LEKSION 32
Nagagahom Na ang Ginharian sang Dios!
Ang Ginharian sang Dios nagsugod sa paggahom sa langit sang 1914. Sa sina man nga tion, nagsugod ang katapusan nga mga adlaw sang paggahom sang tawo. Ngaa masiling naton ina? Binagbinaga ang tagna sa Biblia kag ang mga sitwasyon kag batasan sang mga tawo nga makita gid sugod sang 1914.
1. Ano ang gintagna sang Biblia?
Ang libro sang Daniel sa Biblia nagsiling nga ang Ginharian sang Dios magasugod sa paggahom sa katapusan sang ginatawag nga “pito ka tion.” (Daniel 4:16, 17) Ginatos ka tuig sang ulihi, ini nga tion gintawag ni Jesus nga “gintalana nga mga tion sang mga pungsod,” kag nagsiling sia nga wala pa ini matapos. (Lucas 21:24) Matun-an naton subong nga ang pito ka tion natapos sang 1914.
2. Ano nga mga sitwasyon kag batasan sang mga tawo ang makita gid sugod sang 1914?
Ang mga disipulo ni Jesus namangkot sa iya: “Ano bala ang tanda sang imo presensia kag sang hingapusan sang sistema sang mga butang?” (Mateo 24:3) Bilang sabat, ginsugid ni Jesus ang mga matabo kon magsugod na sia sa paggahom bilang Hari sa Ginharian sang Dios sa langit. Lakip sa sini ang inaway, kakulang sa pagkaon, kag mga linog. (Basaha ang Mateo 24:7.) Gintagna man sang Biblia nga ang batasan sang mga tawo sa “katapusan nga mga adlaw” magapabudlay sang aton kabuhi. (2 Timoteo 3:1-5) Ini nga mga sitwasyon kag mga batasan makita gid sugod sang 1914.
3. Ngaa naglala pa gid ang sitwasyon sugod sang naggahom ang Ginharian sang Dios?
Wala madugay pagkatapos nga nangin Hari si Jesus sang Ginharian sang Dios, nakig-away sia kay Satanas kag sa mga demonyo sa langit. Napierde si Satanas. Ang Biblia nagasiling nga “gintagbong sia sa duta upod ang iya mga anghel.” (Bugna 12:9, 10, 12) Akig gid si Satanas kay kabalo sia nga laglagon sia sa ulihi. Gani ginapaantos niya ang mga tawo sa duta. Amo kon ngaa naglala pa gid ang sitwasyon sa kalibutan. Pero dulaon sang Ginharian sang Dios ining tanan nga problema.
USISAA PA GID
Usisaon naton kon ngaa makasiling kita nga ang Ginharian nagsugod sa paggahom sang 1914 kag kon ano dapat ang epekto sini sa aton.
4. Ang kronolohiya sa Biblia nagapamatuod sang 1914
Ginpadamgo sang Dios si Hari Nabocodonosor sang Babilonia sang isa ka tagna. Ina nga damgo kag ang kahulugan nga ginhatag ni Daniel nagapakita nga may duha ini ka katumanan—sa paggahom ni Nabocodonosor kag sa Ginharian sang Dios.—Basaha ang Daniel 4:17.a
Basaha ang Daniel 4:20-26, dayon gamita ang tsart para masabat mo ang masunod nga mga pamangkot:
(A) Ano ang nakita ni Nabocodonosor sa iya damgo?—Tan-awa ang bersikulo 20 kag 21.
(B) Ano ang matabo sa kahoy? —Tan-awa ang bersikulo 23.
(C) Ano ang matabo sa tapos sang “pito ka tion”?—Tan-awa ang bersikulo 26.
Kon Paano ang Kahoy sa Damgo Naangot sa Ginharian sang Dios
ANG TAGNA (Daniel 4:20-36)
Paggahom
(A) Ang tama kadaku nga kahoy
Nauntat ang paggahom
(B) “Tapsa ang kahoy,” kag “pabay-i . . . sa sulod sang pito ka tion”
Naggahom liwat
(C) “Ibalik sa imo ang imo ginharian”
Sa una nga katumanan sini nga tagna . . .
(D) Sin-o ang ginarepresentar sang kahoy? —Tan-awa ang bersikulo 22.
(E) Paano nauntat ang iya paggahom?—Basaha ang Daniel 4:29-33.
(F) Ano ang natabo kay Nabocodonosor sa tapos sang “pito ka tion”?—Basaha ang Daniel 4:34-36.
UNA NGA KATUMANAN
Paggahom
(D) Si Nabocodonosor nga Hari sang Babilonia
Nauntat ang paggahom
(E) Pagkatapos sang 606 B.C.E., nagbuang si Nabocodonosor kag nag-untat sa paggahom sa sulod sang pito ka literal nga tuig
Naggahom liwat
(F) Nag-ayo si Nabocodonosor kag naggahom liwat
Sa ikaduha nga katumanan sini nga tagna . . .
(G) Sin-o ang ginarepresentar sang kahoy?—Basaha ang 1 Cronica 29:23.
(H) Paano nauntat ang ila paggahom? Ngaa makasiling kita nga wala pa sila naggahom liwat sang ari si Jesus sa duta?—Basaha ang Lucas 21:24.
(I) San-o kag diin ini naggahom liwat?
IKADUHA NGA KATUMANAN
Paggahom
(G) Ang mga hari sang Israel nga nagarepresentar sa paggahom sang Dios
Nauntat ang paggahom
(H) Nalaglag ang Jerusalem, kag nautod ang linya sang mga hari sang Israel sa sulod sang 2,520 ka tuig
Naggahom liwat
(I) Nagsugod sa paggahom si Jesus sa langit bilang Hari sang Ginharian sang Dios
Ano kalawig ang pito ka tion?
Ang pila ka bahin sang Biblia nagabulig sa aton nga maintiendihan ang iban nga bahin sini. Halimbawa, ang libro sang Bugna sa Biblia nagsiling nga ang tatlo ka tion kag tunga katumbas sang 1,260 ka adlaw. (Bugna 12:6, 14) Gani ang pito ka tion doble sina nga numero, ukon 2,520 ka adlaw. Sa Biblia, kon kaisa ang isa ka adlaw nagarepresentar sa isa ka tuig. (Ezequiel 4:6) Amo sina ang pito ka tion nga mabasa sa libro sang Daniel, nagarepresentar ini sing 2,520 ka tuig.
5. Nagbag-o ang kalibutan sugod sang 1914
Gintagna ni Jesus ang mangin sitwasyon sang kalibutan kon maghari na sia. Basaha ang Lucas 21:9-11, dayon binagbinaga ini nga pamangkot:
Diin sa sini ang nakita mo ukon nabatian nga nagakatabo?
Ginsugid ni apostol Pablo ang mangin batasan sang mga tawo sa katapusan nga mga adlaw sang paggahom sang tawo. Basaha ang 2 Timoteo 3:1-5, dayon binagbinaga ini nga pamangkot:
Diin sa sini nga mga batasan ang nakita mo sa mga tawo subong?
6. Ang dapat naton himuon kay nagagahom na ang Ginharian sang Dios
Basaha ang Mateo 24:3, 14, dayon binagbinaga ini nga mga pamangkot:
Ano ang importante nga ginahimo subong nga nagapakita nga nagagahom na ang Ginharian sang Dios?
Ano ang himuon mo para makabantala ka man?
Nagagahom na ang Ginharian sang Dios, kag malapit na nga gamhan sini ang bilog nga duta. Basaha ang Hebreo 10:24, 25, dayon binagbinaga ini nga pamangkot:
Ano ang dapat naton himuon samtang ‘nakita naton nga malapit na ang adlaw’?
Kon may natun-an ka nga makabulig kag makaluwas sa iban, ano ang himuon mo?
KON PAMANGKUTON KA: “Ngaa pirme mabatian sa mga Saksi ni Jehova ang parte sa 1914?”
Ano ang isabat mo?
SUMARYO
Ang tagna sa Biblia, kronolohiya, kag ang sitwasyon sa kalibutan nagapamatuod nga nagagahom na ang Ginharian sang Dios. Mapakita naton nga nagapati kita sa sini kon ginabantala naton ini kag nagatambong kita sa mga miting sang kongregasyon.
Rebyu
Ano ang natabo sa tapos sang pito ka tion nga gintagna sa Biblia sa libro sang Daniel?
Ngaa kumbinsido ka nga ang Ginharian sang Dios nagsugod sa paggahom sang 1914?
Paano mo mapakita nga nagapati ka nga nagagahom na ang Ginharian?
DUGANG NGA IMPORMASYON
Hibalua kon ano ang ginasiling sang mga historian kag sang iban parte sa mga pagbag-o sa kalibutan sugod sang 1914.
“Sang Hinali Lang nga Nagnubo ang Moralidad” (Magmata!, Abril 2007)
Basaha kon ano ang epekto sang tagna sa Mateo 24:14 sa kabuhi sang isa ka tawo.
“Mas Importante sa Akon ang Baseball!” (Ang Lalantawan Num. 3 2017)
Ngaa makasiling kita nga ang tagna sa Daniel kapitulo 4 natuman sa Ginharian sang Dios?
“San-o Nagsugod sa Paggahom ang Ginharian sang Dios? (Bahin 1)” (Ang Lalantawan, Oktubre 1, 2014)
Ano ang pamatuod nga ang “pito ka tion” nga ginsiling sa Daniel kapitulo 4 natapos sang 1914?
“San-o Nagsugod sa Paggahom ang Ginharian sang Dios? (Bahin 2)” (Ang Lalantawan, Nobiembre 1, 2014)
a Tan-awa ang katapusan nga duha ka artikulo sa seksion nga Dugang nga Impormasyon sa sini nga leksion.