Nagabalhin ang Pagginahom sa Kalibutan

KON ikaw ang papilion, sa idalom sang anong sahi sang gobierno luyag mo magkabuhi? Ayhan pilion sang kalabanan sa aton ang isa ka malig-on nga gobierno nga nagahatag sing makatarunganon nga personal nga kahilwayan. Luyag naton ang isa ka gobierno nga makatapna sa krimen, makasakdag sa paghidait, makapauswag sa sosyal nga hustisya, kag makapalambo sa materyal nga kabuganaan. Sa pagkamatuod, pakamaayuhon naton ang isa ka gobierno nga indi mapiguson ukon malaut.

Sing masubo, indi subong sini ang kalabanan nga mga gobierno. Kon binagbinagon naton ang kalibutan subong nga amo ini sa naulihi nga katunga sining ika-20 ka siglo, ano ang makita naton? Kaimulon, kalautan, pagkawalay ikasarang, pamigos, sosyal nga inhustisya, krimen, kag internasyonal nga tension. Amo ini ang katapusan nga resulta sang linibo ka tuig sang tawhanon nga gobierno.

Huo, matuod nga ang iban nga indibiduwal nga gumalahom maayo kag sangkol. Kag ang iban nga sistema sang gobierno malig-on kag epektibo sa makadali. Apang ang kabang-awan sang tawhanon nga gobierno subong kabilugan sa paghimo sa kon ano ang duna nga ginabatyag naton nga dapat sini himuon para sa katawhan nagapamatuod sa kamatuoran sang ginasiling sang Biblia: “Ang dalanon sang tawo wala sa iya kaugalingon. Wala sa tawo nga nagalakat sa pagmando sang iya mga tikang.” (Jeremias 10:23) Sa iban nga hambal, wala ginhimo ang tawo sa paggahom sa iya kaugalingon nga wala sing bulig halin sa guwa.

Amo sina kon ngaa maayo nga mahibaluan nga nagabalhin ang pagginahom sa kalibutan. Ano ang aton buot silingon sini nga ekspresyon? Buot naton silingon nga ang matag-adlaw nga pagdumala sa kabuhi sang katawhan mangin sa kamot sa ulihi sang bag-o gid nga dagway sang gobierno nga mangin madinalag-on sing bug-os. Ining bug-os nga pagbalhin sa gobierno gintagna sang Dios. Sa pagkamatuod, amo gid sini ang tema sang Biblia.

Ang Kabalaka sang Dios Tuhoy sa Gobierno

Ang Dios pirme nabalaka nahanungod sa paggahom sa katawhan. Ginabantayan niya sing maayo kon tubtob diin ginatuman sang mga gobierno sang tawo ang ila responsabilidad, kag kon kaisa nagapakighusay sia sa ila. Matuod, ang mga maragtas sang pila ka tumalagsahon nga sistema sang gobierno sang nagligad nga 2,500 ka tuig sang maragtas gintagna sa Biblia. Sa tolon-an ni Daniel, nga ginsulat sing kapin sa 500 ka tuig sa wala pa matawo si Cristo, ginrekord ang mga tagna nga nagatagna sang pagkapukan sang dumaan nga Babilonia, subong man sang pagbangon kag pagkapukan sang Medo-Persia, Gresya, kag Roma. Gintagna pa gani sang mga tagna ang matabo sa Anglo-Amerikano nga Kagamhanan sa Kalibutan sa aton adlaw. Ang malip-ot nga pagbinagbinag sa pila sining mga tagna magabulig sa aton sa paghangop kon ano ang buot silingon sang pinamulong nga nagabalhin ang pagginahom sa kalibutan.

Ang una sining makatilingala nga mga tagna amo ang inspirado nga damgo diin ang politikal nga kagamhanan sa kalibutan kutob sang adlaw ni Daniel tubtob sa tion naton ginrepresentar sang isa ka daku nga larawan. Nian, ang bato nga natiphag nga wala sing kamot, nag-igo kag nagdugmok sining larawan. Ginhimo sang bato ining mga kagamhanan sa kalibutan nga yab-ok, “nangin kaangay sang labhang sang mga linasan sa tingadlaw, kag ginpalid sila sang hangin sa bagay nga wala sing makit-i kon diin nga duog.”​—⁠Daniel 2:​31-43.

Ina man nga kapitulo sang Daniel nagapaathag kon ano ang kahulugan sini. Ginapakita sini nga ang nabang-awan nga mga gobierno sang tawo buslan sang isa nga superyor sa walay katapusan. Nagasugid ini sa aton: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. Kag ang ginharian sini indi ibilin sa iban nga katawhan. Dugmukon sini kag papason ini tanan nga [tawhanon nga] ginharian kag ini magapadayon tubtob sa tion nga dinapat-od . . . Kag ang damgo matuod kag ang kasaysayan malig-on.”​—⁠Daniel 2:​44, 45.

Apang indi amo sina ang katapusan sang bagay. Sa ikaduha nga palanan-awon, ang sunodsunod nga mga kagamhanan sa kalibutan ginrepresentar sang daku nga mga sapat nga ang mga karakteristiko sang gahom ginalarawan. Gintugutan sadto anay si Daniel nga makita ang tubtob sa makahalawhaw nga langitnon nga trono sang “Dumaan sang mga Adlaw,” kag ginpakita sa iya ang pila ka butang nga mahanabo, indi sa iya adlaw kundi sa panahon sang Anglo-Amerikano nga Kagamhanan sa Kalibutan sa aton tion. Nakita niya ang halangdon nga langitnon nga Hari ni Jehova nga nagalingkod sa paggahom sa sining mga kagamhanan sa kalibutan. (Daniel 7:​2-12) Subong sang ginapakita sa masunod nga mga bersikulo, ginpapanaug ang balaan nga dekrito para sa isa ka pagbalhin sa pagginahom. Kay sin-o ihatag ini nga pagginahom?

Sa Isa nga Kaangay sa Anak sang Tawo

Si Daniel nagahatag sing makakulunyag nga sabat:

“Nakita ko sa palanan-awon sa kagab-ihon, kag, yari karon! may nag-abot upod sa mga panganod sang langit nga isa nga kaangay sa anak sang tawo; kag nag-abot sia tubtob sa Dumaan sang mga Adlaw, kag gindala niya sia malapit sa atubangan Niya. Kag ginhatagan sia sing pagginahom kag dignidad kag ginharian, agod nga ang tanan nga mga katawhan, mga pungsod kag mga hambal mag-alagad sa iya. Ang iya pagginahom dayon nga pagginahom nga indi magtaliwan, kag ang iya ginharian amo ang indi malaglag.”​—⁠Daniel 7:​13, 14.

Busa gingamit si Daniel sa pagtagna nga “ang Dumaan sang mga Adlaw,” si Jehova nga Dios mismo, magadula sang sayop nga pagginahom sang mapiguson nga tawhanon nga mga pangulohan. Buslan niya ini nga pagginahom sang isa ka gobierno nga mas maayo sang sa ginahanduraw sang katawhan​—⁠ang dikitaon nga Ginharian nga nagagahom kag nagapakita sing awtoridad gikan sa langit. Apang sin-o ining “isa nga kaangay sa anak sang tawo” nga magabaton sing Ginharian?

Wala kita ginbilin nga nagapangduhaduha. Ginpakilala mismo ni Jesus ang iya kaugalingon subong “ang Anak sang tawo.” Ginlaragway niya ang iya presensia subong ang tion nga “ang Anak sang tawo nagkari sa iya himaya, kag ang tanan nga anghel kaupod niya.” (Mateo 25:31) Sang ang Judiyong mataas nga saserdote nagpangabay nga sugiran ni Jesus ang hukmanan kon bala sia amo “ang Cristo ang Anak sang Dios,” si Jesus nagsabat: “Ginsiling mo. Apang ako nagasiling sa imo, Kutob karon makita ninyo ang Anak sang tawo nga nagalingkod sa tuo sang gahom kag magakari sa mga panganod sang langit.”a​—⁠Mateo 26:​63, 64.

Ang Katapusan nga Tawhanon nga Kagamhanan sa Kalibutan

Mga 600 ka tuig pagkatapos sang panahon ni Daniel, ginsulat ni apostol Juan ang tolon-an nga Bugna sa Biblia sa idalom sang balaan nga inspirasyon. Ginapatuhuyan sina nga tolon-an ining mga kagamhanan sa kalibutan subong gamhanan nga “mga hari,” nga nagasiling: “Kag may pito ka hari: ang lima sa ila napukan, ang isa amo karon, ang isa wala pa mag-abot, kag kon mag-abot sia kinahanglan nga magpabilin sia sing malip-ot nga tion lamang.”​—⁠Bugna 17:⁠10.

Ang lima nga napukan na sang ginsulat ini ni Juan amo ang Egipto, Asiria, Babilonia, Medo-Persia, kag Gresya. Ang Romanong Emperyo ‘amo anay’ pa sadto. Sing maathag, ang ikapito, ang Anglo-Amerikano nga Kagamhanan sa Kalibutan sa aton tion, wala pa mag-abot. Suno sa Bugna, wala sing kagamhanan sa kalibutan ang magabulos sa ikapito​—⁠ang isa nga nagaluntad karon. Amo ini ang katapusan. Wala na sing magasunod pa.

Apang, indi ina dapat isa ka makahaladlok nga hunahunaon​—⁠isa ini ka makakulunyag! Nagakahulugan ini nga ang dimakatarunganon kag nagainaway nga tawhanon nga pagginahom malapit na matapos. Ang mga tagna nahiusa sa pagsugid nahanungod sa importante katama nga pagbalhin sa kon paano gamhan ang duta​—⁠isa ka pagbalhin gikan sa makagud nga tawhanon nga gobierno pakadto sa isa ka matarong kag langitnon, ang Ginharian ang Dios.

Ang Ginharian nga Gobierno

Apang ano ina nga Ginharian? Kapin pa ini sang sa pag-impluensia sing maayo sa mga tagipusuon kag pagkabuhi sang katawhan. Kapin man ini sang sa pagkabuhi sa ginatawag nga Cristianong iglesia. Ang Ginharian sang Dios isa ka matuod nga gobierno. May hari ini, kaupod nga mga gumalahom, teritoryo, kag mga sakop. Kag magapatubas ini sing makatilingala nga mga pagpakamaayo nga ginsambit kaina.

Ginapakilala si Jesus subong ang Hari sang Ginharian. Ginpaanggid niya ang iya kaugalingon sa isa ka tawo nga dungganon nga “nagkadto sa malayong duta sa pagbaton sing harianon nga paggahom kag ugaling magabalik.” Tuhoy sinang palaabuton nga tion, nagsiling sia: “Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono.”​—⁠Lucas 19:12; Mateo 25:⁠31.

San-o magaabot ang “Anak sang tawo”? Indi na kinahanglan nga pakton naton ang sabat. Ang ginasiling ni Jesus diri bahin sang iya sabat sa pamangkot: “Ano bala ang tanda sang imo presensia kag sang katapusan sang sistema sang mga butang?” (Mateo 24:​3, 30) Subong sang masunson nga ginpakita sa mga kolumna sini nga magasin, ina nga “presensia” nagsugod sing dikitaon sa mga langit sa katapusan sang “gintalana nga mga tion sang mga pungsod” sang 1914.b​—⁠Lucas 21:⁠24.

Subong sang ginasiling sang Bugna kapitulo 12 nga mahanabo, nian ginkuha ni Jesus ang iya gahom kag gintagbong si Satanas gikan sa langit pakadto sa duta. Ang tingog sa langit nagapahayag: “Karon nag-abot ang kaluwasan kag ang gahom kag ang ginharian sang aton Dios kag ang pagbulut-an sang iya Cristo, kay ginhulog ang manunumbong sang aton mga kauturan.” Ginapaathag sini ang nagalain nga mga kahimtangan sa kalibutan kutob sadto nga tion. Busa, ang tingog sa langit nagpadayon: “Kailo sa duta kag dagat, kay ang Yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.”​—⁠Bugna 12:​9-12.

Inang malip-ot nga tion matapos sa dili madugay. Sa masunod pa nga mga pila ka kapitulo, nakita ang nahimaya nga si Jesus sa isa ka kabayo nga maputi. Gintawag sia nga “Ang Pulong sang Dios,” kag iya “lab-on ang mga pungsod” kag “gahuman niya sila sa bilugon nga salsalon”​—⁠subong sang ginpakita ni Daniel nga ang mga pungsod dugmukon sang katulad bato nga Ginharian sang Dios nga magatubo sa paghil-ob sa bug-os nga duta.​—⁠Bugna 19:​11-16; Daniel 2:​34, 35, 44, 45.

Indi na gid mapigos sang katulad sapat nga tawhanon nga mga kagamhanan sa politika ang katawhan!

Kaupod nga mga Gumalahom

Apang may dugang pa. Gin-inspirar si Daniel sa pagsiling nga ang Ginharian ihatag indi lamang sa “isa nga kaangay sa anak sang tawo” kundi subong man “sa katawhan sang mga balaan sang Labing Gamhanan.”​—⁠Daniel 7:⁠27.

Sin-o sila? Ang Bugna nagasiling nahanungod sa Kordero, si Cristo Jesus: “Gintubos mo sa Dios sang imo kaugalingon nga dugo ang mga tawo sa tagsa ka kabikahan kag hambal kag katawhan kag pungsod, kag ginhimo sila nga ginharian kag mga saserdote sa aton Dios, kag magagahom sila sa duta.” Nagasiling ini sing dugang nga “mangin saserdote sila sang Dios kag ni Cristo, kag magahari sila kaupod nila sing isa ka libo ka tuig.” Ginhatag ang ila kadamuon subong 144,000.​—⁠Bugna 5:​9, 10; 14:1; 20:⁠6.

Sila ang ginpili sang Dios nga Labing Mataas nga makigbahin sa bug-os kalibutan nga gobierno kaupod sang iya Anak nga si Jesucristo. Mangin yara bala sa mas maayo nga mga kamot ang aton palaabuton sang sa ila nga ginpili sang Dios? Indi, ini nga Ginharian mangin amo ang labing maayo nga gobierno nga posible​—⁠nga mas superyor sang sa nakilal-an na sang tawo. Sa idalom sini nga pagginahom ang bug-os nga duta buslan sang Paraiso nga gintuyo primero sang Dios.

Basaha ang masunod nga artikulo kag tan-awa kon bala amo ini ang sahi sang gobierno nga pilion mo nga puy-an.

[Mga footnote]

[Kahon sa pahina 4]

“Ang Sentro nga Tema sang Panudlo ni Jesus”

“Ang tema sang ginharian sang Dios nagaokupar sang sentro nga duog sa pagbantala ni Jesus.”​—⁠New Catholic Encyclopedia.

“[Ang Ginharian sang Dios] ginakabig sa kabilugan nga amo ang sentro nga tema sang panudlo ni Jesus.”​—⁠Encyclopædia Britannica.

Apang san-o ang katapusan nga tion nga nabatian mo inang “sentro nga tema sang panudlo ni Jesus” nga ginhambalan sa simbahan?

[Kahon sa pahina 5]

Kagumon Nahanungod sa Ginharian sang Dios

Ang iban nga tawo naghunahuna nga ang “iglesia sa duta” amo ang Ginharian sang Dios, samtang ang iban nagpati nga ang karon nga kalibutan “magalambo sa idalom sang Cristianong impluensia tubtob mangin Ginharian ini.” Ang iban pa gid nagsiling nga ang Ginharian sang Dios amo ang “paggahom sang Dios sa tagipusuon kag kabuhi sang indibiduwal.”

Apang amo lamang bala sini ang yara sa Ginharian sang Dios​—⁠isa ka relihioso nga sistema, amat-amat nga pagbalhin sa politika, ukon espirituwal nga kahimtangan sa mga tagipusuon sang tawo?