Ang Pagtamod sang Biblia Tuhoy sa Paghidait kag Kalig-unan

Madamo nga tawo ang nagapati sa daw huyog padulong sa dugang pa nga paghiusa sa kalibutan kag sa paghidait kag kalig-unan nga mahimo dalhon sini. Nagalaum sila nga ini nga hublag magadul-ong sa isa ka mas maayo nga kalibutan. Apang ginapakita sang Biblia nga kapin pa ang nadalahig sang sa daw ginapakita sang mga kahimtangan.

ANG tema tuhoy sa paghidait kag kalig-unan labi na nga makawiwili para sa mga Cristiano bangod sang ginsulat ni apostol Pablo sa idalom sang inspirasyon sa isa ka Cristianong kongregasyon sang unang siglo. Ang iya ginsiling narekord sa Biblia sa 1 Tesalonica 5:​3: “Kon magsiling sila: ‘Paghidait kag kalig-unan!’ nian sa hinali ang kalaglagan magaabot sa ila subong sang kasakit sang pag-anak sa babayi nga nagadala; kag indi sila nga mas-a makalikaw.” Ining kasulatan nagapautwas sing importante nga mga pamangkot.

Paghidait kag Kalig-unan—Patimaan sang Ano?

Kon basahon mo ang konteksto sang ginsiling ni Pablo nga nabalikwat sa ibabaw, makita mo nga ang nagasiling sing “paghidait kag kalig-unan” indi ang nagamata nga mga Cristiano, kundi, sa baylo, mga indibiduwal nga nagakatulog sa kon ano gid ang nagakatabo. Yara sila sa makatalagam nga kahimtangan apang wala sila makahibalo bangod ginahunahuna nila nga nagaayo ang mga kahimtangan. Apang, tuhoy sa mga Cristiano, si Pablo nagsiling: “Nahanungod sa mga tion kag mga panag-on, mga kauturan, wala kamo sing kinahanglan nga sulatan sang bisan ano.” (1 Tesalonica 5:1) Huo, dapat naton mahibaluan ang orasan sang mga hitabo sang Dios. Ngaa? Bangod nagsiling si Pablo nga ang tion sang hinali nga kalaglagan, nga gintawag “adlaw ni Jehova,” magaabot “nga subong gid sang makawat sa kagab-ihon.”​—⁠1 Tesalonica 5:⁠2.

Ano ang nadalahig sa gintagna nga paghambalanay tuhoy sa paghidait kag kalig-unan? Sing maathag, dapat nga indi lamang ini paghambalanay. Ang mga tawo nagahambalanay tuhoy sa paghidait sing subong kadugay na sa pag-inaway nila. Ang ginsiling ni Pablo nagapatuhoy sa isa ka tion nga ang mga pungsod daw nakatigayon na sing paghidait kag kalig-unan sa isa ka talalupangdon nga paagi. Apang sa guwa lamang ini. Ang daw paghidait kag kalig-unan nga magadul-ong sa hinali nga kalaglagan maathag nga indi matuod nga paghidait ukon matuod nga kalig-unan.

Si Jesus naghambal man nahanungod sining hinali nga kalaglagan. Gintawag niya ini nga isa ka “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo liwat.” Pila ka gatos ka tuig sa wala pa si Jesus, si manalagna Daniel naghambal man nahanungod sini, kag ginlaragway niya ini subong “tion sang kagamo subong sang wala pa mahanabo kutob sang may pungsod tubtob sa amo nga tion.”​—⁠Mateo 24:​21; Daniel 12:⁠1.

Dakung kapipit-an man, ukon tion sang kagamo ang itawag sa sini​—⁠bisan diin sa sining duha, suno sa mga tagna, panason sini ang tanan nga tanda sang dutan-on nga sistema ni Satanas. Sa baylo nga nagakahulugan sing balaan nga kahamuot, ang gintagna nga paghambalanay tuhoy sa paghidait kag kalig-unan magadul-ong sa kabaliskaran gid!​—⁠Ipaanggid ang Zacarias 3:⁠8.

Ginpahayag ang Nagapatimaan nga mga Kahimtangan

Isa bala ka katumanan sang matagnaon nga paandam ni Pablo ang natabo kasan-o lang padulong sa daku pa nga paghiusa sang kalibutan kag ang nagresulta nga paglaum para sa paghidait kag kalig-unan? Ti, subong pirme ginapakita sining magasin, kutob sang 1914 nasaksihan naton ang katumanan sang madamo nga tagna sang Biblia nga may kaangtanan sa paggahom ni Jesus sa langitnon nga Ginharian. (Mateo, kapitulo 24, 25; 2 Timoteo 3:​1-5; Bugna 6:​1-8) Ginpakita ni Jesus nga ang adlaw ni Jehova, kon mag-abot ang hinali nga kalaglagan sa mga malauton, magaabot samtang ang mga katapo sang kaliwatan sang katawhan nga nakasaksi sang pagsugod sining tion buhi pa.​—⁠Lucas 21:​29-33.

Naghatag man si Pablo sing palatandaan nga tion. Sia nagsiling: “Samtang nagahambalanay sila tuhoy sa paghidait kag kalig-unan, sa gilayon ang kalamidad magaabot sa ila.” Ini nga pagbadbad sang The New English Bible sang ginsiling ni Pablo maathag nga nagapakita nga ang dakung kapipit-an mahanabo “samtang nagahambalanay sila.” Kaangay sang makawat sa gab-i​—⁠nga indi makita⁠—​ang kalaglagan magaabot sa tion nga wala ini ginapaabot, kon ang igtalupangod sang kalabanan nga tawo yara sa ila ginalauman nga paghidait kag kalig-unan. Hanti, bisan pa indi naton mahinakop nga ang karon nga paghidait kag kalig-unan amo ang katumanan sang ginsiling ni Pablo​—⁠ukon kon sa anong kasangkaron ang malab-utan sang paghambalanay tuhoy sa paghidait kag kalig-unan⁠—​ang kamatuoran nga ini nga paghambalanay mabatian karon sa isa ka kadakuon nga wala pa matabo sang una nagapaalisto sa mga Cristiano nga magpabilin nga nagamata.

‘Pagsumpunganay’ sang mga Kagamhanan sa Kalibutan

Sang naghambal sia tuhoy sa tion sang kagamo, naghatag man si manalagna Daniel sing nagapatimaan nga tion. Ginpakita niya nga ang tion sang kagamo mahanabo sa katapusan sang madugay nga pagsumpunganay sang duha ka bloke sang kagamhanan, ang isa gintawag nga “hari sang aminhan” kag ang isa naman, “hari sang bagatnan.” (Daniel 11:​5-43) Sugod sang matapos ang Inaway Kalibutanon II, ining mga bloke sang kagamhanan ginrepresentar sang kapitalistiko nga “hari sang bagatnan” kag sang sosyalistiko nga “hari sang aminhan.”

Gintagna ni Daniel nga ang mabaskog nga pagribalay sa ulot sining mga bloke, subong sang aton nakita sa nagligad nga 45 ka tuig, mangin isa ka ‘pagsumpunganay,’ kaangay sang duha ka wrestler nga nagatinguha sa pagpamentaha sa isa kag isa. Sining karon lang, daw nabuhinan ang pagsumpunganay. Sa amo, sang Mayo sang nagligad nga tuig, gindeklarar sang Sobyet nga ministro sa luwas nga natapos na ang Cold War. Sang Hunyo, ginpatuhuyan sang Time nga magasin ang sum­mit con­fer­ence sa ulot sang Estados Unidos kag sang Unyon Sobyet kag nagsiling: “Ang pila sang mga kasugtanan tuhoy sa pagkontrol sa mga armas kag pagtesting sa nuklear nga mga hinganiban isa kuntani ka makapakibot nga katigayunan sang nagligad nga pila ka tuig. Sa karon, bisan pa tingubon ang tanan nga kasugtanan, daw indi na ini daku nga butang.”

Kon bala ining daw pag-abyanay sang duha ka super­power temporaryo ukon permanente, ang tion lamang ang magasugid. Apang, isa ka butang ang maathag. Ang tion nga ginsambit ni Jesus malayo na ang naabtan. Kag ang mga butang nga nagakatabo sa kalibutan nagapakita nga malapit na kita sa mga hitabo nga gintagna ni apostol Pablo kag ni manalagna Daniel. Bisan pa may impluwensia ang mga iglesia sang Cristiandad sa pila ka kasangkaron sa politikal nga mga pagbag-o sining karon lang, indi indi magadul-ong sa dayon nga paghidait. Ang pamatuod amo nga magadul-ong ini sa kabaliskaran para sa mga pungsod sining kalibutan.

[Mga Laragway sa pahina 6]

Ang tion ang magasugid kon tubtob san-o magadugay ang daw pag-abyanay sang duha ka superpower

[Ginkuhaan]

Misyon sang USSR sa NU