Likawi ang ‘Pagpangita sing Dalagku nga mga Butang’

1, 2. (a) Sang ikap-at nga tuig ni Jehoiakim, ano ang problema ni Baruc? (b) Paano ginbuligan ni Jehova si Baruc?

NABALAKA ang matutom nga escriba ni Jeremias nga si Baruc. Ikap-at nga tuig na ini nga paggahom sang malaut nga si Hari Jehoiakim, ukon mga 625 B.C.E. Ginsilingan ni Jeremias ang escriba nga isulat sa tulun-an nga linukot ang tanan nga ginsiling ni Jehova sa manalagna tuhoy sa Jerusalem kag Juda sang nagligad nga kapin sa 23 ka tuig tubtob sina nga tion. (Jer. 25:1-3; 36:1, 2) Wala dayon ginbasa ni Baruc sa mga Judiyo ang kaundan sang linukot. Sa masunod nga tuig pa niya ini basahon. (Jer. 36:9, 10) Pero, ano ang ginakabalak-an ni Baruc?

² “Makaluluoy ako,” reklamo ni Baruc, “kay gindugangan ni Jehova sing kasubo ang akon kasakit! Ginakapoy ako sa akon pagpanghayhay.” Kon kaisa mahimo ginakapoy ka man, kag ayhan mabungat mo ini ukon ginahuptan na lang sa imo tagipusuon. Ano man ang ginhimo ni Baruc, ginpamatian sia ni Jehova. Ang Manug-usisa sang mga tagipusuon nakahibalo kon ngaa ginakapoy kag nabalaka si Baruc, kag paagi kay Jeremias, mainayuhon sia nga gintadlong sang Dios. (Basaha ang Jeremias 45:1-5.) Pero, mahimo ka matingala kon ngaa ginakapoy si Baruc. Bangod bala sa iya asaynment ukon sa kahimtangan sa iya palibot? Indi, kundi bangod sa iya balatyagon. Kay man, si Baruc ‘nagapangita sing dalagku nga mga butang.’ Ano ini? Ano ang ginpasalig sa iya ni Jehova kon batunon niya ang laygay kag panuytoy? Kag ano ang matun-an naton sa eksperiensia ni Baruc?

 3. Ano ang rason sang problema sa espirituwal ni Baruc?

³ Pat-od nga nahibaluan ni Baruc kon ano ang “dalagku nga mga butang.” Nahibaluan niya nga ‘ginatan-aw sang Dios ang ginahimo sang tawo, kag makita niya ang tanan niya nga tikang.’ (Job 34:21) Indi ang iya asaynment ang rason kon ngaa nagbatyag si Baruc nga ‘wala sia sing kapahuwayan’ samtang nagasulat sa ginahambal ni Jeremias. Ang rason amo ang iya pagtamod—ang yara sa iya tagipusuon. Bangod nawili sia sa pagpangita sing “dalagku nga mga butang” para sa iya kaugalingon, nalipatan ni Baruc ang mas importante nga mga butang, ang paghimo sang kabubut-on sang Dios. (Fil. 1:10) Gingamit sang Bag-ong Kalibutan nga Badbad ang tinaga nga “nagapangita.” Gani indi ini umalagi, ukon napensaran lang niya. Nagapangita na si Baruc sing “dalagku nga mga butang” sang ginpaandaman sia ni Jehova nga untatan ini. Bisan pa nagapakigbahin ang matutom nga sekretaryo ni Jeremias sa paghimo sang kabubut-on sang Dios, nagahingamo sia sing “dalagku nga mga butang.”

4, 5. Ngaa mahimo naglakip sa “dalagku nga mga butang” ni Baruc ang kabantugan kag tindog sa katilingban, kag ngaa nagakaigo nga paandaman sia ni Jehova?

⁴ Ang isa sa ginakabalak-an ni Baruc amo ang kabantugan kag tindog sa katilingban. Bisan pa nangin manunulat ni Jeremias si Baruc, indi lamang sia personal nga sekretaryo ni Jeremias. Ginpatuhuyan sa Jeremias 36:32 si Baruc subong “sekretaryo.” Suno sa arkeolohiya, may mataas sia nga katungdanan sa palasyo. Amo man sini ang tawag kay “Elisama nga sekretaryo,” nga ginhingalanan upod sa mga pangulo sang Juda. Nagapahangop ini nga si Baruc makasulod man “sa kalan-an sang sekretaryo” sa “balay sang hari” subong kaupod ni Elisama. (Jer. 36:11, 12, 14) Gani, si Baruc isa ka edukado nga opisyal sa palasyo. Ang iya utod nga si Seraya amo ang nagadumala sa mga pagkabutang ni Hari Sedequias kag nag-upod sa hari sa importante nga misyon sa Babilonia. (Basaha ang Jeremias 51:59.) Subong nagadumala sang mga pagkabutang sang hari, si Seraya amo man ang nagatatap sa mga kinahanglanon kag dalayunan sang hari sa panahon sang pagbiyahe. Isa gid ini ka mataas nga katungdanan.

⁵ Naanad na si Baruc sa mataas nga posisyon. Gani mahimo gid nga ginkapoy sia sa ginasulat niya nga mga mensahe sang paghukom batok sa Juda. Nabutang pa sa katalagman ang iya posisyon bangod sa pagbulig niya sa manalagna sang Dios. Hunahunaa man ang matabo kon gub-on ni Jehova ang Iya gintukod, subong sang mabasa naton sa Jeremias 45:4. Ang “dalagku nga mga butang” nga ginkabalak-an ni Baruc—dugang nga kadungganan sa palasyo ukon materyal nga kabuganaan—mangin wala sing pulos. May rason gid ang Dios nga paandaman si Baruc sa iya mga ginahandum kay malaglag ang Judiyong sistema sa sina nga tion.

6, 7. Kon ang “dalagku nga mga butang” ni Baruc amo ang materyal nga pagkabutang, ano ang pagkaanggid karon nga dapat naton binagbinagon?

⁶ Sa pihak nga bahin, ang “dalagku nga mga butang” ni Baruc mahimo maglakip sang materyal nga kabuganaan. Ang mga pungsod sa palibot sang Juda nagasalig gid sa ila mga pagkabutang kag manggad. Ang Moab nagsalig sa iya “mga hinimuan kag mga bahandi.” Amo man ang Ammon. Naghambal man si Jehova paagi kay Jeremias nga ang Babilonia “madamo sing bahandi.” (Jer. 48:1, 7; 49:1, 4; 51:1, 13) Pero ginpakamalaut sang Dios ini nga mga pungsod.

⁷ Gani sang nagapangita si Baruc sing pagkabutang kag manggad, mahangpan mo kon ngaa ginpaandaman sia ni Jehova. Sang ‘gin-untay sang Dios ang iya kamot batok’ sa mga Judiyo, ang ila mga balay kag uma ginhatag niya sa ila mga kaaway. (Jer. 6:12; 20:5) Kamusta kon updanay kamo ni Baruc nga nagaistar sa Jerusalem? Kalabanan sang inyo kasimanwa—lakip ang mga pangulo, saserdote, kag ang hari mismo—nagapati nga dapat sila makig-away sa nagasalakay nga mga Babilonianhon. Pero, nahibaluan mo ang mensahe ni Jeremias: “Mag-alagad kamo sa hari sang Babilonia agod padayon kamo nga magkabuhi.” (Jer. 27:12, 17) Mangin mahapos bala sa imo nga tumanon ang sugo sang Dios kon madamo ang imo pagkabutang? Ang imo bala mga pagkabutang makabulig sa imo para pamatian ang paandam ni Jeremias ukon sundon mo ang ginahimo sang kalabanan? Sa pagkamatuod, ang tanan nga malahalon nga pagkabutang sang Juda kag Jerusalem, lakip na ang yara sa templo, ginkuha kag gindala sa Babilonia. Gani ang pagtipon sing materyal wala sing pulos. (Jer. 27:21, 22) Ano ang aton matun-an sa sini?

8, 9. Ngaa daku nga butang ang pagluwas kay Baruc?

⁸ Binagbinaga ini: Ano ang mabaton ni Baruc kon tumanon niya ang Dios? Ang iya kabuhi! Pasalig ini nga “luwason” sia. (Basaha ang Jeremias 45:5.) Diutay lang nga tawo ang naluwas sadto. Sin-o? Ang tanan nga nagtuman sa sugo sang Dios nga mag-ampo sa mga Caldeanhon. (Jer. 21:9; 38:2) Mahimo magsiling ang iban, ‘Amo lang bala ina ang ila nabaton sa ila pagkamatinumanon?’

⁹ Hunahunaa ang kahimtangan sa Jerusalem sang ginlikupan sila sang mga Babilonianhon. Amat-amat nga nag-antos ang Jerusalem. Kabaliskaran gid ini sa gulpi nga kalaglagan sang Sodoma, gani masiling nga mas maayo pa ang natabo sa Sodoma. (Pan. 4:6) Si Baruc ang nagsulat sang tagna nga ang mga pumuluyo sang Jerusalem mapatay sa espada, gutom, ukon peste. Nian nakita niya ang katumanan sini. Naubos ang pagkaon sa Jerusalem. Makakulugmat gid makita ang mga iloy nga kinaugali nga “maluluy-on,” nga naglaga kag nagkaon sang ila mga anak! (Pan. 2:20; 4:10; Jer. 19:9) Pero naluwas si Baruc. Sa sini nga kagamo, ang kabuhi kaangay sang inagaw nga ginapadya sa mga nagdaug sa inaway. Maathag nga ginbaton kag ginsunod ni Baruc ang laygay sang Dios kag nag-untat sa pagpangita sing “dalagku nga mga butang.” Gani, ginkahamut-an gid sia ni Jehova kag ginluwas.—Jer. 43:5-7.

10, 11. Ano ang matun-an naton sa kasaysayan ni Baruc?

¹⁰ Bisan masako si Baruc sa paghimo sang kabubut-on sang Dios, may tion nga nangin pagtilaw sa iya ang handum sa “dalagku nga mga butang.” Ginpaandaman sia ni Jehova kag naluwas sia sa espirituwal nga kalaglagan kag pisikal nga kamatayon. Masulay man bala kita ukon madala sang aton handum kaangay ni Baruc, bisan pa aktibo kita sa pag-alagad?

¹¹ Para kay Baruc, pagtilaw gid sa iya ang iya katungdanan. Ayhan nahunahuna niya: ‘Mahuptan ko bala ang akon obra subong “sekretaryo”? Malab-ot ko pa bala ang mas mataas nga posisyon?’ Kamusta kita? Pamangkuta ang imo kaugalingon, ‘May “mga ambisyon” bala ako, ayhan ginatago ko sa akon tagipusuon, nga mangin madinalag-on sa kalibutan karon ukon sa palaabuton?’ Mahimo mamangkot ang pila ka pamatan-on nga Cristiano, ‘Naganyat bala ako sang “dalagku nga mga butang” amo nga maeskwela pa gid ako para mangin kilala kag magmanggaranon?’

12. Paano nangita sing dalagku nga mga butang para kay Jehova ang isa ka utod, kag ano ang imo masiling sa iya desisyon?

¹² Ang isa ka utod nga nagaalagad karon sa ulong talatapan gintanyagan nga mangin iskolar sa isa unibersidad sang 15 anyos sia. Nalugaw-an ang iya mga manunudlo kay wala niya ini ginbaton, sa baylo nagpayunir sia. Pero nanamian gihapon sia magtuon. Nangin misyonero sia sa isa ka malayo nga isla. Kinahanglan niya tun-an ang isa ka lenguahe nga ginapamulong sang sobra lamang sa 10,000 ka tawo. Wala sing diksionaryo sa sini nga lenguahe, gani ginlista niya ang mga tinaga kag ang kahulugan sini. Nangin talunsay sia sa sini nga lenguahe kag gin-asayn sa pagbadbad sang aton pila ka publikasyon. Sang ulihi, ang iya ginhimo nga listahan sang mga tinaga gingamit nga basihan para sa una nga diksionaryo sina nga lenguahe. Isa ka bes, ginsilingan niya ang madamo nga tumalambong sa isa ka distrito nga kombension: “Kon nag-eskwela ako sa isa ka unibersidad, ako ang padunggan sang tanan ko nga nahimuan. Pero, bangod wala ako sing tinapusan, ang tanan nga kadungganan iya ni Jehova.” (Hulu. 25:27) Husto bala ang iya desisyon sang 15 anyos sia? Sa sulod sang mga tinuig, nakabaton sia sing madamo nga pribilehiyo sa tunga sang katawhan sang Dios. Sa imo bahin, sa diin mo gamiton ang imo mga talento? Imbes nga para sa imo kadungganan, determinado ka bala nga gamiton ini sa pagdayaw kay Jehova?

13. Ngaa dapat binagbinagon sang mga ginikanan ang natabo kay Baruc?

¹³ Ang isa pa ka katalagman amo ang pagpangita sing “dalagku nga mga butang” para sa aton mga hinigugma ukon paagi sa ila kag sa iban nga mahimo naton maimpluwensiahan. Makita mo nga ginamaniobra sang kalibutanon nga mga ginikanan ang mga butang para mag-ayuhan ang ila kabataan sangsa ila ukon mahimo nila sila mapabugal. Mahimo nabatian mo na ang mga komento nga: “Indi ko gusto nga mag-antos sia pareho sa akon” ukon “Gusto ko nga may tinapusan ang akon bata para mangin matawhay ang iya kabuhi.” Amo man sini ang balatyagon sang Cristianong mga ginikanan. Mahimo magsiling ang isa, ‘Wala ako nagapangita sing dalagku nga mga butang para sa akon kaugalingon.’ Pero ginahimo bala niya ini paagi sa iya kabataan? Mahimo nga nagtinguha si Baruc sing pagkaprominente paagi sa iya posisyon kag mahimo man ini tinguhaan sang mga ginikanan paagi sa ila mga kabataan. Pero, indi bala nga nahibaluan ini sang “nagausisa sang mga tagipusuon” kaangay sang natabo kay Baruc? (Hulu. 17:3) Indi bala dapat naton pangabayon ang Dios nga usisaon ang aton tagipusuon subong sang ginhimo ni David? (Basaha ang Salmo 26:2; Jeremias 17:9, 10.) Mahimo maggamit si Jehova sing lainlain nga paagi, subong sang aton natun-an kay Baruc, para paandaman kita sa katalagman sang pagpangita sing “dalagku nga mga butang.”

14, 15. Paano mangin “dalagku nga mga butang” naton ang manggad?

¹⁴ Mahimo nga ang isa pa ka “dalagku nga mga butang” ni Baruc amo ang manggad. Subong sang nasambit na, kon higugmaon ni Baruc ang iya mga pagkabutang sa Juda, mabudlayan gid sia sa pagtuman sa sugo sang Dios nga maampo sa mga Caldeanhon. Ang manggaranon masami nagasalig sa iya “manggad,” pero suno sa Biblia ina nga mga butang “[indi matuod nga] nagaamlig nga pader.” (Hulu. 18:11) Makabulig gid sa tanan nga alagad ni Jehova ang balanse nga pagtamod sang Biblia sa materyal nga mga butang. (Basaha ang Hulubaton 11:4.) Pero mahimo may mangatarungan, ‘Ngaa indi ka mangalipay sing makadali lang sa ginatanyag sang kalibutan?’

¹⁵ Ang gugma sa mga pagkabutang mahimo bangdan nga maghingamo ang isa ka Cristiano sing mga butang nga bahin sining kalibutan nga magataliwan. Indi amo sini ang ginhimo ni Jeremias kag ni Baruc. Ginpaandaman man ni Jesus ang mga tawo nga magakabuhi “sa adlaw nga ipahayag ang Anak sang tawo.” Ginsilingan sila ni Jesus: “Dumduma ninyo ang asawa ni Lot.” Sing kaanggid, daw ginapaandaman man ang mga Cristiano: ‘Dumduma sanday Jeremias kag Baruc.’ (Luc. 17:30-33) Kon palambuon naton ang gugma sa materyal, mabudlayan kita magtuman sa ginsiling ni Jesus. Pero dumduma nga ginsunod gid ni Baruc ang paandam sang Dios amo nga naluwas sia.

16. Magsugid sing sitwasyon nga ginbutang sang mga alagad sang Dios sa nagakaigo nga duog ang materyal.

¹⁶ Binagbinaga ang kahimtangan sang mga kauturan sa Romania sa tion sang mga Komunista. Ginasulod ang balay sang mga Saksi, kag kon kaisa ginakuha sang mga tinawo sang gobierno ang ila mga pagkabutang, ilabi na ang puede mabaligya. (Pan. 5:2) Handa ang mga kauturan nga isakripisyo ang ila mga pagkabutang. Sang ginsaylo sila sa iban nga lugar, nabayaan nila ang ila mga pagkabutang; pero nahuptan nila ang ila integridad kay Jehova. Kon makaatubang ka sini nga pagtilaw, tugutan mo bala nga balabagan sang materyal ang imo katutom sa Dios?—2 Tim. 3:11.

17. Paano nabuligan sanday Jeremias kag Baruc sang pila nila ka kontemporaryo?

¹⁷ Ginbuligan man sanday Jeremias kag Baruc sang pila nila ka kontemporaryo. Dungan nga nagpanagna sanday Sofonias kag Jeremias sang panahon ni Josias. Ano ayhan ang ginhunahuna ni Jeremias sa ginasiling sa Sofonias 1:18? (Basaha.) Sigurado gid nga ginpaambit ini ni Jeremias kay Baruc. Ang isa pa ka kontemporaryo niya amo si Ezequiel, nga gindala nga bihag sa Babilonia sang 617 B.C.E. Ang pila sa iya hilikuton kag mensahe direkta nga naangot sa nagpalauli nga mga Judiyo, gani nahibaluan ni Jeremias ang ginhimo kag ginsiling ni Ezequiel. Nahibaluan man ni Ezequiel ang ginhimo kag ginsiling ni Jeremias. Lakip sa sini ang narekord sa Ezequiel 7:19. (Basaha.) Kaangay nanday Jeremias kag Baruc, makabenepisyo ka man sa sining inspirado nga pulong. Sa adlaw ni Jehova, ang mga tawo mangayo sing bulig sa ila mga dios. Pero, indi sila maluwas sang ila mga dios ukon sang ila manggad.—Jer. 2:28.

18. Sin-o ang luwason, kag paano kita maluwas?

¹⁸ Dumdumon naton nga nagsaad si Jehova sing ‘kaluwasan.’ Bisan mapatay ang pila niya ka alagad sa paghingabot sa “dakung kapipit-an” kon ang sungay sang mapintas nga sapat magabalikid sa relihion, banhawon sila para mabaton nila ang “matuod nga kabuhi” sa bag-ong kalibutan. (Bug. 7:14, 15; 1 Tim. 6:19) Makasiguro kita nga kalabanan sa matutom nga alagad sang Dios makagua sa dakung kapipit-an. Kon laglagon sang Dios ang mga pungsod, wala gid sing matutom nga madalahig sa “mapatay ni Jehova.”—Jer. 25:32, 33.

19. Paano ang pagbinagbinag sa halimbawa nanday Jeremias kag Baruc makapabakod sang imo determinasyon nga likawan ang pagpangita sing “dalagku nga mga butang” para sa imo kaugalingon?

¹⁹ Ang pila mahimo masubuan kay kabuhi lang nila ang ila mabaton, pero indi gid ini makapaluya. Dumduma nga sang ginagutman ang mga tawo sa Jerusalem, ginbuligan ni Jehova si Jeremias. Paano? Ginpabilanggo ni Hari Sedequias si Jeremias sa Luwang sang mga Bantay kag ‘ginhatagan sia kada adlaw sing tinapay halin sa dalan sang mga panadero, tubtob naubos ang tanan nga tinapay sa siudad.’ (Jer. 37:21) Kag wala napatay si Jeremias! Gamiton ni Jehova ang bisan ano nga paagi para buligan ang iya katawhan. Kag himuon gid niya ini, kay ginpasalig niya sa ila ang kabuhi nga walay katapusan. Nakalampuwas man si Baruc sang ginlaglag ang Jerusalem bangod nag-untat sia sa ‘pagpangita sing dalagku nga mga butang.’ Sing kaanggid, makalaum gid kita nga “maluwas” sa Armagedon para dayawon si Jehova tubtob sa walay katapusan.