Madumduman Mo Bala?

Nasapwan mo bala ang bag-o nga mga guwa sang Ang Lalantawan nga may praktikal nga kapuslanan sa imo? Kon amo, ngaa indi mo tilawan ang imo memorya sa masunod nga mga pamangkot:

◻ Anong duha ka pamangkot ang nakabulig sa madamong Cristiano nga makahimo sing personal nga desisyon may kaangtanan sa trabaho?

Ang unang importante nga pamangkot amo: Ginapakamalaut bala mismo sa Biblia ang sekular nga trabaho? Ang ikaduha nga pamangkot amo: Ang paghimo bala sini nga trabaho nagahimo sa isa nga kakunsabo sa ginapakamalaut nga buhat?—4/15, pahina 28.

◻ Sa anong paagi nga ‘ang tawhanon nga tinuga ginpasakop sa pagkawalay pulos’? (Roma 8:20)

“Ginpasakop [kita] sa pagkawalay pulos” bangod sang ginhimo sang aton unang mga ginikanan, sanday Adan kag Eva. “Indi sa [aton] kaugalingon nga kabubut-on” ukon bangod sang personal indibiduwal nga luyag nga natabo ini. Napanubli naton ini. Sing maluluy-on, bisan pa nga pagkadihimpit, sala, kag kamatayon lamang ang maliton karon sang aton unang mga ginikanan, gintugutan gihapon sila ni Jehova nga magpanganak. Ang kamatayon naglapnag sa tanan nga tawo, gani sa sina nga kahulugan “ginpasakop [sang Dios ang tinuga] sa pagkawalay pulos.”—5/1, pahina 5.

◻ Ngaa makatarunganon isiling nga may palaabuton nga ‘pagtindog sa isa ka balaan nga duog’ ang “makangilil-ad nga butang”? (Mateo 24:15)

Sa dumaan nga sulundan, ‘ang makangilil-ad nga butang nga nagatindog sa isa ka balaan nga duog’ gin-angot sa pagsalakay sang mga Romano sa idalom ni Heneral Gallus sang 66 C.E. Ang modernong-adlaw nga kaanggid sa sina nga pagsalakay—ang pagdabdab sang “dakung kapipit-an”—yara pa sa palaabuton. (Mateo 24:21) Gani “ang makangilil-ad nga butang nga ginabangdan sang pagkahapay” magatindog pa sa isa ka balaan nga duog.—5/1, pahina 16, 17.

◻ Paano ang nagaobra nga amay kag iloy may yara tion para sa ila kabataan?

Ang iloy nga ginakapoy pagkatapos sang bug-os-adlaw nga pagtrabaho mahimo makapangabay sa iya kabataan nga buligan sia sa pagdigamo. Ang amay nga madamo gid sing hilimuon sa mga talipuspusan sang semana sarang makahimo sang pila sining hilikuton upod sang iya kabataan.—5/15, pahina 6.

◻ Ano ang dapat himuon sang mga ‘nagalakat sa dalanon ni Jehova’? (Jeremias 7:23)

Ang paglakat sa dalanon ni Jehova nagakinahanglan sing pagkamainunungon—sing determinasyon nga sia lamang ang alagaron. Nagakinahanglan ini sing pagsalig—sing bug-os nga pagtuo nga ang mga saad ni Jehova masaligan kag matuman. Ang paglakat sa dalanon ni Jehova nagakinahanglan sing pagkamatinumanon—sing pagsunod sa iya mga kasuguan nga wala nagasipak kag sing pagtuman sa iya mataas nga mga talaksan. (Salmo 11:7)—5/15, pahina 14.

◻ Anong apat ka importante nga responsabilidad ang matuman sang “mga dulot nga mga tawo”? (Efeso 4:8)

Mapasibu nila kita sing malulo, mapalig-on kita sing mahigugmaon, matipigan ang aton paghiusa sa kongregasyon, kag maamligan kita sing maisugon. (Efeso 4:12-14)—6/1, pahina 14.

◻ Ano ang matun-an naton gikan sa pagpakig-upod ni Pablo sa mga isa ka gatos ka indibiduwal nga ginhinambitan sa Binuhatan kag sa iya mga sulat?

Dapat pirme kita mangabudlay upod sa organisasyon sang Dios, upod sa aton lokal nga kongregasyon, kag upod sa aton masigkatumuluo. Kinahanglan naton ang ila bulig, suporta, kag lugpay sa maayo nga mga tion kag sa magamo nga mga tion.—6/1, pahina 31.

◻ Anong tatlo ka pagpangatarungan ang mahimo magamit sa pagbulig sa iban nga hunahunaon ang Manunuga? Ang makita nga pagkasibu sa masangkad nga uniberso, ang ginhalinan sang kabuhi sa duta, kag ang dimapanghiwala nga pagkapinasahi sang utok sang tawo, upod ang nanuhaytuhay nga mga ikasarang sini.—6/15, pahina 18.

◻ Ngaa importante gid nga mahangpan ang kahulugan sang personal nga ngalan sang Manunuga?

Ang ngalan sang Dios nagakahulugan sing “Sia nga Nagapahanabo” kag nagapadaku nga sia nagatuyo kag nagabuhat. Paagi sa aton paghibalo kag paggamit sang iya ngalan, maapresyar gid naton nga nagatuman sia sing mga saad kag nagapahanabo sang iya katuyuan.—6/15, pahina 21.

◻ Paano malakip ang kabataan sa pamilya nga pagtuon sa Biblia?

Kon posible, pat-ura nga ang kada bata may kaugalingon nga Biblia kag publikasyon nga tulun-an. Ang isa ka pamatan-on mahimo pangabayon nga ipaathag ang mga larawan nga makita sa materyal nga ginatun-an, kag ang isa ka bata mahimo tangduan sing abanse nga basahon ang isa ka kasulatan. Ang isa nga dakudaku na mahimo tangduan nga sambiton ang mga kahigayunan nga maaplikar sing praktikal ang materyal nga ginatun-an.—7/1, pahina 15.

◻ Ano ang pila ka tulumuron nga mahimo ilakip sang pamilya sa paghanda para sa mga miting sa kongregasyon?

(1) Ang kada isa sa pamilya handa sa pagkomento sa mga miting; (2) ang kada isa nagatinguha sa pagkomento sa iya kaugalingon nga mga tinaga; (3) ang mga kasulatan ginalakip sa mga komento; kag (4) ang materyal ginatun-an agod maaplikar ini sing personal.—7/1, pahina 20.

◻ Ano ang isa ka yabi sa madinalag-on nga pag-asawahay?

Agod mabuksan kag maeksperiensiahan ang hamili nga kalipay sang isa ka madinalag-on nga pag-asawahay, kinahanglanon ang maayo nga komunikasyon. Nagakinahanglan ini sing pagpaambitay sing mga balatyagon kag hunahuna. Kag ang maayo nga komunikasyon nagalakip sa mga butang nga makapalig-on, makapapagsik, maayo, dalayawon, kag makalugpay. (Efeso 4:29-32; Filipos 4:8)—7/15, pahina 21.

◻ Ano ang ‘dalanon ni Jehova’? (Salmo 25:8, 9,12)

Ina nga dalanon amo ang dalanon sang gugma. Napasad ini sa paghimo sing matarong suno sa mga talaksan sang Dios. Ginatawag sang Biblia ining pag-aplikar sa may prinsipio nga gugma nga “nagalabaw nga dalanon.” (1 Corinto 12:31)—8/1, pahina 12.