang duta sang Egipto, kag sing isa ka haligi para kay Jehova sa tupad sang dulunan sini. Kag ini mangin tanda kag mangin saksi kay Jehova sang mga kasuldadusan sa duta sang Egipto.” Ano ang mahimo nga kaangtanan sang piramide sa Biblia? Ti, subong isa ka halimbawa, ang kalawigon sang pila ka pasilyo sa Dakung Piramide ginhunahuna nga nagapakita sang tion sang pagsugod sang “dakung kapipit-an” sang Mateo 24:​21, subong sang paghangop sa sini anay. Ang iban nga mga Estudyante sang Biblia nawili gid sa pagtakus sa lainlain nga mga bahin sang piramide agod hibaluon ang mga butang subong sang adlaw nga magakadto sila sa langit!

¹⁷ Ining ginatawag nga Biblia sa Bato ginhangad sing daku sa sulod sang pila ka dekada, tubtob sang gin-athag sang mga guwa sang Lalantawan sang Nobiembre 15 kag Disiembre 1, 1928, nga si Jehova wala nagakinahanglan sing bato nga monumento nga gintukod sang paganong mga paraon kag may yawan-on nga mga tanda sang astrolohiya sa pagpalig-on sang saksi nga ginhatag sa Biblia. Sa baylo, ang tagna ni Isaias ginhangop nga may yara espirituwal nga aplikasyon. Subong sa Bugna 11:​8, ang “Egipto” nagasimbulo sa kalibutan ni Satanas. Ang “halaran kay Jehova” nagapahanumdom sa aton sang kalahamut-an nga mga sakripisyo nga ginhimo sang hinaplas nga mga Cristiano samtang umalagi sila nga mga pumuluyo sining kalibutan. (Roma 12:​1; Hebreo 13:​15, 16) Ang haligi “sa tupad sang dulunan” sang Egipto nagapatuhoy sa kongregasyon sang hinaplas nga mga Cristiano, nga amo ang “haligi kag pamakod sang kamatuoran” kag nagatindog subong saksi sa “Egipto,” ang kalibutan nga buot na nila bayaan.​—⁠1 Timoteo 3:⁠15.

18. (a) Paano padayon nga gin-athag ni Jehova ang mga butang para sa sinsero nga mga estudyante sang Biblia? (b) Kon ang isa ka Cristiano nabudlayan nga mahangpan ang isa ka Makasulatanhon nga paathag, ano ang maayo nga panimuot?

¹⁸ Samtang nagaligad ang tinuig, si Jehova padayon nga nagahatag sa aton sing dugang pa nga paathag sa kamatuoran, lakip ang mas maathag nga paghangop sa iya matagnaon nga pulong. (Hulubaton 4:18) Sining ulihi nga tinuig, ginpalig-on kita nga tan-awon liwat nga may mas madalom nga paghangop​—⁠lakip sang iban pa nga mga butang​—⁠ang kaliwatan nga indi magataliwan antes magaabot ang katapusan, ang parabola tuhoy sa mga karnero kag mga kanding, ang makangilil-ad nga butang kag kon san-o ini magatindog sa balaan nga duog, ang bag-ong katipan, ang pagbaylo-dagway, kag ang palanan-awon tuhoy sa templo sang tulun-an ni Ezequiel. Ayhan mabudlay kon kaisa nga mahangpan ining bag-o nga mga paathag, apang ang mga rason tungod sini magaathag sa nagakaigo nga tion. Kon indi mahangpan sing bug-os sang isa ka Cristiano ang bag-o nga paathag sa isa ka kasulatan, maayo nga mapainubuson niya nga suliton ang pinamulong ni manalagna Miqueas: “Magapakita ako sing nagahulat nga panimuot sa Dios sang akon kaluwasan.”​—⁠Miqueas 7:⁠7.

19. Paano ginpakita sang hinaplas nga nagkalabilin kag sang iban nga mga karnero nga kaupdanan nila ang subong-sang-leon nga kaisog sa sining katapusan nga mga adlaw?

¹⁹ Dumduma nga “nagsinggit [ang manugbantay] subong sang leon: ‘Sa ibabaw sang lalantawan, O Jehova, nagatindog ako sing dalayon sa adlaw, kag sa akon ginabantayan yara ako sa tanan nga gab-i.’ ” (Isaias 21:8) Ang hinaplas nga nagkalabilin nagpakita sing subong-sang-leon nga kaisog sa pagbuyagyag sa butig nga relihion kag sa pagpakita sa katawhan sang dalan padulong sa kahilwayan. (Bugna 18:​2-5) Subong “matutom kag mainandamon nga ulipon,” nag-aman sila sing mga Biblia, mga magasin, kag iban pa nga mga publikasyon sa madamong hambal​—⁠“sing pagkaon sa nagakaigo nga tion.” (Mateo 24:45) Nanguna sila sa pagtipon sang “dakung kadam-an . . . gikan sa tanan nga pungsod kag tribo kag katawhan kag hambal.” Gintinluan man sila paagi sa nagagawad nga dugo ni Jesus kag nagpakita sang ila kaugalingon nga may tagipusuon subong sang leon nga nagahimo sa Dios sing “balaan nga pag-alagad sa adlaw kag gab-i.” (Bugna 7:​9, 14, 15) Ano ang nangin bunga sining nagligad nga tuig sang pagpanghikot sang diutay nabilin nga grupo sang hinaplas nga mga Saksi ni Jehova kag sang ila kaupdanan, ang dakung kadam-an? Isugid ini sang amon masunod nga artikulo.

[Nota]

Madumduman Mo Bala?

• Sin-o nga mga saksi ang ginbangon ni Jehova sa sulod sang mga tinuig?

• Ano ang ginhalinan sang Babilonia nga Daku?

• Ngaa gintugutan ni Jehova ang Jerusalem, ang kapital nga siudad sang iya pungsod sang mga saksi, nga malaglag sang 607 B.⁠C.⁠E.? sang 70 C.⁠E.?

• Anong espiritu ang ginpakita sang manugbantay nga klase ni Jehova kag sang ila kaupdanan?

[Retrato sa pahina 7]

“Sa ibabaw sang lalantawan, O Jehova, nagatindog ako sing dalayon”

[Mga retrato sa pahina 10]

Maukod nga ginahimo sang manugbantay nga klase ni Jehova ang hilikuton sini