Ang Pagpakigsuay ni Jehova Batok sa mga pungsod

“Magalambot ang kagahod tubtob sa ukbong sang duta, kay si Jehova may pagpakigsuay batok sa mga pungsod.”​—⁠JEREMIAS 25:⁠31.

1, 2. (a) Ano ang natabo sa Juda sa tapos napatay si Hari Josias? (b) Sin-o ang katapusan nga hari sang Juda, kag paano sia nag-antos bangod sang iya pagkadimatutom?

ANG pungsod sang Juda nag-atubang sa makahalanguyos nga mga tion nga mabudlay pakigbagayan. Temporaryo nga napalantang sang isa ka maayo nga hari, nga si Josias, ang nagadabdab nga kaakig ni Jehova. Apang ano ang nagsunod sang si Joisas ginpatay sang 629 B.C.E.? Ang mga hari nga nagsunod sa iya nagpakahuya kay Jehova.

² Ang katapusan nga hari sang Juda, nga si Sedequias, ikap-at nga anak nga lalaki ni Josias, nagpadayon, suno sa ginasiling sang 2 Hari 24:​19, “sa paghimo sing malaut sa mga mata ni Jehova, suno sa tanan nga ginhimo ni Joaquim [nga iya magulang].” Ano ang resulta? Ginsalakay ni Nabocodonosor ang Jerusalem, ginbihag si Sedequias, ginpatay ang iya mga anak nga lalaki sa atubangan niya, ginbulag sia, kag gindala sia sa Babilonia. Dugang pa, gin-ati sang mga Babilonianhon ang mga suludlan nga ginagamit sa pagsimba kay Jehova, ginsunog ang templo kag ang siudad. Ang mga nakalampuwas nangin mga bihag sa Babilonia.

 3. Ano nga panag-on ang nagsugod sa pagkalaglag sang Jerusalem sang 607 B.C.E., kag ano ang mahanabo sa katapusan sina nga panag-on?

³ Yadto nga tuig, ang 607 B.C.E., nagtanda indi lamang sang hingapusan nga paghapay sa Jerusalem kundi sang pamuno man sang “gintalana nga mga panag-on sang mga pungsod,” nga ginpatuhuyan sa Lucas 21:24. Ining 2,520 ka tuig nga panahon natapos sang aton siglo, sang tuig 1914. Nag-abot sadto ang tion para kay Jehova, paagi sa iya napalingkod na sa trono nga Anak, si Jesucristo, nga daku pa kay Nabocodonosor, nga ipahibalo kag hikuton ang paghukom batok sa malaut nga kalibutan. Ining paghukom magasugod sa modernong adlaw nga katumbas sang Juda, ang katumbas nga nagapangangkon nga nagatiglawas sa Dios kag kay Cristo sa duta.

 4. Ano nga mga pamangkot ang ginapautwas karon may kaangtanan sa tagna ni Jeremias?

⁴ May makita bala kita nga pag-anggid sa ulot sang kagamo sa tion sang hingapusan nga tinuig sang Juda sa idalom sang iya mga hari​—⁠nga may malaglagon nga mga hitabo nga nagaapektar man sa kaingod nga mga pungsod​—⁠kag sang kagamo sa Cristiandad karon? May makita gid kita! Ano, nian, ang ginapakita sang tagna ni Jeremias tuhoy sa kon paano atubangon ni Jehova ang mga butang karon? Tan-awon naton.

 5, 6. (a) Sugod sang 1914, paano ang kahimtangan sa Cristiandad nag-anggid sa Juda antes lang sang kalaglagan sini? (b) Ano nga mensahe ang gindala sang modernong Jeremias sa Cristiandad?

⁵ Ang Britaniko nga matematiko kag pilosopo nga si Ber­trand Rus­sell nagkomento sang nagligad nga mga 40 ka tuig: “Sugod gid sang 1914, ang tagsatagsa nga nagabantay sang mga lakat sa kalibutan natublag gid sing daku sang daw natalana na kag nadesisyunan nga pagmartsa padulong sa daku pa nga kalamidad.” Kag ang Aleman nga manghimanwa nga si Konrad Adenauer nagsiling: “Ang kalig-unan kag kalinong nadula gikan sa kabuhi sang mga tawo sugod sang 1914.”

⁶ Sa karon, subong sang sa mga adlaw ni Jeremias, ang paghinampot sa katapusan sang isa ka sistema sang mga butang ginatandaan sing pagpatulo sing madamo nga walay sala nga dugo, ilabi na sa duha ka inaway kalibutanon sini nga siglo. Sa daku nga bahin, ang nag-ilinaway sa sining mga inaway amo ang mga pungsod sang Cristiandad, nga nagapangangkon nga nagasimba sa Dios sang Biblia. Daw ano nga pagkasalimpapaw! Indi katingalahan nga ginapadala ni Jehova ang iya mga Saksi sa ila, nga nagasiling, suno sa mga pulong sang Jeremias 25:​5, 6: “Magbiya kamo, palihug, ang tagsatagsa sa iya malaut nga dalanon kag sa kalaut sang inyo mga binuhatan . . . Kag dili magsunod sa iban nga mga dios sa pag-alagad sa ila kag sa pagsimba sa ila, agod nga indi ninyo ako mapaakig sa binuhatan sang inyo mga kamot, kag agod nga indi ako magsamad sa inyo.”

 7. Ano ang ebidensia nga ginsikway sang Cristiandad ang mga paandam ni Jehova?

⁷ Apang, ang mga pungsod sang Cristiandad napaslawan sa pagbiya. Ginpakita ini sa ila dugang pa nga paghalad sa dios sang inaway sa Korea kag Vietnam. Kag ginakapitalan nila gihapon ang mga negosyante sang kamatayon, ang mga manugprodukto sing mga armas. Ang daku nga bahin sang halos isa ka trilyon dolyares nga gingasto sa mga armas kada tuig sang katuigan 80 naghalin sa mga pungsod sang Cristiandad. Kutob sang 1951 tubtob 1991, ang gasto sang militar sang Estados Unidos lamang naglabaw sa kabug-usan nga ganansia sang tanan nga mga korporasyon sang Amerika. Sugod sang mabaskog nga ginproklamar ang katapusan sang Cold War, daku ang ginbuhin sa lipas na nga nuklear nga mga armas, apang dalagku nga mga arsenal sang iban pa makamamatay nga mga armas ang nagapabilin kag padayon nga ginapauswag. Mahimo nga gamiton ini sa pila ka adlaw.

Paghukom Batok sa Matinuguton nga Duog sang Cristiandad

 8. Paano ang mga pulong sang Jeremias 25:​8, 9 matuman sa Cristiandad?

⁸ Ang dugang pa nga mga pulong ni Jehova, nga masapwan sa Jeremias 25:​8, 9, naaplikar karon ilabi na sa Cristiandad, nga napaslawan sa pagsunod sa Cristianong mga talaksan sang pagkamatarong: “Busa amo ini ang ginsiling ni Jehova sang kasuldadusan, ‘Bangod nga wala kamo magpamati sa akon mga pulong, yari karon ipadala ko kag kuhaon ang tanan nga panimalay sang aminhan,’ siling ni Jehova, ‘kag padalhan ko si Nabocodonosor nga hari sang Babilonia, nga akon alagad, kag dalhon sila batok sini nga duta kag batok sa iya mga pumuluyo kag batok sini tanan nga pungsod sa palibot; kag laglagon ko sila sing bug-os kag himuon sila nga kabulungan kag panagutsutan kag dayon nga mga kamingaw.’ ” Sa amo, sugod sa nagapangangkon nga katawhan sang Dios, ang Cristiandad, ang dakung kapipit-an magabunal, nga sa ulihi magalab-ot sa bug-os nga duta, tubtob ‘sa tanan nga pungsod sa palibot.’

 9. Sa anong mga paagi ang espirituwal nga kahimtangan sang Cristiandad naglain pa sa aton tion?

⁹ May tion anay sa Cristiandad nga ang Biblia ginatahod, ang pag-asawahay kag ang pamilya ginatamod sa halos bug-os nga uniberso subong tuburan sang kalipay, ang katawhan aga pa nagamata kag nagasapo sing kaayawan sa ila adlaw-adlaw nga trabaho. Madamo ang nagapapagsik sang ila kaugalingon paagi sa pagbasa kag pagtuon sa Pulong sang Dios sa suga sang lampara kon gab-i. Apang karon, ang seksuwal nga pagkasalamwanan, diborsio, pag-abuso sa droga kag pagpahubog, delingkwensia, kakagod, matamad nga pamatasan sa trabaho, pagkayanggaw sa TV, kag iban pa nga mga bisyo nagpierdi sang kabuhi sa isa ka makapabalaka nga kadakuon. Amo ini ang pauna sa kahapayan nga buot na hikuton ni Jehova nga Dios batok sa matinuguton nga duog sang Cristiandad.

 10. Ilaragway ang kahimtangan sang Cristiandad sa tapos hikuton ang mga paghukom ni Jehova.

¹⁰ Si Jehova nagadeklarar, subong mabasa naton sa Jeremias kapitulo 25, bersikulo 10 kag 11: “Kuhaon ko sa ila ang tingog sang kasadya kag ang tingog sang kalipay, ang tingog sang nobyo kag ang tingog sang nobya, ang kagahod sang mga galingan kag ang kapawa sang suga. Kag ini nga bug-os nga duta mangin mamingaw kag kabulungan.” Mangin kabulungan matuod kon ang dalagku nga mga templo kag luhuso nga mga palasyo sang Cristiandad magakalalumpag sa ila kalaglagan. Daw ano kasangkad ini nga pagkalaglag? Sang tion ni Jeremias, ang kahapayan sang Juda kag kaingod nga mga pungsod nagdugay sing 70 ka tuig, nga ginalaragway sang Salmo 90:10 subong isa ka tipiko nga kalawigon sang kabuhi. Ang paghikot ni Jehova sang iya paghukom karon mangin bug-os kag walay katapusan.

Paghukom Batok sa Babilonia nga Daku

 11. Sin-o ang gamiton sa paglaglag sa Cristiandad? Ngaa?

¹¹ Subong gintagna sa Bugna 17:​12-17, ang tion magaabot nga sugdan ni Jehova ang iya makatilingala nga mga buhat paagi sa pagbutang sa tagipusuon sang “napulo ka sungay”​—⁠militar nga mga katapo sang Nasyones Unidas​—⁠‘ang pagtuman sang iya katuyuan’ nga hapayon ang bug-os kalibutan nga emperyo sang butig nga relihion. Paano ini mahanabo? Madamo ang mga paagi nga “ang napulo ka sungay” sang Bugna kapitulo 17 mahimo, suno sa mga pulong sang bersikulo 16, “magadumot sa makihilawason kag . . . magasunog sa iya sing bug-os sa kalayo.” Matuod, nagdamo ang nuklear nga mga armas kag nagadamo gihapon sa madamo nga mga duog sa duta diin posible ang inaway. Apang dapat kita maghulat kag tan-awon kon paano ibutang ni Jehova sa tagipusuon sang politikanhon nga mga manuggahom ang paghikot sang iya pagtimalos.

 12. (a) Ano ang natabo sa Babilonia sa tapos niya ginlaglag ang Jerusalem? (b) Ano ang matabo sa mga pungsod sa tapos sang kalaglagan sang Cristiandad?

¹² Sang dumaan nga mga tion nag-abot man ang turno sang Babilonia nga maeksperiensiahan ang nagadabdab nga kaakig ni Jehova. Sing nagakahisuno, sugod sa Jeremias kapitulo 25, bersikulo 12, ang tagna nagatamod sa mga butang gikan sa isa ka naulihi, nagbag-o nga pagtamod. Indi na subong Manuglaglag ni Jehova, si Nabocodonosor kag ang Babilonia nalakip na karon sa tunga sang tanan nga kalibutanon nga mga pungsod. Kaanggid ini sa kahimtangan karon. “Ang napulo ka sungay” sang Bugna kapitulo 17 magahapay sa butig nga relihion, apang sa ulihi sila mismo pagalaglagon man upod sa tanan nga iban pa nga “mga hari sang duta,” subong ginlaragway sa Bugna kapitulo 19. Ang Jeremias 25:​13, 14 nagalaragway kon paano ang Babilonia, upod sa “tanan nga mga pungsod” nga naghingalit sa katawhan ni Jehova, pagahukman. Gingamit ni Jehova si Nabocodonosor subong manuglaglag sa pagsilot sa Juda. Apang sia kag ang naulihi nga mga hari sang Babilonia bugalon nga nagbayaw sang ila kaugalingon batok kay Jehova mismo, subong ginpakita, halimbawa, sa pagtamay sa mga suludlan sa templo ni Jehova. (Daniel 5:​22, 23) Kag sang ginlaglag sang mga Babilonianhon ang Jerusalem, ang kaingod nga mga pungsod sang Juda​—⁠Moab, Amnon, Tiro, Edom, kag iban pa​—⁠naghinugyaw kag nagyubit sa katawhan sang Dios. Sila man dapat mag-ani sing takus nga silot gikan kay Jehova.

Paghukom Batok sa “Tanan nga Pungsod”

 13. Ano ang buot silingon sang “kupa sang alak sang kasingkal,” kag ano ang mahanabo sa mga magainom gikan sa kupa?

¹³ Busa, si Jeremias nagdeklarar, subong narekord sa kapitulo 25, bersikulo 15 kag 16: “Amo ini ang ginsiling ni Jehova nga Dios sang Israel sa akon: ‘Kuhaa sa akon kamot ini nga kupa sang alak sang kasingkal, kag dapat mo paimnon ang tanan nga pungsod nga padalhan ko sa imo. Kag magainom sila kag magadulingduling sila kag magahikot kaangay sang buangbuang nga mga tawo bangod sang espada nga ipadala ko sa ila.’ ” Ngaa isa ini ka ‘kupa sang alak sang kasingkal ni Jehova’? Sa Mateo 26:​39, 42 kag Juan 18:​11, nagpamulong si Jesus tuhoy sa isa ka “kupa” subong nagasimbulo sa kabubut-on sang Dios para sa iya. Sing kaanggid, ang isa ka kupa ginagamit sa pagsimbulo sa kabubut-on ni Jehova nga ang mga pungsod magainom sang iya pagtimalos. Ang Jeremias 25:​17-26 nagalista sining pungsudnon nga mga grupo nga nagalandong sa mga pungsod karon.

 14. Suno sa tagna ni Jeremias, sin-o ang magainom gikan sa kupa sang alak sang kasingkal ni Jehova, kag ano ang ginasimbulo sini sa aton adlaw?

¹⁴ Sa tapos ang Cristiandad, kaangay sang Juda, himuon nga ‘nahapay nga duog, butang nga kabulungan, nga panagutsutan kag pagpakamalaut,’ ang kalaglagan nagahulat sa nabilin nga bahin sang bug-os kalibutan nga emperyo sang butig nga relihion. Masunod, ang bug-os nga kalibutan, nga ginasimbulo sang Egipto, dapat mag-inom gikan sa kupa sang alak sang kasingkal ni Jehova! Huo, “ang tanan nga hari sang aminhan nga malayo kag malapit, ang isa upod sa isa, kag ang tanan nga ginharian sang duta nga yara sa kadaygan sang duta” dapat mag-inom. Bilang katapusan, “ang hari sang Sesac mismo magainom sa tapos nila.” Kag sin-o ining “hari sang Sesac”? Ang Sesac isa ka simbuliko nga ngalan, isa ka cryptogram, ukon kodigo, para sa Babilonia. Subong nga si Satanas amo anay ang dikitaon nga hari sang Babilonia, sia man “ang manuggahom sang kalibutan” tubtob karon, subong ginpakita ni Jesus. (Juan 14:30) Sa amo, ang Jeremias 25:​17-26 nagaanggid sa Bugna kapitulo 18 tubtob 20 sa pagpakita sing maathag sa paagisod sang mga hitabo samtang ginapasa palibot ang kupa sang kasingkal ni Jehova. Una, ang bug-os kalibutan nga emperyo sang butig nga relihion dapat laglagon, masunod amo ang politikanhon nga kagamhanan, kag dayon si Satanas mismo itagbong sa kadadalman.​—⁠Bugna 18:8; 19:​19-21; 20:​1-3.

 15. Ano ang mahanabo kon mabatian ang pagsinggit sing “paghidait kag kalig-unan”?

¹⁵ May madamo nga paghambalanay tuhoy sa paghidait kag kalig-unan sugod sang ginapatihan nga natapos ang Cold War, nga ang nabilin isa lamang ka super­power. Suno sa ginasiling sa Bugna 17:​10, ina nga superpower, ang ikapito nga ulo sang sapat nga mapintas, dapat “magpabilin sa malip-ot nga tion.” Apang ina nga “malip-ot nga tion” madali na matapos. Sa indi madugay, ang tanan nga pagsinggit sing “paghidait kag kalig-unan” magahatag sing dalan sa ‘hinali nga kalaglagan [nga] magaabot sa ila.’ Amo ang ginasiling ni apostol Pablo.​—⁠1 Tesalonica 5:​2, 3.

 16, 17. (a) Kon may magtinguha sa paglikaw sa paghukom ni Jehova, ano ang mangin resulta? (b) Sa anong malaglagon nga paagi ang kabubut-on ni Jehova pagahimuon sa indi madugay sa duta?

¹⁶ Ang bug-os kalibutan nga sistema ni Satanas, sugod sa Cristiandad, dapat mag-inom gikan sa kupa sang pagtimalos ni Jehova. Ang iya dugang pa nga sugo kay Jeremias, nga narekord sa kapitulo 25, bersikulo 27 tubtob 29, nagapamatuod sini: “Dapat mo isiling sa ila, ‘Amo ini ang ginsiling ni Jehova sang kasuldadusan, nga Dios sang Israel: “Inom kamo kag mahubog kag magbuga kag mapukan agod nga indi na kamo makabangon bangod sang espada nga ipadala ko sa tunga ninyo.” ’ Kag kon magdumili sila sa pagkuha sa kupa gikan sa imo kamot agod imnon, dapat mo man isiling sa ila, ‘Amo ini ang ginsiling ni Jehova sang kasuldadusan: “Mag-inom gid kamo. Kay, yari karon! sa siudad nga ginahingadlan sa akon ngalan ako magasugod sa pagdala sing kalamidad, kag dili gid bala kamo pagsilutan?” ’ ‘Indi kamo mahilway sa silot kay magatawag ako sing espada batok sa tanan nga pumuluyo sang duta,’ siling ni Jehova sang kasuldadusan.”

¹⁷ Matigdas yadto nga mga pulong​—⁠sa pagkamatuod, makahaladlok nga mga pulong, kay ginpamulong sila sang Soberanong Ginuo sang bug-os nga uniberso, si Jehova nga Dios. Sa sulod sang milenyo nga tion, mapailubon nga ginbatas niya ang mga pasipala, ang mga pagpakahuya, kag ang dumot nga gintumpok sa iya balaan nga ngalan. Apang, nag-abot gid man sang ulihi ang tion, nga sabton niya ang pangamuyo nga gintudlo sang iya hinigugma nga Anak, si Jesucristo, sa iya mga disipulo sang yari sia sa duta: “Dapat kamo, nian, mangamuyo sing subong sini: ‘Amay namon nga yara sa mga langit, pakabalaanon ang imo ngalan. Pakariha ang imo ginharian. Pahanabua ang imo kabubut-on, subong sang sa langit, amo man sa duta.’ ” (Mateo 6:​9, 10) Kabubut-on ni Jehova nga si Jesus magahikot subong Iya espada sa paghikot sing pagtimalos.

 18, 19. (a) Sin-o ang magasakay nga nagapangdaug sa ngalan ni Jehova, kag ano ang iya ginahulat antes tapuson ang iya pagpangdaug? (b) Kon buhian sang mga anghel ang mabaskog nga unos sang kasingkal ni Jehova, anong makahaladlok nga mga hitabo ang mahanabo sa duta?

¹⁸ Sa Bugna kapitulo 6, una naton mabasa ang pagsakay ni Jesus sa isa ka kabayo nga maputi ‘agod magdaug kag tapuson ang iya pagdaug.’ (Bersikulo 2) Nagsugod ini sang ginpalingkod sia sa trono subong langitnon nga Hari sang 1914. Ang iban nga mga kabayo kag mga manugkabayo nagasunod sa iya, nagalaragway sang kabug-usan nga inaway, tiggulutom, kag kamatay nga sugod sadto nagsalot sa aton duta. Apang san-o matapos ini tanan nga kagamo? Ang Bugna kapitulo 7 nagapahibalo sa aton nga apat ka anghel ang nagapugong sing mabaskog sa “apat ka hangin sang duta” tubtob matipon ang espirituwal nga Israel kag ang isa ka dakung kadam-an gikan sa tanan nga pungsod para sa kaluwasan. (Bersikulo 1) Nian ano?

¹⁹ Ang Jeremias kapitulo 25, sa bersikulo 30 kag 31, nagapadayon: “‘Si Jehova magangurob gikan sa hitaas, kag magamitlang sang iya tingog gikan sa iya balaan nga puluy-an. Sia magasinggit subong sang mga nagalapak sa ubas batok sa tanan nga mga pumuluyo sang duta. Magalambot ang kagahod tubtob sa ukbong sang duta, kay si Jehova may pagpakigsuay batok sa mga pungsod. Dapat sia personal nga magahukom sa tanan nga unod. Tuhoy sa mga malauton, dapat niya ihatag sila sa espada,’ siling ni Jehova.” Sa amo wala sing pungsod nga makalikaw sa pag-inom sa kupa sang kasingkal ni Jehova. Busa, hilingagawon gid, nga ang tanan sang matarong sing tagipusuon nga katawhan magpain sang ila kaugalingon gikan sa kalautan sang mga pungsod antes buhian sang apat ka anghel ang mabaskog nga unos sang kasingkal ni Jehova. Maunos sa pagkamatuod, kay ang tagna ni Jeremias nagapadayon sa bersikulo 32 kag 33:

 20. Ano nga talan-awon ang nagapadaku sang kapintas sang paghukom ni Jehova, apang ngaa kinahanglanon ini nga buhat?

²⁰ “Amo ini ang ginsiling ni Jehova sang kasuldadusan, ‘Yari karon! Ang kalamidad magalapnag sa pungsod pa pungsod, kag ang daku nga unos magagikan sa mga ukbong sang duta. Kag ang pinatay ni Jehova sa sadto nga adlaw mangin kutob sa isa ka ukbong sang duta tubtob gid sa isa ka ukbong sang duta. Indi sila paghayaan, ukon tipunon ukon ilubong. Mangin ipot sila sa kadaygan sang duta.’ ” Isa matuod ka makangilidlis nga talan-awon, apang kinahanglanon ini nga buhat agod tinluan ang duta gikan sa tanan nga kalautan antes pasudlon ang Paraiso nga ginsaad sang Dios.

Ang mga Manugbantay Magahaya kag Magasinggit

 21, 22. (a) Sa Jeremias 25:​34-36, sin-o ang mga “manugbantay” sang Israel, kag ngaa napilitan sila sa paghaya? (b) Sin-o nga modernong mga manugbantay ang takus sa kaakig ni Jehova, kag ngaa takus gid sila?

²¹ Ang bersikulo 34 tubtob 36 nagapamulong sing dugang pa tuhoy sa paghukom ni Jehova, nga nagasiling: “Haya, kamo nga mga manugbantay, kag singgit! Kag tubog sa mga abo, kamo nga mga kadalagkuan sang panong, kay ang mga adlaw sang pag-ihaw sa inyo kag ang pagpaaplaag sa inyo natuman na, kag mahulog kamo kaangay sang matahom nga suludlan! Kag ang duog nga palagyuhan nadula gikan sa mga manugbantay, kag ang alagyan sa paglikaw gikan sa mga kadalagkuan sang panong. Pamatii! Ang pagsinggit sang mga manugbantay, kag ang paghaya sang mga kadalagkuan sang panong, kay ginasamad ni Jehova ang ila halalban.”

²² Sin-o ining mga manugbantay? Indi sila ang relihioso nga mga lider, nga hubog na sa kaakig ni Jehova. Sila ang militaristiko nga mga manugbantay, nga ginlaragway man sa Jeremias 6:​3, nga nagatipon sa ila mga hangaway sa dalagku nga mga grupo sa pagbato kay Jehova. Sila ang politikanhon nga mga manuggahom, nga nagmanggaranon sa kahalitan sang ila ginagamhan. Madamo sa ila sini tuso nga mga tawo, sampaton sa kalautan. Mahinay sila sa pagpakanay sa tiggulutom nga nagpamatay sa bug-os nga katawhan sa imol nga kadutaan. Ginpamanggaranon nila “ang mga kadalagkuan sang panong,” subong sang mabaskog nga mga negosyante sa armas kag makagod nga mga manuglaglag sang palibot, samtang nagapangindi sa paghatag sing medikal nga bulig kag makapabaskog nga kalan-on nga sa tama ka diutay nga bili makaluwas sa minilyon ka nagatagumatayon nga kabataan.

 23. Ilaragway ang kahimtangan sang nasakupan ni Satanas sa tapos sang malaglagon nga mga buhat ni Jehova.

²³ Indi katingalahan nga ang Jeremias kapitulo 25 nagahinakop, sa bersikulo 37 kag 38, sa pagsiling tuhoy sa ila nga makagod nga nagapangita sing paghidait para sa ila kaugalingon lamang: “Ang malinong nga mga puluy-an ginhimo nga walay kabuhi bangod sang nagadabdab nga kaakig ni Jehova. Ginbayaan niya ang iya palanaguan subong sang leon, kay ang ila duta nangin kabulungan bangod sang kapintas sang espada kag bangod sang iya nagadabdab nga kaakig.” Makatilingala sa pagkamatuod! Apang, ang nagadabdab nga kaakig ni Jehova pat-od gid nga ipabutyag paagi sa Isa nga ginlaragway sa Bugna 19:​15, 16 subong “Hari sang mga hari kag Ginuo sang mga ginuo,” nga nagabantay sa mga pungsod paagi sa bilugon nga salsalon. Kag ano ang magasunod?

 24. Ano nga mga pagpakamaayo ang dalhon sang kalaglagan sang butig nga relihion kag sang nabilin nga bahin sang kalibutan ni Satanas sa matarong nga katawhan?

²⁴ Nakaeksperiensia ka na bala sing isa ka unos ukon bagyo? Mahimo ini mangin isa ka makahaladlok nga eksperiensia. Apang pagkaaga, bisan pa makakita ikaw sing kagulub-an sa bug-os nga palibot, ang hangin masami nga tuman katinlo kag ang kalinong tuman ka makapapagsik nga makapasalamat ikaw kay Jehova bangod sa tumalagsahon katahom nga adlaw. Sing kaanggid, samtang nagaugdaw ang mabaskog nga unos sang dakung kapipit-an, mahimo nga tulukon mo ang duta nga nagapasalamat nga buhi ikaw kag handa sa pagpakigbahin sa dugang pa nga hilikuton ni Jehova sa paghimo sa isa ka natinluan nga duta nga mangin isa ka matahom nga paraiso. Ang pagpakigsuay ni Jehova batok sa mga pungsod sa amo nga tion nadala na sa daku nga katapusan sini, nga nagapakabalaan sang iya ngalan kag nagahawan sang dalan agod ang iya kabubut-on himuon sa duta sa idalom sang Milenyo nga Paggahom sang Mesianikong Ginharian. Kabay nga magkari ina nga Ginharian sa indi madugay!

Repaso sa parapo 5-24 sining artikulo

◻ Anong salimpapaw nga mga dalanon sang Cristiandad ang ginahukman karon?

◻ Anong ginpasangkad nga pagtamod sa paghukom ang ginalaragway sa Jeremias 25:​12-38?

◻ Ano nga kupa sang pagtimalos ang ginapasa sa tanan nga pungsod?

◻ Sin-o ang mga manugbantay nga nagahaya kag nagasinggit, kag ngaa ginatublag sila?

[Piktyur sa pahina 18]

Napili na ni Jehova ang instrumento sa paglaglag sa Cristiandad

[Piktyur sa pahina 23]

Sa tapos sang mabaskog nga unos sang dakung kapipit-an, magalutaw ang isa ka natinluan nga duta