‘Nagatindog Ako sa Lalantawan’

“Nian nagsinggit sia subong sang leon: ‘O Jehova, nagatindog ako sa lalantawan, sing dalayon sa adlawon, kag yara ako sa akon hulot sa bug-os nga mga gab-i.’”—ISAIAS 21:8.

1, 2. (a) Ano ang tulumuron ni Charles T. Russell? (b) Paano ang Biblia nakabulig sa pagtuman sang iya tulumuron?

MAY misyon ang isa ka mahinadlukon sa Dios kag 21-anyos nga tawo nga nagapuyo sa aminhan-sidlangan sang Estados Unidos. Ang iya tulumuron amo nga ibuyagyag ang dimatuod nga mga panuddlo sang relihion sang iya adlaw, labi na ang mga doktrina sang dayon nga pagpaantos kag kapalaran. Subong man, luyag niya depensahan ang kamatuoran nahanungod sa gawad kag ang katuyuan kag paagi sang pagkari ni Cristo. Paano niya himuon ini tanan? Paagi sa pagpasilak sa kapawa sang Pulong sang Dios, ang Balaan nga Biblia, sa relihioso nga mga pagtuluohan.—Salmo 43:3; 119:105.

² Yadto nga tawo amo si ­Charles T. Rus­sell, kag namat-od sia sang 1873 nga magbalhag sing relihioso nga literatura subong paagi sa pagpasanag sang kamatuoran sang Biblia. Para sa sinsero nga mga bumalasa, ipahayag sadtong mga publikasyon ang mga litik sa mga panudlo sang Cristiandad. Ang bisan anong natago nga mga depekto sa doktrina indi makalikaw sa gamhanan nga kapawa sang Biblia. (Efeso 5:13) Sa amo man nga tion, ipatalupangod sining literatura ang ‘maayong panudlo’ agod palig-unon ang pagtuo sang mga bumalasa. (Tito 1:9; 2:11; 2 Timoteo 1:13) May sulundan bala ang kakugi para sa kamatuoran sang Biblia nga nagtiklod kay Rus­sell sa iya pagtinguha?—Ipaanggid ang 2 Hari 19:31.

Unang mga Cristiano: Mga Sumalakdag sang Pulong sang Dios

3. Paano si Cristo Jesus nanguna sa pagsakdag sa kamatuoran?

³ Ginsakdag sang mga Cristiano sang unang siglo ang paggamit sang Pulong sang Dios sa tunga sang mga Judiyo kag mga Gentil. Daw subong bala nga nagtindog sila sa isa ka lalantawan, nga nagapahibalo sang kamatuoran sa tanan nga magapamati. (Mateo 10:27) Ang ila Lider nga si Jesucristo naghatag sing huwaran. Sia nagsiling: “Tungod sini natawo ako, kag tungod sini nagkari ako sa kalibutan, agod nga magpanaksi ako sa kamatuoran.” (Juan 18:37) Bisan pa himpit, wala sia magsandig sa iya kaugalingon nga kaalam ukon personal nga mga opinyon. Sa baylo, ang iya mga panudlo naghalin sa iya Superyor nga Manunudlo, si Jehova nga Dios. “Wala ako nagahimo sing bisan ano sa akon kaugalingon nga pagbulut-an,” siling niya sa isa ka grupo sang mga Judiyo. “Kundi suno sa gintudlo sa akon sang Amay ginapamulong ko ining mga butang.” (Juan 8:28; tan-awa man ang Juan 7:14-18.) Suno sa mga rekord sang Ebanghelyo sang iya dutan-on nga ministeryo, si Jesus nagbalikwat (ukon nagpamulong sing kaanggid nga mga panghunahuna) gikan sa mga katunga sang mga tolon-an sang Heb­reong Kasulatan.—Lucas 4:18, 19 (Isaias 61:1, 2); Lucas 23:46 (Salmo 31:5).

4. Maghatag sing mga halimbawa kon paano gingamit ni Jesus ang Pulong sang Dios sa pagtudlo sing kamatuoran?

⁴ Bisan sa tapos sang iya kamatayon kag pagkabanhaw, gingamit gihapon ni Cristo ang Pulong sang Dios sa pagtudlo sing kamatuoran. Halimbawa, sang si Cleopas kag ang iya kaupod nagalakbay gikan sa Jerusalem padulong sa Emmaus, ginbuligan ni Jesus yadtong mga disipulo sa pagpangatarungan sa Kasulatan. Ang rekord nagasiling: “Kag sumugod kay Moises kag sa tanan nga Manalagna, gintalastas niya sa ila sa bug-os nga mga Kasulatan ang mga butang nahanungod sa iya kaugalingon.” (Lucas 24:25-27) Sang ulihi nga bahin sadto gihapon nga adlaw, nagpakita si Jesus sa 11 ka apostoles kag sa pila sang iya mga disipulo agod palig-unon ang ila pagtuo. Paano? Paagi sa lantip nga paggamit sang Kasulatan. Si Lucas nagsulat: “Nian ginbuksan niya [Jesus] ang ila mga painoino agod nga makahangop sila sang mga Kasulatan, kag nagsiling sia sa ila: ‘Amo ining nasulat, nga ang Cristo mag-antos kag mabanhaw sa ikatlo nga adlaw.’”—Lucas 24:45, 46.

5. Sang Pentecostes 33 C.E., paano ginsunod ni Pedro ang huwaran ni Cristo sa paggamit sing Kasulatan?

⁵ Sa pagsunod sa Huwaran sini, ginsugdan sang Cristianong kongregasyon sang tuig 33 C.E. ang iya pagministeryo sa publiko paagi sa paggamit sing Kasulatan. Ang danyag: isa ka wayang sa guwa sang isa ka balay sa Jerusalem. Sa tapos mabatian ang “mamadlos nga hangin nga naghuyop” gikan sa sining balay, ang isa ka kadam-an sang mga Judiyo sa Jerusalem kag ang Judiyong mga peregrino nagkadto sa sining duog kag nagtipon. Nagpatunga si Pedro—ang 11 ka iban pa nga apostoles nagalibot sa iya—kag paagi sa isa ka gamhanan nga tingog nagsugod sia sa paghambal: “Mga tawo sa Judea kag kamo tanan nga nagapuyo sa Jerusalem, kilalaha ninyo ini, kag dungga ang akon mga pulong.” Nian sa tapos masambit ang ‘ginpamulong ni manalagna Joel’ kag ang ‘ginsiling ni David,’ ginpaathag ni Pedro ang milagro nga bag-o lang matabo kag nga “ang Dios naghimo sa iya nga Ginuo kag Cristo, ining Jesus nga ginlansang ninyo.”—Binuhatan 2:2, 14, 16, 25, 36.

6. (a) Ipaathag kon ano ang natabo sa isa ka sinapol sang nagadumala nga hubon sang unang siglo. (b) Paano ginpahibalo ang mga kongregasyon sang desisyon sang nagadumala nga hubon, kag ano ang kaayuhan?

⁶ Sang ang unang mga Cristiano nagkinahanglan sing makapasanag nga impormasyon tuhoy sa pagtuo kag paggawi, gingamit man sang nagadumala nga hubon sang unang siglo ang Kasulatan. Halimbawa, sa sinapol sang nagadumala nga hubon sang tuig 49 C.E., ginpatalupangod sa ila ni disipulo Santiago, nga amo ang tsirman, ang isa ka kasulatan sa Amos 9:11, 12. “Mga kauturan, pamatii ako ninyo,” siling niya. “Si Simeon nagsugid sing maid-id kon paano nga ang Dios nagduaw sing una sa mga Gentil, sa pagkuha sa ila sing katawhan sa iya ngalan. Kag sa sini nagsinanto ang mga pulong sang mga Manalagna, subong sang nasulat na.” (Binuhatan 15:13-17) Nag-ugyon ang bug-os nga hubon sa buko ni Santiago kag dayon ginpasulat nila ang ila desisyon nga napasad sa kasulatan agod madul-ong sa mga kongregasyon kag mabasa nila. Ano ang mga resulta? Ang mga Cristiano “nagkalipay tungod sang laygay,” kag “ang kongregasyon naglig-on sa pagtuo kag nagdugang sa kadamuon adlaw-adlaw.” (Binuhatan 15:22-31; 16:4, 5) Sa amo, ang unang Cristianong kongregasyon nangin “haligi kag pamakod sang kamatuoran.” Apang kamusta naman ang modernong maragtas? Ilugon bala ni C. T. Rus­sell kag sang iya kaupod nga mga estudyante sang Biblia ining maayong huwaran sang unang siglo? Paano nila sakdagon ang kamatuoran?—1 Timoteo 3:15.

Mga Magasin nga May Masangkad nga Pagtamod

7. (a) Ano ang katuyuan sang Zion’s Watch Tower? (b) Sa kay sin-o ini nagpaabot sing pagsakdag?

⁷ Sang Hulyo 1879, ginsugdan ang panguna nga instrumento ni Rus­sell para sa pagpasanag sa Biblia—ang Zion’s Watch Tower and Herald of Christ’s Presence. Ginsambit sang una nga guwa sini ang dungganon nga katuyuan sang magasin: “Subong ginapakita sang ngalan sini, katuyuan sini nga mangin lalantawan nga gikan diin ang importante kag mapuslanon nga mga butang ipahibalo sa ‘diutay nga panong,’ kag subong ‘Herald of Christ’s Presence,’ maghatag sing ‘karne sa sibu nga tion’ sa ‘panimalay sang pagtuo.’” Ang sadsaran nga bato sang magasin amo ang pagsalig sa labing gamhanan nga Dios. Ang ikaduha nga guwa sini nagsiling: “Ginapatihan namon nga ang sumalakdag sang ‘Zion’s Watch Tower’ amo si JEHOVA, kag gani indi gid ini magpakilimos ukon mangabay sa mga tawo sing supurta. Kon Sia nga nagasiling: ‘Ang tanan nga bulawan kag pilak sang mga bukid akon,’ mapaslawan sa paghatag sing kinahanglanon nga pundo, hangpon namon nga mangin amo ini ang tion sa pag-utod sa publikasyon.”

8. Ipaathag ang pag-uswag sang Ang Lalantawan sa kapawa sang Isaias 60:22 kag Zacarias 4:10.

⁸ Ang Zion’s Watch Tower, karon The Watchtower ukon Ang Lalantawan, ginabalhag nga wala sing lang-at sa kapin sa 107 ka tuig. Nag-uswag ini halin sa binulan nga magasin nga 6,000 ka kopya nga gin-imprinta sa isa ka hambal padulong sa makaduha sa bulan nga magasin nga 12,375,000 ka kopya sa 103 ka hambal.—Ipaanggid ang Isaias 60:22; Zacarias 4:10.

9. Paano nga nagakaigo ang titulo nga Watch Tower?

⁹ Nagakaigo gid ang titulo nga pinili ni Rus­sell nga Watch Tower. Ang tinaga nga masami gingamit sa Hebreong Kasulatan para sa “lalantawan” nagakahulugan sing “laawan” ukon “duog nga talan-awan,” nga gikan diin madali nga makita sang manugbantay ang kaaway sa malayo kag makahatag sing abanse nga paandam tuhoy sa nagapakari nga katalagman. Sing nagakaigo, nian, sa sulod sang una nga 59 ka tuig nga pagbalhag, ang titulo nga pahina nagaunod sining makahalangkat nga binalikwat sa Isaias 21:11, 12, King James Version: “Manugbantay, Ano bala ang Kagab-ihon?” “Ang Kaagahon Nagaabot.”

10. Sin-o ang nagaalagad subong manugbantay sang Isaias 21:11, kag ano nga mensahe ang iya ginpahibalo?

¹⁰ Ang manugbantay sa tagna ni Isaias gintalana nga magatindog sa indi madugay. Sa tunga sang malaut nga kahimtangan sang pagkawalay paglaum sang duta, malipayon nga ginpalayag ni Rus­sell ang maayong balita sang “kaagahon” nga magaabot. Ang Milenio nga Paghari ni Jesucristo nga may paghidait amo ang tema sina nga balita. Apang sa wala pa “ang kaagahon,” ang klase nga nagaalagad subong manugbantay—ang nagkalabilin sang espirituwal nga Israel karon—masidla nga nagapaandam tuhoy sa pagdulom sang “kagab-ihon,” nga magadangat sa pinakamadulom nga bahin sini sa “inaway sang dakung adlaw sang Dios nga Labing Gamhanan” sa Har–Magedon.—Bugna 16:14-16.

11, 12. (a) Paano ginapakita sang mga pulong sa Isaias 21:8 nga ang manugbantay nga klase matutom kag alisto? (b) Sa anong paagi nagaabot ang report karon, kag paano ini ginapalapnag?

¹¹ Sa Isaias 21:8 kaina, ginpakilala kita sa sining matutom nga manugbantay sa sining mga pulong: “Nian nagsinggit sia subong sang leon: ‘O Jehova, nagatindog ako sa lalantawan sing dalayon sa adlawon, kag yara ako sa akon hulot sa bug-os nga mga gab-i.’”

¹² Handurawa sa imo hunahuna ang isa ka manugbantay sa mataas nga torre, nga nagalaaw, ginasipat ang gintaipan sa adlaw, kag ang kadulom sa gab-i—pirme alisto. Nahibaloan na ninyo karon ang una nga ideya nga ginapaalinton sang Hebreong tinaga para sa “lalantawan” (mits·pehʹ) nga gingamit sa Isaias 21:8. Sanglit nagabantay gid ang manugbantay, sin-o nga tawo nga maligdong sing hunahuna ang magaduhaduha sa iya mabaskog nga balita? Sa karon man, ang manugbantay nga klase nagpanikasog sa pag-usisa sa Kasulatan agod tan-awon kon ano ang ginatigana ni Jehova para sa sining sistema sang mga butang. (Santiago 1:25) Nian ginapalanog sining manugbantay ina nga mensahe sing mabaskog kag maisugon, labi na paagi sa mga pahina sang Ang Lalantawan. (Ipaanggid ang Amos 3:4, 8.) Ini nga magasin indi gid magauklo sa kahadlok sa pagsakdag sa kamatuoran!—Isaias 43:9, 10.

13. Anong kaupod nga magasin ang nagguwa sang 1919, kag ano ang kaanggid nga katuyuan sini?

¹³ Sang Oktubre 1, 1919, may bag-o nga magasin nga nag-abot sa kalibutan: ang The Golden Age.a Gingamit sang manugbantay nga klase ining instrumento subong kaupod sang Ang Lalantawan. Bisan pa ang mga artikulo sini wala nagausisa sang mga tema sa Biblia sing subong kadalom sa ginahimo sa Ang Lalantawan, ginapaalisto sini ang katawhan sa dimatuod nga mga panudlo sang relihion, sa nagapakari nga kalaglagan sang malaut nga sistema sang mga butang karon, kag sa bag-ong duta sang pagkamatarong nga magasunod. Huo, sakdagon man sini ang kamatuoran!

14. Ano ang katuyuan sang Consolation, kag sang ulihi sang Awake!?

¹⁴ Pagligad sang napulog-walo ka tuig, ang ngalan nga The Golden Age gin-islan sing Consolation. “Ang bag-o nga ngalan nagatindog para sa kamatuoran,” siling sang Oktubre 6, 1937 nga guwa. Ang Consolation nangin Awake! sang Agosto 22, 1946, nga guwa. Sa sadto nga guwa nanaad ini: “Ang integridad sa kamatuoran mangin amo ang pinakamataas nga katuyuan sining magasin.” Tubtob sa karon, wala ini mapaslawan sa pagtuman sina nga saad. Sing tumalagsahon, ginabayaw sang Ang Lalantawan kag Magmata! ang bandera sang kamatuoran sing mataas agod makita sang tanan. Paagi sa paghimo sini, ginasunod sang mga magasin ang banas nga ginsugdan sang unang Cristianong kongregasyon.—3 Juan 3, 4, 8.

Ang Lalantawan kag Magmata!: Mga Sumalakdag sang Kamatuoran

15. (a) Ano nga metodo sang pagpanagtag sing espirituwal nga kalan-on karon ang kaanggid sa ginhimo sang unang Cristianong kongregasyon? (b) Luwas sa pagbalikwat sa mga bersikulo sang Biblia, ano pa ang kinahanglanon? Maghatag sing mga halimbawa.

¹⁵ Ang “matutom kag mainandamon nga ulipon” nga klase, ang “manugbantay,” nagagamit karon sang Lalantawan nga magasin sa idalom sang pagtuytoy sang Nagadumala nga Hubon sang mga Saksi ni Jehova subong amo ang panguna nga alagyan sa pagpanagtag sing espirituwal nga “kalan-on sa nagakaigo nga tion.” (Mateo 24:45) Ginasunod sini ang sulundan sang kongregasyon sang unang siglo, nga nagasulat sang makapasanag nga impormasyon tuhoy sa mga doktrina kag moral agod “mabasa sang tanan nga kauturan.” (1 Tesalonica 5:27) Sugod gid sa umpisa sini, Ang Lalantawan isa ka magasin nga nagagamit kag nagatudlo sing Biblia. Halimbawa, ang una nga guwa sang Zion’s Watch Tower nagbalikwat ukon nagsitar sing kapin sa 200 ka teksto gikan sa dimagkubos 30 ka tolon-an sang Biblia. Apang kapin pa ang kinahanglanon sang sa balikwaton lamang ang mga bersikulo sang Biblia. Kinahanglan sang mga tawo ang bulig sa paghangop sini. Ang Lalantawan pirme abanse sa paghangop sa Biblia. Kutob sang 1892 tubtob sang 1927 ang tagsa ka guwa nag-unod sing semanal nga balasahon sa Biblia kag sing paathag sang isa ka yabi nga teksto gikan sa tagsa ka pagbasa. Para sa iban pa nga mga halimbawa, tan-awa ang tsart nga natig-uluhan “Importante nga mga Artikulo sang Lalantawan, sa Tagsa ka Dekada.”

16, 17. Ano ang ginhimo sang una nga editor sang Ang Lalantawan agod mapat-od nga sakdagon pirme sining magasin ang kamatuoran sang Biblia?

¹⁶ Paano huptan sang Ang Lalantawan ang pagkaputli sang iya naimprinta nga mensahe? Ang una nga editor sang Ang Lalantawan, nga si C. T. Rus­sell, naghimo sing mga pangamlig agod mapat-od nga ang ginaimprinta sa Ang Lalantawan amo ang kamatuoran nga nahangpan sadto. Ang isa sadtong pangamlig ginsambit sa iya testamento nga ginhimo sang Hunyo 27, 1907. (Napatay si Rus­sell sang Oktubre 31, 1916.) Ang iya testamento nagasiling:

“Ginasugo ko nga ang bug-os nga editoryal sang ZION’S WATCH TOWER mangin sa mga kamot sang isa ka komite sang lima ka utod, nga akon ginlaygayan nga maghalong gid kag mangin matutom sa kamatuoran. Ang tanan nga artikulo nga magaguwa sa mga kolumna sang ZION’S WATCH TOWER dapat aprobahan sang dimagkubos tatlo sa komite sang lima, kag ginalaygay ko nga kon ang bisan anong butang nga inaprobahan sang tatlo mahibal-an ukon ginapatihan nga batok sa mga pagtamod sang isa ukon sang duha pa ka katapo sang komite, ina nga artikulo hawiran anay agod binagbinagon, pangamuyuan kag hambalan sa tatlo ka bulan antes ibalhag—agod nga kon mahimo, ang paghiusa sang pagtuo kag ang mga higot sang paghidait mahuptan sa editoryal nga pagdumala sa balasahon.”

¹⁷ Ang tagsa ka katapo sang Komite sa Editoryal, suno sa testamento ni Rus­sell, dapat mangin “matutom sing bug-os sa mga doktrina sang Kasulatan” kag dapat magpakita, subong talalupangdon nga mga kinaiya, sing “pagkaputli sang kabuhi, pagkaathag sang kamatuoran, kakugi para sa Dios, gugma sa kauturan kag katutom sa Manunubos.” Subong man, ginsugo ni Rus­sell nga “indi pag-ipakita sa bisan anong paagi kon sin-o ang nagsulat sang nanuhaytuhay nga mga artikulo nga nagaguwa sa balasahon . . . agod nga ang kamatuoran makilala kag apresyahon sa katakus sini, kag agod nga ang Ginuo labi pa nga kilalahon subong ang Ulo sang iglesia kag ang Tuburan sang kamatuoran.”

18. Ngaa mabasa naton Ang Lalantawan kag Magmata! nga may pagsalig?

¹⁸ Tubtob sa karon ginasunod sang Nagadumala nga Hubon ini gihapon nga gabayan. Ang tagsa ka artikulo sa Ang Lalantawan kag Magmata! kag ang tagsa ka pahina, lakip ang art­work, ginausisa sang pinili nga mga katapo sang Nagadumala nga Hubon antes imprintahon. Dugang pa, ang mga nagabulig sa pagsulat sing mga artikulo para sa Ang Lalantawan Cristianong mga gulang nga nagaapresyar sa pagkaserioso sang ila asaynment. (Ipaanggid ang 2 Cronica 19:7.) Nagahinguyang sila sing madamo nga oras sa pagpanalawsaw sa Biblia kag sa iban pa nga reperensya agod mapat-od nga ang ginasulat amo ang kamatuoran kag nga ini matutom nga nagasunod sa Kasulatan. (Manugwali 12:9, 10; 2 Timoteo 1:13) Indi tumalagsahon nga ang isa ka artikulo sa magasin—nga mahimo mabasa mo sa 15 minutos—ginahanda sa duha ka semana tubtob sa kapin sa isa ka bulan.

19. Ano ang mahimo mo sa pagsakdag sa kamatuoran sang Biblia?

¹⁹ Busa, mabasa mo ang Ang Lalantawan kag Magmata! nga may pagsalig. Apang kapin pa ang imo mahimo. Sarang mo matanyag nga may kapagsik ining mga magasin sa iban agod nga maton-an man nila ang kamatuoran kag makabenepisyo gikan sa pagpamati sa mga mensahe sang ‘manugbantay nga nagatindog sa lalantawan.’ (Isaias 21:8) Huo, upod sa modernong adlaw nga manugbantay, imo man masakdag ang kamatuoran sang Biblia.

[Footnote]

Nadumduman Mo Bala?

◻ Ngaa nagsugod si C. T. Russell sa pagbalhag sing literatura sa Biblia?

◻ Paano ginsakdag sang unang mga Cristiano ang kamatuoran?

◻ Ngaa ang tinaga nga “Lalantawan” yara sa titulo sining magasin?

◻ Sin-o ang modernong adlaw nga manugbantay, kag anong instrumento ang iya una nga ginagamit sa pagpadaku sang iya tingog?

◻ Paano ginasakdag sang Ang Lalantawan kag Magmata! ang kamatuoran sa Biblia?

[Tsart sa pahina 13]

Importante nga mga Artikulo sang Lalantawan, Sa Tagsa ka Dekada

1879: “Ang Gugma sa Dios”—halad nga gawad ni Jesus subong ang sadsaran sang paggawad sa katawhan

1879: “Kon Ngaa Gintugutan ang Kalautan”—nagpaathag kon ngaa ang presensia ni Jesucristo mangin dimakita

1880: “Isa ka Lawas, Isa ka Espiritu, Isa ka Paglaum”—nagtudlo sa 1914 subong katapusan sang Panahon sang mga Gentil

1882: “Ang Bayad sang Sala Amo ang Kamatayon”—nagbuyagyag sa doktrina sang dayon nga pagpaantos subong isa ka pagpanghiwala sa gugma sang Dios

1885: “Ebolusyon kag ang Dag-on sang Utok”—nagbuyagyag sa ebolusyon nga teoriya subong dimatuod

1897: “Ano ang Ginasiling sang Kasulatan Nahanungod sa Espiritismo?”—naghatag sing pamatuod nga mga demonyo ang ginahalinan sang espiritismo

1902: “Unahon ang Dios—Ang Iya mga Gintangdo”—nagpadaku sang pagtuman sa sugo sang Dios sa pamilya kag sa negosyo

1919: “Bulahan ang mga Wala sing Kahadlok”—naghatag sing bag-o nga kabuhi sa nagbugtaw nga organisasyon sang wala sing kahadlok nga mga sumilimba

1925: “Pagkabun-ag sang Pungsod”—nagpaathag sang mga tagna nga nagapakita nga ang Ginharian sang Dios nabun-ag sang 1914

1931: “Bag-o nga Ngalan”—kutob karon ang ngalan nga mga Saksi ni Jehova magapain sa matuod nga mga Cristiano gikan sa apostata nga Cristiandad

1935: “Ang Dakung Kadam-an”—nagpakita nga ginahimo ang pagtipon sa mga magakabuhi sing dayon sa duta

1938: “Organisasyon”—nagpakilala sing teokratiko gid nga kahimusan sa tunga sang mga Saksi ni Jehova

1939: “Neutralidad”—nagpabaskog sa mga Saksi ni Jehova sa bug-os nga kalibutan sa pagbatas sa mga pag-ipit sang Inaway Kalibutanon II

1942: “Ang Lamang nga Kapawa”—nagpalanog sing sinyas sa pag-abante para sa maisugon nga pagpanaksi

1945: “Indi Mationg Para sa Matuod nga Pagsimba”—nagpakita nga ang mga Cristiano dapat maglihi sa pagpatughong sing dugo

1952: “Paghupot sa Organisasyon nga Matinlo”—nagpakita nga ang pagdisfellowship sang mga kongregasyon Makasulatanhon

1962: “Pagpasakop sa ‘Superyor nga mga Awtoridad’—Ngaa?”—naghatag sing mga rason para sa relatibo nga pagpasakop sa tawhanon nga mga kagamhanan

1973: “Paghupot sa Kongregasyon sang Dios nga Matinlo sa ‘Tion sang Iya Paghukom’”—nagpalig-on sang paglikaw sa tabako

1979: “Kakugi Para sa Balay ni Jehova”—nagpaathag liwat nga ang pamalaybalay nga pagbantala nagasunod sa sulundan sang mga apostol

1982: “Mga Hinigugma, . . . Magpabilin Kamo sa Gugma sang Dios”—nagpaalisto sa mga Cristiano sa metodo sang pagpanghikot sang mga apostata

1983: “Paglakat Upod sa Dios sa Isa ka Masingki nga Kalibutan”—nagpalig-on liwat nga ang mga Cristiano dapat wala sing bahin sa kasingki

1984: “Ang Bag-o nga Toril Para sa ‘Iban nga mga Karnero’”—nagpaathag kon paano ining dutan-on nga klase ginhiusa sa mga yara sa bag-ong katipan nga “toril”

1987: “Ang Cristianong Paghinugyaw Magapadayon sa Milenio”—nagpakita kon paano ang tanan nga matutom nga mga Cristiano makatigayon sing kahilwayan kag kabuhi