Ang Nagakaigo nga Duog sang Pagsimba kay Jehova sa Aton Kabuhi

“Sa bug-os nga adlaw magapasalamat ako sa imo, kag dayawon ko ang imo ngalan tubtob sa walay latid nga panahon, tubtob sa walay katubtuban.”​—⁠SALMO 145:⁠2.

 1. Tuhoy sa pagsimba, ano ang ginapatuman ni Jehova?

“AKO si Jehova nga imo Dios isa ka Dios nga nagapatuman sing bug-os nga debosyon.” (Exodo 20:⁠5) Nabatian ni Moises ina nga kapahayagan gikan kay Jehova, kag ginsulit niya ini sang magpamulong sia sa pungsod sang Israel. (Deuteronomio 5:⁠9) Maathag sa hunahuna ni Moises nga si Jehova nga Dios nagpaabot sa Iya mga alagad nga simbahon Sia sing bug-os.

 2, 3. (a) Ano ang nagpamatuod sa mga Israelinhon nga ang natabo sadto malapit sa Bukid sang Sinai tumalagsahon? (b) Ano nga mga pamangkot ang usisaon naton nahanungod sa pagsimba sang mga Israelinhon kag sang mga alagad sang Dios karon?

² Sang magdulog sila malapit sa Bukid sang Sinai, ang mga Israelinhon kag ang “madamo salalakot nga kaupod” nga nagbiya sa Egipto upod sa ila nakasaksi sing isa ka butang nga tumalagsahon. (Exodo 12:38) Indi ini kaanggid sa pagsimba sa mga dios sang Egipto, nga ginpakahuy-an sang napulo ka kalalat-an. Samtang ginapadayag ni Jehova ang iya presensia kay Moises, makahaladlok nga butang ang natabo: mga daguob, mga kilat, kag makabulungol nga tunog sang isa ka budyong nga nagpakurog sa bug-os nga kampamento. Masunod nag-abot ang kalayo kag aso samtang nagatay-ug ang bug-os nga bukid. (Exodo 19:​16-20; Hebreo 12:​18-21) Kon ang bisan sin-o nga Israelinhon nagakinahanglan sing dugang pa nga pamatuod nga ang nagakalatabo sadto tumalagsahon gid, magaabot pa ini sa indi madugay. Wala magdugay, nagdulhog si Moises gikan sa bukid sa tapos mabaton ang ikaduha nga kopya sang kasuguan sang Dios. Suno sa inspirado nga kasaysayan, “ang panit sang nawong [ni Moises] nagsilak kag [ang katawhan] nahadlok sa pagpalapit sa iya.” Sa pagkamatuod, isa yadto ka dimalipatan, milagruso nga eksperiensia!​—⁠Exodo 34:⁠30.

³ Para sa sadtong tipiko nga pungsod sang Dios, indi maduhaduhaan kon ano ang duog sang pagsimba kay Jehova sa ila kabuhi. Sia ang ila Manluluwas. Utang nila sa iya ang ila gid kabuhi. Sia man ang ila Manughatag sing kasuguan. Apang padayon bala nga gin-una nila ang pagsimba kay Jehova? Kag kamusta ang modernong-adlaw nga mga alagad sang Dios? Ano ang duog sang pagsimba kay Jehova sa ila kabuhi?​—⁠Roma 15:⁠4.

Ang Pagsimba sang Israel kay Jehova

 4. Ano ang plastada sang kampamento sang Israel sa tion sang ila pagpanlakatan sa kahanayakan, kag ano ang yara sa sentro sang kampamento?

⁴ Kon gikan sa mataas nga duog gintan-aw mo ang kampamento sang Israel sa kahanayakan, ano kuntani ang imo nakita? Isa ka malapad, apang mahim-ong, nga kubay sang mga tolda nga ginpuy-an sang mga tatlo ka milyon ukon kapin pa ka mga tawo, nga nagrupo sa tatlo-ka-tribo nga dibisyon sa aminhan, bagatnan, sidlangan, kag katundan. Sa dugang pa nga paghimutad, mahimo nga natalupangdan mo man ang isa pa ka grupo malapit sa tungatunga sang kampamento. Ining apat ka mas diutay nga mga grupo sang mga tolda amo ang ginpuy-an sang mga pamilya sang tribo ni Levi. Sa sentro gid sang kampamento, sa isa ka duog nga nalipnan sang tela nga dingding, amo ang isa ka tumalagsahon nga tinukod. Amo ini ang “tolda nga tilipunan,” ukon tabernakulo, nga gintukod sang “maalamon sing tagipusuon” nga mga Israelinhon suno sa plano ni Jehova.​—⁠Numeros 1:​52, 53; 2:​3, 10, 17, 18, 25; Exodo 35:⁠10.

 5. Ano ang katuyuan sadto sang tabernakulo sa Israel?

⁵ Sa tagsa sang mga 40 ka duog nga ginpatindugan sing kampamento sa tion sang ila paglakbay sa kahanayakan, nagpatindog ang Israel sing tabernakulo, kag nangin sentro ini sang ila kampamento. (Numeros, kapitulo 33) Sing nagakaigo, ginalaragway sang Biblia si Jehova subong nagapuyo sa tunga sang iya katawhan sa sentro gid sang ila kampamento. Ginpuno sang iya himaya ang tabernakulo. (Exodo 29:​43-46; 40:34; Numeros 5:3; 11:20; 16:⁠3) Ang libro nga Our Living Bible nagkomento: “Importante gid ining madaladala nga altar, kay nangin amo ini ang relihioso nga sentro para sa mga tribo. Sa amo naghugpong ini sa ila sa tion sang malawig nga tinuig sang paglibutlibot sa desyerto kag nagpahiusa sang ila panikasog.” Kapin pa sa sina, ang tabernakulo nangin isa ka dalayon nga pahanumdom nga ang pagsimba sang mga Israelinhon sa ila Manunuga importante gid sa ila kabuhi.

 6, 7. Ano nga tinukod para sa pagsimba ang nagbulos sa tabernakulo, kag paano ini gingamit sang pungsod sang Israel?

⁶ Sang makaabot ang mga Israelinhon sa Ginsaad nga Duta, ang tabernakulo padayon nga nangin sentro sang pagsimba sang Israel. (Josue 18:1; 1 Samuel 1:⁠3) Sang ulihi, nagplano si Hari David nga magpatindog sing isa ka permanente nga tinukod. Nangin amo ini ang templo, nga ginpatindog sang ulihi sang iya anak nga si Solomon. (2 Samuel 7:​1-10) Sa tion sang inagurasyon sini may panganod nga nanaug bilang patimaan nga ginkahamut-an ni Jehova yadtong tinukod. “Madinalag-on nga nakapatindog ako para sa imo sing balay nga puluy-an,” pangamuyo ni Solomon, “isa ka malig-on nga duog nga pagapuy-an mo sing dayon.” (1 Hari 8:​12, 13; 2 Cronica 6:⁠2) Ang bag-o napatindog nga templo amo karon ang nangin sentro sang debosyon sang pungsod.

⁷ Tatlo ka beses kada tuig, ang tanan nga Israelinhon nga mga lalaki nagataklad sa Jerusalem agod magtambong sa makalilipay nga mga pagsaulog sa templo bilang pagkilala sa pagpakamaayo sang Dios. Sing nagakaigo, ining mga reunyon gintawag nga “tinangduan nga mga piesta ni Jehova,” nga nagasentro sing igtalupangod sa pagsimba sa Dios. (Levitico 23:​2, 4) Ang debotado nga mga babayi nagtambong upod man sa iban nga mga katapo sang pamilya.​—⁠1 Samuel 1:​3-7; Lucas 2:​41-44.

 8. Paano ang Salmo 84:​1-12 nagapamatuod sa pagkaimportante sang pagsimba kay Jehova?

⁸ Matanlas nga ginkilala sang inspirado nga mga salmista kon daw ano ka importante ang pagsimba sa ila kabuhi. “Daw ano ka hiligugmaon ang imo tabernakulo, O Jehova sang mga kasuldadusan!” amba sang mga anak ni Kore. Pat-od nga indi lamang ang tinukod ang ila gindayaw. Sa baylo, ginpabaskog nila ang ila tingog bilang pagdayaw kay Jehova nga Dios, nga nagapabutyag: “Ang akon tagipusuon kag ang akon unod naghugyaw sa Dios nga buhi.” Ang pag-alagad sang mga Levinhon naghatag sa ila sing daku nga kalipay. “Malipayon ang mga nagapuyo sa imo balay!” siling nila. “Nagapadayon sila gihapon sa pagdayaw sa imo.” Sa kamatuoran ang bug-os nga Israel nag-amba: “Malipayon ang mga tawo nga ang ila kusog yara sa imo, nga sa ila tagipusuon yara ang dakung mga dalan. . . . Magapanglakatan sila sa kusog pa kusog; ang tagsatagsa sa ila nagaatubang sa Dios sa Sion.” Bisan pa ang paglakbay sang isa ka Israelinhon pa Jerusalem mahimo nga madugay kag makalalapyo, ang iya kusog nagpanumbalik sang makalambot sia sa siudad. Ang iya tagipusuon napuno sing kalipay samtang ginadayaw niya ang iya pribilehiyo sa pagsimba kay Jehova: “Kay ang isa ka adlaw sa sulod sang imo luwang labi pa kaayo sa isa ka libo bisan diin. Maayo pa nga ako magmanugbantay sang ganhaan sa balay sang akon Dios sangsa magpuyo sa mga tolda sang pagkamalaut. . . . O Jehova sang mga kasuldadusan, malipayon ang tawo nga nagasalig sa imo.” Ginapahayag sina nga mga pinamulong ang pagpasulabi sang mga Israelinhon sadto sa pagsimba kay Jehova.​—⁠Salmo 84:​1-12.

 9. Ano ang natabo sa pungsod sang Israel sang mapaslawan ini sa pag-una sang pagsimba kay Jehova?

⁹ Sing makapasubo, napaslawan ang Israel nga unahon pirme ang matuod nga pagsimba. Gintugutan nila ang debosyon sa butig nga mga dios nga paluyahon ang ila kakugi kay Jehova. Busa, ginpabay-an sila ni Jehova sa ila mga kaaway, gintugutan sila nga dalhon nga mga bihag sa Babilonia. Sang ginpasag-uli sila sa ila dutang natawhan pagligad sang 70 ka tuig, naghatag si Jehova sa Israel sing makapulukaw nga mga laygay sang matutom nga mga manalagna nga sanday Hageo, Zacarias, kag Malaquias. Ginpapagsik sang saserdote nga si Esdras kag sang gobernador nga si Nehemias ang katawhan sang Dios nga patindugon liwat ang templo kag ibalik didto ang matuod nga pagsimba. Apang pagligad sang mga siglo, wala sa liwat gin-una sang pungsod ang matuod nga pagsim⁠ba.

Ang Kakugi sa Matuod nga Pagsimba sang Unang Siglo

 10, 11. Ano ang duog sang pagsimba kay Jehova sa kabuhi sang mga matutom sang si Jesus yari sa duta?

¹⁰ Nian, sa gintalana nga tion ni Jehova, nag-abot ang Mesias. Ang matutom nga mga indibiduwal nagpaabot sing kaluwasan gikan kay Jehova. (Lucas 2:25; 3:15) Ang Ebanghelyo nga kasaysayan ni Lucas talangkod nga nagalaragway kay Ana nga 84 anyos subong isa ka balo “nga wala gid magpal-at sa templo, nga nagahalad sing balaan nga pag-alagad sa gab-i kag adlaw nga may mga pagpuasa kag mga pangamuyo.”​—⁠Lucas 2:⁠37.

¹¹ “Ang akon kalan-on,” siling ni Jesus, “amo ang paghimo sang kabubut-on sang nagpadala sa akon kag ang pagtuman sang iya buluhaton.” (Juan 4:34) Dumduma kon ano ang ginhimo ni Jesus sang gin-atubang niya ang mga manugbaylo sing kuwarta sa templo. Ginpamaliskad niya ang ila mga lamesa kag ang mga pulungkuan sang mga manugbaligya sing mga salampati. Si Marcos nag-asoy: “Wala sia [Jesus] magtugot kay bisan sin-o nga magdala sing bisan anong butang nga ilaktod sa templo, kundi nagpanudlo sia kag nagsiling: ‘Wala bala masulat, “Ang akon balay tawgon nga balay nga palangamuyuan sa tanan nga kapungsuran”? Apang ginhimo ninyo ini nga lungib sang mga buyong.’ ” (Marcos 11:​15-17) Huo, wala gani magtugot si Jesus kay bisan sin-o nga manglaktod sa luwang sang templo kon nagadul-ong sing mga butang sa lain nga bahin sang siudad. Paagi sa ginhimo ni Jesus, ginsakdag niya ang laygay nga iya ginhatag antes sini: “Padayon, nian, nga pangitaa anay ang ginharian kag ang pagkamatarong [sang Dios].” (Mateo 6:33) Ginbilinan kita ni Jesus sing isa ka maayo gid nga halimbawa sa paghatag kay Jehova sang iya bug-os nga debosyon. Ginpakita gid niya sa buhat ang iya ginbantala.​—⁠1 Pedro 2:⁠21.

 12. Paano ginpakita sang mga disipulo ni Jesus ang pag-una nila sang pagsimba kay Jehova?

¹² Nagpahamtang man si Jesus sing isa ka sulundan para sa iya mga disipulo paagi sa pagtuman sang ginsugo sa iya nga hilwayon ang mga ginpigos, apang matutom, nga mga Judiyo gikan sa nagapabug-at nga mga buhat sang butig nga relihion. (Lucas 4:18) Bilang pagtuman sa sugo ni Jesus nga maghimo sing mga disipulo kag bawtismuhan sila, masidla nga ginwali sang unang mga Cristiano ang kabubut-on ni Jehova may kaangtanan sa ila ginbanhaw nga Ginuo. Nahamuot gid si Jehova sa ila pag-una sang pagsimba sa Iya. Sa amo, milagruso nga ginhilway sang anghel mismo sang Dios sanday apostol Pedro kag Juan gikan sa pagkabilanggo kag ginsugo sila: “Kadto kamo, kag kon makatindog na kamo sa templo, ipamulong sa katawhan ang tanan nga pulong nahanungod sining kabuhi.” Sa tapos mapapagsik liwat, nagtuman sila. Sa kada adlaw, sa templo sa Jerusalem kag sa balay kag balay “wala sila mag-untat sa pagpanudlo kag pagwali sing maayong balita nahanungod kay Cristo, nga si Jesus.”​—⁠Binuhatan 1:8; 4:​29, 30; 5:​20, 42; Mateo 28:​19, 20.

 13, 14. (a) Kutob sang panahon sang unang mga Cristiano, ano ang gintinguhaan ni Satanas nga himuon sa mga alagad sang Dios? (b) Ano ang padayon nga ginahimo sang matutom nga mga alagad sang Dios?

¹³ Samtang nagabaskog ang pagpamatok sa ila pagbantala, gintuytuyan sang Dios ang iya matutom nga mga alagad sa pagsulat sing sibu sa tion nga laygay. “Itugyan ang tanan ninyo nga kabalaka [kay Jehova], kay nagaulikid sia sa inyo,” sulat ni Pedro wala madugay pagligad sang 60 C.E. “Magmaligdong kamo, magbantay kamo. Ang inyo kaaway, nga Yawa, nagaluyong subong sang nagangurob nga leon, nga nagapangita sing iya tulukbon. Apang magtindog kamo batok sa iya, nga nagapangalig-on sa inyo pagtuo, nga nakahibalo nga ang amo man nga pag-antos nagakatabo sa bug-os nga katilingban sang inyo kauturan sa kalibutan.” Pat-od gid nga ang unang mga Cristiano nakasapo sing pasalig sa sadtong mga pulong. Nahibaluan nila nga sa tapos sila mag-antos sa makadali, pagatapuson sang Dios ang ila paghanas. (1 Pedro 5:​7-10) Sa tion sadtong hingapusan nga mga adlaw sang Judiyong sistema sang mga butang, dugang pa nga ginbayaw sang matuod nga mga Cristiano ang mahigugmaon nga pagsimba kay Jehova.​—⁠Colosas 1:⁠23.

¹⁴ Subong sang gintagna ni apostol Pablo, ang apostasya, nga isa ka pagtalikod gikan sa matuod nga pagsimba, natabo. (Binuhatan 20:​29, 30; 2 Tesalonica 2:⁠3) Ang natipon nga mga ebidensia gikan sa nagahingapos nga mga dekada sang unang siglo nagapamatuod sa sini. (1 Juan 2:​18, 19) Si Satanas madinalag-on nga nagsab-ug sing imitasyon nga mga Cristiano sa tunga sang tunay nga mga Cristiano, gani nangin mabudlay kilalahon ining “mga gamhon” gikan sa tulad-trigo nga mga Cristiano. Walay sapayan, sa sulod sang nagligad nga mga siglo, gin-una sang pila ka mga indibiduwal ang pagsimba sa Dios, bisan pa nabutang sa peligro ang ila kabuhi. Apang sang hingapusan nga mga dekada sang “gintalana nga panag-on sang mga pungsod” gintipon liwat sang Dios ang iya mga alagad agod bayawon ang matuod nga pagsimba.​—⁠Mateo 13:​24-30, 36-43; Lucas 21:⁠24.

Ang Pagsimba kay Jehova Ginabayaw Karon

 15. Kutob sang 1919, paano natuman ang mga tagna sang Isaias 2:​2-4 kag Miqueas 4:​1-4?

¹⁵ Sang 1919, ginpapagsik ni Jehova ang hinaplas nga nagkalabilin agod himuon ang isa ka masidla nga pagpanaksi sa bug-os nga kalibutan nga nagbayaw sang pagsimba sa matuod nga Dios. Sa pagdugok sang simbuliko nga “iban nga mga karnero” kutob sang 1935 padayon, ang guban sang katawhan nga sa espirituwal nagataklad sa “bukid sang balay ni Jehova” dugang kag dugang nga nagdaku. Sang 1993 nga tuig sang pag-alagad, 4,709,889 ka Saksi ni Jehova ang nagdayaw sa iya paagi sa pag-agda sa iban pa nga magbuylog sa nabayaw nga pagsimba sa iya. Daw ano ini ka tuhay sa manubo nga kahimtangan sa espirituwal sang mga sekta nga “mga pukatod” sang bug-os kalibutan nga emperyo sang butig nga relihion, labi na sa Cristiandad!​—⁠Juan 10:16; Isaias 2:​2-4; Miqueas 4:​1-4.

 16. Ano ang dapat himuon sang tanan nga mga alagad sang Dios bangod sang gintagna sa Isaias 2:​10-22?

¹⁶ Ginatamod sang mga sumalakdag sang butig nga relihion ang ila mga simbahan kag mga katedral kag bisan gani ang ila mga klero subong “mataas,” ginahatagan ini sing mahimayaon nga mga titulo kag mga kadungganan. Apang talupangda kon ano ang gintagna ni Isaias: “Ang matinaastaason nga mga panulok sang tawo paubson, kag ang pagkapalabilabihon sang mga tawo payaubon; kag si Jehova lamang ang pakataason sa sadtong adlaw.” San-o ini? Sa tion sang nagahilapit nga dakung kapipit-an kon “ang walay pulos nga mga diosdios magataliwan sing bug-os.” Bangod malapit na inang makahaladlok nga tion, dapat usisaon sing serioso sang tanan nga alagad sang Dios kon ano ang duog sang pagsimba kay Jehova sa ila kabuhi.​—⁠Isaias 2:​10-22.

 17. Paano ginapakita sang mga alagad ni Jehova karon ang pag-una nila sa pagsimba kay Jehova?

¹⁷ Subong isa ka internasyonal nga paghiliutod, kilala gid ang mga Saksi ni Jehova sa ila kakugi sa pagbantala sing Ginharian. Ang ila pagsimba indi isa ka pakulahaw lamang nga relihion nga ginatigana para sa mga isa ka oras kada semana. Indi, amo ini ang ila bug-os nga dalanon sang kabuhi. (Salmo 145:⁠2) Sa pagkamatuod, sang nagligad nga tuig kapin sa 620,000 ka Saksi ang nagpasibu sang ila mga hilikuton agod makapakigbahin sa Cristianong ministeryo sing bug-os tion. Kag wala man ginpatumbayaan sang nabilin nga iban pa ang ila pagsimba kay Jehova. Nagapangibabaw ini sa ila mga pagpakighambal sa adlaw-adlaw kag sa ila pagbantala sa publiko, bisan pa ginakinahanglan sang ila obligasyon sa ila pamilya nga magtrabaho sila sing lakas sa sekular nga mga trabaho.

 18, 19. Sambita ang makapalig-on nga mga huwaran nga mahimo nabaton ninyo gikan sa pagbasa sang mga sugilanon sa kabuhi sang mga Saksi.

¹⁸ Ang mga sugilanon sa kabuhi sang mga Saksi nga ginbalhag sa Ang Lalantawan nagahatag sing kasayuran kon paano gin-una sang nanuhaytuhay nga kauturan nga mga lalaki kag mga babayi ang pagsimba kay Jehova sa ila kabuhi. Ang isa ka lamharon nga utod nga babayi nga nagdedikar sang iya kabuhi kay Jehova sa edad nga anom ka tuig naghimo sang pagkamisyonera nga mangin tulumuron niya. Kamo nga lamharon nga mga utod nga lalaki kag babayi, ano nga tulumuron ang mapili ninyo nga magabulig sa inyo sa pag-una sang pagsimba kay Jehova sa inyo kabuhi?​—⁠Tan-awa ang artikulo nga “Pagpadayon sang Tulumuron nga Ginpahamtang sa Edad nga Anom ka Tuig,” sa Ang Lalantawan sang Marso 1, 1992, pahina 26-⁠30.

¹⁹ Ang isa ka balo kag may edad na nga utod nga babayi naghatag man sing maayong huwaran sa pagpahamtang sang pagsimba kay Jehova sa nagakaigo nga duog sini. Nagkuha sia sing kalig-on sa pagbatas gikan sa mga nabuligan niya sa pagtuon sing kamatuoran. Nangin “pamilya” niya sila. (Marcos 3:​31-35) Kon masapwan mo ang imo kaugalingon sa amo man sini nga kahimtangan, batunon mo bala ang pagsakdag kag bulig sang mga lamharon sa kongregasyon? (Talupangda palihug kon ano ang ginpabutyag ni Utod Wini­fred Rem­mie sa “Nagbulig Ako sang Tig-alani,” nga ginbalhag sa Ang Lalantawan sang Hulyo 1, 1992, pahina 21-3.) Kamo nga bug-os tion nga mga alagad, ipakita ninyo nga ang inyo pagsimba kay Jehova amo gid ang una sa inyo kabuhi paagi sa mapainubuson nga pag-alagad sa kon diin kamo gintangdo, nga nagapasakop sing kinabubut-on sa teokratiko nga pagtuytoy. (Talupangda palihug ang huwaran ni Utod Roy Ryan, nga gin-asoy sa artikulo nga “Pagpabilin nga Suod sa Organisasyon sang Dios,” sa Ang Lalantawan sang Disiembre 1, 1991, pahina 24-7.) Dumduma nga kon unahon naton ang pagsimba kay Jehova, makasalig kita nga magaulikid sia sa aton. Indi kita dapat magkabalaka kon paano tigayunon ang mga kinahanglanon sa kabuhi. Ginailustrar ini sang mga eksperiensia nanday Utod Olive kag Sonia Springate.​—⁠Tan-awa ang artikulo nga “Ginpangita Namon Anay ang Ginharian,” sa Ang Lalantawan sang Pebrero 1, 1994, pahina 20-5.

 20. Anong nagakaigo nga mga pakiana ang dapat naton karon ipamangkot sa aton kaugalingon?

²⁰ Gani, indi bala dapat nga pamangkuton sang tagsatagsa sa aton ang iya kaugalingon sing pila ka nagapangusisa nga mga pakiana? Ano ang duog sang pagsimba kay Jehova sa akon kabuhi? Ginatuman ko bala ang akon dedikasyon nga himuon ang kabubut-on sang Dios tubtob sa akon labi nga masarangan? Ano nga mga bahin sang akon kabuhi ang mapauswag ko pa? Ang mahunahunaon nga pagbinagbinag sang masunod nga artikulo magahatag sing kahigayunan sa pagpamensar kon paano naton ginagamit ang aton manggad nahisanto sa aton ginpili nga unahon sa aton kabuhi​—⁠ang pagsimba sa Soberanong Ginuong Jehova, nga aton mahigugmaon nga Amay.​—⁠Manugwali 12:13; 2 Corinto 13:⁠5.

Bilang Repaso

◻ Tuhoy sa pagsimba, ano ang ginapatuman ni Jehova?

◻ Ano ang ginapahanumdom sang tabernakulo?

◻ Sang unang siglo C.E., sin-o ang talalupangdon nga mga huwaran sang kakugi para sa matuod nga pagsimba, kag paano?

◻ Kutob sang 1919, paano ginbayaw ang pagsimba kay Jehova?