May Kaayuhan Bala sa Pag-antos?

KON ginaatubang sing daku nga pag-antos, madamo ang nagalain ang buot. Ang iban nga nagaagom sing pareho ukon malain pa nga mga eksperiensia nangin labi ka maawaon kag mapinalanggaon sa ila balatyagon sa isigkatawo. Sing kaanggid, ginapanghiwala sang iban nga may Dios kon napaidalom sa malawig nga mga kabudlayan, samtang ginatugyan sang iban ang daku nga pagtilaw sa dimationg nga pagtuo sa Labing Gamhanan. Ngaa amo sini?

Sing masami ang mga tawo nagalain ang buot kag nadulaan sing pagtuo bangod ginakabig nila ang ila kaugalingon nga tuman ka importante kag napaslawan sa pagkilala nga sila makasasala tawhanon nga mga buhi sa kalibutan nga wala nagasapak sa kasugoan sang Dios. Sayop nila nga ginapabangod sa Labing Gamhanan ang malain nga mga butang nga sa sini ang mga tawo ang dapat basulon. Gani, wala sila sing naton-an nga mapuslanon sa mga kabudlayan kag, sa tapos makaeksperiensia sing paumpaw, magapakita pa gani sang mas malain pa nga mga batasan sang sa nagligad.

Agod indi ini matabo sa aton, dapat naton tinguhaan nga himuslan ang bisan ano man nga nagakatabo sa aton. Nagakinahanglan ini sing husto nga pagtamod sa pag-antos sang tawo. Ang tolon-an nga Panalabiton sa Biblia makabulig sing daku sa paghangop sing husto sini nga bagay.

Hupti ang Paglaum

Ang tolon-an mismo nagaunod sang lima ka binalaybay nga nagapanalabiton ukon nagalalaw sa grabe nga kalaglagan nga nag-abot sa Jerusalem sa mga kamut sang mga Babilonianhon. Sa ikatlo sining mga binalaybay, si manalagna Jeremias, nga napahulag sang espiritu sang Dios, nagapabutyag sang iya daku nga balatyagon, nagaliton sini sa bug-os nga pungsod sa idalom sang pagkatawo sang makusog nga tawo. (Panalabiton 3:1) Bisan pa nga si Jeremias nag-antos upod sa bug-os nga pungsod, ang eksperiensia wala magpaakig sa iya. Ginhulat niya sing malaumon ang tion nga ang kahamuot sang Dios mangin yara liwat sa Iya katawhan kag ginbaton ang natabo sa pungsod subong makatarunganon nga pagpadapat sang balaan nga paghukom.

Ang paglaum tuhoy sa palaabuton nga pagluwas ang nagsakdag kay Jeremias. Aton mabasa: “Sing walay duhaduha ang imo kalag [kay Jehova mismo] magadumdum kag magatalupangod sa akon. Ini ginadumdum ko sa akon hunahuna. Amo kon ngaa ginapakita ko ang nagahulat nga panimuot.” (Panalabiton 3:20, 21) Wala gid sing duhaduha sa hunahuna ni Jeremias nga sa ulihi tan-awon nga may kahamuot ni Jehova ang Iya mahinulsulon nga katawhan. Matuod, ginpakanubo sila kaayo sa bug-os nga pagkapierde. Apang si Jehova, kon hambalon pa, magaduko gikan sa iya mataas nga kahimtangan sa langit, magabayaw sa ila gikan sa ila manubo nga kahimtangan. Nagahunahuna sini, mahalipay ni Jeremias ang iya tagipusuon kag mapailubon nga makahulat tubtob magapanghikot si Jehova tungod sa Iya mahinulsulon nga katawhan.

Gani, kon nagaagom sing masubo nga eksperiensia, indi kita dapat madulaan sing paglaum. Dapat naton dumdumon ang kamatuoran nga ang mga pagtilaw may ginsuguran kag may katapusan man. Indi gid pagtugotan sang Labing Mataas nga magaantos sing dayon ang iya matutom nga mga alagad upod sadtong indi iya debotado nga katawhan. Amo sina kon ngaa dapat kita maghulat sing mapailubon tubtob dalhon ni Jehova ang paumpaw.

Ang kamatuoran mismo nga ang tawo buhi gihapon dapat magahatag sa iya sing rason nga maglaum. Sadto anay sa panahon ni Jeremias, ang siudad sang Jerusalem kag ang duta sang Juda nahapay, kag madamong Israelinhon ang napatay. Apang, may mga nakalampuwas. Naghatag ini sing pasalig nahanungod sa padayon nga kaluoy sang Dios sa iya katawhan. Aton mabasa: “Mga buhat sang mahigugmaon nga kaluoy ni Jehova nga wala kita pagpapasa, bangod nga ang iya mga kaluoy wala nagauntat. Bag-o sila agaaga. Daku ang imo pagkatutom. ‘Si Jehova amo ang akon bahin,’ nagasiling ang akon kalag, ‘busa magahulat ako sa iya.’”—Panalabiton 3:22-24.

Kon indi bangod sa mahigugmaon nga kaluoy sang Dios, sang iya mainawaon nga pag-ulikid sa iya katawhan, kuntani wala sing nakalampuwas sa tunga sang mga Israelinhon. Apang si Jehova nga Dios nagpakita sing kaluoy. Gani ang iya pagpakita sing kaluoy padayon nga magailig sa iya katawhan, nga nagabag-o agaaga. Ang katunayan nga ang katutom ni Jehova daku nagapat-od nga ang iya kaluoy masaligan. Mangin dalayon ini, indi maluya kag wala sing epekto. Sanglit ang Labing Mataas nagpabilin nga bahin, ukon palanublion, sang iya katawhan, may maayong rason para sa ila nga magahulat sing padayon sa pagbaliskad sang mabudlay nga mga sirkunstansia nga sa sini gintugotan niya sila nga magakari bangod sang ila pagkadimatutom.

Kon Paano Maghulat sing Mapailubon

Paano makilala ina nga paghulat? Ang tolon-an sang Panalabiton nagasabat: “Maayo si Jehova sa mga nagahulat sa iya, sa kalag nga nagapangita sa iya. Maayo nga ang tawo maglaum kag maghulat sing hipus sang kaluwasan ni Jehova. Maayo sa tawo nga magdala sang gota sa iya pagkapamatan-on. Maglingkod sia sing isa lamang kag maghipus, bangod nga ginpapas-an niya ini sa iya. Ibutang niya ang iya baba sa yab-ok. Basi pa nga may paglaum. Itaya niya ang iya pisngi sa nagatampa sa iya. Mangin puno sia sing kahuluy-an.”—Panalabiton 3:25-30.

Talupangda nga sa tion sang kasisit-an, ang isa dapat malaumon nga maghulat sa Dios sing paumpaw kag magpalapit sa iya. Ang isa dapat magpailob, nagahulat sing hipus ukon walay yamo tubtob dalhon sang Labing Mataas ang kahilwayan, ukon kaluwasan. Busa labing mapuslanon nga maton-an sang isa ang magpas-an sang gota sang pag-antos sa pagkapamatan-on. Ngaa? Bangod nagapahapos ini para sa iya nga maagihan inang nga eksperiensia sa ulihi sang kabuhi nga wala nagakadulaan sing paglaum. Nakahibalo nga nalampasan niya ang daku nga mga kabudlayan sang nagligad, may sadsaran sia nga maglaum nga mahimo niya ini liwat.

Karon, kon ang isa ginapapas-an sang gota sang kasisit-an, indi sia dapat magdalidali sa pagpautwas sang iya mga reklamo. Indi, dapat sia maglingkod sing isahanon, subong sang ginahimo sang isa nga nagalalaw, kag maghipus. Dapat sia maghapa, kag ang iya baba nagatandog sa yab-ok. Nagakahulugan ini nga dapat sia magpasakop sing mapinaubuson sa mga pagtilaw nga ginapahanugotan sang Dios nga antuson niya, kag dapat sia maghulat sing malaumon sa nagapakari nga kaluwasan. Indi sia dapat mag-alsa batok sa iya mga manughingabot kundi mapailubon nga magabatas sa abuso sa pisikal kag hambal. Nagapahanumdum ini sa aton sa kon paano naggawi si Jesucristo. Ang report sang Biblia nagarekord: “Sang ginpasipalahan sia, wala sia magbalus sa pagpasipala. Sang mag-antus sia, wala magpahog, kundi gintugyan niya ang iya kaugalingon sa nagahukom sing matarong.”—1 Pedro 2:23.

Ang isa pa ka importante nga punto nga dumdumon kon nagaeksperiensia sing pag-antos amo nga ang Dios wala mahamuot sa malain nga mga butang nga ginahimo sang mga tawo. Apang, ginapahanugotan sang Labing Mataas ina nga mga butang nga matabo upod ang maayong katuyoan. Matahom ini nga ginpabutyag sa masunod nga pinamulong sang tolon-an sang Panalabiton: “Kay si Jehova indi magsikway sing dayon. Kay bisan nagapakalisud sia, apang may kaluoy sia suno sa kadam-an sang iya mahigugmaon nga kaluoy. Kay wala sia nagapapiot sing kinabubut-on ukon nagapakalisud sang mga anak sang mga tawo. Sa paglinas sang tanan nga binilanggo sang duta, sa pagpatalang sang matarong sang tawo sa atubangan sang nawong sang Labing Mataas, sa pagpatalang sa tawo sa iya kasaba, si Jehova wala nagapakamaayo.”—Panalabiton 3:31-36.

Sa bahin sang dimatutom nga mga Israelinhon, gintugotan ni Jehova nga Dios nga magaagom sila sing grabe nga eksperiensia sa kamut sang mga Babilonianhon. Ginsikway niya sila tubtob sa pagpahanugot sa ila nga madala nga bihag. Apang, upod ini ang maayo nga katuyoan, nga amo, ang pagpatubas sing mahinulsulon nga nagkalabilin sa tunga sang mga nakalampuwas kag sa ila mga kaanakan. Sa sining nagkalabilin nga si Jehova nagpakita sing kaluoy. Ang Labing Gamhanan wala mahamuot sa pagsilot sa mga Israelinhon. Indi handum sang iya tagipusuon nga magkalisud sila kag mapiotan paagi sa pagtugyan sa ila sa mga kamut sang ila mga kaaway. Wala ginapakamaayo ni Jehova ang malain nga pagtratar nila sa iya katawhan. Wala sia mahamuot sa mga tawo nga nagapigos sa mga bilanggo sa inaway, sa mga nagadingot sa tawo sang iya hatag-Dios nga mga kinamatarong, kag sa wala nagahatag sing katarungan sa kasaba.

Sing nahisuno, kon kita magaantos sa kamut sang mga tawo, indi naton dapat pagbasulon ang Dios tungod sa mga sayop nga nahimo sang tawo. Ang Labing Mataas wala mahamuot sa pagpigos kag kasingki nila. Sa ulihi manabat sila sa iya tungod sa ila sayop nga mga buhat.

Nian, sa liwat, ang mga tawo mahimo nga magadala sing pag-antos sa ila kaugalingon. Ang walay pagtuo nga mga Israelinhon nagtalikod kay Jehova nga Dios, nagsikway sang iya maamligon nga pag-atipan. Sing makatarunganon, nian, ginbiyaan niya sila sa ila mga kaaway. Gani wala sila sing rason nga magyamo nahanungod sa natabo sa ila. Ginpadaku ini sa pamangkot: “Ngaa bala ang tawo nga buhi nagayamo, ang tawo, tungod sa pagsilot sang iya mga sala?” (Panalabiton 3:39) Sa baylo nga magyamo, ang mga Israelinhon dapat nga magbalik sing mahinulsulon kay Jehova, nagapangabay sang iya kaluoy. Aton mabasa: “Usisaon naton kag tungkaron ang aton mga dalanon, kag magbalik kay Jehova. Bayawon naton ang aton tagipusuon upod sa aton mga kamut sa Dios sa mga langit: ‘Naglalis kami, kag nagbato.’”—Panalabiton 3:40-42.

Huo, indi ini tion para magyamo kag magreklamo. Tion ini nga tan-awon sing maayo ang ila mga ginahimo, ang ila dalanon sang kabuhi ukon paggawi, kag binagbinagon kon ano ang nangin resulta. Sa baylo nga padayunon ang ila kaugalingon nga mga ginahimo sa kalainan nila, dapat sila magbalik kay Jehova kag magpahisuno sa iya mga mando. Ang naguwa nga pagpakita sing paghinulsul, ang pagbayaw sang mga kamut sa pangamuyo, indi bastante. Ang tinagipusuon nga paghinulsul sa mga paglapas ang kinahanglan.

Gani kon nagaantos, dapat naton usisaon ang aton dalanon sang pagkabuhi. Kita bala ang naghatag sing palaligban sa aton kaugalingon bangod sang dipagsapak sa kasugoan sang Dios? Kon amo, wala kita sing rason nga basulon ang Labing Mataas. Sa baylo, dapat naton ipakita nga nakabenepisyo kita gikan sa masakit nga disiplina paagi sa pagsikway sa sayop nga dalanon kag mahinulsulon nga magliso sa Dios. Kon gintinguhaan naton nga magkabuhi sing matadlong apang nakaeksperiensia sing kasisit-an, indi naton dapat pagkalipatan nga ang ginahimo sang malaut nga mga tawo sa aton wala mahamut-i sang Dios. Samtang, dapat kita magpasakop sing mapainubuson sa aton mga pagtilaw, nagahulat sing mapailubon kag walay pagyamo tubtob si Jehova nga Dios magahatag sing paumpaw. Kon iaplikar naton ang laygay sang Pulong sang Dios kon nagaatubang sing pag-antos, makabenepisyo kita. Maton-an naton ang pagpailob, pagbatas, kag bug-os nga pagsalig kay Jehova. Indi gid naton pag-ilugon ang malain nga mga dalanon sang mga mapiguson, kundi padayon kita nga mangin malulo kag mainawaon sa aton isigkatawo.

[Laragway sa pahina 23]

Si Jeremias, nga nagkomposo sang Panalabiton, nakasulat pasad sa eksperiensia tuhoy sa pag-antos