Mainuswagon sa Espirituwal sa Tion sang Pagkaubanon

“Ang mga natanom sa balay ni Jehova . . . magapabilin . . . nga nagauswag sa tion sang ila pagkaubanon.”—SALMO 92:13, 14.

1, 2. (a) Paano sa masami ginalaragway ang pagtigulang? (b) Ano ang saad sang Kasulatan tuhoy sa mga epekto sang sala nga napanubli kay Adan?

PAGTIGULANG—ano ang mapensaran mo sa sini nga tinaga? Kurinot nga panit? Mapigaw nga palamatin-an? Maluya nga mga butkon kag mga tiil? Ukon isa sa mga kahimtangan sang “malaut nga mga adlaw” nga maathag nga ginalaragway sa Manugwali 12:1-7? Kon amo, dapat naton dumdumon nga ang pagtigulang nga ginalaragway sa Manugwali kapitulo 12 indi ang orihinal nga katuyuan sang Manunuga nga si Jehova nga Dios, kundi ang epekto sang pagpakasala ni Adan sa lawas sang tawo.—Roma 5:12.

² Ang pagtigulang mismo indi pagpakamalaut, kay ang isa nagatigulang gid man samtang padayon sia nga nagakabuhi. Ang matuod, tanan nga buhi nga butang nagadaku kag nagahamtong. Madula na sa indi madugay ang mga halit sang anom ka libo ka tuig nga sala kag pagkadihimpit sang tawo nga makita naton karon, kag ang tanan nga matinumanon nga mga tawo magakabuhi suno sa orihinal nga katuyuan, nga indi na mapatay kag mag-antos bangod sa katigulangon. (Genesis 1:28; Bugna 21:4, 5) Sa sina nga tion, “wala sing pumuluyo nga magasiling: ‘Nagamasakit ako.’” (Isaias 33:24) Ang mga tigulang magabalik sa adlaw sang ila “pagkapamatan-on,” kag ang ila unod “mangin linghod pa sangsa pagkapamatan-on.” (Job 33:25) Apang, dapat pakigbatuan karon sang tanan nga tawo ang mga epekto sang napanubli nga sala kay Adan. Walay sapayan sini, ang mga alagad ni Jehova ginapakamaayo sa pinasahi nga mga paagi samtang nagatigulang sila.

 3. Sa ano nga mga paagi ang mga Cristiano ‘magapabilin nga nagauswag sa tion sang ila pagkaubanon’?

³ Ang Pulong sang Dios nagapasalig sa aton nga “ang mga natanom sa balay ni Jehova . . . magapabilin . . . nga nagauswag sa tion sang ila pagkaubanon.” (Salmo 92:13, 14) Sing malaragwayon, ang salmista nagapaathag sang sadsaran nga kamatuoran nga ang matutom nga mga alagad sang Dios padayon nga magauswag, magalambo, kag magahamungaya sa espirituwal, bisan pa nagaluya sila sa pisikal. Madamo sing halimbawa sa Biblia kag sa moderno nga panahon ang nagapamatuod sini.

“Wala Gid Nagapalya”

 4. Paano ginpamatud-an sang tigulang nga manalagna nga si Ana ang iya debosyon sa Dios, kag paano sia ginpadyaan?

⁴ Binagbinaga ang manalagna nga si Ana sang unang siglo. Sa edad nga 84 anyos, “wala gid [sia] nagapalya sa templo, nga nagahimo sang sagrado nga pag-alagad adlaw kag gab-i nga may mga pagpuasa kag pag-ampo.” Bangod ang iya amay indi Levinhon gikan sa “tribo ni Aser,” si Ana indi makaistar sa templo. Hunahunaa ang iya ginhimo nga sakripisyo sa pagkadto sa templo adlaw-adlaw agod mag-alagad halin sa aga tubtob sa hapon! Apang bangod sang iya debosyon, ginpakamaayo sing daku si Ana. Didto sia sa templo sang ginpresentar nanday Jose kag Maria ang lapsag nga si Jesus kay Jehova suno sa ginapatuman sang Kasuguan. Sang makita niya si Jesus, si Ana “nagpasalamat sa Dios kag naghambal tuhoy sa bata sa tanan nga nagahulat sang pagluwas sa Jerusalem.”—Lucas 2:22-24, 36-38; Numero 18:6, 7.

5, 6. Paano ang iban nga mga tigulang karon nagapakita sing panimuot nga kaangay sang kay Ana?

⁵ Kaangay ni Ana, madamo nga tigulang karon ang regular nga nagatambong sa mga miting, hugot nga nagaampo para sa pag-uswag sang matuod nga pagsimba, kag nagatinguha sa pagbantala sing maayong balita. Isa ka utod nga otsentahon sing edad nga regular nga nagatambong sa Cristianong mga miting upod sa iya asawa ang nagsiling: “Kinabatasan na namon nga magtambong sa mga miting. Wala na kami sing iban pa nga luyag kadtuan. Kon diin ang katawhan sang Dios, didto man namon luyag magkadto. Didto kami nakabatyag sing kalig-unan.” Daw ano gid ka makapalig-on nga halimbawa para sa tanan!—Hebreo 10:24, 25.

⁶ “Kon may mga butang nga dapat himuon para sa matuod nga pagsimba, kag masarangan ko man lang ini, nian nagapakigbahin ako.” Amo ini ang prinsipio ni Jean, isa ka balo nga Cristianong babayi nga nagapangidaron sing mga 80 anyos. “Siempre pa, may mga tion man nga nasubuan ako,” siling niya, “apang ngaa abi dalahigon ko ang iban?” Malipayon sia nga nagaistorya tuhoy sa iya pagkadto sa iban nga pungsod para sa makapalig-on sa espirituwal nga mga okasyon. Sa iya pinakaulihi nga pagbiyahe, nagsiling sia sa iya mga kaupod, “Indi ko na gusto maglagaw; gusto ko makigbahin sa ministeryo sa latagon!” Bisan pa indi sia makahibalo sang lenguahe sa amo nga duog, napukaw niya ang interes sang mga tawo sa mensahe sang Biblia. Dugang pa, sa sulod sang pila ka tuig, nakig-upod sia sa kongregasyon nga nagakinahanglan sing bulig, walay sapayan nga kinahanglan sia magtuon sing bag-o nga lenguahe kag maglakbay sing isa ka oras agod makatambong sa mga miting.

Paghupot nga Aktibo sang Hunahuna

 7. Sang tigulang na si Moises, paano niya ginpabutyag nga luyag niya nga magbakod pa gid ang iya kaangtanan sa Dios?

⁷ Samtang nagaligad ang tion, natural lamang nga makatigayon sing eksperiensia sa kabuhi, apang, indi amo sini kon tuhoy sa espirituwalidad. (Job 12:12) Gani, sa baylo nga mangin kontento na lang sa mga butang nga natun-an na sang nagligad, ang matutom nga mga alagad sang Dios nagapanikasog nga ‘madugangan ang ila tinun-an’ samtang nagalipas ang tinuig. (Hulubaton 9:9) Sang ginsugo ni Jehova si Moises, 80 anyos na sia. (Exodo 7:7) Sang panahon niya, tumalagsahon na ini nga edad, kay sia nagsulat: “Ang mga adlaw sang amon mga tuig kapituan ka tuig; kag . . . bangod sang pinasahi nga kabaskog ini kawaluan ka tuig.” (Salmo 90:10) Apang, wala gid maghunahuna si Moises nga tigulang na sia agod magtuon. Pagligad sang dinekada nga pag-alagad sa Dios, pagtigayon sing madamo nga pribilehiyo, kag pag-abaga sing mabug-at nga mga responsibilidad, si Moises nagpakiluoy kay Jehova: “Pahibalua ako, palihug, sang imo mga dalanon, agod makilala ko ikaw.” (Exodo 33:13) Luyag ni Moises nga magbakod pa gid ang iya kaangtanan kay Jehova.

 8. Paano nahuptan ni Daniel nga aktibo ang iya hunahuna sang nobentahon na sia, kag ano ang mga resulta?

⁸ Maukod gihapon nga gintun-an sang mga 90 anyos nga si manalagna Daniel ang balaan nga mga sinulatan. Ang iya nahangpan sa iya pagtuon sa “mga tulun-an”—ayhan nagalakip sang Levitico, Isaias, Jeremias, Oseas, kag Amos—nagpahulag sa iya nga mangamuyo sing hanuot kay Jehova. (Daniel 9:1, 2) Ining pangamuyo ginsabat paagi sa inspirado nga mensahe tuhoy sa pagkari sang Mesias kag tuhoy sa palaabuton sang matuod nga pagsimba.—Daniel 9:20-27.

9, 10. Ano ang ginhimo sang iban agod mahuptan nga aktibo ang ila hunahuna?

⁹ Kaangay nanday Moises kag Daniel, mahuptan naton nga aktibo ang aton hunahuna paagi sa pagsentro sang aton igtalupangod sa espirituwal nga mga butang tubtob sa masarangan naton. Madamo ang nagahimo gid sini. Si Worth, isa ka Cristianong gulang nga mga otsentahon ang pangidaron, nagapanikasog nga makabenepisyo sa suno sa tion nga espirituwal nga pagkaon nga ginaaman sang “matutom kag mainandamon nga ulipon.” (Mateo 24:45) Sia nagsiling, “Ginapakabahandi ko gid ang kamatuoran, kag nalipay ako nga makita kon paano ang kapawa sang kamatuoran padayon nga nagasanag.” (Hulubaton 4:18) Sing kaanggid, si Fred, nga kapin na sa 60 ka tuig sa bug-os tion nga ministeryo, napalig-on gid sa iya pagpakig-istorya tuhoy sa Biblia sa iya mga masigkatumuluo. “Dapat ko pirme huptan nga buhi ang Biblia sa akon hunahuna,” siling niya. “Kon mahuptan mo nga buhi ang Biblia—handurawon ini—kag kon mapasibu mo ang imo natun-an sa ‘sulundan sang makapapagros nga mga pulong,’ nian matigayon mo ang nagahiliangot nga mga impormasyon. Makita mo ang matahom nga kabug-usan sini.”—2 Timoteo 1:13.

¹⁰ Indi upang ang katigulangon sa pagtuon sing bag-o kag mabudlay nga mga ideya. Ang mga tigulang nga sesentahon, setentahon, kag bisan gani otsentahon na sing edad, nakatuon pa sa pagbasa kag pagsulat ukon sa paghambal sing bag-o nga mga lenguahe. Nahimo ini sang iban nga mga Saksi ni Jehova sa tuyo nga ipaambit ang maayong balita sa mga tawo nga may nanuhaytuhay nga nasyonalidad. (Marcos 13:10) Si Harry kag ang iya asawa manugsetenta anyos na sang nagdesisyon sila nga magbulig sa teritoryo sang mga nagahambal sing Portuges. “Ang matuod,” siling ni Harry, “ang bisan ano nga hilikuton mas nagabudlay bangod sa pagtigulang.” Apang, paagi sa panikasog kag pagbatas, nakadumala sila sing mga pagtuon sa Biblia nga ginagamit ang Portuges nga lenguahe. Sa sulod sang madamo nga tuig, nakahatag man si Harry sing mga pamulongpulong sa distrito nga kombension sa sini nga lenguahe.

11. Ngaa dapat naton binagbinagon ang mga nahimuan sang matutom nga mga tigulang?

¹¹ Sa pagkamatuod, indi tanan makasarang sa pag-atubang sa sini nga mga hangkat bangod sang ila panglawason ukon kahimtangan. Busa, ngaa binagbinagon pa naton ang nahimuan sang iban nga mga tigulang? Wala gid ini nagapahangop nga dapat amo man sini ang himuon sang tanan. Sa baylo, kaangay ini sang katuyuan ni apostol Pablo sang nagsulat sia sa mga Cristiano nga Hebreo tuhoy sa matutom nga mga gulang sa kongregasyon: “Samtang ginapanilagan ninyo ang resulta sang ila paggawi iluga ang ila pagtuo.” (Hebreo 13:7) Kon ginapamalandungan naton ang ila makugi nga halimbawa, mapalig-on kita nga ilugon ang ila mabakod nga pagtuo nga nagapahulag sa mga tigulang nga alagaron ang Dios. Si Harry nga karon 87 anyos na, nagpaathag kon ano ang nagpahulag sa iya, “Luyag ko gamiton ang akon nabilin nga mga tinuig sing maalamon kag mangin mapuslanon tubtob sa akon masarangan sa pag-alagad kay Jehova.” Si Fred, nga ginhinambitan kaina, malipayon sa iya asaynment sa Bethel. Sia nagsiling, “Dapat mo hibaluon kon paano mo maalagad sing labing maayo si Jehova kag padayon ini nga himuon.”

Matutom Walay Sapayan sang Nagabag-o nga mga Kahimtangan

12, 13. Paano ginpakita ni Barsilai ang diosnon nga debosyon bisan tigulang na sia?

¹² Mabudlay atubangon ang mga pagbag-o sa lawas bangod sang pagtigulang. Apang, mapakita gihapon ang diosnon nga debosyon walay sapayan sini nga mga pagbag-o. Si Barsilai nga Galaadnon isa ka maayo nga halimbawa sa sini. Sa edad nga 80 anyos, nagpakita sia sing talalupangdon nga pagkamaabiabihon kay David kag sa iya mga hangaway, gin-amanan sila sing pagkaon kag tululugan sang nagrebelde si Absalom. Sang nagbalik si David sa Jerusalem, gindul-ong sila ni Barsilai sa Suba Jordan. Gintanyagan ni David si Barsilai nga magpuyo sa palasyo. Ang sabat ni Barsilai? “Kawaluan ka tuig na ang akon edad karon. . . . Makapanabor pa bala ang imo alagad sang akon ginakaon kag sang akon ginainom, ukon makabati pa bala ako sa tingog sang lalaki kag babayi nga mga manug-amba? . . . Yari ang imo alagad nga si Kimham. Patabuka sia upod sa akon ginuo nga hari; kag himua sa iya ang maayo sa imo mga mata.”—2 Samuel 17:27-29; 19:31-40.

¹³ Bisan tigulang na sia, ginhimo ni Barsilai ang iya bug-os nga masarangan agod sakdagon ang hari nga gintangdo ni Jehova. Bisan pa ginbaton niya nga mapigaw na ang iya panabor kag palamatin-an, wala sia naghinakit. Sa baylo, paagi sa di-makagod nga pagrekomendar kay Kimham, ginpakita ni Barsilai kon ano gid sia nga sahi sang tawo. Kaangay ni Barsilai, madamo nga mga tigulang karon ang nagapakita sing amo man nga panimuot. Ginahimo nila ang ila bug-os nga masarangan agod sakdagon ang matuod nga pagsimba, nga nakahibalo nga “nahamuot gid ang Dios sa sini nga mga halad.” Isa gid ka pagpakamaayo nga kaupod naton ini nga mga matutom!—Hebreo 13:16.

14. Paano ang katigulangon ni David nagdugang sing kahulugan sa mga pinamulong nga ginrekord sa Salmo 37:23-25?

¹⁴ Bisan pa pila ka beses nga nagbag-o ang kahimtangan ni David sa sulod sang mga tinuig, kumbinsido gihapon sia nga nagaulikid si Jehova sa iya mainunungon nga mga alagad. Sang tigulang na gid sia, ginkomposo ni David ang ambahanon nga amo ang Salmo 37 karon. Handurawa nga si David nagakutingkuting sang iya arpa kag nagaamba: “Si Jehova nagapalig-on sang mga paglakat sang tawo, kag nagakalipay Sia sa iya dalanon. Bisan mapukan sia, indi sia mapukan sing bug-os, kay si Jehova nagabayaw sa iya sa kamot. Nangin pamatan-on ako, kag karon tigulang na, apang wala ako makakita nga ang bisan sin-o nga matarong ginpabayaan, ukon ang iya kaliwat nga nagapakilimos sing tinapay.” (Salmo 37:23-25) Nakita ni Jehova nga nagakaigo nga sambiton ang edad ni David sa sining inspirado nga salmo. Makapalig-on gid ining tinagipusuon nga mga pinamulong!

15. Paano si apostol Juan isa ka maayo nga halimbawa sang katutom walay sapayan sang iya nagbag-o nga mga kahimtangan kag katigulangon?

¹⁵ Si apostol Juan isa pa ka maayo nga halimbawa sang katutom walay sapayan sang iya nagbag-o nga mga kahimtangan kag katigulangon. Pagkatapos nakaalagad sa Dios sing halos 70 ka tuig, gintapok si Juan sa isla sang Patmos “bangod sa paghambal tuhoy sa Dios kag sa pagpanaksi tuhoy kay Jesus.” (Bugna 1:9) Apang, wala pa natapos ang iya hilikuton. Ang matuod, ang tanan nga sinulatan ni Juan sa Biblia ginsulat niya sang hingapusan nga bahin sang iya kabuhi. Samtang yara sa Patmos, ginhatagan sia sing makahalawhaw nga palanan-awon tuhoy sa Bugna, nga maukod niya nga ginsulat. (Bugna 1:1, 2) Ginapatihan nga ginhilway sia sa tion sang paggahom sang Romanong Emperador nga si Nerva. Pagkatapos sadto, sang mga 98 C.E., ayhan sang mga 90 ukon 100 anyos sia, ginsulat ni Juan ang Ebanghelyo kag ang tatlo niya ka sulat.

Indi Malipatan nga Rekord sang Pagbatas

16. Paano ang mga nasablagan sa paghambal makapakita sang ila katutom kay Jehova?

¹⁶ Mahimo maeksperiensiahan sang isa ang nanuhaytuhay nga mga kasablagan. Halimbawa, ang iban nasablagan bisan sa paghambal. Apang, indi nila malipatan ang gugma kag di-bagay nga kaayo sang Dios sa ila. Bisan pa indi na sila makahambal sing maayo, sa ila tagipusuon nagasiling sila kay Jehova: “Daw ano ang paghigugma ko sang imo kasuguan! Ginahunahuna ko ini sa bug-os nga adlaw.” (Salmo 119:97) Sa bahin ni Jehova, nahibaluan niya kon sin-o ang mga “nagahunahuna sa iya ngalan,” kag ginapabaloran niya nga tuhay gid sila sa kalabanan nga mga tawo nga wala nagatalupangod sang iya mga dalanon. (Malaquias 3:16; Salmo 10:4) Makalilipay gid nga mahibaluan nga nahamuot si Jehova sa ginapamalandungan sang aton tagipusuon!—1 Cronica 28:9; Salmo 19:14.

17. Ano ang pinasahi gid nga butang ang natigayon sang mga madugay na nga mga alagad ni Jehova?

¹⁷ Indi man mapasapayanan ang kamatuoran nga ang mga nagaalagad sing matutom kay Jehova sing mga dinekada na nakaagom sing pinasahi gid nga butang kag nga indi ini matigayon sa iban pa nga paagi—ang indi malipatan nga rekord sang pagbatas. Si Jesus nagsiling: “Paagi sa inyo pagbatas matigayon ninyo ang inyo kalag.” (Lucas 21:19) Importante ang pagbatas agod maangkon ang kabuhi nga walay katapusan. Kamo nga ‘naghimo sang kabubut-on sang Dios’ kag nangin mainunungon sa bug-os ninyo nga kabuhi makalaum nga matigayon ninyo ang “katumanan sang saad.”—Hebreo 10:36.

18. (a) Ano ang ginaapresyar ni Jehova sa mga tigulang? (b) Ano ang binagbinagon naton sa masunod nga artikulo?

¹⁸ Ginapabaloran gid ni Jehova ang imo bug-os kalag nga pag-alagad bisan ano man ang imo masarangan. Walay sapayan sang mahimo matabo sa ‘lawas’ samtang nagatigulang ang isa, ang “pagkatawo sa sulod” mahimo mabag-o adlaw-adlaw. (2 Corinto 4:16) Walay duhaduha nga ginaapresyar ni Jehova ang imo ginhimo sang nagligad, apang maathag gid nga ginaapresyar man niya ang imo ginahimo karon tungod sa iya ngalan. (Hebreo 6:10) Sa masunod nga artikulo, binagbinagon naton ang mapinadayunon kag daku nga epekto sini nga katutom.

Ano ang Imo Sabat?

• Anong maayo nga halimbawa ang ginpahamtang ni Ana para sa Cristianong mga tigulang karon?

• Ngaa ang pagtigulang indi man gid upang sa kon ano ang mahimo sang isa?

• Paano padayon nga mapakita sang mga tigulang ang diosnon nga debosyon?

• Paano ginatamod ni Jehova ang pag-alagad sang mga tigulang sa iya?

[Piktyur sa pahina 23]

Nahantop sang tigulang nga si Daniel paagi sa “mga tulun-an” ang kadugayon sang pagkatapok sang Juda

[Mga piktyur sa pahina 25]

Madamo nga mga tigulang ang huwaran sa ila regular nga pagtambong sa mga miting, kakugi sa pagbantala, kag kaukod sa pagtuon