Si Jehova Nagagabot sang Iya Espada!

“Ang tanan nga unod makakilala nga ako, si Jehova, naggabot sang akon espada sa iya tagub.”​—⁠EZEQUIEL 21:⁠5.

 1. Batok kay sin-o gintaya ni Jehova ang iya espada sa Juda kag Israel?

ANG espada ni Jehova nagapukaw gid sang kahadlok sa iya mga kaaway. Apang kon gamiton niya ini batok sa mga makasasala sang mga ginharian sang Juda kag Israel, nahibaluan gid bala nila kon ano ang nagakatabo? Huo, ginpahibalo sila nga si Jehova naggabot sang iya simbuliko nga espada sa iya tagub.​—⁠Esdras 9:​6-9; Nehemias 1:8; 9:​26-30.

 2. Ano ang ginsiling ni Jehova batok sa iya “espada,” nagapautwas sang anong mga pamangkot?

² Paagi sa iya manalagna kag manugbantay nga si Ezequiel, ang Dios nagsiling: “Ang tanan nga unod makakilala nga ako, si Jehova, naggabot sang akon espada sa iya tagub.” (Ezequiel 21:⁠5) Ina bala nga mga pulong naaplikar sa dumaan nga tion? Ukon may kahulugan bala ini para sa aton?

Mga Tagna Tuhoy sa Paghukom sa Jerusalem

 3. Ano ang ginsugid ni Ezequiel sa mga bihag sa Babilonia, kag anong modernong-adlaw nga kaanggid sini?

³ Ang kangga ni Jehova nag-andar liwat, kag ang lokasyon ni Ezequiel nagbalhin man. Daw subong bala nga ang katulad-kangga nga langitnon nga organisasyon sang Dios nagsaylo sa lalantawan sa ibabaw sang Bukid sang Olibo. Gikan didto gintagna ni Jesus ang kalaglagan nga natabo sa Jerusalem sang 70 C.E., isa ka makahalapay nga nagatagna sang katapusan sang Cristiandad. (Marcos 13:​1-20) Sa palanan-awon, si Ezequiel ginkuha gikan sa suba sang Kebar, apang paagi sa espiritu sang Dios gindala sia karon pauli sa iya puluy-an sang pagkabihag sa Babilonia. Didto ginsugiran niya ang tanan nga bihag sang ‘tanan nga butang nga ginpakita ni Jehova sa iya.’ Sing kaanggid, ang hinaplas nga “manugbantay” sang Dios kag ang kaupod nga mga saksi nagabantala karon sang tanan nga ginsugid sa ila paagi sa Nagasakay sa langitnon nga kangga.​—⁠Ezequiel 11:​22-25.

 4. Paano naghulag ang Judiyong mga bihag sa simbuliko nga mga buhat ni Ezequiel?

⁴ Paagi sa simbuliko nga mga buhat, ginpakita ni Ezequiel sa Judiyong mga bihag nga ang pungsodnon nga kalaglagan malapit na. (Basaha ang Ezequiel 12:​1-7.) Ang manalagna nagdala sing “balon sa pagliton” sa pagpakita sa pila ka butang nga sarang madala sang mga bihag sa ila mga abaga. Ang kahadlok magapangibabaw sa dili madugay sa ginlikupan nga Jerusalem. Bisan pa nga wala pagsapaka sang madamo ina nga paandam, dapat sugiran ni Ezequiel ang katawhan: “Wala na gid sing paisulon.” Karon wala man ginasapak ang balaan nga mga paandam kag mga tagna, apang daku ang mahimo naton sa pagbulig sa mga nagapangita sang kamatuoran nga magsalig sa katumanan sini.​—⁠Ezequiel 12:​8-28.

 5. Sanglit ang “adlaw ni Jehova” malapit na, anong mga pagpakamalaut ang nagakaigo?

⁵ Yadtong nagapamati sa manugbantay ni Jehova dapat makahibalo nga mabatyagan nila ang “espada” sang Dios. Busa yadtong may salabton sa sayop nga paghangop nahanungod sa kalig-onan sang Jerusalem kag Juda ginpakamalaut. Ang dimatuod nga mga manalagna ginpaanggid sa mabangis nga mga ido nga talonon, kag ginpakita nga ang mga butigon nagatabon sang mahuyang nga mga kuta, ukon walay pulos nga mga proyekto, sang katawhan. Ang dimatuod nga mga manalagna nga babayi ginpakamalaut man. “Ang adlaw ni Jehova” malapit na, kag ang iya nawong gintuhoy batok sa mga ‘nagbulag sa iya,’ kon sayuron, ‘nagdedikar sang ila kaugalingon nga indi magsunod sa Dios.’ Kon dedikado kita kay Jehova, pat-od nga indi gid naton luyag nga magbulag gikan sa iya balaan nga pag-alagad.​—⁠Ezequiel 13:​1-14:⁠11.

 6. Sarang bala maluwas sang bisan sin-o nga tawo ang balingag nga katawhan sang Juda, kag ano ang ginatudlo sini sa aton?

⁶ Sin-o ang makaluwas sa balingag nga katawhan sang Juda? Bisan ang matarong nga sanday Noe, Daniel, kag Job indi makaluwas sa ila kon tumanon sang Dios ang iya paghukom sa duta. Agod makalampuwas kita, nian, dapat naton abagahon ang aton personal nga responsabilidad sa atubangan sang Dios kag sa paghimo sang iya kabubut-on.​—⁠Ezequiel 14:​12-23; Roma 14:⁠12.

 7. Sa ano ginpaanggid ang Juda, apang ano ang gintukod sang Dios upod sa mga matutom?

⁷ Bangod sang iya dimatutom nga mga pumuluyo, ang Juda ginpaanggid sa isa ka ilahas nga balagon sang ubas nga wala sing maayong bunga kag nagakabagay lamang sa kalayo. (Ezequiel 15:​1-8) Ginpaanggid man sia sa isa ka lapsag nga ginluwas sang Dios gikan sa Egipto kag ginpadaku tubtob maghamtong sa pagkadalaga. Ginkuha sia ni Jehova subong asawa niya, apang nagliso sia sa dimatuod nga mga dios kag pagalaglagon bangod sang iya espirituwal nga pagpanglahi. Apang, upod sa mga matutom ang Dios ‘naghimo sing walay katubtuban nga katipan’​—⁠ang bag-ong katipan upod sa espirituwal nga Israel.​—⁠Ezequiel 16:​1-63; Jeremias 31:​31-34; Galacia 6:⁠16.

 8. (a) Sa ano ginpaanggid ang Babilonia kag Egipto? (b) Paano kita dapat maapektuhan sang paglapas ni Zedequias?

⁸ Masunod, ang mga gumalahom sang Babilonia kag Egipto ginpaanggid sa daku nga mga agila. Ginpuktol sang isa ang ukbong sang kahoy nga sedro paagi sa pagpahalin kay Hari Joaquin kag pagtal-us sa iya kay Zedequias. Bisan pa nga si Zedequias nagsumpa sing katutom kay Nabokodonosor, ginlapas niya ini, nangayo sing bulig militar sa gumalahom sang Egipto, isa pa ka daku nga agila. Kon gingamit ni Zedequias ang ngalan sang Dios sa pagsumpa niya, ang paglapas sa sini nagdala sing pasipala kay Jehova. Ang panghunahuna nga pasipalahan ang Dios dapat magpugong sa aton gikan sa indi pagtuman sang aton pulong. Daku gid ang pribilehiyo naton nga dal-on ang balaan nga ngalan subong mga Saksi ni Jehova!​—⁠Ezequiel 17:​1-21.

 9, 10. (a) Anong tagna ang ginrekord sa Ezequiel 17:​22-24, apang ano ang himuon agod makabenepisyo kita gikan sa katumanan sini? (b) Sin-o ang responsable sa mga resulta sang aton paggawi?

⁹ Ang makalilipay nga Mesianikong tagna amo ang nagsunod. (Basaha ang Ezequiel 17:​22-24.) Diri, ang “ugbos gid” amo ang Mesianikong Hari, si Jesucristo. Gintanum ni Jehova sa langitnon nga Bukid sang Sion, sia mangin “matahom nga sedro,” ang tuburan sang pangamlig kag pagpakamaayo samtang nagagahom sia sa duta. (Bugna 14:⁠1) Magakalipay gid kita sa sini.

¹⁰ Apang, agod makabenepisyo kita gikan sa katumanan sang Mesianikong tagna, dapat naton huptan ang maayong kaangtanan kay Jehova. Ang kaupod nga mga bihag ni Ezequiel maathag nga naghunahuna nga may maayo sila nga tindog sa Dios kag ginbasol ang ila mga ginikanan bangod sang mga pag-antos nila. Apang ginpakita sang manalagna nga ang tagsa ka tawo amo ang responsable sa mga resulta sang iya kaugalingon nga paggawi. (Ezequiel 18:​1-29; ipaanggid ang Jeremias 31:​28-30.) Nagsunod ang pangabay. (Basaha ang Ezequiel 18:​30-32.) Huo, si Jehova maluluy-on sa mahinulsulon kag wala nagakalipay sa kamatayon ni bisan sin-o. Busa, ang Dios nagasiling: ‘Liso kamo kag magkabuhi.’​—⁠Ipaanggid ang 2 Pedro 3:⁠9.

11. Sa ano ginpaanggid ang mga gumalahom sang Juda, kag ano ang matabo sa iya kon lab-on sia sang “espada” ni Jehova?

¹¹ Sa isa ka masubo nga ambahanon tuhoy sa pagkapukan sang Juda, ang iya mga gumalahom ginpaanggid sa bataon nga mga leon. Si Hari Joacaz napatay nga bihag sa Egipto, si Joaquim gindakop ni Nabokodonosor, kag si Joaquin ginbihag pakadto sa Babilonia. Masunod nga ginbutang ni Nabokodonosor si Zedequias sa trono sang Juda, apang nagrebelde sia. Sang ulihi, kaangay sang nahawla nga leon, si Zedequias gindala nga bihag sa Babilonia. Nahisuno sa matagnaon nga masubo nga ambahanon, sang 607 B.C.E., ang Juda nangin nalaglag nga ubas, “kag sa bagay nga wala sa iya sing sanga nga mabakud, nga mangin setro sa paggahom.” Ginbuno sia sang “espada” ni Jehova!​—⁠Ezequiel 19:​1-14; Jeremias 39:​1-7.

12. (a) Kaangay sang ila mga ginikanan, sa anong sala nagpaduyog ang mga katubotubo ni Ezequiel? (b) Ano ang ginpamangkot sang katawhan kon bala si Ezequiel wala nagapamulong sang mga paanggid, kag anong paandam ang ginahatag sini para sa aton?

¹² Ginpalapitan sang “pila sang mga tigulang sang Israel,” si Ezequiel nagpamulong sang mensahe sang Dios. Ginpakita niya nga bisan pa ginluwas ni Jehova ang mga Israelinhon gikan sa Egipto kag ginhatag sa ila ang Iya Kasuguan, ginsikway nila ini kag nagbuhat sang idolatriya. Bangod ang mga katubotubo ni Ezequiel nakasala sing kaanggid nga sala, ang Dios magahukom batok sa ila. Sing maathag upod ang pangduhaduha kag indi bangod wala nila mahangpi ang buot silingon ni Ezequiel, ang katawhan namangkot: “Indi bala sia manugpamulong sang mga paanggid?” Nahibal-an nila sang ulihi nga wala gid sing paanggid nahanungod sa mensahe sang manalagna. Dapat ini magpaandam sa aton nga indi gid pagadoptahon ang nagapangduhaduha nga panimuot nahanungod sa katumanan sang Makasulatanhon nga mga paandam.​—⁠Ezequiel 20:​1-49.

Si Jehova nga Hangaway

13. Ang “espada” sang Dios nagalarawan sa ano, kag ano ang mahibaluan sang “tanan nga unod” kon ina nga espada ihana?

¹³ Sang ikapito nga tuig sang pagkabihag (sang Ab 10, 611 B.C.E.), wala pa duha ka tuig kag tunga ang nabilin antes nagsugod ang “inaway sang adlaw ni Jehova” batok sa Juda kag Jerusalem. (Ezequiel 13:5; 20:⁠1) Talupangda nian kon ano ang ginsiling ni Jehova nga Hangaway paagi kay Ezequiel. (Basaha ang Ezequiel 21:​1-5.) Ang “espada” sang Dios nagapatuhoy sa dutan-on nga ahensia nga gamiton niya, apang sarang ini maglakip sa iya langitnon, katulad kangga nga organisasyon. Ang “matarong” kag “malauton” nga mga pumuluyo sang Juda kag Israel, subong man ang mga pungsod nga may dimainabyanon nga balatyagon sa katawhan sang Dios, mahulog sa sulab sang “espada” sang Dios. Sa pagkamatuod, “ang tanan nga unod” makahibalo nga si Jehova nagapakig-away batok sa ila.

14. (a) Kaangay kay Ezequiel, ano ang ginapatalupangod sang mga hinaplas nga mga saksi ni Jehova? (b) Ano ang nagapakita nga ang mga gumalahom sang Cristiandad indi makapalagyo sa “espada” sang Dios?

¹⁴ Kaangay ni Ezequiel, ang hinaplas nga mga saksi ni Jehova karon nagatawag sang igtalupangod sa “espada” nga ginataya sang Dios batok sa mga sumalakdag sang Cristiandad, ang ginharian sini amo ang antitipiko nga “duta sang Israel.” Sa dili madugay ina nga “espada” mabatyagan sang “tanan nga unod kutob sa bagatnan pa aminhan,” sang tanan nga mga nagabuhat sang butig nga relihion. Ang mga nagasalig sa kaugalingon sang panahon ni Ezequiel wala sing rason nga magkasadya, naghinakop nga ang “espada” ni Jehova indi ‘magaorganisar sing pagpamatay’ batok sa ila. Ina nga “espada” nagtamay sang harianon nga setro sang ginharian sang Juda, subong nga gintamay sini ang tagsa ka iban pa nga “kahoy,” ukon setro. Sa pagkamatuod, nian, ang mga gumalahom sang Cristiandad indi makalampuwas sa ahensia sa pagpamatay sang Dios.​—⁠Ezequiel 21:​6-17.

15. Anong hitabo nga nagadalahig kay Nabokodonosor ang nagapakita nga wala sing bisan sin-o ang makapahigad sa “espada” ni Jehova?

¹⁵ Ang tagna ni Ezequiel padayon nga nagapakita nga wala sing isa, lakip ang mga demonyo, ang makapahigad sang “espada” ni Jehova. (Basaha ang Ezequiel 21:​18-22.) Bisan pa nga si Hari Nabokodonosor naghimo sing yawan-on nga pagpamakot, ginpat-od gid ni Jehova nga ang Babilonianhon nga gumalahom nagmartsa batok sa Jerusalem, indi batok sa mas maluya nga kapital sang Amonhon nga Raba. Gikan sa isa ka suludlan si Nabokodonosor magapili sing baslay nga gintigana para sa Jerusalem. Magagamit sia sing terafim (ayhan, magagmay nga mga diosdios sa dagway sang tawo) kag magapangita sing mga indikasyon sa atay sang ginpatay nga sapat. Apang, walay sapayan sang pagpamakot, magakadto sia sa kapital sang Judea kag magaagaw sini. Matuod, si Nabokodonosor nakigkatipan kay Hari Zedequias. Apang bangod sang ila pagbugto sa sumpa, si Zedequias kag ang iban pa nga mga Judiyo ‘gindakop sang kamot’ kag gindala nga bihag sa Babilonia.​—⁠Ezequiel 21:​23, 24.

16. (a) Ano ang natabo bilang katumanan sang Ezequiel 21:​25-27? (b) San-o nagsugod ang Panahon sang mga Gentil, kag upod sa anong hitabo ini natapos?

¹⁶ Bangod sang pagrebelde, si Zedequias napilas sa ikamatay. (Basaha ang Ezequiel 21:​25-27.) Sang ang hari sang Juda ginpahalin, ang harianon nga turbante kag purongpurong ginkuha. (2 Hari 25:​1-7) Ang “mataas” nga ginharian ang Juda ‘ginpaubos’ paagi sa paglaglag sa sini sang 607 B.C.E. Busa ang “kubos” nga Gentil nga mga pungsod ‘ginbayaw,’ naghimo sa ila nga makontrol ang duta nga wala sing pagpasilabot sang isa ka tipiko nga ginharian sang Dios. (Deuteronomio 28:​13, 15, 36, 43, 44) Gani nagsugod ang “gintangdo nga panag-on sang mga pungsod”​—⁠ang Panahon sang mga Gentil​—⁠nga natapos sang 1914 sang ginhatag sang Dios ang pagkahari kay Jesucristo, ‘ang isa nga may legal nga kinamatarong’ sa sini. (Lucas 21:​20-24; Salmo 110:​1, 2; Daniel 4:​15-28; 7:​13, 14) Upod kay Jesus sa langitnon nga trono, ang Gentil nga mga pungsod indi makatapak sa kon ano ang ginalarawan sang dumaan nga Jerusalem, ang Ginharian sang legal nga manunubli ni David.​—⁠Hebreo 12:⁠22.

17. Anong “dimatuod” ang ginsiling sang mga manalagna sang Amonhon?

¹⁷ Ang Amonhon nga mga manalagna nagsiling nga ang kapital sang Amon, ang Raba, indi malaglag sang espada ni Nabokodonosor. Apang “dimatuod” ini, kay ang bug-os nga duta sang Amon pagahapayon. Sa aton panahon, ang Dios nagsugo nga ang kalaglagan sang mga pungsod magasunod sa kalaglagan sang Cristiandad, subong nga ang Raba nalaglag pagkatapos sang Jerusalem.​—⁠Ezequiel 21:​28-32; Bugna 16:​14-16.

Ang Jerusalem Ginsumbong

18. Tungod sa anong mga sala ginpakamalaut ni Ezequiel ang Jerusalem, kag ano dapat ang reaksion naton sa sini?

¹⁸ Nagapamulong liwat sang pulong ni Jehova, ginpakamalaut ni Ezequiel ang Jerusalem bangod sang mga sala subong sang pagpatulo sang dugo, idolatriya, lugak nga paggawi, pangdaya, kag pagkalimot sa Dios. Ang iya nakasala sa dugo nga mga pangulo nag-abuso sang gahom tubtob sa punto sang hudisyal nga pagpatay, kag ang mga manugpasipala nagadula sang mga kaaway paagi sa pagsumbong sa ila sing dimatuod. Bangod sina nga sala, ang mga pumuluyo sang Jerusalem magaalaplaag. Ang paghibalo sini dapat magapabakud sang aton pamat-od nga likawan ang pag-abuso sa gahom, lugak nga paggawi, pasipala, kag iban pa grabe nga mga sala.​—⁠Ezequiel 22:​1-16.

19. Sa anong paagi ang katawhan sang Juda tunawon, kag ngaa ang paglaglag sa ila nagakaigo?

¹⁹ Tunawon man ni Jehova ang katawhan sang Juda sa hurnohan. Indi ini pagputli sa ila sa isa ka proseso sa pagdalisay kundi sa pagdugmok sa ila sa iya daku nga kasingkal. (Ezequiel 22:​17-22) Nagakabagay gid ini nga paghukom sa nagpuhon nga mga manalagna, malinapason nga mga saserdote, mahamkunon nga mga prinsipe, kag dimakatarunganon nga katawhan. Ang tanan ginpakamalaut. Sanglit wala sing isa ka tawo sa tunga nila ang nagtindog tungod sa pagkamatarong, ang Dios magalaglag sa ila sa kalayo sang iya kaalipungot.​—⁠Ezequiel 22:​23-31.

Ang Silot Nagakabagay

20. Sa anong malaragwayon nga mga babayi ibubo ang kaakig sang Dios, kag anong mga detalye ang ihatag mo nahanungod sa pagkilala sa ila?

²⁰ Ang pagbubo sang kaakig sang Dios masunod nga ginrepresentar subong paghukom batok sa duha ka simbuliko nga babayi nga nakasala sing espirituwal nga panglahi. Ang isa amo si Ohola, ang napulo ka tribo nga ginharian sang Israel upod ang Samaria subong ang kapital niya. Sia amo ang “magulang” bangod kay nahuman sang kalabanan nga mga tribo sang Israel, lakip ang naghalin sa kaliwat sang kamagulangan nga mga anak ni Jacob, sanday Ruben kag Simeon. Ang iya utod amo si Oholiba, ang duha ka tribo sang Juda upod ang Jerusalem subong kapital niya. Ang Ohola nagakahulugan sing “Iya Kayangkayang.” Ang Oholiba nagakahulugan sing “Ang Akon Kayangkayang Yara sa Iya,” nga nagakaigo bangod ang kayangkayang, ukon templo sang Dios, yara sa Juda.​—⁠Ezequiel 23:​1-4.

21. Sa ano si Ohola nangita sing kalig-onan, naghatag sang ano nga paandam para sa aton?

²¹ Si Ohola (Israel) wala na magluntad sang ginpukan sia sang mga Asiriahanon sang 740 B.C.E. Ano ang ginhimo niya? (Basaha ang Ezequiel 23:​5-7.) Si Ohola dimatutom nga nangita sing kalig-onan sa mga kaalyado sa politika, apang nagdul-ong ini sa pag-adoptar niya sa butig nga pagsimba sang iya mga kaalyado, amo kon ngaa ‘gindagtaan niya ang iya kaugalingon sang ila mga diosdios.’ Nagakuha sing paandam gikan sa espirituwal nga panglahi ni Ohola, dapat kita mag-andam batok sa kalibutanon nga pagpakig-abyan nga nagalaglag sang aton pagtuo.​—⁠Santiago 4:4; 1 Juan 2:​15-17.

22. Kaangay kanday Ohola kag Oholiba, ano ang ginahimo sang Cristiandad, apang ano ang matabo sa iya?

²² Bangod sang paghimo sang mas makasasala nga dalanon sang sa utod niya, si Oholiba (Juda) nag-agom sing pungsodnon nga kapahamakan sa mga kamot sang Babilonianhon sang 607 B.C.E. Ang iya kabataan nahulog sa espada ukon gindala nga bihag, kag ginpakahuy-an sia sa tunga sang mga pungsod. Kaangay kanday Ohola kag Oholiba, ang Cristiandad naghimo sing espirituwal nga panglahi, isa ka sala sa itotolok sang Dios nga ginaangkon niya nga ginasimba. Ang Protestantismo, upod sang iya madamong denominasyon, nagdagta sang iya kaugalingon sang komersial kag politikal nga mga kagamhanan sang kalibutan nga mas labi pa sang sa iya magulang nga utod, ang Romano nga Katolisismo. Busa, siguraduhon gid ni Jehova nga ang tanan nga Cristiandad malaglag. Nian makilala sang katawhan nga sia amo ang Soberanong Ginuong si Jehova. Magapabakud ini sang aton pamat-od nga likawan ang kalibutanon nga pagpakig-abyan kon ginadumdom naton nga ang mga kaupdanan sang Cristiandad magabalikid sa ulihi sa iya kag magatuman sang pamatbat sang Dios sa iya subong ang panguna nga bahin sang Babilonia nga Daku, ang bug-os kalibutan nga emperyo sang butig nga relihion.​—⁠Ezequiel 23:​8-49; Bugna 17:​1-6, 15-18.

Mga Salimpapaw Nakibot

23. Paano ang Jerusalem ginrepresentar sa mensahe sang Dios kay Ezequiel sang talipuspusan sang Disiembre sang 609 B.C.E., kag ano ang matabo sa iya?

²³ Sa adlaw mismo sang talipuspusan sang Disiembre nga ginsugdan ni Nabokodonosor ang iya 18-ka-bulan nga paglikop sa Jerusalem (Tebeth 10, 609 B.C.E.), ginhatagan sang Dios si Ezequiel sing isa pa ka buhi nga mensahe. Sa sini, ang ginlikupan nga Jerusalem ginlaragway subong sang kawa nga sa ini ang mga pumuluyo sang siudad ‘pabukalan.’ Ang kahigkuan sa moral nagtuga sing “tuktuk” sa sinang malaragwayon nga kawa. “Ang tagsa ka hiwa,” ang mga makasasala haw-ason gikan sa Jerusalem kag ang iya kailo indi matapos tubtob malaglag sia. Ginhukman ni Jehova ang Jerusalem suno sa iya malaut nga mga buhat, kag dapat sia laglagon, subong nga ang Cristiandad dapat man laglagon.​—⁠Ezequiel 24:​1-14.

24. (a) Ngaa si Ezequiel wala magpakita sing kasubo sang mapatay ang iya asawa? (b) Kon ang “espada” ni Jehova itaya sa iya, ano ang reaksion sang Cristiandad, kag ano ang kilalahon niya?

²⁴ Masunod, si Ezequiel magahulag sa dikinaandan nga paagi. (Basaha ang Ezequiel 24:​15-18.) Ngaa ang manalagna indi dapat magpakita sing kasubo sang mapatay ang iya asawa? Agod ipakita kon daw ano ang kakibot sang mga Judiyo sa pagkalaglag sang Jerusalem, sang iya mga pumuluyo, kag sang templo. Bastante na ang ginsiling ni Ezequiel nahanungod sina nga butang kag indi sia liwat magpamulong sang mensahe sang Dios tubtob nga ang pagkapukan sang Jerusalem ginbalita sa iya. Sing kaanggid, ang Cristiandad kag ang iya salimpapaw nga mga relihionista makibot sa panahon sang ila kalaglagan. Kag pagkatapos magsugod ang “dakung kapipit-an,” ang ginsiling sang hinaplas nga manugbantay nga klase nahanungod sa iya katapusan mangin bastante na. (Mateo 24:21) Apang kon ang “espada” sang Dios itaya sa Cristiandad, inang nakibot nga mga relihionista kag ang iban pa ‘makakilala nga sia amo si Jehova.’​—⁠Ezequiel 24:​19-27.

Paano Mo Sabton?

◻ Ano ang natabo sang gintaya ni Jehova ang iya “espada” batok sa Juda kag Israel?

◻ Paano kita dapat maapektuhan sang paglapas ni Zedequias sa iya sumpa kay Nabokodonosor?

◻ Ano ang kahulugan sang “espada” sang Dios?

◻ Ano nga hitabo nga nagadalahig kay Nabokodonosor ang nagapakita nga wala sing bisan sin-o ang makapahigad sang “espada” ni Jehova?

◻ Ano ang natabo sa katumanan sang Ezequiel 21:​25-27?

◻ Ano ang ginalandong sang indi pagpakita ni Ezequiel sing kasubo sang mapatay ang iya asawa?

[Laragway sa pahina 18]

Sang ginlapas ni Hari Zedequias ang iya sumpa kay Nabokodonosor kag gindala nga bihag, ano nga tagna ang nagsugod nga matuman?