Makabenepisyo Ka Bala Gikan sa Iya sang Dios mga Katipan?

Makabenepisyo Ka Bala Gikan sa Iya sang Dios mga Katipan?

“ ‘Paagi sa imo pakamaayuhon ang tanan nga pungsod.’ Busa ang mga tawo nga may pagtuo ginapakamaayo kaupod ni Abraham nga may pagtuo.”—⁠GALACIA 3:8, 9.

1. Ano ang ginapakita sang maragtas tuhoy sa epekto sang madamo nga paggahom?

“MALULUY-ON [ukon, nasanagan] nga mga diktador” amo ang pila ka manuggahom sa Europa sang ika-18 nga siglo. ‘Maayo ang [ila] katuyuan sa paggahom sa ila katawhan nga may amaynon nga pagkamaluluy-on, apang ang ila mga plano wala magmadinalag-on kag ang ila mga reporma napaslawan.’⁠a (The Encyclopedia Americana) Amo ini ang nagapanguna nga kabangdanan sang mga rebolusyon nga wala madugay naglikop sa Europa.

2, 3. Paano si Jehova tuhay sa tawhanon nga mga hari?

² Daw ano ka tuhay si Jehova gikan sa indi mapaktan nga tawhanon nga mga manuggahom. Mahapos naton makita ang daku nga pagkinahanglan sang katawhan sing pagbalhin nga sa ulihi magahatag sang matuod nga mga remedyo sa inhustisya kag pag-antos. Apang indi kita dapat magkabalaka nga ang paghikot sang Dios sa pagpahanabo sini nasandig sa kapritso. Sa labing lapnag nga libro sang kalibutan, gingarantiyahan niya ang iya saad sa pagdala sing dayon nga mga pagpakamaayo sa nagatuo nga katawhan. Magaabot ini walay sapayan sang nagligad nga nasyonalidad sang tawo, sang iya rasa, edukasyon, ukon tindog sa katilingban. (Galacia 3:28) Apang masaligan mo bala ini?

³ Ginbalikwat ni apostol Pablo ang bahin sang pasalig nga ginhatag sang Dios kay Abraham: “Matuod gid pakamaayuhon ko ikaw.” Si Pablo nagdugang nga sanglit “indi mahimo nga ang Dios magbutig,” “may mabaskog [kita] nga pagpalig-on nga manguyat sa paglaum nga yara sa atubangan naton.” (Hebreo 6:13-18) Ang aton pagsalig sa sinang mga pagpakamaayo sarang mapalig-on sing dugang pa paagi sa pagtalupangod sa mahim-ong nga paagi sang pagpasad sang Dios sing sadsaran para sa pagtuman sini.

4. Paano gingamit sang Dios ang nanuhaytuhay nga mga katipan sa pagtuman sang iya katuyuan?

⁴ Nakita na naton nga ang Dios nakigkatipan kay Abraham nga nagadalahig sing binhi nga mangin instrumento sa pagpakamaayo sa “tanan nga pungsod sang duta.” (Genesis 22:17, 18) Ang mga Israelinhon nangin undanon nga binhi, apang sa kapin ka importante nga espirituwal nga kahulugan, si Jesucristo nangin ang una nga bahin sang binhi ni Abraham. Si Jesus amo man ang Anak, ukon Binhi, sang Daku Pa nga Abraham, si Jehova. Ang mga Cristiano nga “iya ni Cristo” nagahuman sang ikaduha nga bahin sang binhi ni Abraham. (Galacia 3:16, 29) Sa tapos maporma ang Abrahamiko nga katipan, ang Dios temporaryo nga nagdugang sing Kasuguan nga katipan sa pungsod sang Israel. Ginpamatud-an sini nga ang mga Israelinhon mga makasasala nga nagkinahanglan sing permanente nga saserdote kag himpit nga halad. Gin-amligan sini ang kaliwatan sang Binhi kag nagbulig sa pagkilala sa iya. Ginpakita man sang Kasuguan nga katipan nga, sa pila ka paagi ang Dios magapatubas sing isa ka pungsod sang mga hari kag mga saserdote. Samtang may epekto pa ang Kasuguan, ang Dios naghimo sing katipan kay David nga magpatok sing dinastiya sang mga hari sa Israel. Ang Davidiko nga katipan sa Ginharian nagtudlo man sa isa nga may permanente nga paggahom sa ibabaw sang duta.

5. Anong mga pamangkot ukon mga problema ang kinahanglanon pa nga lubaron?

⁵ Apang, may yara mga bahin ukon mga tulumuron sining mga katipan nga daw indi pa kompleto ukon kinahanglan nga athagon pa. Halimbawa, kon ang nagapakari nga Binhi mangin hari sa linya ni David, paano sia mangin permanente nga saserdote nga magahimo sing kapin sa ginhimo anay sang mga saserdote? (Hebreo 5:1; 7:13, 14) Makagahom bala ining Hari sing kapin pa sa dutan-on nga duog? Paano ang ikaduha nga bahin sang binhi makalipikar nga mangin sa pamilya sang Daku pa nga Abraham? Kag bisan pa kon makalipikar sila, ano ang ila gamhan, kay ang kalabanan nga katapo wala maghalin kay David? Tan-awon naton kon paano ang Dios naghimo sing legal nga mga tikang sa porma sang dugang nga mga katipan nga magahusay sining mga pamangkot, kag nagbukas sang dalan para sa dayon nga pagpakamaayo sa aton.

Katipan Para sa Langitnon nga Pagkasaserdote

6, 7. (a) Suno sa Salmo 110:4, anong dugang pa nga katipan ang gintukod sang Dios? (b) Anong nagligad nga hitabo ang nagabulig sa aton sa paghangop sining gindugang nga katipan?

⁶ Subong nakita naton, sa sulod sang Kasuguan nga katipan, ang Dios nakigkatipan kay David para sa isa ka kaliwat (isa ka binhi) nga magahari sing permanente sa ibabaw sang duta. Apang ginpahayag man ni Jehova kay David nga magaabot ang isa ka dayon nga saserdote. Si David nagsulat: “Si Jehova nakasumpa (kag indi maghinulsol): ‘Ikaw saserdote sing dayon suno sa paagi ni Melquisedec!’ ” (Salmo 110:4) Ano ang sa likod sining sumpa sang Dios nga nangin isa ka personal nga katipan sa ulot ni Jehova kag sang nagapakari nga Saserdote?

⁷ Si Melquisedec nangin hari anay sang dumaan nga Salem, nga mahimo yadto sa duog nga sang ulihi gintukod ang siudad sang Jerusalem (isa ka ngalan nga nagsugpon sang “Salem”). Ang kasaysayan tuhoy sa mga pagpakig-angot ni Abraham sa iya nagapadaku nga sia isa ka hari nga nagasimba sa “Labing Mataas nga Dios.” (Genesis 14:17-20) Apang, ang ginpamulong sang Dios sa Salmo 110:4 nagapakita nga si Melquisedec isa man ka saserdote, nga nagahimo sa iya nga isa ka tumalagsahon nga tawo. Sia isa ka hari kag saserdote, kag nag-alagad sia sa duog nga diin ang Davidiko nga mga hari kag ang Levinhon nga mga saserdote naghimo sang ulihi sang ila mga hilikuton nga gintangdo sang Dios.

8. Upod kay sin-o ginhimo ining katipan para sa pagkasaserdote kaangay ni Melquisedec, kag ano ang resulta?

⁸ Si Pablo nagahatag sa aton sing dugang pa nga mga detalye nahanungod sining katipan para sa pagkasaserdote kaangay ni Melquisedec. Halimbawa, sia nagasiling nga si Jesucristo amo ang “gintawag sang Dios nga isa ka mataas nga saserdote suno sa paagi ni Melquisedec.” (Hebreo 5:4-10; 6:20; 7:17, 21, 22) Bisan pa si Melquisedec maathag nga may tawhanon nga mga ginikanan, wala sing rekord tuhoy sa iya kaliwatan. Gani sang pagpanubli ni Jesus sang palangakuan sang pagkasaserdote suno sa narekord nga kaliwatan ni Melquisedec, ang pagtangdo sa iya direkta nga naghalin sa Dios. Ang pagkasaserdote ni Jesus indi pag-ipaliton sa isa ka salili, kay “sia nagapadayon sa iya pagkasaserdote.” Amo sini, bangod ang mga kaayuhan sang iya pag-alagad subong saserdote mangin dayon. Mapakamaayo gid kita sa pagtigayon sing isa ka saserdote nga “makaluwas sing bug-os sa ila nga nagapalapit sa Dios paagi sa iya” kag makatudlo kag makatuytoy sa mga matutom sing dayon.—⁠Hebreo 7:1-3, 15-17, 23-25.

9, 10. Paano ang ihibalo tuhoy sining ikalima nga katipan nagapasangkad sang aton paghangop kon paano matuman ang katuyuan sang Dios?

⁹ Ang isa pa ka importante nga kamatuoran amo nga ang papel ni Jesus subong Hari kag Saserdote indi lamang sa duta. Sa amo man nga konteksto nga sa diin ginsambit niya ining katipan para sa pagkasaserdote kaangay ni Melquisedec, si David nagsulat: “Si Jehova nagsiling sa akon Ginuo: ‘Lingkod ka sa akon too, tubtob nga mahimo ko ang imo mga kaaway nga imo palatungan.’ ” Sa amo mahangpan naton nga si Jesus—⁠ang Ginuo ni David⁠—makatigayon sing duog sa langit upod kay Jehova, nga natabo sang magkayab sia. Gikan sa langit, si Cristo makagamit sing awtoridad upod sa iya Amay sa pagsakop sa mga kaaway kag sa paghukom.—⁠Salmo 110:1, 2; Binuhatan 2:33-36; Hebreo 1:3; 8:1; 12:⁠2.

¹⁰ Busa, paagi sa paghibalo sining ikalima nga katipan, may yara kita nagsangkad nga pagtamod sa mahim-ong kag maid-id nga paagi nga sa amo tumanon ni Jehova ang iya katuyuan. Ginapalig-on sini nga ang una nga bahin sang binhi mangin saserdote man sa langit kag nga ang iya awtoridad subong Hari kag Saserdote mangin sa bug-os nga uniberso.—⁠1 Pedro 3:⁠22.

Ang Bag-ong Katipan kag ang Ikaduha nga Bahin sang Binhi

11. Anong mga komplikasyon ang nagluntad tuhoy sa ikaduha nga bahin sang binhi?

¹¹ Sang ginbinagbinag naton ang Abrahamiko nga katipan, natalupangdan naton nga si Jesus nangin una nga bahin sang binhi paagi sa kinaugali nga kinamatarong. Sia direkta nga naghalin sa patriarka nga si Abraham, kag subong isa ka himpit nga tawo, sia isa ka ginbaton nga Anak sang Daku Pa nga Abraham. Apang, kamusta ang mga tawo nga may pribilehiyo nga mangin ikaduha nga bahin sang binhi ni Abraham, “mga manunubli suno sa saad”? (Galacia 3:29) Subong dihimpit, bahin sang pamilya sang makasasala nga si Adan, indi sila kalipikado nga mangin sa pamilya ni Jehova, ang Daku Pa nga Abraham. Paano malandas ining sablag nga pagkadihimpit? Imposible ina sa mga tawo, apang wala sing imposible sa Dios.—⁠Mateo 19:25, 26.

12, 13. (a) Paano ang Dios nagtagna sing isa pa ka katipan? (b) Anong pinasahi nga bahin sining katipan ang takus naton talupangdon?

¹² Samtang may epekto pa ang Kasuguan, ang Dios nagtagna paagi sa iya manalagna: “Magahimo ako sing bag-ong katipan upod sa panimalay sang Israel kag upod sa panimalay sang Juda; indi suno sa katipan nga ginhimo ko upod sa ila mga ginikanan . . . ‘ang akon katipan nga ila ginlalis’ . . . Ibutang ko ang akon kasuguan sa sulod nila, kag isulat ko ini sa ila tagipusuon. Kag ako mangin ila Dios, kag sila mangin akon katawhan. Kag indi na sila magtudlo . . . ‘Kilalaha si Jehova!’ kay sila tanan makakilala sa akon . . . Kay patawaron ko ang kalautan nila, kag indi na pagdumdumon ang ila sala.”—⁠Jeremias 31:31-34.

¹³ Talupangda nga ang isa ka bahin sining bag-ong katipan amo ang kapatawaran sang mga sala, hayag nga sa isa ka paagi nga ‘indi suno’ sa kahimusan sang sapat nga mga halad sa idalom sang Kasuguan. Naghatag si Jesus sing kasanagan sa sini sang adlaw nga mapatay sia. Sa tapos magbuylog sa iya mga disipulo sa pagsaulog sang Paskua subong ginapatuman sang Kasuguan, ginsugdan ni Cristo ang Panihapon sang Ginuo. Ining tuigan nga pagsaulog nagadalahig sing naambitan nga tagayan sang alak, nga tuhoy sini si Jesus nagsiling: “Ining tagayan nagakahulugan sing bag-ong katipan tungod sa akon dugo, nga ginaula para sa inyo.”—⁠Lucas 22:14-20.

14. Ngaa importante ang bag-ong katipan sa pagpatubas sing ikaduha nga bahin sang binhi?

¹⁴ Busa, ang bag-ong katipan ginpahikot sang dugo ni Jesus. Pasad sa sadtong himpit nga halad, ang Dios ‘makapatawad sang sayop kag sala’ sing dayon. Hunahunaa kon ano ang kahulugan sina! Bangod mapatawad na sing bug-os ang mga sala sang matutom nga mga tawo sa pamilya ni Adan, sarang na sila matamod sang Dios subong walay sala, kag ipanganak sila subong espirituwal nga mga anak sang Daku Pa nga Abraham, kag dayon haplasan sila sing balaan nga espiritu. (Roma 8:14-17) Sa amo, ang bag-ong katipan nga ginpahikot sang halad ni Jesus nagahimo sa iya mga disipulo nga mangin ikaduha nga bahin sang binhi ni Abraham. Si Pablo nagsulat: “Paagi sa iya kamatayon sarang malaglag [ni Jesus] ang isa nga may gahom sa kamatayon, nga amo ang Yawa; kag maluwas [niya] sila tanan nga sa kahadlok sa kamatayon mga sakop sa kahiulipnan sa bug-os nila nga kabuhi. Kay sa pagkamatuod wala sia nagatabang sa mga anghel kundi nagatabang sia sa binhi ni Abraham.”—⁠Hebreo 2:14-16; 9:⁠14.

15. Sin-o ang mga partido sa bag-ong katipan?

¹⁵ Samtang si Jesus amo ang Manugpatunga kag ang nagapahikot nga halad sang bag-ong katipan, sin-o ang mga partido sa katipan? Gintagna ni Jeremias nga ang Dios magahimo sining katipan upod sa “panimalay ni Israel.” Diin nga Israel? Indi ang undanon nga Israel nga nasirkunsidar sa idalom sang Kasuguan, kay ang bag-ong katipan nagdula sa daan nga katipan. (Hebreo 8:7, 13; tan-awa ang pahina 31.) Ang Dios karon magapakig-angot sa mga Judiyo kag mga Gentil nga bangod sa pagtuo ‘nasirkunsidar sa tagipusuon paagi sa espiritu’ sing malaragwayon. Nagahisanto ini sa iya ginpamulong nga tuhoy sa mga sa bag-ong katipan ang ‘iya mga kasuguan isulat sa ila hunahuna kag sa ila tagipusuon.’ (Roma 2:28, 29; Hebreo 8:10) Gintawag ni Pablo inang espirituwal nga mga Judiyo nga “Israel sang Dios.”—⁠Galacia 6:16; Santiago 1:⁠1.

16. Paano ang bag-ong katipan nagabulig sa pagtuman sang ginapakita sang Exodo 19:6?

¹⁶ Sanglit ang Dios nagpakig-angot karon sa espirituwal nga Israel, ang gawang sang kahigayunan nagbukas. Sang gintukod sang Dios ang Kasuguan, ginpatuhuyan niya ang mga anak sang Israel subong “isa ka ginharian sang mga saserdote kag balaan nga pungsod” sa iya. (Exodo 19:6) Ang matuod, ang undanon nga Israel wala gid kag indi gid mangin isa ka pungsod nga ang tanan sa ila mga hari kag mga saserdote. Apang ang mga Judiyo kag mga Gentil nga ginbaton subong ikaduha nga bahin sang binhi ni Abraham nangin mga hari kag mga saserdote.⁠b Ginpalig-on ini ni apostol Pedro, nga ginasugiran sila: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga pinasahi nga pagkabutang, agod nga ibantala ninyo ang gamhanan nga mga buhat’ sang isa nga nagtawag sa inyo gikan sa kadudulman.” Nagsulat man sia nga ang ‘panublion nga dimadinulunton . . . natigana sa langit para sa ila.’—⁠1 Pedro 1:4; 2:9, 10.

17. Ngaa ang bag-ong katipan “maayo pa” sa Kasuguan nga katipan?

¹⁷ Busa, ang bag-ong katipan nagapanghikot upod sa nagluntad na nga Abrahamiko nga katipan sa pagpatubas sang ikaduha nga bahin sang binhi. Ining bag-ong katipan sa ulot ni Jehova kag sang ginpanganak sang espiritu nga mga Cristiano nagatugot sa pagporma sing isa ka langitnon nga pungsod sang mga hari kag mga saserdote sa harianon nga pamilya sang Daku Pa nga Abraham. Amo kon ngaa makita naton nga si Pablo nagsiling nga ini isa ka “maayo nga katipan, nga ginhimo sa maayo pa nga mga saad.” (Hebreo 8:6) Yadtong mga saad nagalakip sang pagpakamaayo nga ang kasuguan sang Dios nasulat sa tagipusuon sang mga matutom nga ang ila mga sala wala ginadumdom, kag ang tanan ‘nakakilala kay Jehova, kutob sa labing kubos tubtob sa labing daku sa ila.’—⁠Hebreo 8:⁠11.

Ang Katipan ni Jesus Para sa Isa ka Ginharian

18. Sa anong kahulugan ang mga katipan nga nabinagbinag na naton indi pa kompleto sa pagtuman sang katuyuan sang Dios?

¹⁸ Sa pagpamalandong sa anom ka katipan nga nabinagbinag na naton, daw subong bala nga legal nga ginhanda ni Jehova ang tanan nga kinahanglanon sa pagtuman sang iya katuyuan. Apang, ang Biblia nagasambit sing isa ka katipan nga naangot sa aton na nabinagbinag, isa ka katipan nga nagalakip sing dugang pa nga mga bahin sining importante nga butang. Ang ginpanganak sang espiritu nga mga Cristiano nagakaigo nga nagapaabot nga ‘ang Ginuo magaluwas sa ila gikan sa tagsa ka malaut nga buhat kag magaluwas sa ila para sa iya langitnon nga ginharian.’ (2 Timoteo 4:18) Sa langit, mangin isa sila ka pungsod sang mga hari kag mga saserdote, apang ano ang ila gamhan? Kon banhawon sila padulong sa langit, si Cristo yadto na didto subong isa ka himpit nga mataas nga saserdote. Nagatindog naman sia didto nga may harianon nga gahom sa paggahom sa bug-os nga uniberso. (Salmo 2:6-9; Bugna 11:15) Ano ang himuon sang iban pa nga mga hari kag mga saserdote?

19. San-o kag paano ginhimo ang ikapito nga importante nga katipan?

¹⁹ Sang Nisan 14, 33 C.⁠E., ang gab-i nga ginpatok ni Jesus ang Panihapon sang Ginuo kag ginsambit “ang bag-ong katipan pasad sa [iya] dugo,” nagpamulong sia tuhoy sa isa pa ka katipan, ang ikapito nga binagbinagon. Ginsingganan niya ang iya matutom nga mga apostoles: “Kamo amo ang mga nakapadayon kaupod nakon sa mga pagsulay sa akon; kag nagahimo ako sing katipan upod sa inyo, subong nga ang akon Amay nakahimo sing katipan upod sa akon, para sa isa ka ginharian, nga kamo magkaon kag mag-inom sa akon latok sa akon ginharian, kag maglingkod kamo sa mga trono sa paghukom sa napulog-duha ka tribo sang Israel.” (Lucas 22:20, 28-30) Subong nga ang Amay naghimo sing katipan upod kay Jesus nga mangin saserdote kaangay ni Melquisedec, si Cristo man naghimo sing personal nga katipan upod sa iya matutom nga mga sumulunod.

20. Upod kay sin-o ginhimo ang katipan para sa isa ka Ginharian, kag ngaa? (Daniel 7:18; 2 Timoteo 2:11-13)

²⁰ Ang 11 ka apostoles nag-unong kay Jesus sa iya mga pagtilaw, kag ang katipan nagpakita nga sila magalingkod sa mga trono. Dugang pa, ang Bugna 3:21 nagapamatuod nga ang tanan sang ginpanganak sang espiritu nga mga Cristiano nga mangin matutom magalingkod sa langitnon nga mga trono. Sa amo, ining katipan ginhimo upod sa 144,000 nga ginbakal sang dugo ni Jesus agod dalhon sa langit subong mga saserdote kag “magagahom subong mga hari sa ibabaw sang duta.” (Bugna 1:4-6; 5:9, 10; 20:6) Ang katipan nga ginhimo ni Jesus upod sa ila nagaangot sa ila sa iya sa pagpakigbahin sa iya paggahom. Sa isa ka kahulugan, daw subong bala nga ang nobya gikan sa isa ka halangdon nga pamilya gin-angot sang pag-asawahay sa isa ka nagagahom nga monarka. Sa amo, sia yara na sa posisyon sa pagpakigbahin sa iya paggahom sa ginharian.⁠—⁠Juan 3:29; 2 Corinto 11:2; Bugna 19:7, 8.

21, 22. Anong pagpakamaayo ang mapaabot bangod sang mahimo sining mga katipan?

²¹ Ano nga mga benepisyo ang buksan sini para sa matinumanon nga katawhan? Si Jesus ukon ang 144,000 indi gid mangin kaangay sang maluluy-on nga mga diktador nga “indi makahatag sing matuod nga mga solusyon.” Sa baylo, ginapasalig kita nga si Jesus isa ka mataas nga saserdote “nga natilawan sa tanan nga bagay kaangay naton, apang wala sing sala.” Busa mahangpan naton kon ngaa ‘makapakita [sia] sing kahanuklog’ sa tawhanon nga mga kaluyahon kag kon ngaa ang “iban nga mga karnero” subong amo man sa hinaplas nga mga Cristiano, makapalapit man sa trono sang Dios paagi kay Cristo “nga may kahilwayan sa paghambal.” Sa amo, sila man “makatigayon sing kaluoy kag makasapo sing dibagay nga kaluoy subong bulig sa nagakaigo nga tion.”—⁠Hebreo 4:14-16; Juan 10:⁠16.

²² Sila nga yara sa katipan agod magpakigbahin upod kay Jesus subong mga hari kag mga saserdote nagapakigbahin man sa pagpakamaayo sa katawhan. Subong nga ang Levinhon nga mga saserdote anay naghatag sing benepisyo sa bug-os nga pungsod sang Israel, sila man nga nagaalagad sa langitnon nga mga trono upod kay Jesus magahukom sa pagkamatarong sa tanan nga nagapuyo sa duta. (Lucas 22:30) Sila nga mga hari kag mga saserdote nangin tawo anay, gani mangin mahinuklugon sila sa mga kinahanglanon sang katawhan. Ining ikaduha nga bahin sang binhi magakooperar kay Jesus sa pagpat-od nga ang “tanan nga pungsod pakamaayuhon.”—⁠Galacia 3:⁠8.

23. Paano ang mga indibiduwal dapat maghikot bilang pagkooperar sa sining mga katipan?

²³ Ang tanan nga nagahandum sa pag-ambit sa sina nga pagpakamaayo sa katawhan, sa amo makabenepisyo gikan sa mga katipan sang Dios, ginaagda karon sa paghimo sini. (Bugna 22:17) Ang isa ka maayong tikang amo ang pagtambong sa pagsaulog sang Panihapon sang Ginuo, nga hiwaton sa pagtunod sang adlaw sa Mierkoles, Marso 22, 1989. Palihog magplano na karon sa pagtambong sa isa sang mga kongregasyon sang mga Saksi ni Jehova. Makatuon kamo didto sing dugang pa nahanungod sa balaan nga mga katipan kag mahangpan ninyo sing dugang pa kon paano kamo makabenepisyo gikan sa sini.

[Mga footnote]

a “Bisan ang labing makahas nga mga reporma nagbilin sa imol nga mga mangunguma, sa mga tawo nga may kapin nga mga kinamatarong, sa kadalagkuan nga may manubo nga buhis, sa kasarangan nga klase nga bahin sang pangulohan kag katilingban . . . Dapat silingon nga samtang ang nasanagan nga mga diktador nagsugod sa pag-atubang sa mga pamangkot nga indi na malikawan, indi ini makahatag sing matuod gid nga mga solusyon sa mga problema sa politika kag sa ekonomiya sang dag-on.”—⁠Western Civilization—⁠Its Genesis and Destiny: The Modern Heritage.

b Si Jesus indi isa ka partido sa bag-ong katipan. Sia ang Manugpatunga sini kag wala sing mga sala nga nagakinahanglan sing kapatawaran. Dugang pa, indi kinahanglanon nga mangin hari kag saserdote sia sini, kay sia isa ka hari suno sa Davidiko nga katipan kag isa man ka saserdote kaangay ni Melquisedec.

Nadumduman Mo Bala?

◻ Ngaa ginhimo ang katipan nga ginsambit sa Salmo 110:4, kag ano ang ginhimo sini?

◻ Sin-o ang yara sa bag-ong katipan, kag paano ini nagbulig sa pagpatubas sing isa ka pungsod sang mga hari kag mga saserdote?

◻ Ngaa naghimo si Jesus sing personal nga katipan upod sa iya mga sumulunod?

◻ Ano ang pito ka katipan nga nabinagbinag naton?

[Diagram sa pahina 17]

(For fully formatted text, see publication)

Edeniko nga katipan Genesis 3:15

Abrahamiko nga katipan

Kasuguan nga katipan

Davidiko nga katipan sa Ginharian

Katipan para sa saserdote kaangay ni Melquisedec

Pangunang binhi

Ikaduhang binhi

Dayon nga mga pagpakamaayo

[Diagram sa pahina 19]