Kon Paano Kita Ginabuligan ni Jehova sa Aton Pagbantala

1. Ano ang mapaabot naton, pero sa ano kita makasalig?

MAPAABOT naton nga pamatukan kita sa aton pagbantala. Kag posible nga mas magagrabe pa gid ini sa ulihi. (Dan. 11:44; 2 Tim. 3:12; Bug. 16:21) Pero makasalig kita nga buligan kita ni Jehova. Ngaa masiling naton ini? Kay amo man sini ang ginhimo ni Jehova sa iya mga alagad sang una. Ginbuligan niya sila nga matuman ang ginsugo niya sa ila bisan pa mabudlay ini katama. Halimbawa, binagbinagon naton ang mga natabo sa kabuhi ni manalagna Ezequiel sang nagbantala sia sa mga Judiyo nga ginbihag sa Babilonia.

2. Ano ang ginsiling ni Jehova parte sa mga tawo nga bantalaan ni Ezequiel, kag ano ang binagbinagon naton sa sini nga artikulo? (Ezequiel 2:3-6)

² Ano nga klase sang mga tawo ang bantalaan ni Ezequiel? Nagsiling si Jehova nga mga “mabinatuon” sila, “matig-a sing tagipusuon,” kag “rebelyuso.” Makahalit sila pareho sa mga siit kag delikado gid sila pareho sa mga iwiiwi. Bangod sini, sulitsulit nga ginsilingan ni Jehova si Ezequiel: “Indi ka magkahadlok.” (Basaha ang Ezequiel 2:3-6.) Natuman ni Ezequiel ang sugo sa iya nga magbantala bangod (1) ginpadala sia ni Jehova, (2) ginpabakod sia sang espiritu sang Dios, kag (3) ginpalig-on sia sang pulong sang Dios. Paano ini nakabulig kay Ezequiel? Kag paano ini makabulig sa aton subong?

3. Ano ang ginsiling kay Ezequiel nga nagpabakod sa iya, kag ano ang madamo nga beses nga ginsiling ni Jehova nga nagpasalig sa iya nga buligan sia ni Jehova?

³ Ginsilingan ni Jehova si Ezequiel: “Ipadala ko ikaw.” (Ezeq. 2:3, 4) Sigurado nga nagpabakod gid ini kay Ezequiel. Ngaa? Posible gid nga nadumduman ni Ezequiel nga daw pareho man sini ang ginsiling ni Jehova kay Moises kag kay Isaias sang ginpili Niya sila nga mangin mga manalagna. (Ex. 3:10; Isa. 6:8) Kabalo man si Ezequiel nga ginbuligan ni Jehova ining duha ka manalagna para matuman nila ang ila mabudlay nga asaynment. Gani sang duha ka beses nga ginsilingan ni Jehova si Ezequiel nga “ipadala ko ikaw,” mas nagsalig pa gid sia nga buligan sia ni Jehova. Dugang pa, sa libro sang Ezequiel, madamo nga beses nga mabasa naton nga nagsiling si Ezequiel: “Si Jehova nagsiling sa akon.” (Ezeq. 3:16) Kag madamo nga beses nga nagsiling sia: “Nagsiling pa si Jehova sa akon.” (Ezeq. 6:1) Gani, sigurado gid si Ezequiel nga ginpadala sia ni Jehova. Kag bangod isa ka saserdote ang amay ni Ezequiel, posible nga gintudluan sia sang iya amay nga pirme ginasilingan ni Jehova ang iya mga manalagna nga buligan Niya sila. Halimbawa, ginsilingan ni Jehova si Isaac, si Jacob, kag si Jeremias: “Kaupod mo ako.”—Gen. 26:24; 28:15; Jer. 1:8.

4. Ano ang nagpabakod kay Ezequiel nga tumanon ang sugo sa iya nga magbantala?

⁴ Ano ang mangin reaksion sang kalabanan nga mga Israelinhon sa pagbantala ni Ezequiel? Si Jehova nagsiling: “Ang panimalay sang Israel indi luyag magpamati sa imo, kay indi nila luyag magpamati sa akon.” (Ezeq. 3:7) Gani indi pagpamatian sang katawhan si Ezequiel. Pero ang matuod, si Jehova ang indi nila pagpamatian. Napalig-on gid si Ezequiel sa ginsiling ni Jehova. Ginapahangop sini nga bisan pa indi sia pagpamatian sang mga tawo, indi buot silingon nga wala niya natuman ang ginsugo sa iya bilang manalagna. Ginpalig-on man ni Jehova si Ezequiel nga kon matuman na ang paghukom nga iya ginbantala, “mahibaluan [sang mga tawo] nga may manalagna sa tunga nila.” (Ezeq. 2:5; 33:33) Sigurado nga napabakod gid si Ezequiel nga tumanon ang sugo sa iya nga magbantala.

5. Ano ang ginsiling sang Isaias 44:8 nga nagapabakod sa aton?

⁵ Napabakod man kita bangod kabalo kita nga ginpadala kita ni Jehova. Ginpadunggan niya kita paagi sa pagtawag sa aton nga iya “mga saksi.” (Isa. 43:10) Daku gid ini nga kadungganan para sa aton. Ginsilingan ni Jehova si Ezequiel: “Indi ka magkahadlok.” Pareho kay Ezequiel, ginasilingan man kita ni Jehova: “Indi kamo magkahadlok.” Ngaa indi kita dapat mahadlok sa mga nagapamatok sa aton? Bangod pareho kay Ezequiel, ginpadala man kita ni Jehova kag ginabuligan Niya kita.—Basaha ang Isaias 44:8.

6. (a) Ano ang ginsiling ni Jehova nga nagapasalig sa aton nga buligan niya kita? (b) Ano ang nagapalig-on sa aton?

⁶ Nagpromisa si Jehova nga buligan niya kita. Halimbawa, antes nagsiling si Jehova nga “kamo ang akon mga saksi,” nagsiling sia: “Kon magtabok ka sa katubigan, magaupod ako sa imo, kag kon mag-agi ka sa mga suba, indi ka malumos. Kon maglakat ka sa kalayo, indi ka mapaso, ukon masunog sa dabdab.” (Isa. 43:2) Kon nagabantala kita, makaeksperiensia kita kon kaisa sang mga problema nga daw pareho sa baha, kag sang grabe nga mga kabudlayan nga daw pareho sa kalayo. Pero bisan pa sini, nagapadayon kita gihapon sa pagbantala kay ginabuligan kita ni Jehova. (Isa. 41:13) Pareho sang panahon ni Ezequiel, ang kalabanan nga tawo subong wala man nagapamati sa aton mensahe. Pero bisan pa wala nila ginapamatian ang aton mensahe, indi buot silingon sini nga wala naton natuman ang sugo sa aton nga magbantala. Bangod kabalo kita nga nalipay si Jehova kon padayon naton nga ginabantala ang iya mensahe, nagapalig-on gid ini sa aton. Si apostol Pablo nagsiling: “Ang kada tawo magabaton sing padya suno sa iya binuhatan.” (1 Cor. 3:8; 4:1, 2) Ang isa ka madugay na nga payunir nga sister nagsiling: “Nalipay ako kay ginapadyaan ni Jehova ang aton mga panikasog.”

7. Sa kada tion nga ginapamensar ni Ezequiel ang palanan-awon nga iya nakita, ano ang iya nabatyagan? (Tan-awa ang piktyur sa kober.)

⁷ Nakita ni Ezequiel nga gamhanan gid ang espiritu sang Dios. Sa palanan-awon, nakita ni Ezequiel nga ginabuligan sang balaan nga espiritu ang gamhanan nga mga anghel kag ginapahulag sini ang dalagku nga mga ruweda sang langitnon nga kangga. (Ezeq. 1:20, 21) Ano ang reaksion ni Ezequiel? Ginsugid niya ang natabo. “Sang makita ko ini, naghapa ako.” Nagdayaw gid si Ezequiel sa iya nakita amo nga naghapa sia. (Ezeq. 1:28) Sang ulihi, sa kada tion nga ginapamensar ni Ezequiel ini nga palanan-awon, sigurado nga nagapalig-on ini sa iya nga tumanon ang sugo sa iya nga magbantala kay kabalo sia nga buligan sia sang espiritu sang Dios.

8-9. (a) Ano ang natabo kay Ezequiel sang ginsugo sia ni Jehova nga “magtindog”? (b) Paano pa gid ginpabakod ni Jehova si Ezequiel nga bantalaan ang batinggilan nga mga tawo?

⁸ Ginsugo ni Jehova si Ezequiel: “Anak sang tawo, magtindog ka kay may ihambal ako sa imo.” Sang ginsugo ni Jehova si Ezequiel nga magtindog, napabakod sia nga magtindog paagi sa bulig sang espiritu sang Dios. Nagsiling si Ezequiel: “Napuno ako sang espiritu kag ginpatindog ako sini.” (Ezeq. 2:1, 2) Sa tanan nga tion nga nagbantala si Ezequiel, gintuytuyan sia sang “kamot” sang Dios nga amo ang balaan nga espiritu sang Dios. (Ezeq. 3:22; 8:1; 33:22; 37:1; 40:1) Ginpabakod sang balaan nga espiritu sang Dios si Ezequiel para matuman niya ang sugo sa iya nga bantalaan ang mga tawo nga “batinggilan kag matig-a sing tagipusuon.” (Ezeq. 3:7) Ginsilingan ni Jehova si Ezequiel: “Ginpatig-a ko ang imo nawong kaangay sang ila nawong kag ang imo agtang kaangay sang ila agtang. Ginhimo ko ang imo agtang kaangay sang diamante, nga mas matig-a sangsa bato bantiling. Indi ka magkahadlok sa ila, kag indi ka magkakugmat sa ila nawong.” (Ezeq. 3:8, 9) Daw pareho lang nga ginsilingan ni Jehova si Ezequiel: ‘Indi ka dapat maluyahan sang buot bisan pa batinggilan ang mga tawo. Pabakuron ko ikaw.’

⁹ Pagkatapos sini, gindala sang espiritu sang Dios si Ezequiel sa mga tawo nga iya bantalaan. “Ang gahom ni Jehova mabaskog sa akon,” siling ni Ezequiel. Isa ka semana pa ang nagligad antes nahangpan sing maayo ni Ezequiel ang mensahe nga iya ibantala. (Ezeq. 3:14, 15) Dayon ginsugo sia ni Jehova nga magkadto sa nalupyakan kag didto “napuno [sia] sang espiritu.” (Ezeq. 3:23, 24) Handa na si Ezequiel nga magbantala.

10. Ano ang makabulig sa aton nga matuman ang sugo sa aton nga magbantala, kag ngaa?

¹⁰ Ano ang makabulig sa aton nga matuman ang sugo sa aton nga magbantala? Para masabat ini, hunahunaa ang natabo kay Ezequiel. Antes sang iya pagbantala, ginhatagan sia sang espiritu sang Dios sing kusog. Pareho kay Ezequiel, matuman lamang naton ang sugo sa aton nga magbantala paagi sa bulig sang espiritu sang Dios. Ngaa? Bangod nagapakig-away si Satanas sa aton para pauntaton kita sa aton pagbantala. (Bug. 12:17) Madamo nga tawo ang nagahunahuna nga indi naton mapierde si Satanas bangod gamhanan sia. Pero mapierde naton sia paagi sa aton pagbantala. (Bug. 12:9-11) Paano? Kon nagabantala kita, ginapakita naton nga wala kita nahadlok sa mga pamahog ni Satanas. Sa kada tion nga nagabantala kita, ginapakita sini nga napierde naton si Satanas. Gani ano ang masiling naton kay padayon kita nga nagabantala bisan pa ginapamatukan kita? Masiling gid naton nga ginapabakod kita sang balaan nga espiritu kag nalipay gid si Jehova sa aton.—Mat. 5:10-12; 1 Ped. 4:14.

11. Ano ang mahimo sang espiritu sang Dios para sa aton, kag ano ang himuon naton para padayon naton ini nga mabaton?

¹¹ Ano naman ang matun-an naton sa malaragwayon nga ginsiling ni Jehova nga ginpatig-a niya ang nawong kag agtang ni Ezequiel? Matun-an naton sa sini nga hatagan kita sang espiritu sang Dios sing kusog para mabatas naton ang bisan ano nga kabudlayan sa aton pagbantala. (2 Cor. 4:7-9) Ano ang himuon naton para padayon naton nga mabaton ang espiritu sang Dios? Dapat pirme naton ini ipangamuyo kag magsalig nga pamatian ni Jehova ang aton mga pangamuyo. Gintudluan ni Jesus ang iya mga disipulo: “Padayon kamo sa pagpangayo, . . . padayon kamo sa pagpangita, . . . padayon kamo sa pagpanuktok.” Sabton ini ni Jehova paagi sa ‘paghatag sang iya balaan nga espiritu sa mga nagapangayo sa iya.’—Luc. 11:9, 13; Binu. 1:14; 2:4.

12. Suno sa Ezequiel 2:9–3:3, diin naghalin ang linukot kag ano ang nasulat sa sini?

¹² Magluwas nga ginpabakod sang espiritu sang Dios si Ezequiel, ginpalig-on man sia sang pulong sang Dios. Nakita ni Ezequiel sa palanan-awon ang isa ka kamot nga may ginauyatan nga linukot. (Basaha ang Ezequiel 2:9–3:3.) Diin naghalin ang linukot? Ano ang nasulat sa sini? Paano ini nagpalig-on kay Ezequiel? Hibaluon naton. Ang linukot naghalin sa trono sang Dios. Posible nga gingamit ni Jehova ang isa sa apat ka anghel nga nakita ni Ezequiel para iduhol sa iya ang linukot. (Ezeq. 1:8; 10:7, 20) Nasulat sa linukot ang pulong sang Dios, kag parte ini sa malawig nga mensahe sang paghukom nga ibantala ni Ezequiel sa rebelyuso nga mga bihag. (Ezeq. 2:7) Nasulat ang mensahe sa atubang kag sa likod sang linukot.

13. Ano ang ginsugo ni Jehova kay Ezequiel nga himuon niya sa linukot, kag ngaa matam-is ini?

¹³ Ginsugo ni Jehova ang iya manalagna nga kaunon ang linukot kag ‘pun-on niya sini ang iya tiyan.’ Gintuman ini ni Ezequiel kag ginkaon niya ang bilog nga linukot. Ano ang buot silingon sini? Dapat mahangpan sing maayo ni Ezequiel ang mensahe nga iya ibantala. Dapat nga kumbinsido gid sia sa mensahe kay magapalig-on ini sa iya nga magbantala. Nakibot gid si Ezequiel kay ang linukot “matam-is . . . kaangay sang dugos.” (Ezeq. 3:3) Ngaa matam-is ini? Kay para kay Ezequiel, matam-is ukon makalilipay gid nga mangin representante ni Jehova. (Sal. 19:8-11) Nalipay gid sia kay ginpili sia ni Jehova nga mangin iya manalagna.

14. Ano ang nakabulig kay Ezequiel nga tumanon ang sugo sa iya nga magbantala?

¹⁴ Sang ulihi, ginsilingan ni Jehova si Ezequiel: “Pamatii sing maayo ang tanan nga isiling ko sa imo kag hupti ini sa imo tagipusuon.” (Ezeq. 3:10) Ginsugo ni Jehova si Ezequiel nga sauluhon ang mga nasulat sa linukot kag pamalandungan ini. Napalig-on gid si Ezequiel sang ginhimo niya ini. Nabal-an man niya ang importante nga mensahe nga ibantala niya sa mga tawo. (Ezeq. 3:11) Sang nahangpan na sing maayo ni Ezequiel ang mensahe sang Dios kag kumbinsido gid sia sa sini, handa na sia nga tumanon kag tapuson ang sugo sa iya nga magbantala.—Ipaanggid ang Salmo 19:14.

15. Para makapadayon kita sa aton pagbantala, ano ang dapat naton ‘huptan sa aton tagipusuon’?

¹⁵ Importante gid nga palig-unon man naton ang aton pagtuo paagi sa pulong sang Dios para makapadayon kita sa aton pagbantala. Dapat naton ‘huptan sa aton tagipusuon’ ang tanan nga ginahambal ni Jehova sa aton. Subong, nagapakighambal sa aton si Jehova paagi sa iya Pulong, ang Biblia. Ano ang himuon naton para masigurado naton nga ginagiyahan sang Pulong sang Dios ang aton mga ginahunahuna, ginabatyag, kag ginahimo?

16. Ano ang himuon naton sa Pulong sang Dios, kag ano ang himuon naton para mahangpan naton ini sing maayo?

¹⁶ Kon nagakaon kita kag matunaw na ang aton ginkaon, nagabakod ang aton lawas. Amo man sini sa Pulong sang Dios. Kon basahon naton ini kag pamalandungan, magabakod man ukon magalig-on ang aton pagtuo. Dapat naton dumdumon ang leksion parte sa linukot. Gusto ni Jehova nga ‘pun-on naton ang aton tiyan’ sang Pulong sang Dios. Buot silingon, dapat naton ini mahangpan sing maayo. Makabulig sa aton ang pagpangamuyo, pagbasa, kag pagpamalandong. Una, nagapangamuyo kita para batunon sang aton tagipusuon ang ginatudlo sang Dios. Sunod, ginabasa naton ang Biblia. Dayon, nagauntat kita sa pagbasa para pamalandungan ukon hunahunaon sing maayo ang aton nabasahan. Ano ang resulta sini? Kon pirme kita nagapamalandong, mas mahangpan naton ang Pulong sang Dios. Bangod sini, magabakod pa gid ang aton pagtuo.

17. Ngaa dapat naton pamalandungan ang aton nabasahan sa Biblia?

¹⁷ Ngaa dapat naton basahon ang Biblia kag pamalandungan ini? Kay magapalig-on ini sa aton nga ibantala ang mensahe sang Ginharian subong. Magapalig-on man ini sa aton kon ibantala na naton sa ulihi ang masakit pamatian nga mensahe sang paghukom. Dugang pa, kon ginapamalandungan naton ang matahom nga mga kinaiya ni Jehova, mas nagabakod pa gid ang aton kaangtanan sa iya. Dayon mangin malinong ang aton hunahuna kag mangin kontento kita. Matam-is gid ini ukon makalilipay nga balatyagon.—Sal. 119:103.

18. Ano ang marealisar sang mga tawo sa aton teritoryo, kag ngaa?

¹⁸ Indi kita pareho kay Ezequiel nga isa ka manalagna. Pero, determinado gid kita nga padayon nga ibantala ang mensahe nga ginpasulat ni Jehova sa iya Pulong asta magsiling sia nga tapos na ini nga hilikuton. Kon mag-abot na ang adlaw sang paghukom, indi gid makasiling ang mga tawo sa aton teritoryo nga wala sila ginpaandaman ukon ginbalewala sila sang Dios. (Ezeq. 3:19; 18:23) Sa baylo, marealisar nila nga ang mensahe nga aton ginabantala naghalin gid sa Dios.

19. Ano ang magapabakod sa aton nga tumanon ang sugo sa aton nga magbantala?

¹⁹ Ano ang magapabakod sa aton nga tumanon ang sugo sa aton nga magbantala? Ang tatlo ka butang nga nagpabakod man kay Ezequiel. Nagapadayon kita sa pagbantala bangod kabalo kita nga ginpadala kita ni Jehova, ginapabakod kita sang espiritu sang Dios, kag ginapalig-on kita sang Pulong sang Dios. Paagi sa bulig ni Jehova, makapadayon kita sa pagbantala kag makabatas kita “tubtob sa katapusan.”—Mat. 24:13.