Paghidait Gikan sa Dios—San-o?

“Ang Dios nga nagahatag sing paghidait magadugmok sa madali kay Satanas sa idalom sang inyo mga tiil.”—ROMA 16:20.

 1, 2. (a) Ano ang ginsiling sang Hindu nga mangin-alamon nahanungod sa inaway kag paghidait? (b) Sin-o ang mga malipayon nga may paghidait gikan sa Dios?

“KON magpadayon ang binuang nga palumbaanay sa hinganiban, magadul-ong ini sa pagpamatay nga wala pa gid matabo sa maragtas. Kon may mabilin nga magadaug, ang magadaug amo ang buhi nga kamatayon para sa pungsod nga amo ang magadaug.” Ina nga tagna nga ginhimo sang 1938 ni Mohandas Gandhi malayo pa sang tion niya.

² Sang 1931, si Gandhi nagsiling sa isa ka Britaniko nga pangulo sang puod: “Kon ang imo pungsod kag ang akon maghiusa sa mga panudlo nga ginhatag ni Cristo sa sining Wali sa Bukid, malubad naton ang mga palaligban indi lamang sang aton pungsod kundi sang bug-os nga kalibutan.” Subong ginpakita sang Hindu nga mangin-alamon, ang wali ni Jesus nagatudlo sang dalan padulong sa dayon nga paghidait. Sa sadto nga wali si Cristo nagsiling: “Malipayon ang mga mahidaiton, kay sila tawgon nga ‘mga anak sang Dios.’” (Mateo 5:9) Madamo nga “mga anak” karon ang may paghidait gikan sa Dios. Sa ulihi, ang tanan nga mahagop sang duta makasapo sing “bug-os nga kalipay sa kabuganaan sang paghidait.” (Salmo 37:11) Apang masaligan bala naton ini nga palaabuton?

 3. Ngaa wala sing matuod nga paghidait sa duta karon?

³ Sa karon, ang kalaglagan sang kalibutan nagakabit sa ibabaw sang katawhan. Suno sa isa ka pagtuon kasan-o lang: “Ang katapusan nga kabuangan amo ang $3-4,000,000,000,000 (3-4 trilyon dolyares) nga gingasto kutob sang Inaway Kalibutanon II sa pagtuga sing nuklear nga arsenal nga, kon gamiton, magakahulugan sing paghikog sang bug-os nga globo. . . . Ang dag-on sang megaton sa pagtipon sang kalibutan sing nuklear nga mga hinganiban bastante na sa pagpatay sa 58 bilyones ka tawo, ukon sa pagpatay sang tagsa ka tawo nga nagakabuhi karon sing 12 ka beses.”a Apang nagapadayon sa pagdasig ang binuang nga palumba. MAD sa pagkamatuod, kay ina nga mga letra nagatindog para sa Mu­tu­al­ly As­sured De­struc­tion, ang mahuyang nga ideya nga sa amo ginabalanse sang dalagku nga mga kagamhanan ang ila ginatawag nga paghidait. Sa pagkamatuod indi ini ang paghidait gikan sa Dios.

 4. (a) Ano nga talan-awon ang ginapresentar karon sang kalibutan? (b) Apang anong malig-on nga paglaum ang ginaabiabi sang mga sumilimba ni Jehova?

⁴ Sa tanan nga paagi, ining kalibutan nagapresentar sing isa ka makapasubo nga talan-awon. Wala pa gid matabo sang una nga ang katilingban sang tawo dapat magbatas sing kapin nga kagarukan sa politika, kapin nga kasingki sa krimen, kapin nga mga palaligban sa pangabuhi, ukon kapin nga pagkadidiosnon kag relihioso nga kagumon, sang sa karon nga dag-on. Wala pa gid nangin kapin ka matuod tuhoy sa katawhan nga ang “bug-os nga tinuga nagaugayong sa kasakit sing tingob.” Apang nagapanaad ang Dios nga ang iya tinuga nga mga tawo “hilwayon sa kahiulipnan sang pagkamadinulunton kag makaagom sing mahimayaon nga kahilwayan sang mga anak sang Dios.” (Roma 8:21, 22) Ang mga mahigugmaon sa paghidait nga nagasimba sa Dios sang Biblia, ang Soberanong Ginuong Jehova, ginapasalig nga makasulod sa sina nga kahilwayan. Mangin isa ini ka kahilwayan nga nakapanggamot sing malig-on sa matuod nga paghidait, dayon nga paghidait. (Ezequiel 37:26-28) Apang san-o kag paano maabot ina nga paghidait?

Ang Pagtamod sang Dios sa ‘mga Tion kag mga Panag-on’

 5. Anong pamangkot ang nagautwas may kaangtanan sa 1 Tesalonica 5:1?

⁵ Ginlipay ni apostol Pablo ang mga Cristiano sa Tesalonica paagi sa pagpaathag kon paano ang pagkabanhaw may kaangtanan sa ‘pag-abot ni Ginuong’ Jesus. Nian nagsiling sia: “Nahanungod sa mga tion kag mga panag-on, mga kauturan, wala kamo sing kinahanglan nga sulatan sang bisan ano.”—1 Tesalonica 4:15; 5:1.

 6. Paano naton mahibal-an nga ang ‘mga tion kag mga panag-on’ importante sa Dios?

⁶ Ginapakita bala sang mga pulong sang apostol nga ang ‘mga tion kag mga panag-on’ indi importante sa Dios? Indi gid! (Manugwali 3:1) ‘Sang mag-abot ang bug-os nga limite sang tion,’ sa katapusan sang 69 ka semana sang mga tuig, ‘ginpadala sang Dios ang iya Anak.’ Kag ang ministeryo ni Jesus nagdugay sing tatlo ka tuig kag tunga—kutob sang 29 C.E. tubtob 33 C.E.—subong sang gintagna. (Galacia 4:4; Daniel 9:24-27) Eksakto gid sa katapusan sang “gintalana nga mga tion sang mga pungsod” sang 1914 nga si Jesus ginpalingkod subong Hari sa “langitnon nga Jerusalem.” (Lucas 21:24; Hebreo 12:22; Ezequiel 21:27; Daniel 4:31, 32) Ang “dakung kapipit-an” magaabot man sa “adlaw kag takna” nga gintalana ni Jehova. “Indi ini magpalantang.”—Mateo 24:21, 36; Habacuc 2:3.

 7. Ngaa indi na kinahanglan nga sulatan ni Pablo ang mga taga-Tesalonica nahanungod sa ‘mga tion kag mga panag-on’?

⁷ Apang, sa sini nga punto indi kinahanglan nga magsulat si Pablo nahanungod sa “mga tion kag mga panag-on.” Yadtong taga-Tesalonica nga mga Cristiano nakombinse na nga amo na yadto ang ‘panag-on’ sang katapusan sang Judiyong sistema sang mga butang, nga matapos sa mga 20 ka tuig sa ulihi, sang 70 C.E. Ang ila kakugi kag “kalipay sang balaan nga espiritu” nagsiga subong huwaran. (1 Tesalonica 1:4-7) Subong man, ang mga Saksi ni Jehova karon nakahibalo sing bug-os nga ang mga inaway sa kalibutan kag ang iban pa makapapiot nga mga hitabo kutob sang 1914 amo “ang tanda” sang dimakita nga pag-abot ni Jesus sa gahom kag himaya sa Ginharian.—Mateo 24:3-8; 25:31.

 8. Ngaa dapat kita magpabilin nga nagamata kag aktibo?

⁸ Masunod, ginpasalig sang apostol ang iya mga masigka-Cristiano, nga nagasiling: “Kay kamo gid nakahibalo sing sibu nga ang adlaw ni Jehova magaabot subong sang makawat sa kagab-ihon.” (1 Tesalonica 5:2) Bisan pa wala naton nahibaloan ang sibu nga tion, ina nga adlaw sang paghukom nagapalapit. Magaabot ini sa hinali sa gintalana nga takna sang Dios. Busa, dapat kita magpabilin nga nagamata kag aktibo.—Lucas 21:34-36.

Katapusan nga Panawag Para sa Paghidait

 9. (a) Ano nga singgit ang nagautwas, kag ngaa wala nagabuylog sa sini ang matuod nga mga Cristiano? (b) Sin-o ang nagapaguwa sini nga panawag, kag paano sila kon ipaanggid sa mga manuggahom sang adlaw ni Jeremias?

⁹“Paghidait kag kalig-onan!” Ginapaalisto kita diri ni Pablo sa proklamasyon nga mabatian sa putokputokan sang “pag-abot” ni Cristo. (1 Tesalonica 5:3) Mabatian ayhan naton ang singgit sa indi madugay? Sa diin magahalin ina nga panawag para sa paghidait kag kalig-onan sa kalibutan? Maathag nga indi sa mga sumulunod ni Cristo, kay si Jesus nagsiling nga sila ukon ang iya Ginharian indi “bahin sang kalibutan.” (Juan 15:19; 17:14, 16; 18:36) Busa mahimo gid nga ang mga nagahimo sini nga panawag amo ang mga taga-kalibutan nga nagapamatok sa nagapakari nga Ginharian sang Dios. Bahin sila sang kalibutan nga ‘yara sa gahom sang malauton,’ si Satanas nga Yawa. (1 Juan 5:19) Kaangay sang politikal kag relihioso nga mga lider sang adlaw ni Jeremias, ini sila magahambal sang “palanan-awon sang ila kaugalingon nga tagipusuon,” nga nagasiling, “Makatigayon kamo sing paghidait,” nga nagasiling sing sayop nga ina nga paghidait gikan sa Dios. Daw ano ka sayop nga mapamatod-an ang ila pangangkon!—Jeremias 23:16, 17, 19, 20.

10. Ano nga pagpaagisod sang mga hitabo ang nagdul-ong sa kahimtangan sang kalibutan karon?

¹⁰ Ang isa ka pagpaagisod sang mga hitabo nagadul-ong sa sining pagsinggit sing “Paghidait kag kalig-onan!” Gintukod ang Liga de Nasyones sang 1920 sa tapos sang Daku nga Inaway, nga nakilal-an karon subong Inaway Kalibutanon I. Ang katuyoan sini nga Liga amo nga dulaon ang inaway gikan sa duta sing dayon. Apang ang Inaway Kalibutanon II nagduso sa Liga pakadto sa kadadalman. Sang Oktubre 24, 1945, ini nga hubon ginpasag-uli, nagtindog gikan sa mga abo nga may bag-o nga ngalan, ang Nasyones Unidas. (Ipaanggid ang Bugna 17:8.) Ang una nga tulumuron sini amo “ang pagtipig sang paghidait kag kalig-onan sa kalibutan.” Ang mga tagtukod sini nagpabutyag sing determinasyon nga “luwason ang masunod nga mga kaliwatan gikan sa halit sang inaway.” Nagmadinalag-on bala ang NU sa pagpasalig sina nga paghidait kag kalig-onan?

11. Daw ano ka serioso ang krisis nga nagaatubang sa kalibutan?

¹¹ Bisan daw ano ka sinsero ang pila sang mga tagtukod sang NU, ina nga hubon, kaangay sang Liga anay, napaslawan sa pagtuman sang katuyoan sang iya karta. Ang kalibutan karon nagapungko sa bariles sang nuklear nga mga hinganiban. Ang aksidente sa Cher­no­byl, U.S.S.R., sang Abril 1986, nga nagresulta sa pag-ulan sing radyoaktibo sa ibabaw sang daku nga bahin sang Europa, nagapakita nga bisan kon gamiton para sa mahidaiton nga mga katuyoan, ang nuklear nga gahom may makahaladlok nga kusog. Ang iban nga mga pungsod sa Bagatnan nga Pasipiko nagatinguha sa pagtipig sang ila duog subong hilway sa nuklear nga sona. Apang kon magdabdab ang bug-os nga inaway nuklear, wala sing maluwas bisan diin.

Posible Bala ang “Paghidait kag Kalig-onan”?

12. Ano ang gindeklarar sang NU para sa 1986, kag ano ang sabat sang mga pungsod?

¹² Nakahibalo sang nagagrabe nga krisis, gindeklarar sang Nasyones Unidas ang 1986 subong Internasyonal nga Tuig sang Paghidait. Lainlain ang reaksion sa sini sang mga pungsod. Ang kalabanan sa ila nagsakdag sa Tuig sang Paghidait sang NU sa nanuhaytuhay nga paagi, apang ginatudlo nila ang nuklear nga inaway subong ang katalagman sa paghidait. Samtang, ang diutay nga mga inaway nagapadayon sa bilog nga duta, nga mga 150 kutob sang Inaway Kalibutanon II, kag ang tingob nga napatay sa sini kapin sa 30,000,000. Masiling bala nga may isa ka pungsod nga naghimo gid sang inisyatibo sa pagtuman sang bantog nga mga pulong sang Isaias 2:4 nga natigib sa pader sang plasa sang NU?

13. Paano nagsakdag ang relihioso nga mga lider?

¹³ Ang mga relihion sang kalibutan wala magpangalag-ag sa pagsakdag sa Tuig sang Paghidait sang NU. Ginproklamar ni Papa Juan Paulo II ang Enero 1 subong Adlaw sang Paghidait sang Kalibutan kag ginlaygayan niya ang mga manghimanwa nga manguna sa pagtukod sing sadsaran para sa unibersal nga paghidait. Ginpangabay man niya ang pagtuo sang kalibutan nga magtipon agod mangamuyo sa As­si­si, Italya, sa tion sang Internasyonal nga Tuig sang Paghidait. Mapagsik nga ginbaton sang Arsobispo sang Can­ter­bury, pangulo sang Iglesia sang Inglaterra, kag sang Budhista nga mga grupo ini nga pangagda. Ang ­World Coun­cil of Church­es nagpaguwa sing deklarasyon tuhoy sa Internasyonal nga Tuig sang Paghidait, nga nagalaygay nga ang pagbuhin sang armas sugdan sa gilayon.

14. Paano lamang magmadinalag-on ang isa ka proyekto para sa paghidait?

¹⁴ Apang, sa sining butang sang pagtukod sing “paghidait kag kalig-onan,” ano ang kabubut-on sang “Dios nga nagahatag sing paghidait”? Ginapakita bala sang matagnaon nga Pulong sang Dios nga ang dihimpit nga mga tawo kag ang mga pungsod makapaluntad sing paghidait kag kalig-onan sa sining kalibutan? Indi gid! Ang “pat-od nga kadalag-an” nasandig sa pag-atubang ni Jehova sa mga kahimtangan nga nahisuno sa iya pagkamatarong kag sa iya kadayawan.—Isaias 55:11; 61:11.

Nagahilapit nga “Hinali nga Kalaglagan”

15. Anong makapakibot nga pahibalo ang masunod nga ginhambal ni Pablo?

¹⁵ Ginasugiran kita ni apostol Pablo kon ano ang masunod nga matabo. Sia nagsiling: “Kon magsiling sila: ‘Paghidait kag kalig-onan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala; kag indi sila nga mas-a makalikaw.”—1 Tesalonica 5:3.

16. Ngaa ang mga dalanon sang mga pungsod indi ang mga dalanon sang Dios?

¹⁶ Sa una nga pagbasa, yadto nga mga pulong daw makapakibot. Apang ginapaathag sang Biblia ang mga butang. Ang mga dalanon sang mga pungsod karon indi ang mga dalanon sang Dios. (Isaias 55:8, 9) Ang rason kon ngaa ginatugutan niya nga magpadayon ang nanuhaytuhay nga paggahom sang tawo amo agod masabat niya ang hulusayon nga ginpautwas sang malalangon nga Man-ug, si Satanas nga Yawa, sang mga 6,000 ka tuig nga nagligad. Sang mahaylo ni Satanas ang aton unang mga ginikanan nga mangin independiente sa Dios, ginsuay niya kon bala kinahanglan gid sang katawhan ang paggahom sang Dios.—Genesis 3:4, 5.

17. Ano nga rekord ang nahimo sang paggahom sang tawo, kag ano ang ginapamatod-an sini?

¹⁷ Sa tion sang mga milenyo nga nagsunod, gintugutan sang Dios ang mga tawo sa pag-eks­perimento sang tanan nga porma sang pangulohan sang tawo nga mahunahuna nila. Kon bala nagdugay ini sing pila lamang ka tuig ukon ginatos ka tuig, ang tagsa ka sahi sang paggahom sang tawo napaslawan sa pagpaluntad sing matuod nga paghidait kag kalig-onan. Ang inaway, krimen, kahadlok, kag kamatayon amo ang padayon nga naeksperiensiahan sang katawhan sa idalom sang tanan nga sahi sang pangulohan sang tawo. Sa bug-os nga maragtas, “ang tawo naggahom sa tawo sa iya kahalitan.” (Manugwali 8:9) Amo man sa karon. Ang bisan sin-o nga nakahibalo sang hulusayon makasiling karon, subong sang manalagna anay sang Dios: “Nahibaloan ko gid, O Jehova, nga ang dalanon sang tawo wala sa iya kaugalingon. Wala sa tawo nga nagalakat sa pagmando sang iya tikang.”—Jeremias 10:23.

18. Ngaa mapaslawan ang pagsinggit sang mga pungsod sing “Paghidait kag kalig-onan!”?

¹⁸ Malapit na karon ang tion nga husayon ang hulusayon sing makaisa. Ang paggahom lamang sang Dios ang makadala sing paghidait kag kalig-onan sa katawhan. Apang, indi paggahom sang Dios ang ginapaboran sang mga pungsod kon sila magsinggit sing “Paghidait kag kalig-onan!” Luyag nila magpadayon sa paggahom suno sa ila kaugalingon bugalon nga mga ideolohiya. Apang naubos na ang tion! Nahangpan sang mga pungsod nga dapat himuon ang isa ka butang nga hilingagawon. Kay kon indi, ang tanan madula sa nuklear nga kalaglagan. Gani himuon nila ang gintagna ni Jeremias: “Gin-ayo nila sing hapaw ang pilas sang akon katawhan, nga nagasiling, ‘Paghidait! Paghidait!’ nga wala sing paghidait.” Apang mangin sa walay kapuslanan ini!—Jeremias 6:14; 8:11, 15.

Ang Gintagna nga Katapusan

19. Paano magaabot ang “adlaw ni Jehova”?

¹⁹ “Sa hinali ang kalaglagan magaabot,” siling ni apostol Pablo. Ang manalagna sang Dios nga si Isaias nagdugang: “Yari karon! Ang ila mga isganan nagasinggit sa kalye; ang mga embahador sang paghidait magahibi sing mapait.” (Isaias 33:7) Sa madamo nga duog, ginapakita sang Biblia nga ang paghukom ni Jehova sa malauton nga mga pungsod kag mga tawo magaabot sing hinali, sa wala ginapaabot—sa pagkamatuod “subong sang makawat sa kagab-ihon.” (1 Tesalonica 5:2, 3; Jeremias 25:32, 33; Sofonias 1:14-18; 2 Pedro 3:10) Sa tion nga ang kalibutan mabaskog nga magaproklamar nga nalab-ot sini ang putokputokan sang paghidait kag kalig-onan, ang “adlaw ni Jehova” magaabot nga may makahaladlok nga pagkahinali. Makilala sang katawhan sang Dios kon ano ang kahulugan sang pagsinggit sing “Paghidait kag kalig-onan!” kag may kalig-onan sa dalangpan nga iaman ni Jehova.—Salmo 37:39, 40; 46:1, 2; Joel 3:16.

20. (a) Ano nga sahi sang “sapat” ang NU? (b) Paano ginatamodni Jehova ang dimatuod nga relihion, kag ngaa?

²⁰ Sa Pulong sang Dios, ang dalanon sang Liga de Nasyones kag sang salili sini, ang Nasyones Unidas, ginpaangay sa “mapula nga sapat nga mapintas” nga may pito ka ulo (nagarepresentar sa mga kagamhanan sa kalibutan nga ginhalinan sini) kag may napulo ka sungay (nagatindog sa gahom sang mga pangulohan nga karon nagasakdag sa sini). Ginapakita sang Biblia nga isa ini ka politikal nga “sapat,” kaanggid sa Britaniko nga “leon” kag Ruso nga “oso.” Sa likod sini may nagasakay nga babayi, “Babilonia nga Daku, ang iloy sang mga makihilawason kag sang makangilil-ad nga mga butang sang duta.” (Bugna 17:3-8) Ginapabutyag sini ang pagtamod ni Jehova sa dimatuod nga relihion, nga wala nagarepresentar sa iya kag sa iya matarong nga Ginharian. Nagakomiter sia sing espirituwal nga pagpamiga paagi sa paghilabot sa politika. Ang pagbuylog sang relihion sa NU sa kampanya sang kalibutan para sa paghidait kag kalig-onan isa ka halimbawa sini. Luyag man niya nga makatigayon sing paghidait kag kalig-onan gikan sa mensahe sang paghukom sang Dios nga ginabantala sang mga Saksi ni Jehova. Sa sining katuyoan, gin-impluwensiahan niya ang pila ka pangulohan nga dumilian ang Cristianong hilikuton sang mga Saksi.—Salmo 2:1-3.

21. (a) Ano nga buhat ang magatanda sang pagsugod sang “adlaw ni Jehova”? (b) Sa anong katapusan magadangat ang “adlaw”?

²¹ Paano magaabot ang “adlaw ni Jehova”? Sa sining pinakamadulom nga kagab-ihon sang maragtas sang tawo, sa pagkamatuod magaabot ini “subong sang makawat”! Matabo ina kon maniobrahon sang Dios ang mga pungsod sang NU nga sapat sa pagbalikid sing hinali sa dimatuod nga relihion. Sa pagpakita sang ila natago nga dumot sa Babilonia nga Daku, ibuyagyag nila kon ano sia kag laglagon sia sing bug-os. Tuman kadasig nga mahanabo ining paglaglag amo kon ngaa ang politikal nga mga kahagugma niya anay magatuaw: “Kailo, kailo, ikaw nga dakung siudad, ikaw Babilonia nga siudad nga malig-on, kay sa isa ka tagna nag-abot ang paghukom sa imo!” Apang salakayon man sang mga pungsod kag sang ila mga hangaway ang katawhan sang Dios. Nian, laglagon sang Hari sang mga hari, si Jesucristo ang tanan nga kaaway kag itagbong sa kadadalman ang puno nga manugpamatok, si Satanas nga Yawa.—Bugna 17:16, 17; 18:10; 19:11-21; 20:1-3; ipaanggid ang Ezequiel 38:11, 16, 18-23.

22. (a) Ano ang daku nga paglaum sang nagatuo nga mga tawo karon? (b) Paano ikaw makatigayon sing paghidait gikan sa Dios?

²² Sa katapusan, ang matuod nga paghidait kag kalig-onan magabugana sa idalom sang Ginharian sang Dios! (Salmo 72:1, 7; Isaias 9:6, 7) Sing makalilipay, madamo karon nga ‘nagamata kag nagabantay’ ang mabuhi agod makita ini. (1 Tesalonica 5:4-6) “Ang dakung kadam-an . . . gikan sa tanan nga pungsod,” nga nagatuo sa halad nga aman ni Jehova paagi kay Cristo, luwason gikan sa “dakung kapipit-an” agod makaagom sing dayon nga paghidait gikan sa Dios. (Bugna 7:9-17; 21:3, 4) Kabay nga isa ikaw sa ila!

[Footnote]

Paano Mo Sabton?

◻ Ngaa importante sa Dios kag sa aton ang ‘mga tion kag mga panag-on’?

◻ Paano naton tamdon ang pagpalapit sang “adlaw ni Jehova”?

◻ Sin-o ang magaambit sa pagsinggit sang 1 Tesalonica 5:3, kag san-o?

◻ Anong daku nga mga hitabo ang pahanabuon sina nga singgit?