Si Jehova—Ang Aton Kusog

“Si Jah Jehova amo ang akon kusog kag akon gahom.”—ISAIAS 12:2.

 1. (a) Ngaa tuhay katama ang mga Saksi ni Jehova? (b) Paano ginapabutyag sang Isaias 12:2 kon ano ang ginhimo ni Jehova para sa iya katawhan?

NAGATAMBONG ka bala sa mga miting sa King­dom Hall sang mga Saksi ni Jehova? Didto makita mo ang mga tawo nga tuhay gid sa iban! Sin-o ini nga mga tawo, kag ngaa tuhay sila? Mga katawhan kita sang Dios, kag tuhay kita bangod ginadala naton ang labing daku sa tanan nga ngalan—ang iya sang mahimayaon nga Manunuga sang tanan nga kalatingalahan sa uniberso sa palibot naton. Ang iya ngalan yari sa aton. Sa iya ngalan nga malipayon kita nga nagatipon sa pagpakigbahin sa pinakaali nga espirituwal nga pagkaon nga ginaaman niya sa “nagakaigo nga tion” paagi sa iya organisasyon. (Lucas 12:42) Subong mga Saksi ni Jehova mapasalamaton nga ginapakataas naton ang iya dimatupungan nga ngalan sa mga pulong sang Isaias kapitulo 12, bersikulo 2, nga mabasa: “Yari karon! Ang Dios akon kaluwasan. Magasalig ako kag indi magkahadlok; kay si Jah Jehova amo ang akon kusog kag gahom, kag sia nangin akon kaluwasan.” Ang aton Dios nagluwas sa aton sa madamo nga pagtilaw. Ang aton ulihi nga kaluwasan malapit na sa karon—sa kamot man ni Jah Jehova!

 2. (a) Pila ka beses makita ang ekspresyon nga “Jah Jehovah” sa Biblia, kag diin? (b) Ano ang tal-us nga pagbadbad sa “gahom” sa Isaias 12:2, kag ngaa nagakaigo man ini?

² Ining ekspresyon nga “Jah Jehova,” ang pagdoble sa balaan nga ngalan, makita sing duha ka beses lamang sa Biblia, diri kag sa Isaias 26:4. Nakita sang mga manugbadbad sang King James Version nga nagakaigo ini ibadbad nga “ang GINUONG JEHOVA.” Suno sa foot­note sang New World Translation Reference Bible, ang tal-us nga pagbasa sa “gahom” sa Isaias 12:2 amo ang “ambahanon” kag “pagdayaw.” Daw ano ka matuod nga ang gamhanan nga si Jah Jehova, nga nagahatag sa iya mga sumilimba sing dinamiko nga enerhiya, takus sang aton matam-is nga ambahanon sang pagdayaw!—Isaias 40:28-31.

 3. (a) Para sa ano ginbuksan ni Jah Jehova ang dalan, kag sa sadsaran sang ano? (b) Ano ang epekto sang pinamulong ni Pablo sa Roma 11:33-36 sa mga Saksi ni Jehova?

³ Ang gahom ni Jehova gintimbangan sang iya kaalam, katarungan, kag gugma. Sa pagbuhat sining balaan nga mga kinaiya, ginbuksan ni Jah Jehova ang dalan para sa kaluwasan sang tumuluo nga katawhan sa sadsaran sang halad gawad ni Jesus. Sa sining kaangtanan, si apostol Pablo nagsiling: “O pagkadalum sang kamanggaran kag kaalam kag ihibalo sang Dios! Pagkadimatungkad sang iya mga paghukom kag pagkadimausoy sang iya mga dalanon! Kay ‘si sin-o bala ang nakahibalo sang hunahuna ni Jehova, ukon sin-o bala ang nangin manuglaygay niya?’ Ukon, ‘Sin-o bala ang nakahatag sa iya sing dulot agod nga mabayaran sia?’ Kay gikan sa iya kag paagi sa iya kag tungod sa iya ang tanan nga butang. Sa iya ang himaya sa gihapon. Kabay pa.” (Roma 11:33-36) Busa, daw ano ka nagakaigo nga magpabilin kita nga nagapanguyapot kay Jah Jehova kag nagabantala sang aton bug-os nga kompiansa kag pagsalig sa iya subong ang aton gamhanan nga Dios kag Soberano nga Ginuo!—Ipaanggid ang Hebreo 3:14.

 4. (a) Ngaa may maayong rason si manalagna Isaias sa pagsiling, ‘Magasalig ako kag indi magkahadlok’? (b) Ngaa ang katawhan ni Jehova may maayong rason sa pagsalig kay Jah Jehova sa sining ika-20 ka siglo?

⁴ Si Isaias may maayo nga rason sa pagsiling, ‘Magasalig ako kag indi magkahadlok.’ Nangin pamilyar katama sang ulihi ang manalagna sa mga buhat sang pagluwas sang Dios. Saksi sia sang gintuman ni Jehova ang Iya pulong paagi sa pagpaubos sa Asiria kag sa iya matinaastaason nga hari, si Senaquerib. Sa isa ka gab-i, 185,000 ka Asiriahanon nga soldado ang napatay paagi sa isa lamang ka anghel nga ginpadala sang aton gamhanan nga Dios, si Jehova! Natabo inang daku nga pagluwas bangod si Hari Ezequias kag ang bilog nga Juda nagsalig sing bug-os kay Jah Jehova. (Isaias 37:6, 7, 21, 36-38) Sa sining ika-20 ka siglo, ginluwas man ni Jehova ang iya katawhan gikan sa mga pamigus, mga pagdumili, mga paghingabot, kag mga kampo konsentrasyon. Kaangay sang matinaastaason nga mga Asiriahanon sang panahon ni Isaias, ang gumalahom sang Nazi nga si Adolf Hitler nagreklamo batok sa mga Saksi ni Jehova, nga sang isa ka okasyon nagsinggit, “Ining grupo pagalaglagon sa Alemanya!” Apang si Hitler kag ang iya mga Nazi amo ang ginlaglag. Kag karon ang diutay nga grupo sang Aleman nga mga Saksi nga nagsalig kay Jehova nagtubo tubtob sa 121,200!—Salmo 27:1, 2; Roma 8:31, 37.

 5. Paano naaplikar ang pinamulong sang Isaias 12:3-5 sa nagasalig nga katawhan sang Dios karon?

⁵ Bisan diin man nga may paghingabot, ang nagasalig nga katawhan ni Jehova ginapaumpawan kag ginapabakud paagi sa pag-inum sa nagahatag sing kabuhi nga tubig sang kamatuoran. Subong gid ini sa ginsiling sang manalagna sang Dios sa Isaias 12:3-5: “Sa may kalipay magasag-ub kamo sing tubig sa mga bubon sang kaluwasan. Kag magasiling kamo sa sadto nga adlaw: ‘Magpasalamat kamo kay Jehova! Magpanawag sa iya ngalan. Ipahayag ang iya mga binuhatan sa katawhan. Isambit nga ang iya ngalan ginapakataas. Mag-amba kay Jehova, kay naghimo sia sing mahimayaon nga mga butang. Ipakilala ini sa bug-os nga duta.’” Kabay nga padayon kita nga magainum sang kamatuoran sang Ginharian kag mapasalamaton nga ipadaku ang ngalan sang aton Soberano nga Ginuo, si Jehova. Upod ang bug-os nga pagsalig kay Jehova, “iwali [naton] ang pulong, mag-ukud sa maayo nga panag-on, sa dimaayo nga panag-on.” (2 Timoteo 4:2) Bisan ano man ang ginahimo sang mga manugpamatok, si Jah Jehova mahigugmaon nga magatuytoy sa aton sa dalan sang kaluwasan!

‘Ang Banwa sang Makakulugmat nga mga Pungsod’

 6, 7. (a) Nahisanto sa Isaias 25:1, tungod sa ano nga dapat himayaon si Jehova sang iya mga sumilimba? (b) Paano ginalaragway sang Isaias 25:2, 3 ang isa ka siudad? (c) Ano nga siudad ang mahimo nga ginapatuhuyan sang manalagna, kag ngaa?

⁶ Kadtuan naton karon ang Isaias kapitulo 25. Sa bersikulo 1 aton mabasa: “O Jehova, ikaw ang akon Dios. Pakataason ko ikaw, dayawon ko ang imo ngalan, kay naghimo ka sing makatilingala nga mga butang, ang mga laygay kutob sa dumaan, sa pagkatutom, sa pagkamasaligan.” Ang masaligon nga mga sumulunod ni Jehova nagahimaya sa iya bangod sang makatilingala nga mga buhat nga ginhimo niya sa tunga nila. Nian si Isaias naghatag sing daku nga paanggid, nga nagasiling kay Jehova: “Kay ang siudad ginhimo mo nga tinumpok, ang siudad nga may pamakud nga kagulub-an, ang palasyo sang mga dumuluong nga indi siudad, indi na gid ini pagpatindugon. . . . Ang siudad sang makakulugmat nga mga pungsod magakahadlok [kay Jehova].”—Isaias 25:2, 3.

⁷ Ano ining wala mahingadli nga siudad sang makakulugmat? Ayhan ginapatuhuyan ni Isaias ang Ar, ang kapital sang Moab, nga kasumpong pirme sang katawhan sang Dios. Apang ang konteksto diri mas nagakabagay sa isa pa ka sanga sang organisasyon ni Satanas—ang panguna nga kasumpong nga Babilonia. Sa gintalana nga tion, ang Babilonia magahapay sang Juda kag Jerusalem, magalaglag sang balay sang pagsimba kay Jehova, kag magahimo nga bihag sang makalampuwas nga katawhan. Ginakutlo ni Isaias ang hari sang Babilonia nga nagatikal: “Magasaka ako sa langit. Pataason ko ang akon trono labaw sa kabituonan sang Dios, magalingkod ako sa bukid sang katilingban. . . . Magapakaangay ako sa Labing Mataas.” Apang bayawon ni Jehova si Ciro sang Persia sa pag-utod sa Babilonia kag sa pagpasag-uli sang katawhan sang Dios sa ila duta. Subong sang gintagna, ang lugar sang dumaan nga Babilonia nabilin nga isa na lamang ka “tinumpok sang mga bato” kag “kagulub-an.”—Isaias 14:12-14; 13:17-22.

 8, 9. (a) Anong iban pa nga Babilonia ang dapat atubangon sang mga sumilimba ni Jehova, kag paano sia nagluntad? (b) Paano sia ginalaragway ni Isaias, kag ngaa ang termino nagakabagay?

⁸ Apang, kapin sa 2,500 ka tuig sa tapos mapukan ang Babilonia, ang mga sumilimba ni Jehova dapat gihapon makig-away sa isa pa ka Babilonia—ang “Babilonia nga Daku, ang iloy sang mga bigaon kag sang makangilil-ad nga butang sa duta.” (Bugna 17:5) Sia amo ang kalibutanon nga emperyo sang butig nga relihion. Nag-umpisa sia dili madugay pagkatapos sang Anaw sang adlaw ni Noe, sang gintukod ni Nimrod ang orihinal nga Babilonia, nga nangin ang ginhalinan sang dimatuod, sektaryan nga relihion. Sa tapos gintukod ni Jesus kag sang iya mga apostoles ang Cristianismo, gindagtaan sang mga apostata ang kamatuoran sang Biblia paagi sa pagpasulod sa paganong Babilonianhon nga “mga panudlo sang mga demonyo,” kag ginpatubas ang relihioso nga sistema sang Cristiandad. (1 Timoteo 4:1) Ining dimatuod nga Cristianismo nangin ang panguna nga bahin sang “Babilonia nga Daku,” nga nagalab-ot sa bug-os nga duta sang tanan nga pungsod sang katawhan. Ginalaragway sia ni Isaias subong ang ‘banwa sang makakulugmat nga mga pungsod.’

⁹ Sa sulod sang kapin na sa apat ka milenyo, kutob sang ginpasad ang orihinal nga Babilonia tubtob karon, gingamit sang mapintas nga mga diktador ang makakulugmat nga mga klerigo subong kasangkapan sa pagpugong kag pagkontrol sa mga tawo. Busa, “ang tawo naggahom sa tawo sa iya kasamaran.” (Manugwali 8:9) Naluoy si Jesus sa mga tawo “kay ginlapyo sila kag gin-aplaag” sang dimatuod nga mga manugbantay sang relihion. Karon, ang pinakabalasulon nga grupo ginkilala subong ang “tawo sang sala,” nga ginahuman sang nagapakataas sa kaugalingon nga klero sang Cristiandad, nga nanguna sa pagpamatok kag paghingabot sa mga Saksi ni Jehova.—Mateo 9:36; 2 Tesalonica 2:3, 4.

10. (a) Nahisanto sa Isaias 25:3, paano napilitan ang ‘banwa sang makakulugmat nga mga pungsod’ sa paghimaya kay Jehova, kag sa pagkahadlok man sa iya? (b) Sa Isaias 25:4, 5, ano ang ginsiling ni Isaias kay Jehova, kon tuhoy sa “mga mapainubuson” kag “mga makakulugmat”?

¹⁰ Sang tuig 1919 ginhilway ni Jehova ang iya matuod nga katawhan gikan sa pagkontrol sang “Babilonia nga Daku.” Napilitan inang ‘banwa sang makakulugmat nga mga pungsod’ sa paghimaya kay Jehova sa bagay nga dapat niya tan-awon nga may kapait ang “makatilingala nga mga butang” nga ginhimo niya sa pagpasag-uli sa iya katawhan sa dinamiko nga hilikuton. Ang butig nga mga relihionista napilitan man sa pagkahadlok kay Jehova, sa paghulat sa kon ano ang natigana sa ila. Sa sulod sang mga siniglo, ang makakulugmat nga mga klerigo nagpakataas sang ila kaugalingon sa ibabaw sang mga lego. Apang karon si Isaias nagahambal tuhoy kay Jehova, nga nagasiling: “Kay ikaw nangin kabakuran sa makaluluoy, kabakuran sa nawad-an sa iya kasakitan, dalangpan gikan sa unos kag handong sa kainit, kon ang pusnga sang mga makakulugmat subong sang unod batok sa kuta. Subong sang kainit sa duog nga kigas, palinungon mo ang kagahod sang mga dumuluong, subong sang kainit paagi sa handong sang isa ka gal-um. Ang ambahanon sang mga makakulugmat paubson.”—Isaias 25:4, 5.

Wala sing Makalilipay nga Ambahanon sa “Babilonia”!

11. Ngaa wala sing makalilipay nga ambahanon sa “Babilonia nga Daku,” kag paano ini gin-ilustrar sa pagtinipon sang lainlain nga mga relihion sa Assisi, Italya?

¹¹ Amo sina, sa pagkamatuod, ang kahimtangan karon sa bug-os nga sakop sang “Babilonia nga Daku.” Wala sing makalilipay nga ambahanon nga makita didto. Ang iya relihioso nga mga lider naligban sa mga dios nga dapat nila simbahon. Maathag ini nga ginpakita sa pagtinipon sang mga relihion sa Assisi, Italya, sang Oktubre 27, 1986. Didto, may kaangtanan sa Internasyonal nga Tuig sang Paghidait sang Nasyones Unidas, gintipon ni Papa Juan Paulo II ang mga lider sang dalagku nga mga relihion sang “Babilonia nga Daku.” Nagpangamuyo sila nga tanan sing paghidait, ang iban nga Budhistang mga monghe sing tubtob sa 12 ka oras kalawig sa isa ka adlaw. Apang kay sin-o sila nagpangamuyo? Kay Maria bala? Ukon sa balaan nga Trinidad sang Cristiandad? Ukon sa trinidad sang Hindu? Ukon sa linibo ka dios sang Budhismo? Kay Allah bala? Ukon sa manubo nga sapat, sa lobo, nga ginasimba sang mga Shintoista? Ukon ang labing kalahamut-an nga mga pangamuyo amo bala ang iya sang Amerikanong Indian sang tribo sang Crow? Ginreport sia nga ‘mahimayaon sa isa ka halangdon nga head­dress,’ samtang nagasindi sia sang pipo sa paghidait kag nagabungat sang iya mga pangamuyo “sa aso samtang nagataas ini kaangay sang incienso sa matugnaw nga hangin.”

12. Anong mga pulong ni Miqueas kag ni Isaias ang wala pag-ugyoni sadtong mga relihionista?

¹² Isa ka butang ang pat-od: Wala sing isa sadtong mga relihionista, halin kay Dalai Lama sang Budhismo tubtob sa “Iya Halangdon” nga si Methodius sang Griegong Ortodokso nga Iglesia, ang nagaugyon sa pinamulong sang Biblia sa Miqueas 4:5: “Kay kita nagalakat sa ngalan ni Jehova nga aton Dios tubtob sa tion nga dinapat-od, bisan sing dayon.” Wala sila nagaugyon sa kamatuoran sang inspirado nga pinamulong ni Isaias sa kapitulo 42, bersikulo 5 kag 8: “Amo ini ang ginasiling sang matuod nga Dios, nga si Jehova, ang Manunuga sang mga langit kag Sia nga naghitad sa ila; Sia nga naghumlad sang duta kag sang nagaguwa sa sini, Sia nga nagahatag sing ginhawa sa katawhan sa ibabaw sini, kag espiritu sa mga nagalakat sa sini: ‘Ako amo si Jehova. Ina amo ang akon ngalan; kag indi ko pag-ihatag sa iban ang akon himaya, ukon ang akon pagdayaw sa mga larawan nga tinigban.’”

13. Ano gid ang natabo sa Assisi, kag paano ini gintagudilian ni Jesus sang yari sia sa duta?

¹³ Sa Assisi, ang pakitakita nga seremoniya, nagapakilala nga panapton, kag sulit-sulit nga mga pangadi amo ang mga paagi sa paghimo sing dayag kaayo nga pagpakitakita. Amo sina ang gintagudilian ni Jesus nga Anak ni Jehova sang yari sia sa duta. Nagsiling sia tuhoy sa relihioso nga mga lider sadto anay sang adlaw niya: “Sila nagahimo sang tanan nila nga buluhaton agod tan-awon sang mga tawo,” kag ginsilingan niya sila sing prangka: “Kailo kamo, mga escriba kag mga Fariseo, mga salimpapaw! bangod nga ginatakpan ninyo ang ginharian sang langit sa mga tawo; kay wala kamo inyo nagasulod, ukon nagatugot sa mga manugsulod sa pagsulod.” (Mateo 23:5, 13; tan-awa man ang Mateo 6:1-8.) Indi ang pakunokuno nga pakitakita ukon duog sang pagsimba ang importante sa Dios. Subong sang ginsiling ni Jesus: “Ang Dios Espiritu, kag ang mga nagasimba sa iya dapat magsimba sa espiritu kag kamatuoran.”—Juan 4:21, 24.

Ang Matuod nga Ginhalinan sang Paghidait

14. (a) Ngaa ang mga pangadi sang mga relihion sang kalibutan para sa paghidait salimpapaw? (b) Ano ang balaan nga paghukom sa relihion sang Cristiandad?

¹⁴ Nakita ang kagumon sa mga relihion sang kalibutan, mangin inosente bala ang bisan sin-o sa paghunahuna nga ang mga pangadi sang relihioso nga mga lider magadala sing paghidait sa kalibutan? Ginatos na ka tuig nga nagpangadi sila sing salimpapaw, samtang sa amo man nga tion nagaentra sa mga inaway sang mga pungsod, sa mga Krusada, kag sa malaut nga mga paghingabot. Ang manalagna ni Jehova nagpamangkot: “Makailis bala ang Cushanon sang iya panit? ukon ang leopardo sang iya mga pintokpintok? Nian kamo man makahimo sing maayo nga naanad sa paghimo sing malaut.” (Jeremias 13:23) Subong ang panguna nga bahin sang “Babilonia nga Daku”—ang kalibutanon nga emperyo sang butig nga relihion—ang relihion sang Cristiandad labi na gintimbang sa balaan nga mga timbangan kag nasapwan nga kulang sing mailo. Pagalaglagon ini!—Jeremias 2:34, 35, 37; 5:29-31; Daniel 5:27.

15. Paano paluntaron ni Jehova ang mapinadayunon nga paghidait, kag paano ang mga nagasalig sa iya nagaalagad sa kausa sang paghidait?

¹⁵ Si Jehova, “ang Dios sang paghidait,” magadala sing mapinadayunon nga paghidait paagi sa paglaglag sa tanan nga mga nakasala sa dugo kag sa pagpapuyo sa duta sang mga tawo nga nagahigugma gid sang kamatuoran kag pagkamatarong. (Filipos 4:9) Suno kay Hari David, ang mga mahagop nga “nagasalig kay Jehova kag nagahimo sing maayo” ang “magapanag-iya sang duta” kag “magakalipay sa kabuganaan sang paghidait.” (Salmo 37:3, 11) Ang mga ‘nagasalig pirme kay Jehova kag nagahimo sing maayo’ nagaalagad sa kausa sang paghidait sa paagi nga indi gid mahimo sadtong nagapangadi sa lainlain nga mga dios, kag mga imahen.—Salmo 115:2-8; Isaias 44:14-20.

16. Ano nga piesta ang ginhanda ni Jehova para sa mga mahagop nga gintipon gikan sa “banwa sang makakulugmat nga mga pungsod”?

¹⁶ Daw ano ka daku nga kinatuhayan sa ulot sang mga pangamuyo kag mga paglaum sang katawhan sang Dios kag sang mga sumalakdag sang “Babilonia nga Daku”! Daku gid ang aton apresasyon nga “ang ambahanon sang mga makakulugmat paubson”! (Isaias 25:5) Apang tuhoy sa mga makakulugmat nga gintipon gikan sa “banwa sang makakulugmat nga mga pungsod,” si Isaias padayon nga nagsiling: “Si Jehova sang mga kasoldadosan magahimo sa tanan nga mga katawhan, sa sining bukid, sing piesta sa matambok nga mga butang, piesta sa mga alak nga labud, . . . nga pinatin-aw sing maayo.” (Isaias 25:6) Ang espirituwal nga piesta nga ginapaambitan karon sang mga nagasimba kay Jehova makalilipay nga makaalayaw, isa gid matuod ka piesta! Ang aton mga tagipusuon ginpabakud sa pagbatas kag ang aton kasadya nagaawas samtang ginaalagad naton si Jehova sing makugi nga nagahulat sa pagbag-o sing kabuhi kag piesta sang maayong mga butang nga ginsaad ni Jehova para sa bag-ong duta.—Salmo 104:1, 14, 15; Mateo 19:28, KJ.

17. Anong “makatilingala nga mga butang” ang himuon ni Jehova, nga nagadala sing anong mga kalipay?

¹⁷ Sa dili madugay, si Jah Jehova magahimo sing “makatilingala nga mga butang” sa pagdula indi lamang sa “Babilonia nga Daku” kundi subong man sa “takurong” sang pagtagudili nga nagahumlad sa katawhan bangod sang sala ni Adan. (Isaias 25:7) Huo, sa sadsaran sang halad ni Jesus, tumanon sang aton Dios ang tagna sang Isaias 25:8: “Ginlamon niya sing dayon ang kamatayon, kag pahiran sang Soberano nga Ginuong si Jehova ang luha sang tanan nila nga nawong. Kag ang kahuluy-an sang iya katawhan kuhaon niya sa bug-os nga duta, kay si Jehova nagpamulong sini.” Daw ano nga kalipay ang makita nga gindula ang Adaniko nga sala kag kamatayon kag ginaabiabi ang mga hinigugma sa pagbalik nila gikan sa pagpanguyapot sang kamatayon! Daw ano nga kalipay ang mahibaluan nga ang matutom nga mga saksi ni Jehova naghatag sing kompleto nga sabat sa dakung Manugyaguta, nga si Satanas nga Yawa! (Hulubaton 27:11) Wala na sing bisan sin-o ang magapasipala sa ila, kay nagmadinalag-on sila kon tuhoy sa ila integridad. “Sa pagkatutom, sa pagkamasaligan,” gintuman ni Jehova ang mga butang nga gintagna—ang iya “mga laygay kutob sang nagligad nga tion.” Ang bug-os nga duta mangin matarong nga paraiso, nga puno sang matarong nga mga tawo. Isa gid ka malipayon nga palaabuton!

18. Walay sapayan sang mga pag-ipit, ano ang determinado nga himuon naton, nahisanto sa Isaias 25:9?

¹⁸ Pat-od nga padyaan ang aton pirme nga pagsalig kay Jehova sa sining madulom nga mga adlaw. Bisan ano man nga mga pag-ipit ang dapat naton awayon sa aton matag-adlaw nga pagkabuhi—ayhan sa pag-aman sa aton mga pamilya, sa pagpanguyapot sing hugot sa mga prinsipio sang Biblia sa eskwelahan, ukon sa paghatag sing panaksi sa mabudlay nga mga teritoryo—pirme kita magsalig kay Jehova. Ang aton paghupot sing suod nga kaangtanan kay Jehova subong ang “Manugpamati sang pangamuyo” magahatag sa aton sang kaluwasan. (Salmo 65:2) Busa, magmangin determinado kita sa pagpabilin sa tunga sadtong nagasiling, sang pinamulong sang Isaias 25:9: “Yari karon! Ini amo ang aton Dios. Naglaum kita sa iya, kag sia magaluwas sa aton. Ini amo si Jehova. Naglaum kita sa iya. Magkalipay kita kag magkasadya sa iya kaluwasan.”

Mga Pamangkot sa Repaso

◻ Paano si Jah Jehova ang aton kusog kag aton gahom?

◻ Ano ang “banwa sang makakulugmat nga mga pungsod”?

◻ Paano napilitan ‘ang banwa sang makakulugmat nga mga pungsod’ sa paghimaya kay Jehova, kag sa pagkahadlok man sa iya?

◻ Ano ang nagapakita nga wala sing makalilipay nga ambahanon sa “Babilonia nga Daku”?

◻ Anong “makatilingala nga mga butang” ang pagahimuon ni Jehova para sa iya katawhan?