Ang Paghukom ni Jehova Batok sa Butig nga mga Manunudlo

“Sa mga manalagna sang Jerusalem nakita ko ang makasiligni nga mga butang, nagapanglahi sila kag nagalakat sa kabutigan . . . Tanan sila sa akon nangin subong sang Sodoma, kag ang iya mga pumuluyo subong sang sa Gomorra.”​—⁠JEREMIAS 23:⁠14.

 1. Ngaa mabug-at gid ang salabton sang isa nga nagapakigbahin sa balaan nga pagpanudlo?

ANG bisan sin-o nga nagapakigbahin sa balaan nga pagpanudlo nagadala sing mabug-at gid nga salabton. Ang Santiago 3:1 nagapaandam: “Mga kauturan ko, indi madamo sa inyo ang dapat mangin mga manunudlo, kay nahibaluan ninyo nga magabaton kita sing mas mabug-at nga paghukom.” Huo, ang mga manunudlo sang Pulong sang Dios yara sa idalom sang mas mabug-at nga salabton nga maghatag sing kalahamut-an nga rekord sangsa mga Cristiano sa kabilugan. Ano ang mangin kahulugan sini para sa mga mapamatud-an nga butig nga mga manunudlo? Usisaon naton ang kahim­tangan sang adlaw ni Jeremias. Tan-awon naton kon paano ini nagalaragway sa nagakatabo karon.

2, 3. Ano nga paghukom ang ginhatag ni Jehova paagi kay Jeremias sa butig nga mga manunudlo sang Jerusalem?

² Sang 647 B.C.E., ika-13 nga tuig sang paggahom ni Hari Josias, si Jeremias ginsugo subong manalagna ni Jehova. May reklamo si Jehova batok sa Juda, gani ginpadala niya si Jeremias agod ideklarar ini. Ang butig nga mga manalagna, ukon mga manunudlo, sang Jerusalem, nagahimo sing “makasiligni nga mga butang” sa mga mata sang Dios. Ang ila kalautan tuman ka daku nga ginpaangay sang Dios ang Jerusalem kag Juda sa Sodoma kag Gomorra. Ang Jeremias kapitulo 23 nagasugid sa aton nahanungod sini. Ang bersikulo 14 nagasiling:

³ “Sa mga manalagna sang Jerusalem nakita ko ang makasiligni nga mga butang, nagapanglahi sila kag nagalakat sa kabutigan; kag ginpabakod nila ang mga kamot sang mga nagahimo sing malaut agod nga indi sila magliso, ang kada isa gikan sa iya pagkamalaut. Tanan sila sa akon nangin subong sang Sodoma, kag ang iya mga pumuluyo subong sang sa Gomorra.”

 4. Paano may kaanggid sa Cristiandad karon ang malain nga halimbawa sa moral sang mga manunudlo sang Jerusalem?

⁴ Huo, ining mga manalagna, ukon mga manunudlo, nagpahamtang sing tuman kalain nga mga halimbawa sa moral kag, sa epekto, nagpalig-on sa katawhan sa paghimo sini man. Tan-awa ang mga kahimtangan sa Cristiandad karon! Indi bala pareho lang sila sang sa adlaw ni Jeremias? Sa karon ginatugutan sang mga klero ang mga makilahion kag mga homoseksuwal nga magpabilin subong mga katapo nila kag ginatugutan pa gani sila nga magdumala sa mga serbisyo sang ­simbahan. Katingalahan bala nga madamo sang nalista nga mga katapo sang iglesia ang imoral man?

 5. Ngaa labaw pa sa Sodoma kag Gomorra ang imoral nga kahimtangan sang Cristiandad?

⁵ Ginpaangay ni Jehova ang mga pumuluyo sang Jerusalem sa mga taga-Sodoma kag Gomorra. Apang ang imoral nga kahimtangan sang Cristiandad malain pa sa Sodoma kag Gomorra. Huo, mas salawayon ini sa mga mata ni Jehova. Ginasikway sang iya mga manunudlo ang Cristianong kasuguan sa moral. Kag nagapaluntad ini sing isa ka klima nga may manubo nga moral diin yara ang tanan nga sahi sang malalangon nga mga panghaylo sa paghimo sing malaut. Tuman ka lapnag ini nga kahimtangan sa moral amo kon ngaa ang kalautan ginatamod karon nga normal lamang.

“Nagalakat sa Kabutigan”

 6. Ano ang ginsiling ni Jeremias nahanungod sa kalautan sang mga manalagna sang Jerusalem?

⁶ Talupangda karon kon ano ang ginasiling sang bersikulo 14 nahanungod sa mga manalagna sang Jerusalem. Sila “nagalakat sa kabutigan.” Kag ang naulihi nga bahin sang bersikulo 15 nagasiling: “Gikan sa mga manalagna sang Jerusalem nagguwa ang apostasya pakadto sa bug-os nga duta.” Nian ang bersikulo 16 nagadugang: “Amo ini ang ginsiling ni Jehova sang kasuldadusan: “Dili kamo magpamati sa mga pulong sang mga manalagna nga nagatagna sa inyo. Ginahimo nila kamo nga walay pulos. Nagapa­mulong sila sing palanan-awon sang ila kaugalingon nga tagipusuon​—⁠indi gikan sa baba ni Jehova.’ ”

7, 8. Ngaa ang mga klero sang Cristiandad kaangay sa butig nga mga manalagna sang Jerusalem, kag paano ini nakaapektar sa mga sumilimba?

⁷ Kaangay sang butig nga mga manalagna sang Jerusalem, ang mga klero sang Cristiandad nagalakat man sa kabutigan, nagapalapta sing apostata nga mga doktrina, mga panudlo nga wala sa Pulong sang Dios. Ano ang pila sining butig nga mga panudlo? Ang pagkadimamalatyon sang kalag, ang Trinidad, purgatoryo, kag ang kalayuhon nga impierno sa pagpaantos sa katawhan sing dayon. Ginapakalam man nila ang mga dulunggan sang ila mga tagpalamati paagi sa pagbantala sang luyag pamatian sang katawhan. Ginasulitsulit nila nga wala sing kalamidad nga matabo sa Cristiandad bangod may paghidait sia sang Dios. Apang ang mga klero nagahambal sing “palanan-awon sang ila kaugalingon nga tagipusuon.” Butig ini. Ang mga nagapamati sa sina nga kabutigan ginahiluan sa espirituwal. Ginapatalang sila padulong sa ila kalaglagan!

⁸ Binagbinaga kon ano ang ginasiling ni Jehova tuhoy sining butig nga mga manunudlo sa bersikulo 21: “Wala ko pag-ipadala ang mga manalagna, apang nagdalagan sila. Wala ako magpamulong sa ila, apang nagtagna sila.” Gani sa karon, ang mga klero wala ginpadala sang Dios, ukon nagatudlo sila sing iya mga kamatuoran. Ang resulta? Ang makasiligni nga pagkawalay hinalung-ong sa Biblia nagaluntad sa tunga sang mga sumilimba bangod ginapakaon sila sang ila mga ministro sing kalibutanon nga mga pilosopiya.

9, 10. (a) Ano nga sahi ang mga damgo sang butig nga mga manunudlo sang Jerusalem? (b) Paano ang mga klero sang Cristiandad nagtudlo man sing “butig nga mga damgo”?

⁹ Dugang pa, ginasakdag karon sang mga klero ang butig nga mga paglaum. Talupangda ang bersikulo 25: “Nabatian ko ang mga manalagna nga nagatagna sing kabutigan sa akon ngalan, nga nagasiling, ‘Nagdamgo ako! Nagdamgo ako!’ ” Ano nga mga damgo? Ang bersikulo 32 nagasugid sa aton: “ ‘Yari karon, batok ako sa mga nagatagna sing mga damgo nga binutig,’ siling ni Jehova, ‘nga nagasugid sini kag nagapadalangdalang sa akon katawhan bangod sang ila mga kabutigan kag bangod sang ila pagpabugal. Apang wala ko sila pag-ipadala ukon ginsugo sila. Gani wala gid sila sing mahatag nga kapuslanan sa sining katawhan,’ siling ni Jehova.”

¹⁰ Anong butig nga mga damgo, ukon mga paglaum, ang gintudlo sang mga klero? Ti, ang lamang nga ginalauman sang tawo para sa paghidait kag kalig-unan karon amo ang Nasyones Unidas. Sang nagligad nga mga tinuig gintawag nila ang NU nga “katapusan nga paglaum sang paghiusa kag paghidait,” “ang supremo nga ahensia para sa paghidait kag katarungan,” “ang panguna nga kalibutanon nga paglaum para sa bug-os kalibutan nga paghidait.” Daw ano nga sayop! Ang lamang nga paglaum sang katawhan amo ang Ginharian sang Dios. Apang ang mga klero wala nagabantala kag nagatudlo sing kamatuoran nahanungod sinang langitnon nga gobierno, nga amo ang sentral nga tema sang pagbantala ni Jesus.

 11. (a) Ano ang malain nga epekto sang butig nga mga manunudlo sang Jerusalem sa ngalan sang Dios? (b) Tuhay sa Jeremias nga klase, ano ang ginhimo sang butig nga relihioso nga mga manunudlo karon sa ngalan sang Dios?

¹¹ Ang bersikulo 27 nagasugid sa aton sing kapin pa. “Nagahunahuna sila sa pagpalipat sa akon sang akon ngalan paagi sa ila mga damgo nga ginasugid nila sa isa kag isa, subong sang ila mga ginikanan nga nalipat sa akon ngalan tungod kay Baal.” Ginpalipat sang butig nga mga manalagna sang Jerusalem ang katawhan sang ngalan sang Dios. Indi bala amo man sina ang ginhimo sang butig nga relihioso nga mga manunudlo karon? Malain pa, ginatago nila ang ngalan sang Dios, nga Jehova. Ginatudlo nila nga indi kinahanglanon nga gamiton ini, kag ginkuha nila ini gikan sa ila mga badbad sang Biblia. Ginapamatukan nila sing mabaskog ang bisan sin-o nga nagatudlo sa katawhan nga ang ngalan sang Dios amo si Jehova. Apang ang Jeremias nga klase, ang nagkalabilin sang hinaplas sang espiritu nga mga Cristiano, upod sa ila mga kaupod, naghimo sang ginhimo gid ni Jesus. Gintudluan nila ang minilyon nahanungod sa ngalan sang Dios.​—⁠Juan 17:⁠6.

Pagbuyagyag sa Ila Pagkabalasulon

 12. (a) Ngaa may daku nga kasal-anan sa dugo ang butig nga relihioso nga mga manunudlo? (b) Ano ang nangin papel sang mga klero sa duha ka inaway kalibutanon?

¹² Ang Jeremias nga klase makapila nga nagbuyagyag sa mga klero subong butig nga mga manunudlo nga nagatuytoy sang ila mga panong padulong sa malapad nga dalan sang kalaglagan. Huo, maathag nga ginpakita sang nagkalabilin kon ngaa sila nga mga manugdamgo takus sa malaut nga paghukom ni Jehova. Halimbawa, masami nga ginapatuhuyan sang mga alagad ni Jehova ang Bugna 18:​24, nga nagasiling nga sa Babilonia nga Daku nasapwan ang dugo sang “tanan nga ginpamatay sa duta.” Hunahunaa ang tanan nga inaway bangod sang relihioso nga mga pagkatuhay. Daw ano ka daku ang kasal-anan sa dugo sang butig relihioso nga mga manunudlo! Ang ila mga panudlo ginbangdan sang pagbinahinbahin kag nagpalala pa sang pagdumtanay sang magkatuhay nga mga pagtuluuhan kag pungsudnon nga mga grupo. Tuhoy sa Inaway Kalibutanon I, ang libro nga Preachers Present Arms nagasiling: “Ginhatagan sang mga kleriko [mga klerigo] ang inaway sing iya mainit espirituwal nga kahulugan kag sugyot. . . . Sa amo ang iglesia nangin bahin sang sistema sang inaway.” Amo man ang natabo sa Inaway Kalibutanon II. Ginsakdag sing bug-os sang mga klero ang nag-ilinaway nga mga pungsod kag ginbendisyunan ang ila mga tropa. Duha ka inaway kalibutanon ang nagsugod sa Cristiandad diin nagpinatyanay ang pareho sing relihion. Ang sekular kag relihioso nga mga pagbinahinbahin sa sulod sang Cristiandad padayon nga ginabangdan sang pagpatulo sing dugo tubtob karon. Daw ano ka ­makasiligni ang epekto sang ila butig nga mga panudlo!

 13. Paano ginapamatud-an sang Jeremias 23:22 nga ang mga klero sang Cristiandad wala sing kaangtanan kay Jehova?

¹³ Talupangda palihug ang Jeremias kapitulo 23, bersikulo 22: “Kon nagtindog sila kuntani sa akon suod nga grupo, nian napabati nila kuntani ang akon katawhan sang akon mga pulong, kag napalipas sila gikan sa ila malaut nga dalanon kag gikan sa kalaut sang ila mga hinimuan.” Kon ang relihioso nga mga manalagna sang Cristiandad nagtindog kuntani sa suod nga grupo ni Jehova, nga may suod nga kaangtanan sa iya nga subong isa ka matutom kag mainandamon nga ulipon, nian sila man magakabuhi kuntani suno sa mga talaksan sang Dios. Ila man kuntani mapabati sa katawhan sang Cristiandad ang kaugalingon nga mga pulong sang Dios. Sa baylo, ginhimo sang modernong-adlaw nga butig nga mga manunudlo ang ila mga sumulunod nga bulag nga mga alagad sang Kaaway sang Dios, si Satanas nga Yawa.

 14. Anong mabaskog nga pagbuyagyag sa mga klero sang Cristiandad ang ginpaguwa sang 1958?

¹⁴ Nangin mabaskog gid ang pagpabuyagyag sang Jeremias nga klase sa mga klero. Halimbawa, sa Kabubut-on sang Dios nga Internasyonal nga Asambleya sang mga Saksi ni Jehova sa New York City sang 1958, ang bise presidente sang Watch Tower Society nagpresentar sing isa ka pinamulong nga nagsiling sa bahin: “Sa walay lipudlipod ukon pagpang-alag-ag ginapahibalo naton ining gamot nga kabangdanan sang tanan nga krimen, delingkwensia, dumot, pinuyas, pagdampigdampig, . . . kag pagkagumon subong amo ang sayop nga relihion, ang butig nga relihion; nga sa likod sini amo ang dikitaon nga kaaway sang tawo, si Satanas nga Yawa. Ang mga tawo nga may pinakadaku nga salabton sa kahimtangan sang kalibutan amo ang relihioso nga mga instruktor kag mga lider; kag ang labi nga balasulon sa ila sini amo ang relihioso nga mga klero sang Cristiandad. . . . Pagligad sining tanan nga tinuig sugod sang Inaway Kalibutanon I, ang kaangtanan sa Dios sang Cristiandad kaanggid sa iya anay sang Israel sang adlaw ni Jeremias. Huo, ang Cristiandad nagaatubang sing kalaglagan nga kapin ka makahaladlok kag makahalapay sangsa nakita ni Jeremias nga natabo sa Jerusalem.”

Paghukom sa Butig nga mga Manunudlo

 15. Ano nga mga tagna tuhoy sa paghidait ang gintagna sang mga klero? Matuman bala ini?

¹⁵ Walay sapayan sini nga paandam, ano ang ginhimo sang mga klero sugod sadto? Subong sang ginareport sang bersikulo 17: “Nagasiling sila sa liwat kag liwat sa mga nagatamay sa akon, ‘Si Jehova nagsiling: “Paghidait ang inyo matigayon.” ’ Kag sa tagsatagsa nga nagalakat sa pagkabatinggilan sang iya kaugalingon nga tagipusuon nagsiling sila, ‘Walay malaut nga maabot sa imo.’ ” Matuod bala ini? Indi! Ibuyagyag ni Jehova ang kabutigan sining mga tagna sang mga klero. Indi niya pagpahanabuon ang ila ginasiling sa iya ngalan. Apang, ang paghidait sa Dios nga butig nga ginapasalig sang mga klero tuman ka malimbungon!

 16. (a) Ano ang kahimtangan sa moral sining kalibutan, kag sin-o ang may salabton sa sini? (b) Ano ang ginahimo sang Jeremias nga klase sa manubo nga mga pagtamod sa moral sining kalibutan?

¹⁶ Nagahunahuna ka bala, ‘Ano, malimbungan ako sang butig nga mga panudlo sang mga klero? Indi gid!’ Ti, indi maniguro! Dumduma nga ang butig nga mga panudlo sang mga klero nagpaluntad sing isa ka malalangon, makasiligni nga kahimtangan sa moral. Ang ila wala sing pagdumili nga mga panudlo nagapakamatarong sang halos tanan nga butang, bisan pa daw ano sini ka imoral. Kag ining manubo nga moral nagalatom sa tanan nga latagon sang kalingawan, mga pelikula, TV, mga magasin, kag musika. Dapat kita, busa, maghalong sing maayo, kay basi maimpluwensiahan kita sining manubo apang malalangon kag makalaganyat nga atmospera sa moral. Ang mga pamatan-on sarang masiod sang malaw-ay nga mga video kag musika. Dumduma nga ining panimuot sang katawhan karon nga ang bisan ano puwede isa ka direkta nga resulta sang butig nga mga panudlo sang mga klero kag sang ila kapaslawan sa pagsakdag sa matarong nga mga talaksan sang Dios. Ang Jeremias nga klase nagapakig-away sa sining imoral nga mga pagtamod kag nagabulig sa mga alagad ni Jehova sa pagsikway sa kalautan nga nagalatom sa Cristiandad.

 17. (a) Suno kay Jeremias, ano nga paghukom ang magaabot sa malauton nga Jerusalem? (b) Ano sa indi madugay ang matabo sa Cristiandad?

¹⁷ Ano nga paghukom ang batunon sang butig nga mga manunudlo sang Cristiandad gikan kay Jehova, ang daku nga Hukom? Ang bersikulo 19, 20, 39, kag 40 nagasabat: “Yari karon! Ang unos ni Jehova, ang kasingki, pat-od nga magaguwa, ang unos nga nagaalimpulos. Magalupok ini sa ulo sang malauton. Ang kaakig ni Jehova indi magbalik tubtob nga mahikot kag mahimo niya ang mga tinutuyo sang iya tagipusuon. . . . Patumbayaan ko kamo, sing dayon, kag biyaan ko kamo kag ang siudad nga ginhatag ko sa inyo kag sa inyo mga ginikanan​—⁠gikan sa akon atubangan. Kag magadala ako sa inyo sing dayon nga kahuluy-an, kag wala sing katubtuban nga kahuya nga indi malimtan.” Natabo ina tanan sa malauton nga Jerusalem kag sa iya templo, kag karon ang kaangay nga kalamidad mahanabo sa indi madugay sa malauton nga Cristiandad!

Pagpakilala sa “Lulan ni Jehova”

 18, 19. Ano nga “lulan ni Jehova” ang ginpahibalo ni Jeremias sa Juda, kag ano ang ginapahangop sini?

¹⁸ Gani, ano ang salabton sang Jeremias nga klase kag sang ila mga kaupod? Ang bersikulo 33 nagasugid sa aton: “Kon ini nga katawhan ukon ang manalagna ukon ang saserdote magpamangkot sa imo, nga nagasiling, ‘Ano ang lulan ni Jehova?’ dapat man ikaw magsiling sa ila, ‘ “Kamo​—⁠O daw ano kabug-at nga lulan! Kag biyaan ko gid kamo,” amo ang siling ni Jehova.’ ”

¹⁹ Ang Hebreo nga tinaga para sa “lulan” may doble nga kahulugan. Mahimo ini magpatuhoy sa isa ka mabug-at nga pinamulong gikan sa Dios ukon sa butang nga nagapabug-at kag nagapalapyo sa isa. Ang ekspresyon diri nga “lulan ni Jehova” nagapatuhoy sa isa ka mabug-at nga tagna​—⁠ang pinamulong nga ang Jerusalem pagalaglagon. Naluyagan bala sang katawhan nga pamatian ang subong sadto kabug-at nga matagnaon nga mga pinamulong nga sulitsulit nga gindala sa ila ni Jeremias gikan kay Jehova? Wala, gin-uligyat sang katawhan si Jeremias: ‘Ano ang imo tagna (lulan) karon? Napat-od namon nga ang imo tagna isa naman ka makalalapyo nga lulan!’ Apang ano ang ginsiling sa ila ni Jehova? Amo ini: “Kamo​—⁠O daw ano kabug-at nga lulan! Kag biyaan ko gid kamo.” Huo, ini nga katawhan nangin isa ka lulan kay Jehova kag ipilak niya sila agod indi na sia mabug-atan.

 20. Ano “ang lulan ni Jehova” karon?

²⁰ Ano “ang lulan ni Jehova” karon? Amo ang mabug-at matagnaon nga mensahe gikan sa Pulong sang Dios. Puno ini sing pamatbat, nga nagapahibalo sang nagahilapit nga kalaglagan sang Cristiandad. Tuhoy sa katawhan ni Jehova, may yara kita mabug-at nga salabton nga ipahayag ining “lulan ni Jehova.” Samtang nagahilapit ang katapusan, dapat naton sugiran ang tanan nga ang batinggilan nga katawhan sang Cristiandad isa ka “lulan,” huo, “O daw ano kabug-at nga lulan!” kay Jehova nga Dios, kag nga sa indi madugay haw-asan niya ang iya kaugalingon sini nga “lulan” paagi sa pagdala sing kalamidad sa Cristiandad.

 21. (a) Ngaa ginlaglag ang Jerusalem sang 607 B.C.E.? (b) Sa tapos malaglag ang Jerusalem, ano ang natabo sa butig nga mga manalagna kag sa matuod nga manalagna ni Jehova, nagahatag sa aton sing ano nga pasalig karon?

²¹ Ang paghukom ni Jehova ginhikot sang adlaw ni Jeremias sang ginlaglag sang mga Babilonianhon ang Jerusalem sang 607 B.C.E. Subong gintagna, isa yadto ka ‘kahuluy-an kag kahuya’ para sa batinggilan, dimatutom nga mga Israelinhon. (Jeremias 23:​39, 40) Ginpakita sini sa ila nga si Jehova, nga ila gintamay sing makapila, nagpabaya sa ila sang ulihi sa mga resulta sang ila kalautan. Ang mga baba sang ila matinaastaason nga butig nga mga manalagna ginpahipos sang ulihi. Apang, ang baba ni Jeremias nagpadayon sa pagtagna. Wala sia pagbiyai ni Jehova. Nahisuno sa sini nga sulundan, indi pagbiyaan ni Jehova ang Jeremias nga klase kon ang iya mabug-at nga desisyon magadul-ong sa pagkalaglag sang mga klero sang Cristiandad kag sang mga nagapati sa ila mga kabutigan.

 22. Sa ano nga kahimtangan pagadalhon ang Cristiandad sang mga paghukom ni Jehova?

²² Huo, ang nahapay, wala sing pumuluyo nga kahimtangan sang Jerusalem sa tapos sang 607 B.C.E. amo gid ang mangin laragway sang relihioso nga Cristiandad sa tapos sia mahublasan sang iya manggad kag mabuyagyag sing makahuluya. Amo ini ang nagakaigo nga paghukom nga ginmando ni Jehova batok sa butig nga mga manunudlo. Ina nga paghukom indi mapaslawan. Subong nga nagmatuod sang una ang tanan nga inspirado nga mga paandam ni Jeremias, magamatuod man ini sa modernong-adlaw nga katumanan sini. Gani kabay nga mangin kaangay kita ni Jeremias. Ibantala naton sing maisugon ang matagnaon nga lulan ni Jehova sa katawhan, agod mahibaluan nila kon ngaa ang bug-os nga kabug-aton sang iya matarong nga paghukom magaabot sa tanan nga butig nga relihioso nga mga manunudlo!

Repaso nga mga Pamangkot

◻ Daw ano kalaut ang dumaan nga Jerusalem gikan sa pagtamod ni Jehova?

◻ Sa anong mga paagi ang Cristiandad ‘naglakat sa kabutigan’?

◻ Paano ang pagkabalasulon sang modernong-adlaw nga mga klero ginbuyagyag?

◻ Ano nga “lulan ni Jehova” ang ginapahibalo karon?

[Piktyur sa pahina 8]

Ang mga manalagna sang Jerusalem nakahimo sing “makasiligni nga mga butang”

[Piktyur sa pahina 9]

“Nagapamulong sila sing palanan-awon sang ila kaugalingon nga tagipusuon”

[Piktyur sa pahina 10]

Ang Jerusalem sa tapos sang iya kalaglagan nagalaragway sa hingapusan nga madangatan sang Cristiandad