Kapitulo Kuatro

Ang Balay ni Jehova Ginbayaw

Isaias 2:1-5

1, 2. Ano nga mga pulong ang nasulat sa isa ka pader sa plasa sang Nasyones Unidas, kag diin ini maghalin?

“SALSALON nila ang ila mga espada nga mga punta sang arado. Kag ang ila mga bangkaw nga mga galab nga inughagbas: ang pungsod indi magabayaw sing espada batok sa pungsod. Indi na sila magtuon sing inaway.” Nasulat ining mga pulong sa isa ka pader sa plasa sang Nasyones Unidas sa Siudad sang New York. Sa sulod sang mga dekada wala mahibalui kon kay sin-o maghalin ini nga mga pulong. Sanglit ang katuyuan sang NU amo ang pagpaluntad sing paghidait sa bug-os nga kalibutan, makatarunganon ihinakop nga naghalin ining binalikwat sa mga tagtukod sang NU, sang 1945.

² Apang, sang 1975, ang ngalan nga Isaias gintigib sa pader sa ubos sang binalikwat. Sadto nag-athag nga ining mga pulong indi gali bag-o. Ang matuod, ginrekord ini subong isa ka tagna sang nagligad nga kapin sa 2,700 ka tuig sa amo karon ang ikaduha nga kapitulo sang tulun-an sang Isaias. Sa sulod sang linibo ka mga tuig ginapalibugan sang mga mahigugmaon sa paghidait kon paano kag kon san-o mahanabo ang mga butang nga gintagna ni Isaias. Indi na ini dapat palibugan. Makita naton karon ang talalupangdon nga katumanan sining dumaan nga tagna.

3. Sin-o ang mga pungsod nga nagasalsal sang ila mga espada nga mangin mga punta sang arado?

³ Sin-o ang mga pungsod nga nagasalsal sang ila mga espada nga mangin mga punta sang arado? Sa pagkamatuod, indi ang politikal nga mga pungsod kag mga panguluhan karon. Tubtob karon ining mga pungsod nagahimo gihapon sing mga espada, ukon mga hinganiban, para sa inaway kag agod mahuptan ang “paghidait” paagi sa kusog. Ang matuod, ang huyog sang mga pungsod amo pirme ang pagsalsal sang ila mga punta sang arado nga mangin mga espada! Ang tagna ni Isaias nagakatuman sa mga tiglawas gikan sa tanan nga pungsod, mga tawo nga nagasimba kay Jehova, “ang Dios sang paghidait.”—Filipos 4:9.

Ang mga Pungsod nga Nagadugok sa Putli nga Pagsimba

4, 5. Ano ang ginatagna sang nagabukas nga mga bersikulo sang Isaias kapitulo 2, kag ano ang nagapadaku sang pagkamasaligan sining mga pulong?

⁴ Ang Isaias kapitulo 2 nagasugod paagi sa sining mga pulong: “Ang butang nga nakita ni Isaias nga anak ni Amoz sa palanan-awon nahanungod sa Juda kag Jerusalem: Kag mahanabo gid sa ulihi nga bahin sang mga adlaw nga ang bukid sang balay ni Jehova tukuron sing malig-on nga mataas pa sa putukputukan sang kabukiran, kag pataason pa ini sa kabakuluran; kag magadugok sa sini ang tanan nga pungsod.”—Isaias 2:1, 2.

⁵ Talupangda nga ang gintagna ni Isaias indi haumhaum lamang. Ginsugo si Isaias nga irekord ang mga hitabo nga “mahanabo gid”—nga walay kapaslawan. Ang bisan ano nga ginatuyo ni Jehova “pat-od nga magamadinalag-on.” (Isaias 55:11) Agod padakuon ang pagkamasaligan sang iya saad, gin-inspirar sang Dios si manalagna Miqueas, nga katubotubo ni Isaias, nga irekord sa iya tulun-an ang amo gihapon nga tagna nga ginasambit sa Isaias 2:2-4.—Miqueas 4:1-3.

6. San-o matuman ang tagna ni Isaias?

⁶ San-o matuman ang tagna ni Isaias? “Sa ulihi nga bahin sang mga adlaw.” Ang New International Version mabasa: “Sa katapusan nga mga adlaw.” Ang Cristianong Griegong Kasulatan nagtagna sing mga hitabo nga magapakilala sini nga panahon. Lakip sa sini amo ang mga inaway, mga linog, mga piste, kakulang sa pagkaon, kag “makahalanguyos nga mga tion nga mabudlay pakigbagayan.”a (2 Timoteo 3:1-5; Lucas 21:10, 11) Ang katumanan sini nga mga tagna nagahatag sing daku nga ebidensia nga nagakabuhi kita “sa ulihi nga bahin sang mga adlaw,” ang katapusan nga mga adlaw sang sistema sang kalibutan karon. Gani, makatarunganon nga paabuton naton nga makita sa aton panahon ang mga butang nga gintagna ni Isaias.

Ang Bukid Sang Pagsimba

7. Anong matagnaon nga laragway ang ginlaragway ni Isaias?

⁷ Paagi sa pila ka pulong, ginlaragway ni Isaias ang isa ka maathag nga matagnaon nga laragway. Makakita kita sing isa ka mataas nga bukid, nga sa ibabaw sini amo ang isa ka mahimayaon nga balay, ang templo ni Jehova. Ini nga bukid mataas pa sa mga bukid kag mga bakulod sa palibot sini. Apang, indi ini makatalagam ukon makahaladlok; makagalanyat ini. Ang mga tawo sang tanan nga pungsod nalangkag nga magtaklad sa bukid sang balay ni Jehova; nagadugok sila sa sini. Mahapos ini handurawon, apang ano ang kahulugan sini?

8. (a) Sa ano ginaangot ang mga bakulod kag mga bukid sang panahon ni Isaias? (b) Ano ang ginalaragway sang pagdugok sang mga pungsod sa “bukid sang balay ni Jehova”?

⁸ Sang panahon ni Isaias ang mga bakulod kag mga bukid masami nga ginaangot sa pagsimba. Halimbawa, amo ini ang nahamtangan sang idolatroso nga pagsimba kag sang mga santuaryo sang butig nga mga dios. (Deuteronomio 12:2; Jeremias 3:6) Apang, ang balay, ukon templo, ni Jehova nagapuni sa putukputukan sang Bukid Moria sa Jerusalem. Ang matutom nga mga Israelinhon nagalakbay pa Jerusalem makatlo kada tuig kag nagataklad sa Bukid Moria agod magsimba sa matuod nga Dios. (Deuteronomio 16:16) Gani ang pagdugok sang mga pungsod sa “bukid sang balay ni Jehova” nagalaragway sang pagtipon sang madamo nga katawhan sa matuod nga pagsimba.

9. Ano ang ginalaragway sang “bukid sang balay ni Jehova”?

⁹ Siempre, ang katawhan sang Dios karon wala nagatipon sa isa ka literal nga bukid nga may templo nga human sa bato. Ang templo ni Jehova sa Jerusalem ginlaglag sang Romanong mga hangaway sang 70 C.E. Luwas pa, maathag nga ginpakita ni apostol Pablo nga ang templo sa Jerusalem kag ang tabernakulo nga nauna sa sini malaragwayon. Naglaragway ini sa daku pa, espirituwal nga katunayan, “ang matuod nga kayangkayang, nga ginpatindog ni Jehova, kag indi sang tawo.” (Hebreo 8:2) Ining espirituwal nga kayangkayang amo ang kahimusan para sa pagpalapit kay Jehova sa pagsimba nga napasad sa halad nga gawad ni Jesucristo. (Hebreo 9:2-10, 23) Nahisanto sa sini, “ang bukid sang balay ni Jehova” nga ginasambit sa Isaias 2:2 nagarepresentar sang nabayaw nga putli nga pagsimba kay Jehova sa aton tion. Ang mga nagabaton sang putli nga pagsimba wala nagatipon sa isa ka geograpiko nga lokasyon; nagatipon sila sa nahiusa nga pagsimba.

Ang Pagbayaw sa Putli nga Pagsimba

10, 11. Sa anong kahulugan ang pagsimba kay Jehova ginbayaw sa aton panahon?

¹⁰ Ang manalagna nagsiling nga “ang bukid sang balay ni Jehova,” ukon ang putli nga pagsimba, ‘pagatukuron sing malig-on nga mataas pa sa putukputukan sang kabukiran’ kag ‘pataason pa sa kabakuluran.’ Madugay na antes sang panahon ni Isaias, gindala ni Hari David ang kaban sang katipan sa Bukid Sion sa Jerusalem, nga 760 metros ang kataason sa katupungan sang dagat. Nagpabilin didto ang kaban tubtob ginsaylo ini sa nahuman na nga templo sa Bukid Moria. (2 Samuel 5:7; 6:14-19; 2 Cronica 3:1; 5:1-10) Sa amo, sang panahon ni Isaias ang sagrado nga kaban ginpataas na kag ginpahamtang sa templo, sa isa ka posisyon nga mataas pa sa madamo nga bakulod sa palibot nga gingamit para sa butig nga pagsimba.

¹¹ Sa pagkamatuod, sa espirituwal nga kahulugan, ang pagsimba kay Jehova pirme gid nga nagalabaw sa relihioso nga mga buhat sang mga tawo nga nagaalagad sa butig nga mga dios. Apang, sa aton panahon, ginbayaw ni Jehova ang pagsimba sa iya sa langit, mataas pa sa tanan nga porma sang dimatinlo nga pagsimba, huo, mataas pa sa tanan nga “kabakuluran” kag “putukputukan sang kabukiran.” Paano? Sa kabilugan paagi sa pagtipon sa mga tawo nga luyag magsimba sa iya “sa espiritu kag kamatuoran.”—Juan 4:23.

12. Sin-o ang “mga anak sang ginharian,” kag ano nga pagpanipon ang nagakatabo?

¹² Nagpatuhoy si Jesucristo sa “katapusan sang sistema sang mga butang” subong tig-alani nga sa amo nga tion tipunon sang mga anghel “ang mga anak sang ginharian”—ang mga tawo nga nagalaum nga maggahom upod kay Jesus sa langitnon nga himaya. (Mateo 13:36-43) Sugod sang 1919, gintugutan ni Jehova “ang mga nagkalabilin” sining mga anak nga makigbahin upod sa mga anghel sa pag-ani. (Bugna 12:17) Sa amo, subong umpisa, “ang mga anak sang ginharian,” ang hinaplas nga kauturan ni Jesus, amo ang gintipon. Nian nagapakigbahin sila sa dugang pa nga pagpanipon.

13. Paano ginpakamaayo ni Jehova ang hinaplas nga mga nagkalabilin?

¹³ Sa sining tion sang tig-alani, amat-amat nga ginbuligan ni Jehova ang hinaplas nga mga nagkalabilin nga mahangpan kag iaplikar ang iya Pulong, ang Biblia. Nakabulig man ini sa pagpataas sa putli nga pagsimba. Bisan pa ‘ang kadudulman nagatabon sang duta, kag ang pitipit nga kadudulman sang pungsudnon nga mga grupo,’ ang mga hinaplas ‘nagasiga subong nga mga sulu’ sa tunga sang katawhan, natinluan kag napadalisay ni Jehova. (Isaias 60:2; Filipos 2:15) ‘Napun-an sang sibu nga ihibalo tuhoy sa iya kabubut-on nga may bug-os nga kaalam kag espirituwal nga paghangop,’ ining mga hinaplas sang espiritu “nagasilak sing masanag subong sang adlaw sa ginharian sang ila Amay.”—Colosas 1:9; Mateo 13:43.

14, 15. Dugang sa pagtipon sa “mga anak sang ginharian,” ano nga pagtipon ang nagakatabo, kag paano ini gintagna ni Hageo?

¹⁴ Dugang pa, may iban pa nga nagdugok “sa bukid sang balay ni Jehova.” Gintawag ni Jesus nga iya “iban nga mga karnero,” nagalaum sila nga magkabuhi sing dayon sa isa ka paraiso nga duta. (Juan 10:16; Bugna 21:3, 4) Sugod sang dekada 1930, naglutaw sila sing linibo, dayon sing ginatos ka libo, kag karon sing minilyon! Sa isa ka palanan-awon nga ginhatag kay apostol Juan, ginalaragway sila subong “isa ka dakung kadam-an nga wala sing tawo nga makaisip, gikan sa tanan nga pungsod kag tribo kag katawhan kag hambal.”—Bugna 7:9.

¹⁵ Gintagna ni manalagna Hageo ang paglutaw sining dakung kadam-an. Sia nagsulat: “Amo ini ang ginsiling ni Jehova sang mga kasuldadusan, ‘Sa makaisa pa—diutay nga tion na lamang—kag uyugon ko ang langit kag ang duta kag ang dagat kag ang mamala nga duta. Kag uyugon ko ang tanan nga pungsod, kag ang kalahamut-an nga mga butang sang tanan nga pungsod [ang mga tawo nga nagabuylog sa hinaplas nga mga Cristiano sa putli nga pagsimba] pagapasudlon; kag pun-on ko ining balay sing himaya,’ siling ni Jehova sang mga kasuldadusan.” (Hageo 2:6, 7) Ang pagluntad sining nagadamo pa nga “dakung kadam-an” kag sang ila hinaplas nga mga kaupod nagabayaw, huo nagahimaya, sa putli nga pagsimba sa balay ni Jehova. Wala pa gid matabo anay nga subong sini kadamo ang nahiusa nga nagasimba sa matuod nga Dios, kag nagadala ini sing himaya kay Jehova kag sa iya nagalingkod sa trono nga Hari, si Jesucristo. Si Hari Solomon nagsulat: “Ang kadam-an sang katawhan amo ang puni sang hari.”—Hulubaton 14:28.

Ang Pagsimba Ginbayaw sa Kabuhi Sang Katawhan

16-18. Ano nga mga pagbag-o ang ginhimo sang iban agod simbahon si Jehova sing kalahamut-an?

¹⁶ Si Jehova lamang ang takus padunggan sa pagtib-ong sa putli nga pagsimba sa aton tion. Sa gihapon, may pribilehiyo ang mga nagapalapit sa iya nga makigbahin sa sining hilikuton. Subong nga kinahanglan ang panikasog sa pagtaklad sa bukid, kinahanglan man, ang panikasog sa pagtuon kag sa pagkabuhi nahisuno sa matarong nga mga talaksan sang Dios. Kaangay sang mga Cristiano sang nahauna nga siglo, gintalikdan karon sang mga alagad sang Dios ang mga estilo sang pagkabuhi kag ang mga buhat nga wala nagahisanto sa matuod nga pagsimba. Ang mga makihilawason, mga nagasimba sa idolo, mga makihilahion, mga makawat, mga makagod, mga palahubog, kag ang iban pa nagbag-o sang ila mga dalanon kag ‘ginhugasan na sing matinlo’ sa panulok sang Dios.—1 Corinto 6:9-11.

¹⁷ Ang isa ka halimbawa sini amo ang eksperiensia sang isa ka batan-on nga babayi nga nagsulat: “Nadulaan ako anay sing paglaum. Imoral ako kag palahubog. Gintapikan ako sing seksuwal nga mga balatian. Nagbaligya man ako sing mga droga kag wala gid sing ginaulikdan.” Sa tapos makatuon sang Biblia, naghimo sia sing daku nga mga pagbag-o agod masunod ang mga talaksan sang Dios. Karon sia nagsiling: “Malinong ang akon hunahuna, may pagtahod sa kaugalingon, may paglaum sa palaabuton, may matuod nga pamilya kag, labaw sa tanan, may kaangtanan sa aton Amay, si Jehova.”

¹⁸ Bisan sa tapos matigayon ang nahamut-an nga panindugan sa atubangan ni Jehova, dapat magpadayon ang tanan nga bayawon ang putli nga pagsimba paagi sa paghatag sa sini sing talalupangdon nga bahin sa ila kabuhi. Linibo ka tuig na ang nagligad, paagi kay Isaias, ginpabutyag ni Jehova ang iya pagsalig nga madamo karon ang malangkag sa paghimo sang pagsimba sa iya nga labing importante nga butang sa ila kabuhi. Lakip ka bala sa ila?

Isa ka Katawhan nga Ginatudluan Sang Dalanon ni Jehova

19, 20. Ano ang ginatudlo sa katawhan sang Dios, kag diin?

¹⁹ Ginasugiran kita ni Isaias sing dugang pa tuhoy sa mga nagabaton sang putli nga pagsimba karon. Sia nagsiling: “Madamo nga tawo ang magalakat gid kag magasiling: ‘Kari kamo, kag magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’ Kay gikan sa Sion magaguwa ang kasuguan, kag ang pulong ni Jehova gikan sa Jerusalem.”—Isaias 2:3.

²⁰ Wala ginatugutan ni Jehova ang iya katawhan nga magtalangtalang kaangay sang nadula nga mga karnero. Paagi sa Biblia kag sa napasad sa Biblia nga mga publikasyon, ginapaalinton niya sa ila ang iya “kasuguan” kag ang iya “pulong” agod matun-an nila ang iya mga dalanon. Ini nga ihibalo nagasangkap sa ila sa ‘paglakat sa iya mga banas.’ Gikan sa tagipusuon nga puno sing apresasyon kag nagasunod sa pagtuytoy sang Dios, nagahinambalanay sila tuhoy sa mga dalanon ni Jehova. Nagatipon sila sa dalagku nga mga kombension kag sa diutay nga mga grupo—sa mga Kingdom Hall kag sa pribado nga mga puluy-an—agod mamati kag magtuon sang mga dalanon sang Dios. (Deuteronomio 31:12, 13) Sa amo ginailog nila ang huwaran sang unang mga Cristiano, nga nagtipon agod magpalig-unay kag pukawon ang isa kag isa nga magbugana sa “gugma kag sa maayong mga buhat.”—Hebreo 10:24, 25.

21. Sa ano nga hilikuton nagapakigbahin ang mga alagad ni Jehova?

²¹ Ginaagda nila ang iban pa nga ‘magtaklad’ sa nabayaw nga pagsimba kay Jehova nga Dios. Nagahisanto gid ini sa ginsugo ni Jesus sa iya mga disipulo antes sia magkayab sa langit! Ginsugo niya sila: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Upod ang pagsakdag sang Dios, ang mga Saksi ni Jehova matinumanon nga nagapanghikot sa bug-os nga duta nga nagapanudlo kag nagahimo sing mga disipulo kag ginabawtismuhan sila.

Mga Espada Ginhimo nga mga Punta Sang Arado

22, 23. Ano ang ginatagna sang Isaias 2:4, kag ano ang ginsiling sang isa ka opisyal sang NU tuhoy sini?

²² Makadto kita karon sa masunod nga bersikulo, ang bahin sini nasulat sa pader sa plasa sang NU. Si Isaias nagsulat: “Magahatag gid sia sing paghukom sa tunga sang mga pungsod kag magatadlong sang mga butang nahanungod sa madamong katawhan. Kag salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magabayaw sing espada batok sa pungsod, kag indi na sila magtuon sing inaway.”—Isaias 2:4.

²³ Mabudlay ini matigayon. Si Federico Mayor, direktor-heneral sang United Nations Educational, Scientific, and Cultural Organization, nagsiling anay: “Ang tanan nga kalainan sang inaway, nga ginadala karon sa aton puluy-an sang radyo kag telebisyon, daw indi makapadulog sang pag-uswag sang daku nga palakat para sa inaway nga gintukod kag ginamentinar sa sulod sang madamo nga siglo. Yara sa mga kaliwatan karon ang halos imposible nga butang, ang Biblikanhon nga hilikuton nga ‘salsalon ang ila mga espada nga mga punta sang arado’ kag himuon ang pagbag-o gikan sa huyog sa inaway—nga ginpalambo halin sang una pa—padulong sa pagbatyag sing paghidait. Amo ini ang labing maayo kag labing dungganon nga buhat nga mahimo sang ‘katawhan sa bug-os nga kalibutan,’ kag amo ang pinakamatahom nga mapasubli sa aton mga kaliwat.”

24, 25. Kay sin-o nagakatuman ang mga pulong ni Isaias, kag sa anong paagi?

²⁴ Indi gid matigayon sang mga pungsod sa kabilugan ining dungganon nga tulumuron. Indi gid nila ini masarangan. Ang mga pulong ni Isaias ginatuman sang mga indibiduwal gikan sa madamo nga pungsod, nga nahiusa sa putli nga pagsimba. ‘Ginhusay [ni Jehova] ang mga butang’ sa tunga nila. Gintudluan niya ang iya katawhan sa pagkabuhi sing mahidaiton sa isa kag isa. Sa pagkamatuod, sa isa ka nabahinbahin kag nagailinaway nga kalibutan, ginsalsal nila sa malaragwayon nga paagi ang ila “mga espada nga mga punta sang arado kag ang ila mga bangkaw nga mga galab nga inughagbas.” Paano?

²⁵ Una, wala sila sing ginadampigan sa mga inaway sang mga pungsod. Antes mapatay si Jesus, nag-abot ang naarmasan nga mga tawo agod dakpon sia. Sang gingamit ni Pedro ang iya espada agod pangapinan ang iya Agalon, si Jesus nagsiling sa iya: “Itagob ang imo espada, kay ang tanan nga nagagamit sing espada sa espada mapatay.” (Mateo 26:52) Kutob sadto, ginsalsal sang suod nga mga sumulunod ni Jesus ang ila mga espada nga mangin mga punta sang arado kag naglikaw sa paggamit sing mga hinganiban agod patyon ang ila isigkatawo kag sa pagsakdag sa mga panikasog para sa inaway sa iban nga mga paagi. ‘Ginatinguhaan [nila] ang pagpakighidait sa tanan nga tawo.’—Hebreo 12:14.

Pagsunod sa mga Dalanon Sang Paghidait

26, 27. Paano ang katawhan sang Dios ‘nagapangita sing paghidait kag nagasunod sa sini’? Maghatag sing isa ka halimbawa.

²⁶ May paghidait ang katawhan sang Dios indi lamang bangod wala sila nagapakigbahin sa inaway. Bisan pa masapwan sila sa kapin sa 230 ka kadutaan kag nagarepresentar sa madamo nga mga hambal kag mga kultura, may paghidait sila sa isa kag isa. Masapwan sa ila ang moderno nga katumanan sang mga pulong ni Jesus, nga nagsiling sa iya mga disipulo sang nahauna nga siglo: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ang mga Cristiano karon “mga manugpahidait.” (Mateo 5:9, footnote) ‘Ginapangita [nila] ang paghidait kag ginasunod ini.’ (1 Pedro 3:11) Ginasakdag sila ni Jehova, “ang Dios nga nagahatag sing paghidait.”—Roma 15:33.

²⁷ May yara talalupangdon nga mga halimbawa sang mga nakatuon nga mangin manugpahidait. Ang isa ka batan-on nga lalaki nagsulat tuhoy sa iya kabuhi sang bata pa sia: “Ang kabudlay nga akon inagihan nagtudlo sa akon kon paano pangapinan ang akon kaugalingon. Nangin kabalan ako kag akig sa kabuhi. Pirme lang ako nagapakig-away. Kada adlaw, ginaaway ko ang lainlain nga bata sa palibot, kon kaisa paagi sa mga inumol, kon kaisa paagi sa mga bato ukon mga botelya. Nagdaku ako nga tuman kasingki.” Apang, sang ulihi, ginbaton niya ang pangagda nga magtaklad sa “bukid sang balay ni Jehova.” Natun-an niya ang mga dalanon sang Dios kag nangin mahidaiton nga alagad sang Dios.

28. Ano ang mahimo sang mga Cristiano sa pagpakighidait?

²⁸ Indi subong sini kasingki ang ginhalinan sang kalabanan nga alagad ni Jehova. Sa gihapon, bisan sa diutay lamang nga mga butang—mga buhat sang kaayo, pagkamapinatawaron, kag kahanuklog—nagatinguha sila nga mangin mahidaiton sa iban. Bisan pa indi himpit, nagatinguha sila nga iaplikar ang laygay sang Biblia nga ‘magpadayon sa pagpinaumuray sa isa kag isa kag hilway nga nagapinatawaray sa isa kag isa kon ang isa may inugsumbong batok sa isa.’—Colosas 3:13.

Isa ka Palaabuton nga May Paghidait

29, 30. Ano ang paglaum para sa duta?

²⁹ Nakahimo si Jehova sing dalayawon nga butang sa sining “ulihi nga bahin sang mga adlaw.” Ginatipon niya gikan sa tanan nga pungsod ang katawhan nga luyag mag-alagad sa iya. Ginatudluan niya sila sa paglakat sa iya mga dalanon, ang mga dalanon sang paghidait. Amo ini sila ang makalampuwas sa nagapakari nga “dakung kapipit-an” kag magasulod sa mahidaiton nga bag-ong kalibutan diin ang inaway dulaon tubtob san-o.—Bugna 7:14.

³⁰ Ang mga espada—ang mga hinganiban—madula na. Ang salmista nagsulat tuhoy sa amo nga tion: “Kari kamo, tan-awa ninyo ang mga binuhatan ni Jehova, kon paano sia naghimo sing makahayanghag nga mga hitabo sa duta. Ginapatunong niya ang mga inaway tubtob sa ukbong sang duta. Ginabali niya ang pana kag ginautod ang bangkaw; ginasunog niya sa kalayo ang mga kangga.” (Salmo 46:8, 9) Bangod sini nga paglaum, ang masunod nga laygay ni Isaias nagakaigo man karon subong sang una sang ginsulat niya ini: “O mga tawo sang balay ni Jacob, kari kamo kag maglakat kita sa kapawa ni Jehova.” (Isaias 2:5) Huo, tuguti ang kapawa ni Jehova nga mag-iwag sang aton banas karon, kag magalakat kita sa iya dalanon tubtob sa walay katubtuban.—Miqueas 4:5.

[Nota]